Paghimo sa Bug-os Tion nga Pag-alagad nga Isa ka Karera

SUBONG GIN-ASOY NI MAX LARSON

SANG 1910 ang akon iloy, nga ilo na, naghalin sa Denmark kag nagsakay sa barko padulong sa Estados Unidos. Disiotso anyos lamang sia sadto, indi makahambal sing Ingles, kag wala sia sing kilala sa sadto nga pungsod.

Pag-abot niya sa Siudad sang Nueva York, nagsakay sia sa tren padulong sa South Dakota, nga 2,400 kilometro ang kalayuon. Sa ­South Dakota, nga sa diin may komunidad didto sang mga Danes, nakilala niya ang lalaki nga nangin amay ko. Nagpakasal sila sang Septiembre 20, 1911.

Sang maaga nga bahin sang 1913 si Dad nagsakay sa ginatawag nga ­covered wagon padulong sa Montana agod magpuyo sa homisted. Nagpatindog sia didto sing troso nga balay nga isa sing kuwarto. Sang matapos ini sang tig-ilinit, nagsakay ang akon iloy sa tren agod magbuylog sa iya, upod sa akon utod nga si Norma, nga pila ka bulan lamang ang edad.

Pagligad sang duha ka tuig ang ikaduha nga bata manug-abot. Subong ginalahog ko, “ginbuligan” ko si Mom sa pagtakod sang atop, kay amo sina ang iya ginahimo sa sugpon sa amon balay sang adlaw antes ako matawo. Sang masunod nga adlaw, Abril 29, 1915, sang mag-abot si Dad gikan sa uma agod manyaga, si Mom nagsiling: “Sa banta ko daw mabata na ako.” Sadto nga hapon natawo ako. Apang pagkagab-i, sang magpauli liwat si Dad, si Mom nagtindog na kag nagluto sang iya panihapon!

Pagligad sang tatlo ka tuig ang akon utod nga si Jean natawo sa amo man nga lokasyon. Sang masunod nga tuig ang amon pamilya nagsaylo sa sidlangan nga bahin sang Montana, nga sa diin nagtaba si Tatay sing uma. Sang 1921 ang akon ikaduha nga utod nga babayi, si Laverna, natawo, kag kami nga apat ka kabataan nagdaku sa kapatagan sang Montana.

Ang Pagdihon sang Akon Kabuhi

Ang akon mga ginikanan mga Luterano, kag kada Domingo kami nga anom nagasimba. Apang wala madugay ang isa ka kaingod, isa ka International Bible Student, subong amo anay ang pagtawag sa mga Saksi ni Jehova, nagsugod sa pagduaw kay Mom kag nagtuon sang Biblia upod sa iya. Pagligad sang duha ka tuig, ginbaton ni Mom ang mga kamatuoran sang Biblia nga iya ginaton-an, kag sang 1925 ginbawtismuhan sia sa pasungan sang mga kabayo. Si Dad kag kami nga kabataan wala magbaton sang iya bag-o masapwan nga pagtuo, apang nalipay kami tanan sa pag-utod sang amon pagkadto sa Simbahan sang mga Luterano. Pirme kami ginasingganan ni Mom: “Indi ninyo luyag mag-alagad kay Jehova, apang indi gid paglapasa ang iya mga sugo.” Ini nga laygay nag-amlig sa amon gikan sa gamo.

Ang amon pamilya nga may anom ka katapo nagapanguma sang 320 ektaryas nga duta nga may 14 ka kabayo kag isa ka traktura. Wala kami sing koryente ukon tubig sa sulod sang balay, kag ang tubig ginasag-ob gikan sa bubon nga 4 kilometros ang kalayuon. Bangod sang tigpalamangag sang maaga nga bahin sang katuigan 1930 kag wala makaani sing apat ka tuig, namat-od kami nga magsaylo sa Wash­ing­ton ­State. Bilang paghanda para sa pagsaylo, dapat naton isaylo ang iban sang mga gamit para sa uma kag sa balay gikan sa Montana padulong sa Wash­ing­ton. Gani ang akon asaynment amo ang mag-upod sa bagon kag tan-awon nga ang amon mga kabayo ginapakaon kag ginapainom. Pagligad sang anom ka adlaw, nag-abot kami sang ulihi sa nakatundan nga baybayon sang Wash­ing­ton.

Didto ginbuligan ko si Dad sa pagtukod kag sa pagpahikot sang isa ka dairy farm. Pagligad sang mga isa ka tuig, sa edad nga 20, nagpasimpalad ako sa akon kaugalingon, nagmaneho ako sing trak nga nagapanghakot sing mga troso sa mga bukid kag naghinguyang man ako sing anom ka bulan sa Alaska subong enhinyero sang barko. Sang 1938 ang akon utod nga babayi nga si Jean kag ako nakakita sing trabaho sa Seattle kag nagpuyo kami sa isa ka barko nga balay sa Lake Union. Sadto nga tig-ilinit, si Mom, nga nagapuyo sa duog nga 80 kilometros ang kalayuon, nagtambong sa tuigan nga kombension sang mga Saksi ni Jehova sa Seattle. Sanglit ang duog sang kombension lalakton lang halin sa amon balay nga barko, gin-agda namon sia nga magdayon sa amon. Nagsugot sia, kag nag-upod kami sa pagtambong sa kombension.

Pagpamat-od sa Akon Karera

Sang Sabado sang gab-i, si Joseph F. Ruth­er­ford, presidente sadto sang Watch Tower Bible and Tract Society, nagpamulongpulong sa tema nga “Mga Nagahigugma sa Pagkamatarong.” Ang iya pamulongpulong amo ang tuhoy sa bug-os tion nga ministeryo, ukon payunir nga pag-alagad. Sa tapos sadto si Bill Griffith, nga nagapungko sa tupad ko, nagsiling: “Max, amo na ini. Mapayunir kita!”

“Sige,” sabat ko. “Mapayunir kita.”

“Nagalahog ka bala?” pamangkot ni Bill.

“Wala,” sabat ko. “Sa tapos mapamatian yadto nga pamulongpulong, nakombinse ako nga amo ini ang husto nga butang nga himuon.”

“Apang indi ka pa gani manugbantala. Wala ka pa mabawtismuhi.”

“Matuod, apang bag-o lang nila ginpahibalo nga may bawtismo buwas. Kon amo mapabawtismo ako.”

Gani, may kalangkag, nagkadto kami sa ­Field Serv­ice De­part­ment agod magkuha sang amon aplikasyon para sa pagpayunir. Nakilala namon didto si Utod Van Am­burgh, ang sekretaryo-tresurero sang Sosiedad. Sang ginsugiran namon sia sang amon ginahimo, gindala niya kami sa isa ka bahin kag ginhambal kami kaangay sang isa ka amay. “Indi ninyo paghimua ini nga subong bala isa ka eksperimento ukon pasimpalad,” siling niya. “Ginahimo ninyo ang husto nga butang, apang magsulod kamo sa sini nga subong bala amo ini ang inyo bug-os kabuhi nga karera.” Kag ina nga laygay nakabulig gid sa akon sing daku. Gani ginsumiter namon ang amon aplikasyon, kag pagkaaga, Hunyo 5, 1938, nagpabawtismo ako.

Nahauna nga Asaynment Bilang Payunir

Pagkaaga, Lunes, ginpahibalo ko ang akon amo nga mauntat ako sa pagtrabaho agod mangin ministro. Ginhinguyang ko yadtong nahauna nga semana sa pagtuon sing maayo sang pinakabag-o nga libro sang Sosiedad, nga natig-uluhan Enemies, kag nagtambong ako sa tanan nga miting. Sang ikaduha nga semana, gintun-an ko ang masunod nga pinakabag-o nga libro, ang Riches. Kag sang ikatlo nga semana, nabaton ko ang akon asaynment bilang payunir, nga amo ang Raymond, Wash­ing­ton.

Didto, nasapwan namon ni Bill ang grupo sang 27 ka tawo nga nagahiwat sang mga miting sa balay sang isa sang mga Saksi. Ang instruksion sa amon amo nga dumalahan namon ang tanan nga miting kag buligan ang mga manugbantala kag hanason sila sa pagdumala sing mga pagtuon sa Biblia, nga isa ka bag-ong hilikuton sadtong tion.

Sa nahauna nga Miting sa Serbisyo, sang Huebes, ginpangabay ko ang com­pany serv­ant, subong amo sadto ang pagtawag sa nagadumala nga manugtatap, nga mag-upod sa akon sa masunod nga gab-i agod mag-umpisa sing pagtuon sa Biblia. Nagsiling sia nga masako sia. Gani kami lang ni Bill ang nagguwa. Sang pagbalik namon, ginpadulog kami sa isa ka ginsang-an agod paagihon anay ang parada sang Amer­ican Le­gion. Sa amon katingala, ang lider sang parada amo ang com­pany serv­ant.

Sadtong nahauna nga Domingo, ginsugdan ko ang akon nahauna nga pagtuon sa Biblia sa puluy-an upod sa isa ka tawo. Sa tapos sadto, gindumalahan ko ang akon nahauna nga Pagtinuon sang kongregasyon sa Lalantawan. Natabuan gid nga ang isyu sadto amo ang Hunyo 1, 1938, nga nagapakilala sang teokratikong administrasyon sa sulod sang mga kongregasyon. Sa 27 nga nagapakig-upod, 3 lamang ang nagbaton sang bag-o nga teokratikong kahimusan.

Isa ka Pamilya sang mga Payunir

Wala madugay sang makapayunir ako, ang akon mga utod nga babayi kag lalaki, si Norman, nagbaton man sang bug-os-tion nga ministeryo. Ginbaligya ni Norman kag sang iya asawa ang ila uma, nagbakal sila sing 3.7 metros nga trailer, kag upod sa ila tres-anyos nga bata nga babayi, si Joan, nagbantala sila. Sing natabuan, sang nagapanghikot sila sa Raymond sang 1941, ginsulatan ako ni Norman nga ang 24 nga nagpamatok sa teokratikong kahimusan nagbiya kag nagbuylog sa isa ka apostata nga grupo. Apang, ang una nga gintudluan ko sing Biblia amo ang company servant!

Ang anak nga babayi ni Norman nga si Joan kag ang iya bana, si Maurice O’Callaghan, yara na karon sa ila ika-24 nga tuig sang pagduaw sa mga kongregasyon sa hilikuton sa sirkito. Ang akon manghod, nga si Laverna, nag-eskwela sa ika-12 nga klase sang Gil­ead nga eskwelahan para sa pagkamisyonero sang 1949 kag ginpadala sa Italya. Ang maaga nga kadalag-an sang hilikuton sang pagmisyonero didto nagresulta sa pagtapok sa iya sa Switzerland, nga sa diin nagapuyo sia gihapon upod sa iya bana.

Handum Para sa Dugang Pa nga Serbisyo

Sa tapos makaalagad subong regular payunir sing duha ka bulan, gin-asayn ako subong espesyal payunir. Si War­ren Hen­schel, nga magulang ni Milton Hen­schel, nagbuylog sa amon nga duha ni Bill. Si Milton isa karon ka katapo sang Nagadumala nga Hubon sang mga Saksi ni Jehova.

Sang akon nahauna nga bulan subong espesyal payunir, ginduaw ko isa ka gab-i si Albert Hoff­man. Sia sadto ang rehiyonal, ukon nagalakbay, nga manugtatap kag nagaistar sia sa trailer upod sa iya asawa, si Zola, sa tabok sang dalan gikan sa Kingdom Hall. Sa tion sang mga tinuig sang Depression, pirme namon ginabaylo ang literatura sa pagkaon. Sadto nga adlaw nakabarter ako sing isa ka basket sang peras, gani ginduaw ko si Utod Hoffman kag ginpamangkot sia kon luyag niya sing peras. Nalipay gid sia kag ginpasulod niya ako.

Mga alas nuebe na sang ginsugiran niya ako nahanungod sa Bi­ble ­House (ginatawag karon Bethel), ang bug-os-kalibutan nga ulong-talatapan sang mga Saksi ni Jehova sa Brook­lyn, Nueva York. Sang ulihi, ang iya asawa nagsiling: “Nahibaluan bala ninyo kon ano na ang oras? Alas 4:⁠30.” Naghambalanay kami sa bug-os nga gab-i! Antes magtulog sa at­tic sang King­dom Hall, naghimo ako sing sulat nga nagapangayo sing aplikasyon para sa Beth­el, kag sa gilayon naglakat ako kag ginpadala ang akon pangabay.

Kada adlaw ginapangamuyo ko ini kay Jehova, kag pagligad sang tatlo ka bulan nalipay ako sang mabaton ko ang akon sulat sang imbitasyon sa Brook­lyn Beth­el. Bilang paghanda para sa paglakbay, ginhatag ko ang akon awto sa akon utod nga si Jean, nga espesyal payunir na man sadto. Sing anom ka adlaw kag anom ka gab-i, nagsakay ako sa bus walay sapayan sang duha ka bagyo sa Montana kag sa Dakota kag sang ulihi nag-abot ako sa Siudad sang Nueva York, sang Enero 14, 1939.

Pag-alagad sa Bethel

Ginlista ako sang alagad sang Bethel, si ­Grant ­Suiter, kag dayon ginpadala ako sa pabrika agod magreport kay Na­than ­Knorr, ang alagad sang pabrika. Ang akon nahauna nga asaynment amo ang paghigot sang mga karton sang mga libro sa Ship­ping De­part­ment. Sang ikaduha nga semana, gin-asayn ako sa ro­ta­ry nga makina sa pag-imprinta. Si Utod ­Knorr nagsiling: “Kon matun-an mo ang pagpaandar sining makina sa anom ka bulan, mahimo na ikaw mangin operetor, kay ang operetor sini karon ibutang sa bag-o nga makina.” Natun-an ko ini matuod kag nalipay gid ako sa pagpaandar sini nga makina.

Pagligad sang isa ka tuig kag tunga sa imprintahan, si Utod ­Knorr nagkadto sa imprintahan sang isa ka adlaw kag nagsiling: “Max, luyag mo bala magtrabaho sa opisina?”

“Abaw, Utod Knorr, amo ina ang katapusan nga trabaho nga pilion ko. Apang kon asaynment ko ina, himuon ko ina nga akon una nga interes.”

“Magreport ka sa akon sa opisina sa Lunes sang aga,” sabat niya.

Kutob sadto didto na ako nagatrabaho. Sang primero, nagtrabaho ako subong kabulig ni Utod ­Knorr, kag dayon sang mapatay si Utod Ruth­er­ford sang Enero 8, 1942, si Utod Knorr nangin presidente, kag gintangdo ako subong manugtatap sang pabrika. Beinte-seis anyos lamang ako sadto kag tatlo ka tuig lamang ang akon eksperiensia sa Beth­el. Gani nabatyagan ko ang mabug-at nga lulan sang salabton.

Apang, mahigugmaon nga ginbuligan ako sang hinaplas nga mga manugtatap sang nanuhaytuhay nga departamento sang pabrika. Ang ila mapainubuson kag mabuligon nga panimuot labi pa nga nagpadaku sang akon gugma kag apresasyon sa ila. Ang nagabulig gid kag nagahanas sa akon amo si Utod ­Knorr. Sa sulod sang 35 ka tuig, tubtob sang mapatay sia sang 1977, nakatigayon ako sing pribilehiyo nga magpangabudlay upod sa iya sa pagpalakat sang hilikuton sang Sosiedad sa pagbalhag kag sa pagpatindog. Talalupangdon gid ang iya ikasarang sa pagdumala, kag nabuligan niya ako sing daku sa pagtuman sang akon asaynment.

Sa Atubangan sang mga Opisyales sang Pangulohan

Sa tion sang Inaway Kalibutanon II, maiwat gid ang hilaw nga materyalies nga kinahanglanon namon sa pagpadayon sang amon hilikuton sa pagbalhag. Busa, makapila ako nagakadto kada tuig sa Wash­ing­ton, D.C., agod makig-atubang sa War Pro­duc­tion ­Boards kag sa komite sang Senado. Nag-apelar ako sa ila para sa papel kag iban pa nga mga abiyo, kag ginpakamaayo gid ni Jehova ining mga panikasog.

Sang isa ka okasyon ginhimo ko ang akon presentasyon paagi sa pagpakita sang nanuhaytuhay nga mga pahina gikan sa kilala nga mga pamantalaan nga nagapasayod sang indi kinahanglanon nga mga butang. Nagatudlo sang isa ka pahina nga pasayod para sa fur coat sa nagapanguna nga pamantalaan sang Nueva York, nagsiling ako: “Ang kadamuon sang papel nga ginagamit para sa sining pasayod sa isa ka edisyon para sa Domingo katumbas sa bug-os nga ekstra nga tonilada nga ginapangayo namon para sa bug-os nga tuig.”

“Napaathag mo sing maayo ang imo katuyuan,” sabat sang isa ka senador. Subong resulta sang pagpakamaayo ni Jehova sa sining mga paglakbay, ang amon makina sa pag-imprinta wala gid magdulog sa tion sang inaway bangod naubusan kami sing papel ukon sing iban pa nga mga abiyo. Apang, maathag nga indi namon kinahanglan sadto ang daku nga abiyo sang papel nga ginakinahanglan namon karon.

Ginpasangkad nga Pasilidad sang Pabrika

Napulog-duha ka tuig antes ako mag-abot sa Bethel, ginpatindog sang Sosiedad ang nahauna nga walo ka panalgan nga pabrika sini sa 117 ­Adams ­Street, nga nagakobre sang katunga sang isa ka bloke sa siudad. Apang sang 1949 nangin kinahanglanon nga magpatindog sing siam ka panalgan nga pabrika kag opisina sa nabilin nga katunga sadto nga bloke sa siudad. Napuno sini ang bloke sing isa ka daku nga pabrika nga may mga 15,000 metro kuwadrado nga lugar sang salog.

Sa amo sadto nga tion nga gin-asayn ako sa pagtatap sang hilikuton sa konstruksion para sa Sosiedad diri sa ulong-talatapan. Sa Brook­lyn isa lamang ang tinukod namon para sa opisina kag pabrika kag isa ka tinukod nga puluy-an. Apang karon, pagligad sang 40 ka tuig, may yara kami kapin sa 10 ka tinukod para sa pabrika kag opisina kag mga 20 ka tinukod nga puluy-an diri sa Brook­lyn lamang!

Sang maaga nga bahin sang katuigan 1950, gintinguhaan namon nga mabakal ang propiedad sa tabok lamang sang kalye sa aminhan sang amon tinukod sa 117 ­Adams ­Street, apang wala ginbaton sang tag-iya ang amon tanyag. Sa kamatuoran, indi niya luyag makighambal, kay ginahaumhaum niya nga bayaran sang Sosiedad ang mataas nga presyo. Gani ginliso namon ang amon igtalupangod sa bloke sa sidlangan sang amon pabrika sa ­Adams ­Street, sa tabok lamang sang ­Pearl ­Street. Ini nga duog ginahuman sang walo ka napain nga lote. Ang tagsa ka tag-iya dapat hambalon sing tuhay, apang ginbuksan ni Jehova ang dalan agod mabakal ang tanan nga walo ka propiedad sa isa ka tuig lamang sa promedyo nga presyo nga $97 lamang kada metro kuwadrado!

Gintukod sang Sosiedad sa sining lokasyon ang 13-panalgan nga pabrika sini sa 77 ­Sands ­Street sang 1955 kag 1956. Amo ini ang amon ikaduha nga pabrika, kag kapin pa sa doble ang kasangkaron sang salog sini nga nakalab-ot sa mga 33,000 metro kuwadrado. Apang, sanglit madasig nga nagauswag ang organisasyon, narealisar sadto nga kinahanglan namon ang dugang pa nga lugar. Gani sang 1958 ginbakal namon ang nagatindog na nga pabrika sa pamusod sang Pros­pect kag ­Pearl kag gingamit ini subong bodega.

Karon ang lamang nga duog nga nabilin nga sa diin makonektar namon ang amon iban pa nga mga tinukod paagi sa mga taytay sa ibabaw sang mga kalye amo ang isa sa aminhan nga gintinguhaan namon nga baklon sang una. Narealisar namon nga indi gihapon pagpanubuon sang tag-iya ang sobra kamahal nga presyo kon Watchtower Society ang magbakal sini. Gani ginpangabay namon ang iban nga tawo sa negosyo sang real estate nga baklon ini. Ang presyo nga ginhatag niya mas manubo sa amon gintanyag. Indi na paghambalon pa, daw malupok sa kaakig ang tag-iya sang mahibal-an niya nga ang titulo ginsaylo sang ulihi sa Watchtower Society.

Sang 1966 kag 1967, gintukod namon sa sining propiedad ang napulo ka panalgan nga pabrika nga may 21,000 metro kuwadrado nga kasangkaron sang salog. Karon may yara na kami apat ka bloke sang pabrika sa siudad​—⁠tanan nakonektar paagi sa mga taytay sa ibabaw sang mga kalye. Sang ulihi, sang 1983 kag 1986, ginbakal namon ang duha ka pabrika sa tabok sang mga kalye sa bagatnan, nga sa sini nakapatindog kami sing 49 metros nga taytay nga nagakonektar sini sa mga tinukod sa amon apat pa ka pabrika. Ining anom ka nakonektar nga pabrika may 95,000 metro kuwadrado nga kasangkaron sang salog, ukon mga 9 ektaryas. Sang 1983 ginbakal man namon ang daku nga 93,000 metro kuwadrado nga tinukod sa Furman ­Street, nga pila ka bloke ang kalayuon sa suba, nga sa diin makita karon ang amon pasilidad para sa shipping.

Pagbakal sing “Office Complex”

Ang isa pa ka makawiwili nga eksperiensia sa akon pagpakig-angot tuhoy sa pagbakal sing mga real estate amo ang ­Squibb Pharmaceuticals nga com­plex sang napulo ka konektado nga mga tinukod. Sa tapos namon mabakal ini, ang apat sini ginguba, kag ang isa ka bag-o nga tinukod gin-angot sa isa nga nagatindog na nga daan agod magporma sang 25 Columbia ­Heights, ang bug-os kalibutan nga ulong-talatapan karon sang Watch Tower Society. Nabakal ining propiedad sa sining paagi.

Sang 1969 nagapangita kami sing paagi agod mapasangkad pa ang amon pasilidad sa pagbalhag. Apang maayo ang kahimtangan sang negosyo, gani, sang gintawgan ko ang tagsa ka tag-iya sang propiedad sa sadto nga duog, wala sing isa nga interesado sa pagbaligya sang iya propiedad.

Sining tion, naglakbay ako padulong sa ­North Carolina, nga sa diin makita ang isa ka hilimuan sing papel nga nagaabiyo sang amon papel para sa Biblia. Didto nasambit ko sa isa sang mga tawo nga nagaobra didto nga nagakinahanglan kami sing propiedad sa Brooklyn. Natabuan nga ang utod sining tawo abyan gid sang isa sang mga tag-iya sang ­Squibb nga mga tinukod. Ginhimo niya ang kinahanglanon nga mga kontak kag dayon ginsingganan niya ako nga pagbalik ko sa Brook­lyn, dapat ko tawgan ining tawo.

Sang magtawag ako, naghando ang tawo nga ang ­Squibb nagaplano, sa sibu nga tion, sa pagbaligya sang mga propiedad sini sa Brooklyn kag magguwa sa siudad. Nagsiling sia nga kon handa na sila, tawgan niya ako, kag makahimo kami sing negosasyon. Pagligad sang pila ka bulan nag-abot ang tawag, kag ginsugiran ako nga handa na sila sa pagbaligya sini kag nga dapat kami magkadto sa ila opisina sa masunod nga adlaw.

Naghambalanay kami nga duha ni Utod ­Knorr kag ginpat-od namon kon pila ang ibayad namon. Sa miting sang masunod nga adlaw, ginsugiran kami nga ang presyo indi mahimo mabag-o. “Ang luyag namon tatlo ka milyon nga kuwarta,” siling nila. Nagpakunokuno kami nga wala makibot, kay kadaku gid sang kanubuon sadto sang sa iayo namon kuntani. Indi na paghambalon pa, ginhimos sa gilayon ang pagbaklanay. Sadto nga tion, bag-o lang namon mahuman ang pagpatindog sang amon kuwatro-milyones-dolyares nga bag-ong pabrika, apang sang mahibal-an sang katawhan sang Ginuo nga nagakinahanglan kami sing dugang pa nga kuwarta, ang bulig maabtik nga nag-abot.

Dugang pa nga mga Tinukod nga Puluy-an

Sang katuigan 1950, nabakal namon ang propiedad sa tabok sang kalye gikan sa 124 Columbia ­Heights kag sang 1959 kag 1960 nagpatindog kami sing isa ka daku kag bag-o nga tinukod nga puluy-an. Apang sugod sang 1965 nagbudlay ang pagpatindog sing bag-o nga mga puluy-an. Sadto nga tuig ginhimo sang pangulohan ang duog nga nahamtangan sang Beth­el nga isa ka maragtason nga land­mark. Nagresulta ini sa mga pagdumili sa pagpatindog sing mga tinukod kag sa pagkay-o. Apang, sa bulig ni Jehova natigayon namon pirme ang amon kinahanglanon.

Halimbawa, sang 1967, nag-aplikar kami para sa anom sing panalgan nga tinukod nga puluy-an sa 119 Co­lumbia ­Heights. Bangod sang kasuguan tuhoy sa land­mark, ginbuhinan na namon ang amon orihinal nga plano nga 12 ka panalgan sa 6. Apang, karon luyag sang lokal nga awtoridad nga buhinan pa sing isa pa ka panalgan.

Sang Hunyo, ginkontak ko ang presidente sang banwa sang Brooklyn, nga nagsiling nga kon mapasad namon ang pondasyon antes sang miting sa Septiembre sang ­Board of Es­ti­mate, ang nagapangibabaw nga board sang pangulohan sang siudad, tinguhaan niya nga ang amon tinukod madayon nga anom ka panalgan. Ang amon organisasyon sa pagpatindog nagtrabaho sing lakas, kag nabubo namon ang pondasyon sang Septiembre.

Gintawgan ako sang presidente sang banwa sang adlaw antes ang amon kaso pamatian sing publiko. Ginpangabay niya kami nga magkadto sa City Hall nga temprano sing duha ka oras antes magbukas ang ­Board of Es­ti­mate sa publiko nga miting sini kag makigtabo sa iya sa likod. Gani si Utod ­Knorr kag si Utod ­Suiter, ang amon sekretaryo-tresurero, kag ako nagkadto sa City Hall sing temprano pa gid pagkaaga. Samtang ginahambalan namon ang labing maayong paagi sa pagpresentar sang amon kaso sa ­Board of Esti­mate, naglutaw ang teknikalidad nga nagdalahig sa City Plan­ning Com­mis­sion. Ginklaro ini nga butang paagi sa tawag sa telepono. Sa gilayon, ang komisyoner sang siudad sa pagplano nagsiling nga makadto sia agod sia na ang magaatubang sang kahimtangan. “Sanglit ginapamatukan gid sang publiko ang inyo kaso,” siling niya, “maboluntaryo ako nga magtiglawas sa Watchtower Society sa atubangan sang ­Board.”

Nalipay gid kami sa iya tanyag. Karon, ang paagi sa atubangan sang ­Board of Esti­mate amo nga ginalawag nila ang mga kaso sa ila kalendaryo para sa adlaw, kag kon may yara mga pagpamatok nga pamatian, ang kaso ginahambalan sa hapon. Kon wala sing pagpamatok, ginadesisyonan nila dayon ang kaso. Ang aton kaso ginlawag sing temprano sadto nga aga, kag ang komisyoner sang siudad sa pagplano nagtindog kag nagsiling sa meyor: “Luyag ko maghambal para sa Watchtower Society.”

“Nahibaluan mo nga indi namon paagi nga tugutan ang paghambalanay kon ang butang ginlawag una [sa masami ang paghambalanay ginahimo sa hapon],” sabat sang meyor. “Apang, nahibaluan ko nga masako gid ikaw, Komisyoner, gani mahimo ako sing eksepsion kag ihatag ko ang imo pangabay.” Ginpresentar sang komisyoner ang amon kaso, kag ang ­Board of Esti­mate nag-aprobar sang amon pangabay. Sang nagapaguwa na kami sa hulot nga vistahan, ang abogado sang oposisyon nag-abot nga nagadalagan kag nagasinggit: “May isa ako ka oras nga argumento batok sa sini nga kaso.” Apang ulihi na sia! Naglabay lamang kami, nga ginapasalamatan si Jehova sa kadalag-an.

Masiling ko nga isa gid ka makapaladya nga pribilehiyo sa sulod sang mga tinuig nga magtiglawas sa Sosiedad sa sining mga transaksion. Kag nalipay gid ako nga masaksihan ang daku nga pag-uswag sang bug-os kalibutan nga pagbantala nga hilikuton nga bangod sini nangin kinahanglanon gid nga baklon ining tanan nga tinukod. Ang daku nga bulig sa pag-atipan sining mga pagbakal amo ang paghimo sa akon nga bise-presidente sang Watchtower Bible and Tract Society of New York, Inc., sang Enero 1, 1977.

Malipayon sa Pag-alagad sa Bethel

Sugod sang una ko nga pag-abot sa Beth­el sang 1939, ang pamilya Bethel nagdaku halin sa mga 185 tubtob sa kapin sa 2,800 ka regular nga mga katapo sang Brooklyn kag kapin sa 900 sa Watchtower Farms! Sa masami ginapamangkot ako: “Ano ang nakabulig sa imo sa pagpabilin sa Bethel sining 50 ka tuig?” Ang akon sabat amo: “Wala gid ako sing iban nga ginahunahuna kundi amo ang pag-alagad sa Beth­el.”

Subong man, ang aplikasyon para sa pag-alagad sa Beth­el nga ginsulatan ko kag ginpirmahan nagpamangkot: “Nagasugot ka bala nga magpabilin sa Bethel tubtob kuhaon ka sang Ginuo?” Wala niya ako ginkuha, gani yari pa ako diri nga nagakalipay sa pag-alagad kay Jehova. Kutob sang adlaw sang akon dedikasyon, determinado ako nga himuon ang bug-os tion nga pag-alagad nga akon karera sa bug-os nga kabuhi.

Sa tion sang akon una nga mga tuig sa Beth­el, ang kahimusan wala magtugot sa pagpangasawa, gani, kaangay sang madamo nga iban pa, nangin kontento ako sa akon pagkasoltero kag pag-alagad sa Bethel. Apang, sang magbag-o ang pagsulundan sang pamilya Bethel, nga nagatugot sang pag-asawahay, ginpakaslan ko si ­Helen Lap­shanski sang Abril 7, 1956. Nag-abot sia sa Beth­el sang 1951. Ginpakabahandi gid namon sing daku ang mabuligon nga pag-updanay nga ­gin-aman namon para sa isa kag isa.

Sang maaga nga bahin sang amon pag-asawahay, nagmasakit si Helen sing mul­ti­ple scle­rosis, kag sining karon nga tinuig ang balatian naggrabe. Apang paagi sa bulig sang walk­er kag sing de-bateriya nga karito, makahulaghulag sia sa palibot. May yara gihapon sia sing dalayawon kag malipayon nga espiritu kag nagapakigbahin sa hilikuton sa Beth­el kada adlaw, nga nagaalagad sa opisina sang Puluy-an Beth­el.

Sang bata pa kami, ang akon utod nga si Jean kag ako nangin suod gid kag nagabuligay kami sa paghimo sang mga butang. Busa, determinado gid sia pirme nga sundon ako, kag sang 1943 gin-agda sia sa Bethel. Sang 1952 sia kag si Russell Mock ginkasal, kag sila nga duha nagaalagad diri upod sa amon subong mga katapo sang pamilya Beth­el.

Nagapati ako sing malig-on nga ang Beth­el amo ang labing maayo nga duog sa duta sa wala pa ang dutan-on nga Paraiso. Wala gid ako maghinulsol nga ginhimo ko ang bug-os tion nga serbisyo nga akon bug-os kabuhi nga karera. Daw ano nga kalipay nga masaksihan kag makaambit sa daku nga pag-uswag sang dutan-on nga organisasyon ni Jehova! Determinasyon ko, upod sa bulig ni Jehova, nga padayon nga himuon ang Beth­el nga akon puluy-an kag ihugod ang akon kaugalingon sing bug-os kalag sa pagpauswag sang mga interes sang Ginharian.

[Blurb sa pahina 30]

“Nagapati ako sing malig-on nga ang Bethel amo ang labing maayo nga duog sa duta sa wala pa ang dutan-on nga Paraiso”

[Mga piktyur sa pahina 24, 25]

Ibabaw: Ang propiedad sa 360 Furman Street, ginbakal sang 1983

Ubos: Ang propiedad sa Columbia Heights nga ginbakal namon gikan sa Squibb Pharmaceuticals sang 1969

Wala: Ang daku nga nagbulig sa akon kag naghanas amo si Utod Knorr

Ubos: Sang 1986 may yara kami anom ka pabrika nga tinukod nga ginakonektar sang mga taytay sa ibabaw sang kalye

[Piktyur sa pahina 27]

Ang pabrika sang mapasangkad ini sang 1949

[Piktyur sa pahina 30]

Ang amon adlaw sang kasal