Ang Pagkabanhaw—Para kay Sin-o kag San-o?
NATABO ini sang tuig 32 C.E. sa Betania, diin si Lazaro kag ang iya duha ka utod nga babayi, sanday Marta kag Maria, nagaistar. Ang utod nga mga babayi nagpadala sing mensahe kay Jesus nga si Lazaro nagamasakit. Mahal ni Jesus si Lazaro kag ang iya mga utod, gani naglakat Sia pakadto sa Betania. Sa dalan, ginsugiran ni Jesus ang iya mga disipulo: “Ang aton abyan nga si Lazaro natologan, apang makadto ako agod nga mapukaw sia sa katologon.” Abi sang mga disipulo literal nga tulog ang buot silingon ni Jesus. Gani si Jesus maathag nga nagsiling: “Si Lazaro napatay.”—Juan 11:1-15.
Ang mga bisita nag-abot apat ka adlaw pagkatapos napatay si Lazaro. Sang nakita ni Jesus si Maria kag ang iban pa nga nagahaya, sia “naghibi,” nagapakita sang iya tudok nga gugma kag kaluoy. (Juan 11:17, 35) Ang bangkay ni Lazaro ginlubong sa isa ka lungib. Si Jesus nagsugo nga ang bato nga nagatakup sa lulubngan kuhaon. Nangamuyo sia sa iya Amay kag nian nagsinggit sia sa mabaskog nga tingog: “Lazaro, guwa ka!” Si Lazaro nagguwa. Naghatag ini sing daku gid nga kalipay sa iya mga utod!—Juan 11:38-45.
Ining hitabo nagahatag sing matuod nga paglaum sa pagkabanhaw. Apang, sa kabilugan, ang kamatayon isa ka makusog nga kaaway nga nagakuha sang aton mga hinigugma nga wala sing paglaum nga banhawon sila gilayon ni Jesus. Subong sang nahibaluan naton, madamo sining palangga nga mga tawo ang maayo kag tuman kabuot. Gani, ang pamangkot nagautwas . . .
Ngaa Kinahanglan Pa nga Mapatay ang mga Tawo?
Kon luyag naton ang isa ka sibu kag masaligan nga sabat, dapat naton tan-awon liwat ang ginsuguran sang katawhan sa katamnan sang Eden. Nagatilaw sang pagkamatinumanon ni Adan, ang Dios nagsugo sa iya didto nga indi magkaon sang bunga sang isa ka kahoy. Kon sia kag si Eva magakaon sang bunga, siling sang Dios, “mapatay [sila] nga totoo.” (Genesis 2:17) Sang ginsulay sila ni Satanas, wala nila pagtumana ang Dios kag napaslawan sila sa sinang importante nga pagtilaw. Kamatayon ang resulta.
Ngaa amo gid sina ang silot para sa daw isa ka diutay nga krimen? Indi diutay ang ginhimo nila, kundi ang krimen serioso gid—pagrebelde sang himpit nga katawhan, nanday Adan kag Eva, batok sa ila Manunuga. Indi na sila himpit, kag ginpapanaug sang Dios ang pamatbat nga kamatayon. Apang, ginhimus sang Dios nga inang makatarunganon nga pamatbat baliskaron tungod sa mga kaliwat ni Adan. Paano? Si Pablo nagsulat nga “si Cristo Jesus . . . naghatag sang iya kaugalingon subong nga gawad tungod sa tanan.”—1 Timoteo 2:5, 6; Roma 5:17.
Ano ang Kahimtangan sang Patay?
Apat ka adlaw nga napatay si Lazaro. Kon napatay ka apang tunay nga nagakabuhi sa espirituhanon nga duog sa sulod sang apat ka adlaw kag nian ginbanhaw ka, indi mo bala luyag isugid ang nahanungod sini? Apang si Lazaro wala sing ginsugid nahanungod sa pagkabuhi sa iban nga lugar. Ang Biblia nagasiling: “Ang patay wala makahibalo sing bisan ano.”—Manugwali 9:5; Salmo 146:3, 4.
Binagbinaga ang epekto sina. Minilyon ka tawo ang nagapati sa purgatoryo, bisan pa nga ang tinaga indi makita sa Biblia. Madamo pa gid ang nagapati nga may yara kalayuhon nga impierno. Apang, indi mo mahimo pagasunugon bisan ang kaaway sa kalayo sa walay katapusan. Kon ikaw indi maluyag sa paghimo sina nga kapintas, himuon bala ina sang aton mahigugmaon nga Manunuga paagi sa pagpaantos sa mga indibiduwal sa kalayuhon nga impierno? Apang dumduma, palihog, ang makapaumpaw nga pasalig sang Biblia nga ginasambit sa ibabaw—ang patay “wala makahibalo sing bisan ano.”
Suno sa Kasulatan, diutay lamang ang kadamuon sang magahari kaupod ni Cristo sa langit. Ginlaragway sila ni Jesus subong “diutay nga panong.” (Lucas 12:32) Nakita ni apostol Juan “ang Kordero [si Jesucristo] nga nagatindog sa [langitnon nga] Bukid Sion, kag kaupod niya ang isa ka gatos kag kap-atan kag apat ka libo . . . nga tinubos gikan sa duta.” (Bugna 14:1-3) Nagakahulugan ini, nian, nga ina sila mga tawo anay, napatay, kag sang ulihi ginbanhaw agod magkabuhi sa langit kaupod ni Cristo.
Subong sang mahunahuna mo, ang mga tawo ginbuligan sa paghangop sining mga kamatuoran sa Biblia—nga wala sing purgatoryo ukon nagadabadaba nga impierno kag may yara paglaum nga ang mga patay banhawon pakadto sa langit. Apang, kon ang banhawon pakadto sa langit tuman ka diutay, ano ang paglaum sang iban?
Ang Dutan-on nga Pagkabanhaw
Ginbuksan, ukon ginsugdan ni Jesucristo ang dalan sang pagkabanhaw nga magkabuhi sa langit. (Hebreo 9:24; 10:19, 20) Gani, si Juan Bautista indi makig-ambit sa langitnon nga pagkabanhaw bangod ginpatay sia antes napatay kag ginbuksan ni Jesus ang dalan pakadto sa langitnon nga kabuhi. Si Jesus nagsiling: “Wala sing naglutaw nga daku pa kay Juan Bautista; apang ang labing diutay sa ginharian sang langit daku pa sa iya.” (Mateo 11:11) Anong padya ang ginatigana sang Dios para sa sining matutom nga tawo kag para sa iban kaangay niya nga napatay?
Buksi ang imo Biblia sa Lucas 23 kag basaha ang bersikulo 39 tubtob 43. Ang isa ka malauton nga nalansang sa tupad ni Jesus nagsiling: “Jesus, dumduma ako kon magsulod ka sa imo ginharian.” Ginpasalig sia ni Jesus nga mangin yara sia sa Paraiso. Indi ina langit, kundi isa ini ka dutan-on nga paraiso, subong anay sang una nga Paraiso.
Ang Pagkabanhaw—Tuburan sang Paumpaw
Inang importante nga paglaum sa Biblia makapaumpaw gid, kag may rason kita sa pagpaabot. Ngaa? Bangod si Jehova gugma. (1 Juan 4:8) Sang gintugutan niya ang iya Anak nga mapatay sa makahuluya nga kamatayon, ang Dios nagapadayag gid sang iya tumalagsahon nga kinaiya sang gugma. Wala dugay antes, si Jesus nagsiling: “Ginhigugma gid sang Dios ang kalibutan [katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”—Juan 3:16.
Ginpakita man ni Jesus ang tumalagsahon nga gugma sang ginhatag niya ang iya kabuhi subong gawad para sa tumuluo nga katawhan. Sia mismo nagsiling: “Ang Anak sang tawo wala magkari nga alagdon, kundi sa pag-alagad kag sa paghatag sang iya kabuhi nga gawad sang madamo.”—Mateo 20:28.
Si Carolann, nga ginsambit kaina sa nahaunang artikulo nga namatyan sing madamong hinigugma sa isa ka grabe nga aksidente, nagpalamuypoy pagkatapos. Apang napaumpawan sia sa paghibalo nga yadtong mga hinigugma wala nagaantos. Ano ang dugang nga nagbulig sa iya? Ang gugma kag matuod nga pagpabutyag sing kasubo nga ginpakita sang iya espirituwal nga mga kauturan, mga Saksi ni Jehova, nakabulig gid sing daku.—Salmo 34:18.
Nakabulig man sing daku ang pagpangamuyo kay Jehova. Madamong kagab-ihon nga nagabugtaw sia kag nagahunahuna nga ang tanan isa lamang ka malain nga damgo, apang nian nabatyagan niya ang kamatuoran. Ang pag-ampo kay Jehova nagpakalma sa iya, kag labi pa gid nga gin-apresyar niya ang ginsulat ni Pablo: “Dili kamo maghimud-os sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga paghangop magatipig sang inyo mga tagipusuon kag inyo mga painoino sa kay Cristo Jesus.”—Filipos 4:6, 7.
Si Shirley nagahatag sang isa pa ka halimbawa sa kon daw ano ka makapaumpaw ang paglaum nga pagkabanhaw. Ang iya hoben nga anak nga si Riccardo napatay sing hinali sang natup-an sia sa dughan sang mabug-at nga konkreto, nga nagdunot sang iya diutay nga tagipusuon. Pagkaligad sining trahedya, sang Enero 1986, ginsilingan ni Shirley ang iya mga abyan: “Daw subong ini sang malain nga damgo.” Sa Iglesia Katolika nabatian niya ining mga pulong: “Hukman sang Dios ang buhi kag ang patay.” Si Shirley nagsugod sa paghunahuna, ‘Kon hukman sang Dios ang buhi kag ang patay, nian paano mahibaluan sang isa kon sa diin nagakadto ang mga tawo pagkapatay? Kag kon didto sila sa langit, ngaa banhawon sila sa ulihi agod hukman? Dugang pa, paano sila banhawon kon nagakabuhi na sila sa langit?’ Ang Biblia wala nagasambit sang pagbanhaw sa buhi kundi sa patay lamang.
Ginpamangkot ni Shirley ang iya bana nahanungod sini nga problema, bangod ang iya bana madamo sing nahibaluan sa Biblia. Sang nahangpan niya ang iban sa ginasiling sang Kasulatan nahanungod sini, si Shirley wala na magbalik sa simbahan. Ang isa ka himata nga Saksi ni Jehova nagsugod sa pagtuon sang Biblia upod kay Shirley kag sa iya bana sang Marso 1986, kag wala magdugay, ginbawtismuhan sila. Sia karon nagahinakop: “Makalilipay gid mahibaluan ang kamatuoran, mahibaluan ang nahanungod sa pagkabanhaw, kag mahibaluan kon daw ano ka makatilingala nga persona si Jehova.”
Ang Pagkabanhaw—San-o?
Sa palanan-awon, nakita ni apostol Juan ang “dakung kadam-an, nga walay tawo nga makaisip, gikan sa tagsa ka pungsod, gikan sa tanan nga pungsod kag kabikahan kag katawhan kag hambal, nga nagatindog sa atubangan sang trono kag sang Kordero.” (Bugna 7:9) Nga ang dakung kadam-an ‘nagatindog sa atubangan sang trono sang Dios’ nagahisanto sa katunayan nga magakabuhi sila sa duta. (Isaias 66:1) Kon ang iban sa ila mapatay karon, san-o sila banhawon? Ang Biblia wala nagahatag sang petsa, apang mahanabo ini pagkatapos sang nagahinampot nga inaway diin dulaon sang Dios sa duta ang tanan nga indi luyag magkabuhi suno sa iya matarong nga mga talaksan. (2 Tesalonica 1:6-9) Magabukas ina sang dalan para sa Adlaw sang Paghukom kag sa pagbanhaw sa tanan nga ginatamod sang Dios nga nalinya sa dutan-on nga pagkabanhaw. (Juan 5:28, 29; Binuhatan 24:15) Ang katumanan sang tagna sa Biblia nagapamatuod nga ining makalilipay kag matahom nga mga hitabo mahanabo sa dili madugay!—Bugna 16:14-16.
Ang mga disipulo ni Jesus namangkot anay: “Ano bala ang tanda sang imo presensia kag sang katapusan sang sistema sang mga butang?” Bilang sabat ginsambit ni Jesus ang mga inaway, kakulang sang pagkaon, mga linog, mga kamatay, kag bug-os duta nga pagbantala sang maayong balita sang Ginharian.—Mateo 24:3-14; Lucas 21:7-11.
Ining tumalagsahon nga tagna natuman kutob sang 1914, sang ang Inaway Kalibutanon I nagsugod. Nagpatay ini sang minilyon kag nagresulta sa tiggulutom kag kakulang sing kalan-on sa madamong pungsod. Ang kahimtangan sa bug-os nga kalibutan sa tion kag sa tapos sang Inaway Kalibutanon II mas malain pa gid.
Nahanungod sa kamatay, madamo ang nagabatyag nga ang labing malain nga halimbawa amo ang AIDS. “Ang epidemya tuman gid ka lapnag kag tuman ka makamamatay sa bagay nga ginpaanggid ini sang mga eksperto sa Itom nga Kamatayon nga nagpatay sa un kuwarto sang populasyon sang Europa sang ikanapulog-apat ka siglo.”—Reader’s Digest, Hunyo 1987.
Bangod sinang mga kahadlok karon, daw ano gid ka makalilipay nga hitabo ang pagkabanhaw! Mangin tion sang daku nga kalipay nga ang mga pamilya nga ginguba sang kamatayon, subong sang kanday Carolann kag Shirley, mahiusa liwat! Sing maathag, ang maalamon nga dalanon para sa aton tanan amo ang pagpahisuno sang aton kabuhi karon sa kabubut-on sang Dios kag busa makalipikar nga mangin presente kon ang pagkabanhaw mahanabo.
[Piktyur sa pahina 7]
Ang Biblia nagasiling nga subong nga ang kahoy mahimo pudlon kag magapanalingsing liwat, sarang mabanhaw sang Dios ang patay nga yara sa iya handumanan.—Job 14:7-9, 14, 15