Pagbuyagyag sa “Tawo sang Pagkamalinapason”

“Guwa kamo sa iya, katawhan ko, kon indi ninyo luyag makaambit sa iya mga sala, kag . . . makapakigbahin sa iya mga kalalat-an.”​—⁠BUGNA 18:⁠4.

1, 2. (a) Paano makilala ang tawo sang pagkamalinapason? (b) Ano ang pagtamod sang Dios sa mga nagapangangkon nga nagaalagad sa iya apang nakasala sa dugo? (Mateo 7:​21-23)

GINTAGNA sang Pulong sang Dios ang pag-abot sang “tawo sang pagkamalinapason.” Ginatagna man sini nga ining malinapason nga elemento ‘pagapatyon kag pagalaglagon’ sang langitnon nga manuglaglag sang Dios, si Cristo Jesus. (2 Tesalonica 2:​3-8) Subong ginpakita sang nagligad nga mga artikulo, ina nga tawo sang pagkamalinapason amo ang klero sang Cristiandad. Sang madugay na, ginbiyaan nila ang mga kamatuoran sang Pulong sang Dios kag ginbaton ang pagano nga mga panudlo, subong sang Trinidad, kalayuhon nga impierno, kag pagkadimamalatyon sang kalag. Dugang pa, naghimo sila sing mga hilikuton nga batok sa kasuguan sang Dios. Kaangay sadtong mga tawo nga batok sa ila ginpaandaman ni Pablo si Tito, “nagatu-ad sila sing dayag nga nagakilala sila sa Dios, apang ginapanghiwala nila sia paagi sa ila mga buhat, bangod kalangil-aran sila kag dimasinulundon kag wala nahamut-an sa bisan ano nga maayong buhat.”​—⁠Tito 1:⁠16.

² Si Jesus nagsiling: “Andam kamo sa dimatuod nga mga manalagna, nga nagaabot sa inyo nga nagapanapot sang panapton sang karnero, apang sa sulod manunukob nga mga lobo. Sa ila mga bunga makilala ninyo sila.” Ang dimatuod nga mga manalagna magapatubas sing “malain nga bunga.” (Mateo 7:​15-17) Ang isa ka pamatuod sang malain nga bunga sang klero amo ang ila daku nga sala sa dugo. Sa sulod sang mga siglo ginsakdag nila ang mga krusada, mga inkisisyon, kag mga inaway nga nagpatulo sang dugo sang minilyon. Ginpangamuyuan nila kag ginbendisyonan ang duha ka bahin sa mga inaway nga sa diin ang mga katapo sang ila kaugalingon nga mga relihion nagpatyanay. Sa kabaliskaran, si apostol Pablo nagsiling: “Matinlo ako sa dugo sang tanan nga tawo.” (Binuhatan 20:26) Ang klero indi. Ang Dios nagasiling sa ila: “Bisan kon maghimo kamo sing madamo nga pangamuyo, indi ako magpamati; ang inyo mga kamot puno sang dugo.”​—⁠Isaias 1:⁠15.

3. Anong mga hitabo nga importante sa bug-os nga globo ang madasig nga nagahilapit?

³ Ang tion sang Dios sa paghukom batok sa tawo sang pagkamalinapason madasig nga nagahilapit. Sa dili madugay, subong gintagna ni Jesus, “magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Ina nga wala sing tupong nga tion sang kagamo magasugod sa paglaglag sa Babilonia nga Daku, ang bug-os kalibutan nga emperyo sang dimatuod nga relihion, nga nagalakip sa mga relihion sang Cristiandad. Ang politikal nga mga elemento ‘magahapay kag magapahubo sa iya, kag magakaon sang iya unod kag magasunog sa iya sa kalayo.’ (Bugna 17:16) Ang dakung kapipit-an matapos sa pagkalaglag sang nabilin nga bahin sang kalibutan ni Satanas sa Armagedon, “ang inaway sang dakung adlaw sang Dios ­nga Labing Gamhanan.”​—⁠Bugna 16:​14, 16; 19:​11-21.

Obligado sa Paghigugma sa Iban

4. Ano ang dapat dumdumon sang mga nagasimba sa Dios sa “espiritu kag kamatuoran”?

⁴ Sanglit ining mga hitabo nga magatay-og sang kalibutan magaabot sa dili madugay sa napuy-an nga duta, ano ang mga obligasyon sang mga ‘nagasimba sa Amay sa espiritu kag kamatuoran’? (Juan 4:23) Nahauna, dapat nila dumdumon ang ginsiling ni Jesus: “Kon ginatuman ninyo ang akon mga sugo, magapabilin kamo sa akon gugma, subong nga ginatuman ko ang mga sugo sang akon Amay kag nagapabilin sa iya gugma. . . . Ini amo ang akon sugo, nga maghigugmaanay kamo subong nga ako nagahigugma sa inyo. Wala sing tawo nga may gugma nga daku pa sini, nga ihatag sang isa ka tawo ang iya kalag para sa iya mga abyan. Mga abyan ko kamo kon ginatuman ninyo ang akon mga sugo.”​—⁠Juan 15:​10-14; 1 Juan 5:⁠3.

5, 6. (a) Ano ang ginsugo ni Jesus nga himuon sang iya mga disipulo nga magapakilala sa ila? (b) Sa anong kahulugan nga ini isa ka bag-ong sugo?

⁵ Sa amo, obligado ang matuod nga mga Cristiano nga higugmaon ang iban nga tawo, labi na ang ila Cristianong kauturan nga mga lalaki kag mga babayi sa tanan nga pungsod. (Binuhatan 10:​34; Galacia 6:​10; 1 Juan 4:​20, 21) Sa pagkamatuod, ang mga masigka-Cristiano dapat may “mainit nga gugma sa isa kag isa.” (1 Pedro 4:8) Ina nga sahi sang gugma sa bug-os globo nga kasangkaron nagapakilala sa ila subong matuod nga mga sumilimba, kay si Jesus nagsiling: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. Paagi sa sini ang tanan makahibalo nga kamo mga disipulo ko, kon maghigugmaanay kamo.”​—⁠Juan 13:​34, 35.

⁶ Ano ang bag-o nahanungod sa sina nga sugo? Indi bala ang mga Judiyo sa idalom sang Mosaikong Kasuguan ginhatagan sing sugo nga, “Higugmaa ang imo isigkatawo subong sang imo kaugalingon”? (Levitico 19:18) Huo, apang may dugang nga ginpakita si Jesus sang magsiling sia, “Subong nga ako naghigugma sa inyo.” Ang iya gugma naglakip sang iya paghatag sang iya kabuhi para sa iban, kag dapat mangin handa ang iya mga disipulo sa paghimo sing amo man. (Juan 15:13) Isa yadto ka mataas nga sahi sang gugma, kay ina nga halad wala ginpatuman sang Mosaiko nga Kasuguan.

7. Ano nga relihion ang nagtuman sa kasuguan sang gugma sa sining siglo?

⁷ Sa aton siglo, ano nga relihion ang nakatuman sining kasuguan sang gugma? Sa pagkamatuod indi ang mga relihion sang Cristiandad, kay nagpatyanay sila sing tignapulo ka milyon sa duha ka kalibutanon nga inaway kag sa iban pa nga mga inaway. Ang mga Saksi ni Jehova amo ang nakatuman sang kasuguan sang gugma sa bug-os nga duta. Nagpabilin gid sila nga wala sing nadampigan sa mga inaway sang mga pungsod, kay si Jesus nagsiling nga ang iya mga sumulunod dapat nga mangin “indi bahin sang kalibutan.” (Juan 17:16) Sa amo, makasiling sila, subong ni Pablo, nga sila “matinlo sa dugo sang tanan nga mga tawo.” Subong isa ka halimbawa, talupangda ang nagabukas nga bahin sang isa ka resolusyon nga ginbaton sang mga alagad ni Jehova sa kombension sa Wash­ing­ton, D.C., sang Nobiembre 27, 1921:

“Subong mga Cristiano nga hanuot nga nagapanikasog sa pagsunod sa mga panudlo ni Cristo Jesus nga amon Ginuo kag sang iya mga Apostoles, kami nagapati: nga ang inaway isa ka relikya sang barbarismo, nagalaglag sang maayong mga moral kag kahuy-anan sa Cristianong katawhan; nga ang mga prinsipio nga gintudlo ni Ginuong Jesucristo nagadumili sa nakadedikar nga mga Cristiano sa pagpakigbahin sa inaway, sa pagpatulo sing dugo ukon sa bisan ano nga porma sang kasingki.”

8. Ano ang ginasiling sang maragtason nga rekord nahanungod sa mga Saksi ni Jehova sa tion sang Inaway Kalibutanon II?

⁸ Paano gin-aplikar ina nga pagtamod sa tion sang Inaway Kalibutanon II? Sa sadtong pinakagrabe nga inaway sa bug-os nga maragtas sang tawo, mga 50 milyones ka tawo ang ginpatay. Apang wala sing isa nga ginpatay sang isa sa mga Saksi ni Jehova! Halimbawa, halos tanan sang Aleman nga klero aktibo ukon indi aktibo nga nagsakdag sang Nazismo. Sa kabaliskaran, ang mga Saksi ni Jehova sa idalom sang paggahom sang Nazi nagpabilin nga wala gid sing nadampigan kag nagdumili sa pagdayaw kay Hitler ukon mangin bahin sang iya militar. Busa, wala sila makapatay sang bisan sin-o sa ila espirituwal nga kauturan sa iban nga mga pungsod, ukon kay bisan sin-o. Kag ang mga Saksi ni Jehova sa tanan nga iban pa nga pungsod nagpabilin man nga wala sing nadampigan.

9. Ano ang natabo sa mga Saksi ni Jehova sa Alemanya kag sa Austria sa idalom sang paggahom sang Nazi?

⁹ Madamo sang mga Saksi ni Jehova ang naghalad sang ila kalag para sa ila mga abyan sa pagtuman sang kasuguan sang gugma. Ang pagrepaso sa libro nga Kirchenkampf in Deutschland (Pagpakig-away sang mga Iglesia sa Alemanya), ni Friedrich Zipfel, nagasiling tuhoy sa mga Saksi: “Nobentay siete porsiento sang mga katapo sining diutay nga relihioso nga grupo ang nabiktima sang paghingabot sang National So­cial­istic [Nazi]. Ikatlo nga bahin nila ang napatay, paagi sa pagpatay, iban pa masingki nga mga buhat, gutom, balatian ukon pagpangabudlay subong ulipon. Ang pagkapintas sining pagkabilanggo wala sing tupong kag resulta sang indi magkompromiso nga pagtuo nga wala nagahisanto sa ideolohiya sang National Socialistic.” Sa Austria, 25 porsiento sang mga Saksi ni Jehova ang ginpatay, ginsakit tubtob sa kamatayon, ukon napatay bangod sa balatian ukon pagluya sa mga kampo sang Nazi.

10. Ano ang pagsalig sang mga napatay bangod sa pagtuman sa kasuguan sang gugma?

¹⁰ Yadtong mga napatay subong martir bangod sa pagtuman sa kasuguan sang gugma nagasalig nga “ang Dios indi dimatarong nga malimot sang [ila] binuhatan kag sang gugma nga ginpakita [nila] tungod sa iya ngalan.” (Hebreo 6:10) Nahibaluan nila nga “ang kalibutan nagataliwan kag ang kailigbon sini, apang ang nagahimo sang kabubut-on sang Dios nagapabilin sing dayon.” (1 Juan 2:17) May pat-od sila nga paglaum nga banhawon kag maagom ang dayon nga kabuhi.​—⁠Juan 5:​28, 29; Binuhatan 24:⁠15.

11. Sa anong paagi tumalagsahon ang mga alagad ni Jehova, kag ano nga tagna ang nagakatuman sa ila?

¹¹ Ang mga alagad ni Jehova tumalagsahon gid sa pagtuman sa talaksan nga ginhambal ni Pedro kag sang iban nga mga apostoles sa mataas nga korte: “Dapat namon tumanon ang Dios subong manuggahom sa baylo sang mga tawo.” (Binuhatan 5:29) Bangod ginahimo ini sang mga Saksi ni Jehova, ginasakdag sila sang “balaan nga espiritu, nga ginhatag sang Dios sa mga nagatuman sa iya subong manuggahom.” (Binuhatan 5:32) Amo ina ang gahom nga nagabulig sa ila sa pagtuman sang tagna sa Isaias 2:​2-4. Gintagna sini nga sa aton tion ang matuod nga pagsimba tukuron liwat kag ang mga tawo gikan sa tanan nga pungsod kag mga relihion magapanong sa sini. Ang isa ka resulta mangin amo: “Ang ila mga espada salsalon nila nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.” Bangod ang mga alagad ni Jehova nagahanda para sa kabuhi sa mahidaiton nga bag-ong kalibutan, indi na sila magtuon sa pagpakig-away. Ginatun-an nila ang kasuguan sang gugma.​—⁠Juan 13:​34, 35.

12. Ano ang dapat himuon sang mga nagatuman sang kasuguan sang gugma para sa iban?

¹² Sanglit ang Cristianong gugma nagalakip sang ‘paghigugma sa imo isigkatawo subong sang imo kaugalingon,’ ang mga alagad sang Dios indi mahimo nga mangin makagod nahanungod sa ila nahibaluan. (Mateo 22:39) Madamo pa ang luyag mag-alagad sa Dios kag magpuyo sa iya bag-ong kalibutan. Samtang may tion pa, ini man sila dapat magtuon sang kasuguan sang gugma kag sang madamo pa nga kamatuoran nga may kaangtanan sa Bug-os Uniberso nga Soberano, si Jehova nga Dios. Dapat sila tudluan nga si Jehova lamang ang takus sang aton pagsimba kag kon paano himuon ina nga pagsimba. (Mateo 4:​10; Bugna 4:11) Ang mga nakatuon na sining mga butang obligado sa pagsugid sa iban nahanungod sa sini agod nga sila man kahamut-an ni Jehova.​—⁠Ezequiel 33:​7-9, 14-16.

Pagbuyagyag sa Tawo sang Pagkamalinapason

13. Subong bahin sang aton bug-os kalibutan nga pagpanaksi, ano ang dapat naton ipahibalo, kag ngaa?

¹³ Si Jesus nagsiling nga “ibantala ang maayong balita sang ginharian sa bug-os nga napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Subong bahin sining bug-os kalibutan nga panaksi, ang mga alagad sang Dios obligado nga ipahibalo ang iya paghukom batok sa dimatuod nga relihion, labi na ang klero sang Cristiandad. Ini sila labi ka salawayon sa panulok sang Dios bangod nagapangangkon sila nga Cristiano. Dapat sila ibuyagyag agod nga ang luyag mag-alagad sa Dios mahilway gikan sa ila impluwensia kag makahimo sing nagakaigo nga mga tikang para sa kaluwasan. Subong ginsiling ni Jesus: “Ang kamatuoran magahilway sa inyo.”​—⁠Juan 8:⁠32.

14. Anong maathag nga mensahe ang dapat iwali tuhoy sa dimatuod nga relihion?

¹⁴ Sa amo, dapat ipahibalo sang mga Saksi ni Jehova ining inspirado nga mensahe tuhoy sa dimatuod nga relihion: “Guwa kamo sa iya, katawhan ko, kon indi ninyo luyag makaambit sa iya mga sala, kag kon indi ninyo luyag makapakigbahin sa iya mga kalalat-an. Kay ang iya mga sala nagtangkas na tubtob sa langit, kag ang Dios nagdumdom sang iya mga inhustisya. . . . Sa isa ka adlaw magaabot ang iya mga kalalat-an, kamatay kag kalisod kag tiggulutom, kag sunugon sia sa kalayo, bangod si Jehova nga Dios, nga nagahukom sa iya, gamhanan.”​—⁠Bugna 18:​4-8.

15. Ano ang bahin sang tuig 1914 sa orasan ni Jehova, kag ano ang nagresulta sa tapos sang Inaway Kalibutanon I?

¹⁵ Ginapakita sang mga tagna sang Biblia nga “ang katapusan nga mga adlaw” sining sistema sang mga butang nagsugod sang importante nga tuig sang 1914. (2 Timoteo 3:​1-5, 13; Mateo 24:​3-13) Sugod sadto nga tuig, nagakabuhi na kita sa “tion sang katapusan.” (Daniel 12:4) Pagkatapos gid sang Inaway Kalibutanon I, nahisanto sa orasan ni Jehova, ang iya mga alagad mapagsik nga nagsugod sa pagpasangkad sang ila pagbantala sang Ginharian sang Dios nga gintagna sa Mateo 24:⁠14. Ginbuyagyag man nila ang dimatuod nga relihion sing kapin kabaskog, labi na ang malinapason nga klero nga klase sang apostata nga Cristiandad.

16. Paano ang pagbuyagyag sa tawo sang pagkamalinapason nagbaskog pa sa kapin sa 70 ka tuig?

¹⁶ Sa sulod sang 70 ka tuig na karon, upod ang labi pa kabaskog nga puwersa, ginpaalisto sang mga alagad sang Dios ang katawhan sa malimbungon nga pagpanghikot sang tawo sang pagkamalinapason. Pila ka libo lamang nga mga Saksi ang nagahimo sini sa tapos sang Inaway Kalibutanon I. Apang sila nangin isa ka “gamhanan nga pungsod” sang kapin sa tatlo ka milyon kag tunga ka aktibo nga mga ministro nga naorganisar sa kapin sa 60,000 ka kongregasyon sa bug-os nga duta. (Isaias 60:22) Sa nagasangkad nga kasangkaron, makugi nga ginawali sang mga alagad sang Dios ang Ginharian sang Dios subong ang lamang nga paglaum sang katawhan kag, sa amo man nga tion, ginabuyagyag nila kon ano ang klero​—⁠isa ka malimbungon nga tawo sang pagkamalinapason.

Ngaa Mabaskog Gid?

17. Ngaa mabaskog nga ginabuyagyag sang mga alagad sang Dios ang tawo sang pagkamalinapason?

¹⁷ Ngaa mabaskog nga ginabuyagyag sang mga alagad ni Jehova ang tawo sang pagkamalinapason sining tanan nga tinuig? Bangod ang minilyon sang dakung kadam-an sang mga karnero ni Jehova nga yara na sa dalanon padulong sa kaluwasan dapat amligan gikan sa kalibutan ni Satanas kag sa dimatuod nga relihion sini. (Juan 10:​16; Bugna 7:​9-14) Dugang pa, kon indi pag-ibuyagyag ang klero, ang bunayag sing tagipusuon nga mga tawo nga indi pa bahin sang panong sang Dios indi makahibalo kon paano likawan ang sayop nga dalanon. Gani dapat sila pahibaluon, subong nga ginpahibalo ni Jesus ang katawhan sang magsiling sia tuhoy sa salimpapaw nga relihiosong mga lider sang adlaw niya: “Bulag sila nga mga manugtuytoy. Kon ang bulag magtuytoy sa bulag, sila nga duha mahulog sa buho.”​—⁠Mateo 15:​14; tan-awa man ang 2 Corinto 4:​4; 11:​13-15.

18. Ano ang dapat mahibaluan sang mga nagapangita sang kamatuoran?

¹⁸ Ang klero bahin sang kalibutan ni Satanas. (Juan 8:44) Apang isa ini ka kalibutan nga laglagon sang Dios sa dili madugay. (2 Pedro 3:​11-13; 1 Juan 2:​15-17) Gani ang Pulong sang Dios nagapaandam: “Busa, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Santiago 4:4) Wala ginasapak sang klero ina nga paandam kag nagapahilabot gihapon sila sa politika. Ginasugiran nila ang ila mga sumulunod nga ang maayo pa nga kalibutan magaabot paagi sa panikasog sang mga politiko. Apang isa ina ka sayop nga paglaum, kay ining kalibutan ni Satanas malapit na malaglag. Gani ang mga tawo nga nagalaum sa sining kalibutan ginalimbungan. Dapat sila sugiran sang kamatuoran nahanungod sa kon diin nagapadulong ang kalibutan kag kon ano ang magabulos sa sini.​—⁠Hulubaton 14:​12; 19:​21; Mateo 6:​9, 10; Bugna 21:​4, 5.

19. Paano ginbuyagyag ang pagkakalibutanon sang pila ka klero sa media kasan-o lang?

¹⁹ Ang pagkakalibutanon sang pila ka klero ginbuyagyag sa media kasan-o lang, subong halimbawa sang malaw-ay kag luhuso nga pagkabuhi sang pila ka klerigo sa TV. Ang isa ka moderno nga manunulat sing ambahanon nagkomposo sing ambahanon nga natig-uluhan sing: “Magasuksok Bala si Jesus sing [$10,000] Rolex [relo] sa Iya Programa sa Telebisyon?” Ang ambahanon nagasiling: “Si Jesus bala mangin politiko kon magbalik Sia sa duta, mapatindog sang Iya ikaduha nga balay sa [luhuso nga] Palm Springs kag ilikom ang Iya bili?” Dugang pa, kapin kag kapin pa nga mga klerigo ang nagapabaya ukon nagabuhat sing homoseksuwalidad. Bisan sa karon ang Iglesia Katolika sa Estados Unidos nagabayad sing minilyon ka dolyar sa halit nga nahimo sang mga pari nga nakasala sing seksuwal nga pag-abuso sa kabataan.​—⁠Roma 1:​24-27; 1 Corinto 6:​9, 10.

20. Ngaa magpadayon ang mga alagad sang Dios sa pagbuyagyag sa tawo sang pagkamalinapason?

²⁰ Indi mahimo nga pabay-an lamang sang mga alagad sang Dios ina nga kalautan kundi dapat ini ibuyagyag para sa kaayuhan sang iban. Ang dakung kadam-an sang iban nga mga karnero dapat amligan gikan sa ila nga magatinguha sa paghaylo sa ila sa paglapas sa kasuguan sang Dios. Kag dapat pangitaon ang mga “nagapanghayhay kag nagabakho sa tanan nga kalangil-aran nga ginahimo” kag tipunon sa nagaamlig nga pagtuytoy sang Dakung Manugbantay, si Jehova nga Dios, kag sang “maayong manugbantay,” si Cristo Jesus.​—⁠Ezequiel 9:​4; Juan 10:​11; Hulubaton 18:​10.

21. Ano ang padayon nga ideklarar sang mga Saksi ni Jehova?

²¹ Busa, ang katawhan sang Dios indi magapangalag-ag sa pagdeklarar sang iya pagtimalos batok sa bug-os nga kalibutan ni Satanas, lakip ang tawo sang pagkamalinapason sini, ang klero sang Cristiandad. Iwali nila sing mapagsik ang mensahe sang anghel sa Bugna 14:​7: “Kahadluki ninyo ang Dios kag hatagi sia sing himaya, kay nag-abot na ang takna sang iya paghukom.” Kag ilakip nila sa sining pagwali ang hilingagawon nga paandam sang Bugna 18:4 tuhoy sa dimatuod nga relihion: “Guwa kamo sa iya, katawhan ko, kon indi ninyo luyag makaambit sa iya mga sala, kag . . . makapakigbahin sa iya mga kalalat-an.”

Mga Pamangkot Para sa Repaso:

◻ Ano ang palaabuton sang tawo sang pagkamalinapason, kag ngaa?

◻ Ano ang obligasyon sang mga alagad ni Jehova tuhoy sa iban?

◻ Paano ang katawhan sang Dios nakapabilin nga matinlo sa dugo sang tanan nga tawo?

◻ Ano ang dapat himuon naton tuhoy sa Babilonia nga Daku?

◻ Ngaa padayunon naton ang aton mabaskog nga mensahe tuhoy sa tawo sang pagkamalinapason?

[Piktyur sa pahina 23]

Ginsilingan sang mga apostoles ang mataas nga korte: “Dapat namon tumanon ang Dios subong manuggahom sa baylo sang mga tawo”

[Piktyur sa pahina 24]

Dapat mahibaluan sang mga sinsero kon sa diin pakadto ang kalibutan kag ang mga relihion sini