Ang Pagkabunayag Amo ang Labing Maayo nga Pagsulundan
ANG pagkabunayag ginadayaw gid sa Biblia kag isa ka kinahanglanon para sa matuod nga mga Cristiano. (Mateo 22:39; 2 Corinto 8:21) Dugang pa, ang pagkabunayag amo gid ang labing maayo nga pagsulundan, subong ginapasundayag sa kabuhi sang madamo karon nga ang ila panghunahuna kag tagipusuon ginpabag-o sang sibu nga ihibalo sa kamatuoran. Ang isa ka halimbawa sini naghalin sa Liberia.
Sa tapos sang mapangamuyuon nga pagbinagbinag, ginsira sang isa ka Cristianong gulang kag sang iya asawa ang ila patahian. Ngaa? Bangod nagakonsumo ini sang ila daku nga tion kag nagaupang sa ila ministeryal nga mga hilikuton kag personal nga pagtuon. Nag-ugyunay sila nga mangin kontento na sila sa manubo nga ginakita nila gikan sa pagbaligya sing lugom para sa bayo. Apang, sa gilayon nga natapos nila mahimo ining tikang, ang bili sang lugom nagnubo sa lokal nga merkado. Ang ila ginakita indi karon makabuhi sang ila pamilya. Ano ang ila himuon?
Nangabay sila sa kompanya nga nagasuplay sang lugom nga panubuon ang ila presyo, agod nga magdakudaku ang ila ganansia. Wala ini pagpasugti. Apang, nagtanyag ang kompanya nga magpadala sila sing duha ka resibo, ang isa nagapakita sang aktuwal nga bili kag ang isa pa sang nabuhinan nga presyo nga ila mapakita sa Adwana agod nga mas manubo ang ila bayaran. Paagi sa sini, ang gulang makatigayon sing $2,000 nga dilegal nga ganansia sa tagsa ka alsada.
Nagdumili ang utod nga mangin bahin sang operasyon nga indi bunayag kag magadaya sa gobierno. Nakibot ang mga opisyal sang kompanya. Sila nagsulat: “Ginatahod namon ang imo konsiensia,” kag gintangdo nila ang gulang nga mangin isahanon nga ahente sang ila produkto sa Liberia. Bangod maatipan na karon sing nagakaigo ang materyal nga mga kinahanglanon sang pamilya, ang gulang kag ang iya asawa nag-auxiliary payunir, kag nakabulig sa kauturan sa pagpalig-on sa kongregasyon. Sa pagkamatuod, ang ila pagkabunayag nangin pagpakamaayo para sa ila.
Nasapwan man ni Alfonso, sa Espanya, nga ang pagkabunayag amo ang labing maayo nga pagsulundan. Ini nga bata naglayas sa ila puluy-an sa edad nga 12, kag wala magdugay nagbaligya sia sing droga, subong man ginakawatan niya ang mga awto, mga balay, kag mga balaligyaan. Kon kaisa tubtob sa napulo ka balaligyaan ang iya ginakawatan sa isa ka adlaw. Sa edad nga 21, ginsakit sia sang iya apat ka kaupod, ginkawat ang iya tanan nga suplay sang droga, kag ginpahog nga patyon sia kon manugid sia sa polisiya. Sanglit kilala sia sang polisiya, nahadlok sia bisan magpabulong sa ospital.
Sang mag-ayo sing amat-amat ang iya pilas, ginbinagbinag sing serioso ni Alfonso ang iya pagkabuhi. Nadumduman niya ang mga butang nahanungod sa Biblia kag Cristianong mga prinsipio nga ginsugid sa iya sang iya iloy sang bata pa sia. Sadto, ginsikway niya ang iya mga ginahambal, apang karon nangabay sia sa mga Saksi ni Jehova sing pagtuon sa Biblia. Sa sulod sang anom ka bulan, ginbag-o niya sing bug-os ang iya paggawi kag pagkatawo kag nakalipikar para sa bawtismo.
Apang, sang adlaw antes sang iya bawtismo, nakabaton sia sing sulat nga magpakita sa korte agod atubangon ang akusasyon nga pagpangawat nga may dala nga armas. Isa yadto ka krimen nga nahimo niya madugay na. Walay sapayan, gintu-ad ni Alfonso ang iya sala kag ginbilanggo sia samtang ginahimo ang kasaba. Ginlaygayan sia sang iya abogado nga magsiling nga wala sia sing kinawat kag wala sia nagadala anay sing pusil. Apang namilit si Alfonso nga isugid ang kamatuoran. Bangod sang sala nga nahimo niya kag sang iya malain nga rekord sa polisiya, ginpangayo sang manug-akusar ang pamatbat nga 13 ka tuig. Apang bangod sang iya maayong paggawi kag bunayag nga panimuot, ginhatagan sia sing anom ka bulan, nga iya na nahinguyang samtang ginahulat ang kasaba.
Karon si Alfonso kag ang iya asawa nagaalagad kay Jehova sing matutom, kag malipayon nga nasapwan nila ang matuod nga katuyuan sang kabuhi kag nga napamatud-an nila sa ila kaugalingon nga eksperiensia nga ang pagkabunayag amo ang labing maayo nga pagsulundan.