Ano ang Kahulugan sa Imo sang Kamatayon ni Jesus?

“ANG tanan nga hangaway nga nagmartsa na, ang tanan nga hangaway pangdagat nga natukod na, ang tanan nga parliamento nga naglingkod na, kag ang tanan nga hari nga naggahom na, kon tingubon, wala makaapektar sa kabuhi sang tawo sa sining duta sing subong ka gamhanan sa sining isa ka personalidad.” Amo sina ang ginsulat sang awtor nga si ­James A. Francis nahanungod kay Jesucristo.

Lainlain ang pagtamod sang tawo kay Jesus, apang ginapakilala sia sang Biblia subong Anak sang Dios kag isa ka tawo nga may nagasakripisyo sa kaugalingon nga gugma. Ginsambit ni Jesus ang isa ka pangunang paagi nga ginpakita niya ina nga gugma sang nagsiling sia tuhoy sa iya kaugalingon: “Ang Anak sang tawo wala magkari nga alagdon, kundi sa pag-alagad kag sa paghatag sang iya kalag nga gawad sang madamo.”​—⁠Mateo 20:⁠28.

Ano ang importansia sini nga gawad? Ngaa kinahanglanon ini? Sin-o ang gingawad? Sa pagkamatuod, ano ang kahulugan sa imo sang kamatayon ni Jesus?

Ano Ini?

Ang gawad isa ka butang nga nagahilway. Ang paggawad sa isa nagakahulugan sang paghilway sa iya gikan sa pagkabihag ukon silot paagi sa pagbayad sang bili. Sa espirituwal nga kahulugan, ang “paggawad” nagakahulugan sang paghilway gikan sa sala kag sa silot sini. Amo sina kon ngaa napatay si Jesus. Subong sang ginsulat sang Cristianong si apostol Pablo: “Ang bayad sang sala kamatayon, apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.”​—⁠Roma 6:⁠23.

Ang katumbasan Makasulatanhon nga ginabuylog sa pagbayad sing gawad. Ang Salmo 49:​6-9 nagasiling: “Ang nagasalig sa ila mga manggad, kag nagapabugal sang ila kaugalingon sa kadam-an sang ila manggad, wala sa ila sing sarang nga mas-a nga makatubos sang iya utod, ukon makahatag sa Dios sing gawad sa iya; (kay ang katumbasan sang ila kalag mahal kag ini kulang sa gihapon) agod nga magkabuhi sia sing dayon agod nga indi sia makakita sing kaduluntan.” Ang gawad isa ka pangtubos nga ginhatag sang Dios, indi sang bisan sin-o nga dihimpit nga tawo.

Ngaa Kinahanglan?

Kinahanglan ang gawad bangod ang aton unang tawhanon nga amay, si Adan, nagpakasala. Busa nawasi niya ang walay katapusan nga himpit nga kabuhi, makatarunganon nga ginpamatbatan sing kamatayon, kag sang ulihi napatay. (Genesis 2:​15-17; 3:​1-7, 17-19; 5:5) Subong mga kaliwat niya, napanubli naton ang sala kag kamatayon. “Paagi sa isa ka tawo nagsulod ang sala sa kalibutan kag paagi sa sala ang kamatayon,” sulat ni Pablo, “kag gani ang kamatayon naglaton sa tanan nga tawo kay ang tanan nakasala.” (Roma 5:12) Huo, “kay Adan ang tanan nagakalamatay.” (1 Corinto 15:22) Gani si salmista David nagsiling sing husto: “Sa kalautan natawo ako, kag sa sala ginpanamkon ako sang akon iloy.”​—⁠Salmo 51:⁠5.

Ang kahilwayan gikan sa katagudilian sang sala kag kamatayon kinahanglan agod ang makasasala nga kaliwat ni Adan makabaton sing dayon nga kabuhi. Samtang ang dihimpit nga mga tawo indi makaaman sini nga gawad, mahigugmaon ini nga ginhimo ni Jehova paagi kay Jesucristo. Apang, ano ang ginbakal paagi sa gawad? Ti, sang nagpakasala si Adan, nadula niya ang walay katapusan nga himpit tawhanon nga kabuhi, upod ang tanan nga mga kinamatarong kag mga paglaum sini. Busa, gintubos man ini paagi sa halad ni Jesus.

Kon Ano ang Ginpaposible Sini

Ang katarungan napaayawan sa pag-agom sing kamatayon sang katawhan, ang silot sa sala. Gani ang gawad isa ka buhat sang kaawa kag mahigugmaon nga kaluoy sang Dios. Ang himpit tawhanon nga kabuhi ni Jesus, upod ang tanan nga kinamatarong kag paglaum sini, gin-ampo sa kamatayon, kag wala na pagbawia, kay wala sia pagbanhawa subong isa ka tawo sa unod kag dugo kundi subong dimamalatyon espirituhanon nga tinuga. (1 Corinto 15:​50; 1 Pedro 3:18) Busa ang ginhalad nga tawhanon nga kabuhi ni Jesucristo padayon nga may ikasarang sa pagtubos, ukon sa paggawad.

Subong walay sala nga tawo, si Jesus yara sa kahimtangan nga kaanggid sa gin-agom anay sang himpit nga si Adan. Bangod matinumanon sa Dios tubtob sa kamatayon, ginhimo si Jesus nga dakung Mataas nga Saserdote, kag ginpresentar niya ang balor sang iya himpit tawhanon nga halad sa langit. (Hebreo 9:​24-26) Bangod ginbaton sang Dios ining bili sa pagtubos, natubos ni Jesus ang matinuohon nga mga kaliwat ni Adan gikan sa sala kag kamatayon paagi sa pag-aplikar sang merito sang iya halad tungod sa ila. (1 Corinto 6:​20; 7:​23; 1 Juan 2:​1, 2) Busa si Jesus “nangin ginhalinan sang kaluwasan nga dayon sa tanan nga nagatuman sa iya.” (Hebreo 5:​8, 9) Nagapaposible ini para sa ila nga matigayon ang matarong nga tindog sa atubangan sang Dios paagi sa iya Anak.

Sin-o ang Gintubos?

Sin-o, nian, ang nakabenepisyo gikan sa pangtubos? Ang mga tawo nga nagatuo sa sining aman kag busa nahamut-an sang Dios. Paagi sa pag-alagad sa iya sing matutom, sarang sila mahilway gikan sa sala kag sa silot nga kamatayon kag makabaton sang kabuhi nga dayon.​—⁠Juan 17:⁠3.

Ang unang tawo mahimo makadesisyon kon bala tumanon ang Dios ukon indi. Ginpili niya ang pagkadimatinumanon. “Si Adan wala malimbungi,” kundi napatay sia nga isa ka hungod nga makasasala. (1 Timoteo 2:14) Apang, kamusta ang mga kaliwat ni Adan? Mahimo sila makapili kon bala alagaron ang Dios tubtob sa bug-os nga masarangan sang ila dihimpit nga ikasarang ukon dipagtumanon ang ila Manunuga.​—⁠Josue 24:⁠15.

Si Jesus ‘naghatag sang iya kalag nga gawad sang madamo.’ (Marcos 10:45) Apang sin-o ang “madamo”? Maathag nga wala malakip si Adan bangod sia isa ka himpit nga tawo nga hungod nga nagpili sa paglapas sa Dios kag napatay subong dimahinulsulon kag hungod nga makasasala. Apang kamusta ang iya daku nga pamilya, nga nagadamo sing linibolibo ka milyon? Paagi sa katumbas nga bili, ginbawi ni Jesucristo ang napanubli nga kondenasyon sa panimalay ni Adan. (Ipaanggid ang 1 Timoteo 2:​5, 6.) Tungod sa “madamo” nga tumuluo, gin-aplikar ni Jesus ang balor sang iya pangtubos nga bili.

Ang gingawad nga mga tumuluo naglakip sa mga Judiyo kag mga Gentil, ukon sa mga tawo sang pungsod. Siling ni Pablo: “Nian subong nga tungod sa paglapas sang isa ka tawo nag-abot ang kondenasyon sa tanan nga tawo, gani sa buhat nga sa pagkamatarong sang isa ka tawo nagaabot ang pagpakamatarong kag kabuhi sa tanan nga tawo.” (Roma 5:18) Paagi sa kamatayon sa usok, “si Cristo nagtubos sa [mga Judiyo] gikan sa pagpakamalaut sang Kasuguan nga ginpakamalaut tungod sa [ila], kay nasulat na: ‘Pinakamalaut ang tagsa nga nabitay sa kahoy.’ ” (Galacia 3:​13; Deuteronomio 21:23) Ginapatuhuyan sang Roma 4:​11 ang mga Gentil sang nagsiling ini nga bisan si Abraham, nga katigulangan sang mga Judiyo, disirkunsidado pa, sia nangin “amay sang tanan nga nagatuo bisan disirkunsidado.” Gani, nian, ang halad gawad ni Jesus nagabenepisyo sa nagtuo nga mga Judiyo kag mga Gentil.

Ang dalanon nga ginabuhat sang tagsa ka indibiduwal nagapat-od kon bala magabenepisyo sia gikan sa halad ni Jesus. Kaangay ni Adan, ang hungod nga malaut wala sing merito sang gawad kag dayon nga kabuhi sa ila. Subong sang ginsiling ni Cristo: “Ang nagatuo sa Anak may kabuhi nga walay katapusan; apang ang wala nagatuman sa Anak indi makakita sang kabuhi, kundi ang kasingkal sang Dios nagapabilin sa iya.” (Juan 3:36) Ang gawad nagapaposible man sang pagkabanhaw para sa mga patay nga yara sa hunahuna sang Dios. (Juan 5:​28, 29) Kon mapamatud-an sila nga matutom kag mainapresyahon, ang aplikasyon sang mga benepisyo sang gawad nagakahulugan nga sila magakabuhi sing dayon. Apang para sa mga nagakabuhi sa sining “katapusan nga mga adlaw,” posible ang kabuhi nga dayon nga indi na kinahanglan ang mapatay pa.​—⁠2 Timoteo 3:​1-5; Mateo 24:​3-14, 21, 34; Juan 11:​25, 26.

Mga Rason sa Pagpasalamat

Ang bisan sin-o nga maluyag makabenepisyo gikan sa gawad dapat nga may tudok nga apresasyon para sa sini. Kag daw ano gid ka nagakaigo ina nga pagpasalamat! Total, ang gawad nagakinahanglan sing bugana nga gugma sa bahin sang Dios kag ni Cristo.

Si Jehova nga Dios nagpakita sing daku nga gugma sa pag-aman sing gawad paagi sa kamatayon sang iya Anak. Siling ni Jesus: “Kay ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan. Kay ang Dios wala magpadala sang Anak sa kalibutan sa pagtagudili sang kalibutan, kundi nga ang kalibutan maluwas paagi sa iya.” (Juan 3:​16, 17) Indi bala dapat nga apresyahon mo ining pagpakita sang gugma sang Dios?

Hunahunaa pa gid ang tuhoy sa tudok nga gugma ni Jehova sa paghimo sing aman para sa gawad. Antes ginpadala sa duta ang Anak sang Dios agod magkabuhi kag mapatay subong himpit nga tawo, nagakabuhi na sia anay. Sia amo “ang panganay sang tanan nga tinuga,” nga paagi sa iya “ang tanan nga iban pa nga butang gintuga sa langit kag sa duta, ang mga butang nga kitaon kag ang mga butang nga dikitaon.” (Colosas 1:​13-16) Ginahigugma gid ni Jehova ang iya Anak! Apang, wala ginpadala sang Dios ang bisan-o sin-o lang sa minilyon ka matarong nga anghel sa duta. Daku gid ang iya gugma sa katawhan sa bagay nga ginpadala niya ang iya panganay nga Anak.

Binagbinaga man ang daku nga gugma nga ginpakita ni Jesus nahanungod sa gawad. Subong espirituhanon nga tinuga sa langit, sia amo ang “pangulo nga manugpangabudlay” sang Dios. Matuod, “ang kalipay [sang Anak sang Dios] yara kaupod sa mga anak sang mga tawo.” (Hulubaton 8:​22-31) Apang, indi mahapos para sa iya nga bayaan ang langit, upod ang maayo gid katama nga kahimtangan kaupod sang iya Amay kag sang linaksalaksa ka matarong nga anghel. Gikan sa iya mataas nga lugar sa langit, sarang makita sang Anak sang Dios ang malaut nga kahimtangan sa duta kag ang mga halit sang sala kag kamatayon sa katawhan. Nahibaluan man niya nga ang pag-aman sing gawad nagakinahanglan nga mapatay sia. Apang, sia “nangin dagway sang ulipon kag nangin kaangay sang tawo. Labi pa sa sina, . . . nagpaubos sia sang iya kaugalingon kag nangin masinulundon tubtob sa kamatayon.” Bangod sina nga katutom, si Jesus ginbanhaw sa mahimayaon langitnon nga kabuhi. (Filipos 2:​5-11) Daw ano nga gugma ang ginpakita niya sa gawad! Ginaapresyar mo bala kon ano ang ginhimo ni Jesus?

Ano ang Himuon Mo?

Ang Ingles nga prelado nga si Richard sang Chichester (c 1198⁠–​1253) nangamuyo anay nga ang mga lalaki kag mga babayi “magakilala kay Jesucristo sing labi pa, magahigugma sa iya sing hanuot pa, kag magasunod sa iya sing suod pa.” Ang halad gawad ni Jesus pat-od nga nagahatag sing isa ka maayong rason sa pagkilala, paghigugma, kag pagsunod sa iya.

Kon indi bangod sang gawad, subong mga makasasala mahimo kita mapatay nga wala sing paglaum, kay “ang sudlot sang kamatayon amo ang sala.” (1 Corinto 15:56) Busa, agod maluwas sa kamatayon nga nagaresulta sa pagsudlot sa imo sang kamatayon, ano ang dapat mo himuon? Dapat mo ton-an ang nahanungod sa aman sang Dios para sa kaluwasan paagi kay Jesucristo. Nian dapat mo ipakita nga nagatuo ka sa gawad. Paano? Paagi sa pagpakita sing tinagipusuon nga apresasyon para sa sini, nagahugod sang imo kaugalingon sa Dios, kag nagasugid sa iban nahanungod sining makatilingala nga aman para sa kaluwasan.

Ini nga dalanon magabutang sa imo sa tunga sang “dakung kadam-an” nga “nakalampuwas sa dakung kapipit-an, kag . . . nagbunak sang ila mga panapton kag ginpaputi ini sa dugo sang Kordero,” si Jesucristo. (Bugna 7:​9, 14) Ang ila paglaum amo ang dayon nga kabuhi sa dutan-on nga paraiso. (Lucas 23:43) Huo, kag mahimo ka mangin bahin sinang malipayon nga kadam-an, kon ang kamatayon ni Jesus tunay gid nga hamili sa imo.

[Piktyur sa pahina 4]

Ang walay sala nga si Jesus yara sa kahimtangan nga kaanggid anay sa himpit nga si Adan

[Piktyur sa pahina 6]

Ginaapresyar mo bala ang matuod nga kahulugan sang kamatayon ni Jesus?