Pagkooperar sa Nagadumala nga Hubon Karon

“Padumalahon niya sia sa bug-os niya nga pagkabutang.”​—⁠LUCAS 12:⁠44.

1. Sa anong ginharian si Cristo nagsugod sa paggahom sang 33 C.⁠E., kag paagi sa ano?

SANG Pentecostes 33 C.⁠E., si Jesucristo, ang Ulo sang kongregasyon, nagsugod sa paggahom sing aktibo sa ginharian sang iya hinaplas sang espiritu nga mga ulipon. Paano? Paagi sa balaan nga espiritu, mga anghel, kag kitaon nga nagadumala nga hubon. Subong sang ginpakita ni apostol Pablo, ang Dios ‘nagluwas sa mga hinaplas gikan sa gahom sang kadudulman kag nagliton sa ila sa ginharian sang iya hinigugma nga Anak.’​—⁠Colosas 1:​13-18; ­Binuhatan 2:​33, 42; 15:​2; Galacia 2:​1, 2; Bugna 22:⁠16.

2. Sa anong mas daku nga Ginharian si Cristo nagsugod sa paggahom sang 1914?

² Sang talipuspusan sang “gintangdo nga tion sang mga pungsod,” gindugangan ni Jehova ang harianon nga awtoridad ni Cristo, nagapasangkad sini labang sa Cristianong kongregasyon. (Lucas 21:24) Huo, sang tuig 1914, ginhatagan sang Dios ang iya Anak sing harianon nga awtoridad sa ibabaw sang “mga pungsod,” sang “ginharian sang kalibutan,” sang bug-os nga katawhan.​—⁠Salmo 2:​6-8; Bugna 11:⁠15.

Ginpadumala sa “Bug-os Niya nga Pagkabutang”

3, 4. (a) Sa ilustrasyon ni Jesus nahanungod sa mga mina, sin-o ang ginarepresentar sang tawo nga dungganon? (b) Anong mga hitabo sa Ginharian ang natabo sang 1918 kag 1919?

³ Talalupangdon diri ang ilustrasyon ni Jesus nahanungod sa isa ka tawo nga dungganon. (Lucas 19:​11-27) Antes maglakbay sa luwas sa pagtigayon sang iya harianon nga gahom, ginhatagan sang lalaki ang iya mga ulipon sing kuwarta (mga mina) agod patikangon ini. Pagbalik niya, ini nga tawo, nga nagarepresentar kay Cristo, nagpasugo nga panawgon “ining mga ulipon nga ginhatagan niya sang kuwarta, agod nga mahibaluan niya kon pila ang ila nasaplid sa pagpatikang.” (Lucas 19:15) Paano ini ginpatikang sa tapos matigayon ni Jesus ang harianon nga gahom?

⁴ Sang 1918 nasapwan sang naglingkod sa trono nga si Hari Jesucristo ang isa ka diutay nga grupo sang mga Cristiano nga nagbiya anay sa mga iglesia sang Cristiandad kag nangin masako sa pag-atipan sa mga interes sa duta sang ila Agalon. Sa tapos sila napaputli subong nga sa kalayo, ginhatagan ni Jesus ang iya mga ulipon sing dugang nga awtoridad sang 1919. (Malaquias 3:​1-4; Lucas 19:​16-19) Ginpadumala niya sila “sa bug-os niya nga pagkabutang.”​—⁠Lucas 12:​42-44.

“Suplay nga Pagkaon sa Nagakaigo nga Tion”

5, 6. (a) Anong mas masangkad nga asaynment ang ginbaton sang tulugyanan ni Cristo? (b) Anong mga tagna ang matuman pagkatapos sang 1914, kag paano ang tulugyanan nga klase nakigbahin sing aktibo sa ila katumanan?

⁵ Ang naggahom nga si Hari Jesucristo naghatag sing dugang nga asaynment sa iya tulugyanan, ukon manugdumala sa panimalay, sa duta. Ang gintangdo nga mga Cristiano dapat mangin “mga embahador” sang Dios nga tal-us sa ginpurungpurungan nga hari nga naggahom sa bug-os nga katawhan sang duta. (2 Corinto 5:​20; Daniel 7:14) Ang ila kabilugan nga responsabilidad indi na ang paghatag lamang sa hubon sang hinaplas nga mga alagad ni Cristo sang “ila suplay nga pagkaon sa nagakaigo nga tion.” (Lucas 12:42) Dapat sila karon makigbahin sing aktibo sa pagtuman sang mga tagna nga matuman pagkatapos natukod ang Ginharian sang 1914.

⁶ Ano ang kahulugan sini sa aktuwal nga buhat? Nagakahulugan ini sang pagpasangkad sang pagbantala ‘sining maayong balita sang ginharian sa bug-os napuy-an nga duta.’ (Mateo 24:14) Dugang pa, nagakahulugan ini sang pagbantala sa matigdas nga mga mensahe sang paghukom batok sa malaut nga sistema ni Satanas kag sang mga sumalakdag sini. May epekto ini sang ‘pagtay-ug sa mga pungsod.’ Busa, ang “bilidhon nga mga butang,” ang “iban nga mga karnero” ni Cristo, nagsugod sa pagsulod. (Hageo 2:​7; Juan 10:16) Kutob sang 1935 padayon, ang “dakung kadam-an” nagsugod sa pagdugok pasulod sa organisasyon ni Jehova sa bug-os nga kalibutan. (Bugna 7:​9, 10) Nagkinahanglan ini sing amat-amat nga mga pag-uswag sa organisasyon. Sing simbuliko, ang mga bato islan sing salsalon, ang kahoy sing saway, ang salsalon sing pilak, kag ang saway sing bulawan. (Isaias 60:17) Ini tanan natabo kutob sang 1919 sa idalom sang aktibo kag suod nga panuytoy ni Jesucristo, nga nagtugyan sang tanan niya nga dutan-on nga mga interes, ukon mga pagkabutang sang Ginharian, sa iya matutom nga ­ulipon nga klase kag sa iya Nagadumala nga Hubon.

7. Ano ang ginalakip sang dugang nga mga responsabilidad sang tulugyanan?

⁷ Mahapos naton mahangpan nga ang dugang nga lulan sang responsabilidad nga gintugyan sa ulipon, tulugyanan, ukon manugdumala sang panimalay sang Agalon naglakip sang hanuot nga pagsulat kag editoryal nga mga hilikuton. Ang espirituwal nga suplay sang pagkaon dapat ibalhag sing tayuyon sa nagakaigo nga tion sa Ang Lalantawan. Sang 1919 ang The Golden Age (ang kaupod nga magasin nga nangin Consolation sang ulihi, kag nian Awake!) ginsugdan nga ibalhag sa pagpukaw sang interes sang publiko, dugang sa pagpalig-on sa “panimalay.” (Mateo 24:45) Madamong libro, polyeto, kag mga tract ang ginpatubas man sa mga tinuig.

Padayon nga Pagputli

8. Sa ano una nga nakilal-an ang mga katapo sang Nagadumala nga Hubon, kag ano ang ginsiling sang The Watchtower sang 1944?

⁸ Nagadumdom sining “panag-on sang katapusan,” wala kita makibot nga ang mga katapo sang Nagadumala nga Hubon kilala anay sing suod upod sa editoryal nga katapo sang Watch Tower Society. (Daniel 12:4) Ang artikulo nga “The Theo­cratic Align­ment Today,” nga ginbalhag sang The Watchtower sang Nobiembre 1, 1944, nagsiling: “Sing makatarunganon, yadtong gintugyanan sa pagbalhag sang ginbuyagyag nga mga kamatuoran sa Biblia ginatamod subong pinili nga nagadumala nga hubon sang Ginuo sa pagtuytoy sa tanan nga maluyag sa pagsimba sa Dios sa espiritu kag sa kamatuoran kag sa pag-alagad sa iya sing nahiusa sa pagpalapnag sining ginbuyagyag nga mga kama­tuoran sa iban nga mga ginagutom kag ginauhaw.”

9. Sa ano suod nga nakilal-an sang ulihi ang Nagadumala nga Hubon, kag ngaa?

⁹ May legal nga mga kinahanglanon nga nadalahig sa pagbalhag sing mga magasin kag sang iban pa nga mga bulig sa pagtuon sa Biblia. Gani, gintukod kag ginrehistro ang Watch Tower Bible and Tract Society sa estado sang Pennsylvania, E.⁠U.⁠A. Sa sulod sang mga tinuig, ang kitaon nga Nagadumala nga Hubon nakilal-an nga may pito-ka-katapo nga hubon sang mga direktor sining korporasyon nga ginpasad agod magbalhag sang mga bulig sa pagtuon sa Biblia nga kinahanglan kag gamiton sang katawhan sang Ginuo sa bug-os nga duta.

10, 11. Anong pagputli ang natabo sang 1944, kag ano ang komento sang The Watchtower nahanungod sini?

¹⁰ Ang pito ka direktor sang Sosiedad matutom nga mga Cristiano. Apang ang ila katungdanan sa isa ka legal nga korporasyon nagapakita nga utang nila ang ila mga posisyon sa Nagadumala nga Hubon subong nga sila ginpili sang legal nga mga katapo sang Watch Tower Society. Dugang pa, sa kasuguan ina nga pagkamiembro kag pribilehiyo sa pagboto ginhatag lamang anay sa pila nga nag-amot sa Sosiedad. Ini nga kahimusan dapat bag-uhon. Ginhimo ini sa tuigan nga miting sang korporasyon sa Penn­syl­vania sang Watch Tower Society nga ginhiwat sang Oktubre 2, 1944. Ang mga pagsulundan sang Sosiedad ginbaligwat agod ang pagkamangin katapo indi na bangod sa pinansial nga rason. Ang mga katapo mahimo pilion gikan sa tunga sang matutom nga mga alagad ni Jehova, kag sila naglakip sa ma­damo nga nagaalagad sing bug-os tion sa ulong-talatapan sang Sosiedad sa Brook­lyn, Nueva York, kag sa iya mga sanga sa bug-os nga kalibutan.

¹¹ Nagareport tuhoy sini nga pag-uswag, ang The Watchtower sang Nobiembre 1, 1944, nagsiling: “Ang kuwarta, subong ginapakita sa pinansial nga mga amot, indi dapat amo ang nagapamat-od nga tingog, sa katunayan dapat nga wala sing labot sa pagpuno sa nagadumala nga hubon sang mga saksi ni Jehova sa duta. . . . Ang balaan nga espiritu, ang aktibo nga kusog nga nagahalin kay Jehova paagi kay Cristo Jesus, amo dapat ang magapat-od kag magatuytoy sa bagay.”

Tuhay Gikan sa Hubon sang mga Direktor

12. Ano ang nagapakita nga ginpakamaayo ni Jehova ang mga pagputli sa idalom sang panuytoy sang Nagadumala nga Hubon?

¹² Ang pag-uswag sa pagbantala nga hilikuton sang masunod nga mga dekada nagapamatuod nga ginpakamaayo ni Jehova ang nagligad nga mga pagputli sa paghangop tuhoy sa Nagadumala nga Hubon. (Hulubaton 10:22) Ti, ang kadamuon sang mga manugbantala sang Ginharian sa bug-os nga duta naglumpat halin sa wala pa sa 130,000 sang 1944 pakadto sa 1,483,430 sang 1970! Apang dugang pa nga mga pag-uswag ang mahanabo.

13. (a) Tubtob sang 1971, ano ang kahimtangan kon nahanungod sa Nagadumala nga Hubon? (b) Ano ang natabo sa tuigan nga miting sang Sosiedad sang 1971?

¹³ Tubtob sang 1971 ang katapo sang Nagadumala nga Hubon nakilal-an gihapon upod sa pito ka katapo sang hubon sang mga direktor sang ­Watch Tow­er Bi­ble and ­Tract So­ci­e­ty of Penn­syl­vania. Ang presidente sang Sosiedad amo ang may pangunang responsabilidad sa paghimo sing mga desisyon nga nagaapektar sa pagpanghikot sang mga sanga sang Sosiedad sa bug-os nga kalibutan. Apang ang talalupangdon nga mga pamulongpulong ginhatag sa tuigan nga miting nga ginhiwat sang Oktubre 1, 1971. Ang presidente sang Sosiedad nagpamulong sa tema nga “Pagbutang sang Balaan nga Duog sa Husto nga Kahimtangan,” kag ang bise presidente sa topiko nga “Ang Nagadumala nga Hubon Subong Tuhay Gikan sa Legal nga Korporasyon.” Ano ang kinatuhayan sa ulot sang Nagadumala nga Hubon kag sang legal nga korporasyon?

14. Anong mga kinatuhayan ang nagluntad sa ulot sang legal nga korporasyon kag sang Nagadumala nga Hubon?

¹⁴ Subong sang ginsambit na, ang ­Watch Tow­er Bi­ble and ­Tract So­ci­e­ty of Penn­syl­vania may hubon sang mga direktor nga limitado sa pito ka katapo. Ining dedikado nga Cristianong mga lalaki ginpili para sa tatlo-ka-tuig nga termino sang mga katapo sang korporasyon nga nagadamo sing indi magsobra sa 500, ang kalabanan sa ila indi hinaplas nga mga Cristiano. Dugang pa, bangod ang pagluntad sang korporasyon legal, nga may permanente nga ulong-talatapan geograpiko, mahimo ini dulaon ni Cesar, kon sayuron, sang Estado. (Marcos 12:17) Apang, ang Nagadumala nga Hubon indi isa ka legal nga instrumento. Ang mga katapo sini wala ginpili. Gintangdo sila paagi sa balaan nga espiritu sa idalom sang panuytoy ni Jehova nga Dios kag ni Jesucristo. (Ipaanggid ang Binuhatan 20:⁠28.) Dugang pa, ang mga nagahuman sang Nagadumala nga Hubon gintangdo sang espiritu nga mga lalaki nga wala sing obligado nga permamente nga geograpiko nga lokasyon ukon mga ulong-talatapan.

15. Ano ang ginsiling sang The Watchtower sang Disiembre 15, 1971 nahanungod sa organisasyon, kag ano ang masiling nahanungod sa modernong-adlaw nga Nagadumala nga Hubon?

¹⁵ Nahanungod sa mga pagputli sa paghangop, ang The Watchtower sang Disiembre 15, 1971, nagsiling: “Sing mapasalamaton ang Cristianong mga saksi ni Jehova nakahibalo kag nagasalig nga indi ini isa-ka-tawo nga relihiosong organisasyon, kundi nga ini may nagadumala nga hubon sang gintangdo sang espiritu nga mga Cristiano.” Ang Nagadumala nga Hubon sang hinaplas nga ulipon nga klase kag ang ila minilyon nga kaupdanan sa tunga sang iban nga mga karnero amat-amat nga nasangkapan sa pagtatap sa katungdanan sang pagdumala.

16. Paano nag-uswag ang mga pagkabutang ni Cristo sa duta kutob sang 1971, kag ano ang iban sini nga gintugyan niya nga tatapon sang matutom kag mainandamon nga ulipon, nga ginarepresentar sang iya Nagadumala nga Hubon?

¹⁶ Ang mga pagkabutang ni Hari Jesucristo sa duta padayon nga nagtubo. Kutob sang 1971 ang kadamuon sang mga Saksi nag-uswag halin sa wala pa sa 1,600,000 tubtob sa kataason nga kapin sa 3,700,000 sang 1989. Daw ano nga pamatuod sang pagpakamaayo sang Dios! (Isaias 60:22) Ini nga pag-uswag nagkinahanglan sing pagpasangkad sa mga pasilidad sang mga ulong-talatapan sang Sosiedad kag sang mga sanga sini, subong man sing pagmoderno sa mga metodo sang produksion kag distribusyon. Nagresulta ini sa pagtukod sa madamong King­dom Hall kag mga As­sem­bly ­Hall sa bug-os nga duta. Samtang, ang Nagadumala nga Hubon nagpadayon man sa pagtuman sa responsabilidad nga pagdumala sa pagbantala nga hilikuton, pagpatubas sing materyal sa pagtuon sa Biblia, kag sa pagtangdo sing mga manugtatap sa mga ­sona, mga distrito, mga sirkito, kag mga kongregasyon. Amo ini ang mga interes sa Ginharian nga gintugyan ni Cristo nga atipanon sang matutom kag mainandamon nga ulipon, nga ginarepresentar sang iya Nagadumala nga Hubon.

17. Anong dugang nga mga pag-uswag sa pagdumala ang nahimo sang 1971, 1974, kag 1976?

¹⁷ Ang unang-siglo nga nagadumala nga hubon ginpasangkad sa paglakip indi lamang sa mga apostoles ni Jesus. Sang ang isyu sa sirkunsisyon gindesisyunan, ang hubon maathag nga naglakip sa “mga apostoles kag mga gulang sa Jerusalem.” (Binuhatan 15:​1, 2) Sing kaanggid, ang Nagadumala nga Hubon ginpasangkad sang 1971 kag sa liwat sang 1974. Agod pamag-anon ang ila hilikuton sa pagtatap, ang Nagadumala nga Hubon naghimos para sa lima ka komite nga nagsugod sa pagpanghikot sang Enero 1, 1976. Ang kada komite ginahuman sang halin sa tatlo tubtob sa anum ka katapo, sila tanan may palareho nga partisipasyon sa mga bagay nga ginabinagbinag. Ang tsirman sang kada komite nagaalagad sa isa ka tuig, kag ang indibiduwal nga mga katapo sang Nagadumala nga Hubon nagaalagad sa isa ukon kapin pa sining mga komite. Ang kada isa sining lima ka komite nagahatag sing partikular nga atension sa isa ka ispisipiko nga bahin sang mga pagkabutang ni Cristo sa duta. Ang ikaanum nga komite​—⁠ang Chairman’s Committee, nga ang pagkakatapo nagalainlain kada tuig, nagauyat sing madagmit nga mga problema.

Aktibo nga Pagkooperar sa Nagadumala nga Hubon

18. Paano nagapanghikot ang Nagadumala nga Hubon, kag ano ang isa ka paagi nga masarangan naton nga mapakita ang aton kooperasyon sa sini?

¹⁸ Ang mga komite sang Nagadumala nga Hubon nagahiwat sing semanal nga mga miting sa pagrepaso sa importante nga mga butang, sa paghimo sing mga desisyon pagkatapos sang mapangamuyuon nga mga pagbinagbinag, kag pagplano para sa palaabuton nga teokratikong hilikuton. Subong sang ginsambit na kaina, ang Binuhatan kapitulo 15 nagapakita nga ang mabudlay nga pamangkot nga nagakinahanglan sing resolusyon ginpatalupangod sa unang-siglo nga nagadumala nga hubon. Sing kaanggid karon, ang importante nga mga pamangkot ginapatalupangod sa bug-os nga Nagadumala nga Hubon, nga nagamiting kada semana ukon sing mas masunson pa kon kinahanglan. Ang mga katapo sang Nagadumala nga Hubon, sa karon nagadamo sing 12, nagapangayo sing panuytoy ni Jehova nga Dios paagi sa Kasulatan kag paagi sa pangamuyo. Ang isa ka paagi nga mapakita naton ang aton kooperasyon sa Nagadumala nga Hubon amo ang paagi sa pagdumdom sa sining mga gintangdo sing pinasahi sa aton matag-adlaw nga mga pangamuyo.​—⁠Roma 12:⁠12.

19. Paano nagalab-ot sa mga kongregasyon ang mga instruksion sang Nagadumala nga Hubon?

¹⁹ Paano nagalab-ot sa mga kongregasyon ang mga instruksion kag mga desisyon sang Nagadumala nga Hubon? Pagkatapos nga ang mga katapo sang unang-siglo nga nagadumala nga hubon nakahimo sang ila desisyon upod sa bulig sang espiritu sang Dios, ginpadal-an nila sing sulat ang mga kongregasyon. (Binuhatan 15:​22-29) Apang, ang pangunang paagi karon amo ang paagi sa Cristianong mga publikasyon.

20. (a) Anong dugang nga pagputli sa organisasyon ang ginhimo sang 1976? (b) Paano nagakooperar ang mga ­Branch Com­mit­tee sa Nagadumala nga Hubon?

²⁰ Kutob sang Pebrero 1, 1976, ang kada sanga sang ­Watch Tow­er So­ci­e­ty may ­Branch Com­mit­tee nga ginahuman sang sangkol nga mga lalaki nga gintangdo sang Nagadumala nga Hubon. Subong mga tiglawas sang Nagadumala nga Hubon para sa pungsod ukon mga pungsod nga napaidalom sa pagdumala sang ila sanga, ining mga utod nga lalaki dapat mangin matutom, maunungon nga mga lalaki. Nagapahanumdom ini sa aton sa sangkol, mahadlukon sa Dios, masaligan nga mga lalaki nga nagbulig anay kay Moises sa paghukom sa katawhan sang dumaan nga Israel. (Exodo 18:​17-26) Ang mga katapo sang ­Branch ­Com­mit­tee nagapatuman sang mga instruksion nga nabaton paagi sa mga libro kag mga magasin sang Sosiedad kag sa Ang Aton Ministeryo sa Ginharian, subong man sa kabilugan nga sulat kag espesyal nga mga sulat nga may kahilabtanan sa lokal nga mga problema. Ginasugiran sang mga ­Branch Com­mit­tee ang Nagadumala nga Hubon sang pinakabag-o nahanungod sa pag-uswag sang hilikuton sa kada pungsod kag sa mga problema nga mahimo magautwas. Ina nga report gikan sa bug-os nga kalibutan nagabulig sa Nagadumala nga Hubon sa pagpamat-od kon anong mga tema ang dapat binagbinagon sa mga publikasyon sang Sosiedad.

21. Paano ginatangdo ang nagalakbay nga mga manugtatap, kag ano ang nalakip sa ila mga katungdanan?

²¹ Sa idalom sang panuytoy sang balaan nga espiritu, ang mga ­Branch Com­mit­tee nagarekomendar sing hamtong, espirituwal nga mga lalaki sa pag-alagad subong mga manugtatap sa sirkito kag distrito. Sa tapos matangdo sing direkta sang Nagadumala nga Hubon, nagaalagad sila subong nagalakbay nga mga manugtatap. Ining mga utod nagaduaw sa mga sirkito kag mga kongregasyon agod palig-unon sila sa espirituwal kag buligan sila sa pag-aplikar sang mga instruksion nga nabaton gikan sa Nagadumala nga Hubon. (Ipaanggid ang Binuhatan 16:​4; Roma 1:​11, 12.) Ang nagalakbay nga mga manugtatap nagasumiter sing mga report sa sanga talatapan. Upod sa bulig sang balaan nga espiritu kag sang inspirado nga Kasulatan, nagabuylog sila sa lokal nga mga gulang sa pagrekomendar sa kalipikado nga mga utod para tangdoan subong ministeryal nga mga alagad kag mga gulang sang Nagadumala nga Hubon ukon sang iya mga tiglawas.​—⁠Filipos 1:​1; Tito 1:​5; ipaanggid ang 1 Timoteo 3:​1-13; 4:⁠14.

22. (a) Paano nagakooperar ang mga gulang sa kongregasyon sa Nagadumala nga Hubon? (b) Ano ang nagapamatuod nga ginapakamaayo ni Jehova ining teokratiko nga kahimusan?

²² Nian, ang nagahuman sa mga hubon sang mga gulang ‘nagatatap sang ila kaugalingon kag sang bug-os nga panong, nga sa ila ginhimo sila sang balaan nga espiritu nga mga manugtatap.’ (Binuhatan 20:28) Ining mga manugtatap matutom nga nagatinguha sa pag-aplikar sa mga instruksion nga nabaton gikan kay Jehova nga Dios kag kay Jesucristo paagi sa matutom kag mainandamon nga ulipon kag sa iya Nagadumala nga Hubon. Ginapakamaayo ni Jehova ining teokratiko nga kahimusan, kay ang ‘mga kongregasyon naglig-on sa pagtuo kag nagdugang sa kadamuon adlaw-adlaw.’​—⁠Binuhatan 16:⁠5.

23. Nahanungod sa Nagadumala nga Hubon, dapat kita mamat-od sa paghimo sing ano?

²³ Daw ano kaayo nga paagi sa Nagadumala nga Hubon, si Jehova nga Dios kag ang Agalon, si Jesucristo, nagapakita sing suporta sa katawhan sang Dios! (Salmo 94:14) Subong bahin sang organisasyon ni Jehova, kita sing indibiduwal nagabenepisyo gikan sa sina nga suporta. (Salmo 145:14) Dapat ini magpabakud sang aton pamat-od nga magkooperar sa mga kahimusan sang Dios. Sa pagkamatuod, kabay nga pirme kita masapwan nga nagakooperar sa Nagadumala nga Hubon sang mga Saksi ni Jehova samtang nagaabante kita padulong sa tion nga “ang duta matugub sang ihibalo kay Jehova subong nga ang mga tubig nagatabon sang dagat.”​—⁠Isaias 11:⁠9.

Pangunang mga Punto nga Dumdumon

◻ Anong dugang nga mga responsabilidad ang nabaton sang tulugyanan nga klase sang 1919?

◻ Sa sulod sang madamong tinuig, sa ano nakilal-an ang kitaon nga Nagadumala nga Hubon?

◻ Anong amat-amat nga pagputli ang ginhimo sa pagtangdo sa mga katapo sang Nagadumala nga Hubon?

◻ Ano ang iban sa mga pagkabutang ni Cristo sa duta nga gintugyan niya sa ulipon nga klase kag sa iya Nagadumala nga Hubon?

◻ Paano kita makakooperar sa Nagadumala nga Hubon?

[Piktyur sa pahina 16, 17]

Halin sa ulong talatapan sa Brooklyn, Nueva York, ang Nagadumala nga Hubon nagatatap sang pagbalhag kag pagbantala nga hilikuton sang mga Saksi ni Jehova sa 93 ka sanga sang Watch Tower Society

Alemanya

Japan

Bagatnan nga Aprika

Brazil