Sin-o ang Magatuytoy sa Katawhan Padulong sa Paghidait?

ANG kamatuoran bala nga ang tawo indi makapaluntad sing paghidait nagakahulugan nga indi gid kita makakita sing paghidait? Indi. Subong nga si Satanas, nga labi ka gamhanan sa aton, amo ang katapusan nga balagbag sa paghidait sa duta, may yara Isa nga labi ka gamhanan kay Satanas nga sa ulihi magatuytoy sa katawhan padulong sa paghidait. Ang Biblia, nga nagasugid tuhoy kay Satanas, nagasugid man tuhoy sa sining Isa. Ini nagasiling: “Ang prinsipenhon nga paggahom mangin sa iya abaga. Kag tawgon ang iya ngalan Makatilingala nga Manuglaygay, Gamhanan nga Dios, Dayon nga Amay, Prinsipe sang Paghidait.” (Isaias 9:​6, 7) Sin-o ining Prinsipe sang Paghidait? Wala sing liwan kundi amo si Jesucristo, kag mapaluntad niya ang paghidait bangod kapin sia ka kalipikado sa aton. Sa anong mga paagi?

Kapin sa Tawhanon nga mga Kalipikasyon

Una sa tanan, si Jesus indi mamalatyon, wala sa idalom sang kamatayon. Matuod, nangin tawo sia anay kag napatay sa isa ka mahalaron nga kamatayon. Apang ginbanhaw sia padulong sa dimamalatyon nga kabuhi sa langit, kag sa amo sini nga kahimtangan nga sia nangin Prinsipe sang Paghidait. Amo kon ngaa ang tagna nagasiling: “Ang iya ginharian wala sing katapusan.” (Lucas 1:​32, 33) Indi kaangay sang emperador sang Sidlangan nga si Aśoka, si Jesus magakabuhi nga wala sing katapusan agod mapat-od nga ang iya maayong buhat indi paglaglagon sang mga salili nga kubos sa iya.

Dugang pa, si Jesus indi namantsahan sang sala. Ang iya paggahom napasad sa diosnon nga kaalam kag matarong nga mga prinsipio. Ang manalagna nga si Isaias nagtagna: “Kag magadulog sa iya ang espiritu ni Jehova, ang espiritu sang kaalam kag paghangop, ang espiritu sang laygay kag kusog, ang espiritu sang ihibalo kag sang kahadlok kay Jehova . . . Indi sia maghukom suno sa panulok sang iya mga mata, ukon maghusay suno sa pagpamati sang iya mga dulunggan. Kag magahukom sia nga may pagkamatarong sang mga imol.” (Isaias 11:​2-4) Indi kaangay sang mga Europeo sang una, indi paghuptan ni Jesus ang paghidait sa iya banwa agod lamang makig-away sa iban nga mga pungsod. Sa idalom niya, ang paghidait mangin sa bug-os nga uniberso.

Dugang pa, may gahom si Jesus sa pagpaluntad sing paghidait. Ang tagna nagasiling: “Ang espiritu ni Jehova . . . ang espiritu sang laygay kag kusog,” yara sa iya. Ining espiritu amo ang sa likod sang gintuga ang uniberso subong man sa tanan nga gamhanan nga mga buhat sang pagkamatarong nga ginreport sa Biblia. Bisan ang daku nga kaaway, si Satanas, wala sing hinganiban nga makapugong sing madinalag-on sa puwersa sang espiritu sang Dios.

Ang mga Tikang Padulong sa Paghidait

Paano tuytuyan ni Jesus ang katawhan padulong sa paghidait? Mahimo makibot ka nga nasugdan na niya ini. Sa matagnaon nga libro sang Bugna, si Jesus makita nga nagabaton sing pagkahari gikan sa Dios sa isa ka langitnon nga Ginharian. (Bugna 11:15) Kon usisaon naton sing maayo ang mga tagna sang Biblia kag ipaanggid sila sa mga nagakatabo sa aton siglo, makita naton nga si Jesus naglingkod sa trono subong Hari sa langit sang 1914. (Mateo 24:​3-24) Isa yadto ka daku nga tikang sa pagdala sing paghidait sa duta.

Apang, kon amo sina ang natabo, ngaa nagdabdab ang Inaway Kalibutanon I sang 1914? Kag ngaa mas madamo ang inaway sa aton siglo sang sa bisan ano nga tion sa maragtas? Bangod ang una nga ginhimo sang langitnon nga Hari amo ang pagtabog kay Satanas sa langit kag gintagbong sia sa palibot sang duta. Ang resulta? Ang tagna nagasiling: “Kailo sa duta kag sa dagat, kay ang Yawa nagpanaug sa inyo nga nagabalingaso sa kaakig, kay nahibaluan niya nga may malip-ot lamang sia nga tion.” (Bugna 12:​7-12) Ang dalagku nga mga inaway sang aton siglo may kaangtanan sa kaakig ni Satanas. Apang talupangda: ang kaakig ni Satanas sa ‘malip-ot lamang nga tion.’ Ang krisis malapit na matapos!

Apang antes sini, ang Prinsipe sang Paghidait magahimo sing dugang pa nga importante nga mga paghanda para sa paghidait. Sa pag-umpisa, dapat mahibaluan sang katawhan ang katuyuan sang Dios sa pagpaluntad sing paghidait paagi kay Cristo. Sing nagakahisuno, si Jesus nagtagna nga sa aton tion “ining maayong balita sang ginharian pagaibantala sa bug-os napuy-an nga duta subong panaksi sa tanan nga kapungsuran.” (Mateo 24:14) Bilang katumanan sini, ang maayong balita ginabantala karon sang mga Saksi ni Jehova sa tanan nga pamusod sang globo.

Nian, ang matarong sing tagipusuon nga mga tawo dapat tudluan sang mga dalanon sang paghidait. Ang Biblia nagasaad: “Ang tanan mo nga anak tudluan ni Jehova, kag mangin daku ang paghidait sang imo mga anak.” (Isaias 54:13) Minilyon sang mga matarong sing tagipusuon ang nagabaton sini nga pagtudlo bisan sa karon.

Ang Masunod nga Tikang

Halos tion na karon para sa isa pa ka importante nga tikang sa pagpaluntad sing paghidait. Ano ina? Mahimo nga madamo ang nakahibalo sang ngalan sini apang pila lamang ang nakahibalo sang matuod nga katuyuan sini. Ginatawag ini sang Biblia “ang inaway sang daku nga adlaw sang Dios nga Labing Gamhanan,” ukon Armagedon. (Bugna 16:​14, 16) Madamo ang nagahunahuna nga ang Armagedon isa ka nuklear nga inaway nga magalaglag sa sibilisasyon. Sa kabaliskaran, isa ini ka direkta nga buhat ni Jesus, ang Prinsipe sang Paghidait, sa paghimo sang mga butang nga importante sa paghidait.

Una, dulaon sang Armagedon ang tanan nga tawhanon nga balagbag sa paghidait. Ang tagna sa Salmo 37:​10 nagasiling: “Sa diutay pa nga tion, kag ang malauton wala na; kag bisan talupangdon mo sing makugihon ang iya duog, wala na sia didto.” Huo, dulaon ni Jesus “ang malauton”​—⁠ang mga nagatuga sing inaway, ang mga kriminal, ang mga terorista, subong man ang tanan nga nagadumili sa pagbaton sa daku nga Prinsipe sang Paghidait​—⁠gikan sa duta. Wala na sila sing kinamatarong nga magkabuhi pa sa sini nga planeta.​—⁠Bugna 19:​19-21.

Ikaduha, sa Armagedon ini nga tagna ni Daniel matuman: “Sa mga adlaw sadto nga hari magapatindog ang Dios sang langit sing ginharian nga dili gid malaglag. Kag ang ginharian indi pag-ibilin sa iban nga katawhan. Dugmukon sini kag papason ini tanan nga ginharian, kag ini magapadayon tubtob sa wala sing katubtuban.” (Daniel 2:44) Ang dibisyon sa mga pungsod nga sa masami amo ang nagadul-ong sa inaway dulaon na. Sa katapusan, magaluntad ang isa ka bug-os kalibutan nga gobierno sa idalom sang isa ka manuggahom nga aton masaligan!

San-o magaabot ang Armagedon? Ang Biblia wala nagasiling. Apang ang mga hitabo sa kalibutan bilang katumanan sang tagna nagapakita nga malapit na ini. Maathag nga ginatagna sang Biblia ang isa ka hitabo nga magauna sa sini. Si apostol Pablo nagsiling: “Kon magsiling sila: ‘Paghidait kag kalig-unan!’ nian sa hinali ang kalaglagan magaabot sa ila.” (1 Tesalonica 5:3) Nian, sa gilayon sa tapos sang hinali nga kalaglagan sa tion sang Armagedon, ang pinakadaku nga balagbag sa paghidait dulaon na. Ang “malip-ot nga tion” ni Satanas matapos na, kag ibutang sia sa isa ka kahimtangan nga sa diin indi sia makapanggamo diri sa duta. (Bugna 20:​1-3) Daw ano nga paumpaw!

Isa ka Kalibutan nga May Paghidait

Ilaragway ang kahimtangan sa amo nga tion. Ang salmista nagtagna: “Ang mahagop magapanag-iya sang duta, kag magakalipay sila sa kabuganaan sang paghidait.” (Salmo 37:11) Padayon nga tumanon sining mga mahagop ang matahom nga tagna ni Isaias: “Salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.”​—⁠Isaias 2:⁠4.

Sa katapusan, sa nahauna nga tion sugod sa Eden, ang tanan nga nagakabuhi nga katawhan magaagom sang pagpakamaayo ni Jehova, kag tumanon niya ang iya saad: “Yari karon! Ang kayangkayang sang Dios upod sa mga tawo, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahauna nga mga butang nagtaliwan.”​—⁠Bugna 21:​3, 4.

Isa ka Malig-on nga Paglaum

Sin-o, nian, ang magatuytoy sa katawhan padulong sa paghidait? Amo si Jesucristo, ang gintangdo nga Prinsipe sang Paghidait. Praktikal bala ini nga paglaum para sa aton karon? Ti, kon wala ang mga saad sang Biblia, wala sing matuod nga paglaum para sa paghidait. Ang mga tawo magapadayon sa pag-ilinaway kag sa pagpatyanay nga wala sing katapusan. Apang ang Biblia masaligan, kag ang Ginharian sang Dios sa idalom ni Cristo magapaluntad sing paghidait. Ginapalig-on ka namon nga pamatian ang maayong balita sang Ginharian nga ginadala sang mga Saksi ni Jehova sa imo puluy-an kag usisaa ini para sa imo kaugalingon. Nian, kon mag-abot na ang tion, kabay nga lakip ka sa mga mahagop nga magapanubli sang duta kag magakalipay sa kabuganaan sang paghidait.

Ang paglaum para sa paghidait nga ginpaathag sa sining artikulo naghalin sa Biblia. Sa karon, nga madamo ang wala na nagapati sa Biblia, mahimo nga magaduhaduha ka kon bala praktikal ini nga paglaum. Ang mga Saksi ni Jehova malig-on nga nagapati nga praktikal ini. Ginabaton nila ang Biblia subong inspirado nga Pulong sang Dios, busa masaligan sing bug-os. Sang 1989 nagbalhag sila sing libro nga natig-uluhan The Bible​—⁠God’s Word or Man’s? nga nagapresentar sing madamo nga pamatuod sa sini nga kamatuoran. Ang pila sang impormasyon sa sina nga libro ginpaathag sa masunod nga duha ka artikulo, nga ginaagda namon ka nga basahon.

Dugang pa nga impormasyon nahanungod sa ginsaad sang Biblia nga paghidait ang magaguwa sa artikulo nga “Paghidait sa Kalibutan​—⁠Ano Gid ang Kahulugan Sini?” nga ibalhag sa Abril 15, 1990, nga guwa sang Ang Lalantawan.

[Blurb sa pahina 8]

Si Jesus lamang ang may mga kalipikasyon sa pagtuytoy sa katawhan padulong sa paghidait

[Blurb sa pahina 9]

Sa karon, ang maayong balita sang Ginharian ginabantala sa tanan nga pamusod sang globo