Ginaapresyar Mo Bala ang Nahimo sang Dios?

“Kon sin-ong tawo buot magsunod sa akon, magsikway sia sang iya kaugalingon kag magpas-an sang iya usok sang pag-antos adlaw-adlaw kag magsunod pirme sa akon.”​—⁠LUCAS 9:⁠23.

1. Ano ang iban sang matahom nga mga regalo nga ginaaman sang Dios?

UTANG naton sa Dios ang aton kabuhi. Kon wala niya pagtugaha ang tawo, wala gid kuntani kita mabun-ag. Apang labi pa sa kabuhi ang gintuga sang Dios. Ginhimo niya kita agod magkalipay kita sa madamo nga mga butang: sa sabor sang pagkaon, sa kainit sang silak sang adlaw, sa tunog sang musika, sa pagkapresko sang adlaw sa tigpamulak, sa kalum-ok sang gugma. Dugang pa, ginhatagan kita sang Dios sing hunahuna kag handum nga magtuon nahanungod sa iya. Ginbugna niya ang Biblia, nga nagahatag sa aton sing maligdong nga panuytoy, nagapakita sa aton kon paano magkabuhi sing mas malipayon, kag nagahatag sing paglaum nga magkabuhi sing dayon sa iya matarong nga bag-ong kalibutan. Gin-aman man sang Dios ang iya balaan nga espiritu, ang supurta sang lokal nga kongregasyon, kag ang mahigugmaon nga mga gulang kag mga babayi nga nagabulig sa aton nga magpabilin nga mabakod sa pag-alagad sa iya.​—⁠Genesis 1:​1, 26-28; 2 Timoteo 3:​15-17; Hebreo 10:​24, 25; Santiago 5:​14, 15.

2. (a) Ano ang labing tumalagsahon nga butang nga ginhimo sang Dios sa aton? (b) Matigayon bala naton ang kaluwasan paagi sa mga binuhatan?

² Dugang sa sini tanan, ginpadala sang Dios ang iya panganay nga Anak sa pagsugid sa aton sing dugang nahanungod sa kon ano ang ginapaabot sang Amay sa aton kag sa paghatag sing “pagtubos” para sa tanan nga magabaton sini. (Efeso 1:7; Roma 5:18) Ining anak, si Jesucristo, nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala, kundi may kabuhi nga walay katapusan.” (Juan 3:​16, King James Version) Ang kaluwasan nga ginpaposible bangod sina nga pagtubos superlatibo sa bili sa bagay nga ang bisan sin-o indi gid makahimo sing mga buhat agod matigayon ini, sa pagkamatuod indi mga buhat nga ginhimo anay sa idalom sang Mosaikong Kasuguan. Gani, si Pablo nagsulat: “Ang tawo ginapakamatarong, indi paagi sa mga buhat sang kasuguan, kundi paagi sa pagtuo kay Cristo Jesus.”​—⁠Galacia 2:16; Roma 3:​20-24.

Pagtuo kag mga Binuhatan

3. Ano ang ginsiling ni Santiago nahanungod sa pagtuo kag mga binuhatan?

³ Ang kaluwasan nagaabot paagi sa pagtuo, apang ang pagtuo kag apresasyon para sa tanan nga ginhimo sang Dios dapat magpahulag sa aton nga magpanghikot. Dapat ini magpahulag sa aton sa paghimo sing mga butang nga nagapakita sang aton pagtuo. Ang utod sa iloy ni Jesus nga si Santiago nagsulat: “Ang pagtuo, kon walay mga binuhatan, patay sa iya kaugalingon.” Nagsiling sia sing dugang: “Ipakita sa akon ang imo pagtuo nga walay mga binuhatan, kag ako bangod sang akon mga binuhatan magapakita sa imo sang akon pagtuo.” Ginpakita ni Santiago nga bisan ang mga demonyo “nagatuo kag nagakurog,” apang sing hayag ang mga demonyo wala nagahimo sing diosnon nga mga binuhatan. Si Abraham, sa pihak nga bahin, may pagtuo kag mga binuhatan. “Ang iya pagtuo nagahikot kaupod sang iya mga binuhatan kag bangod sang iya mga binuhatan ang iya pagtuo ginhimpit.” Si Santiago nagsulit: “Ang pagtuo patay kon wala mga binuhatan.”​—⁠Santiago 2:​17-26.

4. Ano ang ginsiling ni Jesus nga dapat himuon sang maluyag magsunod sa iya?

⁴ Ginpakita man ni Jesus ang importansia sang maayong mga binuhatan, nga nagasiling: “Ig-iwag ninyo ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa langit.” “Kon bisan sin-ong tawo buot magsunod sa akon, magsikway sia sang iya kaugalingon kag magpas-an sang iya usok sang pag-antos adlaw-adlaw kag magsunod pirme sa akon.”⁠a Kon ‘ginasikway’ naton ang aton kaugalingon, ginaampo naton ang madamo sang aton personal nga mga luyag. Ginabaton naton nga utang naton sa Dios ang tanan, gani ginatugyan naton ang aton kaugalingon sa iya subong mga ulipon niya, nagapanikasog nga mahibaluan kag mahimo ang iya kabubut-on, subong sang ­ginhimo ni Jesus.​—⁠Mateo 5:16; Lucas 9:23; Juan 6:⁠38.

Apektado ang Kabuhi

5. (a) Ano ang ginapakita ni Pedro nga dapat mag-apektar sang aton bug-os nga dalanon sang kabuhi? (b) Anong maayong mga binuhatan ang ginarekomendar niya?

⁵ Ginpakita ni Pedro nga ang “hamili nga dugo” ni Cristo, nga ginhatag tungod sa aton, superyor gid sa bili sa bagay nga ang aton apresasyon para sa sini dapat makita sa aton bug-os nga dalanon sang kabuhi. Ginlista sang apostol ang madamong mga butang nga dapat ipahulag sang aton apresasyon nga himuon naton. Sia naglaygay: “Isikway ang tanan nga kalautan.” “Handuma ang gatas nga walay simbog nga iya sang pulong.” “Ipahayag ang gamhanan nga mga buhat sang nagtawag sa inyo gikan sa kadudulman pakadto sa iya kalatingalahan nga kapawa.” “Maglikaw sa kalautan kag maghimo sing matarong.” “Maghanda sa pag-apin sang paglaum nga yara sa inyo sa kay bisan sin-o nga magpamangkot sa inyo.” “Indi na pag-ikabuhi ang nabilin nga tion [ninyo] sa unod sa mga kailigbon sang mga tawo, kundi sa kabubut-on sang Dios.”​—⁠1 Pedro 1:19; 2:​1, 2, 9; 3:​11, 15; 4:⁠2.

6. (a) Paano ginpakita sang unang-siglo nga mga Cristiano ang ila pagtuo? (b) Anong halimbawa ang ginapahamtang sini para sa aton?

⁶ Ang unang-siglo nga mga Cristiano nagkabuhi sa ila pagtuo. Nagbalhin ini sang ila panimuot kag sang ila mga personalidad, nagpahulag sa ila nga ipahisuno ang ila kabuhi sa kabubut-on sang Dios. Nag-antos sila sing pagkatapok, pagbato, pagbunal, pagkabilanggo, kag bisan sing kamatayon sa baylo nga pakahuy-an ang ila pagtuo. (Binuhatan 7:​58-60; 8:1; 14:19; 16:22; 1 Corinto 6:​9-11; Efeso 4:​22-24; Colosas 4:3; Filemon 9, 10) Ang bantog nga Romanong istoryador nga si Tacitus, natawo sang mga 56 C.E., nagasiling nga ang mga Cristiano “ginpamatbatan sa mga kalayo kag ginsunog, agod mangin sulu sa gab-i, kon wala na ang adlaw.” Apang wala sila magluya!​—⁠The Annals, Book XV, parapo 44.

7. Sa anong kahimtangan mahimo nasapwan sang mga tawo ang ila kaugalingon?

⁷ Sa iban nga mga kongregasyon mahimo makita mo ang mga tawo nga nagatambong sa mga miting sing tinuig na. Ginahigugma nila ang organisasyon ni Jehova, nagahunahuna nga ang iya katawhan amo ang pinakamaayo nga mga tawo nga nakilala nila, nagakomento sing maayo nahanungod sa kamatuoran, kag nagapangapin sang kamatuoran sa mga tagaguwa. Apang may butang nga nagabalabag sa ila dalanon, butang nga nagapugong sa ila. Wala gid nila paghimua ang maayong tikang nga ginhimo sang 3,000 sadtong adlaw sang Pentecostes, nga ginpamangkot sang nagtuo nga Etiopiahanon, ukon nga ginlaygay ni Ananias kay Saulo nga himuon sa gilayon nga narealisar sining manughingabot anay nga si Jesus amo gid ang Mesias. (Binuhatan 2:41; 8:36; 22:16) Ano ang kulang sa ila karon? Ngaa wala nila paghimua ang tikang nga ginatawag sang Biblia nga “pakiluoy sa Dios tungod sa maayo nga konsiensia”? (1 Pedro 3:21) Kon nasapwan mo ang imo kaugalingon sa sini nga kahimtangan​—⁠nakahibalo sang kamatuoran apang nagapangalag-ag sa paghulag nahanungod sini⁠—​kabiga ini nga artikulo subong nga ginhanda bangod sang pinasahi nga gugma sa imo.

Paglandas sa mga Upang Padulong sa Bawtismo

8. Kon ikaw indi gid isa ka maayong estudyante, anong maalamon nga dalanon ang himuon karon?

⁸ Ano ang mahimo nga makabalabag sa imo dalanon? Ginpakita sang nagligad nga artikulo nga ayhan nasapwan sang iban nga problema ang personal nga pagtuon. Ang Dios naghatag sa aton sing makatilingala nga hunahuna, kag ginapaabot niya nga gamiton naton ini sa pag-alagad sa iya. Ang iban nga mga tawo nga indi makahibalo magbasa nagtinguha sa pagtuon agod makatuon sila sing dugang pa nahanungod sa Dios kag sa iya mga katuyuan. Kamusta ka? Kon nakahibalo ka na magbasa, nagatuon gid bala ikaw, subong sang ginhimo sang mga taga-Berea, “nag-usisa sing maayo sang Kasulatan sa adlaw-adlaw” agod hibaluon kon matuod gid ining mga butang? Ginlagulad mo bala ang “kalaparon kag kalabaon kag kataason kag kadalumon” sang kamatuoran? Ginkutkot mo bala sing madalom ang Pulong sang Dios? Nasapwan mo bala kon daw ano gid ini ka makakulunyag? Nakapalambo ka bala sing matuod nga handum sa paghibalo sang kabubut-on sang Dios? May yara ka bala matuod nga pagkagutom ­sa kamatuoran?​—⁠Binuhatan 17:​10, 11; Efeso 3:⁠18.

9. Ano ang husto nga himuon kon may problema ka sa iban sa kongregasyon?

⁹ Kon kaisa ang mga tawo nagaisol bangod sang ila matuod ukon ginahanduraw nga problema sa iban sa kongregasyon. May isa bala nga nagpaakig gid sa imo? Nian sunda ang giya nga ginpakita sa pinamulong ni Jesus: “Isugid sa iya ang sayop niya sa tunga ninyo nga duha lamang.” (Mateo 18:15) Mahimo ka makibot sa paghibalo nga wala gani sia makahibalo nga naakig ka. Apang kon nakahibalo gid man sia, mahimo mo gihapon ‘madaug ang imo utod,’ subong sang ginsiling ni Jesus. Mahimo mo sia mabuligan nga likawan ang pagpasandad sa iban. Isa pa, kon hunahunaon mo ini, sin-o gid bala ang imo ginaalagad​—⁠ina nga tawo ukon ang Dios? Limitado gid bala ang imo gugma sa Dios sa bagay nga tugutan mo ang sayop sang dihimpit nga tawo nga mag-upang sang imo gugma para sa Iya?

10, 11. Ano ang dapat mo himuon kon ang tago nga sala nagapugong sa imo?

¹⁰ Ang isa ka tago nga sala mahimo magapugong sa isa sa pagpabawtismo. Ayhan butang ini nga natabo sang nagligad, ukon ayhan isa ka nagapadayon nga sayop nga talaksan. Kon problema ini para sa imo, indi bala tion na nga tadlungon ini? (1 Corinto 7:​29-31) Madamo sang katawhan ni Jehova ang naghimo sing mga pagbag-o sa ila pagkabuhi. Ang Biblia nagasiling: “Busa, hinulsol kamo, kag magliso agod mapanas ang inyo mga sala, kag mag-abot ang mga panag-on sang pagpaumpaw gikan sa atubangan ni Jehova.”​—⁠Binuhatan 3:⁠19.

¹¹ Bisan ano man ang ginhimo mo sang nagligad, mahimo ka maghinulsol, magbag-o, kag mangayo sing kapatawaran sa Dios. “Busa, patya ninyo ang inyo mga katapo sang lawas nga dutan-on kon tuhoy sa pagkamakihilawason, kahigkuan, malaut nga balatyagon, malaut nga handum . . . Ubaha ninyo ang daan nga personalidad upod ang mga buhat sini, kag isul-ob ang bag-ong personalidad, nga ginapabag-o sa sibu nga ihibalo suno sa larawan sang Isa nga nagtuga sini.” Sarang mo mapahisanto ang imo kabuhi sa iya mga dalanon, maagom ang maayo nga konsiensia, kag may paglaum sang kabuhi nga walay katapusan sa iya matarong nga bag-ong kalibutan. Indi bala ina takus sa bisan anong panikasog nga kinahanglanon?​—⁠Colosas 3:​5-10; Isaias 1:​16, 18; 1 Corinto 6:​9-11; Hebreo 9:⁠14.

12. Ano ang dapat mo himuon kon ang tabako, abuso sa alkohol, ukon makapagiyan nga droga nagabalabag sa imo kag sa matinlo nga konsiensia?

¹² Ang paggamit sing tabako, abuso sa alkohol, ukon pagkagiyan sa droga nagabalabag bala sa imo kag sa matinlo nga konsiensia? Indi bala inang mga batasan nga nagabutang sa katalagman sang kabuhi nagapakita sing dipagtahod sa makatilingala nga dulot sang Dios nga kabuhi? Kon ina nga mga batasan nagabalabag sa imo dalanon, sigurado gid nga tion na nga tadlungon ini. Ini bala nga mga batasan mapuslanon sa imo kabuhi? Si Pablo nagsiling: “Tinluan ta ang aton kaugalingon sang tanan nga kadagtaan sang lawas kag espiritu, kag himpiton ta ang pagkabalaan sang kahadlok sa Dios.” Ginaapresyar mo bala ang matinlo kag matarong nga dalanon sang Dios sa bagay nga mahimo mo ina?⁠b​—⁠2 Corinto 7:⁠1.

Materyal nga mga Butang

13, 14. (a) Ano ang ginasiling sang Kasulatan nahanungod sa materyal nga mga tulumuron? (b) Ngaa importante nga unahon ang langitnon nga mga butang?

¹³ Ginabutang sang kalibutan karon ang kadalag-an kag ang “pakitakita nga pangabuhi” nga una sa halos tanan nga butang. Apang ginpaanggid ni Jesus “ang mga paghimud-os sining sistema sang mga butang kag ang paglimbong sang manggad” sa “mga talungon” nga naglumos sang pulong sang Dios. Namangkot man sia: “Ano bala ang mapulos sang tawo kon maangkon niya ang bug-os nga kalibutan kag madula ang iya kalag?”​—⁠1 Juan 2:16; Marcos 4:​2-8, 18, 19; Mateo 16:⁠26.

¹⁴ Ginpakita ni Jesus nga ginhimo sang Dios nga ang mga pispis makakita sing kalan-on kag ang mga lirio magpamulak sing halangdon. Nian namangkot sia: “Daw ano kamo kamahal pa sa mga pispis? . . . Daw ano pa bala nga panaptan kamo [sang Dios]!” Sing maalamon, si Jesus nagsiling sa aton nga “indi maghimud-os” sa materyal nga mga butang. Sia nagsiling: “Padayon nga pangitaa ang ginharian [sang Dios], kag ining tanan nga butang idugang sa inyo.” Ginpakita niya nga dapat naton unahon ang langitnon nga mga butang bangod ‘kon diin ang aton bahandi, didto man ang aton tagipusuon.’​—⁠Lucas 12:​22-31; Mateo 6:​20, 21.

Diosnon nga Pag-alagad sa Bulig sang Dios

15. Anong maayong laygay ang ginahatag sa aton sang halimbawa sang unang-siglo nga mga Cristiano?

¹⁵ Problema bala para sa imo ang pagpanaksi sa iban? Ang pagkamahuluy-on bala ang nagapugong sa imo? Kon amo, importante dumdumon nga ang unang-siglo nga mga Cristiano may mga balatyagon nga kaanggid sang sa aton karon. Wala ginpili sang Dios ang madamong maalam kag gamhanan, kundi ginpili niya “ang mga maluya sa kalibutan, sa pagpakahuya sa makusog.” (1 Corinto 1:​26-29) Ginapamatukan sang gamhanan nga mga lider sang relihion ining “ordinaryo” nga mga tawo kag ginmanduan sila nga mag-untat sa pagbantala. Ano ang ginhimo sang mga Cristiano? Nangamuyo sila. Nangabay sila sa Dios sing kasidla, kag ginhatag niya ini sa ila. Subong resulta, ang ila mensahe nagpuno sang Jerusalem kag sang ulihi sang bug-os nga kalibutan!​—⁠Binuhatan 4:​1-4, 13, 17, 23, 24, 29-31; 5:​28, 29; Colosas 1:⁠23.

16. Ano ang matun-an naton gikan sa dakung “kadam-an sang mga saksi” nga ginalaragway sa Hebreo kapitulo 11?

¹⁶ Busa, ang kahadlok sa tawo indi dapat magbalabag sa aton kag sa pag-alagad sa Dios. Ginasugid sa aton sang Hebreo kapitulo 11 ang dakung “kadam-an sang mga saksi” nga nagkahadlok, indi sa mga tawo, kundi sa Dios. Dapat man naton ipakita ang kaanggid nga pagtuo. Ang apostol nagsulat: “Sanglit ginalibutan kita sing tama kadaku nga panganod sang mga saksi, isikway ta man ang tagsa ka kabug-atan, kag ang sala nga nagatapik gid, kag magdalagan kita nga may pagbatas sang dalaganon nga ginabutang sa aton atubang.”​—⁠Hebreo 12:⁠1.

17. Anong laygay ang ginhatag sang Dios paagi kay Isaias?

¹⁷ Ang Dios sarang makahatag sa iya mga alagad sing daku nga bulig. Ang Manunuga sang uniberso nagsiling kay Isaias: “Ang mga nagahulat kay Jehova magabag-o sang ila kusog. Magatimbuok sila nga may mga pakpak subong sang mga agila. Magadalagan sila kag indi paglapyuon; magalakat sila kag indi pagpunawon.”​—⁠Isaias 40:​31.

18. Paano mo malandas ang pagkamahuluy-on agod nga makapakigbahin ka sa pagbantala sang Ginharian?

¹⁸ Ang maisog kag malipayon nga mga Saksi nga nakita mo sa lokal nga kongregasyon diutay lamang nga bahin sang sobra sa tatlo ka milyon kag tunga ka makugi nga mga alagad sa bug-os nga duta. Nagakalipay sila nga makigbahin sa hilikuton nga gintagna mismo ni Jesucristo sa sining mga pulong: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” Kon ang pagpakigbahin sa pagbantala sang Ginharian nagahatag sing problema sa imo bisan pa kalipikado ka sa paghimo sini, ngaa indi mo pangabayon ang isa ka Saksi nga maayo sa ministeryo nga paupdon ka niya sa pagpakigbahin sa pagbantala nga hilikuton? Ang Dios tunay nga nagaaman sing “gahom nga labaw sa kinaandan,” kag makibot ka sa pagtukib kon daw ano gid ka makalilipay ining diosnon nga pag-alagad.​—⁠Mateo 24:14; 2 Corinto 4:7; tan-awa man ang Salmo 56:11; Mateo 5:​11, 12; Filipos 4:⁠13.

19. Anong hilikuton sa pagpanudlo ang ginsugo ni Jesus sa iya mga sumulunod nga himuon?

¹⁹ Ginapaabot ni Jesus sa mga nagaapresyar sang mensahe sang Ginharian nga maghulag sa sini. Sia nagsiling: “Busa lakat kamo kag maghimo sing mga disipulo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga ginsugo ko sa inyo.”​—⁠Mateo 28:​19, 20.

20. Kon nagauswag ka sa espirituwal, anong pamangkot ang nagakaigo sa ulihi?

²⁰ Ang imo bala apresasyon sa mga pagpakamaayo sang Dios, sa “hamili nga dugo” ni Jesus, kag sa dalayawon nga paglaum sang kabuhi nga walay katapusan nagapahulag sa imo nga magpanghikot? (1 Pedro 1:19) Ginpahisanto mo bala ang imo kabuhi sa matarong nga mga kinahanglanon sang Dios? Nagapakigbahin ka bala sing tayuyon sa paghimo sing mga disipulo? Ginsikway mo bala ang imo kaugalingon kag gindedikar ang imo kabuhi sa Dios? Kon ang sabat sa sining tanan nga pamangkot amo gid ang huo, ayhan tion na nga pamangkuton ang isa sa mga gulang sa kongregasyon nga ginatambungan mo sang pamangkot nga ginpakiana sang tumuluo nga Etiopiahanon kay Felipe: “Ano bala ang nagasablag sa akon sa pagpabawtismo?”​—⁠Binuhatan 8:⁠36.

[Mga footnote]

Madumduman Mo Bala?

◻ Ano ang aton pinasahi nga mga rason agod pasalamatan ang Dios?

◻ Ano dapat ang ipahulag sang pagtuo kag apresasyon sa aton nga himuon?

◻ Anong mga problema ang mahimo nga magbalabag sa aton kag sa pagtuman sa Dios, kag ano ang mahimo naton tuhoy sini?

◻ Anong mga pamangkot ang ipamangkot sang mga tawo nga indi pa bawtismado sa ila kaugalingon?

[Kahon sa pahina 18]

‘Ano nga sahi sang “duta” ako?’

Si Jesus naghatag sing ilustrasyon nahanungod sa isa ka tawo nga naglakat sa pagsab-ug sing binhi. Ang iban nga binhi nagtupa sa higad sang dalan kag gintuka sang mga pispis. Ang iban nagtupa sa batuhon nga mga lugar nga diutay sing duta. Ini nagtubo, apang sang nagguwa ang adlaw, nalaya ini kag napatay. Ang iban pa nga mga binhi nagtupa sa mga talungon kag nalumos. Si Jesus nagsiling nga ining tatlo ka grupo nagrepresentar: una, sa tawo nga “nagapamati sang pulong sang ginharian apang wala makahangop sini”; ikaduha, sa isa nga nagabaton sang pulong apang nagtalikod bangod sang kainit sang “kapipit-an ukon paghingabot”; kag ikatlo, sa tawo nga sa iya ang “paghimud-os sining sistema sang mga butang kag paglimbong sang manggad naglumos sang pulong.”

Apang nagsugid man si Jesus sang isa pa ka binhi nga nagtupa sa maayo nga duta. Sia nagsiling: “Amo ini sia ang nagapamati sang pulong kag nagahangop sini, sia gid nagapamunga.”​—⁠Mateo 13:​3-8, 18-23.

Maayo nga pamangkuton ang kaugalingon: ‘Ano nga sahi sang “duta” ako?’

Napatay sila tungod sa ila pagtuo

May kilala ka bala nga handa mapatay sa baylo nga supakon ang ila pagtuo? Linibolibo ka Saksi ni Jehova ang naghimo sina. Sa The Nazi State and the New Religions: Five Case Studies in Non-Conformity, si Dr. Christine E. King nagsulat: “Isa sa kada duha ka Aleman nga Saksi ang ginbilanggo, isa sa apat ang napatay.”

Sang ang kakugmat sa mga kampo natapos gid man sang 1945, “ang kadamuon sang mga Saksi nagdugang kag wala sing nahimo nga mga kompromiso.” Sa The Nazi Persecution of the Churches, si J. S. Conway nagsulat tuhoy sa mga Saksi: “Wala sing iban nga sekta ang nagpakita sing determinasyon nga kaangay sini sa atubangan sang bug-os nga puwersa sang terorismo sang Gestapo.”

Ang mga Saksi ni Jehova wala ginhingabot bangod sang politika ukon rasa. Sa baylo, nag-antos sila bangod lamang sang ila gugma sa Dios kag sang pagdumili nila nga lapason ang ila nahanas sa Biblia nga mga konsiensia.