Ginpakamaayo ni Jehova ang Akon Determinasyon

PANUGIRON NI RICHARD WUTTKE

“Mapatay ka sa sulod sang tatlo ka bulan!” “Ano ang buot mo silingon?” “Amo ina ang ginsugid sa akon sang doktor nga ginpakonsultahan mo sa Assis,” sabat sang akon utod nga si William.

APANG luyag ko pa mabuhi, indi mapatay. Sa nahauna nga tion, nangamuyo ako sa Dios kag nangayo sing bulig. Sing makalilipay, pagligad sang 46 ka tuig, masiling ko nga bisan pa wala ginsugid sang doktor kon ano ang akon balatian, sayop ang iya panayasat. Apang, bangod sang kakulba, ginbinagbinag ko ang akon katuyuan sa kabuhi kag nga dapat ko alagdon ang aton Manunuga.

Nagsaylo ang Amon Pamilya

Sang matawo ako sang Nobiembre 11, 1921, ang akon mga ginikanan nagapuyo sa Grosen, isa ka diutay nga banwa sa nasidlangan nga Alemanya. Natawo sila sa Rusya sa Aleman nga mga imigrante. Apang, sang ginpasulod sang Bolshevik nga rebolusyon sang 1917 ang Komunismo, sila upod sa iban pa nga halin sa Alemanya gintapok kag nadula nila ang tanan nila nga pagkabutang. Sa tapos sang malawig nga paglakbay paagi sa kargahan nga tren, ang akon mga ginikanan kag ang ila diutay nga kabataan nag-abot sa Aleman nga dulunan. Apang, wala sila pagpasudla, gani nagbalik sila sa Rusya. Wala man sila pagpasudla didto, gani nagbalik sila sa Alemanya. Pagligad sang binulan nga kabudlayan, gintugutan sila liwat sang ulihi sa pagsulod sa pungsod.

Ang akon amay napatay sang dies anyos ako. Duha ka tuig sang ulihi, sang 1933, si Hitler nakatigayon sing gahom, kag napilitan ako sa pagbuylog sa Nazi Youth nga kahublagan. Sa tion sang paggahom ni Hitler, nag-utwas ang problema para sa mga Aleman nga natawo sa iban nga pungsod, kag may pamatuod nga ang Aleman nagahanda para sa inaway. Gani namat-od kami nga magsaylo sa Brazil, kay napalig-on kami sang iban nga nagsaylo na didto. Nag-abot kami sa Santos, Brazil, sang 1936.

Sa tapos makatrabaho sing pila ka bulan sa plantasyon sang kape, nagbakal kami sing diutay nga uma sa matambok nga rehiyon malapit sa Maracaí sa estado sang São Paulo. Samtang ginapatindog namon ang amon balay, nag-istar anay kami sa balay sang isa ka Luterano nga ministro. Ginpalig-on niya kami nga magtambong sa iya iglesia apang sang sia, kag sang ulihi ang nagbulos sa iya, nagsugod sa paghambal nahanungod sa politika sa iya mga sermon, naghalin kami sa iglesia.

Nahauna nga Pagkabati sang Kamatuoran sang Biblia

Sa amo sini nga tion nga ginsugiran ako sang akon utod nga lalaki nahanungod sa makahaladlok nga panayasat sang doktor. Gani nagkadto ako sa São Paulo agod magpakonsulta sa iban nga doktor. Samtang didto ako, ang pamilya nga akon gindayunan ginduaw sang isa ka abyan nila, si Otto Erbert. Isa sia sang mga Saksi ni Jehova, kag nagsugod sia sa pagpanaksi sa amon. Apang, wala pag-apresyaha sang pamilya ang iya ginahambal, kag sing isa-isa nagguwa sila tanan sa kuwarto, kag ako na lang ang nabilin upod sa ila bisita.

Duha ka oras nga ginpaathag sa akon ni Otto ang mga tema tuhoy sa kalayuhon nga impierno; pagkadimamalatyon sang kalag; ang matuod nga Dios, nga si Jehova; ang iya ginharian; kag ang paglaum nga magkabuhi sing dayon sa paraiso nga duta. Daw ano ka masanag nga palaabuton ang iya ginlaragway! Daw ano ka tuhay gikan sa akon natun-an sa Luterano nga Iglesia! Sang ulihi, namangkot si Otto: “Nagapati ka bala sa dimatuod nga mga panudlo sang Cristiandad ukon sa Biblia?”

“Sa Biblia,” sabat ko.

“Kon amo tun-i ini!” palig-on niya, kag nagdugang: “Kon luyag mo makabati sing dugang pa nahanungod sini, kadtui ako.” Sanglit naluyagan ko ang akon nabatian, labi na ang nahanungod sa pagkabuhi sing dayon sa duta, ginkadtuan ko sia sang masunod nga adlaw. Yadtong ikaduha nga pagpakighambal sa iya nagkombinse sa akon nga nasapwan ko ang ‘kamatuoran nga nagahilway sa katawhan.’ (Juan 8:32) Naghalin ako nga dala ang polyeto nga Health and Life, kag ang imbitasyon sa isa ka pagtuon sa Biblia sa Aleman.

Pagtuman sang Akon Pinakadaku nga Handum

Samtang, natigayon ko ang nagakaigo nga pagpabulong sa doktor kag nagpauli ako. Ginpaupod ko si Otto Erbert agod magbakasyon. Nalipay gid ang akon iloy nga nagatuon ako sing Biblia, ang libro nga yara pirme sa ibabaw sang amon lamesa apang wala gid mabasa. Sang makabalik na si Otto sa São Paulo, nagdumala ako sing pagtuon sa Biblia upod sa akon pamilya halos kada gab-i, sa labi nga masarangan ko. Sobra gid ang kalipay ko sang ginbaton tanan sang akon iloy, akon utod nga lalaki nga si Robert, kag sang akon utod nga babayi nga si Olga ang mensahe sang kamatuoran. Ang amon balay pirme anay sentro sang sosyal nga aktibidad, apang pagligad sang amon mga duha ka bulan nga pagpanaksi, halos nangin wala ini sing unod. Ang isa sang pirme anay nagakadto sa amon balay nagsiling: “Kon padayunon ninyo ini, magatupa kamo sa balay nga dalangpan!”

Apang, nagbaskog pa ang akon handum nga alagdon si Jehova. Nagtigayon ako sing dugang pa nga mga publikasyon kag ginbasa ko ini tanan tubtob sa kagab-ihon. Apang ang tanan nga literatura Aleman, kag narealisar ko nga agod matudluan ko ang iban, dapat ako magtuon sing Portuges. Gani, sang 1945, nagsaylo ako sa São Paulo agod magtuon sing Portuges. Nag-istar ako kay Otto Erbert, nga sang ulihi nagpakasal sa akon utod nga babayi nga si Olga.

Upod sa mga 50 pa, nagsugod ako sa pagtambong sa mga miting sa isa lamang ka Kingdom Hall sa São Paulo. Yadtong isa ka kongregasyon nagdamo kag nangin kapin sa 510 ka kongregasyon sa kadak-an sang São Paulo, nga may kapin sa 50,000 ka manugbantala sang Ginharian. Sang Enero 6, 1946, ginbawtismuhan ako bilang simbulo sang akon dedikasyon sa paghimo sang kabubut-on sang Dios. Sadto gihapon nga tuig nagtambong ako sa “Glad Nations” nga Teokratikong Asambleya sa São Paulo, ang akon nahauna nga daku nga asambleya. Daw ano ka makakulunyag nga makita ang 1,700 ka tawo nga nagtambong sang Domingo! Sa sini nga kombension nakilala ko si Otto Estelmann, nga nagpalig-on sa akon, nga nagasiling: “Richard, bata pa ikaw; mapagros ikaw; gani magpayunir ka.”

Nabinagbinag ko na anay ang bug-os tion nga ministeryo, apang karon ginbinagbinag ko ini sing kapin ka serioso. Upod sa duha pa ka utod, nagtalana ako sing anom ka bulan antes mag-umpisa. Sang mag-abot ini nga tion, namangkot ako: “Handa na bala kamo sa paglakat?” Pareho sila nga indi pa handa. Gani ginsingganan ko sila nga handa na ako. “Mabudlayan ka lang,” paandam nila. Apang gindayon ko ang akon desisyon. Sang Mayo 24, 1947, nabaton ko ang akon asaynment subong isa ka regular nga payunir.

Nagbukas ang Bag-o nga mga Ganhaan sang Pag-alagad

Daku gid ang akon teritoryo, lakip ang residensial kag ang komersial nga mga bahin sang São Paulo. Nakapahamtang ako sing ginatos ka libro kag polyeto kada bulan. Isa ka aga nagsulod ako sa isa ka daku nga kuwarto nga diin may pila ka tawo nga nagaulubra. Ginpalapitan ko ang nahauna nga tawo kag gintanyagan sia sing libro nga “The Truth Shall Make You Free.”

“Pila ka libro ang yara sa sulod sang imo bag?” pamangkot niya.

“Mga 20,” sabat ko. Ginkuha niya ini tanan kag ginpanghatagan niya ang kada isa ka tawo didto. City hall gali yadto!

Apang, ang akon labing daku nga kalipay amo ang pagdumala sang pagtuon sa Biblia. Sa sulod sang apat ka tuig, salamat kay Jehova, 38 sang akon ginatun-an ang nabawtismuhan. May pila nga nagpili sang bug-os tion nga ministeryo. Lakip sa ila amo si Afonso Grigalhunas, nga nag-alagad subong auxiliary payunir, tubtob sang mapatay sia sang 1988​—⁠kag walay sapayan nga ang isa sang iya mga tiil artipisyal. Amo man ang pamilya nga Ciuffa. Si Francisco, ang anak nga lalaki, nag-alagad sa sulod sang tinuig subong nagalakbay nga manugtatap, kag ang iya utod nga babayi, si Ângela, isa gihapon ka payunir.

Sang 1951 gin-agda ako nga mangin nagalakbay nga manugtatap. Ang akon asaynment naglakip sang daku nga mga bahin sang estado sang Rio Grande do Sul kag Santa Catarina. Linibo ka tawo halin sa Europa ang nagapuyo didto sa bagatnan sang Brazil. Sanglit pila lamang ang kongregasyon sadtong tion, ang kalabanan sang ginaduaw ko amo ang isolated nga mga tawo kag mga grupo. Madamo sing suba apang pila lamang ang mga taytay, nga nagakahulugan nga nagaubog ako sa diutay nga mga suba nga ginapas-an ang akon maleta kag ginauyatan ang akon makinilya kag briefcase. Ang mga dalan indi sementado kag puno sing mga batse ukon mga luhobluhob. Agod amligan ang akon bayo gikan sa yab-ok, nagasuksok ako sing manipis nga bata. Bangod sini nagdumdom ang iban nga ako ang ila bag-o nga pari, kag nagatinguha sila nga halukan ang akon kamot.

Pagdepensa sa mga Interes sang Ginharian

Samtang ginatinguhaan ko nga atubangon ang mga problema, ginsunod ko ini nga prinsipio: Kon masarangan sang iban nga magpuyo malayo sa mga siudad, maglakat sa sini nga mga banas kag magtabok sa sini nga mga suba, nga abi indi ko man mahimo ini, labi na nga isa ka importante gid nga mensahe ang ginadala ko?

Ang lain nga sahi sang mga problema masami nga nagautwas sa diutay nga mga banwa. Halimbawa, sang isa ka tion naghimo kami sing kahimusan nga maghiwat sing miting sa isa ka lokal nga eskwelahan sa tupad sang isa ka parke. Sa pihak nga bahin sang parke may isa ka diutay nga bar kag isa ka Katoliko nga simbahan. Sang wala mag-abot ang manunudlo agod buksan ang eskwelahan, namat-od ako nga maghatag sing pamulongpulong sa parke. Wala madugay sa tapos makasugod ang pamulongpulong, mga tunga sa dosena ka tawo ang nagguwa sa bar kag nagsugod sa pagsinggit kag ginasunodsunod nila ang akon kumpas. Nahibal-an namon sang ulihi nga ginbayaran gali sila sang pari sa paghimo sini.

Ginpabaskog ko pa ang akon tingog, nga sila ang direkta nga ginahambal. Nag-untat sila, kag ang isa nagsiling: “Nagahambal sia nahanungod sa Dios. Ngaa nagsiling ang pari nga sia iya sang Yawa?” Sang makita sang pari nga indi pagtublagon sang mga tawo ang miting, nagsakay sia sa iya dyip kag naglibot sa parke, nga nagasinggit: “Ang bisan sin-o nga Katoliko indi dapat magtambong sa sini nga miting!” Wala sing bisan isa nga naghulag, kag ang miting mahidaiton nga nagpadayon.

Sa Mirante do Paranapanema, São Paulo, ginduaw ko ang hepe sang polisiya agod ipaathag ang amon hilikuton kag mangabay nga gamiton ang hall para sa pamulongpulong publiko. Ginhimos niya nga gamiton namon ang club hall. Ginsugiran man namon sia nga magahanda kami sing hand­bill sa pagpasayod sang pamulongpulong. “Sa ano nga bahin sang banwa ipanagtag ninyo ini?” pamangkot niya. Sang masugiran namon sia, ginpangabay niya ang iban nga managtag man sa isa pa ka bahin sang banwa. Pag-abot sang Domingo, nagtambong sia, upod sa duha pa ka polis, agod siling niya, “maghupot sang kahim-ong.”

“Luyag mo bala nga ako ang magpakilala sang imo pamulongpulong?” pamangkot niya.

“Malipay gid ako,” sabat ko, “apang tuguti ako nga ipaathag sa imo kon paano namon ginapakilala ang amon mga humalambal.” Sa tapos ako mapakilala, nagpungko sia sa plataporma agod mamati. Isa yadto ka mahim-ong nga tumalambong. Wala kami sing problema didto, kay may duha ka polis sa ganhaan kag ang hepe nagapungko sa plataporma!

Sang Marso 1956 gin-asayn ako subong manugtatap sang distrito kag nakaalagad ako sa mga asambleya sa bug-os nga Brazil. Malayo nga mga distansya ang ginalakbay. Isa ka bes naglakbay ako sing tatlo ka adlaw antes makalab-ot sa masunod nga asambleya. Sa naaminhan nga bahin sang pungsod, ang ginasakyan kon kaisa amo ang station wagon. Wala ini sing mga bintana, gani mahangin, nga isa ka maayo nga ideya, kay ang mga pasahero nagalakip sa mga manok kag mga baboy!

Ginpalig-on sang Gilead ang Akon Determinasyon

Daw ano ka makakulunyag sang 1958 ang pag-eskwela sa Watchtower Bible School of Gilead! Ang amon klase naggradwar sadto nga tig-ilinit sa tion sang kombension sa Yankee Stadium kag Polo Grounds, nga sa diin 253,922 gikan sa 123 ka nanuhaytuhay nga pungsod ang nagtambong sa pamulongpulong publiko. Katahom gid nga talan-awon! Nian nagbalik ako sa Brazil, nga determinado sing kapin pa nga padayunon ang pagbantala sang Ginharian ni Jehova.

Sang 1962 ginpakaslan ko si Ruth Honemann, nga nakaalagad na sing kapin sa anom ka tuig subong misyonera sa Brazil. Sugod sang ginkasal kami padayon ako nga nakatigayon sing dugang pa nga mga pribilehiyo sang pag-alagad, lakip ang pagdumala sang mga kurso sa Kingdom Ministry School kag Pioneer Service School, subong man pagpanguna sa paghimos sang mga nasyonal kag internasyonal nga mga kombension kag sa pagtukod sang nahauna nga Assembly Hall sa São Paulo.

Sa karon ginaagom namon ang pinakadaku nga pribilehiyo sang amon teokratiko nga mga karera subong mga katapo sang pamilya Bethel sa Brazil. Sa pagbalikid sang kapin sa 40 ka tuig nga pag-alagad sing bug-os tion, ang 35 sini subong nagalakbay nga manugtatap, masiling ko nga puno ini sing kalipay kag makapaladya nga mga hilikuton. (Hulubaton 10:22) Daku ang natun-an ko gikan sa organisasyon ni Jehova, lakip ang kinahanglanon nga magpakita sing kahanuklog, mangin isa ka abyan indi boss, kag indi magtuman kasako sa pag-atipan sang mga kinahanglanon sang iban. Sa pagtakop, luyag ko isiling, labi na sa mga pamatan-on, ang ginsiling anay sa akon ni Utod Estelmann: “Bata pa ikaw; mapagros ikaw; gani magpayunir ka!”

[Piktyur sa pahina 29]

Ang amon puluy-an karon, ang Bethel sa Brazil

[Piktyur ni Richard kag Ruth Wuttke sa pahina 26]