Ang Kabuhi kag Ministeryo ni Jesus

Pagluib kag Pagdakop

PASADO tungang gab-i sang ginpangunahan ni Judas ang dakung kadam-an sang mga soldado, mga pangulong saserdote, mga Fariseo, kag iban pa sa katamnan sang Getsemane. Ang mga saserdote nagpasugot nga bayaran si Judas sing 30 ka bilog nga pilak agod luiban si Jesus.

Sang nagligad, sang ginpahalin si Judas sa panihapon sang Paskuwa, mahimo nga nagkadto sia direkta sa mga pangulong saserdote. Gilayon nila nga gintipon ang ila kaugalingon nga mga opisyal, kag mga soldado man. Ayhan ginpangunahan sila primero ni Judas sa kon diin si Jesus kag ang iya mga apostoles nagsaulog sang Paskuwa. Sang nakita nga naglakat na sila, ang dakung kadam-an nga may mga hinganiban kag nagadala sing mga suga kag mga sulu nagsunod kay Judas paguwa sa Jerusalem kag patabok sa Nalupyakan sang Kidron.

Samtang ginapangunahan ni Judas ang prosesyon pakadto sa Bukid sang Olibo, sigurado gid sia nga nahibaluan niya kon diin makita si Jesus. Sang nagligad nga semana, samtang si Jesus kag ang mga apostoles naglakbay pakadto-pakari sa Betania kag Jerusalem, masunson sila nagdulog sa katamnan sang Getsemane agod magpahuway kag magsugilanunay. Apang, sa karon, bangod mahimo nga si Jesus natago sa kadudulman sa idalom sang mga kahoy nga olibo, paano sia makilala sang mga soldado? Mahimo nga wala pa nila sia anay makita. Si Judas nagahatag sing tanda, nga nagasiling: “Kon sin-o ang akon halukan, amo sina sia; dakpa sia kag dalha sia sing malig-on.”

Ginapangunahan ni Judas ang dakung kadam-an pasulod sa katamnan, nakita niya si Jesus kag ang iya mga apostoles, kag nagkadto diretso sa iya. “Maayo nga adlaw, Rabbi!” nagsiling sia kag naghaluk sa iya.

“Abyan, ngaa bala yari ka?” sabat ni Jesus. Nian, nagasabat sang iya kaugalingon nga pamangkot, sia nagasiling: “Judas, ginatugyan mo bala ang Anak sang tawo paagi sa haluk?” Apang tuman na sa nagluib sa iya! Si Jesus nagguwa sa kapawa sang nagadabdab nga mga sulu kag mga suga kag namangkot: “Sin-o bala ang ginapangita ninyo?”

“Si Jesus nga Nazaretnon,” amo ang sabat.

“Ako amo sia,” sabat ni Jesus, samtang nagatindog sia sing maisog sa atubangan nila. Nakibot sa iya kasidla kag wala nakahibalo kon ano ang matabo, ang mga tawo nag-isol kag napukan sa duta.

“Nagsugid ako sa inyo nga ako amo sia,” kalmante nga siling ni Jesus. “Gani, kon ginapangita ninyo ako, palakta ninyo ini sila.” Wala madugay antes sa naibabaw nga hulot, ginsilingan ni Jesus ang iya Amay sa pangamuyo nga gintipigan niya ang iya matutom nga mga apostoles kag wala sing isa sa ila ang nadula “luwas sa anak sang kalaglagan.” Gani, agod ang iya pulong matuman, nangabay sia nga ang iya mga sumulunod palakton.

Sang ang mga soldado maulian, nagtindog, kag gingapus si Jesus, nahangpan sang mga apostoles kon ano ang matabo. “Ginuo, ilabo bala namon ang amon espada?” pamangkot nila. Sa wala pa makasabat si Jesus, si Pedro, nga naggabot sang isa sa duha ka espada nga dala sang mga apostoles, naglabo kay Malco, nga ulipon sang mataas nga saserdote. Wala maigo ni Pedro sa ulo ang ulipon apang nagilangan ang iya dulunggan nga tuo.

“Tuman na ini,” siling ni Jesus samtang nagapasilabot sia. Nagatandog sang dulunggan, gin-ayo niya ang pilas. Nian nagtudlo sia sing importante nga leksion, nagasugo kay Pedro: “Itagub ang imo espada, kay ang tanan nga nagagamit sang espada sa espada mapatay. Nagahunahuna ka bala nga indi ako makapangayo sa akon Amay kag sa gilayon padalhan ako niya sing kapin sa napulog duha ka legion nga mga anghel?”

Si Jesus handa magpadakop. Kay sia nagapaathag: “Paano bala nian ang pagkatuman sang mga Kasulatan nga amo ini ang dapat mahanabo?” Kag sia nagadugang: “Ang tagayan nga ginhatag sa akon sang Amay indi ko bala pag-imnon?” Ugyon gid sia sa kabubut-on sang Amay para sa iya!

Nian si Jesus nagpamulong sa kadam-an. “Nagakari bala kamo nga may mga espada kag mga lampus sa pagdakop sa akon subong nga isa ka buyong?” pamangkot niya. “Adlaw-adlaw naglingkod ako sa templo nga nagapanudlo, kag wala ninyo ako pagdakpa. Apang tanan ini nahanabo agod matuman ang kasulatan sang mga manalagna.”

Sa sina gindakop si Jesus sang mga soldado kag sang pangulo sang militar kag sang mga opisyal sang mga Judiyo kag gingapus sia. Sang nakita ini, ginbayaan sang mga apostoles si Jesus kag nagpalagyo. Apang, isa ka lamharon nga lalaki​—⁠ayhan si disipulo Marcos​—⁠ang nagpabilin sa tunga sang kadam-an. Mahimo nga yara sia sa balay sang ginsaulog ni Jesus ang Paskuwa kag pagkatapos ginsundan ang kadam-an gikan didto. Apang, nakilal-an sia, kag gintinguhaan sia nga dakpon. Apang ginbilin niya ang iya lino nga kunup kag nagpalagyo nga hublas. Mateo 26:​47-56; Marcos 14:​43-52; Lucas 22:​47-53; Juan 17:12; 18:​3-12.

◆ Ngaa sigurado gid si Judas nga makita niya si Jesus sa katamnan sang Getsemane?

◆ Paano ginpakita ni Jesus ang kabalaka para sa iya mga apostoles?

◆ Ano nga buhat ang ginhimo ni Pedro sa pagpangapin kay Jesus, apang ano ang ginsiling ni Jesus sa iya?

◆ Paano ginapakita ni Jesus nga ugyon gid sia sa kabubut-on sang Dios para sa iya?

◆ Sang ginbiyaan sang mga apostoles si Jesus, sin-o ang nagpabilin, kag ano ang natabo sa iya?