Sin-o nga Dios ang Dapat Ninyo Simbahon?
NAHAUNA, sin-o ang isa ka Dios nga amo lamang ang dapat simbahon? Prangka ini nga ginasabat sang Biblia. Ang tulun-an sang Bugna nagasiling: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nagluntad sila kag gintuga.” (Bugna 4:11) Huo, si Jehova, nga Manunuga, amo lamang ang Dios nga takus sang aton pagsimba. Ngaa? Balikan naton ini nga pamangkot sa indi madugay. Apang, hambalan naton anay ang iban nga mga dios nga ginasimba sang katawhan.
Ang sa Likod sang Tanan nga Dimatuod nga mga Dios
Bisan madamo nga dios ang ginasimba sang mga tawo, ang kamatuoran amo nga ang tanan nga pagsimba nga ginahalad sa tanan nga dios sa tanan nga pungsod—luwas sa pagsimba nga ginahalad kay Jehova, nga Manunuga—nagaalagad sa katuyuan sang isa lamang ka dios. Sa anong paagi? Basaha ang ginhambal ni apostol Pablo sa mga Cristiano sa Corinto. Sa sadto nga siudad madamo nga dios ang ginasimba, gikan sa makihilawason nga si Aphrodite tubtob kay Aesculapius, ang ila dios sa pag-ayo. Apang, ginpakita ni Pablo nga isa lamang ka malaut nga gahom ang yara sa likod sadtong tanan nga dios. Sia nagsulat: “Ang mga butang nga ginahalad sang mga pungsod ginahalad nila sa mga demonyo, kag indi sa Dios.” (1 Corinto 10:20) Huo, ginasimba sang paganong mga taga-Corinto ang mga demonyo.
Nagrebelde ang mga demonyo sa ginsuguran. Ang nahauna kag ang pinakadaku sa ila amo ang isa ka anghel nga tinuga nga nagsulay kay Eva sa paglapas sa sugo sang Dios didto anay sa hardin sang Eden. (Genesis 3:1-6; Juan 8:44) Paagi sa paghimo sini, nagrebelde ini nga tinuga batok sa soberanya sang iya Manunuga. Pagkatapos, gintawag sia nga Satanas, nga nagakahulugan sing “Manugpamatok.” Sang ulihi, ang iban nga espiritu nga mga tinuga nagbuylog sa iya pagrebelde. Sila man nangin mga demonyo, kag si Satanas ginpakilala subong “ang manuggahom sang mga demonyo.” (Mateo 12:24, 26) Sa tulun-an sang Bugna, ginatawag ining mga demonyo nga “mga anghel” ni Satanas. (Bugna 12:7) Gani ang pagsimba sa mga demonyo pareho lamang sa pagsimba kay Satanas.
Daku ang impluwensia ni Satanas. Si apostol Juan nagsiling nga “ang bug-os nga kalibutan” yara sa iya gahom, kag gintawag sia ni Pablo nga “dios sining sistema sang mga butang.” (1 Juan 5:19; 2 Corinto 4:4) Busa, ang pagsimba sa bisan sin-o nga dios luwas kay Jehova isa gid ka pagsimba kay Satanas. Sa pinakakubos, nagaalagad ini sa mga katuyuan ni Satanas bangod ang iya tulumuron amo nga hayluhon ang mga anak ni Adan kag ni Eva sa pagrebelde batok kay Jehova. Sanglit ‘ginapatalang [ni Satanas] ang bug-os napuy-an nga duta,’ maathag nga madinalag-on sia sa kalabanan nga kaso. (Bugna 12:9) Apang indi sa tanan nga kaso. May yara gihapon minilyon nga nagatinguha sa pagsimba kay Jehova. Ngaa?
Ang mga Bunga sang Sayop nga Pagsimba
Nahauna, nahibaluan nila nga ang bayad sa pagsimba sa iban nga mga dios luwas kay Jehova labaw sa ila masarangan. Ang arkeolohiko nga mga pagkutkot sa dumaan nga Carthage sa Aminhan nga Aprika nakatukib sing isa ka lulubngan sang mga kabataan. Nasapwan sa sini ang mga tul-an sang mga kabataan nga ginhalad sa Fenicianhon nga dios nga si Baal. Ang paghalad sing bata amo ang makakulugmat nga bili nga ginbayad anay sang mga taga-Carthage sa pagsimba kay Baal. Ang Katolisismo sang Edad Media nanukot man paagi sa uhaw sa dugo nga mga Krusada kag mapintas nga mga Inkisisyon nga ginbangdan sang daku nga pag-antos. Ang pagsimba sang mga Inca sa mga dios sa wala pa ang Columbianhon nga Amerika nagdalahig sing pagpatay sa linibo subong bahin sang rito.
Sa moderno nga mga tion, nanuhaytuhay nga porma sang pagsimba ang nadalahig sa pagpamatay sa India, kag ginbangdan ini sang daku nga mga problema sa politika sa Natung-an nga Sidlangan kag sa Aminhan nga Irlandiya. Ang pagkaignorante, disparatis, kag ang kahadlok dapat ilista subong bahin sang bili nga ginabayad sang tawo para sa pagsimba sa iya madamo nga mga dios.
Ngaa Dapat Ninyo Alagdon si Jehova nga Dios?
Sa pihak nga bahin, ang pagsimba kay Jehova nagadala sing mga benepisyo lamang. Nahauna, sia “ang Isa nga nagakabuhi tubtob sa walay katubtuban, nga nagtuga sang langit kag sang yara sa sini kag sang duta kag sang mga butang nga yara sa sini kag sang dagat kag sang mga butang nga yara sa sini.” (Bugna 10:6) Sa amo, dapat naton sia simbahon bangod sia ang aton Manunuga.
Dugang pa, dapat naton simbahon si Jehova nga Dios bangod ang iya mga kinaiya nagaagda sa aton nga simbahon sia. Si apostol Juan nagsiling nga ang “Dios gugma.” (1 Juan 4:8) Ang matutom nga tawo nga si Job nagsiling nga ang “[Dios] maalam sa tagipusuon kag gamhanan sa kusog.” (Job 9:4) Si Moises nag-amba tuhoy sa iya: “Ang Igang, ang iya binuhatan himpit, kay ang tanan niya nga dalanon katarungan. Dios sang katutom kag wala sing kalautan; matadlong kag matarong sia.” (Deuteronomio 32:4) Sin-o ang mangalag-ag sa pag-alagad sa sina nga Dios?
Isa pa, ang Biblia nagasiling: “Ang diosnon nga debosyon mapuslanon sa tanan nga butang, kay may saad ini sang kabuhi karon kag sa palaabuton.” (1 Timoteo 4:8) Daw ano ka matuod ini! Ginahandum ni Jehova ang maayo para sa katawhan. Gin-aman niya ang duta subong isa ka matahom nga puluy-an para sa iya tinuga, kag naghimo sia sing bugana nga aman agod mangin makalilipay ang kabuhi. Walay sapayan sang pagrebelde sang tawo, padayon nga ginsakdag sang Dios ang kabuhi sa sini nga duta, ginahatag ang tanan nga materyal nga mga kinahanglanon sang katawhan kay “nagapasubang sia sang iya adlaw sa mga malauton kag mga maayo, kag nagapaulan sa mga matarong kag sa mga dimatarong.”—Mateo 5:45.
Apang ang “saad sang kabuhi karon” may dugang pa nga kaayuhan. Ang pag-alagad sa Dios makaalayaw kag makalilipay. Gindesinyo kita sa paghimo sini. Kag ginabuligan sang Dios ang mga matutom nga nagaalagad sa iya agod magmadinalag-on sa kabuhi. Paagi sa Biblia, nagahatag sia sing panuytoy sa diminyo nga mga tawo, minyo nga mga tawo, kag sa kabataan—mga tawo gikan sa tanan nga sahi sang pagkabuhi. Nagahatag sia sing masaligan kag praktikal nga kaalam sa pagbulig sa tanan nga kahimtangan agod nga malubad naton ang mga problema sang pagkabuhi subong dihimpit nga mga tawo sa isa ka kalibutan nga yara sa idalom sang impluwensia ni Satanas. Kon ginasimba naton ang Dios suno sa paagi nga nagapahamuot sa iya, matigayon naton ang “paghidait sang Dios nga nagalabaw sa tanan nga paghangop.”—Filipos 4:7.
Talalupangdon, man, ang “saad sang kabuhi . . . sa palaabuton.” Ginsilingan ni Jesus ang Fariseo nga si Nicodemo: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga wala sing katapusan.” (Juan 3:16) Kabuhi nga wala sing katapusan! Sin-o nga dios luwas kay Jehova ang makasaad sina nga butang kag dayon makatuman sang iya saad? Ang katapusan nga kahimtangan sang mga makabaton sinang daku nga regalo ginlaragway sa Bugna: ‘Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ (Bugna 21:4, 5) Sa pagkamatuod, ang kabuhi nga ginalauman sa palaabuton dapat magtiklod sa aton nga alagdon si Jehova!
Sin-o nga Dios, nian, ang dapat naton simbahon? Si Jehova lamang, nga Manunuga. Sa tanan nga mga dios, sa iya lamang naaplikar ang mga pulong: “Dalagku kag kalatingalahan ang imo mga binuhatan, Jehova nga Dios, nga Labing Gamhanan. Matarong kag matuod ang imo mga dalanon, Hari nga dayon. Sin-o bala ang indi mahadlok kag indi maghimaya sang imo ngalan, Jehova, kay ikaw lamang ang balaan? Ang tanan nga pungsod magakari kag magasimba sa imo, kay ang imo mga paghukom napahayag.” (Bugna 15:3, 4) Daw ano ka maalamon ang mga nagabaton sang laygay sang salmista: “O kari, magsimba kita kag magyaub; magluhod kita sa atubangan ni Jehova nga aton Magbubuhat”!—Salmo 95:6.
[Piktyur sa pahina 6]
Ang pila sang mga dios nga ginhaylo ni Satanas ang katawhan nga simbahon
[Piktyur sa pahina 7]
Ang ginalauman nga kabuhi sa palaabuton dapat magtiklod sa aton nga alagdon si Jehova