Magpalig-onay sa Isa kag Isa Samtang Nagahilapit ang Adlaw
“Magpalig-onay ang isa kag isa, kag labi pa gid sa ginatan-aw ninyo nga nagapalapit ang adlaw.”—HEBREO 10:25.
1, 2. Anong adlaw ang nagapalapit, kag ano dapat ang mangin panimuot sang katawhan ni Jehova?
YADTONG nagapakigbahin karon sa pagsiling, ‘Kari kag mag-inum sang tubig sang kabuhi,’ wala nagapain sang ila kaugalingon. Samtang nagahilapit ang dakung adlaw sang kadalag-an ni Jehova, ginaaplikar nila ang laygay sang Biblia: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, subong sang kinabatasan sang iban, kundi nagapalig-onay ang isa kag isa, kag labi pa gid sa ginatan-aw ninyo nga nagapalapit ang adlaw.”—Hebreo 10:24, 25.
2 Ang Kasulatan nagatagna nahanungod sina nga “adlaw” subong ang “adlaw ni Jehova.” (2 Pedro 3:10) Bangod kay si Jehova amo ang Labing Mataas, ang Gamhanan nga Dios, wala sing adlaw ang mahimo nga magalabaw sa iya adlaw. (Binuhatan 2:20) Nagakahulugan ini sang pagbindikar sa iya pagkasoberano subong Dios sa ibabaw sang bug-os nga uniberso. Ina nga adlaw nga indi matupungan sa pagkaimportante nagahilapit na.
3. Paano ang adlaw ni Jehova nagapalapit para sa mga Cristiano sadtong unang siglo, kag kamusta naman sa aton karon?
3 Ginsilingan ni apostol Pablo ang mga Cristiano sang unang siglo sang aton Kumon nga Dag-on nga ang adlaw ni Jehova nagapalapit. Ginahulat nila ang pag-abot sina nga adlaw, apang sadto anay, ina nga adlaw sobra pa sa 1,900 ka tuig kalayo. (2 Tesalonica 2:1-3) Walay sapayan sina nga katunayan, dapat sila palig-unon bangod ina nga adlaw pat-od gid nga magaabot, kag kon ang mga Cristiano padayon nga magpanguyapot sa sina nga pagtuo, makasulod sila sa sinang ginpakamaayo nga adlaw. (2 Timoteo 4:8) Sadto anay, ina nga adlaw ginhangop nga nagapalapit. Para sa aton karon, ang adlaw ni Jehova malapit na sa pagkamatuod. Ang tanan nga makatilingala nga mga katumanan sang tagna sang Biblia nagapamatuod sining makalilipay nga katunayan. Sa dili madugay, ang ngalan sang aton Dios, si Jehova, pagapakabalaanon sa walay katubtuban.—Lucas 11:2.
Ginpalig-on sang Balaan nga Ngalan
4. Suno sa Bugna 19:6, sin-o ang mangin Hari, kag paano ginhantup ang iya ngalan?
4 Ang balaan nga ngalan dapat gid nga makawiwili sa bug-os nga tawhanon nga panimalay. Ang Today’s English Version nagasiling: “Dayawa ang Dios! Kay ang Ginuo, ang aton Labing Gamhanan nga Dios, Hari!” (Bugna 19:6) Suno sa sinang ika-20 ka siglo nga badbad sang Biblia, sia amo ang Ginuo, ang labing gamhanan nga Dios. Wala ginahatag sina nga badbad, subong man sang madamo iban pa nga modernong mga badbad, ang ngalan sang balaan nga Persona nga nagsugod sa paggahom subong Hari. Apang, ang balaan nga ngalan nalakip sa ekspresyon nga “Aleluya!” (“Dayawon si Jah” ukon, “Dayawon si Jehova”) nga makita sa Revised Standard Version, sa New International Version, kag sa badbad ni Moffatt sang Bugna 19:6. Sa kalabanan sang aton Kumon nga Dag-on, ang balaan nga ngalan gintago sa mga badbad sang Biblia. Apang, subong sang makita naton, ina nga ngalan daku nga pagpalig-on sa katawhan sang Dios, sadto anay kag karon.
5, 6. (a) Ngaa kinahanglan nga makilala ni Moises ang ngalan sang Dios nga ginarepresentar niya? (b) Ano ang mahimo nga epekto sa mga Israelinhon sang ginpadaku ni Moises ang balaan nga ngalan?
5 Madumduman naton nga sang ginpadala anay sang Labing Mataas nga Dios si Moises sa katawhan sang Israel nga naulipon sa duta sang Egipto, ang pamangkot sa kon sin-o ang nagpadala sa iya nag-utwas sa hunahuna sang katawhan nga sa ila ginpadala si Moises. Ginpaabot ni Moises nga ang nagaantos nga mga Judiyo maluyag sa paghibalo sa ngalan sang Dios nga ginarepresentar niya. Nahanungod sini aton mabasa sa Exodo 3:15: “Ang Dios nagsiling man kay Moises: ‘Isiling ini sa katawhan sang Israel, “Si Jehova ang Dios sang inyo ginikanan, ang Dios ni Abraham, ang Dios ni Isaac kag ang Dios ni Jacob, nagpadala sa akon sa inyo.’ ” Ini amo ang akon ngalan tubtob sa tion nga dinapat-od, kag ini amo ang akon handumanan sa tanan nga kaliwatan.”
6 Sang ginpadaku sa ila ini nga impormasyon, ang mga Israelinhon mahimo nga napalig-on sing daku. Ginpasalig sang lamang matuod nga Dios, nga si Jehova, ang ila kaluwasan. Kag daw ano gid ka makapalig-on ang paglaum nga makilala ang Dios kon ipasundayag niya ang kahulugan sang iya personal nga ngalan—indi matinaastaason nga nagapain sang iya kaugalingon!—Exodo 3:13; 4:29-31.
7. (a) Paano naton nahibaluan nga kilala sang mga disipulo ni Jesus ang balaan nga ngalan? (b) Paano ginbutang sa likod ang ngalan sang Dios?
7 Ang mga disipulo ni Ginuong Jesucristo napalig-on man sing daku sang balaan nga ngalan, si Jehova, kag sa kon ano ang kahulugan sini. (Juan 17:6, 26) Sadto anay sang ministeryo ni Jesus sa duta, wala gid niya pag-ibutang sa likod ang balaan nga ngalan, kag indi niya tuyo nga ang iya kaugalingon nga ngalan, Jesus, magalabaw. Pagkatapos lamang nga nagsugod ang gintagna nga apostasya gikan sa matuod nga Cristianong pagtuo nga ang balaan nga ngalan ginbutang sa likod, huo, halos ginpanas sa Cristianong paghambalanay. (Binuhatan 20:29, 30) Kon ang ngalan sang Anak sang Dios masugdan nga hatagan sing daku pa nga importansia, nga nagalabaw sa iya sang Amay, ang nagaangkon nga mga Cristiano magatamod sang ila pagsimba sa Amay nga indi gid personal, kulang sing kasuod sa pamilya, kag indi gid makapalig-on.
8. Ano ang padayon nga epekto sa katawhan sang Dios sang pag-adoptar sa ngalan nga mga Saksi ni Jehova?
8 Gani, rason para sa dimapabutyag nga kasadya sang ang International Bible Students nga naangot sa Watch Tower Society nag-adoptar sang ngalan nga mga Saksi ni Jehova sang 1931. Indi lamang ini makalilipay kundi makapalig-on gid. Bangod sini, ang bag-o nahingadlan nga mga estudyante sang Biblia sarang makapalig-onay sa isa kag isa.—Ipaanggid ang Isaias 43:12.
9. Ano ang balatyagon sang matuod nga mga Cristiano nahanungod sa Isa nga sa iya sila mga Saksi?
9 Busa, nasapwan karon sang matuod nga mga Cristiano nga nagakaigo ipakilala ang Isa nga sa iya sila ang gintagna nga mga Saksi, subong sang ginhimo ni Jesucristo nga Lider nila sang yari sia sa duta. (Bugna 1:1, 2) Huo, ginakilala nila sia subong ang isa lamang nga ang ngalan amo si Jehova.—Salmo 83:18.
Puno sang Kalipay kag Balaan nga Espiritu
10-12. (a) Ano ang mangin epekto sang aktibo nga kusog sa mga sumulunod ni Jesus? (b) Ano ang luyag sang malipayon nga mga Saksi ni Jehova nga itrato sa isa kag isa?
10 Siling ni Jesucristo sa iya nagapaalam nga mga pulong sa iya mga apostoles: “Busa lakat kamo kag himuon nga mga disipulo ang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo. Kag, yari karon! ako kaupod ninyo sa tanan nga adlaw tubtob sa konklusion sang sistema sang mga butang.”—Mateo 28:19, 20.
11 Talupangda nga ang bag-ong gintudluan nga mga Cristiano dapat bawtismuhan sa ngalan sang balaan nga espiritu. Ining balaan nga espiritu indi isa ka persona kundi ang aktibo nga kusog ni Jehova nga Dios, nga ginagamit Niya paagi kay Jesucristo. Sa Pentecostes, ginpasagahay ni Jehova nga Dios, paagi kay Jesus, ining aktibo nga kusog sa dedikado nga mga sumulunod ni Jesucristo. (Binuhatan 2:33) Napuno sila sining balaan nga espiritu, kag ang isa sang mga ekspresyon, ukon mga bunga, sang balaan nga espiritu amo ang kalipay. (Galacia 5:22, 23; Efeso 5:18-20) Ang kalipay isa ka nagapapagsik nga kinaiya. Ang mga disipulo dapat nga mapuno sang kalipay sang balaan nga espiritu. Labi ka nagakaigo ang pangamuyo nga ginpamulong ni apostol Pablo: “Kabay ang Dios sang paglaum magpuno sa inyo sing bug-os nga kalipay kag paghidait sa pagtuo, agod nga magbugana kamo sa paglaum sa gahom sang balaan nga espiritu.”—Roma 15:13.
12 Napuno sining nagapapagsik sang kalipay nga espiritu, ang mga Saksi ni Jehova karon, lakip ang “dakung kadam-an,” maluyag kag ginapahulag nga magpalig-onay sa isa kag isa sa tunga sining dimainabyanon nga sistema sang mga butang. Sing nahisuno, si apostol Pablo nagpamulong nahanungod sa “pagbaylohanay sang pagpalig-on.”—Bugna 17:9, 10; Roma 1:12; 14:17.
May Rason Gid nga Mapalig-on
13. Ano ang aton mga rason agod mapalig-on kag agod magpalig-onay?
13 Yari sa tunga sining sistema sang mga butang, nga sa diin ang nagapamatok sa tanan nga butang nga matarong amo ang gumalahom kag dios, luyag sang mga Cristiano nga magpalig-onay ang isa kag isa sa sulod sang bug-os kalibutan nga Cristianong kongregasyon, nga lapnag sang balaan nga espiritu ni Jehova nga Dios. (Hebreo 10:24, 25; Binuhatan 20:28) May rason gid kita nga mapalig-on. Huo, daw ano ang pagpasalamat naton nga matigayon ang sibu nga ihibalo nahanungod kay Jehova kag nahanungod sa Iya Anak kag nahanungod sa aktibo nga kusog nga ginagamit nila, nga amo, ang balaan nga espiritu! Daw ano ang pagpasalamat naton tungod sa paglaum nga ginahatag nila! Busa ang aton pagsimba napuno sang kalipay. Ginsilingan ni apostol Pablo ang mga Cristiano nga ginsulatan niya sang iya sulat nga dapat sila magpalig-onay sa isa kag isa kag magpabakuray sa isa kag isa sa ila labing balaan nga pagtuo. Pagahimuon nila ini ‘sing labi pa samtang malaragwayon nga ginatan-aw nila nga nagapalapit ang adlaw.’ Dugang pa, kon papason sang politikal nga mga kagamhanan sining duta ang Cristianismo sa ngalan lamang, upod sang iban dimatuod nga mga relihion, ang kahimtangan nagakinahanglan nga magpalig-onay kita sa isa kag isa sing labi pa gid.
14. Sin-o ang dapat nga magpalig-onay sa isa kag isa, kag paano?
14 Samtang ang mga gulang nagapanguna sa pagpalig-on sa panong sa ila kaugalingon nga mga kongregasyon, ang tanan nga mga Cristiano dapat magpalig-onay sa isa kag isa, subong sang ginalaygay sang Hebreo 10:25. Sa katunayan, isa ini ka Cristianong kinahanglanon. Kon ikaw katapo sang isa ka kongregasyon, ginahatag mo bala ini nga pagpalig-on? Ayhan mamangkot, ka, ‘Paano? Ano ang himuon ko?’ Una, paagi lamang sa imo pagtambong sa mga miting kag paagi sa imo pagsupurta sa Cristianong kahimusan, indi bala nga ang tanan nga mga kauturan nga lalaki kag babayi ginapalig-on, subong nga ikaw mismo mahimo nga napalig-on nga makita ang iban pa nga mga matutom nga nagatambong sa mga miting sang kongregasyon? Mahimo man sila mapalig-on paagi sa imo halimbawa sang matutom nga pagbatas. Paagi sa imo pagpadayon sa Cristianong dalanon walay sapayan sang mga problema kag mga kabudlayan sa kabuhi, nga wala gid nagauntat, nagapahamtang ka sing makapapagsik nga halimbawa.
Tapnaa ang Pagpaluya sing Buot Gikan sa Yawa
15. Ngaa ang Yawa may “dakung kasingkal,” kag batok kay sin-o?
15 Indi lamang kita ang nakahibalo nga ang adlaw ni Jehova nagapalapit. Si Satanas nga Yawa nakahibalo man. Ginasugiran kita sang Bugna 12:12 nga may kailo karon sa duta “kay ang Yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.” Subong sang ginapakita sang Bugna 12:17, ang iya dakung kasingkal ginpatuhoy batok sa “nagabantay sang mga sugo sang Dios kag nagapamatuod kay Jesus.” Wala gid sing pangduhaduha nahanungod sini—luyag sang Yawa nga magluya kita! Kag nahibaluan gid niya kon paano ini himuon. Nahibaluan niya ang aton mga kaluyahon kag mga problema, kag ginahingalitan niya ini.
16. Ngaa ginagamit ni Satanas ang pagluya sing buot subong hinganiban?
16 Ngaa ginagamit sang Yawa ang pagluya sang buot subong hinganiban? Bangod masunson ini nagamadinalag-on. Bisan ang isa nga nakabatas sang direkta nga pagpamatok kag paghingabot mahimo nga mahulog sa pagluya sing buot. Luyag tiawtiawan ni Satanas si Jehova nga Dios kag tinguhaan nga patalikdon ang katawhan gikan sa pag-alagad sa Iya. (Hulubaton 27:11; ipaanggid ang Job 2:4, 5; Bugna 12:10.) Kon mapaluya ka niya, mahimo nga pahinayon ka niya sa imo pag-alagad sa Dios; mahimo gani nga pauntaton ka niya, nga mangin diaktibo sa pagbantala sang maayong balita sang Ginharian.—2 Corinto 2:10, 11; Efeso 6:11; 1 Pedro 5:8.
17. Paano nakita ang negatibo nga mga epekto sang pagluya sing buot sang adlaw ni Moises?
17 Ang negatibo nga mga epekto sang pagluya sing buot sarang makita sa kaso sang mga Israelinhon sa dumaan nga Egipto. Sa tapos nakigsugilanon si Moises kay Faraon, gindugangan pa gid sadtong mapintas nga gumalahom ang ila mga lulan kag ang iya pagpigus sa ila. Ginsilingan sang Dios si Moises nga pasaligon ang mga Israelinhon nga luwason gid Niya sila, himuon sila nga katawhan Niya, amanan sang ila kaluwasan, kag dalhon sila pasulod sa ginsaad nga duta. Ginsugid ini ni Moises sa mga anak sang Israel. Apang ang Exodo 6:9 nagasiling: “Wala sila magpamati kay Moises bangod sang pagluya sang ila buot kag sang ila mapintas nga kahiolipnan.” Sang nakombinse lamang kag napalig-on ni Jehova si Moises nga ang naluyahan sing buot nga si Moises nakighambal kay Faraon subong sang ginsugo niya.—Exodo 6:10-13.
18. Ngaa kinahanglan sing daku para sa katawhan sang Dios nga tapnaon ang pagpaluya sang buot nga ginahimo sang Yawa?
18 Nahibaluan sing maayo ni Satanas nga Yawa ang negatibo nga epekto sang pagluya sing buot sa alagad sang Dios. Subong sang ginasiling sang Hulubaton 24:10: “Nagluya bala ang imo buot sa adlaw sang kapiotan? Ang imo kusog diutay.” Bangod nagakabuhi kita sa tion sang katapusan, dapat kita mangin makusog kag mabaskog sa espirituwal. Makasulubo nga kinahanglan naton batuan ang aton mga pagkadihimpit, mga kaluyahon, kag mga sayop nga nagapaisol sa aton; apang bangod kay ginatinguhaan ni Satanas nga hingalitan ini nga mga sayop, nagakinahanglan kita sing bulig.
Magsalig sing Malig-on sa Halad ni Cristo
19. Ano ang magabulig sa aton sa pagtapna sa pagluya sing buot, kag ngaa?
19 May kaangtanan sini, ang halad gawad nga ginpaposible sang Dios paagi kay Jesucristo isa ka daku nga bulig. Mangin madinalag-on kita paagi sa pagsalig sing malig-on sa gawad. Makatalagam padiutayon ini nga aman. Huo, magasayop ukon magasala gihapon kita, tubtob nga kita dihimpit. Apang indi kinahanglan nga kita magluya kag mag-untat, magbatyag nga wala na sing paglaum, kag gani mahulog sa siod ni Satanas. Nahibaluan naton nga may yara kita bug-os nga halad para sa sala. Ang gawad sarang makakuha sang mga sala. Kon kita yara sa “dakung kadam-an,” makatuo kag makasalig kita sing bug-os nga mabunakan naton ang aton mga panapton kag mapaputi ini sa dugo sang Kordero.—Bugna 7:9, 14.
20. Paano ginapakita sang Bugna 12:11 nga ang daku nga manugpaluya sing buot, ang Yawa, sarang madaug?
20 Sa Bugna 12:10 si Satanas ginlaragway subong “manunumbong sang aton mga kauturan . . . nga nagasumbong sa ila sa atubangan sang aton Dios sa adlaw kag gab-i.” Paano naton madaug inang malaut nga manunumbong kag dakung manugpaluya sing buot? Ang bersikulo 11 sina nga kapitulo nagahatag sang sabat: “Gindaug nila sia bangod sang dugo sang Kordero kag bangod sang pulong sang ila pagpamatuod, kay wala nila paghigugmaa ang ila kabuhi bisan tubtob sa kamatayon.” Gani ang katawhan ni Jehova kinahanglan magsalig sing bug-os sa halad gawad, sa dugo sang Kordero. Hupti nga malig-on ang pagpalig-on nga nagahalin sa pagpanaksi, tayuyon nga nagapaambit sang maayong balita sang Ginharian sang Dios sa tanan nga masarangan mo.
21. Paano kita dihungod nga nagapakigbahin sa hilikuton sang Yawa nga pagpaluya sa aton mga kauturan?
21 Kon kaisa, bisan sing dihungod, mahimo kita makigbahin sa hilikuton sang Yawa nga pagpaluya sa aton mga kauturan. Paano? Paagi sa sobra ka mamulayon, sobra ka palasugo, ukon sobra katarong. (Manugwali 7:16) Kita tanan may mga deperensya kag mga kaluyahon. Indi naton ini paghingalitan subong sang ginahimo sang Yawa. Sa baylo, maghambal kita sing makapalig-on nahanungod sa aton mga kauturan kag sa katawhan ni Jehova subong organisado nga grupo. Luyag naton pirme magpalig-onay sa isa kag isa kag gani wala nagapaluya sang buot sang isa kag isa.
Pagpalig-onay Samtang Nagapalapit ang Adlaw
22, 23. (a) Ngaa indi naton dapat pag-itugyan sa mga gulang lamang ang mangin mga tuburan sang pagpalig-on? (b) Paano sarang mapalig-on ang mga manugtatap sa Cristianong kongregasyon?
22 Dapat naton ipamat-od sing malig-on nga pirme naton palig-unon ang isa kag isa samtang nagapalapit ang adlaw. Palig-una ang iban paagi sa imo matutom nga halimbawa kag mga pulong sang paumpaw. Iluga si Jehova kag si Ginuong Jesucristo sa sini nga butang. Indi lamang pag-itugyan sa mga gulang sang kongregasyon ang mangin tuburan sang pagpalig-on. Ti, ang mga gulang mismo nagakinahanglan sing pagpalig-on. May mga kaluyahon kag mga kakulangan sila subong sang iban sa panong, kag nagaatubang man sila sang mga problema sa pag-aman para sa ila pamilya sa nagakadunot nga kalibutan. Dugang sa sina, sila may paghimud-os sang kongregasyon subong sang ginlaragway ni Pablo. (2 Corinto 11:28, 29) Mabudlay ang ila hilikuton—nagakinahanglan sila sing pagpalig-on.
23 Mapalig-on mo sing daku ang may mga katungdanan sa pagdumala sa Cristianong kongregasyon paagi sa pagkooperar sa ila. Nian matuman mo ang laygay sa Hebreo 13:17: “Tumana ang mga nagapangulo sa inyo kag magpasakop sa ila, kay nagapulaw sila tungod sa inyo mga kalag subong nga sila ang magahatag sing husay; maghimo sila sini nga may kalipay kag indi nga may pagbakho, kay ina walay kapuslanan sa inyo.”
24. Sa sining adlaw sang pagluya sing buot, ano ang dapat nga ginahimo naton, kag ngaa?
24 Nagakabuhi kita sa adlaw sang pagluya sing buot. Ang tagipusuon sang tawo nagakapunaw gid sa kahadlok kag sa pagpaabot sa mga butang nga mahanabo sa napuy-an nga duta, subong sang gintagna ni Jesus. (Lucas 21:25, 26) Bangod sang tuman kadamo nga problema nga nagapapung-aw kag nagapaluya, “magpalig-onay ang isa kag isa, kag labi pa gid sa ginatan-aw ninyo nga nagapalapit ang adlaw.” Sunda ang maayo nga laygay ni apostol Pablo sa 1 Tesalonica 5:11: “Maglinaygayay kamo kag maglinig-onay kamo, subong sang ginahimo ninyo.”
Paano Mo Sabton?
◻ Ngaa dapat magpalig-onay sa isa kag isa ang mga Cristiano, sing labi pa sang sa nagligad?
◻ Paano makapalig-on sa katawhan ni Jehova ang paghibalo sa balaan nga ngalan?
◻ Sa anong mga paagi naton mapalig-on sing indibiduwal ang isa kag isa?
◻ Ngaa dapat naton likawan ang magpakigbahin sa hilikuton sang Yawa nga pagpaluya sa aton mga kauturan?
[Piktyur sa pahina 17]
Ang mga gulang nagapanguna sa pagpalig-on sa panong sa ila mga kongregasyon