‘Pagpangita sing mga Pulong nga Kalahamut-an, Matadlong nga mga Pulong’

“ANG manugtipon nagtinguha sa pagpangita sing mga pulong nga kalahamut-an kag yadto nga napanulat sing matadlong nga mga pulong sang kamatuoran.” (Manugwali 12:10) Daw ano gid ka hamili ang ‘mga pulong nga kalahamut-an kag matadlong’ pasad sa ginbugna nga mga Kasulatan! Mapaanggid ini sa “mga mansanas nga bulawan sa pinuna nga pilak,” maalamon kag dungganon sa bisan ano nga okasyon kag hamili sa mahuol nga mga sirkuns­tansia.​—⁠Hulubaton 25:⁠11.

Sa aton adlaw ang Daku Pa nga Manugtipon, si Jesucristo, nag-aman sing espirituwal nga mga butang nga labi pa sa gin-agom anay sang katawhan sang Dios sa idalom sang mga hari sang una sa Israel. (Mateo 12:42) Sa sobra sa isa ka siglo, ang kalahamut-an kag matadlong nga mga pulong sang kamatuoran nga nagatuptop sa tanan nga bahin sang kabuhi ginhatag sa mga publikasyon sang ­Watch Tow­er So­cie­ty kag ginpanagtag sing lapnag sa madamong mga hambal. Busa madamong mga pamilya kag mga indibiduwal ang nakatipon sa ila kaugalingon nga mga balay sing isa ka librarya sang masaligan nga mga libro nga nasentro sa Biblia. Dugang pa, kalabanan nga mga kongregasyon sang mga Saksi ni Jehova may mga librarya para magamit sa ila mga Kingdom Hall.

Apang, ang pagpangita sing kalahamut-an kag matadlong nga mga pulong nga kinahanglan sa isa ka partikular nga sitwasyon nagakinahanglan gihapon sing pagpanalawsaw. Nakahibalo sini, kutob pa sang una nga maragtas sini, ang ­Watch Tow­er So­cie­ty nagbalhag sing mga indese sa mga publikasyon.​—⁠Tan-awa ang kahon sa pahina 28 kag 29.

Isa ka Bag-ong Pagsulundan

Ginsugdan sang tuig 1985 ang isa ka bag-o nga kapitulo sa maragtas sang ­Watch Tow­er Pub­lica­tions In­dexes. Siam ka naunang mga In­dexes ang gintingob kag ginhimo nga isa ka tomo nga nagakubre sang 1930 tubtob 1985, isa ka proyekto nga nagakinahanglan sing 14 ka tuig nga panikasog. Ang mga benepisyo sinang isa ka tomo nga Index nga nagakubre sa madamong mga tuig nagdul-ong sang 1986 sa isa ka bag-ong pagsulundan, nga amo ang pagbalhag sing gintingob nga Index­es kutob sadto. Kada tuig, sing masami sa apat ka sunodsunod nga tuig, isa ka gintingob nga brosyur sang Index ang magakubre sa isa, duha, tatlo, kag nian apat ka tuig. Kada lima ka tuig isa ka matig-a sing hapin nga Index ang magatingob sang tanan nga mga Index halin sa 1986 padayon, subong sang 1986-90, 1986-95, kag padayon. Busa, indi kinahanglan nga tan-awon ang sobra sa tatlo ka Index: ang 1930-1985 Index, ang bag-ong matig-a sing hapin nga Index, kag ang bag-o nga brosyur.

Ginhanda ang Index nga Kamo ang Ginahunahuna

Ang una nga seksion sa kada Index amo ang subject index (indese sang tema). Sa paghanda sing indese sang tema, duha ka pamangkot ang ginadumdom: (1) Anong impormasyon ang dapat indisihon? (2) Diin ang isa mangita sina nga impormasyon?

Subong isa ka bumalasa, kis-a ka lang mangin interesado sa pagpangita sa tagsa ka magagmay nga komento sa isa ka tema. Sanglit sa kabilugan nagapangita ka sing impormasyon nga importante ukon mapuslanon katama, amo ini ang ginpili para indisihon. Apang indi kinahanglan nga ina nga materyal mangin maid-id. Ang listahan sa Index mahimo magpatuhoy sa isa lamang ka dinalan, subong sang isa ka dinalan sa pagsulundan sang Sosiedad sa isa ka butang. Ukon mahimo ini maglakip sa bug-os nga artikulo, bisan sa bug-os nga publikasyon. Apang, sa masami, ang listahan nagadul-ong sa madamo nga mga parapo nga ginahinun-anunan.

Importante man ang pamangkot sa kon diin dapat makita sa Index ang mga reperensya, kay ang mga bumalasa lain sing ginahunahuna kag sa lain nga tig-ulo magapangita. Halimbawa, ang impormasyon nahanungod sa Tore sang Babel makita sa ubos sang TOWER OF BABEL. Apang ang iban nga mga bumalasa mahimo magapangita sa ubos sang BABYLON, ARCHAEOLOGY, ukon LANGUAGE(S), depende sa aspeto sang tema nga makawiwili sa iya. Gani, ginhimo ang mga panikasog nga suliton ang mga reperensya sa ubos sang lainlain nagakaigo nga mga tig-ulo, nagadumdom nga ang mga bumalasa lainlain sing edad kag ginhalinan, kag may lainlain sila nga mga katuyuan.

Kon Paano ang Index Makabulig sa Imo

Kaangay sang isa ka mapa mabuligan ka lamang sang Index kon ginagamit mo ini. Ano ­ang mapaabot nga makita mo sa sub­ject in­dex ukon sa Scripture-index section nga nagasunod sa sini?

Ang mga reperensya sa Scripture-index section amo ang materyal nga nagapaathag sa kada bersikulo. Makita mo ang paathag sa danyag nga sa amo ginbungat ang mga tinaga sa isa ka teksto, kon ngaa ginsulat ini, kay sin-o ini ginaaplikar, ukon ang kahulugan sang mga tinaga ukon mga prase. Ang isa ka halimbawa amo ang pangabay sa modelo nga pangamuyo ni Jesus: “Dili kami pagdalha sa panulay.” (Mateo 6:13) Ngaa ginsiling ini sa sina nga paagi? Ang indese sa Kasulatan magabulig sa imo sa paghibalo.

Ang subject index, subong sang ginapakita sang iya ngalan, isa ka indese sang mga tema sa baylo sang mga tinaga ukon mga prase. Kon nagapangita sing isa ka artikulo paagi sa iya titulo, ang iban nga mga bumalasa nabudlayan sa pagpangita sini. Nagautwas ini nga problema kon wala sing tinaga sa titulo ang tunay nga nagapakilala sa tema. Isa ka halimbawa amo ang artikulo “How Much Is Too Much?,” nga nagahinun-anon sang mga epekto sang alkohol. Nagadumdom sang kaundan sang artikulo, mahimo mo tan-awon ang mga tig-ulo nga AL­CO­HOL­IC BEV­ERAGES ukon DRINK­ING sa Index, kag makita mo didto ang reperensya.

Ang Index may pinasahi nga kabilihanan sa pagpangita sing impormasyon sa mga problema nga ginaatubang mo. Halimbawa, kon isa ka ginikanan, nagabatyag ka bala kon kaisa nga nabang-awan sa imo panikasog nga disiplinahon kag tuytuyan ang imo kabataan? Sa ubos sang CHILDREN makita mo ang madamo nga mga reperensya nga nagahatag sing paghangop sa ila panghunahuna, mga balatyagon, kag mga kinahanglanon. Apang, sa ubos sang tig-ulo nga CHILD TRAIN­ING, makita mo ang mga reperensya para sa pagtudlo kag pagdisiplina sa tanan nga mga aspeto nila.

Kon kaisa ang Watch Tower Society nakabaton sing mga sulat nga nagapangabay sing bulig sa paglubad sa mga problema ukon mga pamangkot sa pag-asawahay nahanungod sa pagkanagakaigo sang pila ka pagkasuod sa pag-asawahay. Bisan pa mahimo makasabat ang Sosiedad, ang pareho ka sensitibo kag praktikal nga laygay sarang makita paagi sa pagtan-aw sa tig-ulo nga MAR­RIAGE, kag sa mga subtitulo sini nga “prob­lems” kag “sex” ukon “sex­u­al rela­tions,” kag sa pagpangita sa mga reperensya nga nalista.

Nabaton man ang sulat gikan sa mga ginapung-aw ukon ginasubuan. Ang liwat nga paghatag sing pasalig kag bulig nga mahatag sang sulat mahimo nga mas madali makita sa imo kaugalingon nga librarya ukon sa Kingdom Hall paagi sa pagtan-aw sa mga tig-ulo nga DEPRESSION kag MENTAL ILL­NESS sa Index. Ginasambit ang mga artikulo nga nagapaathag kon paano malandas ang mga balatian sa hunahuna, mga pagbulong nga matigayon, kag makatalandog nga mga ekspriensia sadtong ginpung-aw anay.

Pamatan-on ka bala? Mahimo nga ginakabalak-an mo ang nahanungod sa pag-asawahay, pagkabuhi sang pamilya, eskwelahan, kaangtanan mo sa imo mga ginikanan, kag iban pa. Ang pangunang dinalan nga ­YOUTHS may mga reperensya sa ubos sining tanan nga mga subtitulo kag iban pa. Dugang pa, ang mga tig-ulo subong sang RELA­TION­SHIPS, ­SCHOOLS, CAREER, kag COURT­SHIP madamo sing mabulig. Para sa mga report sa eskwelahan, ang Index magatudlo sa imo sa matahom nga materyal nahanungod sa kinaugali, sa siensya, druga, ekonomiya, kag madamo pa nga topiko.

Mga Benepisyo Para sa Tanan nga Edad

Isa ka 81-anyos nga babayi ang nagsulat: “Ang mga libro kag mga magasin minahan sang bulawan sang impormasyon kag espirituwal nga kusog​—⁠kag ang Index nagadala sang bulawan sa kadaygan.” Isa ka iloy nga may mga anak nga otso kag nuebe anyos ang nagsiling: “Ambot lang kon wala ini. Nagdul-ong ini sa akon sa mga sabat sa madamong mga pamangkot nga madugay ko na ginpaligban kag ang mga panalawsaw sa paghanda para sa mga miting sa kongregasyon nangin mas mahapos. . . . Luyag ko man isugid sa inyo nga daku gid ang nabulig sini nga publikasyon sa amon pamilya nga pagtuon sa Biblia. . . . Sang ginpapili sang akon bana sa mga bata kon ano ang luyag nila nga himuon, masami nga luyag nila magpanalawsaw nga nagagamit sang Index. Nalipay sila magpili sing tema nga naluyagan nila, subong sang paborito nila nga mga sapat ukon lainlain nga mga pungsod, kag nakita nila ang impormasyon upod ang diutay nga bulig. Nagtudlo man ini sa ila nga ang pagtuon sa Biblia makalilipay.”

Ang pagpangita sa mga pulong nga kalahamut-an kag sa matadlong nga mga pulong sang kamatuoran may hamili nga mga padya. Ang panikasog sang Manugtipon naghatag sing mga kaayuhan nga labaw sang sa iya orihinal nga katuyuan, kay ina nga mga pulong nagapalig-on kag nagatuytoy sa mga alagad ni Jehova tubtob karon. Ang aton man mga panikasog nagadala sing pagpakamaayo ni Jehova, upod ang mga resulta nga mahimo magadugay sing dayon.​—⁠Hulubaton 3:​13-18, 21-26.

[Kahon/Piktyur sa pahina 28, 29]

Nauna nga mga Index

Sang 1902 isa ka espesyal nga edisyon sang Holman Paral­lel Edi­tion Bi­ble ang ginhimo para sa Watch Tow­er So­cie­ty, kag nagaunod ini sing ekstensibo nga bulig nga ginhanda sang Sosiedad. Ang apendise sini nagaunod sing mga indese sang tema kag Kasulatan sa Millennial Dawn nga mga serye sang mga libro (nakilal-an sang ulihi subong Studies in the Scriptures), sa duha ka polyeto, kag sa Zion’s Watch Tower para sa 1879⁠–​1901.

Ang Berean Bibles sang 1907 kag pagkatapos sadto nag-aman sing kaanggid nga mga indese. Ginbuslan ini sang 1922 sang ekstensibo nga mga indese sa tanan nga mga publikasyon sang Sosiedad. Makita ini nga indese sa katapusan sang pito ka tomo sang gin-imprinta liwat nga Watch Tower (1879-1919). Tubtob karon ang naulihi amo ang pangunang paagi sa pagpangita sang materyal nga ginhatag sa una nga mga publikasyon sang Watch Tow­er So­cie­ty.

Apang, sa masunod nga 40 ka tuig, ang pagpanalawsaw sa mga publikasyon nga ginpaguwa pagkatapos sang 1919 ginhimo paagi sa paggamit sang madamo nga mga indese sa likod sang mga libro kag sa katapusan nga guwa sang magasin kada tuig. Apang sang 1959 ang Sosiedad naghimo sing daku nga proyekto sa pag-aman sing isa ka indese sang tema kag Kasulatan sa isa ka tomo para sa Ingles nga mga publikasyon. Gintipon ang isa ka grupo nga naglakip sa mga katapo sang ulong talatapan, misyonero nga mga gradwado sang Watch­tow­er Bible ­School of Gil­ead, kag bisan sa nagalakbay nga mga manugtatap gikan sa Siudad sang Nueva York. Pagligad sang isa ka tuig kag tunga sang maukod nga panikasog sang 18 ka dedikado nga mga manugpangabudlay, ang unang Watch Tower Publications Index, nga may mga seksion para sa mga tema nga ginhambalan kag mga kasulatan nga ginpaathag, nagakubre sang 31 ka tuig halin sang 1930 tubtob sang 1960, ginpaguwa. Ginpaguwa ini primero sa malipayon nga tumalambong sa 1961 Nahiusa nga mga Sumilimba nga Asambleya.

Kutob sadto, ang Watch Tower Publications Index nagguwa sa Ingles kada tuig, upod sang matig-a sing hapin gintipon nga Index kada lima ka tuig.