Kon Paano ang Espiritu sang Dios Makaapektar sa Imo

“SA GINSUGURAN gintuga sang Dios ang mga langit kag ang duta. Ang duta wala sing kahusayan kag wala sing sulud, kag ang kadudulman yara sa nawong sang kadadalman; kag ang Espiritu sang Dios nagagiho sa nawong sang mga tubig.” (Genesis 1:​1, 2, Revised Standard Version) Ining Makasulatanhon nga pinamulong nagapadaku sa isa ka tumalagsahon nga paagi nga sa diin ang tanan nga buhi nakabenepisyo gikan sa balaan nga espiritu. Ina nga espiritu aktibo sa tion sang pagpanuga, kag bangod sang pagpanghikot sini, ang duta nangin makalilipay nga puluy-an para sa katawhan.

Apang ang katawhan makabenepisyo sing labi pa gikan sa balaan nga espiritu. Ang inspirado nga hulubaton nagasiling: “Liso kamo sa akon pagsabdong. Nian iula ko ang akon espiritu sa inyo; ipakilala ko sa inyo ang akon mga pulong.” (Hulubaton 1:23) Sa aton adlaw ang natipon nga “mga pulong” sang Dios matigayon sa Balaan nga Biblia, nga ginsulat sang mga tawo nga “gintandog sang balaan nga espiritu.” (2 Pedro 1:​21; Marcos 12:​36; 2 Timoteo 3:16) Sa tion nga ginabasa sang isa ang Biblia, nagabenepisyo sia gikan sa balaan nga espiritu.

Ang Balaan nga Espiritu kag ang Pagbantala nga Hilikuton

Kon ang isa ka Saksi ni Jehova nagaduaw sa inyo puluy-an agod isugid ang nahanungod sa maayong balita sang Ginharian, ang balaan nga espiritu sarang makaapektar sang inyo kabuhi sa iban nga paagi. Paano naton mahibaluan? Ti, sang ginbantala ni Jesucristo ang maayong balita, gin-aplikar niya sa iya kaugalingon ang mga pulong ni manalagna Isaias, nga nagasiling: “Ang espiritu ni Jehova yari sa akon, bangod nga ginhaplas niya ako sa pagwali sang maayong balita sa mga imol, . . . sa pagbantala sang tuig nga nahamut-an ni Jehova.” (Lucas 4:​18, 19; Isaias 61:​1, 2) Huo, si Jesus ginhaplasan sang balaan nga espiritu sa pagbantala sang maayong balita.

Dugang pa, gintagna ni Jesus nga ang pagbantala sang maayong balita magapadayon pagkatapos sang iya kamatayon. Sia nagtagna: “Ining maayong balita sang ginharian pagaibantala sa tanan napuy-an nga duta nga panaksi sa tanan nga pungsod; kag ugaling magaabot ang katapusan.” (Mateo 24:14) Mga pila ka tion antes si Jesus nagkayab sa langit, ginhatag niya sa iya mga sumulunod ini nga sugo: “Lakat kamo kag himuon nga mga disipulo ang tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo.” (Mateo 28:​19, 20) Busa, pagkatapos sang pagkayab ni Cristo sa langit, ginpadayon sang iya mga disipulo ang gin-awtorisahan sang espiritu nga hilikuton sa pagbantala kag pagpanudlo. Ang mga Saksi ni Jehova karon nagailog sadtong unang mga disipulo sa pagbantala sang maayong balita sa bug-os nga kalibutan.

Ang Bawtismo kag ang Balaan nga Espiritu

Kon ang indibiduwal nagapamati sa maayong balita, si Jesus nagsiling nga dapat sia magpabawtismo “sa ngalan sang Amay kag sang Anak kag sang balaan nga espiritu.” Gani ang bag-ong mga disipulo apektado sing dugang sang balaan nga espiritu. Ang ekspresyon nga “sa ngalan sang” nagakahulugan gid sang “paagi sa awtoridad sang” ukon “pagkilala sa posisyon sang.”a Busa, ang pagbawtismo sa ngalan sang Amay nagakahulugan sang pagbaton sing walay pangduhaduha sa pagkasoberano sang Dios sa aton kabuhi. Ang bawtismo sa ngalan sang Anak nagakahulugan sang pagbaton kay Jesus subong ang Manunubos, Huwaran, kag Hari. Kag ang bawtismo sa ngalan sang balaan nga espiritu nagadalahig sang pagsalig sa espiritu kag sa pagpasakop sa gahom sini.b

Ang Balaan nga Espiritu sa Inyo Kabuhi

Sing masubo, ang pagkadibunayag, imoralidad, kasingki, kag pagkamalinapason sang kalabanan nga makita naton sa “Cristiano” nga mga pungsod nagapakita sang kamatuoran nga ang kalabanan sang nagaangkon nga mga Cristiano tunay nga nagabatu sa balaan nga espiritu. Apang ang nagapasakop sa sini ginapakamaayo sing daku. Una, ginabinagbinag nila sing serioso kon ano ang ila nabasa sa ginbugna sang espiritu nga Biblia kag ginaaplikar ini sa ila kabuhi. Gani, sila may kaalam, paghangop, paghantop, kaalam, ihibalo, kag ikasarang sa panghunahuna. (Hulubaton 1:​1-4) Amo ini ang hamili nga mga kinaiya sa aton magamo nga panahon.

Ang balaan nga espiritu nagabulig man sa sinang mga indibiduwal sa paglandas sa mabudlay nga mga problema. Sa dumaan nga mga panahon, ginpakita sang Dios sa iya katawhan kon paano nila nahimo ang mabudlay katama nga buluhaton. Si Jehova nagsiling nga pagahimuon ini “indi paagi sa puwersa militar, ukon sa gahom, kundi paagi sa [iya] espiritu.” (Zacarias 4:6) Kon nagapasakop kita sa Dios kag sa iya espiritu, mabuligan man kita sa paghimo sa mga buluhaton kag malandas ang mga balagbag nga kuntani tuman ka bug-at para sa aton.​—⁠Mateo 6:​33; Filipos 4:⁠13.

Sing dugang, ang espiritu sang Dios nagabulig sa aton sa pagkalipay sa kahilwayan nga indi kilala sa kalibutan sa kabilugan. Si apostol Pablo nagsulat: “Kon diin ang espiritu ni Jehova, yara ang kahilwayan.” (2 Corinto 3:17) Ang mga nagapasakop sa espiritu sang Dios nagaagom sing kahilwayan gikan sa butig nga relihion, disparatis, kahadlok sa palaabuton, kag madamo pa nagaulipon nga mga butang. Ang espiritu sang Dios isa gid ka gahom para sa ikaayo! Mahimo gani ini magapabag-o sa mga tawo. Ginahinun-anunan ini sang Biblia sang nagsiling ini: “Ang bunga sang espiritu amo ang gugma, kalipay, paghidait, pagbatas, kalulo, kaayo, pagtuo, kalum-ok, pagpugong sa kaugalingon. Batok sa amo walay kasuguan.” (Galacia 5:​22, 23) Tuhay gid ang kalibutan kon ang tanan nagapaimpluensia sa espiritu sang Dios!

Subong isa ka grupo, ang matuod nga mga Cristiano nagaagom man sang “pagkaisa sa espiritu sa nagahiusa nga higut sang paghidait.” (Efeso 4:3) Ang paghiusa kag paghidait malaka nga mga butang karon. Apang nagaluntad ini sa kon diin aktibo ang espiritu sang Dios. Sa pagkamatuod, sa tunga sang mga Saksi ni Jehova ang nagahiusa nga higut sang balaan nga espiritu nagdala sa katawhan sang tanan nga mga rasa, mga hambal, kag mga nasyonalidad pasulod sa matuodtuod nga “asosasyon sang mga kauturan.”​—⁠1 Pedro 2:⁠17.

Ang Balaan nga Espiritu kag Ikaw

Nakita mo bala ang benepisyo sang pagtigayon sing hatag-Dios nga kaalam kag sang pag-agom sing matuod nga kahilwayan? Indi bala makalilipay nga matigayon ang balaan nga bulig sa paglubad sa mga problema kag sa pagpalambo sang gugma, kalipay, paghidait, pagbatas, kalulo, kaayo, pagtuo, kalum-ok, kag pagpugong sa kaugalingon? Nian magpasakop sa gahom sang balaan nga espiritu sang Dios. Apang paano niya ini mahimo?

Tuguti ang Pulong sang Dios, ang Biblia, nga mag-impluensia sang imo hunahuna kag tagipusuon. Makig-upod sa mga nagatugot sang balaan nga espiritu nga mag-impluensia sang ila kabuhi. Maghimo sing mga tikang karon sa pagtuon kag sa paghimo sang kabubut-on sang Dios. Nian, “kabay nga ang Dios sang paglaum magpuno sa inyo sing bug-os nga kalipay kag paghidait sa pagtuo, agod nga magbugana kamo sa paglaum sa gahom sang balaan nga espiritu.”​—⁠Roma 15:⁠13.

[Mga footnote]