Ihambal ang Putli nga Hambal kag Magkabuhi sing Dayon!

“Pangitaa ninyo si Jehova . . . , Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”​—⁠SOFONIAS 2:⁠3.

1. (a) Ano nga mga metodo ang ginagamit sang mga estudyante sa pagtuon sing dumuluong nga hambal? (b) Ngaa dapat ihambal ang putli nga hambal?

ANG mga estudyante mahimo nga magtuon sing bag-o nga hambal paagi sa gramatika nga metodo ukon paghambal nga metodo. Sa idalom sang gramatika nga metodo, nagagamit sila sing mga libro kag nagatuon sang mga pagsulundan sang gramatika. Sa idalom sang paghambal nga metodo, ginailog nila ang mga tunog kag ang mga tinaga nga ginahambal sang ila manunudlo. Ining duha ka metodo ginagamit sa pagtuon sang “putli nga hambal.” Kag importante nga ihambal naton ining hambal kon nagalaum kita nga “malipdan sa adlaw sang kaakig ni Jehova.”​—⁠Sofonias 2:​1-3; 3:​8, 9.

2. Paano naton matun-an ang sarang matawag nga mga pagsulundan sang gramatika para sa putli nga hambal?

² Ang panguna nga libro nga ginagamit sa pagtuon sing putli nga hambal amo ang Biblia. Ang maukod nga pagtuon sini kag ang napasad sa Biblia nga mga publikasyon nagatudlo sa imo sang matawag nga mga pagsulundan sang gramatika para sa putli nga hambal. Ang pagtuon sa Biblia nga ginadumalahan sang isa sang mga Saksi ni Jehova isa ka maayong panugod. Para sa mga nakadedikar na sa Dios, ang regular kag maukod nga pagtuon sang Kasulatan kinahanglanon. Apang may yara bala epektibo gid nga mga paagi sa pagtuon sing putli nga hambal? Kag ano nga mga benepisyo ang nagaresulta gikan sa paghambal sini?

Kon Paano Magtuon sing Putli nga Hambal

3. Ano ang isa ka paagi sa pagtuon sing putli nga hambal?

³ Ang isa ka paagi sa pagtuon sing putli nga hambal amo ang pag-angot sang mga kamatuoran nga ginatun-an mo sa mga punto nga nahibaluan mo na, subong nga mahimo progresibo nga iangot sang isa ka estudyante nga nagatuon sing hambal ang nanuhaytuhay nga pagsulundan sang gramatika. Halimbawa, sa isa ka tion mahimo nga natun-an mo nga si Jesucristo Anak sang Dios, apang diutay lamang ang nahibaluan mo tuhoy sa iya mga katungdanan. Sugod sadto, mahimo nga ang pagtuon sa Biblia nagtudlo sa imo nga si Cristo nagagahom na karon subong langitnon nga Hari kag nga sa tion sang iya Isa ka Libo ka Tuig nga Paggahom, ang matinumanon nga katawhan itib-ong sa pagkahimpit. (Bugna 20:​5, 6) Huo, ang pag-angot sang bag-o nga mga punto sa imo nahibaluan na naga­pauswag sang imo paghangop sa putli nga hambal.

4. (a) Ano ang isa pa ka paagi sa pagtuon sang ‘mga pagsulundan sang gramatika’ sang putli nga hambal, kag ano nga kasaysayan sang Biblia ang ginagamit sa paglaragway sini? (b) Ano ang natabo sang maghikot si Gideon kag ang iya tatlo ka gatos ka tinawo? (c) Ang kasaysayan nahanungod kay Gideon nagatudlo sing anong leksion?

⁴ Ang isa pa ka paagi sa pagtuon sang ‘mga pagsulundan sang gramatika’ sang putli nga hambal amo ang paghanduraw sang mga hitabo sa Biblia. Sa pag-ilustrar: Tinguhai nga ‘tan-awon kag pamatian’ ang hitabo nga narekord sa Mga Hukom 7:​15-23. Yari Karon! Ginbahin sang Israelinhon nga hukom nga si Gideon ang iya puwersa sa tatlo ka grupo nga tig-isa ka gatos ka tawo ang tagsa. Samtang madulom pa, hipos nga nanaug sila gikan sa Bukid sang Gilboa kag ginlibutan nila ang kampo sang nagakatulog pa nga mga Midianhon. Lupit bala sa armas, ining tatlo ka gatos? Indi sa militar. Ti, kadlawan lang sila sang hambog nga mga militarista! Ang tagsa ka lalaki nagadala lamang sing isa ka budyong, isa ka daku nga tibod, kag isa ka sulo sa sulod sang tibod. Apang pamatii! Sa sinyales nga ginhatag, ginhuyop sang isa ka gatos nga kaupod ni Gideon ang ila mga budyong kag ginbuka ang ila mga tibod. Amo man ang ginhimo sang duha ka gatos pa. Samtang ginabayaw sang tanan ang ila nagadabdab nga mga sulo, mabatian mo sila nga nagasinggit: “Ang espada ni Jehova kag ni Gideon!” Hinadlukan gid sa sini ang mga Midianhon! Nagkaladusmo sila pagguwa sa ila mga tolda, ang ila ginatuyo pa nga mga mata nagmurahag sa kahadlok sa nagalumpatlumpat nga mga dabdab nga nagapadaku sang mga landong kag nagpautwas sing kahagnok. Sang magpalalagyo ang mga Midianhon, padayon nga ginhuyop sang mga tinawo ni Gideon ang ila mga budyong, kag ginpaaway sang Dios ang ila mga kaaway batok sa isa kag isa sa ila. Daw ano ka mabaskog nga leksion sa putli nga hambal! Ang Dios sarang makaluwas sang iya mga alagad bisan wala sing militar nga puwersa sang tawo. Dugang pa, “indi pagbiyaan ni Jehova ang iya katawhan tungod sa iya daku nga ngalan.”​—⁠1 Samuel 12:⁠22.

5. Paano ang Cristianong mga miting makabulig sa pagpauswag sang aton panghambal?

⁵ Kon ang mga estudyante ginatudluan sing dumuluong nga hambal paagi sa paghambal nga metodo, ginatinguhaan nila nga suliton sing husto ang tunog kag ang sulundan sang mga tinaga. Daw ano katahom nga mga kahigayunan ang yara sa Cristianong mga miting sa paghambal sing putli nga hambal! Didto mabatian naton ang iban nga nagapabutyag sang ila kaugalingon sa sina nga hambal sang Makasulatanhon nga kamatuoran, kag may pribilehiyo kita sa pagkomento man. Nahadlok bala kita nga basi sala ang mahambal naton? Indi kita magkabalaka sa sini, kay ang sala nga ginatadlong sing mahigugmaon sang gulang nga nagadumala sa miting subong sang semanal nga Pagtinuon sa Lalantawan makapaputli sang aton panghambal. Busa, magtambong kag makigbahin sa Cristianong mga miting sing regular.​—⁠Hebreo 10:24, 25.

Pagsulod sang mga Kahigkuan

6. Ngaa may daku nga kinatuhayan sa ulot sang mga Saksi ni Jehova kag sang relihioso nga mga organisasyon sang Cristiandad?

⁶ Ang mga nagawali sang katuyuan ni Jehova kag nagabantala sang iya langitnon nga Ginharian nagahambal sing putli nga hambal subong iya mga Saksi. Ginapakilala nila ang iya ngalan kag nagaalagad sa iya sing “abaga sa abaga,” ukon may paghilisugot. (Sofonias 3:9) Bisan pa may Biblia ang mga relihion sang Cristiandad, wala sila nagahambal sing putli nga hambal ukon nagatawag sa ngalan sang Dios pasad sa pagtuo. (Joel 2:32) Wala sila sing nagahisantuanay nga mensahe nga napasad sa Kasulatan. Ngaa? Bangod ginauna nila ang relihioso nga mga tradisyon, kalibutanon nga mga pilosopiya, kag politikal nga pagkatutom sang sa Pulong sang Dios. Ang ila mga katuyuan, mga paglaum, kag mga metodo yara sa sining malaut nga kalibutan.

7. Anong mga kinatuhayan sa ulot sang mga Saksi ni Jehova kag sang dimatuod nga mga relihion ang ginapakita sa 1 Juan 4:​4-6?

⁷ Ang Cristiandad​—⁠sa kamatuoran, ang bug-os emperyo sang dimatuod nga relihion​—⁠wala nagahambal sing pareho nga hambal sa mga Saksi ni Jehova. Sing makawiwili, sa mga nagahambal sing putli nga hambal, si apostol Juan nagsulat: “Iya kamo sang Dios, . . . kag nadaug ninyo sila, kay sia nga nahiusa sa inyo daku pa sa iya nga nahiusa sa kalibutan. Sila iya sang kalibutan; busa nagahambal sila sang iya sang kalibutan kag ang kalibutan nagapamati sa ila. Kita iya sang Dios. Ang nakakilala sa Dios nagapamati sa aton; kag ang indi iya sang Dios wala nagapamati sa aton.” (1 Juan 4:​4-6) Nadaug sang matuod nga mga alagad sang Dios ang dimatuod nga mga manunudlo bangod ang Dios, nga nahiusa sa iya katawhan, “daku pa [sa Yawa] nga nahiusa sa kalibutan,” ang dimatarong nga katilingban sang tawo. Sanglit ang mga apostata “iya sang kalibutan” kag may yara sang malaut nga espiritu sini, “nagahambal sila sang iya sang kalibutan kag ang kalibutan nagapamati sa ila.” Apang ang tulad-karnero nga mga indibiduwal nagapamati sa mga iya sang Dios, kay narealisar nila nga ang katawhan ni Jehova nagahambal sing putli nga hambal sang kamatuoran ­sang Biblia nga ginaaman paagi sa iya organisasyon.

8. Ano ang identidad sang tawo sang pagkamalinapason?

⁸ Gintagna ang dakung apostasya, kag ang ‘tanhaga sang pagkamalinapason’ nagpanghikot na sang nahaunang siglo C.⁠E. Wala magdugay, ang mga tawo nga nagbaton​—⁠ukon nag-agaw⁠—​sang mga posisyon sa pagpanudlo sa kongregasyon nagtudlo sing madamo nga dimatuod nga mga doktrina. Ang ila hambal indi gid putli. Gani nag-utwas ang grupo nga “tawo sang pagkamalinapason,” ang klero sang Cristiandad, nga nahigot sa dimatuod nga relihiosong mga tradisyon, kalibutanon nga pilosopiya, kag dima­kasulatahon nga mga panudlo.​—⁠2 Tesalonica 2:​3, 7.

Ang Putli nga Hambal Mabatian sa Bug-os nga Kalibutan

9. Ano ang relihioso nga mga hitabo sa tion sang ika-19 nga siglo?

⁹ Isa lamang ka diutay nga minoridad sang mahinadlukon sa Dios nga katawhan ang ‘nagapakig-away sing lakas tungod sa pagtuo nga gintugyan sa mga balaan.’ (Judas 3) Sa diin makita ina nga mga tumuluo? Sa sulod sang mga siglo, ginhuptan sang dimatuod nga relihion ang kadam-an sa espirituwal nga kadudulman, apang nakilala sang Dios ang iya mga nahamut-an. (2 Timoteo 2:19) Kag nian, sa tunga sang industriyal, komersial, kag sosyal nga mga pagbag-o sang ika-19 nga siglo, nag-utwas ang mga tingog gikan sa kabilugan nga babel sang relihioso nga kagumon. May diutay nga mga grupo nga nagtinguha sa paghangop sang mga tanda sang mga tion kag nagtagna sang ikaduha nga pagkari ni Jesucristo, apang indi tanan naghambal sing putli nga hambal.

10. Ano nga grupo nga nagapahibalo sang “ikaduha nga pagkari” ang ginpili sang Dios sa paghambal sing putli nga hambal, kag ngaa maathag nga gintuytuyan sila ni Jehova?

¹⁰ Apang, sang 1879, nag-athag kon kay sin-o tingog tuhoy sa “ikaduha nga pagkari” ang ginpili ni Jehova sa paghambal sang putli nga hambal subong iya mga Saksi. Sadto isa ka diutay nga grupo sa pagtuon sang Biblia nga ginpangunahan ni Charles Taze Russell ang nagatipon sa Pittsburgh, Pennsylvania, E.⁠U.⁠A. Napat-od nila nga ang ikaduha nga pagkari ni Jesus magasugod sa iya dikitaon nga presensia, nga ang tion sang kasisit-an sang kalibutan manug-abot, kag nga sundan ini sang Isa ka Libo ka Tuig nga Paghari ni Cristo nga magapasag-uli sang Paraiso sa duta upod ang dayon nga kabuhi para sa matinumanon nga mga tawo. Sang Hulyo 1879 ining mga Bible Students nagsugod sa pagbalhag sing magasin nga kilala karon sa bug-os nga kalibutan subong Ang Lalantawan. Sies mil ka kopya lamang sang una nga guwa sini ang ginpanagtag. Apang, maathag nga “ang kamot ni Jehova” yara sa sadtong mga Saksi, kay ini nga magasin ginabalhag karon sa 111 ka hambal nga halos kapin sa 15,000,000 ang promedyo nga ginabalhag para sa tagsa ka guwa.​—⁠Ipaanggid ang Binuhatan 11:​19-21.

11, 12. Ano ang pila sang Makasulatanhon nga mga kamatuoran nga nahangpan sang mga nagahambal sing putli nga hambal?

¹¹ Paagi sa Biblia kag sa mga publikasyon sang mga Saksi ni Jehova, kag labi na bangod sang ila makugi nga pagwali sing maayong balita, ang putli nga hambal nakilal-an sa bug-os nga duta. Kag daw ano ka daku nga mga benepisyo ang ginaagom sang mga nagahambal sini! Sa baylo sang pagsiling nga ang ‘Dios Dios, si Cristo Dios, kag ang Balaan nga Espiritu Dios’ sa misteryoso nga Trinitarianismo, nagaugyon sila sa Biblia, nga maathag nga nagapakita nga si Jehova amo ang tumalagsahon nga Labing Mataas nga Dios, si Jesucristo subong kubos amo ang iya Anak kag ang balaan nga espiritu amo ang makatilingala nga aktibo nga puwersa sang Dios. (Genesis 1:​2; Salmo 83:​18; Mateo 3:​16, 17) Ang mga nagahambal sing putli nga hambal nakahibalo nga ang tawo wala magtuhaw gikan sa mas manubo nga porma sang kabuhi kunti gintuga sang isa ka mahigugmaon nga Dios. (Genesis 1:​27; 2:7) Nahangpan nila nga ang kalag nagauntat sa pagluntad sa kamatayon​—⁠isa ka kamatuoran nga nagadula sang kahadlok sa patay. (Manugwali 9:​5, 10; Ezequiel 18:4) Ang impierno nahangpan nga amo ang kinaandan nga lulubngan sang katawhan, indi isa ka kalayuhon nga duog sang pag-antos nga ginhimo sang mapintas nga dios. (Job 14:13) Dugang pa, nahibaluan nila nga ang pagkabanhaw amo ­ang paglaum nga ginhatag sang Dios para sa mga patay.​—⁠Juan 5:​28, 29; 11:​25; Binuhatan 24:⁠15.

¹² Ang mga nagahambal sing putli nga hambal nagapakita sing pagtahod sa dugo kag sa kabuhi. (Genesis 9:​3, 4; Binuhatan 15:​28, 29) Nahangpan nila nga ang dutan-on nga kabuhi ni Cristo amo ang gawad nga ginbayad para sa matinumanon nga mga tawo. (Mateo 20:​28; 1 Juan 2:​1, 2) Wala gid sila nagapangamuyo sa “mga santos,” kay nahibaluan nila nga ang ila mga pangamuyo dapat idirekta sa Dios paagi kay Jesucristo. (Juan 14:​6, 13, 14) Sanglit ginakondenar sang Pulong sang Dios ang pagsimba sa mga idolo, ang mga imahen wala ginagamit sa ila pagsimba. (Exodo 20:​4-6; 1 Corinto 10:14) Kag ginalikawan nila ang katalagman sang demonismo bangod ginasikway nila ang espiritismo, nga ginakondenar man sa Biblia.​—⁠Deuteronomio 18:​10-12; Galacia 5:​19-21.

13. Ngaa wala nagumon ang mga nagahambal sing putli nga hambal?

¹³ Ang mga alagad sang Dios, nga nagahambal sing putli nga hambal, wala nagumon sa kon diin na sila sa lakat sang tion. Gintudluan sila ni Jehova nga yari na sila sa “tion sang katapusan,” kag si Jesus presente subong isa ka mahimayaon dimakita nga espiritu. (Daniel 12:​4; Mateo 24:​3-14; 2 Timoteo 3:​1-5; 1 Pedro 3:18) Upod ang gamhanan nga langitnon nga hangaway, si Cristo malapit na makig-away kon hukman na sang Dios ining malaut nga sistema sang mga butang. (Daniel 2:​44; Bugna 16:​14, 16; 18:​1-8; 19:​11-21) Huo, kag ang mga nagahambal sing putli nga hambal masako sa pagwali sing maayong balita nga ang Ginharian sang Dios sa idalom ni Cristo magadala sa indi madugay sing dakung mga pagpakamaayo sa tanan nga matinumanon nga katawhan sa paraiso nga duta. (Isaias 9:​6, 7; Daniel 7:​13, 14; Mateo 6:​9, 10; 24:​14; Lucas 23:43) Walay sapayan sini tanan, kadaygan pa lamang ang aton natun-an! Sa pagkamatuod, ang putli nga hambal amo ang pinakabugana, labing hamili nga hambal sa duta!

14. Anong iban pa nga mga benepisyo ang ginaagom sang mga nagahambal sing putli nga hambal?

¹⁴ Ang mga kaayuhan nga ginaagom sang mga nagahambal sing putli nga hambal nagalakip sang “paghidait sang Dios” nga nagabantay sang mga tagipusuon kag mga ikasarang sang panghunahuna. (Filipos 4:​6, 7) Ginatuman nila ang kasuguan sang Biblia, nga nagapauswag sang panglawas, kalipay, kag kaayawan nga nagagikan sa pagpahamuot kay Jehova. (1 Corinto 6:​9, 10) Huo, kag ang mga nagahambal sing putli nga hambal nagalaum sa dayon nga kabuhi sa ginsaad nga bag-ong kalibutan sang Dios.​—⁠2 Pedro 3:⁠13.

Gamita Ini Ukon Madula Mo Ini

15. Paano ka makabenepisyo gikan sa maayo nga paghangop sa putli nga hambal?

¹⁵ Agod mahambal mo ang putli nga hambal sa bag-ong kalibutan, dapat mangin sampaton ka sa sini nga nagahunahuna sa sini nga hambal. Kon ang isa ka tawo nagatuon sing isa ka hambal, sa primero nagahunahuna anay sia sa iya tumandok nga hambal kag dayon ginabadbad ang iya panghunahuna sa bag-o nga hambal. Apang samtang nagasampaton sia sa bag-o nga hambal, nagasugod sia sa paghunahuna sa sini nga indi na kinahanglan magbadbad. Sing kaanggid, paagi sa maukod nga pagtuon, mahangpan mo ang putli nga hambal sa bagay nga mahibaluan mo kon paano iaplikar ang kasuguan kag mga prinsipio sang Biblia sa paglubad sang mga palaligban kag magpabilin sa “banas sang kabuhi.”​—⁠Salmo 16:⁠11.

16. Ano ang matabo kon wala mo ginagamit sing regular ang putli nga hambal?

¹⁶ Dapat mo gamiton ang putli nga hambal sing regular, ukon madula mo ang ikasarang sa paghambal sini sing maayo. Sa pag-ilustrar: Sang nagligad nga mga tuig, ang iban sa aton nakatuon sing dumuluong nga hambal. Mahimo madumduman ninyo ang pila ka mga tinaga sa sina nga hambal apang indi na kamo hanas sa sini bangod wala ninyo ginagamit pirme. Amo man ang mahimo matabo sa putli nga hambal. Kon wala naton ginagamit ini sing regular, madula naton ang pagkasampaton sa sini, kag mangin makapasubo ang resulta sini sa espirituwal. Busa hambalon naton ini sing regular sa mga miting kag sa Cristianong ministeryo. Ining mga hilikuton, upod ang personal nga pagtuon, magabulig sa aton sa paghambal sang mga butang sing husto sa putli nga hambal. Kag daw ano ka importante ina!

17. Ano ang nagalaragway nga ang panghambal mahimo nga makaluwas sing kabuhi ukon makamamatay?

¹⁷ Ang hambal mahimo nga makaluwas sing kabuhi ukon makamamatay. Ginpakita ini sang mag-away ang Israelinhon nga tribo sang Efraim kag ni Hukom Jepte sang Galaad. Agod makilal-an ang mga Efraimnon nga nagatinguha sa pagpalagyo paagi sa pagtabok sa Suba sang Jordan, naggamit ang mga Galaadnon sing palatandaan nga tinaga nga “Shibboleth,” nga may “sh” nga tunog sa umpisa. Ginpakilala sang mga Efraimnon ang ila kaugalingon sa Galaadnon nga mga guardia sa talabukan sang Jordan paagi sa pagsiling sing “Sibboleth” sa baylo sang “Shibboleth,” sayop nga pagmitlang sang palatandaan nga tinaga. Subong resulta, 42,000 ka Efraimnon ang ginpatay! (Hukom 12:​5, 6) Sing kaanggid, ang ginatudlo sang klero sang Cristiandad mahimo nga daw malapit sa putli nga hambal para sa mga wala nakasonar sa kamatuoran sang Biblia. Apang ang sayop nga paghambal sa relihioso nga paagi mangin makamamatay sa adlaw sang kaakig ni Jehova.

Magapabilin Kita nga Nahiusa

18, 19. Ano ang kahulugan sang Sofonias 3:​1-5?

¹⁸ Nagapatuhoy sa dimatutom nga Jerusalem sang una kag sa iya modernong katumbas, ang Cristiandad, ginasiling ini sa Sofonias 3:​1-5: “Kailo sa iya nga mabinatuon kag dinagtaan, ang mapiguson nga siudad! Wala sia magtuman sa tingog; wala sia magbaton sang disiplina. Wala sia magsalig kay Jehova. Wala sia magpalapit sa iya Dios. Ang iya mga prinsipe sa tunga niya mga leon nga nagangurob. Ang iya mga hukom mga lobo sa kagab-ihon nga indi magbiya sing tul-an tubtob sa aga. Ang iya mga manalagna mga huroshuros, mabudhion nga mga tawo. Ang iya mga saserdote nagpasipala sang balaan; ginlubag nila ang kasuguan. Si Jehova matarong sa tunga niya; wala sia maghimo sing kalautan. Sa tagsa ka aga ginapasiga niya ang iya katarungan. Wala sia nagapalangan. Apang ang dimatarong wala makakilala sing kahuya.” Ano ang kahulugan sining mga pulong?

¹⁹ Ang dumaan nga Jerusalem kag ang modernong Cristiandad lunsay nagrebelde batok kay Jehova kag gindagtaan ang ila kaugalingon sing dimatuod nga pagsimba. Ang kalautan sang ila mga lider nagresulta sa pagpigos. Walay sapayan sang sulitsulit nga paandam sang Dios, wala sila mamati kag magpalapit sa iya. Ang ila mga prinsipe nangin kaangay sang mabangis, gutom nga mga leon, nga nagasikway sang pagkamatarong. Kaangay sang gutom nga mga lobo, ginlapalapa sang ila mga hukom ang katarungan. Ang ila mga saserdote ‘nagpasipala sa butang nga balaan kag ginlubag nila ang kasuguan’ sang Dios. Gani malapit na ‘tipunon [ni Jehova] ang mga pungsod kag mga ginharian, agod iula sa ila ang iya kaalipungot, ang iya bug-os nga mapintas nga kaakig.’​—⁠Sofonias 3:⁠8.

20. (a) Ano ang dapat himuon agod maluwas sa adlaw sang kaakig ni Jehova? (b) Paano mo malauman ang dayon nga mga pagpakamaayo gikan sa Dios?

²⁰ Ang adlaw sang kaakig ni Jehova madasig nga nagahilapit. Busa, kon luyag ninyo maluwas padulong sa bag-ong kalibutan sang Dios, tun-i kag ihambal ang putli nga hambal sa walay langan. Paagi lamang sa paghimo sini nga makasapo kamo sing proteksion gikan sa espirituwal nga kapahamakan karon kag gikan sa madasig-nagahilapit nga kalamidad sa bug-os nga globo. Ginawali sang mga Saksi ni Jehova ang adlaw sang kaakig sang Dios kag ang makalilipay nga mensahe sang iya Ginharian. Nalipay gid sila sa paghambal nahanungod sa himaya sang iya pagkahari! (Salmo 145:​10-13) Maghiusa sa ila, kag makalaum kamo sa pag-agom sing dayon nga kabuhi kag sang iban pa nga mga pagpakamaayo gikan sa Ginhalinan sang putli nga hambal, ang Soberanong Ginuong Jehova.

Paano Mo Sabton?

◻ Ano ang pila ka paagi sa pagtuon sang putli nga hambal?

◻ Ngaa mapuslanon nga ihambal ang putli nga hambal?

◻ Ano ang matabo kon wala mo ginagamit sing regular ang putli nga hambal?

◻ Paano maluwas ang isa ka tawo sa adlaw sang kaakig ni Jehova kag makaagom sing dayon nga mga pagpakamaayo?

[Laragway sa pahina 16]

Ginhuyop ni Gideon kag sang iya mga tinawo ang ila mga budyong kag ginbayaw ang ila mga sulo

[Laragway sa pahina 18]

Kutob sang 1879 padayon nangin maathag nga si Charles Taze Russell kag ang iya mga kaupod ginagamit sang Dios sa pagsakdag sa putli nga hambal

[Mga Laragway sa pahina 20]

Nahiusa ka bala sa mga Saksi ni Jehova sa paghambal sing putli nga hambal?