Makakulunyag nga mga Palanan-awon nga Nagapabakod sang Pagtuo

Mga Pangunang Punto Gikan sa Bugna

ANG alagad ni Jehova nga si Juan yara sa diutay nga pulo sang Patmos, didto ayon sa katundan nga baybayon sang Asia Minor. Nakita didto sang tigulang nga apostol ang makatilingala nga mga butang​—⁠malaragwayon, sa masami makakilibot, kag importante matuod! Yara sia sa adlaw sang Ginuo, halin sa paglingkod sa trono ni Jesus sang 1914 tubtob sa katapusan sang iya Milenyo nga Paggahom. Bisan pa nakita ni Juan ang mga hitabo nga mahanabo sa pinakamadulom nga takna sang katawhan, matahom gid katama ang iya una nga pagtan-aw sa Isa ka Libo ka Tuig nga Paggahom ni Cristo! Daw ano nian nga mga pagpakamaayo ang maagom sang matinumanon nga katawhan!

Ginrekord ni Juan ining mga palanan-awon sa tulun-an nga Bugna sang Biblia. Ginsulat sang mga 96 C.⁠E., mapabakod sini ang aton pagtuo sa Dios sang tagna, si Jehova, kag sa iya Anak, si Jesucristo.​—⁠Para sa mga katul-iran, tan-awa ang libro nga Revelation​—⁠Its Grand Climax At Hand!, ginbalhag sang Watch­tower Bi­ble and ­Tract So­cie­ty of New York, Inc.

Si Cristo Nagahatag sing Mahigugmaon nga Laygay

Sa una nga bahin sang pagpahayag halin sa Dios paagi kay Cristo nakita ang mga sulat sa pito ka ­kongregasyon sang mga masig­kamanunubli ni Jesus sa Ginharian. (1:​1⁠–​3:22) Sa tingob, ang mga sulat nagahatag sing komendasyon, nagapakilala sang mga problema, nagahatag sing pagtadlong kag/ukon pagpalig-on, kag nagasitar sang mga pagpakamaayo nga resulta bangod sang matutom nga pagkamatinumanon. Bisan pa ang mga taga-Efeso nagbatas, ginbiyaan nila ang ila una nga gugma. Ang manggaranon sa espirituwal nga kongregasyon sang Smirna ginpalig-on sa pagpabilin nga matutom sa tunga sang kapipit-an. Wala madaug sang paghingabot ang kongregasyon sang Pergamo, apang ginpabay-an sini ang sektaryanismo. Walay sapayan sang nag-uswag nga hilikuton sang mga Cristiano sa Tiatira, nagaluntad didto ang impluwensia ni Jesebel. Ang kongregasyon sang Sardis kinahanglan magbugtaw sa espirituwal, ang sa Filadelfia ginlaygayan sa paghupot sang yara sa ila, kag ang maalabaab nga mga taga-Laodicea nagakinahanglan sing espirituwal nga pagbulong.

Daw ano katahom nga mga pulong para sa paghanas sa palaabuton nga mga hari sa langit​—⁠sa katunayan, sa tanan nga mga Cristiano! Halimbawa, may yara bala sa aton nga nangin maalabaab? Nian maghulag! Mangin makapapagsik subong sang isa ka tasa sang mabugnaw nga tubig sa mainit nga adlaw kag magsugod man sa pagpakita sing mainit nga kakugi para kay Jehova kag sa pag-alagad sa iya.​—⁠Ipaanggid ang Mateo 11:​28, 29; Juan 2:⁠17.

Ang Kordero Nagabukas sang Linukot

Masunod nga nakita si Jehova sa iya trono sing halangdon. (4:1–5:14) Ginpalibutan sia sang 24 ka gulang kag sang apat ka tinuga nga buhi. Ginauyatan niya ang isa ka linukot nga napat-inan sing pito ka pat-in. Sin-o ang makabukas sa linukot? Ti, ang Kordero, si Jesucristo, ang takus nga makahimo sina!

Ang dramatiko nga mga hitabo nabuksan sang ginbuksan sang Kordero ang anum sa mga pat-in. (6:​1⁠–​7:17) Sang ginbuksan ang nahaunang pat-in, si Cristo nagasakay sa kabayo nga maputi, nakabaton sing purungpurong (sang 1914), kag naglakat sia nga nagapangdaug. Ang mga manugkabayo nagdala sing inaway, tiggulutom, kag kamatayon sa katawhan sang ang tatlo pa ka pat-in ginbuksan. Sang ginbuksan ang ikalima nga pat-in, ang ginmartir tungod kay Cristo nagsinggit agod itimalus ang ila dugo, kag ang kada isa ginhatagan sing “panapton nga maputi,” nagakahulugan sang matarong nga tindog kag may kaangtanan sa pagbanhaw sa ila padulong sa dimamalatyon nga espiritu nga mga tinuga nga may harianon nga mga pribilehiyo. (Ipaanggid ang Bugna 3:​5; 4:⁠4.) Ang adlaw sang kasingkal sang Dios kag sang Kordero ginpahibalo paagi sa isa ka linog sang ang ikan-om nga pat-in ginbuksan. Apang “ang apat ka hangin sang duta,” nagalaragway sa malaglagon nga paghukom, ginpunggan tubtob ang 144,000 ka ulipon sang Dios ginpat-inan. Sang ginhaplasan sila sang espiritu sang Dios kag gin-adoptar subong espirituwal nga mga anak niya, nakabaton sila sing abanse nga tanda​—⁠isa ka pat-in, ukon sumpa​—⁠sang ila langitnon nga palanublion. Pagkatapos lamang matilawan nga ang pat-in mangin permanente. (Roma 8:​15-17; 2 Corinto 1:​21, 22) Kag daku gid ang katingala ni Juan nga makita ang “dakung kadam-an” gikan sa tanan nga mga pungsod​—⁠isa ka kadam-an nga may paglaum nga kabuhi nga dayon sa dutan-on nga paraiso! Nagguwa sila gikan sa “dakung kapipit-an,” ang tion sang dimapaanggiran nga kasisit-an para sa katawhan!

Makakilibot nga mga hitabo ang natabo sang ang ikapito nga pat-in ginbuksan. (8:​1⁠–​11:14) Ang mga tunga sa takna nga kalinong, nagapahanugot nga ang mga pangamuyo sang mga balaan mabatian, ginsundan sang pagpilak sa duta sang kalayo gikan sa halaran. Nian ang pito ka anghel naghanda sa pagpatunog sang mga budyong nga nagapahibalo sang kalalat-an sang Dios sa Cristiandad. Ang mga budyong ginpalanog sa bug-os nga tion sang katapusan tubtob sa dakung kapipit-an. Ang apat ka budyong nagpahibalo sang mga kapipit-an sa duta, sa dagat, sa mga tuburan sang tubig, kag sa adlaw, bulan, kag mga bituon. Ang pagpatunog sa ikalima nagpaguwa sa mga apan nga nagalaragway sa hinaplas nga mga Cristiano nga nagapanong sa pagpakig-away halin sang 1919 padayon. Sa pagtunog sang ikan-om nga budyong, ang pagsalakay sang mga manugkabayo natabo. Sa katumanan, ang mga hinaplas, nga ginpapagsik kutob sang 1935 sang “dakung kadam-an,” nagbantala sang mga mensahe sang paghukom batok sa relihiosong mga lider sang Cristiandad.

Masunod ginkaon ni Juan ang diutay nga linukot, nagapakita nga ang hinaplas nagbaton sang ila asaynment kag nagkaon gikan sa bahin sang Pulong sang Dios nga nagaunod sang mga ekspresyon sang balaan nga mga paghukom nga ginabantala nila batok sa Cristiandad. Ang apostol ginsugo sa pagtakus sa santuaryo sang templo, nagapakita sang pat-od nga katumanan sang katuyuan ni Jehova nahanungod sa kahimusan sang templo kag sang balaan nga mga talaksan nga tumanon sadtong nagapakig-upod sa sini. Nian ang hinaplas nga “duha ka saksi” sang Dios nga nagatagna sa panapton nga sako, ginpatay, apang ginbanhaw. Nagatudlo ini sa 1918-19, sang ang ila hilikuton sa pagbantala ginhimo nga halos patay sang mga kaaway, apang ang mga alagad ni Jehova milagruso nga ginbuhi liwat para sa ila minis­teryo.

Ang Ginharian Nabun-ag!

Ang pagpatunog sa ikapito nga budyong nagapahibalo sang pagkabun-ag sang Ginharian. (11:15–12:17) Sa langit ang simbuliko nga babayi (ang langitnon nga organisasyon ni Jehova nga Dios) nagbun-ag sang isa ka bata nga lalaki (ang Ginharian sang Dios kag si Cristo ang Hari), apang ang dragon (si Satanas) nagtinguha sa walay pulos sa paglamon sini. Nagatapos sang inaway sa langit pagkatapos nga nabun-ag ang Ginharian sang 1914, ang madaugon nga si Miguel (si Jesucristo) nagtagbong sang dragon kag sang iya mga anghel sa duta. Didto ang dragon padayon nga nagapakig-away batok sa hinaplas nga nagkalabilin sang binhi sang langitnon nga babayi.

Masunod nga nakita ni Juan ang sapat nga mapintas nga sa sini ginhimo ang makangilil-ad nga larawan. (13:​1-18) Ining pito-sing-ulo, napulo-sing-sungay nga politikal nga sapat nga mapintas nagtakas sa “dagat,” ang magarot nga kadam-an sang katawhan nga gikan sini naghalin ang tawhanon nga pangulohan. (Ipaanggid ang Daniel 7:​2-8; 8:​3-8, 20-25.) Ano ang tuburan sang awtoridad sining simbuliko nga tinuga? Ti, wala sing liwan kundi si Satanas ang dragon! Kag hunahunaa lamang! Sa sining politikal nga higante ang duha-sing-sungay nga sapat (ang Anglo-Amerikano nga Kagamhanan sa Kalibutan) nakita nga naghimo sing “larawan,” kilala karon subong ang Nasyones Unidas. Madamo ang ginpilit sa pagsimba sa sapat nga mapintas kag sa pagbaton sang “tanda” paagi sa paghimo sang mga butang sa iya paagi kag sa pagtugot sini nga maggahom sa ila kabuhi. Apang ang mga Saksi ni Jehova malig-on nga nagasikway sa yawan-on nga tanda sang sapat nga mapintas!

Ang mga Alagad ni Jehova Nagapanghikot

Ang nanuhaytuhay nga mga alagad sang Dios nakita nga nagapanghikot sang ang pito ka yahong sang iya kasingkal ginbubo. (14:1–16:21) Pamatii! Sa langitnon nga Bukid sang Sion, mabatian ni Juan ang 144,000 nga nagaamba sang daw bag-o nga ambahanon. Ang isa ka anghel nga nagalupad sa tunga sang langit may maayong balita nga dayon nga ibantala sa mga pumuluyo sang duta. Ano ang ginapakita sini? Nga ang mga Saksi ni Jehova ginabuligan sang mga anghel sa pagbantala sang mensahe sang Ginharian.

Nakibot sing daku si Juan nga makita ang ubasan sang duta nga gin-ani kag ang bug-os nga duta gindugmok sang ang linasan sang kasingkal sang Dios ginlinasan. (Ipaanggid ang Isaias 63:​3-6; Joel 3:​12-14.) Sa sugo ni Jehova, ang pito ka anghel masunod nga nagbubo sang pito ka yahong sang kasingkal sang Dios. Ang duta, ang dagat, kag ang mga tuburan sang tubig, subong man ang adlaw, ang trono sang sapat nga mapintas, kag ang Suba ­Eufrates, apektado sang ginbubo ang nahaunang anom ka yahong. Handurawa ang kakunyag ni Juan sang nakita niya ang yawan-on nga propaganda nga nagatipon sa tawhanon nga mga hari sa inaway sang Dios sa Har⁠–​Magedon. Kag ang resulta makahalapay sang ang ikapito nga yahong ginbubo sa hangin.

Duha ka Simbuliko nga Babayi

Sa pagkamatuod, nalipay si Juan nga makita ang katapusan sang Babilonia nga Daku, ang bug-os kalibutan nga emperyo sang butig nga relihion, kag makita ang makalilipay nga mga hitabo pagkatapos sang iya kalaglagan. (17:1–19:10) Nahubog sang dugo sang mga balaan, nakita sia nga nagasakay sa sapat nga mapintas nga mapula nga may pito ka ulo kag napulo ka sungay (ang Liga de Nasyones kag ang nagtal-us sa sini, ang Nasyones Unidas). A, daku gid nga kalaglagan ang gin-agom niya sang ang mga sungay nagbalikid batok sa iya!

Ang langitnon nga mga tingog nabatian nga nagadayaw kay Jah bangod sang pagkalaglag sang Babilonia nga Daku. Kag nagadaguob gid nga pagdayaw ang nagapahibalo sa kasal sang Kordero kag sang iya Nobya, ang ginbanhaw nga mga hinaplas!

Si Cristo Nagamadinalag-on kag Nagagahom

Ang Hari sang mga hari masunod nga nakita ni Juan nga nagapanguna sa langitnon nga mga hangaway sa paglaglag sa sistema sang mga butang ni Satanas. (19:​11-21) Huo, si Jesus, “Ang Pulong sang Dios,” nagapakig-away sa mga pungsod. Nakita sang apostol ang sapat nga mapintas (ang politikal nga organisasyon ni Satanas kag ang dimatuod nga manalagna (ang Anglo-Amerikano nga Kagamhanan sa Kalibutan) nga gintagbong sa “kalayuhon nga linaw,” simbulo sang bug-os kag dayon nga kalaglagan.

Ano ang masunod? Ti, nakita ni Juan ang paggapos kay Satanas. Nagasunod ang pagtan-aw una sa Isa ka Libo ka Tuig nga Paggahom ni Cristo, diin si Jesus kag ang iya ginbanhaw nga kaupod nga mga manuggahom magahukom sa katawhan, nagadala sa mga matinumanon sa tawhanon nga pagkahimpit! (20:​1-10) Tion na karon para sa katapusan nga pagtilaw. Ginbuy-an gikan sa kadadalman, si Satanas magasugod sa pagpatalang sa ­katawhan, apang ang kalaglagan magatapos sa karera sang tanan nga yawan-on kag tawhanon nga mga rebelde batok sa Dios.

Nagaasoy pabalik sang tion, nawili gid si Juan sa pagtan-aw sa tanan sa kamatayon, sa Hades (ang kinaandan nga lulubngan sang katawhan), kag sa dagat nga ginbanhaw kag ginhukman sa atubangan sang Dios, nagalingkod sa dakung trono nga maputi! (20:​11-15) Kag daw ano nga paumpaw ang maagom sang mga matarong kon ang kamatayon kag Hades itagbong sa linaw nga kalayo, kag indi na gid sa liwat makakuha sing mga biktima!

Samtang manugtapos ang mga palanan-awon ni Juan, nakita niya ang Bag-ong Jerusalem. (21:1–22:21) Inang panggobierno nga siudad nakita nga nagapanaug halin sa langit kag nagadala sing kapawa sa mga pungsod. Nagailig paagi sa Bag-ong Jerusalem ang “suba sang tubig sang kabuhi,” nagalaragway sa Makasulatanhon nga kamatuoran kag sa tanan iban pa nga hatag-Dios nga aman pasad sa halad ni Jesus sa paghilway sa matinumanon nga mga tawo gikan sa sala kag kamatayon kag sa paghatag sa ila sing kabuhi nga walay katapusan. (Juan 1:​29; 17:​3; 1 Juan 2:​1, 2) Sa tagsa ka pangpang sining suba, nakita ni Juan ang mga kahoy nga may mga dahon nga bulong, nagalaragway sa bahin sang aman ni Jehova para sa paghatag sing kabuhi nga dayon sa matinumanon nga katawhan. Ang nagahinakop nga mga mensahe halin sa Dios kag kay Cristo ginsundan sang isa ka imbitasyon. Daw ano ka makalilipay nga mabatian ang espiritu kag ang nobya nga nagaagda sa tanan nga ginauhaw sa ‘pagkari, magkuha sing tubig sang kabuhi nga walay bayad’! Kag samtang ginabasa naton ang katapusan nga mga pulong sang Bugna, walay duhaduha nga ginapaambitan naton ang kainit sang pahayag ni Juan: “Kabay pa! Kari, Ginuong Jesus.”

[Kahon/Laragway sa pahina 21]

Magpabilin nga Nagamata: Sa tunga sang matagnaon nga mga pulong nahanungod sa inaway sang Dios nga Har⁠–​Magedon (Armagedon), ini ginsiling: “Yari karon! Nagakari ako [si Jesucristo] subong sang makawat. Malipayon ang nagamata nga nagatipig sang iya mga panapton, agod nga indi sia maglakat nga hublas kag makita nga hubo.” (Bugna 16:15) Pagpatuhoy ini sa mga katungdanan sang manugtatap, ukon opisyal, sang templo sa Jerusalem. Sa pagbantay, nagkadto sia sa templo sa pagtan-aw kon bala ang Levinhon nga mga bantay nagamata ukon nagatulog sa ila mga istasyon. Ang bantay nga makit-an nga nagatulog ginahampak sang lipak, kag ang iya panapton mahimo nga ginasunog subong makahuluya nga silot. Bangod tuman na kalapit karon ang Armagedon, ang hinaplas nga nagkalabilin sang “harianon nga pagkasaserdote,” ukon “espirituwal nga panimalay,” determinado sa pagpabilin nga nagamata sa espirituwal. Amo man ang ila mga kaupdanan, ang “dakung kadam-an,” nga may dutan-on nga mga paglaum, kay nagahimo man sila sing balaan nga pag-alagad sa Dios sa templo. (1 Pedro 2:​5, 9; Bugna 7:​9-17) Ang Cristianong mga manugtatap labi na nga dapat magpabilin nga nagabantay batok sa paglambo sang malain nga mga kahimtangan sa kongregasyon. Bangod nagapabilin sila nga nagamata, ang tanan nga matutom nga mga sumilimba sa espirituwal nga templo sang Dios nagatipig sang ila “mga panapton,” nagakahulugan sang ila dungganon nga pag-alagad subong mga Saksi ni Jehova.