Mga Cristianong Pamatan-on—Magpakalig-on sa Pagtuo

“ANG tanan dapat magtambong.” Amo sina ang pahibalo. Ang tanan nga estudyante sa isa ka eskwelahan sa Hapón kinahanglan nga magtambong sa general assembly sa awditoryum. Ang isa ka lanubo nga Cristianong estudyante indi ugyon sa mga pulong nga ginapabutyag sa ambahanon sang eskwelahan. “Ti,” hunahuna niya, “nahibaluan ko nga patokaron ang ambahanon sang eskwelahan. Apang wala ako sing dapat paligban. Magalingkod na lamang ako sa likod subong sang kinaandan.”

Apang, sang pagsulod sang lanubo nga Saksi ni Jehova sa awditoryum, nasapwan niya nga ang tanan nga mga manunudlo nagalingkod sa likod nga raya. Gani, kinahanglan sia maglingkod sa atubangan nila. Sang ang iban nga mga estudyante nagtindog para sa ambahanon sang eskwelahan, matinahuron sia nga nagpabilin nga nagalingkod. Apang naakig sa sini ang mga ­manunudlo. Ginpilit nila sia sa pagtindog. Mahanduraw mo bala ang imo kaugalingon sa sina nga kahimtangan? Ano kuntani ang ginhimo mo?

Kon Ngaa Kinahanglan ang Makusog nga Pagtuo

Maayo kuntani kon pabay-an na lamang sang mga tawo ang mga Cristiano kag tugutan sila nga magkabuhi nahisuno sa ila ginhanas sa Biblia nga konsiensia. Apang, sing masunson, ang mga Cristiano kinahanglan nga mag-atubang sang mahuol nga mga kahimtangan. Indi kita makibot sa sini, kay ang Anak sang Dios mismo, si Jesucristo, nagsiling: “Kon ginhingabot nila ako, hingabuton man nila kamo.” (Juan 15:20) Luwas sa direkta nga paghingabot, ang mga alagad ni Jehova nagaatubang sang lainlain iban pa nga mga pagtilaw sang pagtuo.

Ang Cristianong mga pamatan-on masunson nga nagakinahanglan sing makusog nga pagtuo agod maatubang ang mga pagtilaw nga nasugata sa eskwelahan. Mahimo sila mapilitan nga makig-upod sa mga kabutho nga nagagamit sing malaw-ay nga hambal ukon may mga panimuot nga wala nagatahod sa Dios. Ang lanubo nga mga Cristiano mahimo nga nagaatubang sing dugang nga pagpadaku sa nasyonalismo kag pag-ipit nga mag-entra sa mga klub, politika sa eskwelahan, ukon iban pa nga mga aktibidad nga makahalalit sa espirituwal. Mahimo ipiton sang mga manunudlo ukon mga estudyante ang lanubo nga mga Cristiano sa pagkompromiso. Gani, ang diosnon nga mga pamatan-on dapat magsalig sa espiritu ni Jehova para sa pagtuo nga kinahanglanon agod makahatag sing maathag nga pangapin sa ila paglaum.​—⁠Mateo 10:19, 20; Galacia 5:22, 23.

‘Mangin Handa sa Pagpangapin’

Ang laygay ni apostol Pedro nagakaigo para sa lamharon kag hamtong nga mga Cristiano. Sia nagsiling: “Pirme [mangin] handa sa pagpangapin sa atubangan sang tanan nga nagapamangkot sa inyo bangod sang inyo paglaum, apang himua ini nga may pagpaubos kag tudok nga pagtahod.” (1 Pedro 3:15) Ano ang kinahanglan agod mangin handa sa paghimo sina nga pagpangapin? Una, dapat mo mahangpan kon ano ang ginatudlo sang Kasulatan. Agod makatindog nga malig-on sa eskwelahan sa mga butang subong sang nasyonalismo, politika, abuso sa droga, ukon moral, dapat mo anay mahangpan ang rason para sa Cristianong tindog kag dapat magpati sa sini sing hanuot.

Halimbawa, si apostol Pablo nagsiling sa mga masigka Cristiano: “Dili kamo magtalang. Ang malaut nga mga paghiliupod nagadunot sang maayo nga mga pamatasan.” (1 Corinto 15:33) Nagaugyon ka bala sa sina? Subong sang ginpakita ni Pablo, mahapos mapatalang kon tuhoy sa paghiliupod. Ang isa mahimo nga mainabyanon kag mabuot. Apang kon wala sia nagaambit sa imo kabalaka sa pag-alagad kay Jehova ukon nagapati sa mga saad sang Biblia, malain sia nga kaupod. Ngaa? Bangod ang iya kabuhi napasad sa tuhay nga mga prinsipio, kag ang mga butang nga importante katama sa Cristiano mahimo nga diutay sing kahulugan sa iya.

Indi ini makakilibot, kay si Jesus nagsiling tuhoy sa iya mga disipulo: “Sila indi iya sang kalibutan, subong nga ako indi iya sang kalibutan.” (Juan 17:16) Imposible para sa isa ka tawo ang mangin matuod nga Cristiano kag sa amo man nga tion mangin bahin sining kalibutan, diin si Satanas amo ang dios. (2 Corinto 4:4) Nakita mo bala kon paano ang pagkanahamulag sa kalibutan nagaamlig sa isa ka Cristiano gikan sa kalautan kag pinuyas nga nagatublag sa madamo sa karon? Kon amo, nian mahangpan mo kon ngaa dapat mo huptan ang imo pagkanahamulag, bisan pa nagakahulugan ini nga indi ka mahimo makabuylog sa pila ka mga aktibidad sang eskwelahan.

Ang importansia sang pagpakalig-on sa pagtuo kag pag-una sa kabuhi sang mga interes sang Ginharian ginpakita sa kaso sang isa ka lanubo nga Cristianong babayi. (Mateo 6:33) Sang ginpahibalo ang ensayo sang iya gradwasyon, natukiban niya nga gin-iskedyul ini sa adlaw mismo sang sirkito nga asambleya sang mga Saksi ni Jehova nga ginaplano niya nga tambungan. Nagsulat sia sing isa ka matinahuron nga sulat nga nagapaathag kon ngaa indi sia makatambong sa ensayo kag ginhatag niya ini sa iya maestro antes sang klase. Pagkatapos sang klase, ginsugilanon sia sing pribado sang iya maestro kag ginpangabay nga ipaathag liwat kon ngaa indi sia makatambong sa ensayo. Ang bata nagsiling: “Luyag niya mahibaluan kon ang akon pulong pareho. Akon bala ini balatyagon, ukon ang sulat nagaunod lamang bala sang mga pulong sang akon iloy? Sang nakita niya ang akon personal nga kombiksion sa bagay, wala sia nagpamatok sa akon.”

“Magpangapin sa Atubangan sang Tanan”

Natukiban sing masunson sang Cristianong mga pamatan-on nga kon ipahibalo nila sing maathag ang ila tindog sa mga manunudlo kag mga estudyante sa wala pa mag-utwas ang problema, ang pag-ipit indi pareho kadaku kon ang problema kinahanglan atubangon. Ang isa ka lanubo nga Cristiano sa Hapón nag-asoy nga sang 11 anyos sia, ginpatuman sang eskwelahan nga ang tanan nga mga estudyante magatambong sa Christmas party. Ang mga estudyante sa mas mataas nga grado nag-ipit sa iya sa pagpakigbahin, apang wala sia nagtambong, kag nahangpan sang iya manunudlo ang iya tindog. Ngaa? Bangod sa pag-abre gid sang klase, ang Saksi kag ang iya mga ginikanan nakigkita sa manunudlo kag nagpaathag sang lainlain nga mga aspeto sang ila Cristianong tindog.

Samtang nagabantala sa latagon, ang iban nga mga pamatan-on nga Cristiano nahadlok masugilanon ang ila mga kabutho ukon mga manunudlo. Amo man bala sina ang imo balatyagon? Kon amo, ngaa indi maghimo sing inisyatibo kag pahibaluon ang imo mga kabutho nga ikaw nagabantala sa balay kag balay kag kon ngaa ginahimo mo ina. Ang isa ka 14-anyos nga Saksi ni Jehova nagreport: “Ang tanan sa eskwelahan nakahibalo sang akon tindog subong isa ka Cristiano. Sa pagkamatuod, nakahibalo gid sila sing maayo sa bagay nga kon masugilanon ko ang isa ka kabutho samtang nagabantala sa latagon, wala ako nahuya. Ang mga masigka estudyante masunson nga nagapamati, kag sa madamong beses nagakuha sila sing literatura sa Biblia.” Isa ka 12-anyos ang nagareport nga ginakalangkagan gid niya nga masugilanon ang iya mga kabutho kon nagaguwa sia sa latagon. Sa baylo nga mahadlok sa sining panghunahuna, tayuyon niya nga ginaensayo kon ano ang isiling niya kon matabo ini. Gani, handa sia sa paghatag sing maligdong nga mga rason tungod sang iya pagtuo.

Sa madamong mga eskwelahan, ang mga aktibidad pagkatapos sang klase butang nga mapilian. Apang sa katunayan, ang mga manunudlo kag mga estudyante nagaipit sa mga indibiduwal sa pagbuylog sa sinang mga aktibidad. Isa ka 20-anyos nga Cristiano ang nakatukib sang maayong paagi agod madaug ini nga pag-ipit. Sia nagsiling: “Nag-auxiliary payunir ako sang hayskul ako. Nakahibalo ang tanan nga masako gid ako sa akon relihioso nga mga aktibidad sa pagbuylog sa iban nga mga butang.” Amo man sini ang ginhimo sang manghud nga babayi sining Saksi. Ang iban nga Cristianong mga pamatan-on nagdiretso sa auxiliary payunir nga pag-alagad sang mga tuig nga nagaeskwela pakadto sa regular payunir nga hilikuton subong bug-os tion nga mga manugbantala sang Ginharian sang nakatapos na sila sa ila pag-eskwela.

Indi gid pagkalimti ang maayong mga epekto sang imo maayong paggawi kag sang imo maisog nga panaksi. Sa baylo nga maghipos, ngaa indi ipakita nga malig-on ka sa pagtuo paagi sa pagpamulong sing matinahuron apang sing masidla? Amo sina ang ginhimo sang Israelinhon nga bata nga babayi nga ginbihag kag nangin katapo sang panimalay ni Naaman nga heneral sang Siria. (2 Hari 5:​2-4) Ang ngalan ni Jehova gindayaw bangod sang inisyatibo sinang bata nga babayi. Ang imo kaanggid nga pagtuo makahatag man sing kadungganan sa Dios kag makabulig sa madamo pa sa pagtindog nga malig-on subong mga dumalayaw sang iya ngalan.

Ang katunayan amo nga indi naton makompromiso ang aton pagtuo kag sa gihapon makapabilin nga mga Cristiano. Si Jesus nagsiling: “Busa, ang tagsatagsa nga magtu-ad sa akon sa atubangan sang mga tawo, itu-ad ko man sia sa atubangan sang akon Amay nga yara sa langit; apang ang bisan sin-o nga magpanghiwala sa akon sa atubangan sang mga tawo, ipanghiwala ko man sia sa atubangan sang akon Amay nga yara sa langit.” (Mateo 10:​32, 33) Ang mangin malig-on sa pagtuo subong sumulunod ni Jesus isa ka serioso nga responsabilidad, indi bala?

Matigayon ang Bulig

Agod makatindog nga malig-on subong isa ka Saksi ni Jehova, kinahanglan mo ang mabaskog nga pagtuo. Bangod sina, dapat ka magtuon sing makugi sang Biblia, magtambong sang Cristianong mga miting, kag makigbahin sa pag-alagad sa latagon. Kon ginabatyag mo sa gihapon nga may kulang, ano ang himuon mo? Si disipulo Santiago nagsiling: “Kon may yara sa inyo nga nakulangan sing kaalam, papangayoa sia sa Dios, nga nagahatag sing maalwan sa tanan nga tawo kag wala nagabasol; kag hatagan sia sini.” (Santiago 1:5) Makigsugilanon kay Jehova sa pangamuyo nahanungod sang imo problema; pabakuron niya ikaw sa pag-atubang sang mga pagtilaw sang imo pagtuo.

Ano pa ang mahimo sang isa ka lanubo nga Cristiano? Ang tolon-an sang Hulubaton nagasugid sa aton: “Pamatii ang imo amay nga nagpakatawo sa imo, kag dili paghikayi ang imo iloy kon tigulang na sia.” (Hulubaton 23:22) Ginsakdag ni apostol Pablo ining laygay, kay nagsiling sia: “Mga kabataan, tumana ang inyo mga ginikanan sa tanan nga butang, kay ini kalahamut-an sa Ginuo.” (Colosas 3:20) Ang Cristianong mga ginikanan makabulig sa imo nga magpakalig-on sa pagtuo. Pamatii ang ila mga panugda. Paagi sa bulig nila, usisaa ang mga Kasulatan kag ang mga publikasyon nga napasad sa Biblia, nga nagapangita sing mga ideya, laygay, kag mga eksperiensia. Kamo sang inyo mga ginikanan mahalipay sa sini, kag magabulig ini sa inyo nga malandas ang kahuya ukon kahadlok.​—⁠2 Timoteo 1:⁠7.

Himusli sing bug-os ang mga aman nga ginahatag ni Jehova nga Dios paagi sa Cristianong kongregasyon. Maghanda sing maayo para sa mga miting. Makigsugilanon sa gintangdo nga mga gulang kag sa iban pa nga nakaagi sang mga eksperiensia nga kaanggid sa ginaatubang mo sa karon. Si Solomon nagsiling: “Ang maalam nga tawo makabati kag magdugang sa tinun-an, kag ang tawo nga may paghangop sa maayo amo ang isa nga nagatigayon sing malantipon nga mga laygay.” (Hulubaton 1:5) Gani magtuon gikan sa sining mga gulang. Makatuon ka man gikan sa Cristianong mga pamatan-on nga madinalag-on nga naglandas sang mga problema kaangay sang imo.

Ang Katutom Nagadala sing mga Pagpakamaayo

Paagi sa pagtindog nga malig-on sa pagtuo, ginatuman mo ang laygay ni Pablo nga “magpakalig-on kamo, nga dimationg, nga nagabugana gihapon sa buluhaton sang Ginuo.” (1 Corinto 15:58) Si Jehova nakahibalo kag nakahangop sang mga problema nga ginaatubang mo. Ginpabakud niya ang madamo nga nag-atubang sing kaanggid nga mga kabudlayan, kag pabakuron niya ikaw. Kon magsalig ka sa Dios, sakdagon ka niya, kay ang salmista nagsiling: “Itungtong kay Jehova ang imo lulan, kag sia magaalay-ay sa imo. Indi sia magtugot nga malingkang ang matarong.”​—⁠Salmo 55:⁠22.

Si Pedro nagsulat: “Tipigi nga matinlo ang inyo konsiensia, agod nga kon pasipalahan kamo mahuy-an ang mga nagapakamalaut sang inyo maayong paggawi kay Cristo.” (1 Pedro 3:16) Kon indi ka magkompromiso nahanungod sa matarong nga mga kasuguan kag mga prinsipio sang Dios, matigayon mo ang maayong konsiensia, nga isa gid ka pagpakamaayo gikan kay Jehova. Dugang pa, magapahamtang ka sing maayong halimbawa para sa Cristianong mga pamatan-on nga ang pagtuo maluya. (1 Timoteo 4:​15, 16) Ang imo paggawi mahimo nga magapalig-on sa ila sa paghimo sing mga panikasog nga magmangin malig-on sa pagtuo kag busa makasarang sa pagbatas sang mga pagtilaw.

Mahimo mo pa mabuligan yadtong nagpamatok primero sa imo Cristianong tindog. Dumduma ining nagapukaw sing paglaum nga mga pulong: “Sa kaagahon isab-ug ang imo binhi kag sa kahapunon dili pagpunggi ang imo kamot; kay wala ka makahibalo kon diin ang magamadinalag-on, kon ini ukon ina, ukon kon sila nga duha mangin alangay nga maayo.” (Manugwali 11:6) Sin-o ang nakahibalo kon anong maayong resulta ang magaabot bangod sang imo pagsab-ug sing maayong binhi paagi sa imo matutom nga mga buhat?

Ang isa sang labing daku nga mga pagpakamaayo nga maani mo amo ang kalahamut-an nga tindog kay Jehova. Sa ulihi, ang kalig-on sa pagtuo magaresulta sa dayon nga kabuhi. (Juan 17:​3; ipaanggid ang Santiago 1:⁠12.) Wala sing temporaryo nga pahuway sa pagtilaw nga natigayon paagi sa pagkompromiso ang takus sa pagwasi sina nga dulot.

Kamusta ang pamatan-on nga ginsambit sa umpisa sining artikulo? Ti, gin-antos niya ang pagtilaw. Pagkatapos sang general assembly, mataktika nga ginpaathag niya ang iya tindog sa mga manunudlo. Bisan pa nga ang iya paathag wala ginpamatian, may kaayawan sia sa paghibalo nga ginpahalipay niya ang tagipusuon ni Jehova. (Hulubaton 27:11) Padayon niya nga ginpangapinan ang iya pagtuo tubtob nga nakatapos sia sa iya pag-eskwela. Nian nangin payunir sia. Kabay nga ang imo matutom nga pagbatas may kaanggid ka malipayon nga resulta. Mangin amo sini kon mangin malig-on ka sa pagtuo.

[Footnote]

Para sa paghinun-anon sa sini kag sa iban pa nga mga prinsipio sa Biblia, tan-awa ang libro nga Questions Young People Ask​—⁠Answers That Work, nga ginbalhag sang Watchtower Bible and Tract Society of New York, Inc.

[Kahon sa pahina 25]

MATIGAYON NGA BULIG

◻ Pamatii ang kaalam sang imo mahinadlukon sa Dios nga mga ginikanan.

◻ Himusli ang espirituwal nga mga aman sa Cristianong kongregasyon.

◻ Makighambal sa gintangdo nga mga gulang kag sa iban pa nga may mga problema kaangay sang imo.

◻ Makighambal sa iban nga lamharon nga mga Cristiano nga nagalandas sing madinalag-on sang kaanggid nga mga problema.