Adlaw sang Paghukom—Isa ka Tion sang Paglaum!
KON ang ideya nahanungod sa adlaw sang paghukom nagapahadlok sa imo, ngaa indi usisaon kon ano ang ginasiling sang Biblia tuhoy sini? Halimbawa, matuod bala nga kon ang Dios nagahukom sa mga makasasala, ginatagbong sila sa kalayuhon nga impierno?
Ti, ang nahaunang ginrekord nga hitabo sang balaan nga paghukom amo yadtong sa pamuno gid sang maragtas sang tawo. Sanday Adan kag Eva may kahigayunan nga magkabuhi sing dayon sa paraiso nga duta. (Genesis 1:26-28; 2:7-9, 15-25) Apang, nagpakasala sila kag napaidalom sa dikalahamut-an nga paghukom sang Dios. Ang resulta? Ginkuha sang Dios ang dulot nga kabuhi. Sa aton pa, napatay sila. Ang Dios nagsiling sa ila: “Sa balhas sang imo nawong magakaon ka sing kalan-on tubtob nga magbalik ka sa duta, kay ginkuha ka sa iya. Yab-ok ka, kag sa yab-ok magabalik ka.”—Genesis 3:16-19.
Matigdas ini nga paghukom, apang matarong. Kag wala gid ini nagadalahig sing kalayuhon nga impierno. Sang napatay sanday Adan kag Eva, nagbalik sila sa yab-ok. Wala na sila nagluntad. Ang Biblia wala nagasiling nga ang bahin ni Adan ukon sang iban pa nga tawo nagpadayon nga buhi sa tapos sang kamatayon agod silutan sa iban nga lugar sing dayon. Sa baylo, aton mabasa: “Ang buhi nakahibalo nga mapatay sila; apang ang patay wala makahibalo sang bisan ano.”—Manugwali 9:5.
Nakahibalo ka bala nga ang Biblia nagasiling sini? Nakahibalo ka man bala nga ang Biblia wala gid nagagamit sing ekspresyon nga “dimamalatyon nga kalag”? Sa baylo, ini nagasiling: “Ang kalag nga nagapakasala, ini mapatay.” (Ezequiel 18:4, King James Version) Nahisanto gid ini sa prinsipio sang Biblia: “Ang bayad sang sala kamatayon.” (Roma 6:23, KJ) Ini nga prinsipio nagaapektar sa aton tanan. Kita tanan mga kaliwat sang makasasala nga si Adan, gani kita tanan nagapakasala kag nagabaton sang bayad sang sala, ang kamatayon. Subong sang ginasiling sang Biblia: “Paagi sa isa ka tawo nagsulod ang sala sa kalibutan, kag paagi sa sala ang kamatayon; kag gani ang kamatayon naglaton sa tanan nga tawo, kay ang tanan nakasala.” (Roma 5:12, KJ) Ang Adlaw sang Paghukom amo ang panguna nga bahin sang kahimusan sang Dios sa pagluwas sa aton gikan sa sining kahimtangan.
Ang Sadsaran Para sa Adlaw sang Paghukom
Suno sa Biblia, halos 2,000 ka tuig na ang nakaligad nga ginpasad sang Dios ang sadsaran para sa kon ano ang mahanabo sa Adlaw sang Paghukom. Amo ini sang nagkari si Jesus sa duta kag naghatag sang iya himpit tawhanon nga kabuhi tungod sa aton. Si Jesus mismo nagpaathag: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”—Juan 3:16.
Kon magtuo kita kay Jesus, nagabenepisyo kita gikan sa iya halad bisan sa karon sa espirituwal nga paagi. Ang Dios nagapatawad sang aton mga sala kag nagatugot sa aton nga makapalapit sa iya. (Juan 14:6; 1 Juan 2:1, 2) Apang dihimpit gihapon kita, mga makasasala, kag bangod sina, nagamasakit gihapon kita sa pisikal kag nagakapatay sa ulihi. Wala pa kita sing kabuhi nga walay katapusan nga ginsaad ni Jesus. Magaabot ini subong resulta sang Adlaw sang Paghukom.
Ang Adlaw sang Paghukom
Si apostol Juan nakakita sing isa ka palanan-awon nahanungod sa Adlaw sang Paghukom, kag ginlaragway niya ini subong sang masunod: “Nakita ko ang dakung trono nga maputi, kag sia nga nagalingkod sa sini, gikan sa iya atubangan ang duta kag langit nagpalagyo; kag walay nakita nga duog nga sa ila. Kag nakita ko ang mga patay, ang dalagku kag magamay, nga nagatindog sa atubangan sang Dios; kag ang mga tulun-an ginbukad: kag ang isa na man ka tulun-an ginbukad, nga amo ang tulun-an sang kabuhi: kag ang mga patay ginhukman bangod sa nasulat sa mga tulun-an, suno sa ila binuhatan.”—Bugna 20:11, 12, KJ.
Huo, suno sa palanan-awon ni Juan, ang Paghukom sang Dios pagadumalahan sang Dios mismo. Apang may isa pa nga nadalahig. Si apostol Pablo nagpaathag: “[Ang Dios] nagtangdo sing isa ka adlaw nga hukman niya ang kalibutan sa pagkamatarong paagi sa tawo nga iya gintangduan.” (Binuhatan 17:31, KJ) Sin-o ina nga tawo? Si Jesus, nga nagsiling mismo: “Ang Amay wala nagahukom sa kay bisan sin-o nga tawo, kundi natugyan niya sa Anak ang bug-os nga paghukom.” (Juan 5:22, KJ) Gani si Jesus amo ang gintangdo nga Hukom sang Dios sa Adlaw sang Paghukom.
Maayong balita ini para sa mga tawo. Ang mga Ebanghelyo nagapakita nga si Jesus isa ka tawo nga may dakung kaluoy. Indi sia bugalon ukon matinaastaason kundi “malulo kag mapainubuson sing tagipusuon.” (Mateo 11:29; 14:14; 20:34) Malipayon kita nga mangin sa idalom sang pag-atipan sina nga hukom.
Mangin San-o Ini?
Apang, san-o ang Adlaw sang Paghukom? Ang Bugna nagasiling nga mahanabo ini kon “ang duta kag ang langit nawala.” Nagapahanumdom ini sa aton sang pinamulong ni apostol Pedro: “Ang mga langit kag ang duta nga amo karon gintigana sa kalayo kag ginatipigan nga sa adlaw sang paghukom kag kalaglagan sang mga tawo nga didiosnon.” (2 Pedro 3:7) Ang literal nga duta bala ang pagasunugon? Indi, gin-athag sang Biblia ini nga punto. “Ang duta . . . indi mationg sa gihapon.” (Salmo 104:5, KJ) Ang konteksto sang mga pulong ni Pedro nagapakita nga ang karon nga didiosnon nga sistema sang mga butang sang kalibutan pagalaglagon. Ang mga didiosnon, indi ang planeta nga Duta, laglagon.—Juan 12:31; 14:30; 1 Juan 5:19.
Ining mga didiosnon pagalaglagon sa ginatawag sang Biblia nga inaway sang Armagedon—nga, subong sang masunson nga ginapakita sini nga magasin—mahanabo sa dili madugay. (Bugna 16:14, 16) Pagkatapos sina, si Satanas mismo pagaitagbong sa kadadalman kag punggan gikan sa pagpasilabot sa katawhan sa isa ka libo ka tuig, kag ining isa ka libo ka tuig amo ang aktuwal nga kadugayon sang Adlaw sang Paghukom. (Bugna 19:17–20:3) Ano ang mahanabo sa mga matutom kon ang mga didiosnon pagalaglagon sa Armagedon? Makalampuwas sila tubtob sa Adlaw sang Paghukom. Aton mabasa: “Ang matadlong amo ang mabilin [sa duta]. Apang ang malauton, utdon gikan sa duta.”—Hulubaton 2:21, 22.
Sa pagsakdag sini, ang Biblia nagasugid nahanungod sa “dakung kadam-an, nga walay tawo nga makaisip, gikan sa tagsa ka pungsod kag tribo kag katawhan kag hambal” nga magaluntad sa duta antes sang Armagedon. Sila “ang nagguwa sa dakung kapipit-an”; sa iban nga hambal, nakalampuwas sila sa katapusan sining didiosnon nga kalibutan subong nga si Noe nakalampuwas sa katapusan sang kalibutan sang adlaw niya. (Bugna 7:9-17; 2 Pedro 2:5) Nakahibalo ka bala nga ining internasyonal nga dakung kadam-an sang aktibo nga mga Cristiano nagaluntad bisan sa karon? Nagalaum sila nga makalampuwas sa dakung kapipit-an kag magkabuhi sing dayon sa duta. Ang pagluntad nila isa ka sigurado nga pamatuod sang pagkalapit sang Adlaw sang Paghukom.
Sin-o ang Pagahukman?
Ining dakung kadam-an pagahukman sa Adlaw sang Paghukom. Apang indi sila magaisahanon. Ang kasaysayan ni Juan nagapadayon: “Ginhatag sang dagat ang mga patay nga yara sa iya; kag ginhatag sang kamatayon kag impierno ang mga patay nga yara sa ila: kag ginhukman ang tagsa ka tawo suno sa ila mga binuhatan.” (Bugna 20:13, KJ) Yari ang dugang nga pamatuod nga ang tawo wala nagaantos sing dayon sa impierno. Kon ginahatag sang impierno ang mga patay nga yari sa sini, paano ang isa mangin didto sa walay katubtuban? Sa katunayan, ang impierno sa Biblia amo ang kinaandan nga lulubngan sang katawhan, diin ang patay nagapabilin nga wala sing hinalung-ong nga nagahulat sang pagkabanhaw. Sa Adlaw sang Paghukom, ang impierno bug-os nga haw-asan sang mga patay sini.—Manugwali 9:10.
Sin-o ang pagabanhawon gikan sa patay sa Adlaw sang Paghukom? Si apostol Pablo nagsiling: “May pagkabanhaw sang mga matarong kag mga dimatarong.” (Binuhatan 24:15, KJ) Gani, ang matutom nga mga alagad sang Dios, ang “mga matarong,” pagabanhawon. Apang amo man ang dimaisip pa nga iban, ang “mga dimatarong.” Sa pagkamatuod, ang pagkabanhaw magalakip sa tanan nga napatay kag yara pa gihapon sa lulubngan—luwas sa mga tawo nga ang sala tuman kabug-at sa bagay nga ginhukman na sila sang Dios nga ditakus sang kabuhi.—Mateo 12:31.
Ang Paghukom
Apang, ano ang mahanabo sa dakung kadam-an sang mga makalampuwas kag sa mga ginbanhaw sa Adlaw sang Paghukom? Ang Biblia nagasiling: “Ang mga patay ginhukman bangod sa nasulat sa mga tulun-an, suno sa ila binuhatan.” Tion ini sang pag-usisa. Ang tanan nga handa sa pagpanghikot suno sa ‘nasulat sa mga tulun-an’—mahimo nga amo ang mga kinahanglanon sang Dios para sa katawhan sadto nga tion—pagaisulat sa “tulun-an sang kabuhi.” (Bugna 20:12, KJ) Yara na sila sa dalanon nga matigayon ang kabuhi nga walay katapusan!
Nian, sa katapusan, ang mahalaron nga kamatayon ni Cristo magadala sing mga benepisyo sa lawas! Ang mga ginlista sa tulun-an sang kabuhi sadto nga tion indi na magaagom sing balatian kag kamatayon. Sa baylo, amat-amat sila nga ipasag-uli sa tawhanon nga pagkahimpit, upod ang kabuhi nga walay katapusan nga ginsaad sa mga nagatuo kay Jesus. Daw ano ka tumalagsahon nga palaabuton! Apang, ang iban mahimo nga indi magatuman sa “nasulat sa mga tulun-an.” Ano ang mahanabo sa ila? Indi nila matigayon ang dayon nga kabuhi. Sa baylo, ang kasulatan nagasiling: “Ang bisan sin-o nga wala makita ang iya ngalan nga nasulat sa tulun-an sang kabuhi gintagbong sa linaw nga kalayo.”—Bugna 20:15, KJ.
Amo bala ini ang kalayuhon nga impierno nga ginahambal sang Cristiandad? Indi, kay sa nauna nga bersikulo, aton mabasa: “Ang kamatayon kag impierno gintagbong sa linaw nga kalayo. Ini amo ang ikaduhang kamatayon.” (Bugna 20:14, KJ) Kon ang impierno gintagbong sa linaw nga kalayo, ang linaw indi mahimo nga mangin kalayuhon nga impierno mismo. Dugang pa, ang kamatayon indi isa ka butang nga mahikap nga sarang mapudyot kag mahaboy. Gani ang linaw nga kalayo simbuliko. Sang ano? Ang Biblia nagasiling: “Ini amo ang ikaduhang kamatayon.” Sang ang kamatayon kag Hades gintagbong sa linaw nga kalayo, sila “napatay,” nag-untat sa pagluntad. Sa kaanggid, ang rebelyuso nga mga tawo nga nakalab-ot didto nagakapatay, ukon nag-untat sa pagluntad. Apang, amo ini ang ikaduhang kamatayon, nga wala sing paglaum nga pagkabanhaw.
Adlaw sang Paghukom—Tion sang Paglaum
Gani kon ginahunahuna naton ang Adlaw sang Paghukom, indi kita dapat mahadlok ukon maugot. Ang Adlaw sang Paghukom isa ka tion sang paglaum, isa ka tion sang pagpasag-uli sa katawhan sang kabuhi nga walay katapusan nga nadula ni Adan. Pamatii ang mga pagpakamaayo nga ihatag sini sa ginhukman nga matutom: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Kay ang nahaunang mga butang nagtaliwan.”—Bugna 21:3, 4.
Sa katapusan sang isa ka libo ka tuig nga Adlaw sang Paghukom, ang matutom nga mga tawo gikan sa tanan nga bahin sang duta mangin himpit sa ulihi. Sila “mabuhi liwat” sa bug-os nga kahulugan, kag natuman sang Adlaw sang Paghukom ang katuyuan sini. (Bugna 20:5) Nian, ang Biblia nagasiling, si Satanas tugutan nga magpasilabot sa katawhan sa katapusan nga tion. (Bugna 20:3, 7-10) Ang mga nagabato sa iya sa sining katapusan nga tion magaagom sing bug-os nga katumanan sang saad sang Biblia: “Ang mga matarong magapanubli sang duta, kag magapuyo dira sing dayon!”—Salmo 37:29.
Daw ano katahom nga aman ang Adlaw sang Paghukom! Kag daw ano ka talalupangdon nga makahanda kita para sa sini bisan sa karon, paagi sa pagtuon sang Biblia, paghibalo sang kabubut-on sang Dios, kag pag-aplikar sining balaan nga kabubut-on sa aton kabuhi! Indi katingalahan nga ang salmista nagpabutyag sing kalipay sa paghunahuna sang paghukom sang Dios sang nagsulat sia: “Magkasadya ang mga langit, kag magkalipay ang duta. Magngurob ang dagat kag ang iya kabug-usan. Maghinugyaw ang latagon kag ang tanan nga yara sa iya. Nian ang tanan nga kahoy sa kagulangan magaamba sa kalipay sa atubangan ni Jehova. Kay nagakari sia; kay nagakari sia sa paghukom sang duta.”—Salmo 96:11-13.