Ang Adlaw sang Pagtimalos sang Dios

NAKITA naton sa nagligad nga artikulo nga may yara pila ka rason kon ngaa malain nga magtimalos kita. Malain ini bangod sa ulihi, wala ini sing malubad. Malain ini bangod ginasemento sini ang kaawayon sa baylo nga magtukod sing mga taytay sang pag-abyanay. Kag malain ini bangod malaut ini para sa isa nga nagahupot sing matimaluson nga mga panghunahuna.

Apang, ang labing importante nga rason, kon ngaa malain nga magtimalos ang tawo makita sa ginsiling ni Moises sa Israel: “Si Jehova nga inyo Dios isa ka maluluy-on nga Dios.” (Deuteronomio 4:31) Sanglit maluluy-on ang Dios, dapat man kita mangin maluluy-on kaangay niya. Ginsugo ni Jesus ang iya mga sumu­lunod: “Padayon nga magmaluluy-on kamo, subong nga ang inyo Amay maluluy-on.”​—⁠Lucas 6:⁠36.

Walay sapayan, ginalaragway man sang Biblia si Jehova subong isa ka “Dios nga matimaluson.” (Salmo 94:1) Si manalagna Isaias nagapamulong nahanungod sa “tuig sang maayong kabubut-on ni Jehova” kag subong man sang “adlaw sang pagtimalos sang Dios naton.” (Isaias 61:2) Paano ang Dios mangin maluluy-on kag matimaluson man? Kag kon dapat naton ilugon ang kaluoy sang Dios, ngaa indi naton mailog sia sa iya pagtimalos?

Sa pagsabat sang una nga pamangkot, ang Dios maluluy-on bangod ginahigugma niya ang katawhan, kag nagapatawad sia tubtob sa mahimo niya agod hatagan ang mga tawo sing kahigayunan sa pagtadlong sang ila mga dalanon. Madamo, kaangay ni apostol Pablo, ang naghimulos sa sini nga kaluoy. Apang matimaluson man ang Dios​—⁠sa kahulugan sang pagpadapat sing hustisya⁠—​kay ina nga kaluoy magapadayon lamang tubtob sa isa ka kalawigon sang tion. Kon mapasundayag na sang iban nga indi na gid nila mabag-o ang ila mga dalanon, himuon sang Dios ang iya pag­hukom sa ginatawag nga adlaw sang iya pagtimalos.

Bilang sabat sa ikaduha nga pamangkot, indi matarong nga mangin matimaluson kita bangod ang Dios ang magatimalos. Si Jehova himpit sa hustisya. Ang mga tawo indi. Makita sang Dios ang tanan nga bahin sang isa ka butang kag pirme matarong ang iya desisyon. Indi kita masaligan sa paghimo man sini. Amo kon ngaa si Pablo naglaygay: “Dili kamo magtimalos, mga hinigugma, kundi pabayai ang kasingkal; kay nasulat na: ‘Akon ang pagtimalos, ako ang magatumbas, siling ni Jehova.’ ” (Roma 12:19) Para sa aton kaugalingon nga kaayuhan, dapat naton itugyan ang pagtimalos sa mga kamot ni Jehova.

Ngaa Isa ka Adlaw sang Pagtimalos?

Walay sapayan, ginakilala sang Biblia sa madamo nga bahin sini nga kinahanglan ang pagpakighusay sa di-mahinulsulon nga mga makasasala. Halimbawa, gintagna ni apostol Pablo nga ang Dios, paagi kay Jesus, ‘magatimalos sa mga wala nakakilala sa Dios kag sa wala nagatuman sang maayong balita nahanungod sa aton Ginuong Jesus.’ (2 Tesalonica 1:8) May maayo kita nga mga rason nga tamdon sing serioso ining mga pulong. Ngaa?

Una, bangod padayon nga ginapamatukan karon sang kalabanan ang pagkasoberano sang Manunuga, ginsikway nila ang iya matarong nga kasuguan. Nagapati man sila sa Dios ukon wala, ang ila paggawi maathag nga nagapakita nga wala nila ginabatyag nga manabat sila sa Dios. Ang mga pulong sang salmista naaplikar sa ila: “Ngaa bala ginatamay sang malauton ang Dios? Nagsiling sia sa iya tagipusuon: ‘Dili ka makighusay.’ ” (Salmo 10:13) Sa pagkamatuod, indi pagtugutan ni Jehova nga yagutaon sia sa sining paagi sing dayon. Bisan pa sia isa ka Dios sang gugma, sia man isa ka Dios sang hustisya. Sabton niya ang panawag sang mga nagaulikid gid sa hustisya: “Tindog ka, O Jehova, O Dios, bayawa ang imo kamot. Dili pagkalimti ang mga ginapigos.”​—⁠Salmo 10:⁠12.

Dugang pa, ginalaglag sang malinapason sa kasuguan nga katawhan ang duta nga aton ginapuy-an. Ginahigkuan nila ang hangin, ang duta, kag ang tubig; ginapuno nila ang duta sing inhustisya kag kapintas. Kag nagatipon sila sing kemikal, nukleyar, kag iban pa nga makamamatay nga mga hinganiban nga bastante sa paglaglag sang kabuhi sang katawhan. Kinahanglanon ang pagpahilabot sang Dios agod mapat-od ang malig-on nga palaabu­ton para sa matinumanon nga katawhan. (Bugna 11:18) Ining pagpahilabot amo ang ­ginpatuhuyan ni Isaias nga adlaw sang pagtimalos.

Ano ang Himuon sang Adlaw sang Pagtimalos sang Dios?

Suno sa Vine’s Expository Dictionary of Old and New Testament Words, sa Griegong Kasulatan, ang tinaga para sa pagtimalos, kon ginagamit sa Dios, literal nga nagakahulugan sing “ ‘bangod sang hustisya,’ indi, subong amo pirme sa pagtimalos sang tawo, bangod sang halit ukon bangod lamang sang kaakig.” Sa amo, ang pagtimalos sang Dios batok sa iya mga kaaway indi mangin isa ka tion sang indi kontrolado nga pagpaagay sing dugo, kaangay sang personal nga pagtimalos. “Si Jehova makahibalo magluwas sang mga tawo nga may diosnon nga debosyon gikan sa mga pagsulay, kag sa pagtigana sang mga dimatarong para sa adlaw sang paghukom agod utdon,” siling sa aton sang Biblia.​—⁠2 Pedro 2:⁠9.

Ginapaabot sang mga alagad sang Dios ang adlaw sang pagtimalos sang Dios subong isa ka tion nga ang matarong nga paggawi ibindikar kag ang matarong luwason gikan sa pagpamigos sang malauton. Wala ini nagakahulugan nga sila mahaliton ukon matimaluson. “Sia nga nagakalipay sa kalalat-an sang iban indi makaluwas sa silot,” paandam sang Biblia. (Hulubaton 17:5) Sa kabaliskaran, ginapalambo nila ang kaluoy kag kaawa, kag ginatugyan sa Dios ang mga desisyon tuhoy sa pagtimalos.

Matuod, indi mahapos para sa akig nga mga indibiduwal ang paghikot sa sining paagi. Apang posible ini, kag madamo na ang nakahimo sini. Halimbawa, si Pedro may masubo nga nagligad sang bata pa kag pirme sia ginabakol sang iya magulang nga lalaki. Gani nagdaku sia nga masingki, pirme lang ginahusay sang pulisiya kag ginapaupok niya sa iya asawa kag kabataan ang iya kaakig sa iya utod. Sang ulihi, namati sia sa isa sang mga Saksi ni Jehova kag nagsugod sa pagtuon sang Biblia. “Sa bulig ni Jehova,” saysay niya, “nagbag-o ako, kag karon, sa baylo nga makig-away sa mga tawo, ginabuligan ko sila subong isa ka Cristianong gulang.” Sa bulig sang Biblia kag sang balaan nga espiritu, di-maisip nga iban pa ang nagbag-o man gikan sa pagkamahaliton ukon matimaluson padulong sa pagpakita sing gugma kag pagpailob sa iban.

Ano ang Imo Himuon?

Ang pagdumdom sang pag-abot sang adlaw sang pagtimalos sang Dios magabulig sa aton sa pagbenepisyo sa pagpailob ni Jehova. Apang may latid ang kahigayunan sa paghimo sini. Sa indi madugay magaabot ina nga adlaw. Ginpakita ni apostol Pedro kon ngaa wala pa ini mag-abot: “Si Jehova indi uyaya nahanungod sa iya saad, suno sa ginahunahuna sang iban, kundi mapailubon sia sa inyo kay indi niya luyag nga malaglag ang bisan sin-o kundi nga ang tanan maghinulsol.”​—⁠2 Pedro 3:⁠9.

Busa, hilingagawon, nga maghanda karon para sa adlaw sang pagpakighusay sang Dios paagi sa pagtuon sang Kasulatan kag pag-aplikar sang laygay sini. Magabulig ini sa aton sa pagsunod sa mga pulong sang salmista: “Untati ang kaakig kag bayai ang kasingkal; dili ka magkaakig sa paghimo lamang sing malaut. Kay utdon ang mga manughikot sing malaut, apang ang mga nagahulat kay Jehova magapanag-iya sang duta.”​—⁠Salmo 37:​8, 9.

[Laragway sa pahina 7]

Sa tapos sang adlaw sang pagtimalos sang Dios, ‘ang mga nagahulat kay Jehova magapanag-iya sang duta’