Ang Pagbatas nga Magamadinalag-on

“Kinahanglan nga magbatas kamo, agod nga, sa tapos ninyo matuman ang kabubut-on sang Dios, mahimo mabaton ninyo ang katumanan sang saad.”—HEBREO 10:⁠36.

1. Ngaa kinahanglanon ang pagbatas para sa tagsatagsa nga nagaalagad kay Jehova nga Dios karon?

INING bug-os nga kalibutan yara sa gahom sang isa ka rebelyuso nga dios. Ang di-makita nga manuggahom sini, si Satanas nga Yawa, nagakonsentrar sang bug-os niya nga panikasog sa pagpamatok kay Jehova kag sa pagpakig-away batok sa pagbindikar sang bug-os uniberso nga pagkasoberano ni Jehova paagi sa Mesianikong Ginharian. Bangod sini, indi malikawan nga ang bisan sin-o nga magadedikar sang iya kaugalingon sa Dios kag magadampig sa Iya bahin sa hulusayon sang pagkasoberano padayon nga pamatukan sining kalibutan. (Juan 15:​18-20; 1 Juan 5:19) Busa, dapat nga palig-unon sang tagsatagsa sa aton ang iya kaugalingon nga magbatas tubtob nga malutos sing bug-os ining kalibutan sa Armagedon. Dapat kita manguyapot sing hugot tubtob sa katapusan kon luyag naton nga mangin isa sa mga madaugon sang Dios nga magalandas sa kalibutan paagi sa ila pagtuo kag integridad. (1 Juan 5:4) Paano naton mahimo ini?

2, 3. Paano ang Dios kag si Jesucristo amo ang pinakadaku nga huwaran sang pagbatas?

² Una, makakuha kita sing pagpalig-on gikan sa duha ka talalupangdon nga huwaran sa pagbatas. Sin-o ini sila? Ang isa amo si Jesucristo, “ang panganay sang tanan nga tinuga,” nga matutom nga nagbatas sa pag-alagad sa Dios sugod sang gintuga sia sa wala mahibal-i nga tion sa nagligad. Bangod sang iya padayon nga pag-alagad sa Dios sing matutom, si Jesus nangin huwaran sa tanan nga intelihente nga mga tinuga nga sa tapos niya, gintuga sa langit kag sa duta. (Colosas 1:​15, 16) Apang, ang labing daku nga huwaran sa pagbatas amo si Jehova nga Dios, nga madugay na nagbatas sang pagrebelde batok sa iya bug-os uniberso nga pagkasoberano kag padayon nga magabatas tubtob husayon niya sa katapusan nga tion ang hulusayon tuhoy sa pagkasoberano.

³ Si Jehova nagbatas sa isa ka huwaran nga paagi kon tuhoy sa iya kadungganan kag pinakamainit nga balatyagon ang hambalan. Ginpunggan niya ang iya kaugalingon sa atubangan sang daku nga pagpaakig kag gindumilian niya ang iya kaugalingon sa paghikot batok sa mga nagpasipala sa iya​—⁠lakip si Satanas nga Yawa. Nagapasalamat kita bangod sang pagbatas kag kaluoy sang Dios. Kon indi bangod sini, wala gid kita makatigayon sing bisan ano ka lip-ot nga kabuhi. Sa pagkamatuod, ginpa­kilala ni Jehova nga Dios ang iya kaugalingon nga wala sing kaanggid bangod sang iya pag­batas.

4, 5. (a) Paano ang ilustrasyon ni Pablo tuhoy sa maninihon nagapakita sang pagbatas sang Dios kag sang iya kaluoy? (b) Paano ang kaluoy sang Dios napamatud-an nga mapuslanon?

⁴ Ginapatuhuyan ni apostol Pablo ang pagbatas kag ang kaluoy sang Dios sang sia magsiling: “Wala bala sing gahom sa lunang ang maninihon, sa paghimo gikan sa amo nga linamas sing isa ka suludlan nga sa kadungganan, kag ang isa nga sa kahuluy-an? Ano bala kon ang Dios, nga buot magpakita sang iya kasingkal kag magpakilala sang iya gahom, nagbatas nga may dakung pagpailob sa mga suludlan sang kasingkal nga takus sa kalaglagan, agod nga mapakilala niya ang kamanggaran sang iya himaya sa mga suludlan sang kaluoy, nga gin-aman niya nga daan nga sa himaya, nga amo kita, nga gintawag indi gikan sa mga Judiyo lamang kundi sa mga pungsod man?”​—⁠Roma 9:​21-24.

⁵ Subong ginapakita sining mga pulong, sa sini nga tion sang iya pagpailob, ginatuman ni Jehova ang iya mahimayaon nga katuyuan kag nagapakita sing kaluoy sa pila ka tawhanon nga mga suludlan. Ginahanda niya ining mga suludlan para sa walay katapusan nga himaya kag sa amo nagalutos sang malaut nga mga katuyuan sang iya dakung kaaway, nga si Satanas nga Yawa, kag sang tanan nga kabon ni Satanas. Indi tanan sa katawhan nangin mga suludlan sang kasingkal, nga takus sang kalaglagan. Amo ini ang kaayuhan sang mapailubon nga pagbatas sang Labing Gamhanan nga Dios. Ang iya kaluoy indi mangin walay pulos. Magaresulta ini sa (1) mahimayaon nga pamilya sang Ginharian sa langit sa idalom sang hinigugma nga Anak ni Jehova, nga si Jesucristo, kag sa (2) napasag-uli kag nahimpit nga kaliwatan sang tawhanon nga mga tinuga sa isa ka paraiso nga duta, ang tanan nga manugpanubli sing kabuhi nga wala sing katapusan.

Pagbatas Tubtob sa Katapusan

6. (a) Ngaa indi malikawan sang mga Cristiano nga tilawan ang ila pagbatas? (b) Ano sa masami ang kahulugan sang Griegong tinaga para sa “magbatas”?

⁶ Bangod sining matahom nga palaabuton, dapat naton pirme dumdumon ang makapalig-on nga ginsiling ni Jesus, nga amo: “Sia nga nakabatas tubtob sa katapusan amo ang maluwas.” (Mateo 24:13) Importante nga mangin maayo ang pagsugod naton sa dalanon sang Cristianong pagkadisipulo. Apang ang importante sa ulihi amo kon paano kita nagabatas, kon daw ano kaayo matapos naton ang dalanon. Ginpadaku ini ni apostol Pablo sang sia nagsiling: “Kinahanglan kamo magbatas, agod nga, sa tapos ninyo matuman ang kabubut-on sang Dios, mahimo ninyo mabaton ang katumanan sang saad.” (Hebreo 10:36) Ang Griegong tinaga diri nga ginbadbad “magbatas“ amo ang hy·po·mo·neʹ. Sa masami nagakahulugan ini sing maisugon, malig-on, ukon mapailubon nga pagbatas nga wala nagakadulaan sing paglaum walay sapayan sang mga balagbag, mga paghingabot, mga pagtilaw, kag mga pagsulay. Kon luyag naton maluwas sa ulihi, dapat kita magpaidalom sa isa ka pagtilaw sang pagbatas subong bahin sang kinahanglanon nga paghanda para sa sina nga kaluwasan.

7. Ano nga daya ang dapat naton likawan, kag kay sin-o huwaran ang magabulig sa aton sa pagbatas?

⁷ Indi naton dapat pagdayaon ang aton kaugalingon paagi sa nagapahamuot-sa-kaugalingon nga ideya nga madali naton matapos ang pagtilaw. Agod nga masabat sing maathag ang mga hulusayon tuhoy sa bug-os uniberso nga pagkasoberano kag tuhoy sa integridad sang tawo, wala ginpuwera ni Jehova ang iya kaugalingon. Ginbatas niya ang indi makalilipay nga mga butang bisan pa malaglag niya kuntani ini sa gilayon. Si Jesucristo isa man ka huwaran sa pagbatas. (1 Pedro 2:​21; ipaanggid ang Roma 15:​3-5.) Bangod sining talalupangdon nga mga halimbawa, kita man sa pagkamatuod dapat mangin handa sa pagbatas tubtob sa katapusan.​—⁠Hebreo 12:​2, 3.

Isa ka Kinahanglanon nga Kalipikasyon

8. Anong kinaiya nga kinahanglan naton tanan ang ginpakita ni apostol Pablo?

⁸ Wala sing alagad sang Dios, bisan sang una pa nga tion, nga ginpuwera sa pagpamatuod sang iya integridad paagi sa pagbatas. Ang kilala gid nga mga indibiduwal sa maragtas sang Biblia nga nagpabilin nga matutom tubtob sa kamatayon kag nangin takus sa walay katapusan nga kabuhi sa langit nagpamatuod sang ila pagkalig-on. Halimbawa, ang isa ka Fariseo anay, nga si Saulo sang Tarso, nagsiling sa mga taga-Corinto: “Kay bisan sa ano indi ako kubos sa inyo lutaw gid nga mga apostoles, bisan ako indi ano man. Sa pagkamatuod, ang mga tanda sang pagkaapostol ginpanghikot sa tunga ninyo paagi sa bug-os nga pagbatas, kag paagi sa mga tanda kag mga kalatingalahan kag gamhanan nga mga buhat.” (2 Corinto 12:​11, 12) Walay sapayan sang mga lulan sang hilikuton, ginpakabahandi ni Pablo ang iya ministeryo amo kon ngaa nagbatas sia sing daku kag hanuot nga nagtinguha nga indi ini paghatagan sing kahuy-anan.​—⁠2 Corinto 6:​3, 4, 9.

9. (a) Paano ang hinaplas nga nagkalabilin nagpakita sing pagbatas, kag ano ang resulta? (b) Ano ang nagapapagsik sa aton nga magpadayon sing matutom sa pag-alagad sa Dios?

⁹ Sa moderno nga mga tion, ang hinaplas nga mga Cristiano nga nagaalagad sa Dios sa wala pa ang unang kalibutanon nga inaway nakahibalo nga ang 1914 magatanda sang katapusan sang Panag-on sang mga Gentil, kag madamo sa ila ang nagpaabot sa pagbaton sang ila langitnon nga padya sadtong indi malipatan nga tuig. Apang wala ini matabo. Subong ginapakita sang mga kamatuoran karon, dekada sang mga tinuig ang gindugang sa ila. Sa tion sining wala ginapaabot nga pagpalawig sang ila kabuhi sa duta, ginpaputli sila ni Jehova nga Dios. (Zacarias 13:​9; Malaquias 3:​2, 3) Ang padayon nga pagbatas nagresulta sa ila pag-uswag. Subong mga alagad ni Jehova, nalipay sila nga tawgon nga katawhan sa iya ngalan. (Isaias 43:​10-12; Binuhatan 15:14) Sa karon, sa tapos sila ginluwas sa duha ka inaway kalibutanon kag sa pila ka diutay nga mga inaway, nagakalipay sila nga ginabuligan sila sa pagpalapnag sing maayong balita sang isa ka nagadamo nga dakung kadam-an sang iban nga mga karnero, nga karon may kadamuon nga kapin sa apat ka milyon. Ang espirituwal nga paraiso nga ila ginaagom naglapnag sa bug-os nga duta, tubtob sa ukbong sang mga isla sang dagat. Ining nahamut-an nga kahimtangan, nga aton ginaapresyar sing dugang kag dugang pa samtang nagalawig ang aton kabuhi, nagapapagsik sa aton nga padayunon sing matutom ang ­aton balaan nga pag-alagad tubtob matuman sing bug-os ang kabubut-on kag katuyuan ni Jehova.

10. Kon magluya man kita, ano ang tayuyon nga kinahanglanon?

¹⁰ Sanglit ang aton padya nasandig sa aton pagkalig-on, kinahanglan nga laygayan kita pirme tuhoy sa sining importante nga butang. (1 Corinto 15:​58; Colosas 1:23) Agod nga indi magluya ang katawhan ni Jehova, dapat nga mapalig-on kita sing tayuyon nga magpanguyapot sa kamatuoran kag sa hamili nga pribilehiyo sa pagpalapnag sing kamatuoran, subong nga napalig-on man anay ang bag-o maporma nga mga kongregasyon sang unang siglo sang mga pagduaw liwat ni Pablo kag ni Bernabe. (Binuhatan 14:​21, 22) Mamat-od kita sing malig-on kag mangin determinado nga subong sang ginpabutyag ni apostol Juan, ang kamatuoran magapabilin sa aton, “kag ini mangin kaupod naton sing dayon.”​—⁠2 Juan 2.

Nagahulat nga May Indi Mationg nga Pagbatas

11. Daw ano ang paagi sang Dios para sa iya mga alagad, kag paano ini gin-ilustrar sa bahin ni Jose?

¹¹ Kinahanglan ang tion agod ang pagtilaw sa aton matapos. (Santiago 1:​2-4) Hulat anay! Hulat anay! Hulat anay daw amo ang nangin paagi sang Dios sa iya mga alagad anay sang gintilawan sila tuhoy sa ila determinasyon nga magpabilin sa pagtuo. Apang ang paghulat, sa katapusan, pirme nga nangin makapaladya para sa sadtong matutom nga mga alagad. Si Jose, halimbawa, naghulat sing 13 ka tuig subong isa ka ulipon kag bilanggo, apang ini nga eksperiensia nagpaputli sang iya pagkatawo.​—⁠Salmo 105:​17-19.

12, 13. (a) Paano si Abraham isa ka huwaran sang matutom nga pagbatas? (b) Sa anong paagi ang pagtuo kag pagbatas ni Abraham isa ka sulundan para sa aton?

¹² Si Abraham 75 anyos na sang gintawag sia sang Dios gikan sa Ur sang mga Caldeanhon agod magkadto sa Ginsaad nga Duta. Sia mga 125 anyos na sang mabaton niya ang ginpalig-on-sang-sumpa nga saad sang Dios​—⁠nga natabo sa gilayon sa tapos ginpakita ni Abraham ang kabaskugon sang iya pagtuo tubtob sa punto nga ginhalad niya ang iya hinigugma nga anak, nga si Isaac, kag nagdulog lamang sia sang ginpunggan sang anghel ni Jehova ang iya kamot kag ginbalabagan ang paghalad. (Genesis 22:​1-18) Ang kalim-an ka tuig isa ka malawig nga tion para kay Abraham sa paghulat subong manlalakbay sa iban nga pungsod, apang nagpabilin sia diri sing 50 ka tuig pa tubtob nga napatay sia sa edad nga 175 anyos. Sa sining bug-os nga tion, si Abraham isa ka matutom nga saksi kag manalagna ni Jehova nga Dios.​—⁠Salmo 105:​9-15.

¹³ Ang pagtuo kag pagbatas ni Abraham isa ka sulundan para sa tanan nga alagad sang Dios nga luyag makabaton sang ginsaad nga mga pagpakamaayo paagi kay Jesucristo, ang Binhi ni Abraham. (Hebreo 11:​8-10, 17-19) Tuhoy sa iya, aton mabasa sa Hebreo 6:​11-15: “Kag ginahandum namon nga ang tagsatagsa sa inyo magpakita sing amo man nga kaukod sa pagtigayon sang kabug-usan sang paglaum tubtob sa katapusan, agod nga indi kamo magmahinay, kundi mga manug-ilog sa ila nga paagi sa pagtuo kag pagbatas nagapanubli sang mga saad. Kay ang Dios sang paghimo niya sing saad kay Abraham, sanglit nga wala sia sing bisan sin-o nga sumpaan nga daku pa, nagsumpa sia sa iya kaugalingon nga nagasiling, “Matuod gid pakamaayuhon ko ikaw, kag pabuaron ko ikaw.’ Kag sa amo si Abraham sang nakabatas sing mapailubon, nakaagom sang saad.”

14. Ngaa indi kita dapat maghunahuna nga ang pagtilaw sa pagbatas wala sing katapusan kag ang padya mabudlay matigayon?

¹⁴ Nasaksihan na sang hinaplas nga nagkalabilin ang 77 ka tuig nga nagligad sugod sang matapos ang Panag-on sang mga Gentil sang 1914, sang ginpaabot sang iban sa ila ang paghimaya sa matuod nga Cristianong kongregasyon sa langit. Wala kita makahibalo kon tubtob san-o magahulat ang nagkalabilin. Dapat bala kita magduhaduha kag maghunahuna nga ang paghulat wala sing katapusan kag ang padya isa ka malimbungon nga tulumuron? Indi! Indi gid ina magabindikar sa pagkasoberano sang Dios ukon magapadungog sa iya ngalan. Indi sia mabindikar sa atubangan sang kalibutan kon ihatag niya sa aton ang kadalag-an kag ang padya nga kabuhi nga walay katapusan. Walay sapayan sang kalawigon sang tion, ang nagkalabilin, upod sa ila matutom nga tulad-karnero nga mga kaupod, determinado sa paghulat sang paghikot ni Jehova sa iya kaugalingon nga tion. Sa pagpakita sining huwaran nga pagkamabinatason, ginasunod nila ang dalanon ni Abraham.​—⁠Roma 8:​23-25.

15. (a) Ano ang aton eslogan, kag madinalag-on nga ginsakdag kita sa Dios sa ano nga mga eksperiensia? (b) Anong laygay ni Pablo ang nagakaigo gihapon para sa aton adlaw?

¹⁵ Kon amo, ang eslogan amo gihapon ang, indi magduhaduha kag magbatas sa paghimo sang kabubut-on sang Dios. (Roma 2:6, 7) Sa nagligad ginsakdag niya kita sa daku nga mga pag-antos, lakip ang mga pagkabilanggo kag mga kampo konsentrasyon, kag ginluwas niya kita sing madaugon nga may himaya sa iya ngalan kag katuyuan.⁠a Sa bug-os nga tion nga nabilin pa para sa pagtapos sang pagtilaw sa aton, amo gihapon ang himuon ni Jehova. Ang laygay ni Pablo nagakaigo gihapon para sa aton adlaw: “Kay kinahanglan ninyo ang malig-on nga pagpailob kag pagbatas, agod nga mahimo ninyo kag matuman sing bug-os ang kabubut-on sang Dios, kag sa amo mabaton ninyo kag matigayon kag maagom sing bug-os ang ginsaad.”​—⁠Hebreo 10:​36, The Amplified Bible; Roma 8:⁠37.

16. Ngaa indi naton dapat pagtamdon ang aton pagdedikar kay Jehova sa limitado lamang nga paagi ukon may kondisyon?

¹⁶ Nian, tubtob may ginapahimo si Jehova para sa aton sa tunga sining malaut nga kalibutan, sa pagsunod sa huwaran ni Jesus, luyag naton himuon ini nga hilikuton tubtob matapos. (Juan 17:4) Ang aton pagdedikar kay Jehova wala sing kondisyon nga magaalagad kita sa iya sa malip-ot lamang nga tion kag dayon magaabot ang Armagedon. Ang aton pagdedikar tubtob sa walay katubtuban. Ang hilikuton sang Dios para sa aton indi matapos sa inaway sang Armagedon. Apang, sa tapos lamang naton mahimo ang hilikuton nga dapat himuon sa wala pa ang Armagedon nga makita naton ang dungganon nga mga butang nga magaabot sa tapos sining daku nga inaway. Nian, dugang sa makalilipay nga pribilehiyo sa pagpadayon sang iya hilikuton, pagapadyaan kita sing madugay na ginahulat nga mga pagpakamaayo nga iya ginsaad.​—⁠Roma 8:⁠32.

Ang Gugma sa Dios Nagabulig sa Aton sa Pagbatas

17, 18. (a) Sa mga tion sang kabudlayan, ano ang magabulig sa aton sa pagbatas nga may kahamuot sang Dios? (b) Ano ang magabulig sa aton agod matigayon ang kadalag-an, kag ano ang wala naton ginasiling nahanungod sa tion nga nabilin?

¹⁷ Ayhan, kon mabudlay ang tion, mahimo mamangkot kita: ‘Paano kita makabatas pa?’ Ang sabat? Paagi sa paghigugma sa Dios sa bug-os naton nga tagipusuon, hunahuna, kalag, kag kusog. “Ang gugma mainantuson kag maluluy-on. Ang gugma wala nagakahisa, wala nagapabugal, wala nagapahabok. Ginabatas sini ang tanan nga butang, ginatuuhan ang tanan nga butang, ginalauman ang tanan nga butang, ginabatas ang tanan nga butang. Ang gugma wala nagauntat.” (1 Corinto 13:​4, 7, 8) Kon indi kita magbatas bangod sang gugma sa Dios, ang aton pagbatas wala sing pulos. Apang kon magbatas kita sa idalom sang mga kabudlayan bangod sang aton debosyon kay Jehova, nian ang aton pagbatas magapadalom sang aton gugma sa iya. Ang gugma sa Dios, nga iya Amay, amo ang nakabulig kay Jesus sa pagbatas. (Juan 14:​30, 31; Hebreo 12:2) Kon ang aton matuod nga motibo amo ang gugma sa Dios, nga aton Amay, ano ang indi naton mabatas?

¹⁸ Ang aton indi mationg nga gugma kay Jehova nga Dios amo ang nagbulig sa aton nga magpabilin nga madinalag-on batok sa kalibutan sa sining labing makahalanguyos nga tion sang pagtilaw. Kag si Jehova, paagi kay Jesucristo, magapadayon sa paghatag sa aton sang bulig nga ginakinahanglan naton bisan daw ano man kalawig nga tugutan ining daan nga sistema sang mga butang sa pagluntad. (1 Pedro 5:10) Sa pagkamatuod, wala naton ginapakot kon pila pa ka tion ang nabilin, kag wala kita nagatalana sing bisan anong ispisipiko nga petsa. Ginatugyan naton ini nga butang sa Daku nga Manugbantay sang Oras, nga si Jehova nga Dios.​—⁠Salmo 31:⁠15.

19, 20. (a) Paano naton dapat tamdon ang tagsa ka adlaw nga nagaligad nga nagabatas kita? (b) Ano nga kabuangan ang luyag naton likawan, kag ngaa?

¹⁹ Apang, ang kaliwatan nga gintagna sa pagsaksi kag sa pag-eksperiensia sang “katapusan sang sistema sang mga butang” may edad na karon. (Mateo 24:​3, 32-35) Gani indi gid naton pagkalipatan nga ang pagligad sang tagsa ka adlaw nga nagabatas kita isa ka adlaw nga buhin para kay Satanas kag sa iya mga demonyo sa paghigko sa uniberso paagi sa ila gid pagluntad kag isa ka adlaw nga nagalapit pa sa tion nga indi na pagbatason ni Jehova ang pagluntad sang “mga suludlan sang kasingkal nga takus sa kalaglagan.” (Roma 9:22) Sa indi madugay, kon matapos na ang pag-antos sang Dios, ipabutyag niya ang iya kasingkal sa di-diosnon nga mga lalaki kag mga babayi. Sa amo, ipahayag niya ang iya balaan nga kaakig sa ila dalanon, bisan pa gintugutan niya sila nga magpadayon sa sining bug-os nga tion.

²⁰ Mangin buangbuang gid kita kon indi naton pagpadayunon ang aton mahigugmaon nga mga panikasog sa pagtigayon sang mahimayaon nga padya nga ginatanyag sa aton paagi kay Jesucristo. Sa baylo, determinado kita nga magpadayon sing matutom subong mga Saksi para kay Jehova sa sining labing importante nga tion nga buot na ibindikar ni Jehova ang iya kaugalingon subong Bug-os Uniberso nga Soberano.

[Footnote]

Paano Mo Sabton?

◻ Ngaa indi naton malikawan nga matilawan ang aton pagbatas?

◻ Ano nga daya ang luyag naton likawan?

◻ Agod nga indi kita magluya, ano ang kinahanglanon?

◻ Ano ang aton eslogan?

◻ Sa mga tion sang kabudlayan, ano ang magabulig sa aton sa pagbatas?

[Laragway sa pahina 11]

Ang katawhan sang Dios, kaangay sining mga Saksi sa Pantalan sang Espanya, Trinidad, nangin handa pirme sa paghulat kay Jehova