Paano si Jesucristo Isa ka Manalagna Kaangay ni Moises?

SI Jehova nga Dios wala nagabutig. (Tito 1:​2; Hebreo 6:18) Busa, ang mga tagna sang iya Pulong, ang Biblia, masaligan kag matuod. Pat-od gid nga matuman ini.

Ang iban sang ginbugna sang Dios nga mga tagna amo ang ginrekord sang Hebreong manalagna nga si Moises nahanungod sa Mesias. Nagabalikwat kay Jehova, si Moises nagsiling: “Bangunon ko sa ila [mga Israelinhon] ang isa ka manalagna kaangay sa imo [si Moises] gikan sa ila mga utod; kag ibutang ko ang akon mga pulong sa iya baba, kag magapamulong sia sa ila sang tanan nga isugo ko sa iya.”​—⁠Deuteronomio 18:​17, 18.

Gin-aplikar ni apostol Pedro ining tagna kay Jesucristo sang nagsiling sia: “Si Moises nagsiling, ‘Ang isa ka manalagna bangunon ni Jehova nga Dios sa inyo gikan sa tunga sang inyo mga kauturan kaangay sa akon. Sa iya magapamati kamo sa tanan nga ipamulong niya sa inyo.” ’ (Binuhatan 3:22) Sa katunayan, si Jesus mismo nagsiling: “Kon nagtuo kamo kay Moises magatuo kamo sa akon, kay nagsulat sia nahanungod sa akon.” (Juan 5:46) Sa anong paagi magkaangay sanday Jesus kag Moises?

Magkaangay Anay sa ila mga Karera

Sanday Moises kag Jesus nakapalagyo sa pagpamatay sa mga bata nga lalaki. Ang lapsag nga si Moises gintago sa mga tabun-ak sa pangpang sang Suba Nilo kag busa nakapalagyo sa pagpamatay sa Israelinhon nga mga bata nga lalaki subong sang ginsugo ni Faraon sang Egipto. Sadtong bata pa, si Jesus nakapalagyo man sa pagpamatay sa mga bata nga lalaki halin sa duha ka tuig ang edad sa Betlehem kag sa mga distrito sini. Ini nga pagpamatay ginsugo ni Hari Herodes nga Daku, nga, kaangay ni Faraon, kaaway sang Dios kag sang Iya katawhan.​—⁠Exodo 1:​22⁠–​2:​10; Mateo 2:​13-18.

Ang malum-ok sing hunahuna, ukon mahagop, nga espiritu ginpakita nanday Moises kag Jesus. Bisan pa ginpadaku sia subong anak sa panimalay sang gamhanan nga hari sang Egipto, si Moises “tama gid ka mapainubuson, labi pa sa tanan nga tawo nga yara sa kadaygan sang duta.” (Numeros 12:3) Sing kaanggid, si Jesus nag-alagad subong gamhanan nga prinsipe nga si Miguel sa langit apang mapainubuson nga nagkari sa duta. (Daniel 10:​13; Filipos 2:​5-8) Dugang pa, si Jesus may kaluoy sa katawhan kag nakasiling: “Itakud ang akon gota sa inyo kag magtuon kamo sa akon, kay ako mapainubuson kag malulo, kag makakita kamo sing kapahuwayan sa inyo mga kalag.”​—⁠Mateo 11:​29; 14:⁠14.

Tungod sang pag-alagad kay Jehova, ginbayaan nanday Moises kag Jesus ang mataas nga posisyon kag dakung manggad. Agod alagaron si Jehova kag ang Iya katawhan, ginbayaan ni Moises ang manggad kag mataas nga lugar sa Egipto. (Hebreo 11:​24-26) Sa kaanggid, ginbayaan ni Jesus ang maayo gid nga posisyon kag manggad sa langit agod alagaron ang Dios kag ang Iya katawhan sa duta.​—⁠2 Corinto 8:⁠9.

Sanday Moises kag Jesus lunsay nangin mga hinaplas sang Dios. Si manalagna Moises nag-alagad subong hinaplas ni Jehova sa pungsod sang Israel. Subong sang ginsiling ni apostol Pablo, “ginkabig [ni Moises] ang pagtamay nga gin-antos tungod sa Cristo [hinaplas] nga daku pa nga manggad sang sa mga bahandi sa Egipto.” (Hebreo 11:​26; Exodo 3:1–4:17) San-o nangin Cristo, ukon Isa nga hinaplas, si Jesus? Natabo ini sang ginhaplasan sia sang balaan nga espiritu, ukon aktibo nga kusog, sang Dios sang ginbawtismuhan sia. Sa Samariahanon nga babayi sa bubon ni Jacob sa Sicar kag sa atubangan sang mataas nga saserdote sang Israel sang ginbista sia, si Jesus nagpanaksi nga sia amo ang Mesias, ukon Cristo.​—⁠Marcos 14:​61, 62; Juan 4:​25, 26.

Sanday Moises kag Jesus nagpuasa sa 40 ka adlaw. Maaga sa iya karera subong humalambal sang Dios, si Moises nagpuasa sa 40 ka adlaw samtang sa bukid sang Sinai. (Exodo 34:28) Si Jesus nagpuasa sa 40 ka adlaw sa kamingawan kag nian nagbato sa satanikong pagsulay sadtong maaga nga bahin sang iya karera subong ang ginsaad nga Mesias.​—⁠Mateo 4:​1-11.

Lunsay Nila Ginhimaya si Jehova

Gingamit ni Jehova sanday Moises kag Jesus sa pagpadaku sang Iya balaan nga ngalan. Ginsugo sang Dios si Moises sa pagkadto sa mga Israelinhon sa ngalan ‘ni Jehova nga Dios sang ila mga katigulangan.’ (Exodo 3:​13-16) Ginrepresentar ni Moises ang Dios sa atubangan ni Faraon, nga ginhuptan nga buhi agod ang gahom ni Jehova mapakita kag ang Iya ngalan mabantala sa bug-os nga duta. (Exodo 9:16) Nagkari man si Jesus sa ngalan ni Jehova. Halimbawa, si Cristo nagsiling: “Ako nagkari sa ngalan sang akon Amay, kag wala kamo nagabaton sa akon.” (Juan 5:43) Ginhimaya ni Jesus ang iya Amay, ginpakilala ang ngalan ni Jehova sa katawhan nga ginhatag sa iya sang Dios, kag ginpahibalo ini sa duta.​—⁠Juan 17:​4, 6, 26.

Paagi sa balaan nga gahom, sanday Moises kag Jesus naghimo sing mga milagro nga naghimaya sa Dios. Si Moises naghimo sing mga milagro agod pamatud-an nga ginsugo sia ni Jehova nga Dios. (Exodo 4:​1-31) Sa bug-os niya nga karera, si Moises, nga gingamit sang Dios sa pagtunga sang Dagat nga Pula, nagpadayon sa paghimo sing mga milagro nga naghimaya kay Jehova. (Exodo 5:1⁠–​12:​36; 14:​21-31; 16:​11-18; 17:​5-7; Salmo 78:​12-54) Sa kaanggid, si Jesus naghatag sing himaya sa Dios paagi sa paghimo sing madamong milagro. Amo sina kon ngaa si Jesus makasiling: “Magtuo kamo sa akon nga ako sa Amay kag ang Amay sa akon; ukon indi, magtuo kamo sa akon bangod sang mga buhat gid.” (Juan 14:11) Ang iban sang iya mga milagro amo ang pagpakalma sa mabaskog nga bagyo, amo kon ngaa ang Dagat sang Galilea nagkalma.​—⁠Marcos 4:​35-41; Lucas 7:​18-23.

Iban Pa Importante nga Kaanggid

Sanday Moises kag Jesus ginbuylog sa milagruso nga pag-aman sing pagkaon. Si Moises manalagna ni Jehova sang ang pagkaon milagruso nga gin-aman para sa mga Israelinhon. (Exodo 16:​11-36) Sing kaanggid, sa duha ka okasyon sa rekord sang Biblia, milagruso nga ginpakaon ni Jesus ang kadam-an sing materyal nga pagkaon.​—⁠Mateo 14:​14-21; 15:​32-38.

Ang manna halin sa langit gin-angot sa pag-alagad nanday Moises kag Jesus. Si Moises nanguna sa Israelinhon sang gin-amanan sila sing manna halin sa langit, kon sa aton pa. (Exodo 16:​11-27; Numeros 11:​4-9; Salmo 78:25) Sa kaanggid apang sa importante gid nga paagi, si Jesus nag-aman sang iya kaugalingon nga unod subong manna halin sa langit para sa kabuhi sang matinumanon nga katawhan.​—⁠Juan 6:​48-51.

Sanday Moises kag Jesus nagpanguna sa katawhan gikan sa kahiolipnan pakadto sa kahilwayan. Si Moises gingamit sang Dios sa pagpanguna sa mga Israelinhon gikan sa pagkaulipon sa mga Egiptohanon pakadto sa kahilwayan subong katawhan Niya. (Exodo 12:​37-42) Sa kaanggid, si Jesucristo nagapanguna sang iya mga sumulunod pakadto sa kahilwayan. Pagapangunahan pa ni Cristo ang matinumanon nga katawhan pakadto sa kahilwayan gikan sa ­pagkaulipon sa organisasyon ni Satanas nga Yawa, subong man gikan sa sala kag kamatayon.​—⁠1 Corinto 15:​24-26; Colosas 1:​13; 1 Juan 5:⁠19.

Sanday Moises kag Jesus nagpatunga sa mga katipan. Si Moises amo ang manugpatunga sang katipan nga Kasuguan, sa ulot ni Jehova nga Dios kag sang mga Israelinhon. (Exodo 19:​3-9) Si Jesus amo ang Manugpatunga sang bag-ong katipan, sa ulot sang Dios kag sang espirituwal nga Israel.​—⁠Jeremias 31:​31-34; Lucas 22:​20; Hebreo 8:​6-13.

Ang paghukom gintugyan kanday Moises kag Jesucristo. Si Moises nag-alagad subong hukom kag manughatag-kasuguan sa undanon nga Israel. (Exodo 18:​13; Malaquias 4:4) Si Jesus nagaalagad subong Hukom kag naghatag sa espirituwal nga “Israel sang Dios” sang mga kasuguan kag mga mando. (Galacia 6:​16; Juan 15:10) Si Cristo mismo nagsiling: “Ang Amay wala nagahukom sa bisan kay sin-o nga tawo, kundi natugyan niya sa Anak ang bug-os nga paghukom, agod nga ang tanan magtahod sa Anak, subong sang pagtahod nila sa Amay. Ang wala nagatahod sa Anak wala nagatahod sa Amay nga nagpadala sa iya.”​—⁠Juan 5:​22, 23.

Sanday Moises kag Jesus gintugyanan sing pagkaulo sa panimalay sang Dios. Si Moises matutom subong ulo sang panimalay sang Dios sa dumaan nga Israel. (Numeros 12:7) Sa kaanggid, si Jesus ginhimo nga Ulo sang espirituwal nga panimalay sang mga anak ni Jehova kag napamatud-an nga matutom sa sini. Sa pagkamatuod, si Jesus “matutom sa Isa nga nagtangdo sa iya, subong nga si Moises man matutom sa panimalay sinang Isa. Walay sapayan ginpakatakus si Jesus nga labaw pa sing himaya kay Moises, subong nga ang nagtukod sang balay dungganon pa sa balay. . . . Si Moises matutom sa bug-os nga panimalay sinang Isa subong nga manug-alagad sa pagpamatuod sang mga butang nga ibantala sa ulihi, apang si Cristo matutom sa panimalay sinang Isa subong nga Anak. Amo nga panimalay kita sinang Isa, kon ginalig-on ta ang aton kahilwayan sa paghambal kag aton paghimaya sa paglaum nga malig-on tubtob sa katapusan.”​—⁠Hebreo 3:​2-6.

Bisan sa kamatayon, sanday Moises kag Jesus magkaangay. Paano? Ti, ginkuha ni Jehova ang lawas ni Moises, agod indi ini pagtamayon ukon pagsimbahon sang mga tawo. (Deuteronomio 34:​5, 6; Judas 9) Sa kaanggid, ginkuha sang Dios ang lawas ni Jesus, wala nagatugot nga madunot ini kag agod indi ini mangin kasandaran sa pagtuo.​—⁠Salmo 16:​10; Binuhatan 2:​29-31; 1 Corinto 15:⁠50.

Talupangda ang Tagna

Amo ini ang iban nga mga paagi nga si Jesucristo napamatud-an nga isa ka manalagna kaangay ni Moises. Daw ano katahom nga ang mga pinamulong sang Dios kay Moises nahanungod sa pagkari sina nga manalagna natuman!

Walay duhaduha nga gintuman ni Jehova ang iya matagnaon nga saad nga magbangon sing isa ka manalagna kaangay ni Moises. Ang mga pinamulong sa Deuteronomio 18:​18 natuman sa kabuhi kag mga eksperiensia ni Jesucristo. Kag ina nga katumanan nagahatag sa aton sing rason nga magsalig sa iban pa nga mga tagna sa Pulong sang Dios. Busa, talupangdon naton pirme ang tagna sa Biblia.