Isa Bala ka Ministeryo Para sa Imo?
GINPAKITA ni Jehova ang iya kaalwan sa himpit nga pag-aman sang duta para sa aton kalipay sa kabuhi. Maalwan niya nga ginbilin ining mga aman bisan pagkatapos nagrebelde sanday Adan kag Eva. Labi pa sa sini, ginpakita niya ang iya nagalabaw nga gugma sang ginpadala niya ang iya Anak sa pagluwas sa nagatuo nga katawhan gikan sa kalamidad sang sala.—Mateo 5:45; Juan 3:16.
Paano kita magahulag sa sinang gugma? Si Jesus nagsiling nga dapat naton higugmaon si Jehova nga aton Dios sa aton bug-os nga tagipusuon, kalag, hunahuna, kag kusog. Nagakahulugan ini nga dapat naton ihatag sa iya ang aton pagsimba kag katutom kag dapat kita magkabuhi nahisuno sa iya kabubut-on.—Marcos 12:30; 1 Pedro 4:2.
Apang ano ang nalakip sa paghimo sang kabubut-on sang Dios? May pag-alagad bala nga sarang naton mahatag sa iya—isa ka ministeryo nga dapat naton pakigbahinan?
Pagkinahanglan sing mga Ministro
Gingumon sang mga relihion ang mga tawo sa kon paano simbahon kag alagaron ang Dios. Apang, ginapakita sang Biblia nga may isa lamang ka matuod nga relihion, “isa ka Ginuo, isa ka pagtuo, isa ka bawtismo; isa ka Dios kag Amay sang tanan nga mga tawo.” Si Jesus nagsiling: “Ang matuod nga mga sumilimba magasimba sa Amay sa espiritu kag kamatuoran.” Gani ginlaygayan sila: “Magpamulong kamo tanan nga may paghilisugot, kag . . . walay pagbinahinbahin sa inyo.”—Efeso 4:3-6; Juan 4:23; 1 Corinto 1:10.
Ang kagumon sa kon ano gid ang matuod nga relihion nagsugod sa Eden sang ginhangkat ni Satanas ang pagkamatinuuron sang pagkasoberano ni Jehova paagi sa pagpangduhaduha sa paagi sang Dios sa paggahom. (Genesis 3:1-6, 13) Ginasakdag karon ni Satanas ang iya pagpamatok sa Dios paagi sa dimatuod nga mga panudlo nga ginapalapnag sang madayaon nga mga ministro sang relihion nga “nagapakamanug-alagad sang pagkamatarong.” Gani ang Biblia nagasiling: “Mga hinigugma, dili ninyo pagtuuhan ang tanan nga ginbugna nga ekspresyon . . . kay madamo ang dimatuod nga mga manalagna nga naglapnag sa kalibutan.”—2 Corinto 11:14, 15; 1 Juan 4:1.
Sing makalilipay, ang Dios naghimo sing mga tikang sa paglubad sining hulusayon sang pagginahom. Ginpadala ang iya Anak sa paggawad sa katawhan, ginhimo niya karon si Jesus nga Hari sang langitnon nga Ginharian sang Dios, nga may awtoridad sa paglaglag kay Satanas kag sa iya mga manalagna, ukon mga ministro. Nagapat-od ini nga ang kabubut-on sang Dios ginahimo sa duta, sa walay katapusan nga kabulahanan sang matinumanon nga katawhan.—Daniel 7:13, 14; Hebreo 2:9.
Gintago ni Satanas ining mga kamatuoran. (2 Corinto 4:4) Busa, kinahanglan nga mag-alagad kita subong mga ministro sang Dios, nga nagabuyagyag sang mga kabutigan ni Satanas kag nagapanaksi sa kamatuoran. Wala kita ginapilit ni Jehova sa sining pag-alagad. Luyag niya nga, kaangay kay Jesus, ihalad naton ang aton kaugalingon sing kinabubut-on bilang pag-apresyar sa iya kag sa ginhimo niya para sa aton.—Salmo 110:3; Hebreo 12:1-3.
Ang Cristianong Ministeryo
“Naglibot [si Jesus] sa mga siudad kag mga minuro, nga nagawali kag nagadala sang maayong balita sang ginharian sang Dios.” (Lucas 8:1) Ginhanas man niya ang iya mga disipulo nga mangin ministro kaangay niya kag ginpadala sila sa pagbantala. (Mateo 10:1-14, 27) Sang ulihi, ginsugo niya sila nga padayunon ang ministeryo tubtob sa ukbong sang duta.—Mateo 28:19, 20; Binuhatan 1:8.
Ining sugo ginhatag sa matuod nga mga Cristiano, kag ang espiritu sang Dios nagapahulag sa ila sa pagwali. Subong sang natabo sadto anay sang Pentecostes 33 C.E., ang tanan nga nagbaton sang maayong balita nakatigayon sing responsabilidad nga ipahayag sing dayag ang ila pagtuo.—Binuhatan 2:1-4, 16-21; Roma 10:9, 13-15.
Apang, ang kalabanan nga mga tawo indi luyag mangin mga ministro. Si Peter, isa ka Saksi ni Jehova, nagasiling: “Ginakabig sang mga lalaki sa Alemanya nga ubos sa ila dignidad ang maghambal nahanungod sa relihion. ‘Mga klerigo ang nagahimo sina,’ siling nila.” Suno kay Tony, isa ka misyonero sa mga dekada na, ang mga tawo sa Inglaterra nagsiling: “Maayo ang ginasiling ninyo, kag sa banta ko ang mga Saksi ni Jehova maayo nga mga tawo. Apang ang pamalaybalay nga pagbantala—indi ko gid ina mahimo.” Si Ben nagtuon anay sang Biblia upod sa isa ka taga-Nigeria nga tawo nga nagsiling sa iya: “Indi ko mahanduraw ang akon kaugalingon nga nagawali sing dayag sa pamalaybalay; apang sarang ako makahatag sing kuwarta sa inyo kongregasyon agod buligan ang mga luyag maghimo sina.” Huo, ang kalabanan nga mga tawo kulang sing pagtuo kag kombiksion nga kinahanglanon para sa Cristianong ministeryo.
Apang, ang dayag nga pagwali isa ka responsabilidad sang tanan sa Cristianong kongregasyon, bisan ano man ang edad ukon sekso. Indi ini para lamang sa mga gulang kag ministeryal nga mga alagad, nga ‘nagapanguna,’ kundi para man sa mga Cristiano sa kabilugan. Ang tanan ginalaygayan: “Maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan. . . . Tumana ang mga nagapanguna sa inyo.”—Hebreo 13:15, 17.
Nagapamulongpulong sa isa ka salakot nga kadam-an sa iya Wali sa Bukid, si Jesus nagsiling: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang nagahimo sang kabubut-on sang akon Amay nga yara sa langit.” Sang isa ka okasyon ginpakita niya nga ang paghimo sang kabubut-on sang Dios nagalakip sang pagwali sa mga ditumuluo. Sang ginlaygayan sia sang iya mga disipulo nga indi magwali sa mga Samariahanon agod makakaon, nagsiling sia: “Ang akon kalan-on amo ang paghimo sang kabubut-on sang nagpadala sa akon kag ang pagtuman sang iya buluhaton.”—Mateo 7:21; Juan 4:27-38.
Dapat Bala Ini Mangin Imo Karera?
Masunson nga ginapakamaayo sang mga tawo ang maghimud-os sing materyal nga pagkaon kag manggad. Apang sa una nga bahin sang Wali sa Bukid, ginlaygayan ni Jesus ang iya mga tagpalamati nga indi paghimud-usan sing mabinalak-on ina nga mga butang. “Sa baylo,” siling niya, “magtipon kamo sa inyo kaugalingon sing mga bahandi sa langit . . . Pangitaa anay ninyo ang ginharian kag ang pagkamatarong [sang Dios].”—Mateo 6:20, 33.
Ang pagpangita anay sang Ginharian nagakahulugan sang indi pagtugot sang iban nga mga butang nga magapangibabaw sa aton ministeryo. Apang, ang paghimo sini wala nagakahulugan nga indi na pag-ilakip ang iban pa. Halimbawa, ang Biblia nagalaygay sa aton nga indi pagpatumbayaan ang matuod nga mga obligasyon sa pamilya. Ang tanan nga mga tawo may amo sining mga obligasyon. Ang pagpatumbaya sa sini isa ka buhat nga supak sa Cristianong pagtuo. (1 Timoteo 5:8) Apang, dapat naton himuon ang tanan nga rasonable nga masarangan naton sa ministeryo samtang nagaatipan sang iban nga mga responsabilidad sa timbang nga paagi.
Si Jesus nagsiling: “Ining maayong balita ibantala . . . nga panaksi sa tanan nga kapungsuran; kag ugaling magaabot ang katapusan.” (Mateo 24:14) Ang konteksto sinang tagna nagabutang sang katumanan sini sa aton adlaw. Kutob sang 1914 ang maayong balita amo nga ang Ginharian may gahom sa pagpangahikot pabor sa pagkasoberano ni Jehova kag batok kay Satanas kag sa iya kalibutan. (Bugna 11:15-18) Dapat naton hunahunaon sing serioso ang mga implikasyon sini. Ang katapusan magaabot, kag dapat naton anay himuon ang pagbantala nga hilikuton antes sini. Nabutang sa katalagman ang kabuhi; makabulig kita nga maluwas ang madamo sa ila.
Lab-uta ang Daku Pa nga Pag-alagad
Madamo sa mga Saksi ni Jehova ang nagahinguyang sing napulo ukon kapin pa ka oras kada bulan sa pagpaambit sang maayong balita sa iban. Linibo ang nagahinguyang sing duha ukon kapin pa ka oras sa isa ka adlaw sa pagbantala subong mga auxiliary payunir, kag ang iban nagaalagad sing padayon subong regular kag espesyal payunir. Nakahibalo sila sang pagkahilingagawon sining hilikuton kag luyag nila nga makapakigbahin sing bug-os agod mahimo ini sa wala pa nagaabot ang katapusan sining dimalipayon nga kalibutan.
Isa ka na bala ka aktibo nga Saksi ni Jehova? Nian lab-uta ang daku pa nga pagpakigbahin sa pag-alagad. Pauswaga ang imo ikasarang sa pagbantala kag pagtudlo, nagapanikasog nga makahimo sing dugang pa sa ministeryo. Kon yara ka sa posisyon nga magpayunir, himua ini. Kon ang imo kahimtangan tunay nga wala nagatugot sa imo sa pagpayunir, nian palig-una ang mga makasarang sa paglab-ot sini nga pag-alagad.
Kon indi ka pa isa ka dedikado nga Saksi ni Jehova, indi magsiling nga indi para sa imo ang ministeryo. Isa pa ka tawo nga nagahingalan kay Peter, isa ka mechanical engineer, ang makusog nga nagapamatok sa pagsugid sang iya asawa sang maayong balita sa iban. “Ngaa ang akon asawa nagabantala sa pamalaybalay?” pamangkot niya. Pagligad sang mga tuig nga pagpanilag sa malig-on nga kombiksion sang iya asawa nahanungod sa kamatuoran sang Pulong sang Dios, namat-od sia sa pagtuon man sa Biblia. Karon, kaangay sang iya asawa, isa sia ka dedikado kag bawtismado nga ministro sang maayong balita.
Gani indi pagdumilii ang imo kaugalingon gikan sa pribilehiyo nga alagaron si Jehova. Ginapalig-on namon sa imo nga tun-an mo ang Biblia kag makig-upod sa matuod nga mga Cristiano sa ila mga miting. Magabulig ini sa imo sa pagdihon sang imo kabuhi nahisuno sa pagkamatarong sang Dios kag sa pagtukod sang malig-on nga pagtuo sa iya mga katuyuan. Kon nagauswag ka sa sini, kalipikado man ikaw nga mangin isa ka ministro sang Dios. Nian may pribilehiyo ka nga makigbahin sa pagtuman sining sugo ni Jesus: “Busa lakat kamo kag maghimo sing mga disipulo . . . nga nagapanudlo sa ila sa pagtuman sang tanan nga ginsugo ko sa inyo.”—Mateo 28:19, 20.
Huo, may yara isa ka ministeryo nga mahimo mo pakigbahinan, kag labi ka hilingagawon nga himuon mo ini.
[Kahon sa pahina 25]
Isa ka nars nga may ginaatipan nga pamilya ang nagasiling: “Nagabiyahe ako sing sobra sa isa ka oras kada adlaw pakadto sa ospital nga ginaobrahan ko, gani nagdumdom ako nga indi ako makaauxiliary payunir. Apang gin-organisar ko sing maayo ang akon mga hilikuton agod makapakigbahin sa pag-alagad sa latagon sing maaga pa kada adlaw antes magkadto sa obra, sa tion nga inugpahuway sa obra, kag sa mga adlaw nga wala ako sing obra. Mahanduraw ninyo ang akon kalipay sang, sa katapusan sang isa ka bulan, nakahinguyang ako sing 117 ka oras sa pagbantala! Nakapahamtang ako sing 263 ka magasin, 22 ka suskripsion sa magasin kag nakasugod sing 3 ka pagtuon sa Biblia.”
[Kahon sa pahina 27]
Si Michael may pito ka magagmay nga kabataan, kag may maayo sia nga obra sa isa ka kolehiyo sa Nigeria. Isa man sia ka gulang sa Cristiano nga kongregasyon. May kaanggid sia nga panimuot sang linibo ka Saksi:
“Ginatamod ko ang ministeryo subong akon karera kag pirme ginadumdom nga si Pablo nagsiling: ‘Ako ang nagtanom, si Apolo ang nagbunyag, apang ang Dios ang nagapatubo.’ Kami sang akon asawa ‘nagatanom’ sa tion sang malip-ot nga paghinun-anon sang maayong balita sa pamalaybalay. ‘Nagabunyag’ kami paagi sa pagduaw liwat sa mga nagpakita sing interes agod tudluan sila gikan sa Biblia, subong sang ginsiling ni Jesus nga himuon naton. Ang semanal nga pagtuon sa Biblia nagbulig sa madamo—sa iban nga hitabo sa bug-os nga pamilya—nga makatigayon sang ihibalo sang kamatuoran.”