Dumduma Gid ang Adlaw ni Jehova

“Malapit na ang adlaw ni Jehova sa manubo nga kapatagan sang desisyon.”—JOEL 3:14.

1. Ngaa mangin tuhay ang nagapakari nga balaan nga inaway nga ideklarar ni Jehova gikan sa “balaan” nga mga inaway sang katawhan?

“IBANTALA ninyo ini sa mga pungsod, ‘Pakabalaana ang inaway!’” (Joel 3:9) Nagakahulugan bala ini sing isa ka balaan nga inaway? Sa pagdumdom liwat sang mga Krusada, sang relihioso nga mga inaway, kag sang duha ka kalibutanon nga inaway—nga ginpangunahan sang Cristiandad—mahimo nga magakurog kita sa paghunahuna lamang sang “balaan” nga inaway. Apang, ang balaan nga inaway sa tagna ni Joel indi isa ka inaway sa tunga sang mga pungsod. Indi ini isa ka puno sing dumot nga pag-agaway sing teritoryo, nga ginagamit ang relihion subong balibad. Isa ini ka matarong nga inaway. Amo ini ang inaway sang Dios sa pagdula sang kakagud, pinuyas, kagarukan, kag pagpigos gikan sa duta. Magabindikar ini sang matarong nga pagkasoberano ni Jehova sa ibabaw sang bug-os nga duog sang iya tinuga. Ina nga inaway magahawan sang dalan agod pasudlon sang Ginharian ni Cristo ang katawhan sa bug-os uniberso nga paghidait, kabuganaan, kag kalipay sa sulod sang Milenyo nga gintagna sang mga manalagna sang Dios.—Salmo 37:9-11; Isaias 65:17, 18; Bugna 20:6.

2, 3. (a) Ano “ang adlaw ni Jehova” nga gintagna sa Joel 3:14? (b) Ngaa takus sa mga pungsod ang atubangon nila sa sina nga adlaw?

² Ano, nian, ang “adlaw ni Jehova” nga gintagna sa Joel 3:​14? “Kailo sang adlaw,” tuaw ni Jehova mismo, “kay malapit na ang adlaw ni Jehova, kag magaabot ini subong sang kalaglagan gikan sa Isa nga Labing Gamhanan!” Paano ini isa ka kalaglagan? Ang manalagna nagapaathag sang ulihi: “Mga kadam-an, mga kadam-an sa manubo nga kapatagan sang desisyon, kay malapit na ang adlaw ni Jehova sa kapatagan sang desisyon.” (Joel 1:15; 3:14) Amo ini ang adlaw nga himuon ni Jehova ang iya hudisyal nga desisyon sa didiosnon nga kadam-an sang katawhan nga nagasikway sa iya matarong nga pagkasoberano sa langit kag sa duta. Desisyon ni Jehova nga laglagon ang sataniko nga sistema sang mga butang nga madugay na nagahugakom sa katawhan.—Jeremias 17:5-7; 25:31-33.

³ Ang malaut nga sistema sa duta dapat mangatubang sa sina nga desisyon. Apang amo gid bala sina kalain ang sistema sang kalibutan? Ang isa ka pag-usisa sang iya rekord tuman na! Si Jesus nagsambit sing isa ka prinsipio sa Mateo 7:16: “Paagi sa ila mga bunga makilala ninyo sila.” Wala bala ang dalagku nga mga siudad sang kalibutan nangin sentro sang mga droga, krimen, kakugmat, imoralidad, kag polusyon? Sa madamo nga kadutaan, ang bag-o matigayon nga mga kahilwayan ginapiutan sang politikal nga kagamo, kakulang sing kalan-on, kag kaimulon. Kapin sa isa ka bilyon ka tawo ang nagakabuhi sa hawuthawut nga rasyon. Dugang pa, ang epidemya sang AIDS, nga ginadabukan sang mga droga kag imoral nga estilo sang pagkabuhi, nagkulap sing isa ka madulom nga gal-um sa ibabaw sang daku nga bahin sang duta. Ilabi na sang magdabdab ang Inaway Kalibutanon I sang 1914, ang tagsa ka bahin sang kabuhi nag-usmod sa bug-os nga kalibutan.—Ipaanggid ang 2 Timoteo 3:1-5.

4. Ano ang hangkat ni Jehova sa mga pungsod?

⁴ Apang, ginatipon ni Jehova gikan sa tanan nga pungsod ang isa ka katawhan nga malipayon nga nagabaton sing instruksion tuhoy sa iya mga dalanon kag nagalakat sa iya mga banas. Ining katawhan sa bug-os nga globo nagsalsal sang ila mga espada nga mangin mga punta sang arado, ginasikway ang masingki nga mga dalanon sang kalibutan. (Isaias 2:​2-4) Huo, mga espada nga mangin mga punta sang arado! Apang indi bala baliskad ini sang singgit nga ginapabantala ni Jehova sa Joel 3:9, 10? Didto aton mabasa: “Ibantala ninyo ini sa mga pungsod, ‘Pakabalaana ang inaway! Puhaga ang mga tawo nga gamhanan! Papalapita sila! Pataklara ang mga tawo sang inaway! Salsala nga mga espada ang inyo mga punta sang arado kag mga bangkaw ang inyo mga inughagbas.’” A, ginahangkat diri ni Jehova ang mga manuggahom sang kalibutan nga tingubon ang ila hangaway batok sa iya sa Armagedon. Apang indi sila magmadinalag-on! Malutos sila sing bug-os!—Bugna 16:16.

5. Ano ang mangin resulta kon anihon na ni Jesus “ang ubas sang duta”?

⁵ Sa pagbato sa Soberanong Ginuo nga si Jehova, ang gamhanan nga mga manuggahom nagtukod sing hilimuan kag talaguan sing makahaladlok nga mga hinganiban—apang sa walay pulos! Ihatag ni Jehova ang mando sa Joel 3:13: “Igulo ninyo ang galab, kay gulang na ang alanyon. Kari, linas kamo, kay ang ipitan puno. Nagaalawas ang mga kawa; kay daku ang pagkamalaut nila.” Yadtong mga pulong nagaanggid man sa Bugna 14:​18-20, sa diin ang isa ka anghel nga may matalum nga galab, ginasugo nga “gutlabon ang mga pinungpong sang ubas sang duta, kay luto na ang iya mga ubas.” Igulo sang anghel ang isa ka matalum nga galab kag ihaboy yadtong mabinatuon nga mga pungsod “sa dakung linasan sang kasingkal sang Dios.” Sing malaragwayon, ang dugo magailig gikan sa linasan tubtob sa busal sang kabayo sa kataason, sa kalayuon nga 1,600 ka estadio—mga 300 kilometros! Daw ano ka makahaladlok nga palaabuton para sa mga pungsod nga nagapakahuya kay Jehova!

Masinulundon sa Kasuguan nga mga Banwahanon

6. Paano ginatamod sang mga Saksi ni Jehova ang mga pungsod kag ang ila mga manuggahom?

⁶ Nagakahulugan bala ini nga ang mga Saksi ni Jehova indi matinahuron sa mga pungsod kag sa ila mga manuggahom? Malayo sa sini! Nagapanganduhoy lamang sila bangod sa kalautan nga makita sang tanan, kag nagapaandam sila tuhoy sa adlaw ni Jehova sa paghikot sang iya desisyon nga nagahilapit sing madasig. Sa amo man nga tion, mapainubuson nga ginatuman nila ang sugo ni apostol Pablo sa Roma 13:1: “Magpasakop ang tagsa ka kalag sa superyor nga mga awtoridad.” Sa sining tawhanon nga mga manuggahom, nagahatag sila sing nagakaigo nga pagpadungog apang indi sing pagsimba. Subong masinulundon sa kasuguan nga mga banwahanon, ginasunod nila ang mga talaksan sang Biblia sa pagkabunayag, pagkamaminatud-on, kag pagkatinlo kag nagatukod sila sing maayong moralidad sa ila pamilya. Ginabuligan nila ang iban sa pagtuon kon paano man nila mahimo ini. Nagapuyo sila sing mahidaiton upod sa tanan nga tawo, wala nagabuylog sa mga demonstrasyon ukon politikal nga mga pag-alsa. Ang mga Saksi ni Jehova nagatinguha nga mangin huwaran sa pagtuman sang kasuguan sang superyor nga mga awtoridad sang tawo, samtang nagahulat sila sa Supremo nga Awtoridad, ang Soberano nga Ginuong Jehova, sa pagpasag-uli sang himpit nga paghidait kag matarong nga panguluhan sa sini nga duta.

Paghikot sang Iya Desisyon

7, 8. (a) Sa anong paagi uyugon ang mga pungsod kag ang kadudulman magapanaug sa ila? (b) Sin-o karon ang ginalaragway ni Joel, kag kon ipatuhay sa kalibutan sa kabilugan, paano ini sila ginapakamaayo?

⁷ Sa maathag kag malaragwayon nga pulong, ginahatag ni Jehova ining dugang pa nga paglaragway sang paghikot sang iya desisyon: “Ang adlaw kag ang bulan magadulom, kag ang kabituunan magauntat sang ila pagsilak. Kag si Jehova magangurob gikan sa Sion, kag magapatunog sang iya tingog gikan sa Jerusalem. Kag ang langit kag ang duta magakurog; apang si Jehova mangin dalangpan sa iya katawhan, kag pamakod sa katawhan sang Israel.” (Joel 3:15, 16) Ang masanag, bugana nga kahimtangan sang katawhan magadulom, magalain, kag ining nabahinbahin nga sistema sang kalibutan pagauyugon, subong nga ginlaglag sang isa ka mabaskog nga linog!—Hageo 2:20-22.

⁸ Talupangda ang makalilipay nga pasalig nga si Jehova mangin dalangpan kag pamakod sa iya katawhan! Ngaa subong? Bangod sila ang katawhan—ang isa ka internasyonal nga katawhan—nga nagsabat sa mga pulong ni Jehova: “Makilala ninyo nga ako amo si Jehova nga inyo Dios.” (Joel 3:17) Sanglit ang ngalan ni Joel nagakahulugan sing “Si Jehova Dios,” sia nagakaigo nga nagalaragway sa hinaplas nga mga Saksi ni Jehova sa modernong mga tion, nga nagaalagad sing masidla sa pagwali sang pagkasoberano ni Jehova. (Ipaanggid ang Malaquias 1:11.) Kon tan-awon naton ang nagabukas nga mga pulong sang tagna ni Joel, masapwan naton didto kon daw ano kaathag nga ginatagna niya ang hilikuton sang katawhan sang Dios karon.

Isa ka Panong sang mga Apan

9, 10. (a) Ano nga kalalat-an ang ginatagna ni Joel? (b) Paano ginasulit sang Bugna ang tagna ni Joel tuhoy sa kalalat-an, kag ano ang epekto sining kalalat-an sa Cristiandad?

⁹ Pamatii karon “ang pulong ni Jehova nga nag-abot kay Joel”: “Magpamati sini, kamo nga mga tigulang, kag magdungog, tanan kamo nga pumuluyo sang duta. Nahanabo bala ini sa inyo mga adlaw, ukon sa mga adlaw sang inyo mga ginikanan? Magsugid kamo sini sa inyo mga anak, kag ang inyo mga anak sa ila mga anak, kag ang ila mga anak sa madason nga kaliwatan. Ang nabilin sang atataro, ginkaon sang apan; kag ang ginbilin sang apan, ginkaon sang palakukwan; kag ang ginbilin sang palakukwan, ginkaon sang tanga.”—Joel 1:1-4.

¹⁰ Isa ini ka tumalagsahon nga kampanya, isa nga indi malipatan tubtob san-o. Panongpanong sang mga insekto, kalabanan mga apan, ang nagalaglag sang duta. Ano ang buot silingon sini? Ang Bugna 9:1-12 nagahambal man tuhoy sa isa ka kalalat-an sang mga apan, nga ginpadala ni Jehova sa idalom sang “isa ka hari, ang anghel sang kadadalman,” nga wala sing liwan kundi amo si Cristo Jesus. Ang iya mga ngalan nga Abadon (Hebreo) kag Apolyon (Griego) nagakahulugan sing “Kalaglagan” kag “Manuglaglag.” Ining mga apan nagalaragway sa hinaplas nga nagkalabilin sang mga Cristiano nga, sa adlaw sang Ginuo karon, nagalakat agod laglagon ang halalban sang Cristiandad paagi sa bug-os nga pagbuyagyag sa butig nga relihion kag pagbantala sang pagtimalos ni Jehova batok sa sini.

11. Paano ginapabakod pa ang modernong adlaw nga mga apan, kag sin-o ilabi na ang puntariya sang ila mga pagsalakay?

¹¹ Subong ginapakita sang Bugna 9:13-21, ang kalalat-an sang mga apan ginasundan sang isa ka daku nga kalalat-an sang mga hangaway nga manugkabayo. Daw ano ka matuod ini karon, kay ang pila ka libo sang nagkalabilin nga hinaplas nga mga Cristiano ginapabakod pa sang kapin sa apat ka milyon ka “iban nga mga karnero” nga sing tingob nagahuman sing isa ka indi mapamatukan nga mga hangaway sang manugkabayo! (Juan 10:16) Nagahiusa sila sa pagbantala sang masakit nga mga paghukom ni Jehova batok sa mga nagasimba sa idolo sang Cristiandad kag sa mga ‘wala nagahinulsol sa ila mga pagpatay ukon sa ila espiritistiko nga mga buhat ukon sa ila pagpakighilawas ukon sa ila mga pagpangawat.’ Ang mga klero—Katoliko kag Protestante—nga aktibo nga nagsakdag sang makamamatay nga mga inaway sining siglo, subong man ang mga pari nga maluyagon sa mga bata para sa ila seksuwal nga kailigbon kag ang malaut nga mga ebanghelisador sa TV, nalakip sa ginapatuhuyan sining mga mensahe sang paghukom.

12. Ngaa takus ang mga lider sang Cristiandad sa pagbaton sing mga mensahe sang paghukom, kag ano sa indi madugay ang mahanabo sa ila, upod sa tanan nga katapo sang Babilonia nga Daku?

¹² Sa sinang malaut nga mga klero, ang panawag ni Jehova nagalanog: “Pagmata, kamo nga mga palahubog, kag maghibi; kag maghaya, tanan kamo nga palainum sing alak, bangod sang matam-is nga alak, kay ginakuha ini sa inyo baba.” (Joel 1:5) Sa sining ika-20 nga siglo, ginbulos sang relihion sang Cristiandad ang pagkamatinuguton sang kalibutan sa matinlo nga mga prinsipio sa moral sang Pulong sang Dios. Daw nangin matam-is ini sa butig nga relihion kag sa mga parokyano sini agod imnun nila ang mga dalanon sang kalibutan, apang daw ano nga ani sang espirituwal kag pisikal nga balatian ang gin-ani nila! Sa indi madugay, subong ginalaragway sa Bugna 17:16, 17, mangin “panghunahuna” sang Dios nga salakayon sang politikal nga kagamhanan ang bug-os kalibutan nga emperyo sang butig nga relihion, ang Babilonia nga Daku, kag laglagon sia. Sa amo lamang nga tion, samtang ginatan-aw niya ang desisyon ni Jehova nga ginahimo batok sa iya, sia ‘magamata’ gikan sa iya kahulugbon.

“Daku nga Katawhan kag Makusog”

13. Sa anong paagi ang panong sang mga apan daw ‘daku kag makusog’ para sa Cristiandad?

¹³ Ang manalagna ni Jehova nagapadayon sa paglaragway sang panong sang mga apan subong “daku nga katawhan kag makusog,” kag gani daw subong bala nga Babilonia nga Daku ini. (Joel 2:2) Ang mga klero sini, halimbawa, nagareklamo sa kamatuoran nga ang mga relihion sang Cristiandad napaslawan sa paghimo sing mga kombertido sa Budhista nga Hapon. Apang, karon, kapin sa 160,000 ka Hapones nga mga Saksi ni Jehova ang nagapanong sa sina nga pungsod kag nagadumala sing personal nga mga pagtuon sa Biblia sa kapin sa 200,000 ka puluy-an sang katawhan. Sa Italya ang 180,000 ka Saksi ni Jehova ginakilala na karon subong ikaduha sa kadamuon lamang sa mga Katoliko. Sa wala sing mahimo ang isa ka Romano Katoliko nga monsinyor sa Italya nagareklamo sa kamatuoran nga ginakuha sang mga Saksi ni Jehova gikan sa iglesia ang ‘dimagkubos 10,000 ka matutom nga mga Katoliko’ kada tuig.a Ang mga Saksi nalipay sa pag-abiabi sa ila sini.—Isaias 60:8, 22.

14, 15. Paano ginalaragway ni Joel ang panong sang mga apan, kag sa anong paagi nagakatuman ini karon?

¹⁴ Nagalaragway sang apan nga panong sang hinaplas nga mga Saksi, ang Joel 2:7-9 nagasiling: “Nagadalagan sila kaangay sang gamhanan nga mga tawo. Nagataklas sila kaangay sang gamhanan nga mga tawo. Nagapadulong sila ang tagsatagsa sa iya mga dalanon, kag wala nila ginabungkag ang ila mga katay. Kag wala sila nagadis-ugay. Subong sang mabukod nga lalaki sa iya dalanon, nagapadayon sila; kag kon ang iban mapukan sa mga hinganiban, ang iban wala nagabungkag sang ila dalanon. Nagasalakay sila sa siudad. Nagadalagan sila sa ibabaw sang kuta. Nagataklas sila sa mga balay. Nagasulod sila paagi sa mga bintana kaangay sang makawat.”

¹⁵ Isa matuod ka maathag nga paglaragway sa hangaway sang hinaplas nga “mga apan,” nga ginabuylugan karon sang kapin sa apat ka milyon ka kaupod, ang iban nga mga karnero! Wala sing “kuta” sang relihioso nga kaawayon ang makapugong sa ila sini. Sing maisugon, sila “nagapadayon sa paggawi sing mahim-ong suno sa amo gihapon nga dalanon” sang dayag nga pagpanaksi kag iban pa nga Cristianong mga hilikuton. (Ipaanggid ang Filipos 3:16.) Sa baylo nga magkompromiso, handa sila nga atubangon ang kamatayon, subong sang linibo ka mga Saksi nga ‘napukan sa mga hinganiban’ bangod nagdumili sila sa pagsaludo sa Katoliko nga si Hitler sang Nazi Alemanya. Ang apan nga panong naghatag sing maid-id nga panaksi sa “siudad” sang Cristiandad, nagalusot sa tanan nga balagbag, nagasulod, kon sa aton pa, kaangay sang makawat sa tanan nga puluy-an kay nakapanagtag sila sing binilyon ka publikasyon sang Biblia paagi sa pamalaybalay nga hilikuton. Kabubut-on ni Jehova nga ining panaksi mahatag, kag wala sing gahom sa langit ukon sa duta ang makapugong sini.—Isaias 55:11.

“Puno sing Balaan nga Espiritu”

16, 17. (a) San-o ang mga pulong sang Joel 2:​28, 29 natuman sa isa ka talalupangdon nga paagi? (b) Anong matagnaon nga mga pulong ni Joel ang wala matuman sing bug-os sang unang siglo?

¹⁶ Ginasugiran ni Jehova ang mga Saksi: “Makilala ninyo nga ako sa tunga sang [espirituwal nga] Israel, kag nga ako si Jehova nga inyo Dios kag wala na gid sing iban.” (Joel 2:27) Nahangpan sang iya katawhan ining hamili nga butang sang ginsugdan ni Jehova ang pagtuman sang iya mga pulong sa Joel 2: 28, 29: “Mahanabo sa ulihi nga ipasagahay ko ang akon espiritu sa tanan nga unod, kag magatagna ang inyo mga anak nga lalaki kag ang inyo mga anak nga babayi.” Natabo ini sang Pentecostes 33 C.E., sang ang nagtipon nga mga disipulo ni Jesus ginhaplasan “kag sila tanan napuno sing balaan nga espiritu.” Sa gahom sang balaan nga espiritu, nagbantala sila, kag sa isa ka adlaw, “mga tatlo ka libo ka kalag ang nadugang.”—Binuhatan 2:4, 16, 17, 41.

¹⁷ Sadtong makalilipay nga okasyon, ginbalikwat man ni Pedro ang Joel 2:30-32: “Magapakilala ako sing mga katingalahan sa mga langit kag sa duta, dugo kag kalayo kag mga haligi nga aso. Ang adlaw magabaylo sa kadudulman, kag ang bulan sa dugo, sa wala pa mag-abot ang daku kag makakulugmat nga adlaw ni Jehova. Kag mahanabo nga ang bisan sin-o nga magtawag sang ngalan ni Jehova maluwas.” Yadtong mga pulong natuman sa bahin lamang sang ginlaglag ang Jerusalem sang 70 C.E.

18. San-o nagsugod sa pagkahanabo ang daku pa nga katumanan sang Joel 2:​28, 29?

¹⁸ Apang, may dugang pa nga aplikasyon ang Joel 2:28-32. Sa pagkamatuod, ining tagna may talalupangdon nga katumanan sugod sang Septiembre 1919. Sadtong tion isa ka indi malipatan nga kombension sang katawhan ni Jehova ang ginhiwat sa Cedar Point, Ohio, E.U.A. Ang espiritu sang Dios maathag nga ginpakita, kag ang iya hinaplas nga mga alagad napahulag nga sugdan ang bug-os globo nga pagpanaksi nga nagapadayon tubtob karon. Daw ano ka daku nga pagsangkad ang resulta! Ang kapin sa 7,000 nga nagtambong sa sadtong kombension sa Cedar Point nakalab-ot na sa kabilugan nga 10,650,158 nga nagtambong sa Memoryal sang kamatayon ni Jesus sang Marso 30, 1991. Sa sini, 8,850 lamang ang nagapakilala subong hinaplas nga mga Cristiano. Daw ano ka daku ang kalipay nila sini tanan nga makita ang bug-os globo nga bunga nga ginpahanabo sang dinamiko nga espiritu ni Jehova!—Isaias 40:29, 31.

19. Bangod sang pagkalapit sang adlaw ni Jehova, ano dapat ang mangin panimuot sang tagsatagsa sa aton?

¹⁹ Sa unhan lamang amo ‘ang pag-abot sang daku kag makakulugmat nga adlaw ni Jehova’ nga magahapay sa sistema sang mga butang ni Satanas. (Joel 2:31) Sing makalilipay, “ang bisan sin-o nga magpanawag sa ngalan ni Jehova maluwas.” (Binuhatan 2:21) Paano nga subong? Si apostol Pedro nagasugid sa aton nga ang “adlaw ni Jehova magaabot subong sang makawat” kag nagadugang pa: “Sanglit ining tanan nga butang tunawon sa among bagay, ano bala nga sari sang mga tawo dapat mangin amo kamo sa balaan nga mga buhat sang paggawi kag mga buhat sang diosnon nga debosyon, nga nagahulat kag nagadumdom gid sang pag-abot sang adlaw ni Jehova.” Ginatandaan nga ang adlaw ni Jehova malapit na, malipay man kita sa pagtan-aw sang katumanan sang ginasaad ni Jehova nga “bag-ong mga langit kag bag-ong duta.”—2 Pedro 3:10-13.

[Footnote]

Mapaathag Mo Bala?

◻ Ano “ang adlaw ni Jehova”?

◻ Paano anihon ‘ang ubas sang duta,’ kag ngaa?

◻ Sa anong paagi ginsalakay sang kalalat-an sang mga apan ang Cristiandad sugod sang 1919?

◻ Paano ang espiritu ni Jehova ginpasagahay sa iya katawhan sang 33 C.E., kag sa liwat sang 1919?