Report sang mga Manugbantala sang Ginharian

Ang Kamatuoran sang Biblia Naghilway sa Isa ka Madre sa Bolivia

MADAMONG bunayag sing tagipusuon nga tawo ang nagapalagyo gikan sa butig nga relihion, nagatuon sang kamatuoran sang Biblia, kag nagasimba kay Jehova, ang matuod nga Dios. Kapin sa 7,600 ang naghimo sing amo sina sa Bolivia, lakip ang isa ka madre.

Sang nuebe anyos pa lamang sia, si M—— una nga nakapakigsugilanon sa isa ka Saksi ni Jehova. Sia ang nagguwa sa ganhaan sang ang Saksi nagduaw sa iya puluy-an, kag sa nahauna nga tion, nabatian niya nga ginsambit ang ngalan sang Dios, nga si Jehova. Wala niya ini malipati sa mga tinuig.

Sanglit sia lamang ang babayi sa pamilya, ginpamat-od nga dapat sia magmadre. “Daku gid nga kalipay ang nabatyagan ko nga maalagad ang Dios—sa dimagkubos, amo sina ang paghunahuna ko,” siling ni M——. Apang nagsala sia sang nakita niya ang inhustisya kag pagkamaynadampigan nga ginahimo sa kombento. Sia nagsiling: “Ayhan indi ko gid malipatan yadtong pagpakig-away sa kapung-aw kag yadtong pisikal kag espirituwal nga mga pagbunal nga tuman kasakit, nga bangod sini gintamod ko ang Dios, indi subong Isa nga may gugma, kundi subong Isa nga nagasilot nga wala sing kaluoy.”

Sia nagapadayon: “Sugod sang nagmadre ako, wala ko makita ang ngalan nga Jehova sa Biblia. ‘Yahweh’ lamang ang nakita ko, kag naligban ako sa sina. Isa ka adlaw nagguwa ako agod pangitaon ang mga tawo nga nagahambal tuhoy kay Jehova, apang wala ko sila makita.

“Nagligad ang panahon, kag isa ka adlaw sang nagalakat ako pauli sa balay sang akon pamilya, nakita ko ang karatula, ‘Kingdom Hall of Jehovah’s Witnesses.’ Luyag ko sila silingan nga butig nga mga manalagna sila, apang wala sing tawo. Nagbalik ako sang Domingo. Nagamiting na sadto, kag madamo ang daw nakibot nga makita ang isa nga nagasuksok sang panapton sang madre nga nagtambong. Pagkatapos sang miting, gintinguhaan ko nga maglakat dayon. Apang, gintamyaw ako sang isa ka Saksi, gani ginpamangkot ko sia, ‘Ngaa ginapasipalahan ninyo ang Isa nga Balaan paagi sa pagdala sina nga ngalan?’ Ang akon pamangkot nagdul-ong sa isa ka paghambalanay sa Biblia, kag naghimo ako sing kahimusan nga duawon niya ako sa amon balay. Gintabog sia sang akon mga ginikanan. Apang, nagkit-anay kami liwat, duha ka bulan sang ulihi, kag gin-agda niya ako sa iya balay para sa isa ka pagtuon sa Biblia. Nanamian gid ako sa impormasyon nga ginpakita niya sa akon, nagapamatuod nga ang mga Cristiano dapat maggamit sang ngalan sang Dios. Ina nga pamatuod naghatag sa akon sang kinahanglanon nga kusog agod sikwayon ang tanan nga walay pulos nga mga butang nga gintudlo sa akon subong isa ka madre.

“Madamo ako sing madumduman nahanungod sa akon kabuhi sa kombento. Halimbawa, kis-a kinahanglan ko ang dugang nga kalan-on. Gani nagsulat ako kag nangayo sa akon mga ginikanan nga padalhan nila ako sini, wala makahibalo nga ang mga sulat ginabasa gali sa kombento. Pagkadason nga kinaon, madamo nga tinapay kag jelly ang ginbutang sa akon atubangan, kag ginpilit ako nga ubuson ini. Karon sobra katama ang akon kalan-on. Ginsugid ko ini sa akon mga abyan, kag ang isa nagpanugda nga dugmukon ko kuno ang tinapay nga indi ko maubos kag laptahon ini sa salog. Sang ginhimo ko ina, gilayon ako nga ginsabnit sang isa ka madre kag gintikwang sa salog, kag matigdas nga nagsugo nga tinluan ko ang bug-os nga salog paagi sa pagdilap sini. Daku ang hulot. Samtang ginatuman ko ang sugo, nabatian ko ang inutoy-utoy kag kinadlaw—wala gid sing kaluoy nga ginpakita.

“Nakita ko karon kon daw ano gid katahom ang mahilway gikan sa tanan sina. Subong sang mapaabot, ini nga kahilwayan nagkinahanglan sing mga sakripisyo. Una, gintabog ako sang akon amay sa balay. Apang, antes magguwa sa kombento, may pribilehiyo ako nga buligan ang iban nga lamharon nga mga madre nga mahibaluan ang kamatuoran. Nalipay ako sa pagsiling nga ang iban sa amon nagdedikar sang amon kabuhi kay Jehova nga Dios!

“Sang nagguwa na ako sa kombento, indi mahangpan sang akon amay kon ngaa wala ko pagbatuna ang daku sing suweldo apang nagaubos sang tion nga mga obra. Apang, kinahanglan ko ang dugang nga tion para maalagad ang Dios. Nagaalagad ako karon subong isa ka regular payunir, nga may dimasibud apang makapaladya gid nga kabuhi. Kag sa daku ko nga kalipay, ang akon iloy kag mga magulang nga lalaki nagbuylog sa akon sa pag-alagad kay Jehova.”

Sa pagkamatuod, ang kamatuoran sang Biblia nagahilway sa isa gikan sa sistema sang butig nga relihion sining kalibutan, kag nagadala ini sing mapinadayunon nga kasadya kag kalipay.—Juan 8:32.