Ang Pag-asawahay Lamang Bala ang Yabi sang Kalipay?

“Hilway sia pagpamana sang buot niya, lamang sa Ginuo. Apang malipayon pa sia kon magpadayon subong nga amo sia.”—1 CORINTO 7:39, 40.

1. Paano ginalaragway sang Kasulatan si Jehova, kag ano ang ginhimo niya para sa iya mga tinuga?

SI Jehova “malipayon nga Dios.” (1 Timoteo 1:11) Subong Bugana nga Manug-aman sang “tagsa ka maayong hatag kag dulot nga himpit,” ginahatag niya sa iya tanan intelihente nga mga tinuga—tawhanon kag espirituhanon—kon ano gid ang ginakinahanglan nila agod magmalipayon sa pag-alagad sa iya. (Santiago 1:17) Bangod sina, ang pispis nga nagaamba, ang nagadugsing nga totoy, ukon ang palahampang nga dolphin tanan nagapamatuod nga gintuga ni Jehova ang mga sapat agod magkabuhi sing malipayon sa ila nagakaigo nga mga puluy-an. Nagsiling pa gani sing mabinalaybayon ang salmista nga “ang kakahuyan ni Jehova puno sang hun-og, ang mga sedro sang Libano nga gintanum niya.”—Salmo 104:16.

2. (a) Ano ang nagapakita nga si Jesus nakasapo sing kalipay sa paghimo sang kabubut-on sang iya Amay? (b) Ano ang mga rason nga nagkalipay ang mga disipulo ni Jesus?

² Si Jesucristo ‘nagadala sang larawan gid sang kinaugali sang Dios.’ (Hebreo 1:3) Indi makakilibot, nian, nga si Jesus dapat tawgon nga “malipayon kag isa lamang nga Makagagahom.” (1 Timoteo 6:15) Nagahatag sia sa aton sing matahom nga halimbawa sa kon paano ang paghimo sang kabubut-on ni Jehova mangin labi nga makaalayaw sang sa kalan-on, nagahatag sing bug-os nga kalipay. Ginapakita man ni Jesus sa aton nga may kalipay kon magpanghikot nga may kahadlok sa Dios, nga amo, upod ang bug-os nga pagtahod kag nagakaigo nga kahadlok nga indi Sia mapahamut-an. (Salmo 40:8; Isaias 11:3; Juan 4:34) Sang ang 70 ka disipulo nagbalik nga “may kalipay” pagkatapos sang paglakbay nga nagabantala sang Ginharian, si Jesus mismo “nagkalipay sa balaan nga espiritu.” Sa tapos niya mapabutyag ang iya kalipay sa iya Amay sa pangamuyo, nagliso sia sa iya mga disipulo kag nagsiling: “Malipayon ang mga mata nga nakakita sang mga butang nga inyo nakita. Kay nagasiling ako sa inyo, Madamo nga manalagna kag mga hari ang naghandum sa pagtan-aw sang inyo ginatan-aw kag wala makakita sa ila, kag sa pagpamati sang inyo ginapamatian kag wala makabati sa ila.”—Lucas 10:17-24.

Mga Rason sa Pagkalipay

3. Ano ang iban nga rason sa pagkalipay?

³ Indi bala dapat malipay ang aton mga mata nga matan-aw ang mga butang nga nakita naton bilang katumanan sang Pulong kag mga katuyuan ni Jehova sa sining tion sang katapusan? Indi bala kita dapat magkalipay sing daku nga mahangpan ang mga tagna nga wala anay mahangpi sang matutom nga mga manalagna kag mga hari subong nanday Isaias, Daniel, kag David? Wala bala kita malipay nga maalagad ang malipayon nga Dios, nga si Jehova, sa idalom sang pagpanguna sang malipayon nga Makagagahom, ang aton Hari nga si Jesucristo? Siempre huo!

4, 5. (a) Agod magpabilin nga malipayon sa pag-alagad kay Jehova, ano ang dapat naton likawan? (b) Ano ang pila ka butang nga nagaamot sa kalipay, kag anong pamangkot ang ginapautwas sini?

⁴ Apang, kon luyag naton magpabilin nga malipayon sa pag-alagad sa Dios, indi naton dapat ipasad ang aton pangunang mga kinahanglanon para sa kalipay sa kalibutanon nga mga ideya. Madali ini nga magapagumon sang aton hunahuna bangod nagalakip ini sang materyal nga manggad, pakitakita nga estilo sang pagkabuhi, kag kaanggid. Ang “kalipay” nga napasad sa sinang mga butang umalagi lamang, kay ining kalibutan magataliwan.—1 Juan 2:15-17.

⁵ Ang kalabanan nga dedikado nga mga alagad ni Jehova nakahibalo nga ang pagtigayon sing kalibutanon nga mga tulumuron wala nagadala sing matuod nga kalipay. Ang aton langitnon nga Amay lamang ang nagahatag sing espirituwal kag materyal nga mga butang nga nagaamot sa matuod nga kalipay sang iya mga alagad. Nagapasalamat gid kita sing daku tungod sa espirituwal nga pagkaon nga ginahatag niya sa aton paagi sa “matutom kag mainandamon nga ulipon”! (Mateo 24:45-47) Nagapasalamat man kita tungod sa pisikal nga pagkaon kag iban pa nga materyal nga mga butang nga ginabaton naton gikan sa mahigugmaon nga kamot sang Dios. Nian, yara man ang matahom nga dulot sang pag-asawahay kag ang may kaangtanan nga mga kalipay sang pamilya nga pagkabuhi. Indi katingalahan nga ang tinagipusuon nga handum ni Noemi para sa iya nabalo nga umagad nga mga babayi ginpabutyag sa sining mga pulong: “Kabay nga si Jehova magahatag sing dulot sa inyo, kag makakita sing pahuway ang tagsa sa inyo sa balay sang iya bana.” (Rut 1:9) Gani ang pag-asawahay isa ka yabi nga magabukas sang ganhaan padulong sa daku nga kalipay. Apang ang pag-asawahay lamang bala ang yabi sa pagbukas sang gawang padulong sa malipayon nga pagkabuhi? Ang mga pamatan-on labi na nga dapat mag-usisa sing hanuot kon bala amo gid ini.

6. Suno sa Genesis, ano ang pangunang katuyuan sang kahimusan sa pag-asawahay?

⁶ Nagasugid sang ginhalinan sang pag-asawahay, ang Biblia nagasiling: “Ang Dios nagtuga sang tawo sa iya kaugalingon nga dagway, sa dagway sang Dios gintuga niya sia; lalaki kag babayi gintuga niya sila. Kag ang Dios nagpakamaayo sa ila kag ang Dios nagsiling sa ila: ‘Magmabungahon kag magbuad kag magtugub sang duta kag magpakaagalon sa iya.’” (Genesis 1:​27, 28) Paagi sa pagtukod ni Jehova sang pag-asawahay, si Adan gingamit sa pagmuad sang tawhanon nga tinuga, busa nagapasangkad sang rasa sang tawo. Apang may labi pa sa sini sa pag-asawahay.

“Lamang sa Ginuo”

7. Anong kinahanglanon sa pag-asawahay ang ginpanikasugan sing daku sang isa ka matutom nga patriarka nga matuman?

⁷ Sanglit si Jehova nga Dios ang Ginhalinan sang pag-asawahay, mapaabot naton nga magahimo sia sing mga pagsulundan sa pag-asawahay nga magaresulta sa kalipay sang iya mga alagad. Sa panahon sang mga patriarka, ang pagminyo sa mga wala nagasimba kay Jehova makusog nga ginadumili. Ginpasumpa ni Abraham ang iya alagad nga si Eliezer kay Jehova nga indi sia magakuha sing asawa para sa anak sang patriarka nga si Isaac gikan sa mga Canaanhon. Naglakbay sing malawig si Eliezer kag mahalungon nga ginsunod ang sugo ni Abraham agod makakita sing ‘babayi nga ginpat-od ni Jehova nga sa anak sang iya agalon.’ (Genesis 24:3, 44) Gani ginpangasawa ni Isaac si Rebeca. Sang ang anak nila nga si Esau nagpili sing mga asawa gikan sa paganong mga Hethanon, ining mga babayi “nangin kapaitan sa espiritu ni Isaac kag ni Rebeca.”—Genesis 26:34, 35; 27:46; 28:1, 8.

8. Anong pagdumili ang ginhatag tuhoy sa pag-asawahay sang Kasuguan nga katipan, kag ngaa?

⁸ Sa idalom sang Kasuguan nga katipan, ang pagminyo sa mga lalaki ukon mga babayi gikan sa ispisipiko nga Canaanhon nga mga pungsod gindumili. Si Jehova nagsugo sa iya katawhan: “Dili ka magpangasawa sa ila. Dili ka maghatag sang imo anak nga babayi sa iya anak nga lalaki, kag dili ka magkuha sang iya anak nga babayi nga sa imo anak nga lalaki. Kay patalikdon niya ang imo anak gikan sa pagsunod sa akon, agod nga mag-alagad sila sa iban nga mga dios; sa amo ang kasingkal ni Jehova magadabdab batok sa imo.”—Deuteronomio 7:3, 4.

9. Anong laygay tuhoy sa pag-asawahay ang ginahatag sang Biblia sa mga Cristiano?

⁹ Indi makakilibot nga ang kaanggid nga pagdumili sa pagminyo sa mga wala nagasimba kay Jehova dapat iaplikar sa sulod sang Cristianong kongregasyon. Si apostol Pablo naglaygay sa iya mga masigkatumuluo: “Dili kamo magpagota sing linibagon upod sa mga dimatinuuhon. Kay ano bala ang pag-updanay sang pagkamatarong kag kalautan? Ukon ano bala ang paghiambit sang kapawa sa kadudulman? Ano bala ang pag-ugyon ni Cristo kay Belial? Ukon ano bala ang kalabtanan sang matinuuhon sa mga dimatinuuhon?” (2 Corinto 6:14, 15) Ina nga laygay naaplikar sa lainlain nga paagi kag pat-od gid nga maaplikar sa pag-asawahay. Ang maathag nga sugo ni Pablo sa tanan nga dedikado nga alagad ni Jehova amo nga dapat nila binagbinagon ang pagminyo sa isa “kon nahiusa lamang sia sa Ginuo.”—1 Corinto 7:39, footnote.

Indi Makaminyo “sa Ginuo”

10. Ano ang ginahimo sang madamong diminyo nga Cristiano, kag anong mga pamangkot ang nagautwas?

¹⁰ Madamong diminyo nga Cristiano ang nagpili sa pagsunod sang halimbawa ni Jesucristo paagi sa pagpalambo sang dulot sang pagkadiminyo. Nian sa liwat, bangod indi makakita sa karon sing mahinadlukon sa Dios nga tiayon kag busa magminyo “sa Ginuo,” madamong matutom nga Cristiano ang nagbutang sang ila pagsalig kay Jehova kag nagpabilin nga diminyo sa baylo nga magminyo sa isa ka ditumuluo. Ang espiritu sang Dios nagdala sa ila sang mga bunga subong sang kalipay, paghidait, pagtuo, kag pagpugong sa kaugalingon, naghimo sa ila nga mahuptan ang putli nga pagkadiminyo. (Galacia 5:22, 23) Ang iban sang madinalag-on nga nakasugata sini nga pagtilaw sang debosyon sa Dios amo ang madamo naton nga Cristianong utod nga babayi, nga sa ila may daku gid kita nga pagtahod. Sa lainlain nga kadutaan, mas madamo sila sa mga kauturan nga lalaki kag gani may daku nga bahin sa pagbantala nga hilikuton. Sa pagkamatuod, “si Jehova nagahatag sang pulong; ang mga babayi nga nagabantala sang mga balita daku nga kadam-an.” (Salmo 68:11) Sa aktuwal, madamong diminyo nga mga alagad sang Dios sang duha ka sekso ang nagahupot sang integridad bangod ‘nagasalig [sila] kay Jehova sa bug-os nila nga tagipusuon, kag ginatadlong niya ang ila dalanon.’ (Hulubaton 3:5, 6) Apang yadtong indi makaminyo sa karon “sa Ginuo” pat-od bala nga mangin dimalipayon?

11. Ano ang ginapasalig sa mga Cristiano nga nagapabilin nga diminyo tungod sang pagtahod sa mga prinsipio sang Biblia?

¹¹ Dumdumon naton nga mga Saksi kita sang malipayon nga Dios, si Jehova, nga nagaalagad sa idalom sang malipayon nga Makagagahom, nga si Jesucristo. Gani kon ang aton pagtahod sa mga pagdumili nga maathag nga ginahatag sa Biblia magapahulag sa aton nga magpabilin nga diminyo bangod nga indi makakita sing tiayon “sa Ginuo,” makatarunganon bala ang maghunahuna nga pabay-an kita sang Dios kag ni Cristo nga dimalipayon? Indi gid. Gani, dapat kita maghinakop nga posible mangin malipayon subong mga Cristiano samtang diminyo. Si Jehova tunay nga makapahalipay sa aton minyo man kita ukon diminyo.

Ang Yabi sang Matuod nga Kalipay

12. Ano ang ginapakita sang natabo sa dimatinumanon nga mga anghel tuhoy sa pag-asawahay?

¹² Ang pag-asawahay indi lamang ang yabi sang kalipay para sa tanan nga alagad sang Dios. Binagbinaga, subong halimbawa, ang mga anghel. Sa wala pa ang Anaw, ang iban nga mga anghel nagpalambo sang mga handum nga dikinaugali para sa espirituhanon nga mga tinuga, nangin dikontento nga indi sila makaminyo, kag nagmateryalisar sa undanon nga mga lawas agod mangasawa. Bangod ining mga anghel “nagbiya sang ila nagakaigo nga puluy-an,” “gintigana [sila sang Dios] sa mga gapus nga dayon sa mangitongito nga kadudulman tubtob sa paghukom sang daku nga adlaw.” (Judas 6; Genesis 6:1, 2) Sing maathag, wala gid ginplano sang Dios nga ang mga anghel magapangasawa. Gani ang pag-asawahay indi lamang ang yabi sang ila kalipay.

13. Ngaa ang balaan nga mga anghel malipayon, kag ano ang ginapakita sini para sa tanan nga mga alagad sang Dios?

¹³ Apang, ang matutom nga mga anghel malipayon. Ginpasad ni Jehova ang mga sadsaran sang duta “sang nag-ambahan sing malipayon ang kabituunan sang kaagahon kag naghinugyaw sing tingob ang [angheliko] nga mga anak sang Dios.” (Job 38:7, The New Jerusalem Bible) Ngaa malipayon ang balaan nga mga anghel? Bangod yara sila pirme sa atubangan ni Jehova nga Dios, “nga nagapamati sa tingog sang iya pulong” agod tumanon ini. Nalipay sila ‘sa paghimo sang iya nahamut-an.’ (Salmo 103:20, 21, footnote) Huo, ang kalipay sang balaan nga mga anghel nagahalin sa pag-alagad kay Jehova sing matutom. Amo man ina ang yabi sang matuod nga kalipay para sa mga tawo. Bangod sina, ang minyo nga hinaplas nga mga Cristiano nga malipayon nga nagaalagad sa Dios sa karon indi magaminyo kon banhawon pakadto sa langitnon nga kabuhi, apang mangin malipayon sila subong espirituhanon nga mga tinuga nga nagahimo sang kabubut-on sang Dios. Minyo man ukon diminyo, kon amo, ang tanan nga matutom nga alagad ni Jehova sarang mangin malipayon bangod ang matuod nga sadsaran sang kalipay amo ang matutom nga pag-alagad sa Manunuga.

“Maayo Pa sa mga Anak nga Lalaki kag sa mga Anak nga Babayi”

14. Anong matagnaon nga saad ang ginhatag sa diosnon nga mga eunuco sa dumaan nga Israel, kag ngaa daw makatilingala ini?

¹⁴ Bisan pa ang isa ka matutom nga Cristiano indi magaminyo, ginapasalig sang Dios ang iya kalipay. Sarang matigayon ang pagpalig-on gikan sa sining pinamulong nga matagnaon nga ginpatuhoy sa mga eunuco sa Israel sang una: “Amo ini ang ginasiling ni Jehova sa mga eunuco nga nagabantay sang akon mga inugpahuway kag nga nagapili sang mga butang nga nagapahamuot sa akon kag nagahupot sing malig-on sang akon katipan: ‘Sa ila magahatag ako sa akon balay kag sa sulod sang akon mga kuta sing handumanan kag ngalan nga maayo pa sa mga anak nga lalaki kag sa mga anak nga babayi. Hatagan ko sila sing ngalan nga dayon nga indi mawala.’” (Isaias 56:4, 5) Ang isa mahimo magapaabot nga saaran sila sing asawa kag kabataan nga magapadayon sang ila ngalan. Apang ginsaaran sila sing “maayo pa sa mga anak nga lalaki kag sa mga anak nga babayi”—ang ngalan nga dayon sa balay ni Jehova.

15. Ano ang mahimo isiling nahanungod sa katumanan sang Isaias 56:​4, 5?

¹⁵ Kon ining mga eunuco pagakabigon subong matagnaon nga laragway nga nagahilabot sa “Israel sang Dios,” nagalaragway sila sa mga hinaplas nga nagabaton sing mapinadayunon nga duog sa sulod sang espirituwal nga balay, ukon templo, sang Dios. (Galacia 6:16) Sa walay duhaduha, ining tagna may literal nga aplikasyon sa diosnon nga mga eunuco sang dumaan nga Israel nga ginbanhaw. Kon batunon nila ang halad-gawad ni Cristo kag padayon nga magapili kon ano ang nahamut-an ni Jehova, magabaton sila sing “ngalan nga dayon” sa bag-ong kalibutan sang Dios. Maaplikar man ini sa “iban nga mga karnero” sa sining tion sang katapusan nga nagpaiway sang pag-asawahay kag pagkaginikanan agod ihugod ang ila kaugalingon sing labi pa sa pag-alagad kay Jehova. (Juan 10:16) Ang iban sa ila mahimo mapatay nga wala makaminyo kag walay anak. Apang kon sila matutom, sa pagkabanhaw magabaton sila sing “maayo pa sa mga anak nga lalaki kag sa mga anak nga babayi”—ang ngalan “nga indi mawala” sa bag-ong sistema sang mga butang.

Ang Pag-asawahay Indi Lamang ang Yabi sang Kalipay

16. Ngaa masiling nga ang pag-asawahay wala pirme nagadala sing kalipay?

¹⁶ Ang iban nagabatyag nga ang kalipay pirme may kaangtanan sa pag-asawahay. Apang, dapat batunon nga bisan sa tunga sang mga alagad ni Jehova karon, ang pag-asawahay wala pirme nagadala sing kalipay. Nagalubad ini sang iban nga mga problema apang masunson ginatunaan sang iban nga mas mabudlay atubangon sang sa ginaagom sang mga diminyo. Si Pablo nagsiling nga ang pag-asawahay nagadala sing ‘kapipit-an sa unod.’ (1 Corinto 7:28) May tion nga ang minyo nga tawo “nagahimud-os” ukon “nabahinbahin.” Masunson niya nasapwan nga mabudlay ang “pag-alagad sa Ginuo nga wala sing upang.”—1 Corinto 7:33-35.

17, 18. (a) Ano ang ginreport sang iban nga nagalakbay nga mga manugtatap? (b) Ano ang ginlaygay ni Pablo, kag ngaa mapuslanon nga sundon ini?

¹⁷ Ang pag-asawahay kag pagkadiminyo lunsay mga dulot halin sa Dios. (Rut 1:9; Mateo 19:10-12) Apang, agod magmadinalag-on sa sini, ang mapangamuyuon nga panghunahuna importante. Ang nagalakbay nga mga manugtatap nagareport nga madamong Saksi ang nagaminyo sing bata pa, masunson nangin mga ginikanan nga indi pa handa sa pag-abaga sina nga responsabilidad. Ang iban sining pag-asawahay naguba. Nalubad sang iban nga mag-asawa ang ila mga problema, apang ang ila pag-asawahay wala maghatag sa ila sing kalipay. Subong sang ginsulat sang Ingles nga dramatista nga si William Congreve, ang mga nagaminyo sing padasudaso “magahinulsol sing madugay.”

¹⁸ Ang mga manugtatap sa sirkito nagareport man nga ang iban nga lamharon nga mga utod nga lalaki nag-untat sa pag-aplay para sa pag-alagad sa Bethel ukon sa pagboluntaryo para sa Ministerial Train­ing School bangod sang kinahanglanon nga magpabilin anay nga diminyo. Apang si Pablo nagalaygay nga indi anay magminyo sa wala pa ang “isa makaligad sa masingkal nga kailigbon sang pagkapamatan-on,” kon sayuron, maghulat tubtob mag-ugdaw ang una nga kasingkal sa sekso. (1 Corinto 7:36-38) Ang tinuig nga ginhinguyang sa pagkabuhi subong diminyo nga adulto nagahatag sa isa sing hamili nga eksperiensia kag paghangop, nagabutang sa iya sa mas maayo nga tindog sa pagpili sing tiayon ukon sa paghimo sing nabinagbinag sing maayo nga desisyon nga magpabilin nga diminyo.

19. Paano naton mahimo tamdon ang mga butang kon indi gid naton kinahanglan ang magminyo?

¹⁹ Ang iban sa aton nakaligad na sa kasingkal sang kailigbon sang pagkapamatan-on, kag sa makusog nga silabo para sa seksuwal nga kasuod. Mahimo naton hunahunaon kon kaisa ang mga pagpakamaayo sang pag-asawahay apang sa aktuwal may dulot sang pagkadiminyo. Tan-awon ni Jehova nga ginaalagad naton sia sing epektibo sa diminyo nga kahimtangan kag wala gid nagakinahanglan sing pag-asawahay, nga mahimo nagakinahanglan nga bayaan naton ang pila ka pribilehiyo sa pag-alagad sa iya. Kon ang pag-asawahay indi gid man personal nga kinahanglanon kag wala kita pagpakamaayuha sing isa ka tiayon, ang Dios mahimo nga may ginatigana para sa aton. Busa magpakita kita sing pagtuo nga iaman niya kon ano ang aton ginakinahanglan. Ang labing daku nga kalipay nagaresulta gikan sa mapainubuson nga pagbaton sa kon ano ang kabubut-on sang Dios para sa aton, subong nga ang Judiyong mga utod nga lalaki ‘naghipos kag naghimaya sa Dios’ sang nahibaluan nila nga ginpatawad niya ang mga Gentil agod makatigayon sila sing kabuhi.—Binuhatan 11:1-18.

20. (a) Anong laygay tuhoy sa pagkadiminyo ang ginahatag diri sa lamharon nga mga Cristiano? (b) Anong sadsaran nga punto nahanungod sa kalipay ang nagapabilin nga matuod?

²⁰ Gani, nian, ang pag-asawahay sarang mangin yabi sang kalipay, apang sarang man ini magbukas sang ganhaan sa mga problema. Isa ka butang ang pat-od: Ang pag-asawahay indi lamang ang paagi sa pagsapo sing kalipay. Nabinagbinag ang tanan, maalamon nian, labi na para sa lamharon nga mga Cristiano, ang tinguhaan nga paligaron ang madamong tinuig sang pagkadiminyo. Ina nga tinuig sarang magamit sing maayo sa pag-alagad kay Jehova kag sa pag-uswag sa espirituwal. Apang, bisan ano man ang edad ukon espirituwal nga pag-uswag, ining sadsaran nga punto nagapabilin nga matuod para sa tanan nga bug-os nga dedikado sa Dios: Ang matuod nga kalipay masapwan sa matutom nga pag-alagad sa Dios.

Paano Ka Magasabat?

◻ Ngaa ang mga alagad ni Jehova malipayon?

◻ Ngaa ang pag-asawahay indi ang yabi sa labing daku nga kalipay?

◻ Sa pagpili sing tiayon sa pag-asawahay, ano ang ginakinahanglan sa katawhan ni Jehova?

◻ Ngaa makatarunganon patihan nga ang mga Cristiano nga nagapabilin nga diminyo sarang mangin malipayon?

◻ Ano ang dapat batunon nahanungod sa pag-asawahay kag sa kalipay?