“Isuklob ang Bug-os nga Hinganib Gikan sa Dios”

ANG mga Cristiano nagasuklob sing hinganib? Ngaa magasuklob sila sinang pang-inaway nga kagamitan? Indi bala nga mga nagahigugma sila sang paghidait? (2 Timoteo 2:24) Huo. Apang, ang tanan nga matuod nga Cristiano nadalahig sa isa ka inaway—isa nga ginapanikasugan nila, indi agod makapatay, kundi agod madaug.

Kon si Satanas wala magrebelde, kuntani indi na kinahanglan ina nga inaway. Apang nagrebelde sia, kag ginlimbungan niya sanday Adan kag Eva nga magbuylog sa pagrebelde niya. Kutob sadto ang sistema sang kalibutan nga naglambo yara sa gahom sang “malauton,” si Satanas nga Yawa. (1 Juan 5:19) Ang mga nagapasakop sa makatarunganon nga Soberano, si Jehova, dapat magabato sa impluwensia sang kalibutan kag sang gumalahom sini. Dapat sila makig-away tungod sa ila espirituwal nga pagkabuhi. Bangod sini, ang mga Cristiano ginlaygayan: “Isuklob ang bug-os nga hinganib gikan sa Dios agod nga sarang kamo makabatok sa mga daya sang Yawa.”—Efeso 6:11.

Ang Hinganib

Talupangda nga kinahanglan naton ang “bug-os nga hinganib gikan sa Dios” agod maamligan kita sing nagakaigo. Tan-awon naton, nian, ang tagsa ka bahin sining hinganib subong sang ginlaragway ni apostol Pablo kag himuon ang bunayag nga pagbinagbinag sa aton kaugalingon agod hibaluon kon bala nasangkapan kita sing bug-os para sa espirituwal nga inaway.—Efeso 6:14-17.

“Busa magtindog nga nawagkusan ang inyo mga hawak sing kamatuoran.” (Efeso 6:14a) Sang panahon sang Biblia ang mga soldado nagasuksok sing panit nga paha nga kinse sentimetros kalapad. Ining wagkus nagaamlig sa hawak. Kon ginahugot sang isa ka soldado ang iya wagkus, nagakahulugan ini nga handa sia para sa inaway.

Daw ano ka nagakaigo, nian, nga ang balaan nga kamatuoran ginpaanggid sa wagkus sang soldado! Nagailustrar ini sing maayo nga dapat naton huptan nga tuman kasuod sa aton ang Pulong sang Dios sang kamatuoran, subong nga daw ginawagkusan sini. Dapat naton binagbinagon sing maayo ang kaundan nga panghunahuna sang Pulong sang Dios. Magaamlig ini sa aton nga indi mapatalang sang mga kabutigan kag mga daya. Dugang pa, ang mga pinamulong sa bibig ni Jehova nagasakdag kag nagapabakod sa aton sa espirituwal kag nagapalig-on sang aton integridad.

“Nakasuklob sang limbutong sang pagkamatarong.” (Efeso 6:14b) Ang limbutong sang soldado nagaamlig sang importante nga organo sa lawas—ang tagipusuon. Sa aton hatag-Dios nga espirituwal nga hinganib, kon amo, ang pagkamatarong nagaamlig sang aton tagipusuon. Sing Makasulatanhon, ang tagipusuon isa ka nagakaigo nga simbulo sa kon ano kita sa sulod—ang aton mga balatyagon, mga panghunahuna, kag mga handum. Sanglit ang Biblia nagasiling man nga ang tagipusuon nahuyog sa malain, importante nga palambuon ang determinasyon nga magpabilin sa talaksan sang pagkamatarong ni Jehova. (Jeremias 17:9) Ang pagtuman sa Dios indi dapat isa ka salimpapaw nga pagpakitakita sa guwa kundi dapat maghalin sa sulod. Nagakinahanglan ini nga palambuon naton ang makusog nga gugma sa pagkamatarong kag ang makusog man nga pagdumot sa pagkamalinapason. (Salmo 45:7) Busa ang aton tagipusuon pagaamligan.

“Nasukluban ang mga tiil sang pangaman sang maayong balita sang paghidait.” (Efeso 6:15) Ang imo tiil ginasukluban bala sa sining paagi? Ginadala ka bala nila sing tayuyon sa ministeryo sa latagon sa pagbantala sang maayong balita? Ginapanikasugan mo bala nga mapauswag ang kalidad sang imo pagbantala kag pagpanudlo nga mga hilikuton? Matuod, ang iban nga mga teritoryo wala nagabaton. Ang mga indibiduwal mahimo nga wala nagasapak, indi interesado, ukon nagapamatok. Apang paagi sa pagpadayon, ang mga Cristiano nagapalambo sang pagbatas, isa ka kinaiya nga nagahatag sing pangamlig batok sa mga pagsalakay ni Satanas. Bisan ginhingabot, si Pablo isa ka mapisan nga manugbantala, kag ginapalig-on kita nga ‘mangin mga manug-ilog niya, subong nga sia kay Cristo.’—1 Corinto 11:1.

Ang pagpabilin nga masako sa pagbantala sang Ginharian nga hilikuton nagapabakod sang aton pagsalig sa maayong balita. Dugang pa, nagatugot ini sa espiritu ni Jehova nga magpanghikot sa aton sa katumanan sang iya kabubut-on. Sa katunayan, ina nga buhat nagahimo sa aton nga mga masigkamanugpangabudlay sang mga anghel—bisan ni Jehova nga Dios mismo. (1 Corinto 3:9; Bugna 14:6) Kag ang ‘pagbugana sa buluhaton sang Ginuo’ nagahimo sa aton nga ‘malig-on, dimationg.’ (1 Corinto 15:58) Daw ano ka makatilingala nga pangamlig ang ginaaman sini!

“Nagagamit sang daku nga taming sang pagtuo.” (Efeso 6:16) Paagi sa daku nga taming, ang soldado sang una nagaamlig sang iya kaugalingon gikan sa sibat kag pana. Kon mapaslawan sia sa paggamit sang taming, mahimo nga mapilasan sia sing grabe ukon mapatay pa. Ang mga Cristiano nagaatubang sing mas makamamatay nga hinganiban—ang “nagadabadaba nga baslay sang malauton.” Nagalakip ini sang tanan nga paagi nga ginagamit ni Satanas agod paluyahon ang aton pagtuo kag patyon kita sa espirituwal. Nagalakip ini sang paghingabot, kabutigan, madaya nga mga pilosopiya sang kalibutan, materyalistiko nga mga ganyat, kag pagsulay nga maghimo sing imoralidad. Agod amligan kita batok sini tanan, kinahanglan naton ang daku nga taming. Wala sing bahin naton ang sarang mabilin nga maigo nga indi maano.

Si Abraham kag ang iya asawa, si Sara, may mabakod nga pagtuo. Sang pasado na sa edad sa pagpanganak, nagtuo sila sa saad sang Dios nga matawo sa ila ang isa ka binhi. Sang ulihi, ginpakita ni Abraham ang tumalagsahon nga pagtuo sang gintuman niya ang sugo nga ihalad si Isaac, ang iya bugtong nga anak kay Sara nga pinalangga. Ginpunggan ni Jehova ang kamot ni Abraham kag naghatag sing tal-us nga halad. Apang si Abraham handa sa pagtuman. Ngaa? Bangod may bug-os sia nga pagtuo nga si Jehova magabanhaw sang iya anak kag magatuman sang saad nga ginsaad sa iya.—Roma 4:16-21; Hebreo 11:11, 12, 17-19.

Si Moises may pagtuo man nga kinahanglan naton. Ginsikway niya ang manggad sang Egipto, nagpili nga mag-antos kaupod sang katawhan sang Dios. Ngaa? Bangod may pagtuo sia nga si Jehova nagaluntad kag magadala sing kaluwasan sa mga Israelinhon. Tuman kabakod sang pagtuo ni Moises sa bagay nga “nagbatas sia nga nagatan-aw sa Iya nga dimakita.”—Hebreo 11:6,24-27.

May kaanggid bala kita nga pagtuo kay Jehova? Ang aton kaangtanan kay Jehova tuman bala kasuod nga halos daw makita naton sia? Handa bala kita sa paghimo sing sakripisyo ukon sa pagbatas sing kabudlayan agod mahuptan ang aton kaangtanan sa Dios? May bug-os nga pagtuo bala kita kay Jehova? (Hebreo 11:1) Kon amo, ang nagadabadaba nga baslay ni Satanas indi magalapus sa aton taming sang pagtuo.

“Gamita ang pandong sang kaluwasan.” (Efeso 6:17a) Ang pandong sang soldado nagaamlig sang iya ulo kag busa sang iya utok—ang organo nga nagahituhog sang mga ugat kag sang panghunahuna. Ang Cristianong paglaum sa kaluwasan ginpaanggid sa pandong bangod nagaamlig ini sang hunahuna. Ang hunahuna sang isa ka Cristiano ginhimo nga bag-o paagi sa sibu nga ihibalo, apang natungod gihapon ini sa maluya kag dihimpit nga indibiduwal. (Roma 7:18; 12:2) Kon tugutan naton ang hunahuna sa paglingaw sa nagaguba sang pagtuo nga dimatinlo nga panghunahuna nga ginapatubas sang espiritu sining kalibutan, ang aton pagsalig sa kaluwasan magaugdaw kag mapatay sa ulihi. Sa pihak nga bahin, kon padayon naton nga ginalingaw ang aton panghunahuna sa makapabakod nga mga pulong sang Dios, ang aton pagtuo magapabilin nga masanag kag matin-aw. Ginahuptan mo bala nga hugot ang imo pandong sang kaluwasan?

“Ang espada sang espiritu, nga amo, ang pulong sang Dios.” (Efeso 6:17b) Ang hulubaton nga ang labing maayo nga pangapin amo ang pag-una sa pagpakig-away matuod sa Cristianong inaway. Samtang ang aton mga tiil, nga nasukluban sang maayong balita sang paghidait, nagadala sa aton sa mga ditumuluo, wala kita ginapabay-i nga wala sing hinganiban. Ang Pulong sang Dios, ang Biblia, nagapanghikot subong gamhanan nga espada nga nagalaslas sang espirituwal nga kabutigan kag sayop nga ideya kag nagabulig sa matarong sing tagipusuon nga mga indibiduwal sa pagsapo sang espirituwal nga kahilwayan.—Juan 8:31, 32.

Ginpakita ni Jesus ang gahom sining hinganiban sang, sa katunayan, nakig-away sia kay Satanas nga Yawa. Sang ginsulay sa kamingawan, ginpangapinan ni Jesus ang iya kaugalingon batok sa tatlo ka satanikong pagsalakay paagi sa paggamit sing epektibo sang Pulong sang Dios kag sa pagsiling: “Nasulat na.” (Mateo 4:1-11) Kon matun-an naton ang paggamit sining espada sing lantip, mabuligan naton ang mga malum-ok sa pagguwa sa gahom ni Satanas. Nian, ang mga gulang sa kongregasyon nagagamit man sang Pulong sang Dios sa pag-amlig sang panong gikan sa mga indibiduwal nga nagatinguha sa pagpaluya sang pagtuo sang mga maluya.​—⁠Binuhatan 20:28-30.

Ang kalantip sang soldado sa espada indi matigayon sing mahapos. Ang paghanas kag madugay, dedikado nga pag-ensayo ginakinahanglan agod magamit ini sing maayo. Sa kaanggid, sa espirituwal nga inaway nagakinahanglan sing madamo nga pagtuon kag tayuyon nga pag-ensayo sa ministeryo agod mangin lantip nga manuggamit sang Pulong sang Dios. Sing pat-od, panikasugan naton nga mangin lantip nga espirituwal nga mga manug-espada, sangkol sa ‘paggamit sing matadlong sang pulong sang kamatuoran.’—2 Timoteo 2:15.

Magpadayon sa Pangamuyo, Magtindog nga Malig-on

Ang tanan nga bahin sang aton espirituwal nga hinganib importante para sa paghupot sing integridad sa Dios. Apang paano naton padayon nga masuklob ini nga hinganib? Ang tayuyon nga pagtuon sa Biblia, paghanda sing abanse para sa Cristianong mga miting, kag nian pagpamati sing maayo kag pagpakigbahin sing aktibo sa sini magabulig sa aton nga pirme masuklob ang aton hinganib. (2 Timoteo 3:16; Hebreo 10:24, 25) Ang tayuyon kag makugi nga pag-alagad sa latagon upod ang maayong Cristianong pag-inupdanay magabulig man nga huptan ang aton espirituwal nga hinganib sa pagbato kag pagpangapin sa maayo nga kondisyon.—Hulubaton 13:20; Roma 15:15, 16; 1 Corinto 15:33.

Ang pagpalambo sang nagakaigo nga panimuot sa hunahuna importante man. Indi naton pagtugutan ang mga ganyat sining kalibutan sa pagtublag sa aton. Sa baylo, palambuon naton ang ‘simple nga mata.’ (Mateo 6:19-24) Bilang pag-ilog kay Jesucristo, dapat man kita magtuon sa paghigugma sang pagkamatarong kag sa pagdumot sang pagkamalinapason. (Hebreo 1:9) Ini tanan nagabulig sa aton sa pagpabilin nga ginasuklob ang aton hatag-Dios nga espirituwal nga hinganib.

Pagkatapos mahinun-anunan ang tagsa ka bahin sang espirituwal nga hinganib, si Pablo nagahinakop paagi sa pagsiling: “Magpangamuyo sa tanan nga tion sa espiritu, sa bug-os nga pangamuyo kag pag-ampo. Sa sining katuyuan magbantay sa bug-os nga pagpadayon nga nagaampo tungod sa tanan nga balaan.” (Efeso 6:18) Ang matutom nga mga soldado pirme nagakomunikar upod sa ulong-talatapan sang army kag nagatuman sang mga sugo. Subong Cristianong mga soldado, kinahanglan naton huptan ang pagpakig-angot sa aton Soberano, si Jehova nga Dios, paagi sa iya dakung “pangulo kag manugmando sa mga katawhan,” si Jesucristo. (Isaias 55:4) Sarang ini mahimo, indi paagi sa salimpapaw nga pangamuyo, kundi paagi sa tinagipusuon nga pagpangalaba nga nagapabanaag sang suod kag tudok nga debosyon kay Jehova. Paagi sa regular nga pagpakigsugilanon kay Jehova, nagabaton kita sing kusog kada adlaw sa pagsakdag sa aton sa inaway.

Si Jesus nagsiling: “Nadaug ko ang kalibutan.” (Juan 16:33) Luyag man ni Jehova nga magmadinalag-on kita. Samtang nagahilapit ang kamatayon ni apostol Pablo, nakasiling sia: “Nakapakig-away ako sang maayong pag-away, natapos ko ang dalaganon, natipigan ko ang pagtuo.” (2 Timoteo 4:7) Kabay nga mahimo man naton ang kaanggid nga ekspresyon sa bahin naton sa inaway. Kon luyag gid naton ini, aton ‘pamatukan ang mga daya sang Yawa’ paagi sa pagsuklob pirme sang bug-os nga hinganib gikan sa Dios.—Efeso 6:11.