Ginakahamut-an Bala sang Dios ang Pagpang-ayo Paagi sa Pagtuo?

“NAKITA naton ang makatilingala nga mga butang karon!” Huo, nahayanghag ang mga nakakita. Ang paralitiko gin-ayo sa atubangan sang ila mga mata. Siling sang nag-ayo sa tawo: “Tindog ka kag dalha ang imo higdaan kag magpauli sa imo balay.” Kag amo gid sina ang iya ginhimo! Indi na sia paralitiko. Indi katingalahan nga ang mga nakakita “naghimaya sa Dios”! (Lucas 5:18-26) Ining pagpang-ayo, nga ginhimo ni Jesucristo sang nagligad nga halos 2,000 ka tuig, maathag gid nga ginkahamut-an sang Dios.

Kamusta karon? Ang milagruso nga pagpang-ayo posible bala gihapon para sa mga indi na gid mahimo mabulong? Si Jesus naghimo sing mga milagro nga nagapang-ayo. Ang faith healers (mga manugpang-ayo paagi sa pagtuo) nagaangkon karon nga nagailog sa iya. Paano naton dapat tamdon ang ila mga pangangkon?

Ang faith healing (pagpang-ayo paagi sa pagtuo) ginasaysay subong “paagi sang pagbulong sa balatian paagi sa pangamuyo kag sa pagpakita sing pagtuo sa Dios.” Ang Encyclopædia Britannica nagasiling: “Ang maragtas sang pagpang-ayo paagi sa pagtuo sa Cristianismo nagsugod paagi sa makatilingala nga personal nga mga ministeryo ni Jesus kag sang mga apostoles.” Huo, si Jesus naghimo sing tumalagsahon nga pagpang-ayo. Ginahimo bala karon sang mga faith healer ang mga milagro nga ginhimo niya?

Pagtuo—Kinahanglanon Bala?

Suno sa Black’s Bible Dictionary, si Jesus “nagsambit [sang pagtuo] subong nahauna nga kinahanglanon para sa iya mga milagro sang pagpang-ayo.” Apang amo gid bala sina? Ginkinahanglan bala ni Jesus nga ang masakiton may pagtuo anay antes niya sia ayuhon? Indi ang sabat. Kinahanglan ang pagtuo sa bahin sang manugpang-ayo apang indi sa bahin sang masakiton. Sang isa ka okasyon wala maayo sang mga disipulo ni Jesus ang bata nga kuyapon. Gin-ayo ni Jesus ang bata kag pagkatapos sadto ginsilingan niya ang mga disipulo kon ngaa wala nila sia maayo. “Nagsabat sia sa ila: ‘Bangod sang inyo diutay nga pagtuo.’”—Mateo 17:14-20.

Suno sa Mateo 8:16, 17, “gin-ayo [ni Jesus] ang tanan nga nagamasakit.” Huo, ang mga tawo may pagtuo kay Jesus amo kon ngaa nagpalapit sila sa iya. (Mateo 8:13; 9:22, 29) Sa kalabanan nga okasyon dapat sila magkadto kag magpangabay antes niya sila ayuhon. Apang, wala ginkinahanglan ang pagtu-ad sing pagtuo para himuon ang milagro. Sang isa ka okasyon gin-ayo ni Jesus ang piang nga wala gani makakilala kon sin-o si Jesus. (Juan 5:5-9, 13) Sang gab-i nga gindakop sia, gin-uli ni Jesus ang dulunggan sang alagad sang mataas nga saserdote, bisan pa nga sia isa sa grupo sang mga kaaway ni Jesus nga nagkari sa pagdakop sa iya. (Lucas 22:50, 51) Sa pagkamatuod, kon kaisa, bisan ang patay ginbanhaw ni Jesus!—Lucas 8:54, 55; Juan 11:43,44.

Paano nahimo ni Jesus inang mga milagro? Bangod nagsalig sia sa balaan nga espiritu, ukon aktibo nga kusog, sang Dios. Amo ini ang nagapang-ayo, indi ang pagtuo sang masakiton. Kon basahon mo ang mga kasaysayan sa Mga Ebanghelyo, matalupangdan mo man nga ang mga pagpang-ayo ni Jesus ginhimo nga may diutay nga seremonya. Wala ini ginhimo sa paagi nga nagaganyat sing igtalupangod ukon nagahingalit sang emosyon. Isa pa, bisan ano man ang masakit, si Jesus wala gid mapaslawi. Pirme sia nagmadinalag-on, kag wala gid sia manukot sing bayad.​—⁠Mateo 15:30,31.

Modernong mga Pagpang-ayo Kaangay sang kay Jesus?

Ang balatian isa ka daku nga problema, kag kon mag-abot ini, natural nga nagapangita kita sing paumpaw. Apang, kamusta kon nagaistar kita sa isa ka lugar diin “ang mga tawo, labi na ang mga imol, ginakabig sang propesyonal nga mga manugbulong subong mga butang kag indi subong mga tawo”? Amo sini ang sitwasyon nga napanilagan sang isa ka doktor sa isa ka pungsod sa Latin-Amerika. Kag kamusta kon nagaistar kita sa isa ka lugar diin, subong sa sina man nga pungsod, ‘40 porsiento lamang sang mga doktor ang kalipikado sa pagbuhat sang ila propesyon’?

Indi katingalahan nga madamo, bangod wala na sing nahibaluan nga solusyon, ang nagatamod sang faith healing subong butang nga takus tilawan. Apang, ang ginaangkon nga pagpang-ayo sang mga faith healer balaisan. Halimbawa, ang ginabulubanta nga 70,000 nagtambong sa isa ka miting sa São Paulo, Brazil, diin ang duha ka manugpang-ayo ‘nagtapak sang ginatos ka antipara nga ginhaboy sang tumalambong, nanaad sa mapinatihon nga mga tawo nga magabalik ang ila panulok.’ Ang isa sa mga manugpang-ayo bunayag nga nagbaton sa isa ka interbyu: “Indi ko masiling nga ang tanan sadtong nagamasakit nga ginpangamuyuan namon magaayo. Nagadepende ini sa ila pagtuo. Kon ang isa ka tawo nagatuo, magaayo sia.” Ginbasol niya ang indi pag-ayo sa kakulang sing pagtuo sang isa nga nagamasakit. Apang, dumduma, nga subong nga nakita na naton kaina, ang ginbasol ni Jesus sa kapaslawan sa pagpaayo amo ang kakulang sing pagtuo sadtong mga nagpang-ayo!

Ang isa pa ka manugpang-ayo nagsaad nga maayo niya ang kanser kag paralitiko. Ano ang natabo? Suno sa Veja nga magasin, “ang saad, maathag, nga wala natuman.” Kag pamatii kon ano ang iya ginhimo: “Sa halos duha ka oras, [ang “faith healer”] naglingaw sang tumalambong paagi sa mga sermon, mga pangadi, mga singgit, ambahanon—naggamit pa sing sumbag, agod paguwaon ang mga demonyo nga nagsulod sa lawas sang mga sumilimba. Sa katapusan, ginhaboy niya ang iya kurbata kag ang iya panyo sa nalumay nga tumalambong kag nagpasa sang plato agod makolekta ang ‘boluntaryo nga mga amot.’” Si Jesus kag ang iya mga apostol wala gid magpangayo sing kuwarta tungod sa milagruso nga mga pagpang-ayo, kag wala gid sila maghimo sina nga talan-awon.

Sing maathag, nian, ang modernong mga faith healer wala nagahimo sang ginhimo ni Jesus. Kag mabudlay hangpon nga ang Dios mahamuot sa ginahimo nila. Apang, may ginakahamut-an bala sia nga milagruso nga pagpang-ayo karon? Ukon may paagi bala nga ang aton pagtuo makabulig sa aton kon kita ukon ang aton mga hinigugma nagamasakit?