Ang Espiritu ni Jehova Nagatuytoy sa iya Katawhan

“Ang imo espiritu maayo; kabay nga magtuytoy ini sa akon sa duta sang pagkatadlong”—SALMO 143:10.

1, 2. Ano ang mahimo makatuga sing kalisud para sa matutom nga mga alagad ni Jehova?

‘GINAPUNG-AW gid ako! Sa diin bala ako makakita sing paumpaw? Ginsikway bala ako sang Dios?’ Nakabatyag ka na bala sing amo sina? Kon amo, wala ka nagaisahanon. Bisan pa nga ang matutom nga mga alagad ni Jehova nagapuyo sa nagauswag nga espirituwal nga paraiso, kon kaisa nagaatubang sila sing malisud nga mga problema, mga pagtilaw, kag mga pagsulay nga kinaandan sa katawhan.—1 Corinto 10:13.

² Ayhan ginatublag ikaw sang madugay na nga pagtilaw ukon kabangdanan sang daku nga kahuol. Ayhan nagakalisud ka tungod sa pagkapatay sang isa ka hinigugma kag ayhan nagabatyag nga nagaisahanon na lamang. Ukon ayhan ang imo tagipusuon ginatublag bangod sang pagmasakit sang isa ka mahal nga abyan. Ina nga mga kahimtangan mahimo nga nagakuha sa imo sang kalipay kag paghidait kag mahimo nga makatalagam pa sa imo pagtuo. Ano ang dapat mo himuon?

Mangayo sa Dios sang Iya Espiritu

3. Kon may butang nga nagakuha sa imo sang mga kinaiya subong sang paghidait kag kalipay, ano ang maalamon nga pagahimuon?

³ Kon may butang nga nagakuha sa imo sang paghidait, kalipay, ukon iban pa nga diosnon nga kinaiya, maalamon nga mangamuyo para sa balaan nga espiritu, ukon aktibo nga kusog, sang Dios. Ngaa? Bangod ang espiritu ni Jehova nagapatubas sing maayo nga bunga nga nagabulig sa isa ka Cristiano nga maatubang ang mga problema, mga pagtilaw, kag mga pagsulay. Sa tapos magpaandam batok sa “mga buhat sang unod,” si apostol Pablo nagsulat: “Apang, ang bunga sang espiritu amo ang gugma, kalipay, paghidait, pagbatas, pagkalulo, pagkaayo, pagkatutom, pagkamapainubuson, pagpugong sa kaugalingon. Batok sa amo walay kasuguan.”—Galacia 5:19-23.

4. Kon ginaatubang sang pila ka pagtilaw ukon pagsulay, ngaa mahimo nagakaigo nga mangin ispisipiko sa mga pangamuyo?

⁴ Bangod sang sahi sang pagtilaw nga ginaatubang mo, ayhan marealisar mo nga may katalagman nga mawasi mo ang imo pagkalulo, ukon pagkalum-ok. Nian mangin ispisipiko paagi sa pagpangamuyo kay Jehova nga Dios para sa bunga sang espiritu nga pagkalulo. Kon ikaw ginaatubang sang pila ka pagsulay, labi na nga kinahanglan mo ang bunga sang pagpugong sa kaugalingon. Sa pagkamatuod, nagakaigo man nga mangamuyo para sa balaan nga bulig sa pagpakig-away sa pagsulay, para sa kahilwayan gikan kay Satanas, kag para sa kaalam nga ginakinahanglan agod mabatas ang pagtilaw.—Mateo 6:13; Santiago 1:5, 6.

5. Kon ang mga sirkunstansia tuman gid kalisud nga indi mo mahibaluan kon ano nga bunga sang espiritu ang ipangamuyo, ano ang sarang himuon?

⁵ Apang, kon kaisa, ang mga sirkunstansia mahimo nga tuman gid kalisud ukon makagulumon nga indi mo mahibaluan kon ano nga bunga sang espiritu ang ginakinahanglan mo. Sa katunayan, ang kalipay, paghidait, pagkalulo, kag iban pa nga diosnon nga mga kinaiya mahimo nga nabutang sa katalagman. Ano nian? Ngaa indi mangabay sa Dios para sa balaan nga espiritu mismo kag tugutan ini sa pagpauswag sang kinahanglanon nga mga bunga sa imo bahin? Ang kinahanglanon nga mga bunga mahimo nga amo ang gugma ukon kalipay ukon paghidait ukon kombinasyon sang mga bunga sang espiritu. Mangamuyo man nga ang Dios magabulig sa imo sa pagpasakop sa pagtuytoy sang iya espiritu, kay ginagamit niya ini sa pagtuytoy sa iya katawhan.

Si Jehova Handa sa Pagbulig

6. Paano ginpatudok ni Jesus sa iya mga sumulunod ang kinahanglanon nga magpangamuyo sa walay langan?

⁶ Sang ang mga disipulo ni Jesucristo nangabay sing instruksion sa pangamuyo, sing bahin ginlaygayan niya sila nga mangamuyo para sa espiritu sang Dios. Naggamit anay si Jesus sang isa ka ilustrasyon nga gindesinyo sa pagpahulag sa ila nga mangamuyo sa walay langan. Sia nagsiling: “Sin-o bala sa inyo ang may abyan nga magkadto sa iya sa gab-i kag magsiling sa iya, ‘Abyan, pahulama ako sing tatlo ka tinapay, kay ang abyan nakon nag-abot sa akon gikan sa panlakatan kag wala ako sing ibutang sa atubangan niya’? Kag sia gikan sa sulod magsabat, ‘Dili ako paggamuha. Natakop na ang ganhaan, kag ang akon kabataan nagahigda upod sa akon; indi ako makabangon kag makahatag sa imo.’ Nagasiling ako sa inyo, Bisan indi sia magbangon kag maghatag bangod nga abyan niya sia, apang bangod sang iya tama gid nga pagpilit magabangon sia kag magahatag sa iya suno sa kinahanglan niya.”—Lucas 11:5-8.

7. Ano ang kahulugan sang pinamulong ni Jesus sa Lucas 11:​11-13, kag anong pasalig ang ginahatag nila sa aton nahanungod sa Dios kag sa iya espiritu?

⁷ Si Jehova handa sa pagbulig sa tagsatagsa sang iya matutom nga dedikadong mga alagad, kag nagapamati sia sa ila mga pangabay. Apang kon ina sia ‘padayon nga nagapangayo,’ subong sang ginlaygay ni Jesus, nagapakita ini sing tinagipusuon nga handum kag isa ka pagpakita sang pagtuo. (Lucas 11:9, 10) Si Cristo nagdugang: “Sin-o bala sa inyo nga amay, nga kon pangayuan sang iya anak sing isda, hatagan niya sia sing man-ug? Ukon magpangayo sia sing itlog, hatagan bala niya sia sing iwiiwi? Nian, kon kamo, nga malaut, makahibalo maghatag sing maayong mga dulot sa inyo mga anak, daw ano pa gid bala nga ang inyo Amay nga langitnon magahatag sang balaan nga espiritu sa mga nagapangayo sa iya!” (Lucas 11:11-13) Kon ang isa ka dutan-on nga ginikanan, bisan pa malauton bangod sang napanubli nga pagkamakasasala, nagahatag sing maayong mga butang sa iya anak, pat-od gid nga ang aton langitnon nga Amay magapadayon sa paghatag sang iya balaan nga espiritu kay bisan sin-o sa iya matutom nga mga alagad nga mapainubuson nga nagapangayo sini.

8. Paano ang Salmo 143:​10 naaplikar kay David, kay Jesus, kag sa modernong-adlaw nga mga alagad sang Dios?

⁸ Agod makabenepisyo gikan sa espiritu sang Dios, dapat nga mangin subong kita ka handa kay David sa pagsunod sa panuytoy sini. Sia nangamuyo: “Tudlui ako sa paghimo sang imo kabubut-on, kay ikaw amo ang akon Dios. Ang imo espiritu maayo; kabay nga magatuytoy ini sa akon sa duta sang pagkatadlong.” (Salmo 143:10) Si David, nga ginhimo nga sinikway sang hari sang Israel nga si Saul, naluyag nga ang espiritu sang Dios magatuytoy sa iya agod makapat-od sia nga ang iya dalanon matadlong. Sang ulihi nag-abot si Abiatar nga may dala nga efod sang saserdote nga gingamit sa pagpat-od sang kabubut-on sang Dios. Subong saserdotenhon nga tiglawas sang Dios, gintudluan ni Abiatar si David sang dalan nga paglaktan agod mapahamut-an si Jehova. (1 Samuel 22:17–23:12; 30:6-8) Kaangay ni David, si Jesus gintuytuyan sang espiritu ni Jehova, kag matuod man ini sa hinaplas nga mga sumulunod ni Cristo subong isa ka klase. Sang 1918-19, ginkabig sila sang sosiedad nga mga sinikway, kag ang ila relihioso nga mga kaaway naghunahuna nga sarang nila sila malaglag. Ang mga hinaplas nangamuyo sing dalan paguwa sa ila diaktibo nga kahimtangan, kag sang 1919, ginsabat sang Dios ang ila mga pangamuyo, ginhilway sila, kag ginpaaktibo liwat sa pag-alagad sa iya. (Salmo 143:7-9) Sing pat-od, ang espiritu ni Jehova nagabulig kag nagatuytoy sadto sa iya katawhan, subong sang ginahimo niya tubtob karon gid nga adlaw.

Kon Paano ang Espiritu Nagabulig

9. (a) Paano ang balaan nga espiritu nagaalagad subong “mananabang”? (b) Paano naton nahibaluan nga ang balaan nga espiritu indi isa ka persona? (Tan-awa ang foot­note.)

⁹ Gintawag ni Jesucristo ang balaan nga espiritu nga “mananabang.” Halimbawa, nagsiling sia sa iya mga sumulunod: “Ako magapangayo sa Amay kag magahatag sia sa inyo sing isa pa ka mananabang agod nga mag-upod sia sa inyo sa gihapon, bisan ang espiritu sang kamatuoran, nga indi mabaton sang kalibutan, kay wala ini makakita sa iya ukon makakilala sa iya. Nakilala ninyo sia, kay nagapabilin sia sa inyo kag mangin yara sia sa inyo.” Lakip sa iban nga mga butang, ina nga “mananabang” mangin isa ka manunudlo, kay si Cristo nagsaad: “Ang mananabang, ang balaan nga espiritu, nga ipadala sang Amay sa akon ngalan, magatudlo sia sa inyo sang tanan nga butang kag magapahanumdom sa inyo sang tanan nga akon ginsiling sa inyo.” Ang espiritu magapanaksi man nahanungod kay Cristo, kag ginpasalig niya ang iya mga disipulo: “Sa kaayuhan ninyo nga ako magtaliwan. Kay kon indi ako magtaliwan, ang mananabang indi mag-abot sa inyo; apang kon magtaliwan ako, ipadala ko sia sa inyo.”—Juan 14:16, 17, 26; 15:26; 16:7.a

10. Sa anong mga paagi ang balaan nga espiritu napamatud-an nga isa ka mananabang?

¹⁰ Halin sa langit, ginpasagahay ni Jesus ang ginsaad nga balaan nga espiritu sa iya mga sumulunod sang adlaw sang Pentecostes sang 33 C.E. (Binuhatan 1:4, 5; 2:1-11) Subong mananabang, ang espiritu naghatag sa ila sing dugang nga paghangop sa kabubut-on kag katuyuan sang Dios kag nagbukas sang iya matagnaon nga Pulong sa ila. (1 Corinto 2:10-16; Colosas 1:9, 10; Hebreo 9:8-10) Ina nga mananabang naghatag man sing gahom sa mga disipulo ni Jesus nga mangin mga saksi sa bug-os nga duta. (Lucas 24:49; Binuhatan 1:8; Efeso 3:5, 6) Sa karon, ang balaan nga espiritu sarang makabulig sa isa ka dedikado nga Cristiano nga magtubo sa ihibalo kon himuslan niya ang espirituwal nga mga aman nga ginaaman sang Dios paagi sa “matutom kag mainandamon nga ulipon.” (Mateo 24:45-47) Ang espiritu sang Dios sarang makaaman sing bulig paagi sa paghatag sing kaisog kag kusog nga kinahanglanon sa pagpanaksi subong isa sang mga alagad ni Jehova. (Mateo 10:19, 20; Binuhatan 4:29-31) Apang, ang balaan nga espiritu nagabulig man sa katawhan sang Dios sa iban nga mga paagi.

“May mga Pag-ugayong nga Dimamitlang”

11. Kon ang pagtilaw daw tuman ka daku, ano ang dapat himuon sang isa ka Cristiano?

¹¹ Kon ang isa ka Cristiano ginatublag sang pagtilaw nga daw indi masarangan, ano ang dapat niya himuon? Aba, mangamuyo sing balaan nga espiritu, kag tuguti ini sa pagpanghikot! “Ang espiritu nagabulig sa aton kaluyahon,” siling ni Pablo, “kay indi kita makahibalo magpangamuyo sing nagakaigo, apang ang espiritu gid nagapatunga tungod sa aton nga nagapakiluoy nga may mga pag-ugayong nga dimamitlang. Kag ang nagausisa sang mga tagipusuon nakahibalo kon ano ang kahulugan sang espiritu, bangod nga nagapatunga nga nagapakiluoy sia tungod sa mga balaan suno sa kabubut-on sang Dios.”—Roma 8:26, 27.

12, 13. (a) Paano ang Roma 8:​26, 27 naaplikar sa mga pangamuyo nga ginapangamuyo sa tuman kabudlay nga mga kahimtangan? (b) Ano ang ginhimo ni Pablo kag sang iya mga kaupdanan sang napaidalom sila sa daku nga pag-ipit sa distrito sang Asia?

¹² Yadtong mga balaan nga sa ila ang espiritu sang Dios nagapakiluoy amo ang hinaplas nga mga sumulunod ni Jesus, nga may langitnon nga paglaum. Apang bisan man ikaw may langitnon nga pagtawag ukon dutan-on nga paglaum, subong isa ka Cristiano matigayon mo ang bulig sang balaan nga espiritu sang Dios. Si Jehova kon kaisa nagahatag sing direkta nga sabat sa isa ka ispisipiko nga pangamuyo. Apang, kon kaisa, mahimo ka malisdan sing daku nga indi mo mabungat sa mga pulong ang imo mga balatyagon kag mahimo lamang magapakiluoy kay Jehova paagi sa dimamitlang nga mga pag-ugayong. Sa katunayan, ayhan wala ka makahibalo kon ano ang labing maayo para sa imo kag ayhan magapangabay pa sing sayop nga butang kon indi ka mangamuyo para sa balaan nga espiritu. Nakahibalo ang Dios nga luyag mo himuon ang iya kabubut-on, kag nakahibalo sia kon ano gid ang imo ginakinahanglan. Dugang pa, paagi sa iya balaan nga espiritu, ginparekord niya sa iya Pulong ang madamong pangamuyo, kag ini nagahinun-anon sa mabudlay nga mga kahimtangan. (2 Timoteo 3:16, 17; 2 Pedro 1:21) Busa, sarang matamod ni Jehova ang mga balatyagon nga ginpabutyag sa sinang ginbugna nga mga pangamuyo subong mga ekspresyon nga luyag mo himuon subong isa sang iya mga alagad, kag sarang niya ini masabat tungod sa imo.

¹³ Si Pablo kag ang iya mga kaupdanan mahimo nga wala makahibalo kon ano ang ipangamuyo sang nagaeksperiensia sing kapipit-an sa distrito sang Asia. Bangod ‘ginbug-atan sing lakas sing labaw sa ila ikasarang, nagbatyag sila nga nabaton nila ang paghukom sang kamatayon.’ Apang nagpabulig sila sa iban paagi sa ila mga pangamuyo kag nagsalig sa Dios, nga makabanhaw sang patay, kag ginluwas niya matuod sila. (2 Corinto 1:8-11) Daw ano ka makapaumpaw nga si Jehova nga Dios nagapamati kag nagasabat sa mga pangamuyo sang iya matutom nga mga alagad!

14. Anong kaayuhan ang magaresulta kon ginatugutan ni Jehova ang isa ka pagtilaw nga magapadayon sa pila ka tion?

¹⁴ Ang katawhan sang Dios masunson ginatublag sang mga pagtilaw subong isa ka organisasyon. Subong sang ginsiling kaina, ginhingabot sila sadtong Inaway Kalibutanon I. Bisan wala pa sila sadto sing maathag nga paghangop tuhoy sa ila posisyon kag busa wala makahibalo sing eksakto kon ano dapat ang ipangamuyo, ang Pulong ni Jehova nag-unod sing matagnaon nga mga pa⁠ngamuyo nga ginsabat niya tungod sa ila. (Salmo 69, 102, 126; Isaias, kapitulo 12) Apang ano kon ginapahanugutan ni Jehova ang isa ka pagtilaw nga magpadayon sa pila ka tion? Mahimo ini magaresulta sa isa ka panaksi, mahimo magapahulag sa iban nga batunon ang kamatuoran, kag magahatag sa mga Cristiano sing kahigayunan nga ipakita ang utudnon nga gugma paagi sa pagpangamuyo para sa ukon indi gani sa pagbulig sa nagaantos nga mga masigkatumuluo. (Juan 13:34, 35; 2 Corinto 1:11) Dumduma nga si Jehova nagatuytoy sang iya katawhan paagi sa iya balaan nga espiritu, nagahimo sang kon ano ang labing maayo para sa ila, kag pirme nagahimo sang mga butang nga magapadungog kag magapakabalaan sa iya balaan nga ngalan.—Exodo 9:16; Mateo 6:9.

Dili Pagpasubu-a ang Espiritu

15. Ang mga Cristiano sarang makasalig sa espiritu ni Jehova sa paghimo sing ano tungod sa ila?

¹⁵ Busa, kon ikaw isa ka alagad ni Jehova, magpangamuyo para sa balaan nga espiritu sa tion sang mga pagtilaw kag sa iban nga mga tion. Nian pat-ura nga sundon ang mga panuytoy sini, kay si Pablo nagsulat: “Dili pagpasubu-a ang balaan nga espiritu sang Dios, nga sa iya pinat-inan kamo sa adlaw sang pagtubos.” (Efeso 4:30) Ang espiritu sang Dios isa anay kag isa karon ka pat-in, ukon ‘tanda sang kon ano ang magaabot,’ para sa matutom nga hinaplas nga mga Cristiano—nga amo, ang dimamalatyon nga langitnon nga kabuhi. (2 Corinto 1:22; Roma 8:15; 1 Corinto 15:50-57; Bugna 2:10) Lunsay ang hinaplas nga mga Cristiano kag yadtong may dutan-on nga paglaum makasalig sa espiritu ni Jehova sa paghimo sing madamo tungod sa ila. Makatuytoy ini sa ila sa kabuhi sang katutom kag makabulig sa ila sa paglikaw sa makasasala nga mga buhat nga nagadul-ong sa indi pagkahamuot sang Dios, pagkawasi sang iya balaan nga espiritu, kag kapaslawan sa pagtigayon sang kabuhi nga dayon.—Galacia 5:19-21.

16, 17. Paano mahimo nga ginapasubo sang isa ka Cristiano ang espiritu?

¹⁶ Paano, sing nahibaluan ukon indi, mahimo mapasubo sang isa ka Cristiano ang espiritu? Ti, ginagamit ni Jehova ang iya espiritu sa pagpauswag sang paghiusa kag sa pagtangdo sa responsable nga mga lalaki sa kongregasyon. Busa, kon ang isa ka katapo sang kongregasyon magakumod batok sa gintangdo nga mga gulang, magapamaba sang mapasipalahon nga kutsokutso, kag iban pa, wala niya ginasunod ang mga panuytoy sang espiritu sang Dios padulong sa paghidait kag paghiusa. Sa kabilugan nga paagi, ginapasubo niya ang espiritu.—1 Corinto 1:10; 3:1-4, 16, 17; 1 Tesalonica 5:12, 13; Judas 16.

¹⁷ Sa pagsulat sa mga Cristiano sa Efeso, si Pablo nagpaandam batok sa mga huyog sa pagbutig, madugay nga kaakig, pagpangawat, malain nga pulong, dimaayo nga kaibog sa pakighilawas, binastos nga buhat, kag malaw-ay nga linahog. Kon tugutan sang isa ka Cristiano ang iya kaugalingon nga madaldal pakadto sa sinang mga butang, nagasupak sia sa ginbugna sang espiritu nga laygay sang Biblia. (Efeso 4:17-29; 5:1-5) Huo, kag busa sa isa ka kasangkaron ginapasubo niya ang espiritu sang Dios.

18. Ano ang mahanabo sa bisan sin-o nga Cristiano nga nagasugod sa pagpasapayan sa laygay sang ginbugna sang espiritu nga Pulong sang Dios?

¹⁸ Sa pagkamatuod, ang bisan sin-o nga Cristiano nga nagasugod sa pagpasapayan sa laygay sang ginbugna sang espiritu nga Pulong ni Jehova mahimo magasugod sa pagpalambo sing mga panimuot ukon mga batasan nga magaresulta sa hungod nga sala kag sa pagkawasi sang balaan nga kahamuot. Bisan pa mahimo nga wala sia nagabuhat sing sala sa karon, mahimo sia nagapadulong sa sina nga direksion. Ina nga Cristiano nga nagasupak sa panuytoy sang espiritu nagapasubo sa sini. Busa ginabatuan kag ginapasubo man niya si Jehova, ang Tuburan sang balaan nga espiritu. Indi gid ina luyag nga himuon sang isa nga nagahigugma sa Dios!

Padayon nga Magpangamuyo Para sa Balaan nga Espiritu

19. Ngaa ang katawhan ni Jehova ilabi na nga nagakinahanglan sang iya espiritu karon?

¹⁹ Kon ikaw isa ka alagad ni Jehova, magpadayon sa pagpangamuyo para sa iya balaan nga espiritu. Labi na sa sining “katapusan nga mga adlaw,” kag sa ital-ital nga mga tion sini nga mabudlay gid atubangon, ang mga Cristiano nagakinahanglan sang bulig sang espiritu sang Dios. (2 Timoteo 3:​1-5) Ang Yawa kag ang iya mga demonyo, nga gintabog gikan sa langit kag karon yari na sa palibot sang duta, nagasalakay sang organisasyon ni Jehova. Gani, karon labaw pa gid sang sa nagligad, nga ang katawhan sang Dios nagakinahanglan sang iya balaan nga espiritu sa pagpanguna, ukon sa pagtuytoy, sa ila kag sa pagbulig sa ila nga mabatas ang mga kabudlayan kag paghingabot.—Bugna 12:7-12.

20, 21. Ngaa dapat sundon ang panuytoy sang Pulong, sang espiritu, kag sang organisasyon ni Jehova?

²⁰ Magpakita pirme sing apresasyon tungod sa bulig nga ginahatag ni Jehova nga Dios paagi sa iya balaan nga espiritu. Sunda ang panuytoy sang iya ginbugna sang espiritu nga Pulong, ang Biblia. Magkooperar sing bug-os sa ginatuytuyan sang espiritu nga dutan-on nga organisasyon sang Dios. Indi gid pagtuguti ang imo kaugalingon nga magliso sa isa ka dimakasulatanhon nga dalanon nga katumbas sa pagpasubo sa balaan nga espiritu, kay basi magadul-ong ini sa ulihi sa pagkadula sini kag busa sa espirituwal nga kapahamakan.—Salmo 51:11.

²¹ Ang pagpatuytoy sa espiritu ni Jehova amo ang lamang nga paagi sa pagpahamuot sa iya kag sa pagtigayon sing isa ka mahidaiton kag makalilipay nga kabuhi. Dumduma, man, nga gintawag ni Jesus ang balaan nga espiritu nga “mananabang,” ukon “manuglugpay.” (Juan 14:16, footnote) Paagi sini, ang Dios nagalugpay sa mga Cristiano kag nagapabakud sa ila sa pag-atubang sa ila mga pagtilaw. (2 Corinto 1:3, 4) Ang espiritu nagahatag sing kusog sa katawhan ni Jehova sa pagbantala sang maayong balita kag nagabulig sa ila sa pagdumdom sang Makasulatanhon nga mga punto nga ginakinahanglan sa paghatag sing maayo nga panaksi. (Lucas 12:11, 12; Juan 14:25, 26; Binuhatan 1:4-8; 5:32) Paagi sa pangamuyo kag panuytoy sang espiritu, sarang maatubang sang mga Cristiano ang mga pagtilaw sang pagtuo nga may langitnon nga kaalam. Busa, sa tanan nga sirkunstansia sa kabuhi, padayon sila nga nagapangamuyo para sa balaan nga espiritu sang Dios. Subong resulta, ang espiritu ni Jehova nagatuytoy sa iya katawhan.

[Footnote]

Ano ang Imo mga Sabat?

◻ Ngaa magpangamuyo para sa balaan nga espiritu ni Jehova?

◻ Paano ang balaan nga espiritu isa ka mananabang?

◻ Ano ang kahulugan sang pagpasubo sa espiritu, kag paano naton malikawan ang paghimo sini?

◻ Ngaa padayon nga magpangamuyo para sa balaan nga espiritu kag magsunod sang iya panuytoy?

[Laragway sa pahina 15]

Subong nga ang isa ka mahigugmaon nga amay nagahatag sing maayong mga butang sa iya anak, si Jehova nagahatag man sang balaan nga espiritu sa iya mga alagad nga nagapangamuyo para sini

[Laragway sa pahina 17]

Nahibaluan mo bala kon paano ang espiritu sang Dios nagapakiluoy para sa mapangamuyuon nga mga Cristiano?