Kon Ngaa ang Panihapon sang Ginuo May Kahulugan Para sa Imo

GINPATOK ni Jesucristo ang Panihapon sang Ginuo sadtong katapusan nga gab-i sang iya tawhanon nga kabuhi. Huebes sang gab-i sadto, Marso 31, kag si Jesus napatay sang Biernes sang hapon, Abril 1. Sanglit ang mga adlaw sa Judiyong kalendaryo nagadalagan halin sa gab-i sang isa ka adlaw pakadto sa masunod, ang Panihapon sang Ginuo kag kamatayon ni Jesus lunsay natabo sang Nisan 14, 33 C.E.

Ngaa ginpatok ni Jesus ini nga panihapon? Ano ang kahulugan sang tinapay kag alak nga gingamit niya? Sin-o ang dapat mag-ambit? Daw ano kasunson dapat saulugon ini nga panihapon? Kag paano ini may kahulugan para sa imo?

Ngaa Ginpatok?

Nahanungod sa panihapon sang Ginuo, si Jesus nagsugo sa iya mga apostoles: “Padayon ninyo nga himuon ini sa handumanan nakon.” Suno sa isa pa ka badbad, nagsiling sia: “Himua ini subong isa ka memoryal sa akon.” (1 Corinto 11:​24, The New English Bible) Sa katunayan, ang Panihapon sang Ginuo masami nga ginapatuhuyan subong Memoryal sang kamatayon ni Cristo.

Napatay si Jesus subong isa ka nagahupot sing integridad nga tagsakdag sang soberanya ni Jehova kag busa nagpamatuod kay Satanas nga isa ka butigon nga manugpasipala tungod sang pagsumbong nga ang matarong nga mga tawo nagaalagad sa Dios bangod lamang sang makagod nga mga motibo. (Job 2:​1-5) Ang iya kamatayon nagpahalipay sang tagipusuon sang Dios.​—⁠Hulubaton 27:⁠11.

Paagi sa iya kamatayon subong himpit nga tawo, si Jesus man ‘naghatag sang iya kalag nga gawad sang madamo.’ (Mateo 20:28) Sa pagpakasala batok sa Dios, gindula sang nahaunang tawo ang himpit tawhanon nga kabuhi kag ang mga palaabuton sini. Apang “ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Huo, “ang bayad sang sala kamatayon, apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.”​—⁠Roma 6:⁠23.

‘Ginbaton sa Ginuo’

Nagahatag sing kapawa sa pagdumdom sang kamatayon ni Cristo amo ang mga pinamulong ni apostol Pablo: “Ginbaton ko sa Ginuo ang ginpalaton ko man sa inyo, nga si Ginuong Jesus sang gab-i nga gintugyan sia nagkuha sing tinapay kag, sang nakapasalamat sia, gintipiktipik niya ini kag nagsiling: ‘Nagakahulugan ini sang akon lawas nga ginatipiktipik tungod sa inyo. Padayon ninyo nga himuon ini sa handumanan nakon.’ Ginhimo man niya ini sa tagayan, sa tapos ang panihapon, nga nagasiling: ‘Ini nga tagayan nagakahulugan sang bag-ong katipan sa akon dugo. Padayon ninyo nga himuon ini, kay sa masunson nga nagakaon kamo sining tinapay kag nagainom sa tagayan, padayon ninyo nga ginabantala ang kamatayon sang Ginuo, tubtob nga magkari sia.”​—⁠1 Corinto 11:​23-26.

Sanglit indi kaupod si Pablo nanday Jesus kag sang 11 ka apostoles sang Nisan 14, 33 C.E., ini nga impormasyon maathag nga ‘ginbaton sa Ginuo’ paagi sa ginbugna nga pagpahayag. Ginpatok ni Jesus ang Memoryal “sang gab-i nga inugtugyan sia” ni Judas sa Judiyong relihiosong mga kaaway, nga nagsugyot sa mga Romano nga ipalansang si Cristo. Yadtong may kinamatarong nga mag-ambit sa emblema nga tinapay kag alak dapat maghimo sini sa handumanan niya.

Daw Ano Kasunson Ini Isaulog?

Ano ang kahulugan sang mga pinamulong ni Pablo: “Sa masunson nga nagakaon kamo sining tinapay kag nagainom sa tagayan, padayon ninyo nga ginabantala ang kamatayon sang Ginuo, tubtob nga magkari sia”? Ang matutom nga hinaplas nga mga Cristiano magapakig-ambit sa mga emblema sa Memoryal “sa masunson” tubtob mapatay sila, nga pagabanhawon sa ulihi pakadto sa langitnon nga kabuhi. Sa atubang sang Dios kag sang kalibutan, sa amo magabantala sila sa masunson sang ila pagtuo sa aman ni Jehova sang paghalad ni Jesus. Tubtob san-o? “Tubtob nga magkari sia,” siling ni Pablo, ayhan nagakahulugan nga ining mga pagsaulog magapadayon tubtob magkari si Jesus sa pagbaton sa iya hinaplas nga mga sumulunod sa langit paagi sa pagkabanhaw sa tion sang iya “presensia.” (1 Tesalonica 4:​14-17) Nahisanto ini sa mga pinamulong ni Cristo sa 11 ka matutom nga apostoles: “Kon ako makakadto kag makaaman sa inyo sing duog, magabalik ako kag dalhon ko kamo kaupod nakon, agod nga kon diin ako didto man kamo.”​—⁠Juan 14:⁠3.

Dapat bala dumdumon ang kamatayon ni Cristo adlaw-adlaw ukon ayhan kada semana? Ti, ginpatok ni Jesus ang Panihapon sang Ginuo kag ginpatay sia sang Paskuwa, nga nagdumdom sang paghilway sa Israel gikan sa pagkaulipon sa Egipto. Sa katunayan, gintawag sia nga “si Cristo nga aton paskuwa” bangod sia amo ang Kordero nga ginhalad tungod sa mga Cristiano. (1 Corinto 5:⁠7) Ang Paskuwa ginsaulog sing makaisa lamang sa isa ka tuig, sang Nisan 14. (Exodo 12:​6, 14; Levitico 23:⁠5) Nagapanugda ini nga ang kamatayon ni Jesus dapat lamang dumdumon sing makaisa nga subong kasunson sang Paskuwa​—⁠kada tuig, indi adlaw-adlaw ukon kada semana.

Sa mga pila ka siglo madamong nagaangkon nga mga Cristiano ang nagsaulog sang kamatayon ni Jesus sing makaisa sa isa ka tuig. Bangod ginhimo nila ini sang Nisan 14, gintawag sila nga mga Quartodeciman, nga nagakahulugan sing “mga ikakatorse.” Nahanungod sa ila, ang istoryador nga si J. L. von Mosheim nagsulat: “Ang mga Cristiano sa Asia Minor naanad sa pagsaulog sining sagrado nga kapiestahan, nga nagadumdom sang pagpatok sang panihapon sang Ginuo, kag sang kamatayon ni Jesucristo, sa tion man nga ang mga Judiyo nagkaon sang ila kordero sa Paskuwa, nga amo ang gab-i sang ikakatorse nga adlaw sang nahaunang bulan [Nisan]. . . . Nagbatyag sila nga obligado sa pagsunod sang halimbawa ni Cristo subong sang pagsunod nila sa isa ka kasuguan.”

Kahulugan sang mga Emblema

Si Pablo nagsiling nga si Jesus “nagkuha sing tinapay kag, sang nakapasalamat sia, gintipiktipik niya ini.” Inang kaangay sang galyetas nga tinapay nga ginluto halin sa harina kag tubig nga wala sing lebadura (ukon, pangpakumbo) dapat tipiktipikon agod makaon. Sa simbulismo sa Biblia, ang lebadura nagakahulugan sang sala ukon kalautan. Nagalaygay sa mga Cristiano sa Corinto nga paguwaon ang imoral nga tawo gikan sa kongregasyon, si Pablo nagsiling: “Wala bala kamo makahibalo nga ang diutay nga tapay nagalatum sang bug-os nga linamas? Panghugas kamo gikan sa daan nga tapay, agod nga mangin bag-o kamo nga linamas, subong nga wala kamo sing tapay. Kay, sa pagkamatuod, ang aton paskuwa nga kordero nga si Cristo nahalad na. Busa hiwaton ta ang piesta, indi sa daan nga tapay, sa tapay sang kalainan kag kalautan, kundi sa tinapay nga walay tapay sang kabunayag kag kamatuoran.” (1 Corinto 5:​6-8) Subong nga ang diutay nga maaslom nga masa nagalatum sang bug-os nga linamas sang tinapay, ang kongregasyon mangin dimatinlo man sa mata ni Jehova kon ang malain nga impluwensia sang makasasala nga tawo wala ginkuha. Kinahanglan nila kuhaon ang “lebadura” gikan sa tunga nila, subong nga ang mga Israelinhon indi dapat nga may lebadura sa ila mga balay sa tion sang Kapiestahan sang Tinapay nga Walay Tapay nga nagasunod sa Paskuwa.

Nahanungod sa walay tapay nga tinapay sang Memoryal, si Jesus nagsiling: “Nagakahulugan ini sang akon lawas nga ginatipiktipik tungod sa inyo.” (1 Corinto 11:24) Ang tinapay nagalaragway sa himpit undanon nga lawas ni Jesus, nga nahanungod sini si Pablo nagsulat: “Sang pag-abot [ni Jesus] sa kalibutan nagsiling sia: ‘ “Indi ka buot sang mga halad kag mga dulot, kundi gin-amanan mo ako sing lawas. Sa mga halad nga sinunog kag mga halad tungod sa sala wala ka sing kalipay.” Nian nagsiling ako, “Tuluka! Nagaabot ako (sa linukot sang tulun-an nga ginsulat nahanungod sa akon) sa paghimo sang imo kabubut-on, O Dios.” ’ . . . Paagi sa sinang ‘kabubut-on’ ginapakabalaan kita paagi sa paghalad sang lawas ni Jesucristo sing makaisa gid lang.” (Hebreo 10:​5-10) Ang himpit tawhanon nga lawas ni Jesus wala sing sala kag nangin halad gawad para sa katawhan.​—⁠Hebreo 7:⁠26.

Pagkatapos mapangamuyuan ang tagayan sang wala masimbugi nga pula nga alak, si Jesus nagsiling: “Ining tagayan nagakahulugan sing bag-ong katipan tungod sang akon dugo.” (1 Corinto 11:25) Ang isa pa ka badbad amo: “Ining tagayan nagakahulugan sang bag-ong katipan nga ginpalig-on paagi sa akon dugo.” (Mof­fatt) Subong nga ang dugo sang ginhalad nga mga baka nga lalaki kag mga kanding nagpalig-on sang Kasuguan nga katipan sa ulot sang Dios kag sang pungsod sang Israel, ang dugo man ni Jesus nga ginbubo sa kamatayon nagpalig-on sa bag-ong katipan. Ang pagsambit sa sinang katipan nagabulig sa aton nga makilala ang takus nga mga umalambit sa mga emblema sang Memoryal.

Sin-o ang Dapat Mag-ambit?

Ang mga hinaplas nga sumulunod ni Jesus, nga yara sa bag-ong katipan, makatarunganon nga nagaambit sa mga emblema sang Memoryal. Ini nga katipan ginhimo sa ulot sang Dios kag sang espirituwal nga Israel. (Jeremias 31:​31-34; Galacia 6:16) Apang ang bag-ong katipan magadala sa ulihi sing mga pagpakamaayo sa tanan nga matinumanon nga katawhan, kag mahimo kamo mangin kaupod sang mga makabaton sinang mga pagpakamaayo.

Ang mga umalambit sa mga emblema sang Memoryal dapat nga may personal nga pagpakigkatipan sa Ginharian nga ginhimo ni Jesus. Sang ginpatok ining panihapon, si Jesus nagsiling sa iya matutom nga mga apostoles: “Nagapakigkatipan ako sa inyo, subong nga ang akon Amay nakigkatipan sa akon, para sa isa ka ginharian.” (Lucas 22:29) Ang katipan sa Ginharian nga ginpakigkatipan sang Dios kay Hari David nagtudlo sa pagkari ni Jesus, ang isa nga magagahom sing dayon sa langitnon nga Ginharian. Ang 144,000 ka espiri­tuwal nga mga Israelinhon, nga magagahom kaupod niya ginalaragway subong nagatindog sa langitnon nga Bukid sang Sion kaupod sang Kordero, si Jesucristo. Pagkabanhaw, magagahom sila kaupod ni Cristo subong kabulig nga mga hari kag mga saserdote. (2 Samuel 7:​11-16; Bugna 7:4; 14:​1-4; 20:⁠6) Yadto lamang ang yara sa bag-ong katipan kag sa personal nga pagpakigkatipan kay Jesus ang makatarunganon nga magaambit sa mga emblema sang Panihapon sang Ginuo.

Ang espiritu sang Dios nagapanaksi sa espiritu sang mga hinaplas nga sila mga anak Niya kag mga masigkamanunubli ni Cristo. Sulat ni Pablo: “Ang espiritu gid nagasaksi upod sa aton espiritu nga mga anak kita sang Dios. Kag kon kita mga anak, nian mga manunubli man kita: mga manunubli gid sang Dios, kag mga masigkamanunubli ni Cristo, kon matuod nga nagaantos kita kaupod niya agod nga paghimayaon man kita kaupod niya.” (Roma 8:​16, 17) Ang balaan nga espiritu, ukon aktibo nga puwersa sang Dios, nagatuga sa sulod sang mga hinaplas sing pasalig nga gintuyo sila para sa langitnon nga kabuhi. Ginatamod nila nga ginapatuhoy sa ila ang tanan nga ginasiling sang Kasulatan nahanungod sa langitnon nga kabuhi kag handa sa pagsakripisyo sang tanan nga dutan-on nga mga butang, lakip ang tawhanon nga kabuhi. Bisan pa ang pagkabuhi sa dutan-on nga Paraiso mangin makalilipay, wala sila sina nga paglaum. (Lucas 23:43) Ang pat-od kag dimabag-o nga langitnon nga paglaum nga wala mapasad sa butig nga relihiosong mga pagtamod nagahatag sa ila sing kinamatarong nga mag-ambit sa mga emblema sa Memoryal.

Indi mahamuot si Jehova kon ipakilala sang isa ang iya kaugalingon subong gintawag nga mangin langitnon nga hari kag saserdote kon wala sia sing amo nga pagtawag. (Roma 9:16; Bugna 22:⁠5) Ginpatay ni Jehova si Core tungod sang matinaastaason nga pagtinguha sang pagkasaserdote. (Exodo 28:1; Numeros 16:​4-11, 31-35) Gani, ano kon ang makusog nga mga emosyon ukon relihioso anay nga mga ideya nagtiklod sa isa nga mag-ambit sing sayop sa mga emblema sang Memoryal? Nian dapat sia mag-untat sa pag-ambit kag mapainubuson nga mangayo sing kapatawaran sa Dios sa pangamuyo.​—⁠Salmo 19:⁠13.

Kon Paano Ka Naapektuhan

Ang isa indi kinahanglan mag-ambit sa mga emblema sa Memoryal agod makabenepisyo sa halad gawad ni Jesus kag makabaton sing kabuhi nga dayon sa duta. Halimbawa, wala ginapakita sang Biblia nga ang mahinadlukon sa Dios nga mga tawo kaangay nanday Abraham, Sara, Isaac, Rebeca, Boaz, Rut, kag David magaambit sa sining mga emblema. Apang sila kag ang tanan pa nga iban nga nagahandum sang kabuhi nga walay katapusan sa sining globo dapat magtuo sa Dios kag kay Cristo kag sa aman ni Jehova nga halad gawad ni Jesus. (Juan 3:36; 14:⁠1) Ang tuigan nga pagsaulog sang kamatayon ni Cristo nagapahanumdom sinang daku nga halad.

Ina nga importansia sang halad ni Jesus ginpakita sang si apostol Juan nagsiling: “Nagasulat ako sa inyo sini agod nga indi kamo makasala. Apang, kon ang bisan sin-o makasala, may mananabang kita upod sa Amay, si Jesucristo, nga matarong. Kag sia amo ang katumbasan tungod sa aton mga sala, kag indi lamang tungod sa aton kundi tungod man sa mga sala sang bug-os nga kalibutan.” (1 Juan 2:​1, 2) Ang hinaplas nga mga Cristiano makasiling nga si Jesus “katumbasan tungod sa [ila] mga sala.” Apang, halad man sia para sa mga sala sang bug-os nga kalibutan, nagapaposible sang kabuhi nga dayon para sa matinumanon nga katawhan sa Paraiso nga duta sa karon nga tuman na kalapit!

Paagi sa pagtambong sa pagdumdom sa kamatayon ni Cristo, makabenepisyo kamo gikan sa isa ka nagapahunahuna nga diskurso sa Biblia. Pahanumdumon kamo kon ano ang ginhimo ni Jehova nga Dios kag ni Jesucristo para sa aton. Makapaladya gid sa espirituwal ang magtipon kaupod sadtong may tudok nga pagtahod sa Dios kag kay Cristo kag sa halad gawad ni Jesus. Ang okasyon mahimo nga magapabakud gid sang imo handum nga makabaton sang dibagay nga kaluoy sang Dios, nga nagadul-ong sa kabuhi nga dayon. Mainit namon kamo nga ginaagda nga makig-upod sa mga Saksi ni Jehova pagtunod sang adlaw sa Abril 6, 1993, sa pagdumdom sang kamatayon ni Jesucristo bangod ang Panihapon sang Ginuo may daku nga kahulugan para sa inyo.