Ang Kaluoy ni Jehova Nagaluwas sa Aton Gikan sa Pagkawalay Paglaum

“Kaluuyi ako, O Dios, suno sa imo mahigugmaon nga kalulo. Suno sa kabugana sang imo kaluoy panasa ang akon mga paglalis.”​—SALMO 51:1.

1, 2. Paano ang isa ka alagad ni Jehova maapektuhan sang serioso nga sala?

ANG mga kasuguan ni Jehova indi mahimo malapas nga indi masilutan. Makita gid ina kon makahimo kita sing isa ka mabug-at nga sala batok kay Jehova! Bisan pa tinuig na nga gin-alagad naton si Jehova sing matutom, ang paglapas sa iya kasuguan mahimo makatuga sing daku nga kabalaka ukon daku nga kapung-aw. Mahimo kita magbatyag nga ginpabay-an kita ni Jehova kag nga indi na kita takus mag-alagad sa iya. Ang aton sala mahimo nga daw kaangay sang madamol nga panganod nga nagatabon sa kapawa sang kahamuot sang Dios.

² Nasapwan anay ni Hari David sang dumaan nga Israel ang iya kaugalingon sa sina nga kahimtangan. Paano natabo ini nga kahimtangan?

Ang Sayop nga mga Tikang Makadul-ong sa Daku nga Sala

3, 4. Ano ang natabo kay Hari David sadtong panag-on sang kabuganaan?

³ Ginhigugma ni David ang Dios apang nakahimo sia sing sayop nga mga tikang nga nagdul-ong sa grabe nga mga sala. (Ipaanggid ang Galacia 6:1.) Mahimo ini matabo kay bisan sin-o nga dihimpit nga tawo, ilabi na kon may awtoridad sia sa iban. Subong isa ka manggaranon nga hari, si David bantog kag gamhanan. Sin-o ang maisog nga magahangkat sang iya pulong? Ang sangkol nga mga lalaki handa kag kinabubut-on nga nag-alagad sa iya, kag ang mga tawo malangkagon nga nagtuman sang iya ginsugo. Apang, nakasala si David paagi sa pagkuha sing madamo nga asawa kag pag-isip sa mga tawo.​—Deuteronomio 17:​14-20; 1 Cronica 21:1.

⁴ Sa sining panag-on sang materyal nga kabuganaan, si David nakahimo sing daku nga mga sala batok sa Dios kag sa tawo. Ti, ang isa ka sala nagdul-ong sa isa pa kaangay sang ginlala nga mga hilo sa isa ka tela nga gindesinyo ni Satanas! Samtang ang mga masigka-Israelinhon nagapakig-away sa mga Amonhon, gintan-aw ni David gikan sa ibabaw sang iya atop ang matahom nga asawa ni Urias, nga si Batseba, nga nagapaligo. Bangod si Urias didto sa inaway, ginpakadto sang hari ang babayi sa iya palasyo kag nagpanglahi sa iya. Handurawa ang iya kakibot sang mahibaluan niya sang ulihi nga nagabusong sia! Ginpapauli ni David si Urias, sa paglaum nga huliran niya si Batseba sina nga gab-i kag kabigon ang bata nga iya. Bisan pa ginhubog sia ni David, si Urias wala maghulid sa iya asawa. Nadulaan na sing paglaum, ginhatagan ni David si Joab sing likom nga mga sugo nga ibutang si Urias sa unahan sang inaway diin pat-od gid nga mapatay sia. Napatay si Urias sa inaway, ang iya asawa naghimo sang kinaandan nga panag-on sang paglalaw, kag ginpakaslan sia ni David antes mamutikan sang mga tawo ang iya pagbusong.​—2 Samuel 11:​1-27.

5. Ano ang natabo sang nagpakasala si David upod kay Batseba, kag ano ang epekto sa iya sang iya mga sala?

⁵ Paagi kay manalagna Natan, ginbuyagyag sang Dios ang mga sala ni David kag nagsiling: “Magabangon ako sing malaut batok sa imo gikan sa imo kaugalingon nga panimalay.” Gani, ang anak nga natawo kay Batseba napatay. (2 Samuel 12:​1-23) Ginlugos ni Amnon, nga panganay nga anak nga lalaki ni David, ang iya kaugalingon nga utod nga babayi sa amay nga si Tamar kag ginpatay sia sang utod ni Tamar. (2 Samuel 13:​1-33) Gintinguhaan sang anak sang hari nga si Absalom nga agawon ang trono kag ginpakahuy-an ang iya amay paagi sa paghulid sa mga babayi ni David. (2 Samuel 15:1–16:22) Nagpuas ang inaway sibil sa pagkapatay ni Absalom kag labi pa nga ginsubuan si David. (2 Samuel 18:​1-33) Apang, ang mga sala ni David nagpaubos sa iya kag nagpamaradmad sa iya sang kinahanglanon nga magpabilin nga suod sa iya maluluy-on nga Dios. Kon makasala kita, mapainubuson kita nga magpaubos kag magpalapit kay Jehova.​—Ipaanggid ang Santiago 4:8.

6. Ngaa si Hari David ilabi na nga nakasala?

⁶ Labi na gid nga nakasala si David bangod sia isa ka Israelinhon nga gumalahom nga nakahibalo sing bug-os sang Kasuguan ni Jehova. (Deuteronomio 17:​18-20) Indi sia isa ka paraon sang Egipto ukon hari sang Babilonia nga kulang sina nga ihibalo kag mahimo nga kinaandan nga nagahimo sing mga butang nga wala ginakahamut-an sang Dios. (Ipaanggid ang Efeso 2:12; 4:18.) Subong katapo sang isa ka pungsod nga dedikado kay Jehova, nahibaluan ni David nga ang panglahi kag pagpatay daku nga mga sala. (Exodo 20:​13, 14) Nakahibalo man ang mga Cristiano sang kasuguan sang Dios. Apang, kaangay kay David, ginalapas ini sang iban sa ila bangod sang duna nga pagkamakasasala, tawhanon nga kaluyahon, kag dimabatuan nga pagsulay. Kon matabo ina kay bisan sin-o sa aton, indi kita dapat magpabilin sa nadulman nga kahimtangan nga nagaburon sang aton espirituwal nga panan-aw kag nagatabon sa aton sa daku nga pagkawalay paglaum.

Ang Pagtu-ad Nagadala sing Paumpaw

7, 8. (a) Ano ang natabo kay David sang gintinguhaan niya nga itago ang iya mga sala? (b) Ngaa itu-ad kag bayaan ang sala?

⁷ Kon nakahimo kita sing grabe nga mga paglalis sa kasuguan sang Dios, ayhan mabudlayan kita sa pagtu-ad sang aton mga sala, bisan kay Jehova. Ano ang mahimo matabo sa idalom sinang mga kahimtangan? Sa Salmo 32, si David nagbaton: “Sang naghipos ako [sa baylo nga magtu-ad] nahagas ang akon mga tul-an tungod sang akon pag-ugayong sa bilog nga adlaw. Kay sa adlaw kag gab-i mabug-at sa akon ang kamot [ni Jehova]. Ang akon kahun-og nagbaylo subong sang kamala sang tingadlaw.” (Bersikulo 3, 4) Ang pagtinguha nga taguon ang iya sala kag punggan ang natublag nga konsiensia naghagas sa balingag nga si David. Ang kalisang nagbuhin sing daku sang iya kusog nga nangin kaangay sia sang namalhan nga kahoy nga wala sing nagahatag-kabuhi nga kahun-og. Sa katunayan, mahimo nga nabatyagan niya ang malain nga mga epekto sa hunahuna kag sa pisikal. Ti, nawasi niya ang iya kalipay. Kon masapwan sang bisan sin-o sa aton ang aton kaugalingon sa kaanggid nga kahimtangan, ano ang dapat naton himuon?

⁸ Ang pagtu-ad sa Dios makahatag sing kapatawaran kag kaumpawan. “Gintu-ad ko sang ulihi sa imo ang akon sala, kag wala ko ginlikom ang akon kalautan,” amba ni David. “Ako nagsiling: ‘Itu-ad ko ang akon mga paglalis kay Jehova.’ Nian ikaw nagpatawad sang kalautan sang akon sala.” (Salmo 32:5) Ginatublag ka bala bangod sang tago nga sala? Indi bala labing maayo nga itu-ad kag untatan ini agod matigayon ang kaluoy sang Dios? Ngaa indi tawgon ang mga gulang sang kongregasyon kag mangayo sing espirituwal nga pag-ayo? (Hulubaton 28:13; Santiago 5:​13-20) Ang imo mahinulsulon nga espiritu pagakilalahon, kag sa ulihi ang imo Cristianong kalipay mapasag-uli. “Malipayon sia nga ang iya paglalis ginpatawad, nga ang iya sala gintabunan,” siling ni David. “Malipayon ang tawo nga wala ginapasangti ni Jehova sang kalautan, kag nga sa iya espiritu walay limbong.”​—Salmo 32:​1, 2.

9. San-o ginsulat ang Salmo 51, kag ngaa?

⁹ Si David kag si Batseba nanabat kay Jehova nga Dios tungod sang ila nahimo nga sala. Bisan pa nga mahimo sila kuntani patyon tungod sang ila mga sala, ginkaluy-an sila sang Dios. Maluluy-on sia ilabi na kay David bangod sang katipan sa Ginharian. (2 Samuel 7:​11-16) Ang mahinulsulon nga panimuot ni David sa iya mga sala may kaangtanan kay Batseba makita sa Salmo 51. Ining makatalandog nga salmo ginkomposo sang naghinulsol nga hari pagkatapos nga ginpukaw ni manalagna Natan ang iya konsiensia sa kadakuon sang iya mga paglalis sa balaan nga kasuguan. Nagkinahanglan sing kaisog para kay Natan nga ipatalupangod kay David ang iya mga sala, gani ang gintangdo nga Cristianong mga gulang dapat man magmaisog sa paghimo sing subong sina nga butang sa karon. Sa baylo nga ipanghiwala ang panumbungon kag imando nga patyon si Natan, ang hari mapainubuson nga nagtu-ad. (2 Samuel 12:​1-14) Ginapakita sang Salmo 51 kon ano ang ginsiling niya sa Dios sa pangamuyo nahanungod sa iya makahuluya nga mga buhat kag nagakaigo gid nga ipamalandong ini sa pangamuyo, labi na kon nakasala kita kag nagakinahanglan sing kaluoy ni Jehova.

Manabat Kita sa Dios

10. Paano nakaeksperiensia sing espirituwal nga pagpasag-uli si David?

¹⁰ Wala mangatarungan si David tuhoy sa iya sala kundi nakiluoy sia: “Kaluoyi ako, O Dios, suno sa imo mahigugmaon nga kalulo. Suno sa kabugana sang imo kaluoy panasa ang akon mga paglalis.” (Salmo 51:1) Paagi sa paglalis, si David naglabang sa mga dulunan sang Kasuguan sang Dios. Apang, may paglaum nga mapasag-uli sia sa espirituwal kon ang Dios magpakita sa iya sing kaluoy suno sa Iya mahigugmaon nga kalulo, ukon maunungon nga gugma. Ang kabugana sang nagligad nga mga kaluoy sang Dios naghatag sing rason sa mahinulsulon nga hari sa pagtuo nga panason sang iya Magbubuhat ang iya mga paglalis.

11. Ano ang ginapahangop sang mga halad sa Adlaw sang Katumbasan, kag ano ang ginakinahanglan para sa kaluwasan karon?

¹¹ Paagi sa matagnaon nga mga landong sang mga halad sa Adlaw sang Katumbasan, ginpahangop ni Jehova nga may paagi sia sa pagtinlo sa mga mahinulsulon gikan sa ila sala. Nakahibalo kita karon nga ang iya kaluoy kag kapatawaran ginahatag sa aton pasad sa aton pagtuo sa halad gawad ni Jesucristo. Kon si David, nga ang ginahunahuna lamang amo ang mga tipo kag mga landong sining halad, makasalig sa mahigugmaon nga kalulo kag mga kaluoy ni Jehova, daw ano pa gid nga ang karon nga mga alagad sang Dios dapat magtuo sa halad nga gin-aman para sa ila kaluwasan!​—Roma 5:8; Hebreo 10:1.

12. Ano ang kahulugan sang pagpakasala, kag ano ang ginbatyag ni David sa iya ginhimo nga sala?

¹² Sang nagpakiluoy sa Dios, si David nagdugang: “Hugasi ako sing himpit gid sang akon kalautan, kag tinlui ako gikan sa akon sala. Kay ginakilala ko ang akon mga paglalis, kag ang akon sala yari gihapon sa atubangan nakon.” (Salmo 51:​2, 3) Ang pagpakasala amo ang indi pagsunod sa mga talaksan ni Jehova. Amo gid sina ang ginhimo ni David. Apang, indi sia kaangay sang isa ka manugpatay sing tawo ukon manugpanglahi nga wala mabalaka sa iya sala, nasubuan lamang bangod sang silot sa iya ukon sang posibilidad nga malatnan sang balatian. Subong mahigugmaon kay Jehova, gindumtan ni David ang malain. (Salmo 97:10) Ginkangil-aran niya ang iya sala kag luyag niya nga tinluan sia sang Dios sa sini sing bug-os. Nakahibalo gid si David sang iya mga paglalis kag nagkasubo sing daku nga ginpabay-an niya ang iya makasasala nga handum nga mangibabaw sa iya. Pirme niya nadumduman ang iya sala, kay ang nakasala nga konsiensia sang isa ka mahinadlukon sa Dios nga tawo indi gid maglinong tubtob nga may paghinulsol, pagtu-ad, kag pagpatawad ni Jehova.

13. Ngaa makasiling si David nga nagpakasala sia sa Dios lamang?

¹³ Nagakilala sang iya salabton kay Jehova, si David nagsiling: “Batok sa imo, sa imo lamang, nakasala ako, kag nakahimo sang malaut sa imo itululok, agod nga pakamatarungon ka kon magpamulong ka, kag putli kon ikaw maghukom.” (Salmo 51:4) Ginlapas ni David ang mga kasuguan sang Dios, ginpakahuy-an ang harianon nga katungdanan, kag “indi maduhaduhaan nga naghulag nga may dipagtahod kay Jehova,” nagpadayag sa Iya sa kahuy-anan. (2 Samuel 12:​14; Exodo 20:​13, 14, 17) Ang makasasala nga mga buhat ni David mga kasal-anan man batok sa Israelinhon nga katilingban kag sa mga katapo sang iya pamilya, subong nga ang bawtismado nga makasasala sa karon nagapasubo ukon nagapalisod sa Cristianong kongregasyon kag sa mga hinigugma. Bisan pa ang mahinulsulon nga hari nakahibalo nga nakasala sia batok sa mga isigkatawo kaangay ni Urias, ginkilala niya ang mas mataas nga salabton kay Jehova. (Ipaanggid ang Genesis 39:​7-9.) Ginkilala ni David nga ang paghukom ni Jehova matarong. (Roma 3:4) Ang mga Cristiano nga nakasala nagakinahanglan sing amo man nga pagtamod.

May Kabangdanan nga mga Kahimtangan

14. Anong may kabangdanan nga mga kahimtangan ang ginsambit ni David?

¹⁴ Bisan pa wala gintinguhaan ni David nga pakamatarungon ang iya kaugalingon, nagsiling sia: “Tuluka! Sa kalautan natawo ako sa kasakit sang pagpanganak, kag sa sala ginpanamkon ako sang akon iloy.” (Salmo 51:5) Si David natawo sa kalautan, kag ang iya iloy nakaeksperiensia sing kasakit sang pagpanganak bangod sang napanubli nga pagkamakasasala. (Genesis 3:16; Roma 5:12) Ang iya mga pinamulong wala nagakahulugan nga ang nagakaigo nga mga relasyon sa pag-asawahay, pagpanamkon, kag pagbun-ag mga pagpakasala, kay ang Dios ang nag-aman sang pag-asawahay kag pagpanganak; ukon wala ginpatuhuyan ni David ang bisan anong espesipiko nga sala sang iya iloy. Ginpanamkon sia sa sala bangod ang iya mga ginikanan mga makasasala kaangay sang tanan dihimpit nga mga tawo.​—Job 14:4.

15. Bisan pa mahimo binagbinagon sang Dios ang may kabangdanan nga mga kahimtangan, ano ang indi naton dapat himuon?

¹⁵ Kon kita nakasala, masambit naton sa pangamuyo sa Dios ang bisan anong may kabangdanan nga mga kahimtangan nga mahimo nga ginbangdan sang aton pagpakasala. Apang indi naton paghimuon ang dibagay nga kalulo sang Dios nga balibad sa lugak nga paggawi ukon paggamiton ang duna nga pagkamakasasala subong tabon nga aton mapanaguan gikan sa pagpanabat sa aton sala. (Judas 3, 4) Gin-ako ni David nga ginbinagbinag niya ang mahigko nga panghunahuna kag nagpadala sia sa pagsulay. Mangamuyo kita nga indi kita madala sa pagsulay kag dayon maghulag kita nahisuno sa sina nga pangamuyo.​—Mateo 6:13.

Makiluoy Para sa Pagpaninlo

16. Sa anong kinaiya nagakalipay ang Dios, kag paano ina dapat magaapektar sang aton paggawi?

¹⁶ Ang mga tawo mahimo nga maayong mga indibiduwal nga debotado sa Dios tan-awon, apang wala sia nagatan-aw sa kadaygan kag ginatan-aw niya kon ano sila sa sulod. Siling ni David: “Tuluka! Ikaw [Jehova] nagakalipay sang kamatuoran sa akon kasudlan; kag sa tago buot mo ako pakilalahon sing kaalam.” (Salmo 51:6) Si David nakasala sing kabutigan kag pagkaditampad sa pagmaniobra sang kamatayon ni Urias kag pagtinguha nga ilikom ang mga kamatuoran nahanungod sa pagbusong ni Batseba. Apang, nakahibalo sia nga ang Dios nagakalipay sa pagkamatinuuron kag pagkabalaan. Dapat ini mag-apektar sang aton paggawi sa maayo nga paagi, kay si Jehova magatagudili sa aton kon indi kita tampad. (Hulubaton 3:32) Nakahibalo man si David nga kon ang Dios ‘buot magpakilala sa iya sing kaalam,’ subong mahinulsulon nga hari, mahimo niya masunod ang balaan nga mga pagsulundan sa nabilin nga tinuig sang iya kabuhi.

17. Ano ang kahulugan sang pagpangamuyo agod maputli sang isopo?

¹⁷ Bangod nahangpan sang salmista nga kinahanglan niya ang bulig sang Dios sa paglandas sa makasasala nga mga huyog, nagpakiluoy sia sing dugang: “Ulaya ako sang isopo, kag mangin matinlo ako; hugasi ako, kag mangin maputi pa ako sa nieve.” (Salmo 51:7) Lakip sa iban nga mga butang, ang tanom nga isopo (ayhan marjoram, ukon Origanum maru) gingamit sa seremonya sa pagpaninlo para sa mga tawo nga nagmasakit anay sing aru. (Levitico 14:​2-7) Gani nagakaigo nga si David dapat mangamuyo nga putlion gikan sa sala paagi sa isopo. Ang ideya tuhoy sa pagputli ginabuylog man sa iya pakiluoy nga hugasan sia ni Jehova agod bug-os sia nga mangin matinlo, maputi pa bisan sa nieve nga wala pa maagyuhan ukon masagbutan. (Isaias 1:18) Kon ang bisan sin-o sa aton karon ginatublag ang konsiensia bangod sang nahimo nga sala, magtuo kita nga kon mahinulsulon nga pangayuon naton ang kapatawaran sang Dios, putlion kag tinluan niya kita pasad sa halad gawad ni Jesus.

Makiluoy Para sa Pagpasag-uli

18. Ano ang kahimtangan ni David antes sia naghinulsol kag nagtu-ad, kag paano ini nga ihibalo mabuligon sa karon?

¹⁸ Ang bisan sin-o nga Cristiano nga nakaantos sing natublag nga konsiensia makahangop sang mga pinamulong ni David: “Kabay nga pun-on mo [Jehova] ako sing kalipay kag kasadya, pasadyaha ang mga tul-an nga imo ginbuong.” (Salmo 51:8) Sa wala pa maghinulsol si David kag magtu-ad sang iya mga sala, ang iya natublag nga konsiensia nagpasubo gid sa iya. Wala sia malipay bisan sa mga ambahanon sang kalipay kag kasadya nga ginhimo sang maayong mga manug-amba kag lantip nga mga musikero. Daku gid ang pag-antos sang makasasala nga si David nga ang Dios wala mahamuot sa iya amo kon ngaa nangin kaangay sia sang isa ka tawo nga ang mga tul-an ginbuong sing masakit. Luyag niya ang kapatawaran, ang espirituwal nga pag-ayo, kag ang pagpasag-uli sang kalipay nga naeksperiensiahan niya anay. Ang isa ka mahinulsulon nga makasasala sa karon nagakinahanglan man sang kapatawaran ni Jehova agod matigayon liwat ang iya anay kalipay antes sia nakahimo sing butang nga nagguba sang iya kaangtanan sa Dios. Ang pagpasag-uli sang “kalipay sa balaan nga espiritu” sa mahinulsulon nga tawo nagakahulugan nga si Jehova nagpatawad sa iya kag nagahigugma sa iya. (1 Tesalonica 1:6) Daw ano nga paumpaw ang ginadala sina!

19. Ano ang pagabatyagon ni David kon panason sang Dios ang tanan niya nga mga sala?

¹⁹ Si David dugang nga nangamuyo: “Lipdi ang imo nawong gikan sa akon mga sala, kag panasa ang tanan ko nga kalautan.” (Salmo 51:9) Si Jehova indi mapaabot nga magatamod sang sala nga may kahamuot. Gani, ginpangabay sia nga lipdan ang iya nawong gikan sa mga sala ni David. Nakiluoy man ang hari nga panason sang Dios ang tanan niya nga kalautan, dulaon ang tanan niya nga pagkadimatarong. Kon himuon lang kuntani ina ni Jehova! Magapahalipay ini sang mga espiritu ni David, magadula sang lulan sang natublag nga konsiensia, kag magapahibalo sa mahinulsulon karon nga hari nga ginpatawad na sia sang iya mahigugmaon nga Dios.

Ano Kon Nakasala Ka?

20. Ano ang ginarekomendar para kay bisan sin-o nga Cristiano nga nakasala sing daku?

²⁰ Ginapakita sang Salmo 51 nga ang bisan sin-o sa dedikado nga mga alagad ni Jehova nga nakasala sing mabug-at apang mahinulsulon sarang makapangabay sa iya sing masinaligon nga pakitaan sila sing kaluoy kag tinluan sila gikan sa ila sala. Kon isa ikaw ka Cristiano nga nakasala sa sinang paagi, ngaa indi mangayo sing kapatawaran sa aton langitnon nga Amay sa mapainubuson nga pangamuyo? Kilalaha ang pagkinahanglan mo sing bulig sang Dios agod makatindog nga kalahamut-an sa atubangan niya, kag pangabaya nga ipasag-uli ang imo nagligad nga kalipay. Ang mahinulsulon nga mga Cristiano masinaligon nga makadangop kay Jehova sa pangamuyo sa sinang mga pangabay, kay “sia magapatawad sing bugana.” (Isaias 55:7; Salmo 103:​10-14) Siempre pa, ang mga gulang sa kongregasyon dapat tawgon agod makahatag sila sing kinahanglanon nga espiri­tuwal nga bulig.​—Santiago 5:​13-15.

21. Ano ang masunod nga binagbinagon naton?

²¹ Ang kaluoy ni Jehova nagaluwas sang iya katawhan gikan sa pagkawalay paglaum. Apang usisaon naton ang iban pa nga tinagipusuon nga mga pakiluoy sang mahinulsulon nga si David sa Salmo 51. Ang aton pagtuon magapakita nga si Jehova wala nagatamay sang buong sing tagipusuon.

Paano Mo Sabton?

◻ Ano ang mahimo nga epekto sang serioso nga sala sa isa sang mga alagad ni Jehova?

◻ Paano naapektuhan si David sang gintinguhaan niya nga taguon ang iya sala?

◻ Ngaa nagsiling si David nga nakasala sia sa Dios lamang?

◻ Bisan pa mahimo nga binagbinagon sang Dios ang may kabangdanan nga mga kahimtangan kon nakasala kita, ano ang indi naton dapat himuon?

◻ Ano ang dapat himuon sang isa ka Cristiano kon nakasala sia sing daku?