Mga Pamatan-on​—⁠Ano ang Inyo Ginahimud-usan?

“Palagyo ka sa mga kailigbon nga pinamatan-on, kundi himud-usi ang pagkamatarong, pagtuo, gugma, paghidait, kaupod sa mga nagapanawag sa Ginuo gikan sa tagipusuon nga putli.”​—⁠2 TIMOTEO 2:⁠22.

1. Ano ang aton ginalauman para sa mga pamatan-on sa tunga naton?

“ANG mga Saksi ni Jehova,” siling sang pamantalaan sang Pentecostal sa Sweden nga Dagen (Ang Adlaw), “amo ang grupo nga nakakuha sing pinakamadamo nga bag-ong katapo kada tuig kag may pinakadaku nga kadam-an sang mga pamatan-on.” Ayhan nalakip ikaw sa sining kadam-an sang matinlo, nagakahadlok sa Dios nga mga pamatan-on. Ayhan ginpadaku ka sa Cristianong dalanon kutob sa pagkabata, ukon ayhan nakabati kag naghulag ka sa mensahe sang Ginharian sing kinaugalingon. Bisan diin man sa duha, nalipay kami nga mangin sa tunga namon kamo. Kag ginalauman namon nga himud-usan ninyo ang dalanon sang pagkamatarong, subong sang ginhimo sang matutom nga Cristianong mga pamatan-on sang unang siglo. Ang pinamulong ni apostol Pablo mahimo gid nga nagalaragway sa inyo: “Mabakod kamo kag ang pulong sang Dios nagapabilin sa inyo kag nadaug ninyo ang malauton.”​—⁠1 Juan 2:⁠14.

2. Anong mga butang ang nagahimo sang paghimud-os sa matarong nga dalanon nga mabudlay sa tion sang “kapagsik sang pagkabatan-on”?

² Madamo​—⁠huo kalabanan⁠—​sang Cristianong mga pamatan-on karon ang nagatindog nga malig-on sa mga pag-ipit sang kalibutan. Apang, masapwan ninyo nga ang paghupot sina nga dalanon indi mahapos. Kon yara kamo sa “kapagsik sang pagkabatan-on,” ayhan mabatyagan ninyo nga nagakadala kamo sa bag-o kag makusog nga mga emosyon. (1 Corinto 7:36) Sa amo man nga tion, ayhan mabatyagan ninyo ang nagadugang nga lulan sang mga salabton sa eskwelahan, sa balay, kag sa kongregasyon. May pag-ipit pa gani gikan mismo kay Satanas nga Yawa. Determinado nga sulayon ang pinakamadamo nga masarangan niya, ginasalakay niya yadtong daw madali masulay​—⁠subong sang ginhimo niya sa katamnan sang Eden. Sadto anay, ginsentro niya ang iya mahayluhon nga limbong, indi sa mas magulang, mas maalamon nga si Adan, kundi sa mas bataon kag kulang gid sa eksperiensia nga babayi, si Eva. (Genesis 3:​1-5) Mga siglo sang ulihi, gingamit ni Satanas ang kaanggid nga mga padugi sa bag-ong kongregasyon sang mga Cristiano sa Corinto. Si apostol Pablo nagsiling: “Nagakahadlok ako nga subong nga ang man-ug sa iya kadaya naglimbong kay Eva, ang inyo mga hunahuna patalangon gikan sa hanuot kag putli nga katutom kay Cristo.”​—⁠2 Corinto 11:⁠3.

3, 4. Ano ang pila ka kasangkapan nga ginagamit ni Satanas nga Yawa sa pagpatalang sa mga pamatan-on, kag upod ang anong posible nga resulta?

³ Sa karon, ang inyo Cristianong mga ginikanan mahimo man mabalaka sa inyo. Indi bangod ginahunahuna nila nga nahuyog kamo sa malain, kundi nakahibalo sila gikan sa eksperiensia nga ang mga pamatan-on mahapos nga masulay sa “malimbungon nga mga buhat” ni Satanas. (Efeso 6:​11, foot­note) Indi malain tan-awon, ang mga siod ni Satanas ginahimo nga daw makagalanyat kag halandumon. Malimbungon nga ginapresentar sang telebisyon ang materyalismo, sekso, detalyado nga kasingki, kag espiritismo subong kalingawan. Ang lamharon nga mga hunahuna mahimo mapuno sang mga butang nga indi gid ‘matuod, halangdon, matarong, putli, kag hiligugmaon.’ (Filipos 4:⁠8) Ang pag-ipit sang mga katubotubo amo ang isa pa ka epektibo nga kasangkapan ni Satanas. Ayhan ipiton gid kamo sang inyo mga katubotubo nga magsunod sa ila estilo sang pagkabuhi, pamayo, kag pamustura. (1 Pedro 4:​3, 4) Ang kolumnista sang pamantalaan nga si Wil­liam Brown nagsiling: “Kon may isa ka sekular nga Dios para sa tin-edyer ini amo ang Dios sang pagsunod. . . . Para sa mga tin-edyer ang mangin tuhay gikan sa iya mga katubotubo amo ang pinakamalain nga butang nga mahanabo sa iya.” Isa ka Saksi nga bata nga babayi sa Italya ang nagtu-ad: “Nahuya ako mahibaluan sang akon mga kabutho nga Saksi ako. Kag bangod nahibaluan ko nga wala malipay si Jehova sa akon, nagkasubo ako kag napung-aw.”

⁴ Indi magpadaya​—⁠luyag ni Satanas nga tuytuyan kamo padulong sa inyo kalaglagan. Madamong pamatan-on sa kalibutan ang mapatay sa dakung kapipit-an bangod gintugutan nila ang ila kaugalingon nga patalangon. (Ezequiel 9:⁠6) Ang lamang nga paagi nga makalampuwas amo ang paghimud-os sa kon ano ang matarong.

Magbantay Batok sa Malain nga mga Kaupdanan

5, 6. (a) Anong mga hangkat ang gin-atubang sang lamharon nga si Timoteo samtang nagapuyo sa Efeso? (b) Anong laygay ang ginhatag ni Pablo kay Timoteo?

⁵ Amo ina ang kaundan sang laygay nga ginhatag ni apostol Pablo sa pamatan-on nga si Timoteo. Sa kapin sa napulo ka tuig, gin-updan ni Timoteo si apostol Pablo sa iya misyonero nga mga paglakbay. Sang si Timoteo nagaalagad sa paganong siudad sang Efeso, si Pablo isa ka bilanggo sa Roma nga nagahulat patyon. Samtang nagahinampot ang tion sang iya kamatayon, pat-od gid nga nabalaka si Pablo sa kahimtangan ni Timoteo. Ang Efeso isa ka siudad nga kilala sa iya manggad, imoralidad, kag malaw-ay nga kalingawan, kag wala na si Pablo nga mangin masaligan nga manuglaygay ni Timoteo.

⁶ Gani ginsulatan ni Pablo ang iya ‘hinigugma nga anak’ sing masunod: “Sa dakung balay yara indi lamang ang mga suludlan nga bulawan kag pilak kundi man ang mga suludlan nga kahoy kag lunang, ang iban sa paggamit nga dungganon kag ang iban sa didungganon. Kon, busa, ang bisan sin-o magpaninlo sang iya kaugalingon gikan sa didungganon, nian mangin suludlan sia nga galamiton sa kadungganan, nga ginapakabalaan kag mapuslanon sa agalon sang balay, nga handa sa bisan anong maayong buhat. Gani, palagyo ka sa mga kailigbon nga pinamatan-on, kag himud-usi ang pagkamatarong, pagtuo, gugma, kag paghidait, kaupod sa mga nagapanawag sa Ginuo gikan sa tagipusuon nga putli.”​—⁠2 Timoteo 1:2; 2:​20-22.

7. (a) Anong ‘mga suludlan nga didungganon’ ang ginpaandam ni Pablo? (b) Paano maaplikar sang mga pamatan-on sa karon ang mga pinamulong ni Pablo?

⁷ Busa ginpaandaman ni Pablo si Timoteo nga bisan sa tunga sang mga masigka-Cristiano mahimo nga may ‘mga suludlan nga didungganon’​—⁠mga indibiduwal nga wala nagagawi sing nagakaigo. Karon kon ang pagpakig-upod sa sinang hinaplas nga mga Cristiano mahimo kuntani nga makahalalit para kay Timoteo, ang pagpakig-upod sa mga kalibutanon labi pa gid nga makahalalit para sa isa ka Cristianong pamatan-on karon! (1 Corinto 15:33) Wala ini nagakahulugan nga mangin dimainabyanon kamo sa inyo mga kabutho. Apang dapat kamo maghalong nga indi gid magsuod sa ila, bisan pa kon kaisa daw loner (isa nga nagalikaw sa iban) kamo tan-awon. Mabudlay gid ini. Siling sang isa ka taga-Brazil nga bata nga babayi: “Mabudlay ini. Pirme ako ginaagda sang akon mga kabutho nga magkadto sa mga pagtilipon kag mga lugar nga dinagakaigo para sa Cristianong mga pamatan-on. Nagasiling sila: ‘Ano! Indi ka magkadto? Binuang!’ ”

8, 9. (a) Paano ang pagpakig-upod, bisan pa sa daw mabuot nga mga kalibutanon, nagahatag sing katalagman para sa isa ka Cristiano? (b) Diin kita makasapo sing maayo nga mga abyan?

⁸ Ang iban nga kalibutanon nga mga pamatan-on daw mabuot bangod wala sila nagapanigarilyo, wala sila nagapamuyayaw, ukon wala sila nagahimo sing imoral nga sekso. Apang, kon wala nila ginahimud-usan ang pagkamatarong, ang ila undanon nga panghunahuna kag mga panimuot mahapos nga magaimpluwensia sa inyo. Isa pa, daw ano kadaku ang pagkapareho mo sa mga ditumuluo? (2 Corinto 6:​14-16) Aba, ang espirituwal nga mga kabilihanan nga ginapakamahal ninyo “kabuangan” lamang sa ila! (1 Corinto 2:14) Sarang bala ninyo mahuptan ang pagpakig-abyan sa ila nga wala nagakompromiso sang inyo mga prinsipio?

⁹ Gani likawi ang dimaayo nga mga kaupdanan. Makig-upod lamang sa mahunahunaon sa espirituwal nga mga Cristiano nga nagahigugma gid kay Jehova. Bisan sa kongregasyon maghalong sa mga pamatan-on nga negatibo ukon mamulayon. Samtang nagatubo kamo sa espirituwal, ang inyo ginapangita sa mga abyan mahimo nga magabalhin. Siling sang isa ka Saksi nga tin-edyer nga babayi: “May bag-o ako nga mga abyan sa lainlain nga mga kongregasyon. Nagparealisar ini sa akon kon daw ano ka dikinahanglanon ang kalibutanon nga mga abyan.”

Pagpalagyo sa Malain nga mga Kailigbon

10, 11. (a) Ano ang kahulugan sang ‘magpalagyo sa mga kailigbon nga pinamatan-on’? (b) Paano kita ‘makapalagyo sa pagkamakihilawason’?

¹⁰ Ginlaygayan man ni Pablo si Timoteo nga ‘magpalagyo sa mga kailigbon nga pinamatan-on.’ Kon kamo pamatan-on pa, ang handum nga magmangin popular, maglipaylipay, ukon magpaayaw sang seksuwal nga mga kailigbon makagalanyat. Kon indi mapunggan, inang mga handum mahimo magdul-ong sa inyo sa sala. Gani nagsiling si Pablo nga magpalagyo sa makahalalit nga mga kailigbon​—⁠magdalagan subong nga daw nabutang sa katalagman ang kabuhi.⁠a

¹¹ Ang seksuwal nga kailigbon, halimbawa, nagdul-ong sa madamong Cristianong pamatan-on sa espirituwal nga kalaglagan. Tungod sang maayong rason, nian, nga ang Biblia nagasugo sa aton nga “palagyo kamo sa pagkamakihilawason.” (1 Corinto 6:18) Kon ang babayi kag lalaki nagaluyagay, naga­date, maaplikar nila ining prinsipio paagi sa paglikaw sang makasululay nga mga kahimtangan​—⁠subong sang magsilahanon lamang sa isa ka apart­ment ukon nagadulog nga salakyan. Mahimo nga daw karaan na ang magpatsaperon, apang proteksion gid ini. Kag samtang ang pila ka pulong kag buhat sa pagpabutyag sing paghigugma mahimo nga ­nagakaigo, dapat ipahamtang ang makatarunganon nga mga latid agod malikawan ang dimatinlo nga buhat. (1 Tesalonica 4:⁠7) Ang pagpalagyo sa pagkamakihilawason nagalakip man sang paglikaw sa mga sine ukon mga programa sa telebisyon nga nagapukaw sang sayop nga kailigbon. (Santiago 1:​14, 15) Kon ang imoral nga mga panghunahuna magsulod sa imo hunahuna, ilisi ang topiko sa hunahuna. Magdayandayan; magbasa; magtrabaho sa balay. Ang pangamuyo isa man ka epektibo nga bulig may kaangtanan sini.​—⁠Salmo 62:⁠8.⁠b

12. Paano ninyo natun-an nga dumtan ang malain? Iilustrar.

¹² Labaw sa tanan, dapat ninyo tun-an nga dumtan, kangil-aran, dikahamut-an ang malain. (Salmo 97:10) Paano ninyo dumtan ang butang nga makalilipay ukon kahalamut-an sa primero? Paagi sa paghunahuna sang mga resulta! “Dili kamo magtalang: Ang Dios indi tiliawtiawan. Kay bisan ano ang ginasab-ug sang tawo, ina man ang iya anihon; kay ang nagasab-ug sa iya kaugalingon nga unod magaani sing kaduluntan gikan sa unod.” (Galacia 6:​7, 8) Kon ginasulay nga magpadala sa silabo sang balatyagon, hunahunaa ang daku pa nga resulta​—⁠kon paano ini magasaklaw kay Jehova nga Dios. (Ipaanggid ang Salmo 78:41.) Hunahunaa, man, ang posibilidad nga magmabdos ukon malatnan sing balatian, subong sang AIDS. Binagbinaga ang emosyonal nga kasubo kag pagkadula sang imo pagtahod sa kaugalingon. Mahimo man nga may malawig nga mga resulta. Isa ka Cristianong babayi ang nagabaton: “Kami sang akon bana may inagihan na sa sekso upod sa iban bag-o kami magkilalahay. Bisan pa kami nga duha mga Cristiano na karon, ang amon nagligad nga inagihan sa sekso nangin kabangdanan sang pag-away kag pagpangimon sa amon pag-asawahay.” Indi man dapat pagkalimtan ang pagkadula sang inyo teokratikong mga pribilehiyo ukon ang posibilidad nga paguwaon gikan sa Cristianong kongregasyon! (1 Corinto 5:​9-13) Ang bisan anong umalagi nga kalipay takus gid bala sa sina nga bili?

Paghimud-os sang Suod nga Kaangtanan kay Jehova

13, 14. (a) Ngaa indi lamang bastante nga magpalagyo gikan sa malain? (b) Paano ang isa ‘makahimud-os nga makilala si Jehova’?

¹³ Apang, indi lamang bastante nga magpalagyo gikan sa malain. Ginlaygayan man si Timoteo nga ‘himud-usan ang pagkamatarong, pagtuo, gugma, paghidait.’ Nagapahangop ini sing lakas nga pagpanghikot. Si manalagna Oseas nakiluoy man sa dimatutom nga pungsod sang Israel: “Kari, kamo nga katawhan, kag magbalik kita kay Jehova . . . Magahimud-os kita sa pagkilala kay Jehova.” (Oseas 6:​1-3) Nahimo na bala ninyo ina nga paghimud-os? Nagalakip ini sing kapin pa sa pagtambong lamang sa mga miting kag pag-upod sa inyo mga ginikanan sa pag-alagad sa latagon. Ang isa ka Cristianong babayi nagtu-ad: “Ginpadaku ako sang akon mga ginikanan sa kamatuoran, kag bata pa ako ginbawtismuhan. . . . Talagsa lang ako nga indi makatambong sa mga miting kag pirme ako nagaguwa sa latagon kada bulan, apang wala gid ako makapalambo sing suod nga personal nga kaangtanan kay Jehova.”

¹⁴ Isa pa ka pamatan-on ang nagbaton nga napaslawan man sia nga makilala si Jehova subong Abyan kag Amay, ginatamod sia subong isa ka walay kaathagan nga Espiritu. Nakahimo sia sing imoralidad kag nangin wala makasal nga iloy sa edad nga 18. Indi paghimua ang kaanggid nga sala! ‘Himud-usi nga makilala si Jehova,’ subong sang laygay ni Oseas. Paagi sa pangamuyo kag adlaw-adlaw nga paglakat upod kay Jehova, sarang ninyo sia mahimo nga inyo masaligan nga abyan. (Ipaanggid ang Miqueas 6:8; Jeremias 3:⁠4.) “Indi sia malayo sa tagsatagsa sa aton” kon pangitaon naton sia. (Binuhatan 17:27) Busa kinahanglan ang regular nga programa sang personal nga pagtuon sa Biblia. Ina nga rutina indi kinahanglan nga mangin detalyado ukon masibod. “Kada adlaw ginabasa ko ang Biblia sa mga 15 minutos,” siling sang isa ka lamharon nga babayi nga si Melody. Magpain sing tion sa pagbasa sang tagsa ka guwa sang Ang Lalantawan kag Magmata! Maghanda para sa mga miting sang kongregasyon agod ‘mapukaw [ninyo ang iban] sa gugma kag maayong mga buhat.’​—⁠Hebreo 10:​24, 25.

Ihatag ang Inyo Tagipusuon sa Inyo mga Ginikanan

15. (a) Ngaa mabudlay kon kaisa tumanon ang inyo mga ginikanan? (b) Ngaa ang pagkamatinumanon masami nga sa kaayuhan sang pamatan-on?

¹⁵ Ang mahadlukon sa Dios nga mga ginikanan mahimo mangin isa ka tuburan sang matuod nga bulig kag supurta. Apang talupangda ang imo katungdanan: “Tumana ang inyo mga ginikanan sa Ginuo, kay ini matarong; ‘Tahura ang imo amay kag ang imo iloy’; ini amo ang nahaunang sugo nga may saad: ‘Agod nga magmaayo sa imo kag magkabuhi ka sing malawig sa duta.’ ” (Efeso 6:​1-3) Matuod, daku na kamo kag ayhan luyag ninyo ang dugang nga kahilwayan. Ayhan nahibaluan na ninyo ang mga limitasyon sang inyo mga ginikanan. “Ang aton tawhanon nga mga amay,” ginbaton ni apostol Pablo, “nagahimo lamang kon ano ang ginahunahuna nila nga pinakamaayo.” (Hebreo 12:​10, The Jerusalem Bible) Apang, pagkatapos mabinagbinag ang kabilugan nga mga benepisyo, para gihapon sa inyo kaayuhan ang tumanon sila. Ang inyo mga ginikanan nagahigugma sa inyo kag nakakilala sa inyo sing maayo sangsa kay bisan sin-o. Bisan pa nga indi kamo pirme makaugyon sa ila, ginahunahuna nila sa masami ang inyo pinakamaayo nga kaayuhan. Ngaa batuan ninyo ang ila mga panikasog nga padakuon kamo sa “disiplina kag panghunahuna ni Jehova”? (Efeso 6:⁠4) Sa pagkamatuod, buangbuang lamang ang “wala nagatahod sang disiplina sang iya amay.” (Hulubaton 15:⁠5) Ang maalamon nga pamatan-on magakilala sang awtoridad sang iya mga ginikanan kag magapakita sing nagakaigo nga pagtahod.​—⁠Hulubaton 1:⁠8.

16. (a) Ngaa indi maalamon para sa mga pamatan-on nga ilikom ang mga problema gikan sa ila mga ginikanan? (b) Ano ang mahimo himuon sang mga ginikanan sa pagpauswag sang komunikasyon upod sa ila mga ginikanan?

¹⁶ Nagalakip ina sang pagsugid sang kamatuoran sa inyo mga ginikanan, pagpahibalo sa ila kon may mga problema kamo, subong sang nagatublag nga mga pangduhaduha nahanungod sa kamatuoran ukon pagsugod sa paggawi sing dikalahamut-an. (Efeso 4:25) Ang paglikom sinang makatulublag nga mga kahimtangan sa mga ginikanan nagatuga sing dugang nga mga problema. (Salmo 26:⁠4) Ibutang ta, ang iban nga mga ginikanan wala gid nagapanikasog sa pagpakigkomunikar. “Ang akon iloy wala gid nagapungko kag nagapakigsugilanon sa akon,” reklamo sang isa ka pamatan-on nga babayi. “Wala gid ako sing kaisog nga ihambal ang akon ginabatyag bangod nahadlok ako nga basi mulayon niya ako.” Kon yara kamo sa kaanggid nga kahimtangan, maalamon nga magpili sing nagakaigo nga tion agod isugid sa inyo mga ginikanan ang inyo balatyagon. “Anak ko, ihatag sa akon ang imo tagipusuon,” laygay sang Hulubaton 23:26. Tilawi nga isugid sa ila ang inyo mga kabalaka sing tayuyon, antes maglutaw ang serioso nga mga problema.

Padayon nga Himud-usi ang Pagkamatarong!

17, 18. Ano ang magabulig sa pamatan-on sa pagpadayon sa iya paghimud-os sa pagkamatarong?

¹⁷ Sa katapusan nga bahin sang iya ikaduhang sulat, si Pablo naglaygay kay Timoteo: “Padayon ka sa natun-an mo kag nasaligan sing malig-on.” (2 Timoteo 3:14) Amo man sini ang dapat ninyo himuon. Indi pagtuguti ang bisan sin-o ukon ang bisan ano nga magpahilayo sa inyo gikan sa inyo paghimud-os sa pagkamatarong. Ang kalibutan ni Satanas​—⁠tungod sang tanan nga pangganyat sini⁠—​puno sing kalautan. Sa dili madugay ini kag ang tanan nga bahin sini pagalaglagon. (Salmo 92:⁠7) Mangin determinado gid nga indi malaglag kaupod sang kadam-an ni Satanas.

¹⁸ Bangod sina, dapat ninyo pirme usisaon ang inyo mga tulumuron, mga handum, kag mga luyag. Pamangkuta ang inyo kaugalingon, ‘Ginahuptan ko bala ang mataas nga mga talaksan sa hambal kag paggawi kon indi ako makita sang akon mga ginikanan kag sang mga katapo sang kongregasyon? Ano nga sahi sang mga abyan ang ginapili ko? Ginadiktahan bala ako sang akon kalibutanon nga mga katubotubo sa akon pamayo kag pamustura? Anong mga tulumuron ang ginpahamtang ko para sa akon kaugalingon? Handum ko gid bala ang bug-os tion nga pag-alagad​—⁠ukon ang karera sa nagatagumatayon nga sistema sang mga butang ni Satanas?’

19, 20. (a) Ngaa indi dapat magbatyag ang isa ka pamatan-on nga indi niya masarangan ang mga ginapatuman ni Jehova? (b) Anong mga aman ang mahimo matigayon sang mga pamatan-on?

¹⁹ Ayhan nakita ninyo ang kinahanglanon nga maghimo sing pila ka pagbag-o sa inyo panghunahuna. (2 Corinto 13:11) Indi magbatyag nga indi ninyo ini masarangan. Dumduma, si Jehova wala nagapaabot sa inyo labaw sa kon ano ang makatarunganon. Si manalagna Miqueas nagpamangkot: “Ano bala ang ginakinahanglan sa imo ni Jehova kundi ang paghimo sing katarungan kag ang paghigugma sa kalulo kag ang paglakat sing mapainubuson upod sa imo Dios?” (Miqueas 6:⁠8) Indi ini tuman kabudlay kon inyo ginahimuslan ang mga aman ni Jehova sa pagbulig sa inyo. Magpabilin nga suod sa inyo mga ginikanan. Makig-upod sing tayuyon upod sa Cristianong kongregasyon. Sing partikular, panikasugi nga makilala ang mga gulang sa kongregasyon. Nabalaka sila sa inyo kaayuhan kag mahimo mangin tuburan sang pagsakdag kag paumpaw. (Isaias 32:⁠2) Labaw sa tanan, palambua ang suod, mainit nga kaangtanan upod kay Jehova nga Dios. Hatagan niya kamo sing kusog kag handum nga himud-usan ang matarong!

²⁰ Apang, ginapaluya sang iban nga mga pamatan-on ang ila mga panikasog sa pagtubo sa espirituwal paagi sa pagpamati sa malain nga musika. Ang masunod nga artikulo magahatag sing pinasahi nga igtalupangod sini nga topiko.

[Mga Footnote]

Madumduman Mo Bala?

◻ Ngaa ang mga pamatan-on labi na nga madali masulay sang “malimbungon nga mga buhat” ni Satanas?

◻ Ngaa ang pagpakig-upod sing suod sa kalibutanon nga mga pamatan-on makatalagam?

◻ Paano kamo makapalagyo gikan sa seksuwal nga imoralidad?

◻ Paano ninyo mahimud-usan ang suod nga kaangtanan kay Jehova?

◻ Ngaa importante makigkomunikar sa inyo mga ginikanan?

[Piktyur sa pahina 16]

Ang duha nga nagaluyagay maalamon nga magakilalahay sing maayo sa mga lugar, subong sang pag-eskiting sa yelo, nga wala nagahamulag sa ila gikan sa iban nga mga tawo