Ginasunod Mo Bala sing Bug-os si Jehova?
“ANG mga matarong maisog subong sang leon.” (Hulubaton 28:1) Nagatuo sila, nagasalig sing may kompiansa sa Pulong sang Dios, kag masidla nga nagapadayon sa pag-alagad kay Jehova sa atubangan sang bisan anong katalagman.
Samtang ang mga Israelinhon didto sa Sinai sa tapos sila ginhilway sang Dios gikan sa pagkaulipon sa Egipto sang ika-16 nga siglo B.C.E., duha ka tawo ang ilabi na nga nagpakita nga maisog sila subong sang leon. Nagpakita man sila sing katutom kay Jehova sa idalom sang mabudlay nga mga kahimtangan. Ang isa sining mga lalaki amo ang Efraiminhon nga si Josue, nga alagad anay ni Moises kag sang ulihi gintangdo subong tal-us niya. (Exodo 33:11; Numeros 13:8, 16; Deuteronomio 34:9; Josue 1:1, 2) Ang isa pa amo si Caleb, ang anak ni Jefone sang kabikahan ni Juda.—Numeros 13:6; 32:12.
Si Caleb matutom kag makugi nga naghimo sang kabubut-on ni Jehova. Ang iya malawig nga kabuhi sang matutom nga pag-alagad sa Dios nagpaposible sa iya sa pagsiling nga ‘nagsunod sia sing bug-os kay Jehova.’ (Josue 14:8) “Ako matutom sing bug-os sa GINUO, nga akon Dios,” siling sang The New American Bible. Si Caleb “matutom nga nagtuman,” ukon “matutom nga nagtuman sang katuyuan ni,” Jehova nga Dios. (Today’s English Version; The New English Bible) Ginasiling sa iban nga paagi, si Caleb nagsiling: “Akon . . . ginsunod ang GINUO nga akon Dios sa bug-os nga tagipusuon.” (New International Version) Kamusta ka? Ginasunod mo bala sing bug-os si Jehova?
Paglampitaw sa Duta
Handurawa ang imo kaugalingon sa tunga sang mga Israelinhon wala madugay pagkatapos sila ginhilway ni Jehova gikan sa kahiulipnan sa Egipto. Tan-awa kon paano si manalagna Moises matutom nga nagasunod sang mga instruksion sang Dios. Huo, kag talupangda ang pagsalig ni Caleb nga si Jehova nagaupod sa Iya katawhan.
Ikaduha ini nga tuig pagkatapos sang Exodo (Pagguwa) gikan sa Egipto, kag ang mga Israelinhon nagkampo sa Cades-barnea sa kamingawan sang Paran. Nahamtang sila sa dulunan sang Ginsaad nga Duta. Sa sugo sang Dios, si Moises magapadala sing 12 ka lampitaw sa Canaan. Sia nagasiling: “Taklad kamo sa sining dalan paagi sa Negeb, kag tukad kamo sa kabakuluran. Kag tan-awa ninyo ang duta kon ano sia kag ang katawhan nga nagapuyo sa iya, kon mabakod ukon maluya sila, kon diutay ukon madamo sila; kag kon maayo ang duta nga ginapuy-an nila ukon malain, kag kon ano ang mga siudad nga ginapuy-an nila sa mga dulugan ukon sa mga pamakod; kag kon ano ang duta nga matambok ukon maniwang, kag kon sa iya may kakahuyan ukon wala. Kag magpakaisog kamo kag magdala sang bunga sang duta.”—Numeros 13:17-20.
Ginsugdan sang 12 ka lalaki ang ila peligruso nga paglakbay. Ang ila paglakbay naglawig sing 40 ka adlaw. Sa Hebron nakita nila ang mga lalaki nga dalagku. Sa nalupyakan sang Escol, natalupangdan nila ang pagkamabungahon sang duta kag namat-od sa pagdala pauli sang pila ka bunga sini. Mabug-at gid katama ang pungpong sang mga ubas nga ginyayungan ini sang duha sa isa ka yayungan!—Numeros 13:21-25.
Sa pagbalik sa dulugan sang Israel, ang mga lampitaw nagreport: “Nag-abot kami sa duta nga ginpakadtuan mo sa amon, kag nagailig sia sing gatas kag dugus, kag ini amo ang bunga niya. Apang, ang katawhan nga nagapuyo sa duta makusog, kag ang mga siudad nga napamakuran dalagku gid; kag, labot pa, nakita namon didto ang mga kaliwatan ni Anak. Ang mga Amaleknon nagapuyo sa duta sang Negeb, kag ang mga Hethanon kag ang mga Jebusnon kag ang mga Amornon nagapuyo sa kabakuluran, kag ang mga Canaanhon nagapuyo sa ubay sang dagat kag sa ubay sang pangpang sang Jordan.” (Numeros 13:26-29) Ang napulo ka lampitaw indi handa sa pagbaton sang sugo sang Dios kag sa pagmartsa pasulod sa Ginsaad nga Duta.
“Si Jehova Upod sa Aton”
Apang, nagatuo kay Jehova nga Dios, ang dimahinadlukon nga lampitaw nga si Caleb naglaygay: “Magtaklad kita gilayon, kag magtag-iya sini, kay kita makasarang gid sa pagdaug sini.” Apang ang napulo ka lampitaw namatok, nagasiling nga ang mga pumuluyo sang Canaan mas makusog pa sa mga Israelinhon. Ang hinadlukan kag walay pagtuo nga mga espiya nagtamod sang ila kaugalingon subong mga tibakla lamang kon ipaanggid.—Numeros 13:30-33.
“Si Jehova upod sa aton. Dili kamo magkahadlok sa ila,” laygay ni Caleb kag ni Josue. Wala sila ginpamatian sang katawhan. Sang buot sila batuhon sang katawhan, ang Dios nagpasilabot kag namatbat sa mga palakumod: “Indi kamo makasulod sa duta nga nahanungod sa iya nagsumpa ako nga akon kamo papuy-on sa iya, luwas si Caleb nga anak ni Jefone kag si Josue nga anak ni Nun. Apang ang inyo mga magamay . . . sila pasudlon ko, kag magakilala sila sang duta nga inyo ginsikway. . . . Kag ang inyo mga anak magamanugbantay sa kamingawan sing kap-atan ka tuig, . . . tubtob nga mapapas ang inyo mga bangkay sa kamingawan. Suno sa kadamuon sang mga adlaw sang paglampitaw ninyo sang duta, sa kap-atan ka adlaw, sa tagsa ka adlaw sa isa ka tuig, magaantos kamo sang inyo kalautan, bisan kap-atan ka tuig.”—Numeros 14:9, 30-34.
Matutom Gihapon Pagligad sang mga Tinuig
Ang 40 ka tuig nga pamatbat nagligad, kag napatay ang bug-os nga kaliwatan sang mga palakumod. Apang sanday Caleb kag Josue matutom gihapon sa Dios. Sa kapatagan sang Moab, gin-isip ni Moises kag sang Mataas nga Saserdote nga si Eleazer ang mga lalaki sa edad militar nga 20 anyos pataas. Ang Dios naghingalan sang isa ka lalaki gikan sa tagsa ka kabikahan ni Israel nga gintugyanan nga magabahinbahin sang Ginsaad nga Duta. Sanday Caleb, Josue, kag Eleazar amo ang iban sa ila. (Numeros 34:17-29) Bisan pa 79 anyos na karon, si Caleb mapagsik, matutom, kag maisog gihapon.
Sang gin-isip ni Moises kag ni Aaron ang katawhan sa Sinai wala madugay antes mahinadlukon sila nga nagdumili sa pagsulod sa duta sang Canaan, ang mangangaway sang Israel 603,550. Pagligad sang apat ka dekada sa kamingawan, nangin 601,730 na lang ini. (Numeros 1:44-46; 26:51) Apang, upod kay Josue nga nanguna sa ila kag kay Caleb kaupod nila, ang mga Israelinhon nagsulod sa Ginsaad nga Duta kag nakatigayon sing sunodsunod nga kadalag-an. Subong sang pirme nga ginpaabot nanday Josue kag Caleb, si Jehova nagadaug sang mga inaway tungod sa iya katawhan.
Nagatabok sa Suba nga Jordan kaupod sang mga mangangaway sang Israel, ginpas-an sang tigulang na nga sanday Josue kag Caleb ang ila mga lulan sa masunod nga mga inaway. Apang, pagkatapos sang anom ka tuig nga pagpakig-away, madamo pa nga duta ang nabilin nga panag-iyahan. Si Jehova magasubol sa mga pumuluyo apang nagasugo karon nga ang duta pahaton paagi sa papalad sa tunga sang mga kabikahan sang Israel.—Josue 13:1-7.
Ginsunod Niya sing Bug-os si Jehova
Subong beterano sa madamong inaway, si Caleb nagtindog sa atubangan ni Josue kag nagsiling: “Ako kap-atan ka tuig sang ginpadala ako ni Moises nga alagad ni Jehova kutob sa Cades-barnea sa paglampitaw sang duta, kag ginsugiran ko sia sang yari sa akon tagipusuon. Apang ang akon mga utod nga nagtaklad kaupod nakon nagpatunaw sang tagipusuon sang katawhan; walay sapayan ako nagsunod sing bug-os gid kay Jehova nga akon Dios.” (Josue 14:6-8) Huo, si Caleb nagsunod sing bug-os kay Jehova, matutom nga naghimo sang kabubut-on sang Dios.
“Gani,” dugang ni Caleb, “si Moises nagsumpa sadtong adlaw, nga nagasiling, ‘Ang duta nga natapakan sang imo tiil mangin panublion nga dayon sa imo kag sa imo mga anak, bangod nga nagsunod ka sing bug-os kay Jehova nga akon Dios.’ Kag karon, yari karon, suno sa ginpamulong niya, ginbuhi ako ni Jehova sining kap-atan kag lima ka tuig kutob sang tion nga si Jehova naghambal sining pulong kay Moises, sang nagpanlakatan ang Israel sa kamingawan, kag karon, yari karon, ako kawaluan kag lima ka tuig sining adlaw. Sa sining adlaw ako subong pa kakusog sangsa adlaw nga ginpadala ako ni Moises. Subong sang kakusog ko sadto amo ang kakusog ko karon, nga sa pag-awayan, kag sa paguwa kag sa pagsulod. Busa karon ihatag sa akon ining kabakuluran nga ginpamulong ni Jehova sadtong adlaw, kay ikaw nakabati sadtong adlaw kon paano nga ang mga Anakimnon yadto didto pati ang dalagku kag malig-on nga mga siudad. Ayhan si Jehova magaupod sa akon, kag masubol ko sila, suno sa ginpamulong ni Jehova.” Natigayon karon ni Caleb ang Hebron subong panublion.—Josue 14:9-15.
Nabaton sang tigulang nga si Caleb ang pinakamabudlay sa mga asaynment—ang rehiyon nga puno sang mga lalaki nga dikinaandan ang kadakuon. Apang indi ini tuman kabudlay para sa sining 85-anyos nga mangangaway. Sang ulihi ang mga mapiguson nga nagapuyo sa Hebron nalutos. Si Otniel, nga anak sang manghod nga lalaki ni Caleb kag hukom sa Israel, nag-agaw sang Debir. Ang duha ka siudad ginpuy-an sang ulihi sang mga Levinhon, kag ang Hebron nangin siudad nga dalangpan para sa dihungod nga nakapatay.—Josue 15:13-19; 21:3, 11-16; Hukom 1:9-15, 20.
Sunda Pirme sing Bug-os si Jehova
Sanday Caleb kag Josue mga dihimpit nga tawo. Apang, matutom nila nga ginhimo ang kabubut-on ni Jehova. Ang ila pagtuo wala mag-ugdaw sa sulod sang 40 ka tuig nga kabudlayan sa kamingawan nga nagresulta sa dipagsunod sang Israel sa Dios. Sa kaanggid, wala ginatugutan sang modernong-adlaw nga mga alagad ni Jehova ang bisan ano nga mag-upang sa ila pag-alagad sa kadayawan sang Dios. Bangod nahibaluan nila ang inaway sa ulot sang organisasyon sang Dios kag sang iya ni Satanas nga Yawa, malig-on sila, padayon nga nagapanikasog nga pahamut-an ang ila langitnon nga Amay sa tanan nga butang.
Halimbawa, madamong katawhan ni Jehova ang nagrisgo sang mapintas nga pagtratar kag bisan kamatayon agod masaulog ang Panihapon sang Ginuo, ukon Memoryal sang kamatayon ni Jesucristo. (1 Corinto 11:23-26) May kaangtanan sini ang isa ka Cristianong babayi nga nabilanggo sa kampo konsentrasyon sang Nazi sang Inaway Kalibutanon II nagreport:
“Ang tanan ginsilingan nga mangin didto sa lugar nga lalabhan (laundry) sa alas 11 s.g. Eksakto alas 11 s.g., nagtipon kami, 105 sa kadamuon. Nagtindog kami sing pabilog, sa tunga [sini amo] ang bangko nga may puti nga tela nga may mga emblema. Isa ka kandila ang nagasuga sa hulot, kay mahimo kami makita sa de-koryente nga suga. Kaangay kami sang unang mga Cristiano sa mga katakumba. Isa yadto ka solemne nga selebrasyon. Ginpabutyag namon sa liwat ang amon hanuot nga sumpa sa amon Amay nga gamiton ang amon tanan nga kusog sa pagbindikar sa Iya balaan nga ngalan, sa pagtindog nga malig-on sa Teokrasya.”
Walay sapayan sang mga pagtilaw sa aton subong ginhingabot nga mga alagad ni Jehova, makasalig kita sa hatag-Dios nga kusog nga alagaron sia sing maisog kag padunggan ang iya balaan nga ngalan. (Filipos 4:13) Samtang ginapanikasugan naton nga pahamut-an si Jehova, mas maayo nga dumdumon naton si Caleb. Ang iya halimbawa sa pagsunod sing bug-os kay Jehova nagpahamuot gid sa isa ka pamatan-on nga lalaki nga nagsulod sa bug-os tion nga pagbantala nga hilikuton sadtong 1921. Sia nagsulat:
“Bisan pa nga ang pagpayunir nagkahulugan sang pagbiya sa akon masulhay nga trabaho sa isa ka modernong imprintahan sa Coventry [Inglaterra], wala ako maghinulsol. Ang akon dedikasyon naglubad na sang problema; ang akon kabuhi gindedikar sa Dios. Nadumduman ko si Caleb, nga nakasulod sa Ginsaad nga Duta kaupod ni Josue kag sa iya ginsiling, ‘Ginsunod niya sing bug-os si Jehova.’ (Jos. 14:8) Isa ini ka maayong panimuot para sa akon. Nahibaluan ko nga ang pag-alagad ‘sing bug-os’ sa Dios magahimo sang akon dedikadong kabuhi nga mas importante; magahatag ini sa akon sing dugang pa nga kahigayunan nga mapatubas ang bunga nga nagatanda sa Cristiano.”
Si Caleb ginpakamaayo gid tungod sang matutom nga pagsunod sing bug-os kay Jehova, pirme nagtinguha sa paghimo sang balaan nga kabubut-on. Kaangay niya, ang iban nakatigayon sing dakung kalipay kag bugana nga mga pagpakamaayo sa pag-alagad sa Dios. Kabay nga amo sina ang imo maeksperiensiahan subong isa ka tawo nga padayon nga nagasunod sing bug-os kay Jehova.
[Piktyur sa pahina 26]
Sanday Caleb kag Josue matutom kay Jehova sa idalom sang pagtilaw. Ikaw bala?