Mapinasalamaton sa Dalayon nga Pagsakdag ni Jehova

PANUGIRON NI SHARON GASKINS

PARAISO sa duta! Nakita ko ang akon kaugalingon nga nagaduludalagan sa katamnan, nagalagas sang mga alibangbang, nagadugsing sa mga totoy nga leon. Kanami gid pamatian! Apang may pagpangduhaduha​—⁠serioso nga pangduhaduha. Ang akon paglaum masunson nga nagadangat sa kasubo!

Suno sa akon madumduman, ang wheel­chair amo ang akon nagaunay nga kaupod. Kutob sa pagkatawo, gin-agaw sa akon sang cerebral palsy ang kasadya sang pagkabata. Nagainudyak ang iban nga kabataan sa pagsakay sa mga ­skate kag bisikleta, apang ako akon nagapungko sing isahanon, indi makalakat. Gani sang gindala ako ni Nanay sa lainlain nga mga ­faith heal­er, hanuot kami nga naglaum sa isa ka milagro. Apang, sa tagsa ka tion, wala ako mag-ayo. Makapaluya gid matuod para sa akon, apang daw ano ka makapasubo para sa iya!

Sa pagpangita sing matuod nga paglaum, nagsugod sa pagtuon sang Biblia ang akon iloy upod sa mga Saksi ni Jehova sadtong temprano sang 1964. Mga anom ka tuig kag tunga ako sadto.

Makalilipay mahibaluan nga may isa sadto ka matahom nga paraiso diri sa duta. Sing makapasubo, nadula ini sang una nga tawo, nga si Adan, apang ginhandum ko ang malapit nga kaangtanan sa Dios nga iya natigayon sadto. Ano ayhan ang kaanggid sang pagtigayon sing kaangtanan sa Dios? Ukon ang magkabuhi sang yari pa sa duta ang iya kaugalingon nga Anak? Ang akon pagdalamguhanon nagdala man sa akon sa palaabuton nga Paraiso. Bisan sa sadtong linghod nga pang-edaron, napat-od ko nga nasapwan namon ang kamatuoran.

Pagpasiplat sa Paraiso

Ginsugdan ni Nanay nga dalhon ang pamilya sa Kingdom Hall sang mga Saksi ni Jehova. Tuhay gid ang ila mga miting sangsa amon nakita sa mga simbahan! Natandog gid ako sang mga tawo kag sang kahimtangan sa palibot.

Ang pagdala sa amon sa Kingdom Hall isa ka kabudlayan para sa akon iloy. Magluwas sa akon, yara pa ang akon tatlo ka manghod, kag wala kami sing salakyan. Nagataksi kami kon may inugbayad sia. Madumduman ko pa ang iya daku nga panikasog isa ka Domingo. Wala gid sing taksi. Nian, sang hinali kag sa wala ginapaabot, may nag-abot nga tawo sakay sa iya trak kag ginpasakay kami. Naulihi kami sa miting, apang nakadangat gid man kami didto. Daku gid ang amon pasalamat kay Jehova!

Sang ulihi, mahigugmaon nga nagbulosbulos sa pagsugat sa amon ang amon palangga nga kauturan nga lalaki kag babayi nga may mga salakyan. Ang pagpalig-on ni Nanay nga indi gid magpalya sa mga miting magluwas kon nagamasakit gid kami sing grabe nagpatudok sa akon linghod nga panghunahuna sang importansia sang ‘pagtilipon sing tingob.’ (Hebreo 10:​24, 25) Ginpahulag sang iya natun-an, gindedikar sang akon iloy ang iya kabuhi kay Jehova kag nabawtismuhan sang 1965.

Sadto nga tion hamtong na ako agod maapresyar sing lubos ang mga miting. Sa Kongregasyon sang Cypress Hills sa Brooklyn, Nueva York, may mga Europeanhon, mga itom, mga Katsila, kag iban pa nga nagasimba sing nahiusa. Nagakaigo lamang nga ang mahinadlukon sa Dios nga mga tawo magkabuhi sa sinang matuod nga paghiliutod.​—⁠Salmo 133:⁠1.

Gintudluan ako sang akon iloy kon paano maghanda. Indi problema ang akon hunahuna, apang ang problema amo ang akon lawas. Ginapabudlay sang cerebral palsy ang mahapos nga mga hilikuton. Imposible sadto kag tubtob karon para sa akon ang magkurit sing tadlong agod tandaan ang mga sabat sa amon literatura sa Biblia. Apang, paagi sa paghanas, nag-uswag ang akon pagkurit.

Puno sing butang nga inughambal ang akon hunahuna. Apang sa pagguwa sini sa akon baba, nagasilinakot ang mga tinaga. Kinahanglan ang magrelaks agod indi magpalanghugot ang akon mga kaunuran. Kinahanglan ko man nga magkonsentrar sa pagmitlang sang tagsa ka tinaga sing maathag. Nagabatyag ako sing kapaslawan kon indi maathag ang akon komento ukon kon matalupangdan ko nga wala mahangpan sang iban ang akon ginahambal. Apang kon maanad na sa akon ang mga kauturan nga lalaki kag babayi, amo kag mahangpan na nila sing maayo ang akon ginahambal. Apang, ginabudlayan gihapon ako sa sini nga kasablagan.

Anom ka Makapasubo nga Bulan

Sa edad nga walo ka tuig, may anom ka bulan ako nga eksperiensia nga nakaapektar sa akon tubtob sa karon. Walay sapayan sang tanan nga terapiya sa pisikal, pagtrabaho, kag paghambal nga ginpadapat sa akon, ginpadala ako sang mga doktor sa isa ka rehabilitasyon nga ospital sa West Haverstraw, Nueva York. Ginsubuan gid kami sang akon iloy. Mga tuig antes sadto, sang sayop ako nga gin-usisa sang mga doktor subong may diperensia sa hunahuna, ginsilingan sila sang akon iloy nga indi gid sia magpasugot nga ipasulod ako sa bululngan sang mga may diperensia sa hunahuna. Gani bisan ang temporaryo nga pagbulagay mabudlay para sa iya. Apang, nakita niya nga ang pagkabuhi ko sing mapatubason nga wala nagasandig sa iya kag sa akon amay makabulig sa akon nga mangin independiente sa pisikal.

Maayo ang mga pasilidad, apang nagbatyag ako nga ginbayaan. Makita sa akon mga pagtiyabaw kag pagbisyo nga wala ko maluyagan ang duog. Indi mahimo sang akon mga ginikanan ang pirme magbiyahe sing tatlo ka oras sakay sa bus agod duawon ako, ilabi na nga nagabusong si Nanay sang iya ikalima nga bata. Kon maglakat na sila, nagakasubo ako sing tuman sa bagay nga nagsiling ang doktor nga lakalakaon lang nila ang mga pagduaw. Makaduha lamang ka beses nga gintugutan ako sa pagpauli.

Gintudluan ako sang mga terapista nga makalakat paagi sa bulig sang mga laki-laki kag sang ginpabug-atan sing tingga nga mga baston. Tuman sini ka bug-at. Apang, nakabulig ini sa akon nga makabalanse kag makalikaw nga matumba. Amo ini ang una nga tikang sa paglakat nga wala sing mga laki-laki.

Ang paggulot sing pagkaon, pagbutones​—⁠ang bisan ano nga hilikuton nga nagakinahanglan sing paggamit sa mga tudlo​—⁠mabudlay kon indi imposible para sa akon. Apang sa pila ka kasangkaron natun-an ko ang magkaon kag mag-ilis sing kinaugalingon. Nakabulig ini sang ulihi sa akon pag-alagad sa Dios.

Natapos ang akon paghanas kag nagpauli ako liwat sa balay. Sa gilayon ginpagamit sa akon ni Nanay ang akon bag-o nga mga ikasarang. Ang paghimo sini isa ka pagpakig-away sa balatyagon, kay bisan luyag ko maghimo sang mga butang sing kinaugalingon, ang paghimo sini makapaluya, madugay, kag makakalapoy. Ti, ang pag-ilis lamang para sa mga miting duha ka oras nga trabaho!

Sang nakasaylo kami sa tabok mismo sang Kingdom Hall, nagalakat lamang ako sing isahanon. Isa gid ka daku nga kadalag-an!

Ang Pinakamalipayon nga Adlaw sang Akon Kabuhi

Ginapat-od gid sang akon iloy nga may balanse nga pagkaon sa espirituwal ang pamilya. Gintun-an niya ako kag nagpaabot nga basahon ko ang tagsa ka guwa sang aton mga balasahon, Ang Lalantawan kag Magmata! May mga miting nga dapat handaan kag tambungan. Bisan malangkagon nga ginabaton sang akon tagipusuon kag hunahuna ini nga ihibalo, ang serioso nga paghunahuna sa pagdedikar sang akon kabuhi kay Jehova kag sa pagsimbulo sini paagi sa pagpabawtismo sa tubig wala ko ginpamensar. Ginbuligan ako ni Nanay nga makita nga walay sapayan sang akon kasablagan, may espirituwal ako nga salabton sa Dios. Indi ko mapaabot nga makasulod sa bag-ong kalibutan nga nagasalig lamang sing bug-os sa iya.

Ang akon kahimtangan naghimo sa akon nga tuhay sa iban​—⁠isa ka masakit nga kamatuoran para sa isa ka tin-edyer. Mabudlay batunon ang akon mga kasablagan. Pirme ako ginadaug sang kaakig, kag dapat ini kontrolon antes sang bawtismo. (Galacia 5:​19, 20) Apang paano kon indi ko mahimo ang magkabuhi suno sa akon dedikasyon kay Jehova?

Sa pangabay sang akon iloy, ginsugilanon ako sang isa ka gulang sang kongregasyon. Ginkutlo niya ang pamangkot ni manalagna Elias sa mga Israelinhon: “Tubtob pa bala san-o nga magpiniang kamo sa tunga sang duha ka panghunahuna?” (1 Hari 18:21) Sing maathag, wala mahamuot si Jehova sa akon pagpangduhaduha.

Nagbugtaw ako sa espirituwal kag hanuot nga nangamuyo para sa bulig ni Jehova para sa determinasyon nga idedikar ang akon kabuhi sa iya. Gintun-an ako sang isa ka utod nga babayi sa kongregasyon. Hoben sia sangsa akon kag napatay ang iya iloy sang gamay pa sia. Walay sapayan, nagdedikar sia sa Dios sang bataon pa sia.

Sa edad nga 17, bug-os na ang akon panghunahuna. Luyag ko alagaron si Jehova sa bug-os ko nga masarangan. Ang Agosto 9, 1974​—⁠sang ginbawtismuhan ako⁠—​amo ang pinakamalipayon nga adlaw sa akon kabuhi.

Kalipay sa Ministeryo

Ang pagpakigbahin sa ministeryo nagdala sing pila ka tulad-bukid nga mga kabudlayan. Ang pinakadaku nga hangkat amo kon paano ako mahangpan. Kinahanglan ko maghambal sing maathag. Kag, kon kinahanglan, ginasulit sang akon kaupod sa ministeryo sa latagon ang akon ginahambal sa tagbalay. Negatibo ang reaksion sang iban, ginatamod ako subong isa ka biktima sang paghingalit sang mga Saksi. Apang kinamatarong ko kag handum sang akon tagipusuon ang magbantala.

Tuman ka makakalapoy ang maglakat sa balay kag balay bisan sa isa ka bloke lamang. Madamo nga kabalayan sa amon teritoryo ang may mga hagdanan, nga indi ko masaka. Kon tigtulugnaw, ang mga yelo sa kalye nagahimo sang pamalaybalay nga hilikuton nga imposible para sa akon. (Binuhatan 20:20) Apang, ginbuligan gid ako sing daku sang akon mga kauturan sa espirituwal, kag ginpakamaayo ako ni Jehova sang isa ka de-motor nga wheel­chair, nga nagpahapos sing daku sang akon ministeryo.

Sang ulihi, nagsugod ako sa pagpanaksi paagi sa sulat. Indi ako puwede magsulat paagi sa kamot bangod indi mabasa ang akon agi sang kalabanan nga mga tawo. Gani ang de-koryente nga makinilya amo ang akon nangin manunulat. Tuman sa akon ka hinay magmakinilya bangod sing mapigaw nga paghilituhog sang akon kamot. Mga katunga sang tion, ginatumod ko ang isa ka letra pero tuhay ang matublok ko. Mga isa ka oras ukon kapin pa ang akon mahinguyang sa pagmakinilya sang isa lamang ka pahina.

Walay sapayan sang maluya nga panglawason, sa tion kag tion nagaauxiliary payunir ako, nagahinguyang sing 60 ka oras ukon kapin pa sa ministeryo sa isa ka bulan. Nagakinahanglan ini sing maayo nga iskedyul, dugang nga panikasog, kag sing bulig sang mga masigkatumuluo. Napalig-on ako sang ila espiritu sa pagpayunir. Si Nanay naghatag man sing isa ka maayo nga halimbawa paagi sa pag-alagad subong regular ukon isa ka auxiliary payunir samtang nagaatubang sing mga kabudlayan, mapigaw nga panglawas, kag ang hangkat sing pagpadaku sa pito ka kabataan sa sulod sang nabahinbahin sa relihion nga panimalay.

Sa Akon Pagkinaugalingon

Sa edad nga 24 anyos, nagdesisyon ako nga magkabuhi sing kinaugalingon. Ang akon pagsaylo sa seksion sang Benson­hurst sa Brook­lyn nangin isa ka pagpakamaayo. Ang Kongregasyon sang Marl­boro kaangay sang isa ka suod nga pamilya. Makapalig-on gid sa pagtuo ang mangin sa tunga nila! Bisan duha lamang ukon tatlo ang magamit nga salakyan sa kongregasyon, ginadala ako sang akon espirituwal nga mga kauturan sa tanan nga miting. Apang wala ako magdugay didto.

Nagbatyag sing daku nga kapaslawan, nagpauli ako sa akon pamilya kag ginpung-awan sa sulod sang tatlo ka tuig. Nagbalalik ang pagkamaakigon. Dayon nag-abot ang panghunahuna nga maghikog kag ang pila ka beses nga pagtilaw nga himuon ini. Pirme ako ginapahog sang kamatayon. Apang nagsalig ako sing daku sa Dios kag nanaad nga ipakita ang pag-apresyar sa iya dulot nga kabuhi. Ang mga gulang naghatag sa akon sing paglipay kag laygay. Ini, upod ang pangamuyo, personal nga pagtuon, paumod sa bahin sang akon mga ginikanan, kag ang pila ka propesyunal nga bulig, nagtadlong sang akon panghunahuna.

Paagi sa Ang Lalantawan, mahigugmaon nga gin-aman ni Jehova ang paghangop tuhoy sa daku nga kapung-aw. Huo, nagaulikid gid sia sa iya katawhan kag ginahangop ang aton mga balatyagon. (1 Pedro 5:​6, 7) Sang ulihi nagkanay gid man ang kapung-aw. Napulo ka tuig sang ulihi, padayon ako nga ginabuligan ni Jehova sa pag-atubang sa kapaslawan kag kapung-aw. Kon kaisa daw ginadaug ako sang balatyagon nga wala ako sing pulos. Apang, ang pangamuyo, pagtuon sa Biblia, kag ang akon espirituwal nga pamilya isa ka dalayawon nga bulig sa akon nga indi mag-ampo.

Pagkatapos sang walay resulta nga pagpangita sing lain nga apartment, may pang-alag-ag ako nga namat-od nga magpuyo upod sa akon pamilya sa bilog ko nga kabuhi. Nian ginsabat ni Jehova ang akon mga pangamuyo. May isa ka bakante nga duog sa Bedford-Stuyvesant nga seksion sang Brooklyn. Sang hingapusan sang tig-ilinit sang 1984, nagsaylo ako, kag didto nagpuyo kutob sadto.

Mahigugmaon nga ginadala ako sa mga miting sang mga katapo sang Kongregasyon sang Laf­fayette. Lab-as pa sa akon hunahuna ang una nga Pagtinuon sa Libro sang Kongregasyon nga natambungan ko. Ginhiwat ini sa ikaapat nga panalgan​—⁠kag wala sang elebeytor! Sa bulig lamang ni Jehova nga nakasaka ako kag nakapanaug sa hagdanan. Sang ulihi gintudlo sa akon ang mas mahapos kadtuan nga duog sang pagtinuon. Kag karon ginpakamaayo ako ni Jehova sing pribilehiyo nga may isa ka Pagtinuon sa Libro sang Kongregasyon sa akon balay.

Isa ka makadalayaw nga espiritu sa pagpayunir ang nagaluntad sa sini nga kongregasyon. Sang pag-abot ko, may yara mga 30 ka payunir, kag ginhatagan ako sing pinasahi nga pag-ulikid kag igtalupangod sang pila sa ila. Ang makugi nga palibot nagpahulag sa akon nga mag-auxiliary payunir sing masunson.

Sang Abril 1990 ang mga Kongregasyon sang Laf­fayette kag Pratt nagtukod sang isa ka bag-o nga Kingdom Hall sa mismo nga kalye sang akon apartment. Sibu man ini sa tion, kay bangod sang nagadugang nga pisikal nga pagluya, nangin problema liwat sa akon ang maglakat. Apang, paagi sa akon de-motor nga scooter kag sa bulig kag pagsakdag sang akon espirituwal nga mga kauturan nga lalaki kag babayi, makalilipay ang pagpakadto-pakari sa mga miting. Ginaapresyar ko gid ining mahigugmaon nga bulig!

Mapinasalamaton sa Pagsakdag sang Dios

Bisan mahuyang ang akon mga tiil, malig-on ang akon tagipusuon. Ang maayo nga edukasyon nagpahapos gawa sang kabuhi, apang ginsakdag ako sang Dios. Kon kaisa indi ko mahibaluan kon diin kuhaon ang akon kaunon, apang ginsakdag ako ni Jehova kag nangin matutom nga Manug-aman sa akon. Importante sa akon, sa pagkamatuod, amo ang mga pulong ni David: “Nangin pamatan-on ako, kag karon tigulang na, apang wala ako makakita nga ang matarong ginpabayaan, ukon ang iya kaliwat nga nagpakilimos sing kalan-on.”​—⁠Salmo 37:​23-25.

Makapila nga nahuptan ko ang Makasulatanhon nga tindog bangod ginbuligan ako ni Jehova nga pangindian ang dugo sa tion sang operasyon. (Binuhatan 15:​28, 29) Napatay ang akon amay sining karon lang. Ang madulaan sang isa ka mahal sa kabuhi tuman gid ka makapasubo. Ang kusog lamang gikan kay Jehova ang nagbulig sa akon sa sini kag sa iban pa nga mga pagtilaw.

Kon kaisa nagapalibog ako kon ano ang matabo sa akon sa palaabuton. Mahimo nga padayon nga magluya ang akon nga panglawas, apang ang akon pagsalig sa Dios kag ang akon kaangtanan sa iya amo ang akon kabuhi. Daku gid ang akon kalipay nga mangin sa tunga sang katawhan ni Jehova kag matigayon ang iya dalayon nga pagsakdag!