Ang Kabuganaan Mahimo Magtilaw sang Imo Pagtuo

ANG kabuganaan mahimo magtilaw sang pagtuo sang matadlong nga tawo. Ang paghimulat nga magbugana sa materyal mahimo magdul-ong sa pagkawasi sang pagtuo. (1 Timoteo 6:​9, 10) Apang ang kabuganaan mahimo man magtilaw sang pagtuo sa isa pa ka paagi. Kon makita sang isa ka matarong nga tawo nga madamong dimatarong nga mga tawo ang nagabugana sa materyal samtang sia nagaantos, mahimo sia masulay sa paglakat sa didiosnon nga dalanon. Ti, nagdul-ong pa gani ini sa pila ka mga alagad ni Jehova nga duhaduhaan ang balor sang paglakat sa matadlong nga pagkabuhi!

Natabo ini sa Levinhon nga musikero nga si Asap sang panahon sang hari sang Israel nga si David. Si Asap nagkomposo sing mga salmo nga gingamit sa publiko nga pagsimba. Upod nanday Heman kag Jedutun, nagtagna man sia, naghatag kay Jehova nga Dios sing kadayawan kag pasalamat sa akompanyamento sang musika. (1 Cronica 25:1; 2 Cronica 29:30) Bisan pa nga may pribilehiyo si Asap, ginapakita sang Salmo 73 nga ang materyal nga kabuganaan sang malauton nga mga tawo isa ka daku gid nga pagtilaw sa iya pagtuo.

Ang Makatalagam nga Panimuot ni Asap

“Sa pagkamatuod ang Dios maayo sa Israel, sa mga putli sa tagipusuon. Apang ako, ang akon mga tiil diutayan lang makadanlog, ang akon mga tikang diutayan lang makadalin-as.” (Salmo 73:​1, 2) Paagi sa sining mga pinamulong, ginbaton ni Asap nga si Jehova maayo sa pungsod sang Israel. Ilabi na gid sa “mga putli sa tagipusuon,” kay handum nila nga hatagan ang Dios sing eksklusibo nga debosyon kag makaamot sa pagpakabalaan sa iya balaan nga ngalan. Kon may amo kita sina nga panimuot, pakamaayuhon naton si Jehova paagi sa pagpamulong sing maayo tuhoy sa iya bisan pa kon ginatilawan kita sing daku bangod sang kabuganaan sang malauton ukon bangod sang iban pa nga kahimtangan.​—⁠Salmo 145:​1, 2.

Bisan pa nahibaluan ni Asap ang pagkaayo ni Jehova, ang iya mga tiil diutayan lang makadanlog gikan sa matarong nga banas. Daw nagakadalin-as ini sa mayelo nga duta sa tion sang makakalapoy nga mara­thon. Ngaa ang iya pagtuo nangin tuman kaluya? Sia nagpaathag: “Kay nahisa ako sa mga matinaastaason, sang nakita ko ang kauswagan sang malauton. Kay wala sing mga kasakit sa ila kamatayon; kundi ang ila tiyan matambok. Wala sila sa kagamo subong sa iban nga mga tawo, kag wala sila sa kalalat-an kaangay sa iban nga mga tawo.”​—⁠Salmo 73:​3-5.

Bangod sang materyal nga kabuganaan sang dimatarong nga mga tawo, si Asap nahisa sa ila. Daw malinong ang ila pangabuhi, bisan pa nakatipon sila sing manggad paagi sa madayaon nga mga paagi. (Ipaanggid ang Salmo 37:⁠1.) Walay sapayan sang ila malaut nga mga buhat, gikan sa guwa nga dagway malig-on sila. Aba, ang ila kabuhi daw matapos nga wala sing mga kasakit sa ila kamatayon! Kon kaisa nagakapatay sila sing malinong kag matawhay, nga wala makahibalo sang espirituwal nga kinahanglanon. (Mateo 5:⁠3) Sa pihak nga bahin, ang iban sang mga alagad sang Dios nagaantos sing masakit nga balatian kag kamatayon, apang ginasakdag niya sila, kag may yara sila makalilipay nga paglaum sang pagkabanhaw.​—⁠Salmo 43:​1-3; Juan 5:​28, 29.

Madamong malauton ang wala sing problema sa panglawas nga nagapugong sa ila gikan sa pagtigayon sing bugana nga pagkaon. “Ang ila tiyan matambok,” ang ila tiyan dalagku. Apang, wala sila sing “kagamo subong sa iban nga mga tawo,” kay indi kaangay sang kalabanan nga mga tawo, indi nila kinahanglan nga maghimakas agod matigayon ang mga kinahanglanon sa kabuhi. Si Asap naghinakop nga ang mga malauton “wala sa kalalat-an kaangay sa iban nga mga tawo.” Ilabi na nga nalikawan nila ang mga pagtilaw nga naeksperiensiahan sang mga diosnon nga tawo bangod ang naulihi nagsunod sa matarong nga mga pagsulundan ni Jehova sa malauton nga kalibutan ni Satanas.​—⁠1 Juan 5:⁠19.

Bangod ang malauton nagabugana, si Asap padayon nga nagsiling: “Busa ang bugal subong sang kulintas sa ila liog; ang kasingki nagaputos sa ila subong sang panapton. Ang ila mga mata nagabuslo sa katambukon; may yara sila nga labaw pa sa mahandum sang tagipusuon. Nagayubit sila kag sa pagkamalaut nagamitlang sing pagpigos; nagapamulong sila sing matinaastaason. Napahamtang nila ang ila baba sa mga langit, kag ang ila dila nagadayandayan sa duta.”​—⁠Salmo 73:​6-9.

Ang mga malauton nagasuksok sang bugal subong sang “kulintas,” kag tuman kadamo ang ila masingki nga mga buhat nga “nagaputos ini sa ila subong sang panapton.” Determinado nga masunod ang ila luyag, ginayubit nila ang iban. Ang mga mata sang mga malauton wala nagapalangdalom bangod sang kakulang sing pagkaon kundi “nagabuslo sa katambukon,” nagamudlo bangod sang sobra nga katambukon nga resulta sang pagkahakugan. (Hulubaton 23:20) Tuman ka madinalag-on ang ila buko nga ‘nalabawan pa nila ang mahandum sang ila tagipusuon.’ Ginapamulong nila ang iya pangdaya sa bugalon, “matinaastaason” nga paagi. Ti, ‘ginpahamtang nila ang ila baba sa mga langit, kag ang ila dila nagadayandayan sa duta’! Wala sing pagtahod kay bisan sin-o sa langit ukon sa duta, napasipalahan ang Dios kag nahalitan nila ang mga tawo.

Sing maathag, indi lamang si Asap ang naapektuhan sing malain sang kon anong nakita niya. Nagsiling sia: “Busa ang iya [Dios] katawhan nagabalik diri, kag ang mga tubig sang puno nga tagayan ginahubas nila. Kag nagasiling sila: ‘Paano bala ang pagkahibalo sang Dios? May kaalam bala sa Labing Mataas?’ ” (Salmo 73:​10, 11) Ang Hebreong teksto mahimo magkahulugan nga bangod ang mga malauton daw nagabugana, ang pila sa tunga sang katawhan sang Dios may sayop nga panimuot kag nangin kaangay sa kahimtangan sang mga malinapason, nga nagasiling: ‘Ang Dios wala makahibalo kon ano ang nagakatabo kag indi sia magapanghikot batok sa mga malinapason.’ Sa pihak nga bahin, ang makita ang mga malauton nga nagabuhat sing pagkamalinapason nga daw wala masilutan kaangay sang pag-inom sing mapait nga ilimnon, nga nagapahulag sa matadlong sa pagpamangkot: ‘Paano mapahanugutan sang Dios ini nga mga butang? Wala bala niya makita kon ano ang nagakatabo?’

Nagapaanggid sang iya kahimtangan sa iya sang malauton, si Asap nagsiling: “Yari karon! Amo ini ang mga malauton, subong nga matawhay sing dalayon. Nagadugang sila sa manggad. Sa pagkamatuod walay pulos ang pagtinlo ko sang akon tagipusuon kag ang paghinaw ko sang akon mga kamot sa pagkawalay sala. Kay sa bug-os nga adlaw ginsakit ako, kag ginsilutan agaaga.” (Salmo 73:​12-14) Nagbatyag si Asap nga walay pulos ang magkabuhi sing matadlong. Ang mga malauton nagmanggaranon, kaangay sang ‘pagdugang sang ila manggad’ paagi sa daya. Daw nalikawan nila ang silot sa pinakamalain nga sala, apang si Asap ginsakit “sa bug-os nga adlaw”​—⁠kutob sang pagbugtaw niya tubtob sa pagtulog niya sa gab-i. Nagbatyag sia nga si Jehova nagasilot sa iya agaaga. Sanglit daw indi ini makatarunganon, nagtilaw ini sang pagtuo ni Asap.

Pagpasibu sing Panghunahuna

Narealisar sang ulihi nga ang iya panghunahuna sayop, si Asap nagsiling: “Kon nakasiling ako: ‘Ako magapamulong sing subong,’ kuntani nakaluib ako sa kaliwatan sang imo mga anak. Kag sang naghunahuna ako kon paano nga mahibaluan ko ini; ini tama kasakit sa akon, tubtob nga nagsulod ako sa daku nga santuaryo sang Dios. Nian nagpatugsiling ako sang ila kaulihian. Sa pagkamatuod ginapahamtang mo sila sa madanlog nga mga duog. Ginahulog mo sila sa kalaglagan. O daw ano nga nangin mamingaw sila sa isa ka tion! Napapas sila sing bug-os nga may kakugmat! Subong sang damgo kon ang isa nagmata, sa amo, O Jehova, kon ikaw magmata, magatamay ka sang ila larawan.”​—⁠Salmo 73:​15-20.

Maayo nga si Asap wala magreklamo, kay ang pagsiling sing dayag nga walay pulos ang mag-alagad kay Jehova mahimo nga nagpaluya sing buot sang mga katapo sang iya panimalay sang mga sumilimba ukon mahimo nga nagpaluya sang ila pagtuo. Daw ano kaayo nga maghipos kag himuon ang ginhimo ni Asap! Agod makita kon ngaa ang mga malauton daw nakapalagyo sa sala samtang ang matarong nagaantos, nagkadto sia sa santuaryo sang Dios. Ina nga palibot nagtugot kay Asap nga makapamalandong sing malinong sa tunga sang mga sumilimba ni Jehova, kag ang iya panghunahuna napasibu. Busa karon, kon ginatublag kita sang kon ano ang aton nakita, mangita man kita sing sabat sa aton mga pamangkot paagi sa pagpakig-upod sa katawhan sang Dios sa baylo nga painon ang aton kaugalingon.​—⁠Hulubaton 18:⁠1.

Narealisar ni Asap nga ang Dios nagbutang sa mga malauton sa “madanlog nga mga duog.” Bangod ang ila kabuhi nagapalibot sa materyal nga mga butang, may katalagman nga magaantos sila sing hinali nga pagkapukan. Sa ulihi, ang kamatayon magalab-ot sa ila sa katigulangon, kag ang ila manggad nga natigayon sa malain nga paagi indi magapasalig sing mas malawig nga kabuhi para sa ila. (Salmo 49:​6-12) Ang ila kabuganaan mahimo nga mangin isa ka maabtik nga damgo nga nagaligad. Ang katarungan mahimo nga makalab-ot sa ila antes sila magtigulang kay anihon nila kon ano ang ila ginsab-ug. (Galacia 6:⁠7) Bangod hungod nila nga ginpasapayanan ang Isa lamang nga makabulig sa ila, ginbilin sila nga wala sing mahimo, wala sing paglaum. Kon si Jehova magapanghikot batok sa ila, tamdon niya ang ila “larawan”​—⁠ang ila kabuganaan kag kahimtangan⁠—​nga may pagtamay.

Bantayi ang Imo Reaksion

Bangod sang iya indi maayo nga reaksion sa kon ano ang iya nakita, si Asap nagbaton: “Kon ang akon kalag nagkalisod kag ginsuntok ako sa akon mga batobato, kag indi ako makatarunganon kag indi makahibalo; daw sapat ako sa atubangan mo. Walay sapayan nagaupod ako sa imo sing dalayon; ginkaptan mo ang akon kamot nga tuo. Magatuytoy ka sa akon sang imo laygay, kag ugaling batunon mo ako sa himaya.”​—⁠Salmo 73:​21-24.

Ang pagkabuhi sa materyal nga kabuganaan sang mga malauton kag sa pag-antos sang mga matarong magapalisod sang tagipusuon sang isa ka tawo ukon magamapait sa iya. Sa sulod niya​—⁠sa iya mga batobato⁠—​ang pagkatublag ni Asap tungod sang iya kahimtangan naghatag sa iya sing daku nga kasakit. Gikan sa punto-de-vista ni Jehova, nangin kaangay sia sang dimakatarunganon nga sapat nga nagahulag pasad lamang sa pisikal nga paghantop. Apang, si Asap ‘nagaupod sing dalayon sa Dios, nga nagakapot sang iya kamot nga tuo.’ Kon magsala kita sa aton panghunahuna apang nagapangita sang laygay ni Jehova subong sang ginhimo ni Asap, ang Dios magakapot sa aton sa kamot, magasakdag kag magatuytoy sa aton. (Ipaanggid ang Jeremias 10:23.) Paagi lamang sa pag-aplikar sa iya laygay nga mahimo kita makatigayon sing malipayon nga palaabuton. Mahimo kita paubson sa makadali, apang pahanabuon ni Jehova ang pagbaliskad, ‘nagahimaya sa aton,’ ukon nagapadungog.

Nagaapresyar sang pagkinahanglan sing pagsalig kay Jehova, si Asap nagdugang: “Sin-o bala ang akon sa langit kundi ikaw? Kag wala ako sing ginahandum sa duta luwas sa imo. Ang akon unod kag ang akon tagipusuon nagaluya. Apang ang Dios kusog sang akon tagipusuon kag akon bahin tubtob sa tion nga dinapat-od. Kay, yari karon! ang mga malayo sa imo mawala. Ginlaglag mo tanan sila nga nagamakihilawason nga nagatalikod sa imo. Apang maayo sa akon nga magpalapit sa Dios. Ginhimo ko nga akon dalangpan ang Soberanong Ginuo nga si Jehova, agod nga masugid ko ang tanan mong binuhatan.”​—⁠Salmo 73:​25-28.

Kaangay ni Asap, wala na sing iban kundi si Jehova lamang ang masaligan naton para sa matuod nga kalig-unan kag paumpaw. (2 Corinto 1:​3, 4) Gani sa baylo nga magkaibog sa dutan-on nga manggad ni bisan sin-o, alagaron naton ang Dios kag magtipon sing bahandi sa langit. (Mateo 6:​19, 20) Ang pagtigayon sing kalahamut-an nga tindog kay Jehova amo dapat ang aton pinakadakung kalipay. Bisan kon ang aton unod kag tagipusuon mapaslawan, pabakuron niya kita kag palig-unon ang aton tagipusuon agod indi kita madulaan sing paglaum kag kaisog sa tunga sang mga kabudlayan. Ang pagkasuod kay Jehova isa ka hamili nga pagkabutang. Ang pagsikway sini magaresulta sing kapahamakan sa aton upod sa tanan nga nagbiya sa iya. Busa, kaangay ni Asap, magsuod kita sa Dios kag itugyan ang aton tanan nga kabalaka sa iya. (1 Pedro 5:​6, 7) Nagapasanyog ini sang aton espirituwal nga kaayuhan kag nagapahulag sa aton nga isugid sa iban ang makatilingala nga mga binuhatan ni Jehova.

Magpabilin nga Matutom kay Jehova

Si Asap naligban bangod nakita niya nga ang mga malauton nagabugana sa Israel, sa iya tumandok nga duta. Sa tunga sang matutom nga mga alagad ni Jehova, may “mga malauton” nga nakasala sing pagpabugal, pagkamatinaastaason, kasingki, pagyubit, kag daya, kag nagpanghiwala nga nakahibalo ang Dios kon ano ang ila ginahimo. (Salmo 73:​1-11) Daw ano nga paandam! Agod pahamut-an ang Dios, dapat kita mag-untat gikan sa pagpakita sang mga kinaiya subong sang bugal, kasingki, pagyubit, kag pagkadibunayag. Kaangay ni Asap, ang tanan nga mga alagad ni Jehova ‘nagakadto sa daku nga santuaryo sang Dios’ paagi sa pagtipon sing tayuyon upod sa Iya matutom nga mga sumilimba. Sa pagkamatuod, ang tanan nga nagahigugma kay Jehova ‘nagsuod sa Dios,’ nagasalig sa iya nga sakdagon sila sa tunga sang mga pag-antos, walay sapayan sang kon ano ang mahimo nga isiling ukon himuon sang iban.​—⁠Salmo 73:​12-28; 3 Juan 1-10.

Matuod, ang materyal nga kabuganaan sang mga malauton mahimo magtilaw sang aton pagtuo, kaangay kay Asap. Apang, mabatas naton ini nga pagtilaw kon ginasentro naton ang aton kabuhi sa pag-alagad kay Jehova. Pagapadyaan kita tungod sang paghimo sini bangod ‘ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan.’ (Hebreo 6:10) Ang mga pagtilaw sa aton mangin “umalagi kag mamag-an” kon ipaanggid sa aton padya. (2 Corinto 4:17) Bisan ang mga 70 ukon 80 ka tuig nga pag-antos kaangay lamang sang ginhawa nga nagaligad sa aton mga bibig sa isa ka hutik kon ipaanggid sa dayon nga malipayon nga pagkabuhi nga ginasaad ni Jehova sa iya matutom nga mga alagad.​—⁠Salmo 90:​9, 10.

Kabay nga indi gid naton pagtugutan ang materyal nga kabuganaan sang mga malauton kon ipaanggid sa aton mga pag-antos tungod sa pagkamatarong nga magapugong sa aton gikan sa pagpakita sing pagtuo nga isa ka bunga sang balaan nga espiritu sang Dios. (Galacia 5:​22, 23; 1 Pedro 3:​13, 14) Malipay si Satanas kon ilugon naton ang mga malauton, nga masami nagabugana bangod wala sila sing prinsipio. Sa baylo, padunggan naton ang ngalan ni Jehova paagi sa pagbato sa mga pagsulay nga sikwayon ang iya matarong nga mga talaksan. (Sofonias 2:⁠3) Indi kita magkalisod sa kadalag-an sang mga malauton, kay, sa masami, ang materyal nga kabuganaan lamang ang matigayon nila. Kag ano ang balor sina? Indi gani ini masugdan nga ipaanggid sa espirituwal nga kabuganaan nga ginaagom sang mga nagapakita sing pagtuo sa Soberanong Ginuo nga si Jehova.