Malipayon ang mga Mapainubuson
“Ang Dios nagasumpong sang mga bugalon, apang nagahatag sia sing dibagay nga kaluoy sa mga mapainubuson.”—1 PEDRO 5:5.
1, 2. Paano gin-angot ni Jesus sa iya Wali sa Bukid ang pagkamalipayon sa pagkamapainubuson?
MAY kaangtanan bala ang pagkamalipayon kag pagkamapainubuson? Sa iya pinakabantog nga wali, si Jesucristo, ang labing bantog nga tawo nga nagkabuhi, nagalaragway sang siam ka kalipay, ukon kabulahanan. (Mateo 5:1-12) Gin-angot bala ni Jesus ang pagkamalipayon sa pagkamapainubuson? Huo, gin-angot niya, kay ang pagkamapainubuson nalakip sa pila ka kalipay nga ginsambit niya. Halimbawa, ang isa ka tawo dapat mangin mapainubuson agod mangin mahunahunaon sia sa iya espirituwal nga kinahanglanon. Mga mapainubuson lamang ang ginagutom kag ginauhaw sa pagkamatarong. Kag ang bugalon indi malum-ok sing hunahuna kag indi maluluy-on, ni mahidaiton sila.
2 Ang mapainubuson malipayon bangod matarong kag bunayag ang mangin mapainubuson. Isa pa, ang mapainubuson malipayon bangod maalamon ang mangin mapainubuson; nagaresulta ini sa maayong kaangtanan kay Jehova nga Dios kag sa mga masigka-Cristiano. Dugang pa, ang mga mapainubuson malipayon bangod isa ka pagpakita sing gugma sa bahin nila ang mangin mapainubuson.
3. Ngaa ang pagkabunayag nagaobligar sa aton nga magpaubos?
3 Ngaa ang pagkabunayag nagakinahanglan nga magmapinaubuson kita? Una, bangod kita tanan nakapanubli sing pagkadihimpit kag padayon nga nagahimo sing sala. Si apostol Pablo nagsiling tuhoy sa iya kaugalingon: “Nakahibalo ako nga sa akon, kon sayuron, sa akon unod, walay nagapuyo nga maayo; kay ang pagbuot sing maayo yari sa akon, apang indi ako makahimo sini.” (Roma 7:18) Huo, kita tanan nagpakasala kag nawad-an sang himaya sang Dios. (Roma 3:23) Ang pagkabunayag magapugong sa aton sa pagpabugal. Nagakinahanglan sing pagpaubos nga batunon ang sala, kag ang pagkabunayag nagabulig sa aton nga batunon ini kon makahimo kita sing sala. Sanglit indi naton pirme matigayon ang ginapanikasugan naton, may maligdong nga rason kita agod magmapainubuson.
4. Anong nagapahulag nga rason ang ginahatag sa 1 Corinto 4:7 agod magmapainubuson kita?
4 Si apostol Pablo nagahatag sa aton sing isa pa ka rason kon ngaa ang pagkabunayag dapat magpaubos sa aton. Sia nagasiling: “Sin-o bala ang nagapalabi sa imo? Sa pagkamatuod, ano bala ang imo nga wala mo mabaton? Nian, kon imo nabaton ini, ngaa bala nga nagapabugal ka subong nga daw wala mo mabaton?” (1 Corinto 4:7) Wala sing pangduhaduha sa sini, ang pagkuha naton sing himaya sa aton kaugalingon, ang pagpabugal sang aton mga pagkabutang, mga ikasarang, kag mga hinimuan, indi pagpaubos. Ang pagkabunayag nagabulig agod matigayon naton ang maayong konsiensia sa atubangan sang Dios, agod mahimo kita “makagawi sing bunayag sa tanan nga butang.”—Hebreo 13:18.
5. Paano ang pagkabunayag magabulig sa aton kon nakahimo kita sing sala?
5 Ang pagkabunayag nagabulig sa aton sa pagpaubos kon makahimo kita sing sala. Nagabulig ini sa aton nga batunon sa gilayon ang sala, sa baylo nga pakamatarungon ang kaugalingon ukon basulon ang iban. Busa, samtang ginbasol ni Adan si Eva, wala pagbasula ni David si Bat-seba, sa pagsiling, ‘Indi sia dapat maligo nga kitaon sa tanan. Indi ko gid malikawan nga masulay.’ (Genesis 3:12; 2 Samuel 11:2-4) Sa pagkamatuod, mahimo masiling nga sa isa ka bahin, ang pagkabunayag nagabulig sa aton nga magpaubos; sa pihak nga bahin, ang pagpaubos nagabulig sa aton nga magmangin bunayag.
Ang Pagtuo kay Jehova Nagabulig sa Aton sa Pagpaubos
6, 7. Paano ang pagtuo sa Dios nagabulig sa aton sa pagpaubos?
6 Ang pagtuo kay Jehova magabulig man sa aton sa pagpaubos. Ang pag-apresyar kon daw ano ka daku ang Manunuga, ang Soberano sang Uniberso, tunay nga magapugong sa aton gikan sa pagkabig sang aton kaugalingon nga tuman ka importante. Daw ano kaayo nga ginapahanumdom kita ni manalagna Isaias sini! Sa Isaias 40:15, 22, aton mabasa: “Yari karon! Ang mga pungsod subong sang isa ka tulo gikan sa timba; kag ginaisip subong sang diutay nga yab-ok sang timbangan. . . . Sia amo ang nagalingkod sa ibabaw sang natipulunan sang duta, ang iya mga pumuluyo subong sang mga tibakla.”
7 Ang pagtuo kay Jehova magabulig man sa aton kon nagabatyag kita nga nagaantos kita sing inhustisya. Sa baylo nga mabalaka sa sini, mapainubuson kita nga magahulat kay Jehova, subong sang ginapahanumdom sa aton sang salmista sa Salmo 37:1-3, 8, 9. Amo man sini ang punto nga ginahatag ni apostol Pablo: “Dili kamo magtimalos, mga hinigugma, kundi pabayai ini sa kasingkal; kay nasulat na: ‘Akon ang pagtimalos; ako ang magatumbas,’ siling ni Jehova.”—Roma 12:19.
Pagkamapainubuson —Ang Dalanon sang Kaalam
8. Ngaa ang pagkamapainubuson nagaresulta sa maayong kaangtanan kay Jehova?
8 Madamo sing rason kon ngaa ang pagkamapainubuson amo ang dalanon sang kaalam. Ang isa amo nga, subong sang ginpakita na, nagaresulta ini sa maayong kaangtanan upod sa aton Manunuga. Ang Pulong sang Dios maathag nga nagasiling sa Hulubaton 16:5: “Ang tagsatagsa nga bugalon sa tagipusuon kangil-aran kay Jehova.” Aton man mabasa sa Hulubaton 16:18: “Ang bugal nagauna sa kalaglagan, kag ang palabilabihon nga espiritu nagauna sa pagkapukan.” Sa ulihi ang mga bugalon magaagom sing kasubo. Dapat gid mangin amo sina bangod sang aton mabasa sa 1 Pedro 5:5: “Tanan kamo magpangwagkus sang pagpaubos, kay ang Dios nagasumpong sang mga bugalon, apang nagahatag sia sing dibagay nga kaluoy sa mga mapainubuson.” Makita ninyo ini man nga punto sa ilustrasyon nga ginhatag ni Jesus tuhoy sa nagapangamuyo nga Fariseo kag manugsukot sing buhis. Ang mapainubuson nga manugsukot sing buhis amo ang napamatud-an nga mas matarong.—Lucas 18:9-14.
9. Paano makabulig ang pagkamapainubuson sa panahon sang kabudlayan?
9 Ang pagkamapainubuson amo ang dalanon sang kaalam bangod ang pagkamapainubuson nagapahapos para sa aton nga tumanon ang laygay nga masapwan sa Santiago 4:7: “Busa, magpasakop kamo sa Dios.” Kon mapainubuson kita, indi kita magaribok kon ginatugutan ni Jehova nga mag-antos kita. Ang pagkamapainubuson magabulig sa aton nga mangin kontento sa aton mga kahimtangan kag magbatas. Ang bugalon nga tawo indi kontento, pirme maluyag sing madamo pa, kag nagaribok sa mabudlay nga mga sirkunstansia. Sa pihak nga bahin, ang mapainubuson nga tawo nagabatas sang mga kabudlayan kag mga pagtilaw, subong sang ginhimo ni Job. Nadula ni Job ang tanan niya nga mga pagkabutang kag nagmasakit sing grabe, kag nian ang iya asawa naglaygay pa sa iya nga magpabugal, nga nagasiling: “Sikwaya ang Dios kag panginmatay!” Ano ang reaksion niya? Ang rekord sang Biblia nagasugid sa aton: “Sia nagsiling sa iya: ‘Nagapamulong ka subong sang pagpamulong sang isa sang mga babayi nga kulangkulang. Batunon bala naton ang maayo sa kamot sang Dios kag indi naton pagbatunon ang malaut?’ Sa sini tanan wala makasala si Job sa iya mga bibig.” (Job 2:9, 10) Bangod mapainubuson si Job, wala sia magribok kundi maalamon nga nagpasakop sa bisan ano nga gintugot ni Jehova nga mahanabo sa iya. Apang sang ulihi nakabaton sia sing bugana nga padya.—Job 42:10-16; Santiago 5:11.
Ang Pagkamapainubuson Nagaresulta sa Maayong Kaangtanan sa Iban
10. Paano ginapauswag sang pagkamapainubuson ang aton mga kaangtanan sa masigka-Cristiano?
10 Ang pagkamapainubuson amo ang dalanon sang kaalam bangod nagaresulta ini sa maayong kaangtanan upod sa aton mga masigka-Cristiano. Nagakaigo ang laygay ni apostol Pablo sa aton: “Dili maghimo sang bisan ano gikan sa pagkamaiyaiyahon ukon pagpadayawdayaw, kundi sa pagpaubos magbilang sa iban nga maayo pa sa inyo kaugalingon, dili magtamod ang tagsa sa inyo sa iya kaugalingon lamang nga mga butang, kundi man sa mga butang sang iban.” (Filipos 2:3, 4) Ang pagkamapainubuson maalamon nga magapugong sa aton nga magpaindisanay sa iban ukon magtinguha nga labawan ang iban. Ina nga panimuot sa hunahuna nagahatag sing problema sa aton kag sa aton mga masigka-Cristiano.
11. Ngaa ang pagkamapainubuson makabulig sa aton sa paglikaw nga makahimo sing sala?
11 Sa liwat kag liwat ang pagkamapainubuson magabulig sa aton nga malikawan ang paghimo sing mga sala. Paano? Bangod ang pagkamapainubuson magapugong sa aton nga magmangin sobra ka masinaligon. Sa baylo, maapresyar naton ang laygay ni Pablo sa 1 Corinto 10:12: “Ang nagahunahuna nga nagatindog sia mag-andam basi kon mapukan sia.” Ang bugalon tuman ka masinaligon sa kaugalingon, gani madali sia makahimo sing mga sayop bangod sang naguwa nga mga impluwensia ukon sang iya kaugalingon nga mga kaluyahon.
12. Ang pagkamapainubuson magapahulag sa aton nga sundon ang anong Makasulatanhon nga obligasyon?
12 Ang pagkamapainubuson magabulig sa aton sa pagtuman sa sugo nga magpasakop. Sa Efeso 5:21, ginalaygayan kita: “Magpasakop kamo ang isa sa isa sa pagtahod kay Cristo.” Matuod, indi bala tanan kita nagakinahanglan nga magpasakop? Ang mga kabataan kinahanglan magpasakop sa ila mga ginikanan, ang mga asawa sa ila mga bana, kag ang mga bana kay Cristo. (1 Corinto 11:3; Efeso 5:22; 6:1) Nian, sa Cristianong kongregasyon, ang tanan, lakip ang ministeryal nga mga alagad, dapat magpasakop sa mga gulang. Indi bala matuod man nga ang mga gulang nagapasakop sa matutom nga ulipon nga klase, ilabi na subong nga ginatiglawas sang manugtatap sa sirkito? Nian sa liwat, ang manugtatap sa sirkito kinahanglan magpasakop sa manugtatap sa distrito, kag ang manugtatap sa distrito sa Komite sang Sanga sang pungsod nga ginaalagaran niya. Kamusta ang mga katapo sang Komite sang Sanga? Dapat sila “magpasakop sa isa kag isa” kag sa Nagadumala nga Hubon man nga nagareprentar sa matutom kag mainandamon nga ulipon nga klase, nga, sila man, may salabton kay Jesus, ang nagalingkod sa trono nga Hari. (Mateo 24:45-47) Kaangay sang bisan anong hubon sang mga gulang, ang mga katapo sang Nagadumala nga Hubon dapat magtahod sa punto-de-vista sang iban. Halimbawa, ang isa mahimo magahunahuna nga maayo gid ang iya ideya. Apang kon indi magaugyon ang nagakaigo nga kadamuon sang iban pa nga mga katapo sa iya panugda, dapat niya kalimtan ini nga butang. Huo, kita tanan kinahanglan magpaubos, kay kita tanan nagapasakop.
13, 14. (a) Sa anong partikular nga kahimtangan ang pagkamapainubuson makabulig sa aton? (b) Anong halimbawa ang ginhatag ni Pedro may kaangtanan sa pagbaton sing laygay?
13 Ang pagkamapainubuson ilabi na nga makita nga amo ang dalanon sang kaalam sa bagay nga ang pagkamapainubuson nagapahapos para sa aton nga batunon ang laygay kag disiplina. Ang tagsatagsa sa aton nagakinahanglan sing disiplina kon kaisa, kag dapat naton pamatian ang laygay sa Hulubaton 19:20: “Pamatii ang laygay kag batuna ang disiplina, agod nga magmaalam ka sa imo kaulihian.” Subong sang nasambit na, ang mga mapainubuson wala nagakasaklaw ukon nagakasubo kon ginadisiplina. Dugang pa, si apostol Pablo, sa Hebreo 12:4-11, nagalaygay sa aton nahanungod sa kaalam sang mapainubuson nga pagpasakop sa disiplina. Sa sining paagi lamang nga makalaum kita nga matuytuyan ang aton palaabuton nga dalanon sing maalamon kag busa makatigayon sing padya nga kabuhi nga walay katapusan. Daw ano ka makalilipay nga resulta ina!
14 May kaangtanan sini mahimo naton itudlo ang halimbawa ni apostol Pedro. Ginlaygayan sia sing matigdas ni apostol Pablo, subong sang masayran naton gikan sa kasaysayan sa Galacia 2:14: “Sang nakita ko nga wala sila nagagawi sing matarong, nagsiling ako kay Cefas [Pedro] sa atubangan sang tanan: ‘Kon ikaw, nga Judiyo, nagakabuhi subong sang mga pungsod, kag indi subong nga Judiyo, paano bala nga ginapilit mo ang mga tawo sang pungsod sa pagpangabuhi subong sang mga Judiyo?’ ” Nasaklaw bala si apostol Pedro? Kon nasaklaw gid man sia, wala ini magdugay, subong sang makita gikan sa iya paghinambit sang ulihi sa “aton hinigugma nga utod nga si Pablo” sa 2 Pedro 3:15, 16.
15. Ano ang kaangtanan sang aton pagpaubos kag sang aton pagkalipay?
15 Yara man ang tuhoy sa pagkanaayawan sa kaugalingon, pagkakontento. Indi kita mahimo magmalipayon kon indi kita kontento sa aton kahimtangan, sa aton mga pribilehiyo, sa aton mga kabulahanan. Ang mapainubuson nga Cristiano may panimuot nga: “Kon ginatugutan ini sang Dios, masarangan ko ini,” nga amo gid ang ginasiling ni apostol Pablo, subong sang mabasa naton sa 1 Corinto 10:13: “Walay pagsulay nga nakaabot sa inyo nga indi masarangan sang tawo. Apang ang Dios matutom, kag indi magtugot nga sulayon kamo labaw sa inyo masarangan, kundi kaupod sang pagsulay magahatag man sing lulutsan agod nga makasarang kamo sa pagbatas.” Gani nakita naton sa liwat kon paano ang pagkamapainubuson amo ang dalanon sang kaalam, kay nagabulig ini sa aton nga magmalipayon walay sapayan kon ano man ang aton kahimtangan.
Ang Gugma Magabulig sa Aton sa Pagpaubos
16, 17. (a) Anong Makasulatanhon nga halimbawa ang nagapadaku sang pinakadaku nga kinaiya sa pagbulig sa aton nga magpaubos? (b) Anong sekular nga halimbawa man ang nagailustrar sini nga punto?
16 Labaw sa bisan ano pa nga butang, ang dimakagod nga gugma, ang a·gaʹpe, magabulig sa aton sa pagpaubos. Ngaa nabatas ni Jesus sing mapainubuson gid ang iya naeksperiensiahan sa usok sang pag-antos nga ginalaragway ni Pablo sa mga taga-Filipos? (Filipos 2:5-8) Ngaa wala niya paghunahunaa ang makigtupong sa Dios? Bangod, subong sang ginsiling gid niya: “Ako nagahigugma sa Amay.” (Juan 14:31) Amo ina kon ngaa sa tanan nga tion ginpatuhoy niya ang himaya kag dungog kay Jehova, ang iya langitnon nga Amay. Busa, sa isa pa ka okasyon ginpadaku niya nga ang iya langitnon nga Amay lamang ang maayo.—Lucas 18:18, 19.
17 Nagailustrar sini nga punto amo ang hitabo sa kabuhi sang isa sang unang mga mamalaybay sang Amerika, nga si John Greenleaf Whittier. May nobya sia sa iya pagkabata, kag kis-a sa paindis-indis sa tigbato, natigbato sang iya nobya sing husto ang isa ka tinaga, samtang ang sa iya sala. Naglain gid ang buot sang iya nobya. Ngaa? Subong sang madumduman pa sang mamalaybay, ang iya nobya nagsiling: “Ginakasubo ko nga natigbato ko sing husto yadto nga tinaga. Indi ko luyag maglabaw sa imo . . . man, ginahigugma ko ikaw.” Huo, kon ginahigugma naton ang iban, luyag naton nga mangibabaw sia, indi mag-ubos, sa aton bangod ang gugma mapainubuson.
18. Ang pagkamapainubuson magabulig sa aton sa pagpamati sa anong Makasulatanhon nga laygay?
18 Maayo ini nga leksion para sa tanan nga mga Cristiano, ilabi na sa mga kauturan nga lalaki. Nahanungod sa pinasahi nga pribilehiyo sang pag-alagad, magakalipay bala kita nga nabaton ini sang aton utod sa baylo nga kita, ukon maimon ukon mahisa bala kita? Kon ginahigugma gid naton ang aton utod, magakalipay kita nga natigayon niya inang pinasahi nga asaynment ukon pagkilala ukon pribilehiyo sang pag-alagad. Huo, ang pagkamapainubuson magapahapos sang pagtuman sa laygay: “Manguna sa pagpakita sing kadungganan sa isa kag isa.” (Roma 12:10) Ang isa pa ka badbad nagasiling: “Padunggi ang isa kag isa labaw sa inyo kaugalingon.” (New International Version) Nian sa liwat, ginalaygayan kita ni apostol Pablo: “Paagi sa gugma mag-inalagaray kamo.” (Galacia 5:13) Huo, kon kita may gugma, malipay kita nga buligan ang aton mga kauturan, alagaran sila, unahon sila kag ang ila kaayuhan sangsa aton, nga nagakinahanglan sing pagkamapainubuson. Ang pagkamapainubuson magapugong man sa aton sa pagpakataas kag busa sa paglikaw nga pukawon sa iban ang espiritu sang kaimon ukon kahisa. Si Pablo nagsulat nga ang gugma wala “nagapabugal, wala nagapahabok.” Ngaa wala? Bangod ang motibo sa likod sang pagpabugal kag pagpahabok makagod, maiyaiyahon, samtang ang gugma amo gid ang kahulugan sang pagkadimakagod.—1 Corinto 13:4.
19. Anong mga halimbawa sa Biblia ang nagailustrar nga ang pagkamapainubuson kag gugma magkaupod, subong sang bugal kag kakagod?
19 Ang kaangtanan ni David kay Hari Saul kag sa iya anak nga si Jonatan isa ka talalupangdon nga halimbawa kon paano ang gugma kag pagkamapainubuson magkaupod kag kon paano ang bugal kag kakagod magkaupod man. Bangod sang mga kadalag-an ni David sa inaway, ang kababayin-an sang Israel nag-amba: “Si Saul nagpatay sang iya linibo, kag si David sang iya linaksa.” (1 Samuel 18:7) Bangod indi gid mapainubuson kundi, sa baylo, napuno sing bugal, ginpalambo ni Saul sugod sadto ang mamalatyon nga kaugot kay David. Tuhay gid ini sa espiritu sang iya anak nga si Jonatan! Aton mabasa nga ginhigugma ni Jonatan si David subong sang iya kaugalingon nga kalag. (1 Samuel 18:1) Gani ano ang reaksion ni Jonatan sang, sa lakat sang mga hitabo, maathag gid nga ginpakamaayo ni Jehova si David kag nga sia, indi si Jonatan, ang magabulos kay Saul subong hari sang Israel? Naimon bala ukon nahisa si Jonatan? Wala gid! Bangod sang iya daku nga paghigugma kay David, nakasiling sia, subong sang aton mabasa sa 1 Samuel 23:17: “Dili mahadlok; kay ang kamot ni Saul nga akon amay indi makatultol sa imo, kag ikaw magahari sa ibabaw sang Israel, kag ako magadason sa imo; kag nasayran man ini ni Saul nga akon amay.” Ang daku nga paghigugma ni Jonatan kay David nagtiklod sa iya nga batunon sing mapainubuson ang ginhantop niya nga kabubut-on sang Dios sa kon sin-o ang magabulos sa iya amay subong hari sang Israel.
20. Paano ginapakita ni Jesus ang suod nga kaangtanan sang gugma kag pagkamapainubuson?
20 Ang dugang nga nagapakita sang kaangtanan sang gugma kag pagkamapainubuson amo ang natabo sadtong katapusan nga gab-i nga si Jesucristo kaupod sang iya mga apostoles antes sia napatay. Sa Juan 13:1, aton mabasa nga si Jesus, “nakahigugma sang mga iya nga yari sa kalibutan, ginhigugma niya sila tubtob sa katapusan.” Pagkatapos sina, aton mabasa, ginhugasan ni Jesus ang tiil sang iya mga apostoles, nagpanghikot kaangay sang isa ka kubos nga suluguon. Daw ano ka daku nga leksion sang pagkamapainubuson!—Juan 13:1-11.
21. Sa pagsumaryo, ngaa dapat kita magpaubos?
21 Sa pagkamatuod, madamo sing rason agod magpaubos. Amo ini ang husto, ang bunayag nga butang agod magpaubos. Amo ini ang dalanon sang pagtuo. Nagaresulta ini sa maayong kaangtanan kay Jehova nga Dios kag sa aton mga masigkatumuluo. Amo ini ang dalanon sang kaalam. Labaw sa tanan, amo ini ang dalanon sang gugma kag nagadala sing matuod nga kalipay.
Paano Mo Sabton?
◻ Sa anong mga paagi ang pagkabunayag isa ka bulig sa pagpaubos?
◻ Ngaa ang pagtuo kay Jehova makabulig sa aton sa pagpaubos?
◻ Ano ang nagapakita nga ang pagpaubos dalanon sang kaalam?
◻ Ngaa ang gugma ilabi na nga makabulig sa aton pagpaubos?
[Piktyur sa pahina 21]
Si Job mapainubuson nga nagpasakop sang iya kaugalingon kay Jehova. Wala niya ‘pagsikwaya ang Dios kag nanginmatay’
[Piktyur sa pahina 23]
Si Pedro mapainubuson nga nagpasakop sang ginlaygayan sia ni Pablo sa publiko