Magsalig kay Jehova sa Pagtuman sang Iya Katuyuan
“Ang mga matarong magapanubli sang duta, kag magapuyo dira sing dayon.”—SALMO 37:29.
1. Ano ang katuyuan ni Jehova para sa katawhan kag para sa sining duta?
SANG gintuga ni Jehova ang aton unang mga ginikanan, nga sanday Adan kag Eva, ginhimo niya sila nga himpit. Kag gintuga niya sila agod mahimo sila mabuhi sing dayon sa sining duta—kon tumanon nila ang iya mga sugo. (Genesis 1:26, 27; 2:17) Dugang pa, ginbutang sila sang Dios sa paraiso nga mga kahimtangan. (Genesis 2:8, 9) Si Jehova nagsiling sa ila: “Magmabungahon kag magbuad kag magtugob sang duta.” (Genesis 1:28) Busa, ang ila mga kaanakan magalapnag sa ulihi sa bug-os nga duta, kag ining planeta mangin isa ka paraiso nga puno sang himpit, malipayon nga rasa sang katawhan. Daw ano kaayo ang panugod sang tawhanon nga panimalay! “Nakita sang Dios ang tagsa ka butang nga nahimo niya kag, yari karon! tama gid kaayo.”—Genesis 1:31.
2. Anong mga pamangkot ang ginapautwas sang kahimtangan sang tawo?
2 Apang, ang kahimtangan sang katawhan nga nagluntad sa linibo ka tuig wala gid sing kaanggid sa orihinal nga katuyuan sang Dios. Ang katawhan malayo sa kahimpitan kag indi gid malipayon. Ang mga kahimtangan sa kalibutan makahalanusbo, kag subong sang gintagna, labi ini nga naglain sing dramatiko sa panahon naton. (2 Timoteo 3:1-5, 13) Gani paano kita makasalig nga ang katuyuan sang Dios para sa katawhan matuman sa malapit nga palaabuton? Magaligad bala ang malawig pa nga mga panag-on sang tion upod ang dalayon nga makahalanusbo nga mga kahimtangan?
Ano ang Nagpalain sang mga Kahimtangan?
3. Ngaa wala sa gilayon pagtapusa ni Jehova ang pagrebelde sang tawo?
3 Yadtong may sibu nga ihibalo sa inspirado nga Pulong sang Dios nakahibalo kon ngaa gintugutan ni Jehova ining malain nga mga kahimtangan sa duta. Nakahibalo man sila kon ano ang himuon niya sa sini. Gikan sa kasaysayan sang Biblia, natun-an nila nga wala paggamita sing husto sang aton unang mga ginikanan ang makalilipay nga dulot sang hilway nga pagpili nga ginhatag sang Dios sa mga tawo. (Ipaanggid ang 1 Pedro 2:16.) Sayop nila nga ginpili ang dalanon sang pagkaindependiente gikan sa Dios. (Genesis, kapitulo 2 kag 3) Ang ila pagrebelde nagpautwas sing may pinakadaku nga kasangkaron nga mga pamangkot, subong sang: May kinamatarong bala ang Soberano sa Bug-os nga Uniberso nga gamhan ang katawhan? Ang iya bala paggahom amo ang labing maayo para sa ila? Magamadinalag-on bala ang tawhanon nga paggahom kon wala ang pagdumala sang Dios? Ang pat-od nga paagi agod masapwan ang mga sabat sa sining mga pamangkot amo ang pagtugot nga magligad ang mga siglo sang tawhanon nga paggahom. Ginapakita sing dimapangduhaduhaan sang mga resulta kon bala mahimo nga magmadinalag-on ang mga tawo nga wala ang ila Magbubuhat.
4, 5. (a) Ano ang nangin resulta sang pagsikway sang tawo sa pagginahom sang Dios? (b) Ano ang dimapangduhaduhaan nga ginpakita sang nagligad nga tion?
4 Sang ginbayaan nanday Adan kag Eva ang Dios, wala na niya sila pagsakdaga sa kahimpitan. Bangod wala sang iya pagsakdag, nagluya sila. Ang resulta amo ang pagkadihimpit, katigulangon, kag sang ulihi kamatayon. Paagi sa kasuguan sang pagpanubli, ginliton sang aton unang mga ginikanan ang makahalalit nga mga karakteristiko sa tanan nila nga mga kaliwatan, lakip kita. (Roma 5:12) Kag ano ang resulta sang linibo ka tuig sang tawhanon nga paggahom? Nangin malaglagon ini, subong sang matinuuron nga ginasiling sang Manugwali 8:9: “Gingamhan sang tawo ang tawo sa iya kasamaran.”
5 Ang nagligad nga tion nagapakita sing dimapangduhaduhaan nga indi matuytuyan sang mga tawo sing madinalag-on ang ila dalanon nga hilway sa ila Manunuga. Ang inspirado nga manunulat sang Biblia nga si Jeremias nagsiling: “Nahibaluan ko gid, O Jehova, nga ang dalanon sang dutan-on nga tawo wala sa iya kaugalingon. Wala sa tawo nga nagalakat ang pagtuytoy sang iya tikang.”—Jeremias 10:23; Deuteronomio 32:4, 5; Manugwali 7:29.
Ang Katuyuan sang Dios Wala Magbalhin
6, 7. (a) Ang linibo ka tuig sang maragtas nagbalhin bala sang katuyuan ni Jehova? (b) Ano ang ginalakip sa katuyuan ni Jehova?
6 Ang pagligad bala sang linibo ka tuig sang tawhanon nga maragtas—nga puno gid sing kalautan kag pag-antos—nagbalhin sang katuyuan sang Dios? Ang iya Pulong nagasiling: “Amo ini ang ginasiling ni Jehova, ang Manunuga sang mga langit, Sia amo ang matuod nga Dios, ang Naghuman sang duta kag Magbubuhat sini, Sia ang Isa nga nagpalig-on sini, nga wala magtuga sini nga walay pulos, nga naghuman sini nga pagpuy-an.” (Isaias 45:18) Gani ginhuman sang Dios ang duta nga pagapuy-an sang katawhan, kag amo gihapon ina ang iya katuyuan.
7 Wala lamang gintuga ni Jehova ang duta nga pagapuy-an kundi gintuyo man niya nga mangin isa ini ka paraiso nga pagapuy-an sang himpit, malipayon nga katawhan. Amo ina kon ngaa gintagna sang Biblia ang “bag-ong duta,” ang bag-ong tawhanon nga katilingban, diin “magapuyo ang pagkamatarong.” (2 Pedro 3:13) Kag sa Bugna 21:4, ang Pulong sang Dios nagasugid sa aton nga sa iya bag-ong kalibutan, “pahiran niya ang tagsa ka luha sa mga mata [sang katawhan], kag wala na sing kamatayon, ukon kalisud ukon paghibi ukon kasakit pa.” Bangod sina nga mga rason nga si Jesus nagpamulong nahanungod sinang nagapakari nga bag-ong kalibutan sa duta subong “Paraiso.”—Lucas 23:43.
8. Ngaa makapat-od kita nga tumanon ni Jehova ang iya katuyuan?
8 Sanglit si Jehova ang labing gamhanan kag labing maalamon nga Manunuga sang uniberso, wala sing isa ang mahimo nga makapatiku sang iya katuyuan. “Si Jehova sang mga kasuldadusan nagsumpa, nga nagasiling: ‘Suno sa akon ginpainoino, amo ini ang mahanabo; kag suno sa akon gintuyo, amo ini ang mahimo.’ ” (Isaias 14:24) Busa, sang ang Dios nagsiling nga himuon niya ining duta nga isa ka paraiso nga puy-an sang himpit nga mga tawo, amo sina ang mahanabo. Si Jesus nagsiling: “Malipayon ang mga mapainubuson, kay sila magapanubli sang duta.” (Mateo 5:5; ipaanggid ang Salmo 37:29.) Makasalig gid kita sa katumanan sina nga saad. Sa katunayan, mahimo naton mahatag ang aton bug-os nga kabuhi tungod sa sini, bisan tubtob sa punto nga irisgo ang aton kabuhi para sa sini.
Nagsalig Sila kay Jehova
9. Ano ang ginhimo ni Abraham nga nagpakita sang iya pagsalig kay Jehova?
9 Madamong mahinadlukon sa Dios nga katawhan sa bug-os nga maragtas ang naghatag sing bug-os sang ila kabuhi, bisan tubtob sa punto nga irisgo ang ila kabuhi sa katuyuan sang Dios sa duta bangod kombinsido sila nga tumanon niya ini. Bisan pa limitado ang ila ihibalo, nagsalig sila sa Dios kag gintukod ang ila kabuhi sa paghimo sang iya kabubut-on. Halimbawa, yara si Abraham, nga nagkabuhi mga 2,000 ka tuig sa wala pa matawo si Jesus sa duta—madugay antes pa ginsugdan nga isulat ang Biblia. Nagsalig sia kay Jehova nga tumanon Niya ang Iya mga saad. Ayhan natun-an ni Abraham ang nahanungod sa Manunuga sa iya matutom nga katigulangan nga si Sem, nga gintudluan ni Noe. Gani sang ginsugo sang Dios si Abraham nga biyaan ang mabuganaon nga Ur sang mga Caldeanhon kag magkadto sa disunado kag delikado nga duta sang Canaan, nahibal-an sadto nga patriarka nga masaligan niya si Jehova, kag busa naglakat sia. (Hebreo 11:8) Sang ulihi, ginsilingan sia ni Jehova: “Himuon ko gikan sa imo ang isa ka pungsod nga daku.”—Genesis 12:2.
10, 11. Ngaa handa si Abraham nga ihalad ang iya bugtong nga anak, nga si Isaac?
10 Ano ang natabo sa tapos nabun-ag si Isaac kay Abraham? Ginpakita ni Jehova kay Abraham nga ang iya mga kaliwatan mangin isa ka daku nga pungsod paagi kay Isaac. (Genesis 21:12) Busa, daw nagasumpakil gid ang pagsugo ni Jehova kay Abraham, subong pagtilaw sa iya pagtuo, nga ihalad ang iya anak nga si Isaac. (Genesis 22:2) Apang, bangod sang bug-os nga pagsalig kay Jehova, si Abraham naghimo sing mga tikang sa pagsunod, sing aktuwal ginbayaw ang iya sundang sa pagpatay kay Isaac. Sa katapusan nga higayon, ginpadala sang Dios ang isa ka anghel sa pagpugong kay Abraham.—Genesis 22:9-14.
11 Ngaa matinumanon gid si Abraham? Ang Hebreo 11:17-19 nagasugid: “Bangod sa pagtuo si Abraham, sang gintilawan sia, naghalad kay Isaac, kag sia nga nakabaton sang mga saad handa sa paghalad sang iya bugtong nga anak, nga nahanungod sa iya ginsiling: ‘Sa kay Isaac paghingalanan ang “imo mga kaliwatan.” ’ Apang sia nagkabig nga ang Dios makasarang sa pagbanhaw sang mga tawo bisan gikan sa mga patay; kag gani sa halimbawa ginbaton niya sia liwat.” Ang Roma 4:20, 21 nagasiling man: “Bangod sa saad sang Dios [si Abraham] wala magduhaduha, . . . nga nagsalig sing bug-os nga [ang Dios] nga nagsaad makasarang man sia sa paghimo.”
12. Paano ginpadyaan si Abraham bangod sang iya pagtuo?
12 Si Abraham ginpadyaan tungod sang iya pagtuo indi lamang paagi sa pagluwas kay Isaac kag paagi sa paghimo nga ang “dakung pungsod” magagikan sa iya kundi sa isa pa ka paagi. Nagsiling ang Dios kay Abraham: “Sa imo binhi pakamaayuhon ang tanan nga pungsod sang duta bangod nagtuman ka sa akon tingog.” (Genesis 22:18) Paano? Ang Hari sang langitnon nga Ginharian sang Dios magagikan sa linya sang kaliwatan ni Abraham. Dugmukon sina nga Ginharian ining malauton nga kalibutan sa idalom ni Satanas. (Daniel 2:44; Roma 16:20; Bugna 19:11-21) Nian, sa isa ka natinluan nga duta sa idalom sang pagginahom sang Ginharian, ang Paraiso pagapatahumon sa bug-os nga globo, kag gikan sa “tanan nga pungsod” ang mga tawo nga nagahimo sang kabubut-on sang Dios magaagom sing himpit nga kapagros kag kabuhi sing dayon. (1 Juan 2:15-17) Kag bisan pa limitado lamang ang ihibalo ni Abraham tuhoy sa Ginharian, nagsalig sia kay Jehova kag naghulat sa pagtukod sini.—Hebreo 11:10.
13, 14. Ngaa nagsalig si Job sa Dios?
13 Pila ka gatos ka tuig sang ulihi, yara si Job, nga nagkabuhi sa ulot sang ika-17 kag ika-16 nga siglo B.C.E. sa ginatawag karon nga Arabia. Nagkabuhi man sia antes ginsugdan nga isulat ang Biblia. Si Job “himpit kag matarong, kag mahadlukon sa Dios kag nagalikaw sa malaut.” (Job 1:1) Sang ginsakit ni Satanas si Job sang makangilil-ad, masakit katama nga balatian, yadtong matutom nga tawo “wala magbungat sang isa ka makasasala nga pulong” sa bug-os niya nga pag-antos. (Job 2:10, The New English Bible) Si Job nagsalig sa Dios. Kag bisan pa wala niya mahibalui ang mga detalye kon ngaa nagaantos sia sing daku, ginhatag niya sing bug-os ang iya kabuhi, bisan tubtob sa punto nga irisgo ang iya kabuhi sa Dios kag sa Iya mga katuyuan.
14 Nakahibalo si Job nga bisan mapatay sia, sa pila ka adlaw ipasag-uli sia sang Dios sa kabuhi paagi sa pagkabanhaw. Ginpakita niya ini nga paglaum sang nagsiling sia kay Jehova nga Dios: “O kabay pa kuntani nga taguon mo ako sa Sheol [ang lulubngan], . . . nga tangduan mo ako kuntani sing pinat-od nga tion kag madumduman ako! Kon ang tawo mapatay mabuhi pa bala sia? . . . Magapanawag ka, kag ako magasabat sa imo.” (Job 14:13-15) Bisan pa ginabudlayan, ginpakita ni Job ang pagtuo sa pagkasoberano ni Jehova, nga nagasiling: “Tubtob nga mapatay ako indi ko pag-isikway gikan sa akon ang akon pagkatadlong!”—Job 27:5.
15. Paano ginpabutyag ni David ang iya pagsalig sa katuyuan ni Jehova?
15 Mga anom ka siglo sa tapos ni Job kag mga isa ka libo ka tuig sa wala pa si Jesus magkari sa duta, ginpabutyag ni David ang iya pagsalig sa bag-ong kalibutan. Nagsiling sia sa mga salmo: “Ang nagahulat kay Jehova magapanubli sang duta. Kay sa diutay pa nga tion, kag ang malauton wala na . . . Apang ang mga mahagop magapanubli sang duta, kag magakalipay sing bug-os sa kabuganaan sang paghidait. Ang mga matarong magapanubli sang duta, kag magapuyo sila diri sing dayon.” Bangod sang iya dimationg nga paglaum, si David naglaygay: “Salig kay Jehova . . . Kalipay ka man kay Jehova, kag hatagan ka niya sang mga handom sang imo tagipusuon.”—Salmo 37:3, 4, 9-11, 29.
16. Ano ang paglaum sang ‘tama kadaku nga panganod sang mga saksi’?
16 Sa sulod sang mga siglo, ang matutom nga mga lalaki kag mga babayi may amo man sini nga paglaum nga mabuhi sing dayon sa duta. Sa katunayan, ginahuman sila sang ‘tama kadaku nga panganod sang mga saksi’ nga literal nga naghatag ukon nagrisgo sang ila kabuhi sa mga saad ni Jehova. Madamong sadtong mga saksi anay ni Jehova ang ginsakit kag ginpatay bangod sang ila pagtuo, “agod matigayon nila ang maayo pa nga pagkabanhaw.” Paano? Sa bag-ong kalibutan, padyaan sila sang Dios sing maayo pa nga pagkabanhaw kag sing paglaum nga kabuhi nga walay katapusan.—Juan 5:28, 29; Hebreo 11:35; 12:1.
Ang Cristianong mga Saksi Nagasalig sa Dios
17. Daw ano kalig-on ang pagsalig sang unang-siglo nga mga Cristiano kay Jehova?
17 Sang unang siglo C.E., ginpahayag ni Jesus sa bag-ong gintukod nga Cristianong kongregasyon ang dugang pa nga mga detalye nahanungod sa Ginharian kag sa paggahom sini sa bug-os nga duta. Halimbawa, gin-inspirar sang iya espiritu si apostol Juan nga isulat nga ang kadamuon sang mangin kaupod ni Jesucristo sa Ginharian sa langit mangin 144,000. Matutom nga mga alagad sila sang Dios nga “ginbakal sa tunga sang katawhan.” (Bugna 7:4; 14:1-4) Magagahom sila sa bug-os nga duta “subong mga hari” kaupod ni Cristo sa langit. (Bugna 20:4-6) Gani yadtong unang-siglo nga mga Cristiano nagsalig gid sing malig-on kay Jehova nga tumanon niya ang iya katuyuan para sa langitnon nga Ginharian kag sa iya dutan-on nga mga sakop sa bagay nga handa sila nga mapatay tungod sang ila pagtuo. Amo gid sina ang ginhimo sang madamo sa ila.
18. Paano karon ginailog sang mga Saksi ni Jehova ang ila katumbas sang una?
18 Sa karon, halos lima ka milyon ka mga Saksi ni Jehova ang may pagsalig man sa Dios kaangay sang ila mga katumbas nga nagkabuhi mga siglo antes nila. Ining karon nga mga Saksi naghatag man ukon nagrisgo sang ila kabuhi sa mga saad sang Dios. Gindedikar nila ang ila kabuhi sa iya kag may kompleto nga Biblia sa pagpabakod sang ila pagtuo. (2 Timoteo 3:14-17) Ginailog sining modernong-adlaw nga mga Saksi ni Jehova ang unang-siglo nga mga sumulunod nga nagsiling nga ila ‘tumanon ang Dios subong gumalahom sangsa mga tawo.’ (Binuhatan 5:29) Sa sining siglo madamo sining Cristianong mga Saksi ang mapintas nga ginhingabot. Ginpatay pa gani ang iban bangod sang ila pagtuo. Ang iban napatay bangod sang balatian, aksidente, ukon katigulangon. Apang, kaangay sang matutom nga mga saksi sang nagligad, nagsalig sila sa Dios bangod nakahibalo sila nga ipasag-uli niya sila sa kabuhi sa iya bag-ong kalibutan paagi sa pagkabanhaw.—Juan 5:28, 29; Binuhatan 24:15; Bugna 20:12, 13.
19, 20. Ano ang makita naton sa tagna sang Biblia para sa aton adlaw?
19 Ginaapresyar sang mga Saksi ni Jehova nga ang pagkuha sa ila gikan sa tanan nga pungsod pasulod sa isa ka tugob-globo nga paghiliutod madugay na gintagna sa Biblia. (Isaias 2:2-4; Bugna 7:4, 9-17) Kag ginapahimo ni Jehova sa ila ang bug-os kalibutan nga pagbantala nga hilikuton agod tipunon sa iya kahamuot kag pangamlig ang iban pa nga mga bunayag sing tagipusuon. (Hulubaton 18:10; Mateo 24:14; Roma 10:13) Sila tanan nagsalig sing bug-os kay Jehova, nakahibalo nga sa dili madugay paluntaron niya ang iya matahom nga bag-ong kalibutan.—Ipaanggid ang 1 Corinto 15:58; Hebreo 6:10.
20 Ginapakita sang mga tagna sa Biblia nga ang kalibutan ni Satanas halos 80 ka tuig na karon nga yara sa iya katapusan nga mga adlaw, sugod sang importante gid nga tuig sang 1914. Ining kalibutan nagahilapit na sa iya katapusan. (Roma 16:20; 2 Corinto 4:4; 2 Timoteo 3:1-5) Busa ang mga Saksi ni Jehova may kaisog kag determinasyon bangod nakahibalo sila nga sa dili madugay kontrolon sing bug-os sang Ginharian sang Dios ang tanan nga hilikuton sa duta. Paagi sa paglaglag sa sining karon malauton nga kalibutan kag sa pagpaluntad sang iya matarong nga bag-ong kalibutan, panason sing bug-os sang Dios ang malain nga kahimtangan nga nagluntad sa duta sa madamo gid nga siglo.—Hulubaton 2:21, 22.
21. Ngaa mahimo kita magkasadya walay sapayan sang karon nga mga palaligban?
21 Nian, sing dayon, ipakita sang Dios ang iya daku nga pag-ulikid sa aton paagi sa pagpaulan sing mga kabulahanan nga magatumbas sing labaw pa sa kasakit nga natigayon naton sang nagligad. Madamo gid nga maayong mga butang ang mahanabo sa aton sa bag-ong kalibutan amo nga ang aton nagligad nga mga problema mapanas sa hunahuna. Daw ano ka makalulugpay mahibaluan nga ‘ihumlad [nian ni Jehova] ang iya kamot kag busgon ang handom sang tagsa ka butang nga buhi.’—Salmo 145:16; Isaias 65:17, 18.
22. Ngaa dapat kita magsalig kay Jehova?
22 Sa bag-ong kalibutan, makita sang matutom nga katawhan ang katumanan sang Roma 8:21: “Ang tinuga gid hilwayon sa kahiulipnan sang pagkadimadinulunton kag makaagom sang mahimayaon nga kahilwayan sang mga anak sang Dios.” Makita nila nga matuman ining pangamuyo nga gintudlo ni Jesus sa iya mga sumulunod: “Magkari ang imo ginharian. Paghimuon ang imo kabubut-on sa duta subong sang sa langit.” (Mateo 6:10) Gani magsalig sing bug-os kay Jehova bangod ang iya dimasinalaypon nga saad amo: “Ang mga matarong magapanubli sang duta, kag magapuyo sila diri sing dayon.”—Salmo 37:29.
Paano Mo Sabton?
◻ Ano ang katuyuan ni Jehova para sa mga tawo kag para sa sining duta?
◻ Ngaa gintugutan ni Jehova ang malain nga mga kahimtangan sa duta?
◻ Paano ginpakita sang matutom nga katawhan sang una ang ila pagsalig kay Jehova?
◻ Ngaa ang mga alagad sang Dios sa karon nagasalig kay Jehova?
[Piktyur sa pahina 16]
Gintuga sang Dios ang mga tawo sa pagkabuhi sing dayon sa kalipay sa paraiso nga duta
[Piktyur sa pahina 18]
Si Abraham nagsalig sa ikasarang ni Jehova sa pagbanhaw sa mga patay