Madumduman Mo Bala?

Naluyagan mo bala ang pagbasa sa ulihi nga mga guwa sang Ang Lalantawan? Kon amo, masapwan mo nga makawiwili dumdumon ang masunod:

▫ Ngaa ginpili sang Israelinhon nga mga lampitaw ang magdayon sa balay ni Rahab nga makihilawason?

Ang Israelinhon nga mga lampitaw nagkabuhi suno sa Kasuguan sang Dios, gani wala sila magdayon sa balay ni Rahab tungod sang imoral nga mga rason. Ayhan nangatarungan sila nga ang ila presensia sa balay sang isa ka makihilawason mahimo nga indi makapukaw sing suspetsa sa siudad. Nga ang iya balay natukod sa pader sang siudad labi nga nagapahapos sang pagpalagyo. Apang labaw sa tanan, gintuytuyan sila ni Jehova sa isa ka makasasala nga ang tagipusuon natandog gid sa mga balita tuhoy sa balaan nga mga pagpakig-angot upod sa mga Israelinhon nga naghinulsol sia kag ginbag-o ang iya mga dalanon.​—⁠12/15, pahina 24-5.

▫ Paano naapektuhan sang kaakig ang aton ikaayong-lawas?

Ginapakita sang pagtuon nga ang kaakig nagapatubas sing stress hormones. Ang masunson nga pagsingkal nagatuga sing pagkaditimbang sa ulot sang maamligon kag makahalalit nga mga dagway sang kolesterol, nagabutang sa aton sa katalagman nga magbalatian sa tagipusuon.​—⁠12/15, pahina 32.

▫ Anong mga panugda ang magabulig sa aton sa pagpauswag sang aton napanagtag nga Lalantawan kag Magmata! nga mga magasin?

Mangin mahunahunaon sa Lalantawan kag Magmata!; hupti nga simple ang presentasyon; magmangin mapasibusibuon paagi sa paghanda sang pila ka malip-ot nga mga presentasyon; magpahamtang sing personal nga tulumuron.​—⁠1/1, pahina 24-5.

▫ Ngaa si Moises isa ka maayo nga teokratikong halimbawa para sundon naton?

Si Moises nangayo sing tuytoy kay Jehova sa mga kabudlayan. Wala sia sing personal nga mga ambisyon apang nabalaka sia sa himaya ni Jehova. May malig-on sia nga pagtuo; kag wala gid sia malipat nga si Jehova amo ang tunay nga Gumalahom sang pungsod sang Israel.​—⁠1/15, pahina 11.

▫ Ano ang pila ka paagi nga ang balaan nga panudlo nagamadinalag-on?

Ang balaan nga panudlo nagamadinalag-on paagi sa pagpaambit sa katawhan ni Jehova sing amat-amat nga paghangop sa kamatuoran. Nagadala ini sa katawhan sa espirituwal nga kasanag, kag ginapakita sini sa mga mahagop kon paano simbahon ang Dios “sa espiritu kag kamatuoran.” (Juan 4:24) Ang balaan nga panudlo nagamadinalag-on man sa mga pagtilaw kag sa malauton nga kalibutan.​—⁠2/1, pahina 10-12.

▫ Ano ang yabi sa madinalag-on nga paglaygay?

Ang yabi amo ang nagakaigo nga pagtahod sa iban kag sa iya kinamatarong nga tratuhon sa matinahuron nga paagi. Gani, ang isa ka Cristianong manuglaygay dapat mangin malulo kag malig-on apang dapat nagapanapot sa ginalaygayan sing dignidad.​—⁠2/1, pahina 28.

▫ Paano ginbaton sang Iglesia Katolika Romana ang Pagsaka ni Maria sa Langit subong isa ka doktrina?

Sang unang mga siglo pagkatapos napatay si Jesus, ang ideya tuhoy sa Pagsaka ni Maria sa langit indi gid kilala sa panghunahuna sang mga Cristiano. Apang, sa tapos ang Trinidad nga doktrina nangin opisyal nga doktrina sang simbahan, si Maria ginhatagan sing dugang pa nga importante nga papel. Ang teoriya sang Pagsaka sa Langit ginbaton lamang subong doktrina sang Nobiembre 1, 1950, sang si Papa Pio XII nagpahibalo: “Ginakabig namon ini nga isa ka doktrina nga ginpahayag sang Dios.”​—⁠Munificentissimus Deus.​—⁠2/15, pahina 26-7.

▫ Sa Jeremias kapitulo 24, ano ang ginarepresentar sang duha ka alat sang mga higos, ang maayo nga mga higos kag ang mga malain?

Ang maayo nga mga higos nagarepresentar sa mga Judiyo nga gindala una nga bihag sa Babilonia, nga gikan sini isa ka nagkalabilin ang nagbalik sa Juda. Ang malain nga mga higos nagalaragway kay Hari Sedequias kag yadtong mga kaupod niya nga nagrebelde batok kay Hari Nabocodonosor walay sapayan nga nakapanumpa sa ngalan sang Dios. Sa pagpaanggid, makita naton sa modernong mga tion ang nagkalabilin sang espirituwal nga Israel, nga nagpatubas sing maayong mga bunga sa ila kabuhi, kabaliskaran sa klero sang Cristiandad, nga nagpatubas sing dunot nga mga bunga.​—⁠3/1, pahina 14-16.

▫ Sin-o ang mga Quartodeciman, kag ngaa makawiwili sila sa mga Cristiano karon?

Pagkatapos sang panahon sang mga apostoles, may iban nga nagsaulog sang Panihapon sang Ginuo sa Nisan 14 kada tuig, nga nagasunod sang halimbawa sang mga apostoles. Nakilal-an sila nga mga “Ikanapulog-apat,” ukon mga Quartodeciman. Makawiwili ini sa karon, kay ginapakita sini nga bisan sa tapos napatay ang mga apostoles, may iban nga nagpabilin sa nagakaigo nga paagi sang pagsaulog sang kamatayon ni Jesus sing makaisa sa isa ka tuig sa Nisan 14.​—⁠3/15, pahina 4-5.

▫ Sin-o si William Whiston?

Sia isa ka maalam nga iskolar sang ika-18 nga siglo sa Inglaterra, isa ka suod nga kaupod ni Sir Isaac Newton. Ginbadbad ni Whiston ang Cristianong Griegong Kasulatan, hayag nga namatok sa panudlo sang Trinidad nga doktrina, kag manuglektyur sa astronomiya kag matematika. Apang ayhan labi nga madumduman si Whiston bangod sang iya pagbadbad sa Ingles sang mga sinulatan sang Judiyong istoryador nga si Flavius Josephus.​—⁠3/15, pahina 26-8.

▫ Paano ginhimo ang tawo sa larawan sang Dios? (Genesis 1:⁠27)

Ang tawo ginhimo nga may ikasarang sa pagpakita sang tumalagsahon nga mga kinaiya sang Dios nga gugma, katarungan, kaalam, kag gahom​—⁠subong man sang iban pa nga mga kinaiya.​—⁠4/1, pahina 25.