Sa Diin Ikaw Makasapo sing Masaligan nga Panuytoy?
“NAHIBALUAN ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat ang pagmando bisan sang iya mga tikang. Tadlunga ako, O Jehova.”—Jeremias 10:23, 24.
Ginsulat sang manunulat sang Biblia nga si Jeremias ina nga mga pulong sang nagligad nga mga 25 ka siglo. Ang mailo nga kahimtangan sang katawhan pagligad sang linibo ka tuig nga pag-aplikar sang tawhanon nga panuytoy nagapamatuod sa dimabais nga kamatuoran sini nga pinamulong. Apang ayhan ipamangkot mo, ‘Sa diin masapwan ang masaligan nga panuytoy?’
Ang kasulatan nga ginbalikwat sa ibabaw nagatudlo sa tuburan sang masaligan nga giya kag tuytoy nga labaw gid sa tawo—ang Manunuga sang tawo, nga si Jehova nga Dios. Pat-od gid nga wala sang isa nga nakahibalo sing maayo pa sang pagkahuman sang tawo kag sang iya mga kinahanglanon sangsa aton Manunuga. Apang, interesado bala ang Dios sa pag-aman sa aton sina nga giya kag tuytoy? Paano niya ini ginahimo? Praktikal bala ini sa panahon naton?
Gindesinyo sa Pagbaton sing Balaan nga Panuytoy
Kilala na nga ang pangunang kinatuhayan nga nagahamulag sa tawo gikan sa mga sapat nasentro sa pagkahuman, kapasidad, kag pagpanghikot sang tawhanon nga utok. Halos tanan nga pagpanghikot sang utok sa mga sapat ginprograma sa ginatawag nga duna nga kaalam. Indi amo sini sa mga tawo.—Hulubaton 30:24-28.
Indi kaangay sang utok sang mga sapat, ang daku nga bahin sang tawhanon nga utok wala sing permanente nga mga programa. Ginhatagan sang Dios ang mga tawo sing ikasarang sang hilway nga pagbuot, nagapaposible sa ila sa paghimo sing intelihente nga mga desisyon kag sa pagpakita sing superyor nga mga kinaiya, subong sang gugma, kaalwan, dikakagod, katarungan, kag kaalam.
Makatarunganon bala hunahunaon nga gintuga sang Dios ang tawo nga may amo nga ikasarang sa hunahuna nga wala nag-aman sing panuytoy sa kon paano ini labing maayo nga gamiton? Ginhatagan sang Dios ang unang mga tawo sing direkta nga panuytoy. (Genesis 2:15-17, 19; 3:8, 9) Bisan sa tapos nahulog sa sala ang tawo, si Jehova padayon nga nagtuytoy sa matutom nga mga kalalakin-an kag mga kababayin-an, sing labing talalupangdon paagi sa iya kaugalingon inspirado nga Pulong, ang Biblia. (Salmo 119:105) Nagtugot ini sa mga tawo nga malubad sing madinalag-on ang adlaw-adlaw nga mga problema sang kabuhi samtang ginagamit nila ang ila hilway nga pagbuot sing maalamon.
Ang Pagsulat sang Dios sa Biblia
Ano ang nagahimo sa Biblia nga isa ka masaligan nga ginhalinan sang panuytoy? Una, nagahatag ini sang impormasyon nga ang Manunuga lamang ang makaaman. Ginabalay sini ang maragtas sang mga hitabo antes pa nagsugod ang tawhanon nga kabuhi. Halimbawa, ginaaman sini ang maragtas kon paano ginhanda ang duta sa alagisod nga mga hut-ong tubtob nangin nagakabagay ini sa pagsakdag sa tawhanon nga kabuhi. (Genesis, kapitulo 1, 2) Bisan ginrekord ini sa Biblia sang nagligad nga kapin sa 3,000 ka tuig, nahisanto ini sa modernong sientipiko nga mga ideya.
Sa wala pa ginbaton sang katawhan sa kabilugan nga ang duta matipulon, ang Biblia nagsiling: “Ginauntay [sang Dios] ang aminhan sa ibabaw sang wala unod nga kahawaan, kag ginabitay niya ang duta sa ibabaw sang wala.” (Job 26:7) Dugang pa, ginasugid sang Biblia nga “may Isa nga nagalingkod sa ibabaw sang natipulunan sang duta, kag ang iya mga pumuluyo subong sang mga tibakla.” (Isaias 40:22) Ang Dios lamang, nga Manunuga, ang makaaman sini nga detalye.
Ang ikasarang sa pagpakot sang palaabuton indi isa ka dulot nga ginhatag sa tawo. Sa baylo, ginatagna sang Dios ang palaabuton paagi sa mga pahina sang Biblia. Gin-inspirar sang Dios si manalagna Isaias sa pagsulat tuhoy sa Iya: “Ako amo ang Isa nga Balaan kag wala na sing iban nga Dios, kag wala na gid sing kaangay sa akon; ang Isa nga nagapahayag sang katapusan kutob sa ginsuguran, kag kutob sa dumaan nga mga tion sang mga butang nga wala pa mahimo.”—Isaias 46:9, 10.
Ginpakita sang Biblia nga makatilingala nga matagna sini sing husto ang katapusan halin sa ginsuguran. Halimbawa, gintagna sini ang pagbangon, pagkapukan, kag ang mga karakteristiko sang pangunang mga kagamhanan sa kalibutan sa sulod sang linibo ka tuig sang tawhanon nga maragtas. Ining talalupangdon nga mga tagna ginsulat mga siglo pa antes sang mga katumanan sini, sa pila ka hitabo sing linibo ka tuig antes. Busa ginatagna sing husto sang Biblia ang modernong-adlaw nga mga hitabo, subong man ang ila katapusan nga resulta. Pinasahi man ang Biblia bangod ginatudlo sini ang dalan sang kaluwasan sa tion nga laglagon ang dihimpit hinimo-sang-tawo nga mga gobierno sa Armagedon, “ang inaway sang dakung adlaw sang Dios nga Labing Gamhanan.” Himuon sang Ginharian sang Dios sa kamot sang iya Anak, nga si Jesucristo, inang daku nga buhat.—Bugna 16:14, 16; 17:9-18; Daniel, kapitulo 2, 8.
Pirme Mapuslanon—Indi Makahalalit
Ang tawhanon lamang nga kaalam dihimpit; gani, ang tawhanon nga laygay indi pirme mapuslanon, bisan nga mahimo ini ihatag upod ang maayo nga mga tinutuyo. Indi amo sini sa laygay sang Biblia. Ang Dios mismo nagasiling: “Ako, si Jehova, . . . ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo. O kabay kuntani nga nagpamati ka sa akon mga sugo! Nian ang imo paghidait nangin subong kuntani sang suba, kag ang imo pagkamatarong nangin subong sang mga balod sang dagat.”—Isaias 48:17, 18.
Ang balaan nga panuytoy nagabulig sa aton sa pagpahamtang sing mga prioridad kag sa pagtuman sa superyor nga mga prinsipio sa kabuhi. Samtang ginapadaku sang modernong katilingban ang materyal nga mga hinimuan kag mga tulumuron, ginapadaku sang Biblia kon daw ano ka hamili para sa aton nga “isentro ang aton mga mata, indi sa mga butang nga makita, kundi sa mga butang nga dimakita. Kay ang mga butang nga makita umalagi, apang ang mga butang nga dimakita walay katapusan.” (2 Corinto 4:18) Sa sining paagi ginapalig-on sa aton nga tigayunon ang pinakamaayo nga mga tulumuron sa kabuhi, nga amo, ang espirituwal nga mga tulumuron may kaangtanan sa paghimo sang kabubut-on sang Dios, nga ang lamang nga tulumuron amo ang kabuhi nga walay katapusan sa makatarunganon nga bag-ong sistema.
Samtang ginapanikasugan sang Cristiano nga tigayunon ining mataas nga mga tulumuron, ang laygay sang Biblia nagabulig sa iya sa pagkabuhi sang pinakamaayo nga sahi sang kabuhi nga posible sa sining malauton nga sistema sang mga butang. Ang modernong tawhanon nga mga kaalam nagapalig-on sang pilosopiya nga magtrabaho sing kubos kag magtigayon sang pinakadaku nga suweldo. Sa pihak nga bahin, ang Biblia nagasugid sa aton nga “mangin imol ang nagapangabudlay sa kamot nga matamad, apang ang kamot sang makugi nagapamanggad.” Si apostol Pablo nagsulat sa Hebreong mga Cristiano: “Nagasalig kami nga may bunayag kami nga konsiensia, kay handum namon nga maggawi sing bunayag sa tanan nga butang.”—Hulubaton 10:4; Hebreo 13:18.
Ang Biblia nagahatag man sing praktikal nga laygay tuhoy sa kahimusan sang pamilya. Ginapasad sini ilabi na ang katungdanan sang bana kag asawa sa kahimusan sang pag-asawahay, subong man ang husto nga paagi sang pagpadaku kag pagtudlo sa mga kabataan. Ini nagasiling: “Ang mga bana dapat maghigugma sang ila mga asawa subong sang ila kaugalingon nga mga lawas. . . . Sa pihak nga bahin, ang asawa dapat magtahod sing tudok sang iya bana. Mga anak, tumana ang inyo mga ginikanan. . . . Kamo, nga mga amay, dili ninyo pagpaakiga ang inyo mga anak, kundi padayon sila nga sagura sa disiplina kag panghunahuna ni Jehova.” Ang pagsunod sa superyor nga laygay sang Manunuga nagabulig sing daku sa kalig-unan kag kalipay sang mga pamilya.—Efeso 5:21–6:4.
Isa ka Malig-on nga Palaabuton Para sa mga Nagasunod sa Panuytoy sang Dios
Ginahatag sang nasulat nga Pulong sang Dios ang solusyon sang Dios para sa tanan nga mga problema sang tawo. Sa dili madugay dulaon ni Jehova nga Dios ang karon nga sistema sang mga butang, lakip ang tanan nga kasakit sini, inhustisya kag pag-antos, kag buslan ini sang iya matarong nga bag-ong sistema. Ginalaragway ini sang Biblia sa 2 Pedro 3:7-10, nagadugang sa bersikulo 13: “May mga bag-ong langit kag isa ka bag-ong duta nga ginahulat naton suno sa iya saad, kag sa sini magapuyo ang pagkamatarong.” Amo ini sa karon ang pinakamaayo nga maayong balita nga mahatag sa tawhanon nga pamilya. Amo gid ini ang mensahe nga ginahatag sang Biblia kag ginabantala sang mga Saksi ni Jehova sa kapin sa 200 ka kadutaan kag kapuluan sa dagat.
Kon ang kabubut-on sang Dios ginahimo sa bug-os nga duta, ang bug-os tawhanon nga pamilya magabenepisyo paagi sa pagsunod sa ekselente nga panuytoy sang Manunuga sini, nga si Jehova. Madula na ang mga problema sa kaimulon, krimen, kag mga droga. Ang katawhan dili na magbalatian, magtigulang, kag mapatay. Ang tawhanon nga pamilya pagahimpiton kaangay sang aton unang mga ginikanan antes sila nagrebelde batok sa panuytoy sang Dios.
Daw ano katahom ang paglaragway sang katapusan nga tulun-an sang Biblia sa makalilipay nga kahimtangan sadtong nagabutang sang ila pagsalig sa balaan nga panuytoy! Ang Bugna 21:4, 5 nagasiling: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Ang nahaunang mga butang nagtaliwan.” Gingarantiyahan ina sang aton Manunuga, nga nagasiling: “Toloka! Ginahimo ko nga bag-o ang tanan nga butang.” Sia nagadugang: “Ining mga pulong masaligan kag matuod.”
Agod matigayon naton ining mga pagpakamaayo, ano ang ginapaabot sang Dios sa aton? Ginapaathag ni apostol Pablo nga kabubut-on sang Dios nga “ang tanan nga tawo maluwas kag makadangat sa sibu nga ihibalo sang kamatuoran.” (1 Timoteo 2:4) Ang mga Saksi ni Jehova mainabyanon nga nagaagda sa imo sa pagtigayon sinang sibu nga ihibalo sang kamatuoran paagi sa maid-id nga pagtuon sa Biblia. Paagi sa makugi nga pagtuon nahanungod sa balaan nga kabubut-on, masapwan mo man paagi sa eksperiensia nga ang balaan nga kaalam amo lamang ang masaligan nga panuytoy sa sining makatalagam nga mga tion. Ang pagkahilingagawon sang mga tion nagahimo sini nga kinahanglanon gid sundon!