Mga Pamatan-on—Kay Sin-o Panudlo ang Inyo Ginapamatian?
“Ang iban magatalikod sa pagtuo, nga nagatalupangod sa . . . mga panudlo sang mga demonyo.”—1 TIMOTEO 4:1.
1. (a) Ano ang mga pililian sang mga pamatan-on? (b) Paano nagatudlo si Jehova?
ANG pamangkot diri nga ginapatuhoy sa mga pamatan-on amo, Kay sin-o panudlo ang inyo ginapamatian? Nagapakita ini nga kamo nga mga pamatan-on may pililian. Ang pililian amo ang sa ulot sang pagbaton sa diosnon nga panudlo kag pagsunod sa mga panudlo sang mga demonyo. Si Jehova nagatudlo paagi sa iya Pulong, ang Biblia, kag paagi man sa ministeryo sang mga ginagamit niya subong mga tiglawas niya sa duta. (Isaias 54:13; Binuhatan 8:26, 39; Mateo 24:45-47) Apang nakibot ka bala nga ang mga demonyo nagatudlo man?
2. Ngaa kinahanglanon nga magbantay batok sa mga panudlo sang mga demonyo ilabi na sa sining tion?
2 Si apostol Pablo nagsulat: “Sa ulihi nga mga panag-on sang tion ang iban magatalikod sa pagtuo, nga nagatalupangod sa nagapatalang nga inspirado nga mga pinamulong kag sa mga panudlo sang mga demonyo.” (1 Timoteo 4:1) Sanglit nagakabuhi kita sa “katapusan nga mga adlaw” nga si Satanas kag ang iya mga demonyo ilabi na nga aktibo, nahangpan bala ninyo kon ngaa ginabangon namon ang pamangkot, Kay sin-o panudlo ang inyo ginapamatian? (2 Timoteo 3:1-5; Bugna 12:7-12) Bangod si Satanas kag ang iya mga demonyo tuman ka malimbungon, tuman ka madayaon sa ila mga paagi sa pagpanghikot, kinahanglan nga hatagan ninyo sing mahalungon nga pagbinagbinag ini nga pamangkot.—2 Corinto 11:14, 15.
Ang mga Demonyo kag ang Ila mga Panudlo
3. Sin-o ang mga demonyo, ano ang ila katuyuan, kag paano nila ginatinguhaan nga himuon ini?
3 Ang mga demonyo mga anghel anay ni Jehova, apang nagrebelde sila batok sa ila Manunuga kag sa amo nangin mga sumalakdag ni Satanas. (Mateo 12:24) Ang ila katuyuan amo ang pakalainon ang katawhan kag patalikdon sila gikan sa pag-alagad sa Dios. Agod mahimo ini, ginagamit sang mga demonyo ang tawhanon nga mga manunudlo sa pagpasanyog sang makagod, imoral nga dalanon sang pagkabuhi nga ginapakamalaut ni Jehova. (Ipaanggid ang 2 Pedro 2:1, 12-15.) Ang pagrepaso sa kon paano ang matutom anay nga mga anghel nangin mga demonyo magabulig sa inyo nga makilala ang ila mga panudlo kag ang dalanon sang kabuhi nga ginapasanyog sining mga panudlo.
4. (a) Ngaa nagkari sa duta ang dimatinumanon nga mga anghel sang panahon ni Noe? (b) Ano ang natabo sa malauton nga mga anghel kag sa ila mga kaanakan sang panahon sang Anaw?
4 Sang panahon ni Noe, ang pila ka mga anghel naganyat gid sa matahom nga mga anak nga kadalagahan sang mga tawo nga ginbiyaan sining espiritu nga mga tinuga ang ila posisyon sa langit agod magkari sa duta. Ang ila seksuwal nga paghiusa sa mga babayi nagresulta sa mestiso nga kaanakan nga gintawag nga Nefilim. Sanglit indi kinaugali para sa espiritu nga mga tinuga ang mangasawa sa mga tawo, ang ginhimo sang dimatinumanon nga mga anghel sa sadtong mga babayi sayop kaangay gid sa homoseksuwal nga mga buhat sang ulihi sang mga kalalakin-an kag mga kabataan nga lalaki sa Sodoma. (Genesis 6:1-4; 19:4-11; Judas 6, 7) Bisan nga ang mga tiayon sang mga anghel nagkalamatay sa baha kaupod sang ila mestiso nga mga kabataan, gin-uba sang malauton nga mga anghel ang ila ginmateryalisar nga undanon nga mga lawas kag nagbalik sa langit diin nangin demonyo nga mga kaupdanan sila ni Satanas nga Yawa.—2 Pedro 2:4.
5. Ano nga sahi sang mga tinuga ang mga demonyo, kag paano nila ginatinguhaan nga patikuon ang mga kasuguan sang Dios?
5 Bangod sining maragtason nga ginhalinan, nahangpan bala ninyo kon ano gid nga sahi sang mga tinuga ang mga demonyo? Sila ang mga nagahimo sang tiko nga mga padugi sa sekso kag yara sa likod nga mga manugmaniobra sining nabuang-sa-sekso nga kalibutan. Bisan nga gindumilian sila nga magmateryalisar liwat subong mga tawo, nagakalipay sila gikan sa tiko nga seksuwal nga mga buhat sadtong mahimo nila mapalain sa duta. (Efeso 6:11, 12) Ginatinguhaan sang mga demonyo nga patikuon ang mga kasuguan ni Jehova may kaangtanan sa pagkaputli kag moralidad paagi sa paghimo sa sini nga daw sobra ka madumilion. Ginasakdag sining malauton nga mga anghel ang seksuwal nga imoralidad subong isa ka normal kag makalilipay nga dalanon sang kabuhi.
Pagpasanyog sang mga Panudlo sang mga Demonyo
6. Ngaa indi kita dapat makibot nga ang mga demonyo nagapasanyog sang ila mga panudlo sa malimbungon nga paagi?
6 Indi kita dapat makibot nga pasanyugon sang mga demonyo ang ila mga panudlo sa malimbungon nga paagi, kay amo ini ang paagi nga gingamit sang ila lider, nga si Satanas nga Yawa, sa paglimbong kay Eva. Dumduma nga nakigsugilanon sia sa iya subong nga daw luyag niya magbulig. “Matuod gid bala nga nagsiling ang Dios nga indi kamo magkaon gikan sa tagsa ka kahoy sa katamnan?” pamangkot ni Satanas. Nian malimbungon nga gintinguhaan niya nga pakadiutayon ang panudlo sang Dios paagi sa pagsiling kay Eva nga magkaayuhan sia gikan sa pagkaon sa gindumilian nga kahoy. “Sa adlaw nga magkaon kamo gikan sa sini,” panaad sang Yawa, “magamuklat ang inyo mga mata kag mangin kaangay sang Dios kamo, nga nakahibalo sang maayo kag malain.” (Genesis 3:1-5) Busa nasulay si Eva, huo, nalimbungan, sa paglapas sa Dios.—2 Corinto 11:3; 1 Timoteo 2:13, 14.
7. Ano ang nangin epekto sang malimbungon nga mga panudlo sang mga demonyo, kag ano nga paandam ang ginahatag sini?
7 Sa sining karon man nga mga tion, madamo ang nasulay. Malimbungon gid nga ginapasanyog sang mga demonyo ang seksuwal nga imoralidad amo nga nangin kalahamut-an ini sa madamo nga nagapakamalaut sini anay. Halimbawa, sang ginsabat sang isa ka kilala nga manughatag-laygay nga kolumnista ang isa ka sulat nahanungod sa mga diminyo nga nagahimo sing seksuwal nga paghulid, sia nagsulat: “Indi gid ako makapati nga magabag-o ako sa sini nga butang, apang nagapati ako karon nga ang magnobya nga serioso sa pag-asawahay dapat anay maglakbay nga magkaupod sa pila ka talipuspusan sang semana agod tilawan kon magsahuay sila.” Nian sia nagdugang: “Indi ako makapati nga nasulat ko yadto!” Bisan sia indi makapati nga ginrekomendar niya ang pakighilawas, apang nahimo niya! Sing maathag, dapat kita maghalong nga ang aton pagtamod sa mga buhat nga ginapakamalaut sang Dios indi maapektuhan sang mga panudlo sang mga demonyo.—Roma 1:26, 27; Efeso 5:5, 10-12.
8. (a) Paano ginagamit ang tinaga nga “kalibutan” sa Biblia? (b) Sin-o ang nagagahom sa kalibutan, kag paano dapat tamdon sang mga sumulunod ni Jesus ang kalibutan?
8 Indi gid kita dapat malipat nga si Satanas amo ang “gumalahom sining kalibutan.” Sa katunayan, si apostol Juan nagsiling nga “ang bug-os nga kalibutan yara sa gahom sang isa nga malauton.” (Juan 12:31; 1 Juan 5:19) Matuod, gingamit kon kaisa ni Jesus ang tinaga nga “kalibutan” sa pagpatuhoy sa tanan nga katawhan. (Mateo 26:13; Juan 3:16; 12:46) Walay sapayan, sing mas masunson, gingamit niya ang tinaga nga “kalibutan” sa pagpatuhoy sa tanan nga organisado nga tawhanon nga katilingban nga nagaluntad sa guwa sang matuod nga Cristianong kongregasyon. Halimbawa, si Jesus nagsiling nga ang iya mga sumulunod dapat mangin “indi bahin sang kalibutan” (dimatarong nga tawhanon nga katilingban) kag bangod indi sila bahin sang kalibutan, ang kalibutan magadumot sa ila. (Juan 15:19; 17:14-16) Ang Biblia dugang nga nagapaandam nga dapat naton likawan ang mangin mga abyan sining kalibutan nga ginagahuman ni Satanas.—Santiago 4:4.
9, 10. (a) Anong kalibutanon nga mga butang ang nagapukaw sang dinagakaigo nga seksuwal nga kailigbon? (b) Paano mahimo makilala kon sin-o ang yara sa likod sang ginatudlo sang kalingawan sang kalibutan?
9 Si apostol Juan naglaygay: “Dili ninyo paghigugmaon ang kalibutan ukon ang mga butang nga yara sa kalibutan.” Sia man nagsiling: “Ang tanan nga yara sa kalibutan—ang kailigbon sang unod kag ang kailigbon sang mata kag ang pakitakita nga pangabuhi—wala maghalin sa Amay.” (1 Juan 2:15, 16) Hunahunaa ini. Ano bala ang yara sa kalibutan sa karon nga nagapukaw sang sayop nga kailigbon, halimbawa, sang kailigbon sa ginadumilian nga sekso? (1 Tesalonica 4:3-5) Kamusta ang kalabanan nga musika sang kalibutan? Ang isa ka probation officer nga pulis sa California nagsiling: “Sa kinaandan, ang musika nagatudlo nga indi kinahanglan nga pamatian ninyo ang inyo mga ginikanan, kag nga dapat kamo magkabuhi sa paagi nga luyag ninyo.” Nakilala bala ninyo ang ginhalinan sang panudlo nga ginahatag sang amo sina nga musika?
10 Dumduma nga si Satanas, sa katunayan, nagsiling kay Eva: ‘May nawasi ikaw nga makawiwili ukon mapuslanon nga butang. Magkabuhi sa paagi nga luyag mo. Mamat-od para sa imo kaugalingon kon ano ang maayo kag kon ano ang malain. Indi kinahanglan nga mamati ka sa Dios.’ (Genesis 3:1-5) Indi bala nga amo man sina nga sahi sang mensahe ang masapwan sa kalabanan nga musika sang kalibutan? Apang ang mga demonyo wala nagatudlo paagi lamang sa musika. Nagagamit man sila sang komersial nga mga programa sa telebisyon, sine, kag video sa pagtudlo. Paano? Ti, ang mga paagi sang komunikasyon sang kalibutan nagapresentar sang kalingawan nga nagahimo sang moral nga mga panudlo sang Dios nga daw mapiguson. Ginasakdag nila ang pakighilawas paagi sa pagpadaku sini kag sa pagpresentar sini subong kalahamut-an.
11. Kon tuhoy sa moral, ano ang masami nga ginatudlo sang telebisyon?
11 Ang magasin nga U.S.News & World Report nagsiling: “Sang 1991, ang tatlo ka estasyon [sa E.U.] nagpakita sing kapin sa 10,000 ka seksuwal nga mga danyag sa mga oras nga madamo ang nagatan-aw; para sa tagsa ka danyag nga nagalaragway sang seksuwal nga paghirupay sang mga mag-asawa, ang mga estasyon nagpakita sing 14 ka danyag sang sekso sa guwa sang pag-asawahay.” Paagi sa pagpakita sing kapin sa 9,000 ka danyag sang ginadumilian nga sekso sa mga oras nga madamo ang nagatan-aw sa isa ka tuig, ano ang masiling ninyo nga ginatudlo sang telebisyon? Si Barry S. Sapolsky, nga nagsulat man sang report nga “Sex in Primetime Television: 1979 Versus 1989,” nagsiling: “Kon ang isa ka tin-edyer tinuig nga magatan-aw sing TV diin ang mga tawo nagahimo sing makiaton ukon seksuwal nga mga buhat, ining linibo ka laragway sa sulod sang mga tinuig magatudlo sa ila nga ang sekso maayo—kag nga wala sing bisan ano man nga resulta.” Wala gid sing pangduhaduha sa sini: Ang kalingawan sang kalibutan nagatudlo sa mga pamatan-on nga wala sing mga pagsulundan, nga ang pakighilawas kalahamut-an, kag nga wala sing malain nga mga resulta sa pagkabuhi sa paagi nga ginapakamalaut sang Dios.—1 Corinto 6:18; Efeso 5:3-5.
12. Ngaa ang kalingawan sang kalibutan makatalagam ilabi na sa Cristianong mga pamatan-on?
12 Ang musika, sine, video, kag telebisyon sang kalibutan gindesinyo sa pagganyat sa mga pamatan-on. Ginapalapnag nila ang malaut nga mga panudlo sang mga demonyo! Apang makapakibot bala ini? Hunahunaa ini. Kon ang butig nga relihion kag politika bahin sang kalibutan ni Satanas—kag maathag gid nga amo—nagakaigo bala ang magpati nga ang kalingawan nga ginapasanyog sang kalibutan hilway sa impluwensia sang demonyo? Kamo nga mga pamatan-on ilabi na nga dapat mag-andam nga indi ‘pagtugutan ang kalibutan sa palibot ninyo nga magdasok sa inyo sa iya kaugalingon nga hurmahan.’—Roma 12:2, The New Testament in Modern English, ni J. B. Phillips.
Usisaa ang Kaugalingon
13. Anong pag-usisa sa kaugalingon ang dapat himuon?
13 Ang butang tuhoy sa kon kay sin-o mga panudlo ang inyo ginapamatian ginapat-od indi lamang sang inyo panghambal kundi sang inyo man mga buhat. (Roma 6:16) Gani pamangkuta ang inyo kaugalingon, ‘Ang akon bala panimuot kag ang akon dalanon sang pagkabuhi dinagakaigo nga naapektuhan sang akon natun-an paagi sa mga paagi sang propaganda sang kalibutan? Ang mga panudlo sang mga demonyo mahimo bala nga nagahimo sing mga kahalitan sa akon kabuhi?’ Sa pagbulig sa inyo nga masabat ina nga mga pamangkot, ngaa indi pag-ipaanggid ang kadamuon sang tion kag panikasog nga ginahinguyang ninyo sa pagtuon sa Biblia, pagtambong sa Cristianong mga miting, kag pagpakigsugilanon sa iban nahanungod sa Ginharian sang Dios sa ginahinguyang ninyo sa pagtan-aw sing TV, pagpamati sa musika, pagpakigbahin sa inyo paborito nga isport, ukon pagbuhat sang kaanggid nga mga aktibidades? Sanglit daku gid—sa pagkamatuod, ang inyo gid kabuhi—ang yara sa katalagman, usisaa sing bunayag ang inyo kaugalingon.—2 Corinto 13:5.
14. Ano ang makaapektar sa aton espirituwal nga kapagros, kag anong serioso nga panghunahuna ang dapat naton huptan sa hunahuna?
14 Nakahibalo gid kamo nga ang materyal nga pagkaon nga ginakaon ninyo nagaapektar sang inyo pisikal nga kapagros. Sa kaanggid, ang inyo epsirituwal nga kapagros apektado sang kon ano ang inyo ginapakaon sa inyo hunahuna kag tagipusuon. (1 Pedro 2:1, 2) Samtang mahimo ninyo madaya ang inyo kaugalingon nahanungod sa kon ano gid ang inyo tunay nga mga naluyagan, indi ninyo madaya ang aton Hukom, nga si Jesucristo. (Juan 5:30) Gani pamangkuta ang inyo kaugalingon, ‘Kon si Jesus yari sa duta, mahuya bala ako nga pasudlon sia sa akon hulot kag pabation sang akon musika ukon patan-awon sang akon ginatan-aw?’ Ang serioso nga katunayan amo nga si Jesus nagatan-aw kag nakahibalo sang aton mga buhat.—Bugna 3:15.
Pamatuki ang mga Panudlo sang mga Demonyo
15. Ngaa dapat makig-away sing lakas ang mga Cristiano agod pamatukan ang mga panudlo sang mga demonyo?
15 Daku gid nga pag-ipit ang ginahimo sang mga demonyo agod pamatian sang mga pamatan-on ang ila mga panudlo. Ining malauton nga mga espiritu daw nagatanyag sing pagkabuhi nga may umalagi nga kaayawan—isa nga masadyahon kag makalilipay. Agod pahamut-an ang Dios, ginsikway ni Moises sang una “ang umalagi nga kalipayan sang sala” subong prominente nga katapo sang panimalay ni Faraon. (Hebreo 11:24-27) Indi mahapos sikwayon ang ginatanyag sang mga demonyo, gani dapat kamo makig-away sing lakas nga himuon kon ano ang husto. Matuod ini ilabi na bangod nakapanubli kita sing sala kag ang aton mga tagipusuon masunson nga naluyag sa paghimo sang malain. (Genesis 8:21; Roma 5:12) Bangod sang makasasala nga mga huyog, bisan si apostol Pablo dapat mangin matigdas sa iya kaugalingon kag indi pagtugutan ang iya undanon nga mga kailigbon nga magkontrol sa iya.—1 Corinto 9:27; Roma 7:21-23.
16. Paano mapamatukan sang mga pamatan-on ang paghimo sing imoral nga paggawi?
16 Bisan mahimo kamo masulay nga “mag-ilog sa kadam-an para sa malaut nga mga katuyuan,” ang Dios makabulig sa inyo nga pamatukan ang pag-ipit gikan sa inyo mga katubotubo nga maglakat sa ila sayop nga dalanon. (Exodo 23:2; 1 Corinto 10:13) Apang dapat ninyo pamatian ang mga panuytoy sang Dios, nagapakabahandi sang iya mga pinamulong sa inyo tagipusuon. (Salmo 119:9, 11) Dapat ninyo mahangpan nga kon ginapain sang mga pamatan-on ang ila kaugalingon, ang seksuwal nga kailigbon nagatubo kag nagadul-ong sa paglapas sa kasuguan sang Dios. “Kon nagaisahanon ako kaupod sang akon nobyo, ang akon lawas maluyag sa paghimo sang isa ka butang kag ang akon utok nagasugo sa akon nga himuon ang tuhay,” pagbaton sang isa ka pamatan-on. Gani hibalua ang inyo mga limitasyon kag hantupa nga ang inyo tagipusuon madayaon. (Jeremias 17:9) Indi pagpaina ang inyo kaugalingon. (Hulubaton 18:1) Magtalana sing mga limitasyon sa mga pagpakita sing pagpalangga. Kag importante ilabi na, makig-upod lamang sing suod sa mga nagahigugma kay Jehova kag nagatahod sing tudok sa iya mga kasuguan.—Salmo 119:63; Hulubaton 13:20; 1 Corinto 15:33.
17. Ano ang makabulig sa Cristianong mga pamatan-on nga matigayon ang kusog nga mapamatukan ang mga panudlo sang mga demonyo?
17 Ang mahalungon nga pagtuon sa Cristianong mga publikasyon nga gindesinyo para sa inyo espirituwal nga kabakod magabulig sa inyo. Halimbawa, binagbinaga ang libro nga Questions Young People Ask—Answers That Work kag ang kapitulo nga “Ang Pagpakig-away sa Paghimo sing Matarong” sa libro nga Mahimu Ka Mabuhi sing Dayon sa Paraiso sa Duta. Patuduka ang Makasulatanhon nga panudlo sa inyo hunahuna kag tagipusuon, kag magapabakod ini sa inyo. Ang isa ka katunayan nga indi gid ninyo dapat pagkalimtan amo nga sa sining kontrolado sang demonyo nga kalibutan ang paghimo sing husto indi mahapos. Gani makig-away sing lakas. (Lucas 13:24) Lig-una ang inyo espirituwal nga kusog. Indi pag-iluga ang mga maluya, mga mahinadlukon nga nagailog sa kadam-an.
Manginpulos sa Balaan nga Panudlo
18. Ano ang pila ka benepisyo sang pagpamati sa balaan nga panudlo?
18 Dumduma, man, nga wala kamo sing mawasi nga mapuslanon nga butang paagi sa pagpamati sa panudlo ni Jehova. Sia tunay nga nagahigugma sa inyo, kag amo ina kon ngaa sia ‘nagatudlo sa inyo sa kapuslanan.’ (Isaias 48:17) Gani pamatii ang panudlo ni Jehova, kag likawi ang kasubo sang isa ka nahalitan nga konsiensia, pagkawasi sing pagtahod sa kaugalingon, wala ginapaabot nga mga pagmabdos, mga balatian nga napaliton paagi sa sekso, ukon kaanggid nga mga trahedya. Si Jehova nagakasadya kon ang iya mga alagad nagahatag sa iya sing sabat sa hangkat ni Satanas nga ang katawhan indi magapabilin nga matutom sa Dios sa idalom sang pagtilaw. (Job 1:6-12) Kon ginapahalipay ninyo ang tagipusuon ni Jehova paagi sa pagpabilin nga matutom sa iya, makalampuwas kamo kon hukman niya ining kalibutan, samtang ang tanan nga nagalapas sing hungod sang iya mga kasuguan malaglag.—Hulubaton 27:11; 1 Corinto 6:9, 10; 1 Juan 2:17.
19. Ano ang balor sang pagpakig-upod sa sadtong nagapasalamat sa mga bulig sang panudlo ni Jehova?
19 Kon makig-upod kamo sing suod sa mga nagapasalamat sa ginhimo ni Jehova para sa ila, makatuon kamo gikan sa ila inagihan. Ang isa ka babayi nga nagiyan anay sa droga kag nagbuhat sing imoralidad nagpaathag: “Kon wala ako namati kay Jehova, kuntani patay na ako. Ang lalaki nga pakaslan ko kuntani napatay bangod sang AIDS. Ang akon anay tanan suod nga kalibutanon nga mga abyan napatay bangod sang AIDS ukon malapit na mapatay. Masunson ko sila makita sa mga kalye, kag ginapasalamatan ko si Jehova kada adlaw tungod sang iya mga kasuguan nga nagatuytoy sa iya katawhan kag nagahupot sa aton nga balaan kon ginasunod lamang naton ini. Wala pa gid ako nangin malipayon, kontento, kag malig-on sa kabuhi subong sang karon.” Sa pagkamatuod, ang pagpamati sa panudlo ni Jehova pirme nagabulig sa aton!
Himua ang Husto nga Pagpili
20, 21. (a) Ano ang duha ka pililian sang mga pamatan-on? (b) Anong mapinadayunon nga benepisyo ang magaresulta gikan sa pagpamati sa balaan nga panudlo?
20 Ginapalig-on namon kamo nga mga pamatan-on: Himua ang husto nga pagpili paagi sa pag-alagad kay Jehova. Nian mamat-od nga magpabilin sa sina nga desisyon. (Josue 24:15) Sa pagkamatuod, isa lamang sa duha ka pililian ang mahimo ninyo. Si Jesus nagsiling nga may yara malapad kag masangkad nga dalan—ang isa nga mahapos sa paghimo kon ano ang naluyagan sang isa. Ina nga dalan nagapadulong sa kamatayon, sa kalaglagan. Ang isa pa ka dalan masipot. Mabudlay ini nga dalan laktan sa sining imoral, kontrolado sang demonyo nga kalibutan. Apang ina nga dalan nagadul-ong sa ulihi sa mga nagalakbay sa sini padulong sa makalilipay nga bag-ong kalibutan sang Dios. (Mateo 7:13, 14) Diin nga dalan ang inyo pagalaktan? Kay sin-o panudlo ang inyo pamatian?
21 Ginabilin ni Jehova ang pagpili sa inyo. Wala niya kamo ginapilit nga alagaron sia. “Nabutang ko sa atubangan mo ang kabuhi kag ang kamatayon,” siling ni Moises, nga manalagna sang Dios, nga nagalaygay: “Pilia ang kabuhi.” Ini nga pagpili ginahimo paagi “sa paghigugma kay Jehova nga imo Dios, sa pagpamati sa iya tingog kag sa pagpabilin sa iya.” (Deuteronomio 29:2; 30:19, 20) Kabay nga maalamon nga pilion ninyo nga pamatian ang balaan nga panudlo kag agumon ang kabuhi nga walay katapusan sa mahimayaon nga bag-ong kalibutan sang Dios.
Paano Mo Sabton?
◻ Sin-o ang mga demonyo, kag ano ang ila ginatudlo?
◻ Paano ginapasanyog sang mga demonyo ang ila mga panudlo sa karon?
◻ Paano mahimo mapamatukan ang mga panudlo sang mga demonyo?
◻ Ano ang mga benepisyo sang pagpamatok sa mga panudlo sang mga demonyo?
[Piktyur sa pahina 16]
Antes sang anaw, ginpasanyog sang dimatinumanon nga mga anghel kag sang ila mga kaanakan ang kasingki kag pagpatuyang
[Piktyur sa pahina 18]
Mahuya ka bala kon mabatian ni Jesus ang imo paborito nga musika?