Makapailob Ka Bala?

SI Jehova nagsugo kay Abram: “Halin ka sa imo duta . . . pakadto sa duta nga akon igapakita sa imo; kag himuon ko gikan sa imo ang isa ka pungsod nga daku kag pakamaayuhon ko ikaw kag padakuon ang imo ngalan.” (Genesis 12:​1, 2) Si Abram 75 anyos sadto. Nagtuman sia kag maalamon nga nagpailob sa nabilin nga tinuig sang iya kabuhi, nga naghulat kay Jehova.

Sang ulihi, ang Dios nanaad sa mapailubon nga si Abraham (Abram): “Matuod gid pakamaayuhon ko ikaw, kag pabuaron ko ikaw.” Si apostol Pablo nagdugang: “Kag sa amo pagkatapos si Abraham nagpakita sing pailob, naagom niya ini nga saad.”​—⁠Hebreo 6:​13-15.

Ano ang pailob? Ginahatagan ini sing kahulugan sang mga diksionaryo subong ang ikasarang “sa paghulat sing kalma sa pila ka butang” ukon pagpakita sing “pagbatas sa idalom sang pagpaakig kag pagtilaw.” Gani ang imo pagkamapailubon ginatilawan kon kinahanglan ka nga maghulat sa isa ka tawo ukon sa isa ka butang, ukon kon ginapaakig ka ukon ginahul-an. Sa sinang mga kahimtangan ang mapailubon nga tawo nagapabilin nga kalma; ang dimapailubon nangin padasudaso kag maakigon.

Ang Aton Dimapailubon nga Modernong Kalibutan

Ilabi na sa madamong mga siudad, ginahatagan sing pagpadaku ang kadasig indi ang pailob. Para sa minilyon ka tawo nga nagapuyo sa nagaginutok nga mga siudad, ang tagsa ka adlaw nagasugod kon ang alarm clock magtunog. Ginasugdan sina ang madasig nga buhat​—⁠sa pagkadto sa isa ka lugar, sa pagpakigkita sa isa ka tawo, sa pagtigayon sang pila ka butang. Katingalahan bala nga madamo ang ginahul-an kag dimapailubon?

Naugot ka bala sa mga kakulangan sang iban? “Indi ko luyag ang indi mahunahunaon sa oras,” siling ni Albert. Ang kalabanan magaugyon nga ang paghulat sa isa ka tawo nga madugay mag-abot makapahuol, ilabi na kon may gintalana nga tion nga dapat lab-uton. Nahanungod sa Duke sang Newcastle, isa ka Britaniko nga politiko sang ika-18 nga siglo, amo ini ang ginsiling: ‘Tunga sa oras ang ginawasi niya sa aga, nga ginalagas niya sa nabilin nga inoras sa adlaw kag kinabatasan na nga pirme sia ulihi.’ Kon magasalig ka sa subong sina nga tawo kada adlaw, magapabilin ka bala nga mapailubon?

Kon nagamaneho sing salakyan, madali ka bala maakig, matak-an sa paghulat, ukon masulay sa pagpadalagan sing madasig? Sa sina nga mga sirkunstansia, ang dipagpailob masunson nagakahulugan sing kapahamakan. Sang 1989, sa anay Katundan nga Alemanya, kapin sa 400,000 ka aksidente sa haywey ang nagresulta sa kasamaran ukon kamatayon. Sa sini, 1 sa 3 ang resulta sang pagmaneho nga tuman kadasig ukon tuman kalapit sa salakyan sa unahan. Busa, sa dimagkubos sa pila ka kasangkaron, ang indi pagpailob amo ang ginbangdan sang kasamaran ukon kamatayon sang kapin sa 137,000 ka tawo. Daw ano nga bili nga ibayad para sa dipagpailob!

“Nabudlayan ako magpabilin nga mapailubon kon ang isa pirme nga nagapanapar,” reklamo ni Ann, “ukon kon ang isa palatikal.” Si Karl-Hermann nagabaton nga ang iya pailob ginahangkat sang “mga batan-on nga wala sing pagtahod sa mga tigulang.”

Ini kag ang iban nga mga kahimtangan magahimo sa imo nga dimapailubon. Paano, nian, ninyo mapalambo ang dugang nga pagpailob?

Mapalig-on ni Jehova ang Inyo Pagpailob

Madamong mga tawo ang nagahunahuna nga ang pagpailob pagpakita sing pagkadimapinat-uron ukon pagkaluya. Apang, para kay Jehova, nagakahulugan ini sing kusog. Sia mismo “mapailubon . . . bangod indi niya luyag nga ang bisan sin-o malaglag kundi nagahandom nga ang tanan makadangat sa paghinulsol.” (2 Pedro 3:⁠9) Busa, agod mapabakod ang inyo kaugalingon nga pagpailob, magpabilin nga suod kay Jehova kag magsalig sa iya sing bug-os. Ang pagpabakod sang inyo kaangtanan sa Dios amo ang isa ka pinakaimportante nga tikang padulong sa pagpalambo sing mapailubon nga disposisyon.

Dugang pa, importante nga hibaluon ang mga katuyuan ni Jehova para sa duta kag katawhan. Si Abraham “nagahulat sing siudad nga may tunay nga mga pundasyon [Ginharian sang Dios], nga ang manunukod kag naghimo sini nga siudad amo ang Dios.” (Hebreo 11:10) Sa kaanggid, mapuslanon nga huptan nga maathag ang diosnon nga mga saad kag mangin kontento sa paghulat kay Jehova. Nian marealisar mo nga ang pagpailob, nga wala nagapakita sing pagpangalag-ag, aktuwal nga nagaganyat sa mga tawo sa matuod nga pagsimba. Gani, “kabiga ninyo ang pagpailob sang aton Ginuo subong kaluwasan.”​—⁠2 Pedro 3:⁠15.

Ano kon ang imo kaugalingon nga personal nga mga sirkunstansia nagatilaw sang imo pagpailob nga halos dimaagwanta? Ginatilawan bala ikaw sing makaulugot sang mga ditumuluo? Daw tuman ka dugay na bala ikaw nga nagamasakit? Sa sina nga hitabo, dumduma ang ginsulat ni disipulo Santiago. Pagkatapos nga patuhuyan ang sulundan nga ginhatag sang mga manalagna sa pagpailob, ginsugid niya ang sekreto sang pagpabilin nga kalma sa idalom sang kahuol. Si Santiago nagsiling: “May bisan sin-o bala nga nagaantos sing kalainan sa inyo? Magpadayon sia sa pagpangamuyo.”​—⁠Santiago 5:​10, 13.

Hanuot nga mangabay sa Dios sa pangamuyo nga pabakuron ang imo pagpailob kag buligan ikaw nga makontrol ang imo espiritu sa idalom sang pagtilaw. Magliso pirme kay Jehova, kag buligan niya ikaw nga makilala ang mga sirkunstansia kag ang mga batasan sang iban nga nagabutang sa katalagman sang imo pagkakalma. Ang pagpangamuyo sing abanse sang posible nga mabudlay nga mga kahimtangan magabulig sa imo sa pagpabilin nga kalma.

Ang Nagakaigo nga Pagtamod sa Kaugalingon kag sa Iban

Agod huptan ang malinong nga panghunahuna, dapat mo tamdon ang imo kaugalingon kag ang iban sa nagakaigo nga paagi. Posible ini paagi sa pagtuon sa Biblia, kay ginapakita sini nga ang tanan nakapanubli sing mga pagkadihimpit kag busa may mga kaluyahon. Dugang pa, ang ihibalo sa Biblia magabulig sa imo sa pagtubo sa gugma. Ini nga kinaiya kinahanglanon agod makapailob sa iban.​—⁠Juan 13:​34, 35; Roma 5:12; Filipos 1:⁠9.

Ang gugma kag kahanuot sa pagpatawad makapakalma sa imo kon ginapaakig. Kon ang isa may batasan nga nagapaakig sa imo, ang gugma magapahanumdom sa imo nga indi ang tawo, kundi ang mga batasan, ang wala mo maluyagi. Binagbinaga kon daw ano kasunson mahimo nga ginatilawan sang imo kaugalingon nga mga kaluyahon ang pagkamapailubon sang Dios kag mahimo nga nagapaakig sa iban.

Ang husto nga pagtamod sa imo kaugalingon magabulig man sa imo sa paghulat sing mapailubon. Halimbawa, ginatinguhaan mo bala nga malab-ot ang mga pribilehiyo sa pag-alagad kay Jehova, lamang nga mapaslawan? Nabatyagan mo bala nga nagakaubos ang imo pailob kaangay sang katapusan nga balas sa isa ka baso nga taknaan? Kon amo sina, nian dumduma nga ang kalabanan nga dipagpailob nanggamot sa bugal. “Maayo pa ang isa nga mapailubon sangsa isa nga bugalon sa espiritu,” siling ni Solomon. (Manugwali 7:⁠8) Huo, ang bugal amo ang pangunang sablag sa pagpalambo sing pailob. Indi bala matuod nga mas mahapos para sa mapainubuson nga tawo ang maghulat sing kalma? Busa, palambua ang pagkamapainubuson, kag mas madali mo mabaton ang pagpalantang nga may kalinong sa hunahuna.​—⁠Hulubaton 15:33.

Ang Pagpailob Nagahatag sing Bugana nga mga Padya

Si Abraham nakilala sing maayo tungod sang iya pagtuo. (Roma 4:11) Apang, ang pagpailob naghimo sang iya pagtuo nga mabakod. Ano ang iya padya bangod sang paghulat kay Jehova?

Si Abraham labi nga ginsaligan ni Jehova. Busa ang ngalan ni Abraham nangin daku kag ang iya mga kaliwat nangin isa ka gamhanan nga pungsod. Ang tanan nga mga pungsod sa duta ginpakamaayo paagi sa iya binhi. Si Abraham nag-alagad subong humalambal para sa Dios kag subong larawan sang Manunuga. May daku pa bala nga padya para sa pagtuo kag pagpailob ni Abraham?

“Si Jehova mapinalanggaon gid” sa mga Cristiano nga mapailubon nga nagabatas sa mga pagtilaw. (Santiago 5:​10, 11) Ina nga mga indibiduwal nagaagom sing matinlo nga konsiensia bangod sang paghimo sang iya kabubut-on. Sa imo bahin, nian, kon maghulat ka kay Jehova kag mapailubon nga magabatas sang mga pagtilaw, ang imo pagpailob magaresulta sa kahamuot kag pagpakamaayo ni Jehova.

Ang pagkamapailubon nagabulig sa katawhan sang Dios sa tanan nga bahin sang kabuhi. Natukiban ini sang duha sa mga alagad ni Jehova, nga sanday Christian kag Agnes, sang namat-od sila nga magkagon. Ginpalantang nila ang pagkanakagon bilang pagtahod sa mga ginikanan ni Christian, nga nagkinahanglan sing tion nga makilala si Agnes. Ano ang epekto sini nga buhat?

“Ulihi na lang namon nahibal-an kon daw ano ka daku ang kahulugan sang amon pailob sa akon mga ginikanan,” paathag ni Christian. “Ang amon mapailubon nga paghulat wala maghalit sa kaangtanan namon nga mag-asawa. Apang amo ini ang ­nahaunang butang nga nagpabakod sang amon kaangtanan sa akon mga ginikanan.” Huo, ang pagpailob nagabili sing bugana nga mga pagpakamaa⁠yo.

Ang pagkamapailubon nagapasanyog man sing paghidait. Ang pamilya kag mga abyan magapasalamat nga wala mo ginapadaku ang ila tagsa ka kakulangan. Ang imo kakalma kag paghangop kon ang iban makahimo sing sayop nagatapna sang makahuluya nga mga hitabo. Ang isa ka Intsik nga hulubaton nagasiling: “Ang pagpailob sa tion sang kaakig magaluwas sa imo sa isa ka gatos ka adlaw sang kalisang.”

Ang pagkamapailubon nagapauswag sang imo personalidad, sa katunayan nagabulig sa imo nga mahuptan ang imo iban pa maayong mga kinaiya sa maayo nga kahimtangan. Nagahimo ini sang imo pagtuo nga mabakod, sang imo paghidait nga mapinadayunon, kag sang imo gugma nga dimationg. Ang imo pagpailob nagabulig sa imo nga malipayon samtang ginabuhat ang kalulo, kaayo, kag kalum-ok. Ang pagpailob nagapabakod sang kusog nga kinahanglanon sa pagpalambo sing pagbatas kag pagpugong sa kaugalingon.

Nian, maghulat sing mapailubon sa katumanan sang mga saad ni Jehova kag isa ka makatilingala nga palaabuton ang ginapasalig sa imo. Kaangay ni Abraham, kabay nga “paagi sa pagtuo kag pagpailob mapanubli [mo] ang mga saad.”​—⁠Hebreo 6:⁠12.

[Piktyur sa pahina 23]

Ang suod nga kaangtanan kay Jehova magabulig sa imo sa pagpailob, subong sang ginhimo ni Abraham