Ngaa Dapat Ikaw Mangin Interesado sa Relihion?
SA TAGSA ka pungsod sa nawong sang duta, may interes sa relihion. Sa pihak nga bahin, madamo man ang nagaprangka nga wala sila sing interes sa relihion. Apang amo na bala sila sina halin sang una?
Ang kinaugali sang tawo indi gid kontento sa materyal nga mga butang lamang. Nagakinahanglan ang mga tawo sing espirituwalidad. Ang adlaw-adlaw nga pagkabuhi nga nasentro sa pagtigayon lamang sing pisikal nga mga kinahanglanon, nga may paglingawlingaw kon kaisa, wala nagabusog sing bug-os sa pinakasulod nga mga kinahanglanon sang isa ka tawo. Indi kaangay sang mga sapat, luyag mahibaluan sang mga tawo, ‘Ano ang katuyuan sang kabuhi?’ ‘Amo lamang bala sini ang malip-ot nga kabuhi, madamo sing matahom apang madamo man sing malaw-ay nga mga bahin?’ Wala mo bala mapamangkot ang mga pakiana kaangay sini?
Apang, minilyon ka tawo nga buhi karon ang nagdaku sa mga palibot nga wala nagapalig-on sing mapuslanon nga interes sa relihion. Ina nga impluwensia mahimo nga naghalin sa ila mga ginikanan, mga manunudlo, mga katubutubo, ukon sa panguluhan pa gani.
Si Skalabrino, isa ka pamatan-on nga lalaki nga taga-Albania, nagpaathag nga sa idalom sang Komunista nga paggahom ang mga tawo gintudluan nga wala sing Dios. Dugang pa, makatalagam para sa ila nga maghambalanay tuhoy sa relihion; mahimo ini magdul-ong sa pagkabilanggo. Apang, sang 1991, sang didto sia sa Switzerland subong isa ka refugee, ginhatagan sia sing kahigayunan sa pagtuon sa Biblia. Ginbaton niya ini. Ngaa?
Bueno, nabatian niya sang didto pa sia sa Albania nga may yara libro nga ginatawag nga Biblia, apang wala gid sia sing namang-an sa sini. Sa amo, sang primero mahimo nga indi gid ang handum nga mahangpan ang Biblia ang nagpahulag sa iya. Bisan pa ginsugiran sia nga matun-an niya ang katuyuan sang Dios para sa katawhan kag sa duta, nakita man niya nga isa ini ka kahigayunan agod mapauswag niya ang iya paghambal sing lokal nga hambal. Apang, sa gilayon, nasapwan niya nga ang iya ginatun-an nagabusog sang isa ka tudok nga espirituwal nga pagkalangkag sa iya bahin. Nalipay sia sa ginasaad sang Dios nga isa ka bag-ong kalibutan diin magaluntad ang paghidait, isa ka kalibutan diin ang katawhan makakabuhi tubtob sa walay katubtuban kag bugana nga makatigayon sing tanan nga butang nga kinahanglanon para sa kabuhi. Labi pa nga napukaw ang iya interes sang matun-an niya nga sia kag ang iya pamilya mahimo mangin bahin sining bag-ong kalibutan. Indi matago ining maayong balita sa iya kaugalingon lamang, ginteleponohan niya ang iya pamilya sa Albania agod ipaambit ini sa ila.
Si Aleksei, nga nagapuyo sa Rusya, nakibot man sa mahimo mangin epekto sang sibu nga ihibalo sa Biblia sa kabuhi sang isa ka tawo. Bangod sang sobra nga mga problema kag wala sing makita nga makaalayaw nga paathag sa katuyuan sang kabuhi, nagplano sia nga maghikog. Apang, antes sini, nagkadto anay sia sa Finland agod magduaw sa isa ka abyan. Sang sa tren sia pakadto didto, ginsugid niya ang iya mga problema sa pila ka pasahero nga kaupod niya. Ang isa sa ila isa sang mga Saksi ni Jehova, nga nagpalig-on sa iya nga magtuon sing Biblia bangod nagahatag ini sing mga solusyon sa sina nga mga problema. Nagduhaduha sia. Sa iya paglakbay pauli, amo gihapon ang iya naeksperiensiahan. Sini nga tion isa naman ka lain nga Saksi ang naghambal kag ginsugiran sia nga pareho lang sila sing mga problema anay apang nabuligan sia sang Biblia sa paglandas sini. Ginpalig-on man niya sia nga magtuon sing Biblia. Pag-abot niya sa balay, nagkiriring ang telepono. Isa pa yadto ka abyan niya, nga nagatuon upod sa mga Saksi kag malipayon gid sia. Amat-amat na karon nga narealisar sining tawo nga ang Biblia makabulig gid siguro sa pag-aman sang iya ginakinahanglan, apang nahibaluan niya nga kon wala sing may magbulig indi niya mahangpan ini. Nagsugot sia nga tun-an ang Biblia sing regular sa iya puluy-an upod sa mga Saksi ni Jehova, kag nagsugod sia sa pagtambong sa ila mga miting. Wala madugay, nahangpan na niya kon ngaa ang mga nagadihon sang ila kabuhi sa kon ano ang ginatudlo sang Biblia malipayon gid, bisan pa may mga problema man sila nga kinaandan sa katawhan.
Bangod nahangpan ni Jesucristo ang kinaugali sang tawo, nagsiling sia: “Indi mabuhi ang tawo sa tinapay lamang.” (Mateo 4:4, The New English Bible) Nagsiling man sia: “Malipayon sila nga mahunahunaon sang ila espirituwal nga kinahanglanon.” (Mateo 5:3) Nagakalipay sila bangod nahibaluan gid nila ang ila kinahanglanon, nagahimo sing nagakaigo nga mga tikang sa pagbusog sini, kag ginapakamaayo sila sang Dios. Apang, indi naton maaman ang aton espirituwal nga kinahanglanon paagi lamang sa pagbuylog sa isa ka iglesia ukon pagtambong sa relihioso nga mga serbisyo. Ang relihion nga mahuyugon sa mga ritwal mahimo nga makagalanyat sa emosyon, apang nagahatag bala ini sing realistiko nga mga solusyon sa mga problema sang kabuhi? Bisan pa maayo nga mga ideya ang ginasakdag sang isa ka relihion, kon wala naman sini ginapaathag ang matuod nga katuyuan sang kabuhi, maaman bala sini ang imo espirituwal nga kinahanglanon? Ang mas kabalak-an pa amo ini, magadul-ong bala ini nga relihion sa isa ka maayong kaangtanan sa Dios? Kon wala sina, indi matigayon ang matuod nga pagkakontento.
Sa sining bahin madamo nga tawo ang nagapangita sing butang nga wala pa nila makit-i.
[Piktyur sa pahina 3]
Maamanan gid bala ang imo espirituwal nga mga kinahanglanon paagi sa pagbuylog sa isa ka iglesia?
[Piktyur sa pahina 4]
Nasapwan sang madamo nga sang mahangpan nila ang Biblia, nakatigayon sing bag-o nga katuyuan ang kabuhi