Ang Paghibalo sa Husto nga Relihion Nagadala sing Salabton

“Malipayon ang mga nagapamati sa pulong sang Dios kag nagatuman sini!”—LUCAS 11:⁠28.

1. Sa tion nga makilala nila ang husto nga relihion, ano nga sahi sang mga tawo ang nagasentro sang ila kabuhi sa sini?

INDI pa tuman na nga makilala lamang ang husto nga relihion. Kon ginahigugma naton ang husto kag matuod, sa tion nga masapwan naton ini, isentro naton ang aton kabuhi sa sini. Ang matuod nga relihion indi isa ka pilosopiya lamang sang hunahuna; isa ini ka dalanon sang pagkabuhi.​—⁠Salmo 119:105; Isaias 2:3; ipaanggid ang Binuhatan 9:⁠2.

2, 3. (a) Paano ginpadaku ni Jesus ang pagkaimportante sang paghimo sa kabubut-on sang Dios? (b) Ano ang salabton sang tagsatagsa nga nakakilala sang husto nga relihion?

² Ginpadaku ni Jesucristo ang pagkaimportante sang paghimo sang ginpahayag sang Dios nga kabubut-on Niya. Sa paghinakop sang gintawag nga Sermon sa Bukid, ginpakilala ni Jesus nga indi tanan sang nagatawag sa iya Ginuo (sa amo nagapakilala nga mga Cristiano) ang makasulod sa Ginharian; sila lamang nga nagahimo sang kabubut-on sang iya Amay. Ang iban, siling niya, pagasikwayon subong “mga manugbuhat sing pagkamalinapason.” Ngaa pagkamalinapason? Bangod subong ginasiling sang Biblia, ang kapaslawan sa paghimo sang kabubut-on sang Dios isa ka sala, kag ang tanan nga sala pagkamalinapason. (Mateo 7:​21-23; 1 Juan 3:4; ipaanggid ang Roma 10:​2, 3.) Mahimo nga nahibaluan sang isa ka tawo ang husto nga relihion, mahimo nga ginakomendahan niya ang mga nagatudlo sini, kag mahimo nga ginadayaw niya ang mga nagapakigbahin sa sini, apang may salabton man sia nga iaplikar ini sa iya mismo kabuhi. (Santiago 4:17) Kon batunon niya ina nga salabton, masapwan niya nga ang iya kabuhi magauswag, kag makaagom sia sing kalipay nga indi matigayon sa iban nga paagi.

³ Sa nagligad nga artikulo, ginbinagbinag naton ang anom sang nagapakilala nga tanda sang matuod nga relihion. Ang tagsa sadto wala lamang nagabulig sa aton nga makilala ang husto nga relihion kundi nagapresentar man sa aton sing mga hangkat kag mga kahigayunan. Sa anong paagi?

Ano ang Imo Reaksion sa Pulong sang Dios?

4. (a) Sa pagsugod sang mga bag-uhan sa pagpakig-upod sa mga Saksi ni Jehova, ano sa indi madugay ang mapanilagan nila tuhoy sa paggamit sang mga Saksi sa Biblia? (b) Paano ang pagkaon sing bugana nga espirituwal nga kalan-on nagaapektar sa mga alagad ni Jehova?

⁴ Sa pagtuon sang mga Saksi ni Jehova sa Biblia upod sa bag-uhan nga mga interesado, madamo sining mga bag-uhan ang makahantop sa gilayon nga ang ginatudlo nagagikan sa Biblia. Para sa sabat sa ila mga pamangkot, wala sila ginatudlo sa mga kredo sang iglesia, sa mga tradisyon sang tawo, ukon sa mga opinyon sang kilala nga mga tawo. Ang Pulong mismo sang Dios amo ang awtoridad. Kon magkadto sila sa Kingdom Hall, mapanilagan nila nga didto man ang panguna nga tulun-an amo ang Biblia. Ang mga sinsero nga nagapangita sing kamatuoran indi madugayan sa pagrealisar nga ang daku nga kabangdanan sang kalipay nga makita nila sa tunga sang mga Saksi ni Jehova amo ang katunayan nga sila bastante nga ginapakaon sa espirituwal gikan sa Pulong sang Dios.​—⁠Isaias 65:​13, 14.

5. (a) Ano nga hangkat ang ginapresentar sa mga nagapanilag sa mga Saksi ni Jehova? (b) Paano sila makaambit sa kalipay sang mga Saksi?

⁵ Kon ginakilala mo ini, ano ang himuon mo sa sini? Kon nahangpan mo ini, indi mahimo nga mangin tumalan-aw lamang ikaw, ukon handumon mo nga mangin subong sini. Ginapakita sang Biblia nga ang “mga manugpalamati lamang” apang indi “mga manugtuman sang pulong” ‘nagalimbong sa ila kaugalingon paagi sa sala nga pangatarungan.’ (Santiago 1:22) Ginalimbungan nila ang ila kaugalingon bangod wala nila mahangpi nga walay sapayan kon ano ang mahimo isiling nila, ang ila kapaslawan sa pagtuman sa Dios nagapakita nga wala gid nila ginahigugma sia. Ang ginapangangkon nga pagtuo nga wala ginapamatud-an sang mga binuhatan isa ka patay nga pagtuo. (Santiago 2:​18-26; 1 Juan 5:⁠3) Sa kabaliskaran, ang isa nga ginapahulag sang gugma kay Jehova nga mangin “manugtuman sang hilikuton” mangin “malipayon sa paghimo sini.” Huo, subong ginpaathag ni Jesucristo, “malipayon ang mga nagapamati sa pulong sang Dios kag nagatuman sini!”​—⁠Santiago 1:25; Lucas 11:28; Juan 13:⁠17.

6. Kon ginaapresyar gid naton ang Pulong sang Dios, anong mga kahigayunan ang tinguhaan naton nga himuslan?

⁶ Ina nga kalipay magadaku samtang nagauswag ang imo ihibalo tuhoy sa kabubut-on sang Dios kag ginaaplikar mo ang dugang pa nga mga butang nga imo ginatun-an. Daw ano nga panikasog ang gamiton mo sa pagtuon sang Pulong sang Dios? Tignapulo ka libo ka indibiduwal nga indi makahibalo magbasa kag magsulat ang nanikasog sing lakas agod makatuon sini, ginahimo ini sing espisipiko agod makabasa sila sing Kasulatan kag itudlo ini sa iban nga mga tawo. Ang iban aga pa nagamata kada aga agod makahinguyang sila sing pila ka tion kada adlaw sa pagbasa sang Biblia kag sang mga bulig sa pagtuon sang Biblia, subong sang Ang Lalantawan. Samtang personal nga ginahimo mo ang pasunod nga pagbasa sang Biblia ukon ginabasa ang mga kasulatan nga ginsambit sa iban nga tulun-an nga materyal, talupangda sing maayo ang mga layi kag kasuguan ni Jehova, kag tinguhai nga hantupon ang madamo nga prinsipio nga yara dira para sa pagtuytoy sa aton. Pamalandungi kon ano ang ginapahayag sang tagsa ka bahin tuhoy sa Dios, sa iya katuyuan, kag sa iya mga pagpakig-angot sa katawhan. Hatagi sing tion ang pagdihon sini sa imo tagipusuon. Binagbinaga kon bala may mga paagi nga maaplikar mo sing dugang pa ang laygay sang Biblia sa imo kaugalingon nga kabuhi.​—⁠Salmo 1:1, 2; 19:​7-11; 1 Tesalonica 4:⁠1.

Bug-os Bala ang Imo Debosyon kay Jehova?

7. (a) Paano ang Trinidad nga doktrina nakaimpluwensia sa panikasog sang mga tawo sa pagsimba sa Dios? (b) Ano ang mahimo matabo kon matun-an sang isa ka tawo ang kamatuoran tuhoy kay Jehova?

⁷ Para sa minilyon ka tawo, nangin paumpaw ang matun-an nga ang matuod nga Dios indi isa ka Trinidad. Ang paathag nga “ini isa ka tanhaga” wala gid magpakontento sa ila. Paano sila makapalapit sa isa ka Dios nga indi mahangpan? Subong resulta sina nga panudlo, ginsikway nila ang Amay (nga ang ngalan sini wala gid nila mabatii sa simbahan) kag ginsimba si Jesus subong Dios ukon ginpatuhoy ang ila pagsimba kay Maria (nga gintudlo sa ila subong amo ang “Iloy sang Dios”). Apang nalipay ang ila tagipusuon sang ginbuksan sang isa sang mga Saksi ni Jehova ang Biblia kag ginpakita sa ila ang personal nga ngalan sang Dios, nga Jehova. (Salmo 83:18) Nalipay gid ang isa ka taga-Venezuela nga babayi sang ginpakita sa iya ang ngalan sang Dios amo kon ngaa ginhakos gid niya ang lin-ay nga nagpaambit sa iya sining hamili nga kamatuoran kag nagsugot nga tun-an ang Biblia sa iya puluy-an. Sa tion nga mahibaluan sina nga mga tawo nga gintawag ni Jesus ang iya Amay subong “akon Dios kag inyo Dios” kag nga gintawag ni Jesus ang iya Amay subong “ang lamang matuod nga Dios,” marealisar nila nga ang ginatudlo sang Biblia tuhoy sa Dios indi dimahangpan. (Juan 17:3; 20:17) Samtang ginatun-an nila ang mga kinaiya ni Jehova, ginabuyok sila nga magpalapit sa iya, magsugod sa pagpangamuyo sa iya, kag maghandum nga pahamut-an sia. Ano ang resulta?

8. (a) Bangod sang ila gugma kay Jehova kag sang ila handum nga pahamut-an sia, ano ang ginhimo sang minilyon ka tawo? (b) Ngaa importante gid ang Cristianong bawtismo?

⁸ Sa sulod sang nagligad nga napulo ka tuig, 2,528,524 ka tawo sa anom ka kontinente kag madamo nga isla ang nagdedikar sang ila kabuhi kay Jehova kag dayon ginsimbuluhan ini nga dedikasyon paagi sa bawtismo sa tubig. Isa ka bala sa ila, ukon nagahanda ka na bala karon sa pagpabawtismo? Ang bawtismo isa ka importante nga tikang sa kabuhi sang tagsa ka matuod nga Cristiano. Ginsugo ni Jesus ang iya mga sumulunod nga maghimo sing mga disipulo sang katawhan sa tanan nga kapungsuran kag bawtismuhan sila. (Mateo 28:​19, 20) Talalupangdon man nga si Jehova mismo naghambal gikan sa mga langit sa tapos gid mabawtismuhan si Jesus, nga nagasiling: “Ikaw ang akon Anak, nga hinigugma; nahamut-an ko ikaw.”​—⁠Lucas 3:​21, 22.

9. Agod mahuptan ang isa ka nahamut-an nga kaangtanan kay Jehova, ano ang ginakinahanglan sa aton bahin?

⁹ Ang isa ka nahamut-an nga kaangtanan kay Jehova isa ka butang nga dapat pakabahandion. Kon nakasulod na ikaw sa sini nga kaangtanan paagi sa dedikasyon kag bawtismo, likawi ang bisan ano nga magabugto sini nga kaangtanan. Indi pagtuguti ang mga kabalaka sang kabuhi kag ang paghimud-os sa materyal nga mga butang nga iduso ini sa ikaduha nga duog. (1 Timoteo 6:​8-12) Magkabuhi gid nahisanto sa laygay sang Hulubaton 3:6: “Sa tanan mo nga dalanon kilalaha sia [Jehova], kag sia mismo magatadlong sang imo mga banas.”

Daw Ano ka Dalom ang Gugma ni Cristo Nagaapektar sa Imo?

10. Ngaa ang aton pagsimba kay Jehova wala nagapahulag sa aton nga sikwayon si Jesus?

¹⁰ Sa pagkamatuod, ang nagakaigo nga pag-apresyar kay Jehova subong amo ang lamang matuod nga Dios, wala nagahimo sa isa ka tawo nga sikwayon si Jesucristo. Sa kabaliskaran, ang Bugna 19:10 nagasiling: “Ang pagpanaksi kay Jesus amo ang nagainspirar sing pagpanagna.” Halin sa Genesis tubtob sa Bugna, ang inspirado nga mga tagna nagahatag sing mga detalye tuhoy sa papel ni Jesucristo sa katuyuan ni Jehova. Samtang nagauswag ang ihibalo sang isa ka tawo sa sining mga detalye, nagahuman ang isa ka makawiwili nga laragway nga wala sing mga pagpatiko kag sayop nga mga paghangop nga resulta sang butig nga mga panudlo sang Cristiandad.

11. Paano ang pagtuon sang kon ano gid ang ginatudlo sang Biblia tuhoy sa Anak sang Dios nakaapektar sa isa ka babayi nga taga-Poland?

¹¹ Ang paghangop sa kamatuoran tuhoy sa Anak sang Dios makaapektar sing daku sa isa ka tawo. Amo sina ang natabo kay Danuta, isa ka babayi nga taga-Poland. Nagapakig-angot sia sa mga Saksi ni Jehova sa walo ka tuig, naluyagan niya ang ila ginatudlo, apang wala niya ginhimo ang matuod nga pagsimba nga iya dalanon sang pagkabuhi. Nian nakabaton sia sing kopya sang libro nga Ang Pinakabantog nga Tawo nga Nagkabuhi, nga nagapresentar sang kabuhi ni Cristo sa isa ka mahapos hangpon nga paagi.⁠a Sang hinagob na ang kagab-ihon, ginbuksan niya ang libro, sa tuyo nga basahon ang isa lamang ka kapitulo. Apang, wala niya ginbuy-an ang libro tubtob nga matapos niya ini sang kaagahon. Nakahibi sia. “Jehova, patawara ako,” pakiluoy niya. Subong resulta sang iya nabasa, nakita niya sing kapin kaathag ang gugma nga ginpakita ni Jehova kag sang iya Anak. Narealisar niya nga sa walo ka tuig walay apresasyon nga ginapangindian niya ang bulig nga mapailubon nga ginatan-ay sang Dios sa iya. Sang 1993 ginbawtismuhan sia subong simbulo sang iya dedikasyon kay Jehova pasad sa pagtuo kay Jesucristo.

12. Paano ang sibu nga ihibalo tuhoy kay Jesucristo nagaapektar sang aton kabuhi?

¹² Ang “sibu nga ihibalo tuhoy sa aton Ginuong Jesucristo” ginaangot sa aktibo kag mabungahon nga Cristiano. (2 Pedro 1:⁠8) Tubtob sa anong kasangkaron magapakigbahin ikaw sa sina nga hilikuton, nga ginapaambit sa iban ang mensahe sang Ginharian? Ang kadamuon nga mahimo sang mga indibiduwal nasandig sa madamo nga kahimtangan. (Mateo 13:​18-23) Ang iban nga mga kahimtangan mabag-o naton; ang iban indi. Ano ang magapahulag sa aton sa paghibalo kon ano ining mga kahimtangan kag himuon ang mga pagbag-o nga sarang mahimo? Si apostol Pablo nagsulat: “Ang gugma ni Cristo nagatiklod sa aton”; kon sa aton pa, ang gugma nga ginpakita niya sa paghalad sang iya kabuhi para sa aton tuman gid ka talalupangdon nga samtang nagadaku ang aton apresasyon sa sini, ang aton tagipusuon mapahulag sing tudok. Subong resulta, marealisar naton nga indi gid nagakaigo para sa aton nga padayunon ang paghingamo sa makagod nga mga tulumuron kag magkabuhi agod lamang paayawan ang kaugalingon. Sa baylo, pasibuon naton ang aton mga hilikuton agod hatagan sing una nga duog ang hilikuton nga ginsugo ni Cristo sa iya mga disipulo.​—⁠2 Corinto 5:​14, 15.

Napain Gikan sa Kalibutan —Tubtob sa Anong Kasangkaron?

13. Ngaa indi naton luyag nga mangin bahin sang isa ka relihion nga naghimo sang iya kaugalingon nga bahin sang kalibutan?

¹³ Indi mabudlay makita ang rekord nga nahimo sang Cristiandad kag sang iban nga mga relihion bangod luyag nila mangin bahin sang kalibutan. Ang mga pundo sang iglesia ginagamit sa pagsustento sa rebolusyonaryo nga hilikuton. Ang mga pari nangin gerilya nga mga mangangaway. Sa adlaw-adlaw, ang mga pamantalaan nagareport tuhoy sa relihioso nga mga pagbinahinbahin sa nanuhaytuhay nga mga bahin sang duta nga nagailinaway batok sa isa kag isa. Nagaagay ang dugo sa ila mga kamot. (Isaias 1:15) Kag sa bug-os nga kalibutan ginatinguhaan gihapon sang klero nga maniobrahon ang politika. Ang matuod nga mga sumilimba wala sing bahin sa sini.​—⁠Santiago 4:​1-4.

14. (a) Ano ang dapat naton likawan kon luyag naton mangin napain gikan sa kalibutan? (b) Ano ang makabulig sa aton agod malikawan nga masiod kita sang kalibutanon nga mga panimuot kag mga buhat?

¹⁴ Apang kapin pa sa sina ang nadalahig sa pagkanapain gikan sa kalibutan. Kilala ang kalibutan sa gugma sa kuwarta kag sa sarang mabakal sang kuwarta, sa handum sa personal nga kabantugan, kag sa walay untat nga pagpangita sing kalalipayan, lakip ang mga butang subong sang kakulang sing sinsero nga kabalaka para sa iban, pagbinutig kag walay pasunaid nga mga panghambal, pagrebelde batok sa awtoridad, kag kapaslawan sa pagpakita sing pagpugong sa kaugalingon. (2 Timoteo 3:​2-5; 1 Juan 2:​15, 16) Bangod sang aton pagkadihimpit, mahimo nga kon kaisa ginapakita naton ang pila sining mga kinaiya. Ano ang makabulig sa aton sa pagpanikasog naton nga likawan ina nga mga siod? Dapat naton pahanumdumon ang aton kaugalingon kon sin-o ang sa likod sini tanan. “Ang bug-os nga kalibutan yara sa gahom sang isa nga malauton.” (1 Juan 5:19) Bisan pa daw ano ka makagalanyat ang isa ka dalanon, bisan pa daw ano kadamo nga tawo ang nagakabuhi sa sinang paagi, kon makita naton nga ang sa likod sini amo ang puno nga kaaway ni Jehova, si Satanas nga Yawa, narealisar naton kon daw ano ini kalaw-ay.​—⁠Salmo 97:⁠10.

Tubtob Diin ang Imo Gugma?

15. Paano ang dimakagod nga gugma nga imo napanilagan nakabulig sa imo nga makilala ang husto nga relihion?

¹⁵ Sang una ikaw makig-upod sa mga Saksi ni Jehova, walay duhaduha nga naganyat ikaw sa gugma nga makita sa tunga nila bangod tuhay ini sa espiritu sang kalibutan. Ang pagpadaku sa dimakagod nga gugma nagapain sang matuod nga pagsimba kay Jehova gikan sa tanan nga porma sang pagsimba. Ayhan amo ini ang nagkombinsi sa imo nga ang mga Saksi ni Jehova amo sa pagkamatuod ang nagapakita sing buhat sang husto nga relihion. Si Jesucristo mismo nagsiling: “Sa sini ang tanan nga tawo makahibalo nga kamo mga disipulo ko, kon maghigugmaanay kamo.”​—⁠Juan 13:⁠35.

16. Ano ang mga kahigayunan nga kita sing indibiduwal makapasangkad sa aton gugma?

¹⁶ Nagapakilala man bala sa imo ina nga kinaiya subong isa sang mga disipulo ni Cristo? May yara bala mga paagi nga makapasangkad ikaw sa imo pagpakita sing gugma? Sa walay duhaduha kita tanan makahimo sini. Indi lamang ini pagpakig-abyan sa iban sa Kingdom Hall. Kag kon ang pakitaan naton sing gugma amo lamang ang mga nagahigugma sa aton, paano ini mangin tuhay sa kalibutan? “Labaw sa tanan nga butang, magpakita kamo sing mainit nga gugma sa isa kag isa,” laygay sang Biblia. (1 Pedro 4:⁠8) Kay sin-o kita magpakita sing daku pa nga gugma? Sa isa bala ka Cristianong utod nga lalaki ukon utod nga babayi nga lain ang gindak-an sa aton kag makaulugot ang pagsinalayo? Sa isa bala, nga bangod sang balatian ukon katigulangon, indi tayuyon sa pagtambong sa mga miting? Sa aton bala tiayon? Ukon ayhan, sa aton nagatigulang nga mga ginikanan? Ang iban nga nagapakita sing mga bunga sang espiritu, lakip ang gugma, nagbatyag nga subong bala ginatun-an nila liwat ining mga kinaiya sang gin-atubang sila sing mabudlay gid nga mga kahimtangan nga mahimo mag-utwas sa paghatag sing halos bug-os nga pag-atipan sa isa ka katapo sang pamilya nga nabaldado. Sa pagkamatuod, bisan pa kon ginaatubang sining mga kahimtangan, dapat kita magpakita sing gugma indi lamang sa aton panimalay.

Pagpanaksi sa Ginharian —Daw Ano ka Importante sa Imo?

17. Kon kita mismo nakabenepisyo gikan sa mga pagduaw sang mga Saksi ni Jehova, ano dapat ang ginapahulag sa aton nga himuon naton?

¹⁷ Ang isa ka importante nga paagi nga nagapakita kita sing gugma sa aton isigkatawo amo ang pagpanaksi sa ila nahanungod sa Ginharian sang Dios. Isa lamang ka grupo sang mga tawo ang nagahimo sining hilikuton nga gintagna ni Jesus. (Marcos 13:10) Amo ini ang mga Saksi ni Jehova. Personal kita nga nakabenepisyo sa sini. Karon aton naman pribilehiyo nga buligan ang iban. Kon sundon naton ang pagtamod sang Dios sa sini nga butang, unahon naton ini nga hilikuton sa aton kabuhi.

18. Paano ang aton pagbasa sang libro nga Jehovah’s Witnesses​—⁠Proclaimers of God’s Kingdom mahimo makaimpluwensia sang aton bahin sa pagpanaksi sa Ginharian?

¹⁸ Ang makakulunyag nga kasaysayan kon paano ang mensahe sang Ginharian gindala sa nabaw-ing nga mga bahin sang duta sa sining katapusan nga mga adlaw ginasaysay sa libro nga Jehovah’s Witnesses​—⁠Proclaimers of God’s Kingdom. Kon kahibalo kamo sang Ingles, basaha gid ini. Kag samtang ginabasa mo ini, talupangda ilabi na ang tanan nga paagi nga gingamit sang mga indibiduwal sa pagpanaksi tuhoy sa Ginharian. May mga halimbawa bala ang iban nga mailog mo? Madamo nga kahigayunan ang bukas sa aton tanan. Kabay nga pahulagon kita sang aton gugma kay Jehova nga gamiton ini sing maayo.

19. Paano kita makabenepisyo kon batunon naton ang salabton nga nagaupod sa paghibalo sa husto nga relihion?

¹⁹ Kon maghugod kita sa paghimo sang kabubut-on ni Jehova, masapwan naton ang sabat sa pamangkot nga, Ano ang katuyuan sang kabuhi? (Bugna 4:11) Wala na kita nagapangalapkap, nagabatyag nga walay kabilinggan. Wala na sing karera nga imo maukuran nga makahatag sa imo sing daku pa nga pagkakontento sangsa bug-os tagipusuon nga paghugod sang imo kaugalingon sa pag-alagad kay Jehova nga Dios. Kag daw ano katahom nga palaabuton ang ginatanyag sini! Walay katapusan nga makaalayaw nga kabuhi sa iya bag-ong kalibutan, diin magamit naton sing bug-os ang aton mga ikasarang nahisanto sa mahigugmaon nga katuyuan sang Dios sa pagtuga sa katawhan.

[Footnote]

Paano Mo Sabton?

◻ Ngaa importante nga ang isa ka relihion nagabaton sa Biblia subong Pulong sang Dios kag nagapadungog kay Jehova subong matuod nga Dios?

◻ Ano ang ginatudlo sang matuod nga relihion tuhoy sa papel ni Jesus subong Manunubos?

◻ Ngaa dapat magpabilin ang mga Cristiano nga napain gikan sa kalibutan kag nagapakita sing dimakagod nga gugma?

◻ Ano ang papel sang pagpanaksi sa Ginharian sa husto nga relihion?

[Mga piktyur sa pahina 16]

Ang bawtismo isa ka importante nga tikang sa pagbaton sang mga salabton sang matuod nga pagsimba. Kada bulan, mga 25,000 sa bug-os nga kalibutan ang nagahimo sina nga tikang

Rusya

Senegal

Papua New Guinea

E.U.A.

[Mga piktyur sa pahina 17]

Ang pagpaambit sing kamatuoran sang Biblia sa iban bahin sang matuod nga pagsimba

E.U.A.

Brazil

E.U.A

Hong Kong

Japan