Isa Ka Nabahinbahin nga Iglesia—Makalampuwas Ayhan Ini?

“ANG tanan nga nagasiling nga ang nagaluwas nga kamatuoran ni Cristo yara sa kitaon nga Iglesia. Ang pagkanabahinbahin sang Cristiandad​—⁠sa ulot sang Sidlangan kag Katundan, kag sa ulot sang Roma kag sang mga iglesia sang Repormasyon​—⁠amo ang mga pagbinahinbahin sa sulod sang isa ka Iglesia.” (Christians in Communion) Amo sina ang pagtamod sang isa ka awtor sa Cristianismo​—⁠subong isa ka nalapta sing lapnag nga pamilya sang mga relihion, ang tanan nagapabutyag sing pila ka sahi sang pagtuo kay Jesucristo.

Apang, isa ini ka nabahinbahin nga pamilya, nga may nagasumpakilay nga mga pagtuluuhan kag mga talaksan sang paggawi. “Ang Cristiandad karon . . . may talaksan para sa pagkakatapo sa iglesia nga manubo pa sangsa para sa paglakbay,” siling sang isa ka nagapanilag nga tawo. Ano, nian, ang masiling naton sa espirituwal nga kahimtangan sini? Ang Katoliko nga obispo nga si Basil Butler naghinakop: “Ang nabahinbahin nga Cristiandad nagabalatian sing malubha gid.” (The Church and Unity) Paano nagsugod ining balatian? May paglaum bala nga magaayo ini?

“Ang Tawo sang Pagkamalinapason”

Nagpaandam si apostol Pablo nga mahanabo ang dipaghiusa. Sa mga Cristiano sa Tesalonica nga nagdumdom nga ang presensia ni Cristo malapit na sadto, sia nagsulat: “Indi pagtuguti ang bisan sin-o nga limbungon kamo sa bisan anong paagi, kay indi ini [adlaw ni Jehova] mag-abot kon indi anay mag-abot ang apostasya kag mapahayag ang tawo sang pagkamalinapason, ang anak sang kalaglagan.”​—⁠2 Tesalonica 2:⁠3.

Ining “tawo sang pagkamalinapason” nagdala sing apostasya kag pagrebelde sa sulod sang Cristianong kongregasyon. Sin-o sia? Indi ang bisan sin-o nga indibiduwal nga tawo, kundi, sa baylo, amo ang klero nga klase sang Cristiandad. Ginbayaw sini nga klase ang iya kaugalingon sa ibabaw sang apostata nga kongregasyon sa tapos mapatay ang mga apostoles ni Jesus, kag sang ulihi nagtudlo sing paganong mga pilosopiya, subong sang Trinidad kag pagkadimamalatyon sang tawhanon nga kalag. (Binuhatan 20:​29, 30; 2 Pedro 2:​1-3) Kaangay sang makamamatay nga vi­rus, ginlatnan sini ang nagapakilala nga Cristianong kongregasyon sing gin-inspirar sang mga demonyo nga mga ideya nga magadul-ong sa ulihi sa dipaghiusa.​—⁠Galacia 5:​7-10.

Ang makalalaton nga butang nagsugod na sang adlaw ni apostol Pablo. Sia nagsulat: “Matuod, ang tanhaga sining pagkamalinapason nagapanghikot na; lamang may nagapugong karon tubtob nga makuha sia.” (2 Tesalonica 2:⁠7) Ang mga apostoles amo ang nagpugong batok sa hilo sang apostasya. Sang makuha ang ila nagapahiusa nga impluwensia, ang wala sing pugong nga apostasya naglapta kaangay sang kalamayo.​—⁠1 Timoteo 4:​1-3; 2 Timoteo 2:​16-18.

Ang mga pagpanghikot sining “tawo sang pagkamalinapason” nagpadayon nga walay paghinay. Sa isa ka report kasan-o lang tuhoy sa “isa ka iglesia nga ginatormento sa sekso kag sa teolohiya,” ang isa ka arch­deacon sang ­Church of Eng­land ginbalikwat nga nagareklamo: “Ang mga panugda nga nagapangabay sa klero nga indi magpatuyang sa sekso sa guwa sang pag-asawahay ginsikway. Ginaordenahan ang mga homoseksuwal. Ginhimo nila nga maayo ang malaut kag ang malaut nga maayo.”​—⁠The Sunday Times Magazine, London, Nobiembre 22, 1992.

Mga Trigo kag mga Gamhon

Si Jesucristo mismo nagtudlo nga ang matuod nga Cristianismo madula sing umalagi. Nagsiling sia nga ang pagtukod sa Cristianong kongregasyon daw kaangay sang isa ka tawo nga nagsab-ug sing maayong binhi sa iya uma. Apang, si Jesus nagsiling, “nag-abot ang iya kaaway kag nagsab-ug sing mga gamhon sa tunga sang mga trigo.” Sang mamangkot ang iya mga ulipon kon bala dapat nila gabuton ang mga gamhon, ang tag-iya sang uma nagsiling: “Indi; basi kon sa paggabot ninyo sang mga gamhon, magabot ninyo pati ang mga trigo.” Daw ano kadugay magapadayon ining pagsamo sang mga trigo kag mga gamhon? Ang tag-iya sang uma nagsiling: “Pabay-i nga magtubo anay sila sing tingob tubtob sa ani.”​—⁠Mateo 13:​25, 29, 30.

Tubtob sa “ani,” ukon tion sang pagpain sa katapusan nga mga adlaw sang “sistema sang mga butang,” ang imitasyon nga mga Cristiano nagtubo upod sa matuod nga mga Cristiano. (Mateo 28:20) Gingamit ni Satanas nga Yawa ang mga apostata sa pagtuga sing isa ka malaut kag nabahinbahin nga imitasyon nga Cristianong kongregasyon. (Mateo 13:​36-39) Nagpatubas sila sing isa ka makahuluya nga huwad sang matuod nga Cristianismo. (2 Corinto 11:​3, 13-15; Colosas 2:⁠8) Samtang nagabahinbahin ang iglesia sa pagligad sang mga siglo, nagbudlay sing dugang pa nga makilala ang matuod nga mga Cristiano.

Bag-o nga mga Dibisyon

Sa ulihi pa nga bahin sang moderno nga panahon, siling sang The Testing of the Churches​—⁠1932-1982, “[b]ag-o nga mga dibisyon ang naglutaw, ilabi na ang char­is­mat­ic nga hublag, nga nagapadaku sang personal nga pagtuo kag eksperiensia.” Sing makawiwili, ginatamod sang iban ang mga kahublagan nga born ­again kag char­is­mat­ic subong mga tanda sang espirituwal nga pagpanumbalik sa baylo nga bag-o nga mga dibisyon. Ang Naaminhan nga Ireland, halimbawa, nakaeksperiensia sina nga pagpanumbalik sang katuigan 1850. Ginpabutyag ang daku nga mga paglaum. Ang isa ka report nagsugid tuhoy sa “utudnon nga paghiusa . . . sa tunga sang mga ministro sang Pres­by­te­rian, Wes­ley­an, kag In­de­pend­ent” kag nagsiling nga ang “tagsa ka adlaw nagdala sing bag-o nga mga report tuhoy sa mga panganinaw, mga pagtulog, mga palanan-awon, mga damgo kag mga milagro.”​—⁠Religious Re­vi­v­als.

Gintamod sang madamo ining dramatiko nga mga pagpadayag subong ebidensia sang pagpanghikot sang espiritu sang Dios sa pagpaaktibo liwat sa iya iglesia. “Ang iglesia sang Dios,” siling sang isa nga nagapanilag, “napaaktibo gid liwat sa sining mga distrito.” Apang, bisan pa ining partikular nga pag-aktibo liwat ginpahayag subong “isa ka mahimayaon kag walay tupong nga dag-on sa relihioso nga maragtas sang Ul­ster,” ini kag ang iban pa nga pag-aktibo liwat kaangay sini wala magpatubas sing relihioso nga paghiusa sa tunga sang mga nagapangangkon sing isa ka espirituwal nga pagkabun-ag liwat.

Ina sila magapangatarungan nga nahiusa sila sa labing importante nga mga butang. Apang amo man ini ang ginapangatarungan sang nabilin nga bahin sang Cristiandad, nga nagarason nga “ang butang nga nagapahiusa na sa mga Cristiano mas importante sangsa mga butang nga nagabahinbahin pa sa ila.” (The Church and Unity) Ang Cristiandad nagasiling: “Ang amon sadsaran nga paghiusa sa isa kag isa kag upod sa tanan namon nga masigka-Cristiano napasad sa amon pagpabawtismo kay Cristo.” (Christians in Communion) Apang, ang pagsiling nga ang mga dibisyon ukon pagbinahinbahin indi isa ka daku nga butang bangod sang pagtuo sang tanan kay Jesus, daw kaangay sa pagsiling nga ang kanser indi malubha tubtob mabaskog ang imo tagipusuon.

Ang kamatuoran amo nga gindugangan pa tapat sinang modernong relihioso nga mga kahublagan ang kagumon kag nagpatubas ini sing espirituwal nga anarkiya samtang ang mahayluhon nga mga manunudlo nagatipon sing mga sumulunod para sa ila kaugalingon. Sanday Jim ­Jones kag David ­Koresh amo ang mga halimbawa kasan-o lang sang espirituwal nga mga lider nga nagpatalang sa linibo. (Mateo 15:14) Ang isa ka ministro sang Bap­tist isa ka nagapanguna nga katapo sang Ku Klux Klan. Ginaangot niya ang iya kampanya para sa pagkasupremo sang mga puti sa isa ka relihioso nga pag-aktibo liwat kag nagasiling nga ang mga nagapakigbahin sa sini “pagahatagan sing diosnon nga kusog, pagahatagan sing kaisog Niya nga napatay sa Kalbaryo [Jesucristo].”

Kamusta naman ang ginasiling nga mga milagro, gamhanan nga mga buhat, kag ang mga tanda nga ginhimo sa ngalan ni Jesus? Dumduma ang mabaskog nga paandam ni Jesucristo nga, indi ang mga nagasiling lamang sing “Ginuo, Ginuo” ang makatigayon sang iya kahamuot, kundi, sa baylo, amo ‘sila nga nagahimo sang kabubut-on sang iya Amay.’ Madamo karon ang wala gani makakilala sa ngalan sang iya Amay, nga Jehova. Nagpaandam si Jesus tuhoy sa mga ‘magasubol sa mga demonyo sa iya ngalan, kag maghimo sing gamhanan nga mga buhat sa sini nga ngalan’ apang “mga manugbuhat [gali] sing pagkamalinapason.”​—⁠Mateo 7:​21-23.

“Guwa Ka sa Iya, Katawhan Nakon”

Ano ang masiling sa nagabalatian nga Cristiandad? Malubha gid. Dapat pa bala naton sundon ang laygay sang Katoliko nga obispo nga si But­ler, nga “magbuylog [sa iglesia] sa gilayon kag maghatag sing bulig sa iya padayon nga ‘pagpaputli’ sa tunga sang iya mga katapo”? Indi! Ang nabahinbahin kag mabahinbahinon nga Cristiandad indi makalampuwas. (Marcos 3:​24, 25) Bahin sia sang isa ka bug-os kalibutan nga emperyo sang butig nga relihion nga ginatawag Babilonia nga Daku. (Bugna 18:​2, 3) Ining nakasala sa dugo nga relihiosong sistema nagaatubang sing malapit nga kalaglagan sa kamot sang Dios.

Wala ginapahangop sang Biblia nga ang matuod nga mga Cristiano magpabilin sa sulod sining malaut nga relihiosong organisasyon kag tinguhaan nga bag-uhon sia gikan sa sulod. Sa baylo, nagalaygay ini: “Guwa ka sa iya, katawhan nakon, kon indi mo luyag makaambit sa iya mga sala, kag kon indi mo luyag makaambit sa iya mga kalalat-an. Kay ang iya mga sala natumpi tubtob sa langit, kag gindumdom sang Dios ang iya dimakatarunganon nga mga buhat.”​—⁠Bugna 18:​4, 5.

“Guwa” pakadto diin? Dumduma, nanaad si Jesus nga sa tion sang ani, ang matuod nga mga Cristiano pagatipunon liwat sa isa ka bug-os kalibutan nga paghiusa. Gintagna man ni manalagna Miqueas inang pagtipon liwat paagi sa sining mga pulong: “Ipahamtang ko sila nga may paghiusa, kaangay sang isa ka panong sa toril.” (Miqueas 2:12) Natabo bala ini?

Huo! ginatipon na karon ang matuod nga mga Cristiano sa isa ka nahiusa nga paghiliutod sa bug-os nga duta. Sin-o sila? Amo sila ang Cristianong kongregasyon sang mga Saksi ni Jehova, nga may paghiusa nga nagawali sing maayong balita nahanungod sa Ginharian sang Dios sa 231 ka kadutaan. Ginsikway nila ang mabahinbahinon nga mga panudlo sang Cristiandad kag nagatinguha sa pagsimba sa Dios suno sa kamatuoran sang iya Pulong.​—⁠Juan 8:​31, 32; 17:⁠17.

Tinagipusuon nga ginaagda ikaw sa pagpakighambal sa ila. Kon luyag mo makahibalo sing dugang pa nahanungod sa mga Saksi ni Jehova, pakig-anguti sila palihug sa lokal ukon paagi sa nagakaigo nga direksion sa pahina 2 sining magasin.

[Piktyur sa pahina 7]

“Gindumdom sang Dios ang iya dimakatarunganon nga mga buhat”