Pagmuklat sang mga Mata sa Maayong Balita

“ANG langit indi tanto ka bughaw bangod indi ini makita sang bulag,” siling sang isa ka Danes nga hulubaton. Apang sa aton masako nga pagkabuhi sa adlaw-adlaw, nakita bala naton nga ang langit bughaw, kon sa aton pa? Ginatan-aw bala naton ang palaabuton nga may pagsalig? Ginapatihan gid bala naton ang maayong balita nga ginatanyag sang Pulong sang Dios, ang Biblia?

Sa nauna nga artikulo, ginbinagbinag naton ang mga bahin sang literal nga pagkabulag. Usisaon naton karon ang isa ka sahi sang panan-aw nga labi pa ka importante. Nagadalahig ini sa aton mapinadayunon nga kalipay subong man sa palaabuton sang aton mga hinigugma.

Sa walay duhaduha, nagaatubang kita sang “makahalanguyos nga tion nga mabudlay atubangon.” (2 Timoteo 3:⁠1) Ano ang nagakatabo samtang ang katawhan nagahimakas sa pagpangabuhi, nagaagwanta sang mga problema sa panglawas kag pamilya, kag nagabatas sang inhustisya sa katilingban kag kakulang sing gugma? Sing makapasubo, nasapwan sang madamo nga ang ila pagsalig sa isigkatawo, relihion, kag panguluhan nagaugdaw. Bangod wala sing nahibaluan nga solusyon, ang iban nagahinakop nga ang ila mga problema indi gid malubad sa normal nga paagi. Sa pamantalaan nga Jornal da Tarde sa Brazil, si Jacob Pinheiro Goldberg nagsiling: “Ang mga tawo, sa atubangan sang masakit nga katunayan, nagabatyag gid sing kaugot sa mga kasaypanan sa bagay nga wala sila nagapangatarungan sing lohiko, kag nagasalig sila sa makabalang-aw nga mistisismo.” Apang, bisan pa magalain ang mga kahimtangan, luyag naton gamiton ang maligdong kag maalamon nga panghunahuna, indi bala?

Handurawa sa makadali nga nagakinahanglan ikaw sing isa ka puluy-an para sa imo pamilya, kag indi problema ang kuwarta. Ayhan nangita kag ginduaw mo ang nanuhaytuhay nga kabalayan sa lainlain nga kaingod nga mga lugar. Bisan pa ginapanikasugan sang mga ahente nga pahamut-an ang imo mga luyag, wala mo makita ang sahi sang puluy-an nga naluyagan mo. Apang, sanglit nadalahig ang pagkanaayawan kag kaayuhan sang imo pamilya, indi ka magapangampo, indi bala? Handurawa karon ang kalipay sang nakita mo sang ulihi ang balay nga imo gid naluyagan.

Subong nga magahinguyang ka sing tion sa pagpangita sing bag-o nga puluy-an, ngaa indi mo pag-usisaon ang Biblia agod makita ang solusyon sa imo mga problema? Subong nga dapat naton timbang-timbangon ang mga katunayan kon nagahimo sing mga desisyon nahanungod sa isa ka puluy-an, dapat man kita mangatarungan sing maayo sa nabasa naton sa Pulong sang Dios. Kag mas mapuslanon pa sangsa pagkakita sing puluy-an amo ang makita naton kag mabaton ang kamatuoran nahanungod kay Jehova nga Dios kag kay Jesucristo. Si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo nahanungod sa imo, ang lamang matuod nga Dios, kag nahanungod sa isa nga imo ginpadala, si Jesucristo.”​—⁠Juan 17:⁠3.

Apang kon ang mensahe sang Biblia tuman ka bilidhon, ngaa madamo katama ang nagapabilin nga bulag sa maayong balita sini? Ang isa ka rason amo, kag mahimo ini makapakibot sa madamo, “ang bug-os nga kalibutan yara sa gahom sang isa nga malauton.” (1 Juan 5:19) Subong resulta, si Satanas nga Yawa “nagbulag sang mga painoino sang mga ditumuluo, agod ang kapawa sang mahimayaon nga maayong balita nahanungod kay Cristo, nga amo ang larawan sang Dios, indi mag-iwag.” (2 Corinto 4:⁠4) Bisan pa nga makakita kita paagi sa aton mga mata, ang utok amo ang nagapatpat sang kapawa nga nagasulod sa mata. Hanti, ang pagkabulag ginahatagan man sing kahulugan subong “indi makasarang ukon indi handa sa paghantop ukon sa paghukom.” Nagapahanumdom ini sa aton sang isa ka bantog nga hambalanon: “Yadtong indi luyag nga makakita kaangay man sang bulag.”

Ang bulag indi makakita sang kon ano ang yara sa iya atubangan, gani may katalagman nga basi sia mahalitan. Ang literal nga pagkabulag sang madamo indi karon sarang maayo, apang wala sing isa ang obligado nga magpabilin nga bulag sa espirituwal.

Paglandas sa Espirituwal nga Pagkabulag

Kon paano ang mapigaw nga mga kahimtangan sa katinlo mahimo makahalit sa panan-aw, ang malaut nga palibot mahimo makaamot sa moral nga pagkabulag. Dugang pa, si Jesucristo nagpaandam batok sa hinimu-sang-tawo nga mga doktrina kag mga tradisyon. Ginpaathag niya nga ang relihiosong mga lider sadto anay nagpatalang sang ila panong: “Bulag sila nga mga manugtuytoy. Kon, nian, ang bulag magtuytoy sa bulag, sila nga duha mahulog sa buho.”​—⁠Mateo 15:⁠14.

Sa baylo nga madaya sang bulag sa espirituwal kag moral nga mga lider, daw ano gid ka malipayon yadtong nagmuklat sang ila mga mata sa maayong balita nahanungod sa Ginharian sang Dios! Si Jesus nagsiling: “Para sa sini nga paghukom ako nagkari sa sining kalibutan: agod yadtong indi makakita makakita.” (Juan 9:39) Apang, paano makakita ang mga bulag sa espirituwal? Ti, padayunon naton ang aton pagrepaso sa literal nga pagkabulag.

Matigayon na karon ang lainlain nga mga aman para sa mga mapigaw sing panan-aw. Indi amo sini pirme ang kahimtangan. Antes gintukod ni Valentin Haüy ang isa ka pinasahi nga eskwelahan para sa mga bulag sang 1784, wala gid anay sing serioso nga mga panikasog nga ginhimo agod buligan ang mga bulag. Sang ulihi, gin-imbento ni ­Louis ­Braille ang sistema nga nagadala sang iya ngalan; ginhimo niya ini agod buligan ang mga mapigaw sing panan-aw sa pagbasa.

Kamusta ang mga bulag sa espirituwal? Sining ulihi nga mga tinuig ginhimo ang hanuot nga mga panikasog agod ibantala ang maayong balita bisan sa pinakamalayo nga mga bahin sang duta. (Mateo 24:14) Ang mga Saksi ni Jehova nalipay sa pagdala sing paglaum sa malaragwayon kag sa pisikal nga mga bulag.

Ang isa ka taga-Brazil nga babayi nagsulat: “Luyag ko ipabutyag nga walay sapayan sang akon pisikal nga sablag, makakita ako​—⁠sa espirituwal. Daw ano kaayo nga Dios! Nalipay kita sa paghibalo nga ‘si Jehova magahumlad sang iya kamot kag magabusog sang handom sang tagsa ka butang nga buhi.’ ” (Salmo 145:16) Kag si Jorge, nga bulag sa pisikal, nagahinumdom: “Ang akon kabuhi mahimo gid matunga sa duha ka bahin: sa wala pa kag pagkatapos sang mga Saksi. . . . Paagi sa ila, nasugdan ko nga mahantop sa hunahuna sing maathag kag masanag ang kalibutan. May maayo gid ako nga kaangtanan sa tanan sa kongregasyon.” Makalilipay kaangay sina, ang Biblia nagahatag sa aton sing pasalig nga sa dili madugay wala na sing isa sa duta ang mangin bulag​—⁠sa literal ukon sa espirituwal. Paano ina mahanabo? Paano magamatuod sa bug-os nga duta nga “si Jehova nagapamuklat sang mga mata sang mga bulag”?​—⁠Salmo 146:⁠8.

Ang Lamang Permanente nga Bulong —ang Ginharian sang Dios

Walay sapayan sang dugang nga ihibalo sa medisina, madamong balatian ang padayon nga ginatunaan sang pagkabulag, kasakit, kag kamatayon. Ano, nian, ang ginakinahanglan agod madula ang malnutrisyon, mapigaw nga mga kahimtangan sa katinlo, kag kalisdanan nga nagakuha sang panan-aw kag kalipay sa kabuhi? Ang pagpang-ayo ni Jesus sa mga bulag kag sa iban pa isa anay ka diutay-sing-kasangkaron nga sulundan para sa palaabuton. Sing makalilipay, ang iya hilikuton sa pagpanudlo kag pagpang-ayo naglandong sa mga pagpakamaayo nga matigayon sa duta sa idalom sang Ginharian sang Dios nga panguluhan.

Ang pagpang-ayo sa bug-os kalibutan nga kasangkaron malapit na.⁠a Ining diosnon nga programa sa pagpang-ayo gin-ilustrar sing matahom ni apostol Juan: “Ginpakita niya sa akon ang suba sang tubig sang kabuhi, nga matin-aw subong sang katya, nga nagailig gikan sa trono sang Dios kag sang Kordero sa tunga sang malapad nga dalan sini. Kag sa sining pangpang sang suba kag didto sa pihak nga pangpang yara ang mga kahoy sang kabuhi nga nagadala sing napulog-duha ka ani sang bunga, nga nagapatubas sang iya mga bunga sa tagsa ka bulan. Kag ang mga dahon sang mga kahoy para sa pagbulong sa mga pungsod.”​—⁠Bugna 22:​1, 2.

Ang mga ekspresyon subong sang “tubig sang kabuhi” kag “mga kahoy sang kabuhi” nagalaragway nga pagkatapos malaglag ang karon malaut nga sistema, ang nagabulong nga mga aman sang Ginharian sang Dios amat-amat nga magabayaw sa katawhan sa kahimpitan. Sa katunayan, ang mga benepisyo sang halad gawad ni Jesus (lakip ang bug-os nga kapatawaran sa mga sala), upod ang ihibalo nahanungod kay Jesucristo kag sa iya Amay, magapaluntad sang himpit nga panglawas kag kabuhi nga walay katapusan.​—⁠Juan 3:⁠16.

Kalipay sa Bag-ong Kalibutan sang Dios

Handurawa, nian, ang duta nga wala sing krimen, polusyon, ukon kaimulon. Hunahunaa ang imo pamilya nga nagakabuhi sing mahidaiton sa napasag-uli nga Paraiso. (Isaias 32:​17, 18) Daw ano nga kalipay nga makita ang nanuhaytuhay nga mga duag nga may himpit nga hunahuna kag mga igbalatyag!

“Ang kinaugali nga kahimtangan para sa tawo amo ang magkabuhi sa nagabalhin sing dalayon nga palibot​—⁠sang kapawa, duag, dagway. Wala sing palareho nga palibot sa kinaugali,” siling ni Faber Birren. “Ang duag amo ang isa sang kinaugali nga mga kalipay sining kalibutan. Sa katunayan ang duag nagakahanabo indi lamang sa pila ka hitabo, kag ang daku nga bahin sang makalilipay nga kabuhi nasandig sa sini.”

Daw ano ka hamili ang dulot sang itululok! Daw ano nga kasadya kon ang mga mata sadtong anay bulag​—⁠sing literal ukon sing espirituwal​—⁠makakita!

Huo, sa nagahilapit nga napasag-uli nga Paraiso, ang pagkabulag kag ang iban pa nga mga sablag indi na pagatunaan sing kasubo! Wala na sing isa ang madaya. Sanglit magaluntad ang matuod nga gugma, ang tanan masanagan sa espirituwal. Ina, kag ang madamo pa, mahanabo sa malapit nga palaabuton, apang karon na ang tion nga mangin kalahamut-an sang Isa nga magatuman sang iya matagnaon nga saad: “Sa sina nga tion ang mga mata sang mga bulag pamuklaton”!​—⁠Isaias 35:⁠5.

[Footnote]

[Piktyur sa pahina 7]

Sa sina nga tion ang mga mata sang mga bulag pamuklaton!