Himua nga Sulundan ang mga Manalagna sang Dios
“Mga kauturan, himua ninyo nga sulundan sang pag-antos sing kalautan kag sang pagpailob ang mga manalagna, nga naghambal sa ngalan ni Jehova.”—SANTIAGO 5:10.
1. Ano ang nagabulig sa mga alagad ni Jehova nga mangin malipayon bisan pa ginahingabot sila?
ANG mga alagad ni Jehova nagakalipay sing daku walay sapayan sang kadulom nga lapnag sa bug-os nga kalibutan sa sining katapusan nga mga adlaw. Amo ini bangod nahibaluan nila nga ginapahamut-an nila ang Dios. Nagabatas man ang mga Saksi ni Jehova sa idalom sang paghingabot kag pagpamatok sa ila dayag nga pagministeryo bangod nahibaluan nila nga nagaantos sila tungod sa pagkamatarong. Si Jesucristo nagsiling sa iya mga sumulunod: “Malipayon kamo kon ang mga tawo magpakahuya sa inyo kag maghingabot sa inyo kag binutig nga maghambal sang tanan nga sahi sang malaut nga butang batok sa inyo bangod sa akon. Magkalipay kamo kag maglumpat sa kasadya, kay ang inyo padya daku sa mga langit; kay amo man ang paghingabot nila sang mga manalagna nga nahauna sa inyo.” (Mateo 5:10-12) Sa pagkamatuod, kon ang mga alagad sang Dios nagaatubang sing mga pagtilaw sang pagtuo, ginakabig nila ini nga kalipay.—Santiago 1:2, 3.
2. Suno sa Santiago 5:10, ano ang makabulig sa aton agod makapailob?
2 Si disipulo Santiago nagsulat: “Mga kauturan, himua ninyo nga sulundan sang pag-antos sing kalautan kag sang pagpailob ang mga manalagna, nga naghambal sa ngalan ni Jehova.” (Santiago 5:10) Sanday W. F. Arndt kag F. W. Gingrich naghatag sing kahulugan sa Griegong tinaga nga ginbadbad diri nga “sulundan” (hy·poʹdeig·ma) subong “halimbawa, huwaran, sulundan, sa maayo nga kahulugan subong b[utang] nga nagapukaw ukon dapat magpukaw sa isa nga ilugon ini.” Subong ginapakita sa Juan 13:15, “labi pa ini sangsa isa ka halimbawa. Isa gid ini ka tipiko nga halimbawa.” (Theological Dictionary of the New Testamnent) Gani, nian, sarang mahimo sang modernong-adlaw nga mga alagad ni Jehova ang iya matutom nga mga manalagna subong sulundan kon tuhoy sa ‘pag-antos sing kalautan’ kag ‘pagpailob.’ Ano pa ang mahantop naton kon tun-an naton ang ila kabuhi? Kag paano ini makabulig sa aton sa aton pagbantala nga hilikuton?
Nag-antos Sila sing Kalautan
3, 4. Ano ang reaksion ni manalagna Amos sa pagpamatok ni Amasias?
3 Ang mga manalagna ni Jehova masunson nga nag-antos sing kalautan ukon sing malain nga pagtratar. Sadtong ikasiam nga siglo B.C.E., halimbawa, ang nagasimba sa baka nga saserdote nga si Amasias malauton nga namatok kay manalagna Amos. Si Amasias binutig nga nagpangangkon nga si Amos nagpuhon batok kay Jeroboam II paagi sa pagtagna nga ang hari mapatay sa espada kag nga ang Israel dalhon nga bihag. Sing matinamayon, si Amasias nagsiling kay Amos: “O ikaw nga manugpanan-aw, lakat, palagyo ka sa duta sang Juda, kag magpangabuhi didto, kag magtagna didto. Apang dili ka na magpanagna pa sa Bet-el, kay santuario ini sang hari kag templo ini nga harianon.” Wala mapunggan sining matigdas nga hambal, si Amos nagsabat: “Indi ako manalagna, ukon anak ako sang manalagna; kundi manugbantay ako sang kahayupan kag manugtatap sang sicomoro. Kag ginkuha ako ni Jehova sa pagsunod sang panong, kag nagsiling sa akon si Jehova, ‘Lakat, tagna sa akon katawhan nga Israel.’ ”—Amos 7:10-15.
4 Ginhatagan si Amos sang espiritu ni Jehova sang kusog nga magpanagna sing maisugon. Handurawa ang reaksion ni Amasias sang nagsiling si Amos: “Pamatii ang pulong ni Jehova, ‘Nagasiling bala ikaw: “Dili ka magtagna batok sa Israel, kag dili ka magwali batok sa panimalay ni Isaac”? Busa amo ini ang ginasiling ni Jehova: “Tuhoy sa imo asawa, mangin makihilahion sia sa siudad. Kag tuhoy sa imo mga anak nga lalaki kag sa imo mga anak nga babayi, mapukan sila sa espada. Kag tuhoy sa imo duta, bahinbahinon ini sa latid. Kag tuhoy sa imo, ikaw mapatay sa duta nga dimatinlo; kag tuhoy sa Israel, sa pagkamatuod dalhon ini nga bihag gikan sa iya duta.” ’ ” Natuman ina nga tagna. (Amos 7:16, 17) Mahimo nga nakibot gid sing daku ang apostata nga si Amasias!
5. Anong kaangtanan ang makuha naton sa ulot sang kahimtangan sang modernong-adlaw nga mga alagad ni Jehova kag sa iya ni manalagna Amos?
5 Nagaanggid ini sa kahimtangan sang katawhan ni Jehova karon. Nagaantos kita sing kalautan kaangay sadtong nagpahayag sang mga mensahe sang Dios, kag madamo nga tawo ang nagahambal sing matinamayon nahanungod sa aton pagbantala nga hilikuton. Matuod, ang aton awtoridad sa pagbantala wala maghalin sa teolohiko nga seminaryo. Sa baylo, ang balaan nga espiritu ni Jehova nagapahulag sa aton nga ibantala ang maayong balita sang Ginharian. Wala naton ginabayluhan ukon ginabuhinan ang puwersa sang mensahe sang Dios. Sa baylo, kaangay ni Amos, matinumanon naton nga ginabantala ini walay sapayan sang reaksion sang aton mga tagpalamati.—2 Corinto 2:15-17.
Nagpailob Sila
6, 7. (a) Ano ang nagapakilala sa pagpanagna ni Isaias? (b) Paano nagapanghikot ang karon nga mga alagad ni Jehova kaangay ni Isaias?
6 Ang mga manalagna sang Dios nagpailob. Halimbawa, ginpakita ni Isaias ang pagpailob, nga nag-alagad subong manalagna ni Jehova sadtong ikawalo nga siglo B.C.E. Ang Dios nagsugo sa iya: “Lakat, kag sugiri ini nga katawhan, ‘Pamati kamo sa liwat kag liwat, O mga tawo, apang indi makahangop; kag tan-aw kamo sa liwat kag liwat, apang indi makahantop.’ Patig-aha ang tagipusuon sini nga katawhan, kag pabungula ang ila mga igdulungog, kag papiyunga ang ila mga mata, basi nga makakita sila sa ila mga mata kag makabati sa ila mga igdulungog, kag makahangop sa ila tagipusuon kag magliso kag mag-ayo.” (Isaias 6:9, 10) Amo gid sina ang reaksion sang katawhan. Apang nagpauntat bala ini kay Isaias? Wala. Sa baylo, mapailubon kag makugi niya nga ginbantala ang nagapaandam nga mga mensahe ni Jehova. Ang Hebreong pagkahuman sang mga pinamulong sang Dios nga bag-o lang ginbalikwat nagasakdag sang panghunahuna sang “malawig nga pagpadayon” sang mga pagpahayag sang manalagna, nga nabatian sang katawhan “sa liwat kag liwat.”—Gesenius’ Hebrew Grammar.
7 Sa karon ang reaksion sang madamo sa maayong balita kaangay gid sa reaksion sang mga tawo sa mga pulong ni Jehova nga ginpaalinton ni Isaias. Kaangay sadtong matutom nga manalagna, walay sapayan, ginasulit naton ang mensahe sang Ginharian “sa liwat kag liwat.” Ginahimo naton ini nga may kakugi kag mapailubon nga pagbatas bangod kabubut-on ini ni Jehova.
“Amo Gid ang Ginhimo Nila”
8, 9. Sa anong mga paagi ang manalagna ni Jehova nga si Moises isa ka maayo nga halimbawa?
8 Si manalagna Moises huwaran sa pagpailob kag pagkamatinumanon. Ginpili niya nga magtindog upod sa naulipon nga mga Israelinhon, apang dapat sia maghulat sing mapailubon sa tion sang pagluwas sa ila. Sa sulod sang 40 ka tuig nagpuyo sia sa Midian tubtob nga gingamit sia sang Dios sa pagpanguna sa katawhan sang Israelinhon paguwa sa kahiulipnan. Sang si Moises kag ang iya utod nga si Aaron yara sa atubangan sang gumalahom sang Egipto, matinumanon nga ginsiling kag gintuman nila ang ginsugo sang Dios. Sa katunayan, “amo gid ang ginhimo nila.”—Exodo 7:1-6; Hebreo 11:24-29.
9 Si Moises mapailubon nga nagbatas sang 40 ka tuig nga kabudlayan sa kamingawan. Matinumanon man niya nga gintuman ang diosnon nga sugo sa pagtukod sing tabernakulo sang Israel kag sa paghimo sing iban pa nga mga butang nga gingamit sa pagsimba kay Jehova. Gintuman gid sing maayo sang manalagna ang mga sugo sang Dios nga aton mabasa: “Ginhimo ni Moises ang tanan suno sa ginsugo sa iya ni Jehova. Amo ini ang iya ginhimo.” (Exodo 40:16) Sa pagtuman sang aton ministeryo kaupod sang organisasyon ni Jehova, dumdumon naton ang pagkamatinumanon ni Moises kag ang pagsunod sa laygay ni apostol Pablo nga ‘magmatinumanon sa sadtong mga nagapanguna sa tunga naton.’—Hebreo 13:17.
May Positibo Sila nga Panimuot
10, 11. (a) Ano ang nagapakita nga si manalagna Oseas may yara positibo nga pagtamod? (b) Paano naton mahuptan ang positibo nga panimuot kon nagapalapit kita sa mga tawo sa aton mga teritoryo?
10 Ang mga manalagna kinahanglan nga may positibo nga panimuot samtang ginahatag nila ang mga mensahe sang paghukom subong man ang mga tagna nga nagapakita sang mahigugmaon nga pagkabalaka sang Dios sa mga matutom nga nag-alaplaag sa Israel. Matuod ini kay Oseas, nga isa ka manalagna sa indi magkubos sa 59 ka tuig. Sa positibo nga paagi, nagpadayon sia sa paghatag sang mga mensahe ni Jehova kag naghinakop sang iya matagnaon nga tulun-an paagi sa mga pulong: “Sin-o bala ang maalam, agod nga mahangop niya ining mga butang? Ang mahinalungon, agod nga mahangop niya sila? Kay ang mga dalanon ni Jehova matarong, kag ang mga matadlong magalakat sa ila; apang ang mga malalison mapukan sa ila.” (Oseas 14:9) Bangod ginatugutan kita ni Jehova sa paghatag sing panaksi, tigayunon naton ang positibo nga panimuot kag padayon nga tan-awon yadtong maalamon nga nagbaton sang dibagay nga kaluoy sang Dios.
11 Agod ‘makita ang mga takus,’ dapat kita magmabinatason kag tamdon ang mga butang sing positibo. (Mateo 10:11) Halimbawa, kon nabutang naton sa iban nga lugar ang aton mga yabi, mahimo nga usuyon naton liwat ang aton ginlaktan kag mangita sa lainlain nga mga lugar nga ginkadtuan naton. Mahimo lamang naton ini makita pagkatapos sang sulit-sulit nga paghimo sini. Magmabinatason man kita sing kaanggid sa pagpangita sa mga katulad-karnero. Daw ano ang aton kalipay kon mamati sila sang maayong balita sa masunson ginapangabudlayan nga teritoryo! Kag daw ano ang aton kasadya nga ginapakamaayo sang Dios ang aton hilikuton sa kadutaan diin ginlatiran anay sang mga pagdumili ang aton dayag nga pagministeryo!—Galacia 6:10.
Mga Ginhalinan sang Pagpalig-on
12. Anong tagna ni Joel ang may yara ika-20 nga siglo nga katumanan, kag paano?
12 Ang mga pinamulong sang mga manalagna ni Jehova mahimo mangin daku nga kalig-unan sa aton ministeryo. Halimbawa, binagbinaga ang tagna ni Joel. Nagaunod ini sing mga mensahe sang paghukom nga ginpatuhoy sa apostata nga mga Israelinhon kag sa iban pa sadtong ikasiam nga siglo B.C.E. Apang, si Joel gin-inspirar man sa pagtagna: “Mahanabo sa ulihi nga ipasagahay ko [si Jehova] ang akon espiritu sa tanan nga unod, kag magatagna ang inyo mga anak nga lalaki kag ang inyo mga anak nga babayi. Tuhoy sa inyo mga tigulang, magadamgo sila sing mga damgo. Tuhoy sa inyo pamatan-on nga mga lalaki, makakita sila sing mga palanan-awon. Kag bisan sa mga alagad nga lalaki kag sa mga alagad nga babayi man ipasagahay ko ang akon espiritu sa sadtong mga adlaw.” (Joel 2:28, 29) Nagmatuod ini sa mga sumulunod ni Jesus sugod sang Pentecostes 33 C.E. padayon. Kag daw ano ka daku nga katumanan sining tagna ang makita naton sa sining ika-20 nga siglo! Karon, may yara kita minilyon nga “nagatagna,” ukon nagawali sang mensahe ni Jehova—sa tunga nila kapin sa 600,000 ang yara sa bug-os tion nga payunir nga pag-alagad.
13, 14. Ano ang makabulig sa pamatan-on nga mga Cristiano nga makasapo sing kalipay sa ministeryo sa latagon?
13 Madamong manugbantala sang Ginharian ang mga pamatan-on. Indi pirme mahapos para sa ila ang makigsugilanon sa mga tigulang nahanungod sa Biblia. Kon kaisa ang pamatan-on nga mga alagad ni Jehova ginasilingan: ‘Ginauyangan lang ninyo ang inyo tion sa pagbantala,’ kag ‘dapat nga may yara kamo iban nga ginahimo.’ Sing mataktikanhon ang lamharon nga mga Saksi ni Jehova mahimo magasabat nga ginakasubo nila nga amo sina ang iya opinyon. Nasapwan sang isa ka lamharon nga manugbantala sang maayong balita nga mabuligon ang pagdugang: “Sa banta ko makabenepisyo gid ako gikan sa pagpakigsugilanon sa mga tigulang kaangay mo, kag nalipay ako sa sini.” Sa pagkamatuod, ang pagbantala sing maayong balita indi gid pag-uyang sing tion. Ang kabuhi nabutang sa katalagman. Paagi kay Joel, ang Dios nagsiling sing dugang: “Mahanabo nga ang bisan sin-o nga magtawag sang ngalan ni Jehova maluwas.”—Joel 2:32.
14 Ang mga kabataan nga nagaupod sa ila mga ginikanan sa pagbantala sing Ginharian nga hilikuton nagaabiabi sang bulig sang mga ginikanan sa pagpahamtang sing personal nga mga tulumuron. Sing amat-amat ina nga kabataan nagauswag halin sa pagbasa sing isa ka kasulatan pakadto sa pagpaathag sang ila pasad-sa-Biblia nga paglaum kag pagtanyag sing nagakaigo nga literatura sa mga interesado. Samtang makita nila ang ila kaugalingon nga pag-uswag kag ang pagpakamaayo ni Jehova, ang lamharon nga mga manugbantala sang Ginharian makasapo sing daku nga kalipay sa pagbantala sing maayong balita.—Salmo 110:3; 148:12, 13.
Kakugi kag Panimuot sa Paghulat
15. Paano ang halimbawa ni Ezequiel makabulig sa aton sa pagpasag-uli sang aton kakugi para sa pagbantala sing Ginharian nga hilikuton?
15 Ang mga manalagna sang Dios mga huwaran man sa pagpakita sing kakugi kag panimuot sa paghulat—mga kinaiya nga kinahanglanon naton sa aton ministeryo sa karon. Sang una naton nga natun-an ang kamatuoran gikan sa Pulong sang Dios, mahimo nga napuno kita sing kakugi nga nagpahulag sa aton sa pagpamulong sing masidla. Apang mahimo nga tinuig na ang nagligad, kag mahimo nga gintuptupan naton ang aton teritoryo sa pagpanaksi sing masunson. Nagadiutay nga mga tawo karon ang mahimo nga nagabaton sang mensahe sang Ginharian. Nagbuhin bala ini sang aton kakugi? Kon amo, binagbinaga si manalagna Ezequiel, nga ang iya ngalan nagakahulugan sing “Ang Dios Nagapabakod.” Bisan pa nga si Ezequiel nag-atubang sang matig-a sing tagipusuon nga mga tawo sa dumaan nga Israel, ginpabakod sia sang Dios kag malaragwayon nga ginhimo ang iya agtang nga mas matig-a pa sangsa santikan. Busa, natuman ni Ezequiel ang iya ministeryo sa madamo, madamo nga tinuig bisan pa nga namati man ukon wala ang mga tawo. Ginapakita sang iya halimbawa nga sarang man naton ini mahimo, kag makabulig ini sa aton sa pagpasag-uli sang aton kakugi para sa pagbantala nga hilikuton.—Ezequiel 3:8, 9; 2 Timoteo 4:5.
16. Anong panimuot ni Miqueas ang dapat naton palambuon?
16 Talalupangdon tungod sa iya pagpailob amo si Miqueas, nga nagtagna sadtong ikawalo nga siglo B.C.E. “Para sa akon,” sulat niya, “magatulok ako kay Jehova. Magahulat ako sa Dios sang akon kaluwasan. Ang akon Dios magapamati sa akon.” (Miqueas 7:7) Ang pagsalig ni Miqueas nanggamot sa iya mabakod nga pagtuo. Kaangay ni manalagna Isaias, nahibal-an ni Miqueas nga ano man ang gintuyo ni Jehova pat-od gid nga pagahimuon Niya. Nahibaluan man naton ini. (Isaias 55:11) Busa palambuon naton ang panimuot sa paghulat sa katumanan sang mga saad sang Dios. Kag ibantala naton ang maayong balita nga may kakugi, bisan sa mga lugar diin ang mga tawo nagapakita sing diutay nga interes sa mensahe sang Ginharian.—Tito 2:14; Santiago 5:7-10.
Pagpailob sa Karon
17, 18. Anong dumaan kag modernong mga halimbawa ang makabulig sa aton sa pagpailob?
17 Ang iban sa mga manalagna ni Jehova mapailubon nga nagbatas sa ila mga asaynment sing tinuig apang wala nila nakita ang katumanan sang ila mga tagna. Apang, ang ila mapailubon nga pagbatas, sa masunson samtang nagaantos sing malain nga pagtratar, nagabulig sa aton sa paghangop nga sarang naton matuman ang aton ministeryo. Mahimo man kita makabenepisyo gikan sa halimbawa sang matutom nga mga hinaplas sang unang mga dekada sang ika-20 nga siglo. Bisan pa nga ang ila langitnon nga mga paglaum wala natuman sing subong kadasig sa ginpaabot nila, wala nila gintugutan ang kapaslawan bangod sang daw pagpalantang sa pagbuhin sang ila kakugi sa paghimo sang kabubut-on sang Dios subong sang ginpahayag niya sa ila.
18 Sa mga tinuig, madamo sining mga Cristiano ang tayuyon nga nagpanagtag sing Ang Lalantawan kag sang kaupod nga balasahon sini, ang Magmata!, (anay ginhingalanan nga The Golden Age kag sang ulihi Consolation). Makugi nila nga ginpanagtag ining hamili nga mga balasahon sa mga tawo sa mga dalan kag sa ila mga puluy-an sa ginatawag naton karon nga mga ruta sa magasin. Isa ka tigulang nga utod nga babayi nga nakatapos sang iya dutan-on nga dalanon ang gilayon nga ginkahidlawan sang mga nagalabay nga naanad na nga makita sia nga nagapanaksi sa dalan. Daw ano nga panaksi ang nahatag niya sa iya madamong tinuig sang matutom nga pag-alagad, subong sang ginpakita sang mainapresyahon nga mga komento sadtong nakapanilag sang iya dayag nga pagministeryo! Subong manugbantala sang Ginharian, tayuyon mo bala nga ginapahamtang Ang Lalantawan kag Magmata! sa mga kamot sadtong masugilanon mo sa imo ministeryo?
19. Anong pagpalig-on ang ginahatag sa aton sang Hebreo 6:10-12?
19 Binagbinaga, man, ang pagpailob kag matutom nga pag-alagad sang mga kauturan nga nagaalagad subong mga katapo sang Nagadumala nga Hubon sang mga Saksi ni Jehova. Pila sa ila ang yara na karon sa ikasiam ukon ikanapulo nga dekada sang ila kabuhi, apang mga manugbantala gihapon sila sang Ginharian nga makugi nga nagaatipan sang ila gintangdo nga mga katungdanan. (Hebreo 13:7) Kag kamusta ang iban pa nga mga tigulang nga may langitnon nga paglaum kag bisan ang pila sa tunga sang “iban nga mga karnero” nga tigulang na? (Juan 10:16) Makapat-od gid sila nga ang Dios indi dimatarong nga makalimot sang ila hilikuton kag sang gugma nga ginapakita nila para sa iya ngalan. Kaupod sang mas batan-on nga mga masigkatumuluo, madamong tigulang nga mga Saksi ni Jehova ang nagapadayon sa paghimo sang masarangan nila, nagapakita sing pagtuo kag pagpailob sa pag-alagad sa Dios. (Hebreo 6:10-12) Nian, paagi man sa pagkabanhaw, kaangay sang mga manalagna sang una, ukon paagi sa pagkalampuwas sa nagapakari nga “dakung kapipit-an,” pagaanihon nila ang bugana nga padya sang kabuhi nga dayon.—Mateo 24:21.
20. (a) Ano ang imo natun-an gikan sa “sulundan” sang mga manalagna? (b) Paano makabulig sa aton ang kaangay sang manalagna nga pagpailob?
20 Daw ano kaayo nga sulundan ang ginbilin sang mga manalagna sang Dios sa aton! Bangod nagbatas sila sing pag-antos, nagpailob, kag nagpakita sing lain nga diosnon nga mga kinaiya, pribilehiyo nila ang magpamulong sa ngalan ni Jehova. Subong ang iya modernong-adlaw nga mga Saksi, kabay nga mangin kaangay kita sa ila kag mangin subong katutom kay manalagna Habaccuc, nga nagsiling: “Padayon ako nga magatindog sa akon pagbantay, kag padayon ako nga magapahamtang sa torre; kag padayon ako nga magalantaw, agod mahibaluan kon ano ang ipamulong [sang Dios] sa akon.” (Habaccuc 2:1) Kabay nga may kaanggid kita nga determinasyon samtang nagapailob kita kag malipayon nga nagapadayon sa pagpahayag sing dayag sa bantog nga ngalan sang aton Dakung Manunuga, si Jehova.—Nehemias 8:10; Roma 10:10.
Nahantop Mo Bala Ining mga Punto?
◻ Anong maisugon nga halimbawa ang ginpahamtang ni manalagna Amos?
◻ Sa anong mga paagi huwaran si manalagna Moises?
◻ Paano ang modernong-adlaw nga mga Saksi ni Jehova makapanghikot kaangay nanday Amos kag Isaias?
◻ Ano ang matun-an sang Cristianong mga ministro gikan sa pagginawi nanday Oseas kag Joel?
◻ Paano kita makabenepisyo gikan sa mga halimbawa nanday Ezequiel kag Miqueas?
[Piktyur sa pahina 16]
Walay sapayan sang daku nga pagpamatok ni Amasias, ang espiritu ni Jehova naghatag sing kusog kay Amos agod magpanagna sing maisugon
[Piktyur sa pahina 18]
Ang matutom nga mga hinaplas nagapahamtang sing maayo nga halimbawa paagi sa pagpailob sa pag-alagad kay Jehova