Ang Pag-antos sang Tawo—Ngaa Ginatugutan Ini sang Dios?

SA GINSUGURAN sang maragtas sang tawo, wala gid anay sing mga luha sang kasubo ukon sang kasakit. Wala nagaantos ang tawo. Ginhatagan ang katawhan sing himpit nga pamuno. “Nakita sang Dios ang tagsa ka butang nga nahimo niya kag, yari karon! tama gid kaayo.”​—⁠Genesis 1:⁠31.

Apang ang iban nagapamatok, ‘Ang sugilanon tuhoy kanday Adan kag Eva sa hardin sang Eden isa lamang ka ilustrasyon.’ Sing makapasubo, madamo nga klerigo sang Cristiandad ang nagasiling sini. Apang, si Jesucristo mismo nga may mataas nga awtoridad nagpamatuod nga ang mga natabo sa Eden isa ka maragtas. (Mateo 19:​4-6) Dugang pa, ang lamang nga paagi agod mahangpan kon ngaa gintugutan sang Dios ang pag-antos sang tawo amo ang pag-usisa sining mga hitabo sa maaga nga maragtas sang tawo.

Ang una nga tawo, nga si Adan, ginhatagan sing makaalayaw nga hilikuton sa pag-atipan sa hardin sang Eden. Subong man, ginpahamtang sang Dios sa atubangan niya ang tulumuron nga pasangkaron ang iya Edeniko nga puluy-an tubtob mangin isa ka bug-os globo nga hardin sang kalipay. (Genesis 1:28; 2:15) Agod buligan si Adan sa pagtuman sining daku nga hilikuton, ginhatagan sia sang Dios sing asawa, nga si Eva, kag ginsugo sila nga magmabungahon kag magbuad, kag gamhan ang duta. Apang may isa pa ka butang nga kinahanglanon agod mapasalig ang kadalag-an sang katuyuan sang Dios para sa duta kag sa katawhan. Bangod ginhimo sa dagway sang Dios, may hilway nga kabubut-on ang tawo; busa, kinahanglanon nga ang kabubut-on sang tawo indi gid magsumpakil sa kabubut-on sang Dios. Kay kon magsumpakil ini, magagamo ang uniberso, kag ang katuyuan sang Dios nga pun-on ang duta sing mahidaiton nga pamilya sang tawo indi matuman.

Ang pagpasakop sa paggahom sang Dios indi awtomatiko. Dapat ini mangin mahigugmaon nga pagpabutyag sang hilway nga kabubut-on sang tawo. Halimbawa, nabasa naton nga sang si Jesucristo nagaatubang sing mabudlay gid nga pagtilaw, nangamuyo sia: “Amay, kon buot mo, ipahilayo sa akon ining kupa; apang indi ang akon kabubut-on, kundi ang imo, paghimuon.”​—⁠Lucas 22:⁠42.

Sing kaanggid, depende sadto kanday Adan kag Eva kon bala magapasakop sila sa kabubut-on sang Dios. Sa sining katuyuan, naghatag si Jehova nga Dios sing isa ka simple lamang nga pagtilaw. Ang isa sang kakahuyan sa hardin gintawag nga “kahoy sa pagkilala sing maayo kag malaut.” Naglaragway ini sa kinamatarong sang Dios sa paghimo sing mga talaksan sang husto nga paggawi. Sa maathag nga hambal, gindumilian sang Dios ang pagkaon sing bunga gikan sa sining partikular nga kahoy. Kon maglalis sanday Adan kag Eva, magaresulta ini sa ila kamatayon.​—⁠Genesis 2:​9, 16, 17.

Ang Pagsugod sang Pag-antos sang Tawo

Isa ka adlaw, ginduhaduhaan sang isa ka espiritu nga anak sang Dios ang paagi sang paggahom sang Dios. Ginagamit ang man-ug subong manughambal, ginpamangkot niya si Eva: “Gali nagsiling bala ang Dios nga dili kamo magkaon sang bisan ano nga kahoy sang hardin?” (Genesis 3:⁠1) Sa amo, gintanom ang binhi sang pagduhaduha sa hunahuna ni Eva sa kon bala husto ang paagi sang paggahom sang Dios.⁠a Bilang sabat, ginhatag ni Eva ang husto nga sabat, nga natun-an niya gikan sa iya bana. Apang, nian ginsumpakil sang espiritu nga tinuga ang Dios kag nagbinutig nahanungod sa mangin mga resulta sang paglalis, nga nagasiling: “Dili kamo mapatay nga totoo. Kay ang Dios nakahibalo nga sa adlaw nga magkaon kamo gikan sa sini magamuklat ang inyo mga mata kag mangin kaangay sang Dios kamo, nga nakakilala sang maayo kag malaut.”​—⁠Genesis 3:​4, 5.

Sing makapasubo, nalimbungan si Eva sa paghunahuna nga ang paglalis magaresulta, indi sa pag-antos sang tawo, kundi sa mas maayo pa nga kabuhi. Sa dugang nga pagtulok niya sa bunga, dugang pa nga nangin halandumon ini, kag nagsugod sia sa pagkaon sini. Sang ulihi, ginhaylo niya si Adan nga magkaon man. Makapasubo nga ginpili ni Adan nga mahuptan ang pabor sang iya asawa sa baylo sang sa Dios.​—⁠Genesis 3:6; 1 Timoteo 2:​13, 14.

Paagi sa pagsugyot sining pagrebelde, ginhimo sining espiritu nga tinuga ang iya kaugalingon nga isa ka kasumpong sang Dios. Sa amo, gintawag sia nga Satanas, nga naghalin sa Hebreong tinaga nga nagakahulugan sing “manugsumpong.” Nagbinutig man sia nahanungod sa Dios, nagahimo sang iya kaugalingon nga isa ka manugpasipala. Busa, gintawag man sia nga Yawa, nga naghalin sa isa ka Griegong tinaga nga nagakahulugan sing “manugpasipala.”​—⁠Bugna 12:⁠9.

Sa amo, nagsugod ang pag-antos sang tawo. Tatlo sang mga tinuga sang Dios ang nag-abuso sang hilway nga kabubut-on nga gindulot sa ila, nagpili sing isa ka makagod nga dalanon sang pagkabuhi batok sa ila Manunuga. Nag-utwas karon ang pamangkot, Paano atubangon sang Dios ining pagrebelde sa isa ka matarong nga paagi nga magapasalig sa nabilin nga bahin sang iya intelihente nga mga tinuga, lakip ang matutom nga mga anghel sa langit kag ang palaabuton nga mga kaliwat nanday Adan kag Eva?

Ang Maalamon nga Sabat sang Dios

Ang iban mahimo mangatarungan nga maayo gid kuntani kon ginlaglag gilayon sang Dios sanday Satanas, Adan, kag Eva. Apang wala kuntani sina mahusay ang mga hulusayon nga ginpaut-was sang pagrebelde. Ginsuay ni Satanas ang paagi sang paggahom sang Dios, nagapahangop nga mas magaayuhan ang mga tawo kon wala sila sa idalom sang paggahom sang Dios. Subong man, ang iya kadalag-an sa pagpatalikod sa una nga duha ka tawo batok sa paggahom sang Dios nagpautwas sing iban pa nga mga hulusayon. Sanglit nakasala sanday Adan kag Eva, nagakahulugan bala ini nga may sayop sa paagi sang pagtuga sang Dios sa tawo? May tinuga bala ang Dios sa duta nga magapabilin nga matutom sa iya? Kag kamusta naman ang angheliko nga mga anak ni Jehova nga nakasaksi sang pagrebelde ni Satanas? Sakdagon bala nila ang pagkamatarong sang Iya pagkasoberano? Sing maathag, kinahanglan ang bastante nga tion agod husayon ining mga hulusayon. Amo kon ngaa gintugutan sang Dios nga magluntad si Satanas tubtob sa aton adlaw.

Tuhoy kanday Adan kag Eva, sang adlaw nga naglalis sila, ginpamatbatan sila sang Dios sing kamatayon. Gani nagsugod ang proseso sang kamatayon. Ang ila mga kaliwat, nga ginpanamkon sa tapos na makasala sanday Adan kag Eva, nagpanubli sing sala kag kamatayon gikan sa ila dihimpit nga mga ginikanan.​—⁠Roma 5:⁠14.

Nagsugod si Satanas nga kadampig ang una nga duha ka tawo sa iya bahin sa hulusayon. Gingamit niya ang tion nga gintugot sa iya sa pagtinguha nga kontrolon ang tanan nga kaliwat ni Adan. Nagmadinalag-on man sia sa paghaylo sa pila ka mga anghel nga magbuylog sa iya pagrebelde. Apang, ang kalabanan sang angheliko nga mga anak sang Dios matutom nga nagsakdag sang pagkamatarong sang paggahom ni Jehova.​—⁠Genesis 6:​1, 2; Judas 6; Bugna 12:​3, 9.

Ang hulusayon amo ang paggahom sang Dios kontra kay Satanas, isa ka hulusayon nga mainit gid sang mga adlaw ni Job. Ginpamatud-an sining matutom nga tawo paagi sa iya paggawi nga ginpasulabi niya ang matarong nga paggahom sang Dios sang sa sataniko nga kahilwayan, subong sang nahimo na sang mahinadlukon sa Dios nga mga tawo nga sanday Abel, Enoc, Noe, Abraham, Isaac, Jacob, kag Jose. Si Job nangin topiko sang isa ka paghambalanay nga natabo sa langit sa atubangan sang matutom nga mga anghel sang Dios. Bilang panakdag sa Iya matarong nga paggahom, nagsiling ang Dios kay Satanas: “Natalupangdan mo bala ang akon alagad nga si Job, nga wala sing kaangay sa iya sa duta, tawo nga himpit kag matarong, nga mahadlukon sa Dios kag nagalikaw sa malaut?”​—⁠Job 1:​6-8.

Nangindi sa pagbaton sing pagkalutos, nagsiling si Satanas nga si Job nagaalagad sa Dios bangod lamang sa makagod nga mga rason, kay bugana nga ginpakamaayo sang Dios si Job sing materyal nga kahamungayaan. Gani nagsiling si Satanas: “Sa pagbag-o sang kahimtangan, untaya ang imo kamot, palihug, kag tanduga ang tanan nga iya kag tan-awa kon indi ka bala niya pagsikwayon sa imo gid nawong.” (Job 1:11) Indi pa kontento si Satanas, ginduhaduhaan niya ang integridad sang tanan nga tinuga sang Dios. “Ang tanan nga iya sang tawo ihatag niya tungod sa iya kalag,” siling niya. (Job 2:⁠4) Ining mapasipalahon nga pagsalakay nagdalahig indi lamang kay Job kundi sa tanan nga matutom nga sumilimba sang Dios sa langit kag sa duta. Ginpahangop ni Satanas nga sikwayon nila ang ila kaangtanan kay Jehova kon ang ila kabuhi yara sa katalagman.

May bug-os nga pagsalig si Jehova nga Dios sa integridad ni Job. Subong pamatuod sa sina, gintugutan niya si Satanas nga paantuson si Job. Paagi sa iya katutom wala lamang ginbindikar ni Job ang iya kaugalingon nga ngalan kundi, kapin ka importante, ginsakdag niya ang pagkamatarong sang pagkasoberano ni Jehova. Napamatud-an nga isa ka butigon ang Yawa.​—⁠Job 2:10; 42:⁠7.

Apang, ang labing maayo nga huwaran sang katutom sa idalom sang pagtilaw amo si Jesucristo. Ginsaylo sang Dios ang kabuhi sining angheliko nga Anak gikan sa langit padulong sa taguangkan sang isa ka ulay. Amo kon ngaa wala makapanubli si Jesus sing sala kag dikahimpitan. Sa baylo, nagdaku sia nga isa ka himpit nga tawo, ang sibu nga katumbas sang una nga tawo sang wala pa madula sadtong isa ang iya kahimpitan. Ginhimo ni Satanas si Jesus nga isa ka pinasahi nga puntariya, ginpaidalom sia sa madamo nga pagsulay kag pagtilaw, nga nagdangat sa isa ka makahuluya nga kamatayon. Apang wala mabungkag ni Satanas ang integridad ni Jesus. Sing bug-os, ginsakdag ni Jesus ang pagkamatarong sang paggahom sang iya Amay. Ginpamatud-an man niya nga ang himpit nga tawo nga si Adan wala sing balibad sa pagbuylog sa pagrebelde ni Satanas. Mahimo nangin matutom si Adan sa idalom sang iya mas diutay nga pagtilaw.

Ano Pa ang Napamatud-an?

Mga 6,000 ka tuig na sang pag-antos sang tawo ang nagligad sugod sang magrebelde sanday Adan kag Eva. Sa sulod sining tion gintugutan sang Dios ang katawhan nga tilawan ang nanuhaytuhay nga mga porma sang panguluhan. Ang makakulugmat nga rekord sang pag-antos sang tawo nagapamatuod nga ang tawo wala sing ikasarang sa paggahom sa iya kaugalingon. Sa kamatuoran, nagaluntad karon ang anarkiya sa madamo nga bahin sang duta. Ang kahilwayan gikan sa Dios, nga ginsakdag ni Satanas, malaglagon.

Wala sing dapat pamatud-an si Jehova sa iya kaugalingon. Nahibaluan niya nga ang iya paagi sang paggahom amo ang matarong kag para sa kaayuhan gid sang iya mga tinuga. Apang, agod sabton sing makaalayaw ang tanan nga pamangkot nga ginpautwas sang pagrebelde ni Satanas, ginhatagan niya ang iya intelihente nga mga tinuga sing kahigayunan nga ipakita ang ila pagpasulabi sa iya matarong nga paggahom.

Ang mga padya sang paghigugma sa Dios kag sang pagpabilin nga matutom sa iya nagalabaw gid sa umalagi nga panahon sang pag-antos sa kamot sang Yawa. Ginailustrar ini sang natabo kay Job. Gin-ayo ni Jehova nga Dios si Job gikan sa balatian nga ginpaantos sa iya sang Yawa. Dugang pa, “ginpakamaayo [sang Dios] ang kaulihian ni Job labi pa sang iya pamuno.” Sang ulihi, sa tapos sang 140 ka tuig nga pagpalawig sang iya kabuhi, “si Job napatay, nga tigulang kag naayawan sa mga adlaw.”​—⁠Job 42:​10-17.

Ginapatalupangod ini sang Cristianong manunulat sang Biblia nga si Santiago, nga nagasiling: “Nabatian ninyo ang pagbatas ni Job kag nakita ninyo ang resulta nga ginhatag ni Jehova, nga si Jehova mapinalanggaon gid kag mainawaon.”​—⁠Santiago 5:​11, footnote.

Natapos na karon ang tion para kay Satanas kag sa iya kalibutan. Sa indi madugay, baliskaron sang Dios ang tanan nga pag-antos sang katawhan nga resulta sang pagrebelde ni Satanas. Bisan ang mga minatay pagabanhawon. (Juan 11:25) Nian, ang matutom nga mga tawo kaangay ni Job may kahigayunan nga makatigayon sing kabuhi nga walay katapusan sa isa ka paraiso nga duta. Ining palaabuton nga mga pagpakamaayo nga ibubo sang Dios sa iya mga alagad magabindikar sa iya sing dayon subong isa ka matarong nga Soberano nga sa pagkamatuod “mapinalanggaon gid kag mainawaon.”

[Footnote]

[Kahon/Mga piktyur sa pahina 8]

MAPINTAS NGA MGA DIOS SANG MGA TAWO

ANG dumaan nga mga dios masami nga ginlaragway subong uhaw sa dugo kag mailigbon sa sekso. Agod mapahamut-an sila, ginsunog pa gani nga buhi sang mga ginikanan ang ila kabataan sa kalayo. (Deuteronomio 12:31) Sa isa pa ka sobra nga butang, ang paganong mga pilosopo nagtudlo nga ang Dios wala sing mga balatyagon subong sang kaakig ukon kaluoy.

Ang gin-inspirar sang demonyo nga mga pagtamod sining mga pilosopo nag-impluwensia sa nagapakilala nga katawhan sang Dios, ang mga Judiyo. Ang Judiyong pilosopo nga si Philo, nga kadungan ni Jesus, nagsiling nga ang Dios “wala sing huyog sa bisan ano nga balatyagon.”

Bisan gani ang estrikto nga Judiyong sekta sang mga Fariseo naim­pluwen­sia­han man sang Griegong pilosopiya. Ginbaton nila ang mga panudlo ni Plato nga ang tawo ginahuman sang isa ka dimamalatyon nga kalag nga nasiod sa lawas sang tawo. Dugang pa, suno sa unang siglo nga istoryador nga si Josephus, ang mga Fariseo nagpati nga ang mga kalag sang malauton nga mga tawo “nagaantos sing dayon nga silot.” Apang, ang Biblia, wala nagahatag sing sadsaran para sa sina nga pagtamod.​—⁠Genesis 2:7; 3:19; Manugwali 9:5; Ezequiel 18:⁠4.

Kamusta ang mga sumulunod ni Jesus? Gintugutan bala nila ang ila kaugalingon nga maimpluwensiahan sang paganong pilosopiya? Ginakilala ining katalagman, ginpaandaman ni apostol Pablo ang mga Cristiano: “Andam kamo: basi may maglimbong sa inyo paagi sa pilosopiya kag daya nga walay pulos suno sa pinalatunlaton nga sugid sang mga tawo, suno sa nahauna gid nga pagtulun-an sang kalibutan kag indi suno kay Cristo.”​—⁠Colosas 2:8; tan-awa man ang 1 Timoteo 6:⁠20.

Sing makapasubo, ginsikway sang pila ka nagapakilala nga Cristianong mga manugtatap sang ikaduha kag ikatlo nga siglo yadto nga paandam kag nagtudlo nga ang Dios wala sing mga balatyagon. Ang The Encyclopedia of Religion nagasiling: “Sa kabilugan, ang paghangop sa mga kinaiya sang Dios naghisanto sa Judiyo kag pilosopiko nga panghunahuna sadtong tion . . . Ang ideya nga ang Dios nga Amay may mga balatyagon subong sang kaluoy . . . ginkabig sa kabilugan nga indi mabaton sa dimagkubos tubtob sa talipuspusan sang ikabeinte nga siglo.”

Sa amo, ginbaton sang Cristiandad ang butig nga panudlo tuhoy sa isa ka mapintas nga dios nga nagasilot sa mga makasasala paagi sa pagpaantos sa ila sing dayon. Sa pihak nga bahin, si Jehova nga Dios maathag nga nagasiling sa iya Pulong, ang Biblia, nga “ang bayad sang sala amo ang kamatayon,” indi ang dayon nga pagpaantos.​—⁠Roma 6:⁠23.

[Credit Lines]

Ibabaw: Acropolis Museum, Gresya

Sa maayong kabubut-on sang The British Museum

[Piktyur sa pahina 7]

Ang katuyuan sang Dios nga himuon ang duta nga isa ka Edeniko nga paraiso dapat matuman!