May Napalig-on Ka Bala Kasan-o Lang?
NAPULOG-PITO ka tuig lamang si Elena sang natukiban sang mga doktor nga may kanser sia sa obaryo. Dapat batason sang iya iloy, nga si Mari, ang kalisud nga makita si Elena nga ginasakitan sing daku.
Sang ulihi, ginsaylo si Elena sa isa ka ospital sa Madrid, Espanya, 1,900 kilometros kalayo gikan sa iya balay sa Canary Islands. Sa Madrid ang isa ka grupo sang mga doktor handa nga operahan sia nga wala sing dugo. (Binuhatan 15:28, 29) Apang antes gid lamang masugdan ang operasyon, nangin maathag nga ang kahimtangan ni Elena mahimo sa ulihi magadul-ong sa iya kamatayon. Ang kanser naglapta na sa iya bug-os nga lawas, kag wala sing mahimo ang mga manugbusbos. Napatay si Elena pagligad sang walo ka adlaw nga nag-abot sila sa Madrid.
Wala gin-atubang sing isahanon ni Mari yadtong masakit nga pagtilaw. Sa ila kaugalingon nga gasto, ang duha ka Cristianong mga gulang nag-upod sa ila sang iya kamagulangan nga anak nga lalaki sa Madrid kag nagtener didto tubtob napatay si Elena. “Ginbuligan nila ako nga maatubang ang balatyagon sang daku nga kasubo nga nabatyagan ko sa sulod,” paathag ni Mari. “Indi ko gid malipatan ang pagpalig-on nga ginhatag nila sa akon. Ang ila espirituwal nga pagsakdag kag praktikal nga bulig hamili gid katama. Sila matuod nga ‘palalipdan sa hangin.’ ”—Isaias 32:1, 2.
Nalipay si Jehova nga ang mahigugmaon nga mga manugbantay kaangay nila nagaatipan sang iya mga karnero sing tuman ka mapinalanggaon. (Hulubaton 19:17; 1 Pedro 5:2-4) Apang, ang paghatag sing pagpalig-on indi lamang pribilehiyo sang mga gulang. Ang tanan nga Cristiano nagatipon sing tingob sa pagbaton sing espirituwal nga panudlo kag sa ‘pagpalig-unay sa isa kag isa.’ (Hebreo 10:24, 25) Ang pagpalig-on isa ka kinahanglanon nga bahin sang Cristianong paghiliupod.
Ano ang Nalakip sa Pagpalig-on?
Kon paano ang isa ka matahom nga bulak magakalaya kon indi mabunyagan, ang mga indibiduwal—sa pamilya kag sa kongregasyon—magaluya man kon wala sing pagpalig-on. Sa pihak nga bahin, ang suno-sa-tion nga pagpalig-on mahimo makapabakod sa mga nagaatubang sing pagsulay, nagapahalipay sa ginapung-aw, kag nagapapagsik sa mga nagaalagad sa Dios sing matutom.
Ang Griegong tinaga nga ginbadbad nga “pagpalig-on” nagalakip sang ideya sang paglugpay, paglaygay, kag pagpahalipay. Busa, ang pagpalig-on indi limitado sa pagsiling sa iya nga maayo ang ginahimo niya. Mahimo man ini maglakip sang paghatag sing praktikal kag espirituwal nga bulig.
Sa katunayan, ang Griegong tinaga nga ginbadbad nga “pagpalig-on” literal nga nagakahulugan sing “imbitasyon nga updan ang isa ka tawo.” Ang paglakat sing dungan kaupod sang aton espirituwal nga mga kauturan nga lalaki kag babayi nagapahanugot sa aton sa paghatag sing gilayon nga pagsakdag kon ang isa sa ila ginakapoy ukon nasandad. (Manugwali 4:9, 10) Sing makawiwili, ang katawhan ni Jehova ‘nagaalagad sa iya nga may paghilisugot.’ (Sofonias 3:9) Kag gintawag ni apostol Pablo ang isa ka Cristiano nga “totoo nga katuwang sing gota.” (Filipos 4:3) Ang pagpangabudlay nga magtuwangay sa isa ka gota paagi sa pag-alagad sing hilisugot nagapamag-an sang lulan, ilabi na para sa mga indi mabakod sa espirituwal.—Ipaanggid ang Mateo 11:29.
Nagahatag Sila sing Pagpalig-on
Sanglit ang pagpalig-on importante katama, binagbinagon naton ang pila ka Makasulatanhon nga mga halimbawa sini. Sang malapit na mapatay ang manalagna sang Dios nga si Moises, gintangdo ni Jehova si Josue nga mangin pangulo sang mga Israelinhon. Indi ini mahapos nga asaynment, subong sang nahibaluan gid mismo ni Moises. (Numeros 11:14, 15) Gani, ginsugo ni Jehova si Moises nga ‘tulinan si Josue kag pabakuron sia kag palig-unon sia.’—Deuteronomio 3:28.
Sadto anay sang panahon sang mga hukom sang Israel, ang anak nga babayi ni Jefte kinabubut-on nga nagtuman sang sumpa sang iya amay paagi sa pagbiya sang posibilidad nga makatigayon sing pamilya agod mag-alagad sa santuaryo ni Jehova. Natalupangdan bala ang iya pagsakripisyo? Huo, kay ang Hukom 11:40 nagasiling: “Ang babayi nga mga anak sang Israel nagakadto tuigtuig sa paghatag sing komendasyon sa anak nga babayi ni Jefte nga Galaadnon sing apat ka adlaw sa tuig.” Yadto nga mga pagduaw mahimo nga nakapalig-on gid sa masinakripisyuhon sa kaugalingon nga anak nga babayi ni Jefte.
Ang paghatag sing pagpalig-on nagakinahanglan kon kaisa sing kaisog. Sadtong nahauna nga misyonero nga paglakbay ni apostol Pablo, nakasumalang sia sing masingki nga pagpamatok sa pila ka siudad sang Asia Minor. Gintabog sia sa Antioquia, haluson nakapalagyo sa kamatayon sa Iconio, kag ginbato kag ginbayaan sa paghunahuna nga patay na sia sa Listra. Apang, wala madugay pagkatapos sadto, si Pablo kag ang iya mga kaupdanan nagbalik sa sining mga siudad, “nga nagapabakod sang mga kalag sang mga disipulo, nga nagapalig-on sa ila sa pagpadayon sa pagtuo kag nagasiling: ‘Magsulod kita sa ginharian sang Dios paagi sa madamong kapipit-an.’ ” (Binuhatan 14:21, 22) Handa si Pablo nga ibutang sa katalagman ang iya kabuhi agod mapalig-on ining bag-ong mga disipulo.
Apang, ang bag-ong mga disipulo indi lamang ang mga Cristiano nga nagakinahanglan sing pagpalig-on. Mga tinuig sang ulihi si Pablo nakaeksperiensia sing mabudlay nga paglakbay pakadto sa Roma, diin ginkasaba sia. Samtang nagahinampot sa iya kaladtuan, mahimo nga ginluyahan sia sing buot. Apang sang makaabot sia sa isa ka lugar nga 74 kilometros bagatnan-sidlangan sang Roma, napalig-on sia. Ngaa? Bangod ang mga kauturan halin sa Roma nagkari sa pagsug-alaw sa iya sa Foro ni Appio kag sa Tres Tavernas. “Sang nakita niya sila, si Pablo nagpasalamat sa Dios kag nagpakaisog.” (Binuhatan 28:15) Sa kaanggid nga mga okasyon, ang aton lamang presensia mahimo nga makapalig-on sing daku sa mga masigkatumuluo.
Himusli ang mga Kahigayunan nga Makahatag sing Pagpalig-on
Madamo, sa pagkamatuod, ang mga kahigayunan nga makahatag sing pagpalig-on. Napahulag bala ang imo tagipusuon sa isa ka maayo nga pamulongpulong sang estudyante nga ginhatag sang isa ka utod nga lalaki ukon babayi sa Teokratikong Eskwelahan sa Pagministro? Nalipay ka bala nga may mabakod sa espirituwal nga mga tin-edyer sa kongregasyon? Nahamuot ka bala sa pagbatas sang mga tigulang? Nagadayaw ka bala sa kon paano ginagamit sang isa sang mga payunir ang Biblia sa balay-balay nga ministeryo? Nian maghatag sing komendasyon, kag maghambal sing butang nga makapalig-on.
Daku ang mahimo sang pagpalig-on sa pamilya subong man sa kongregasyon. Makabulig ini sa mga ginikanan sa pagpadaku sa ila mga kabataan “sa disiplina kag sa panghunahuna ni Jehova.” (Efeso 6:4) Ang pagsugid sa bata nga maayo ang ginhimo niya, kag ang pagpaathag kon ngaa, makapalig-on gid! Sa tinuig sang pagkatin-edyer, kon ang mga pamatan-on nagaatubang sing madamong pagsulay kag pag-ipit, ang dalayon nga pagpalig-on kinahanglanon.
Ang kakulang sing pagpalig-on sa panahon sang pagkabata makahalalit. Karon si Michael, nga isa ka Cristianong gulang, mainabyanon, apang sia nagsiling: “Ang akon amay wala gid magsiling nga may nahimo ako nga maayo. Gani nagdaku ako nga kulang sing pagtahod sa kaugalingon. . . . Bisan pa nga 50 anyos na ako karon, ginaapresyar ko gihapon ang liwat nga pagpasalig sang akon mga abyan nga maayo ang akon ginahimo subong isa ka gulang. . . . Ang akon mismo inagihan nagtudlo sa akon kon daw ano ka importante ang maghatag sing pagpalig-on sa iban, kag ginapanikasugan ko gid nga himuon ini.”
Sin-o ang Nagakinahanglan sing Pagpalig-on?
Ang mapisan nga Cristianong mga gulang nagakabagay sing pagpalig-on. Si Pablo nagsulat: “Ginapakiluoy namon sa inyo, mga kauturan, nga tahuron ninyo ang mga nagapangabudlay sing lakas sa tunga ninyo kag nagadumala sa inyo sa Ginuo kag nagalaygay sa inyo; kag hatagi sila sing labaw sa kinaandan nga patugsiling sa gugma bangod sang ila buhat.” (1 Tesalonica 5:12, 13) Mahapos pasapayanan ang lakas nga pagpangabudlay sang mga gulang. Apang ang mga pulong sang sinsero nga pagpasalamat kag pagpalig-on magapamag-an sang ila lulan.
Yadtong nagabatas sing mabudlay nga mga kahimtangan sa tunga naton nagakinahanglan man sing pagpalig-on. “Magpamulong nga may paglugpay sa mga napung-awan nga mga kalag, sakdagon ang mga maluya,” ang laygay sang Biblia. (1 Tesalonica 5:14) Ang nagaisahanon nga mga ginikanan, mga balo, mga tin-edyer, mga tigulang, kag mga balatianon amo ang pila sang mahimo nga nagabatyag sing kapung-aw ukon pagluya sa espirituwal sa tion kag tion.
Hinali nga nasapwan ni María, nga isa ka Cristianong babayi, ang iya kaugalingon nga ginbayaan sang iya bana. Sia nagsiling: “Kaangay ni Job, luyag ko mapatay kon kaisa. [Job 14:13] Apang wala ako mag-ampo, bangod sa pagpalig-on nga nabaton ko. Ang duha ka gulang, nga kilala ko gid sing maayo, naghinguyang sing madamong inoras sa pagbulig sa akon nga makita ang importansia sang pagpadayon sa bug-os tion nga pag-alagad. Kag ang duha ka mahinangpanon nga utod nga babayi naglugpay man sa akon, mapailubon nga namati samtang ginatu-ad ko ang akon mga problema. Paagi sa paggamit sang Biblia, ginbuligan nila ako nga tamdon ang mga butang gikan sa pagtamod ni Jehova. Ambot kon pila ka bes namon ginbasa ang Salmo 55:22, apang nahibaluan ko nga paagi sa pag-aplikar sini nga kasulatan, amat-amat ko nga napasag-uli ang akon espirituwal kag emosyonal nga pagkatimbang. Ini tanan natabo sang nagligad nga 12 ka tuig, kag nalipay ako sa pagsiling nga nagpadayon ako sa bug-os tion nga pag-alagad tubtob karon. Ang akon kabuhi makaalayaw kag makalilipay walay sapayan sang pulupanag-on nga kasakit sa balatyagon. Kombinsido ako nga ang pagpalig-on sa tion nga kaangay sina may daku gid nga mabulig sa kabuhi sang isa ka tawo.”
Ang iban nagakinahanglan sing pagpalig-on bangod nakahimo sila sing mga kasaypanan kag nagapanikasog sa karon nga matadlong ini. Ayhan nakabaton sila sing mahigugmaon nga pagsabdong. (Hulubaton 27:6) Ang mga gulang nga naghatag sing pagsabdong mahimo mangin alisto sa paghatag sing komendasyon kon makita nila nga ginaaplikar ang Makasulatanhon nga laygay. Ang ila mga pulong sang pagpalig-on may yara doble nga kapuslanan—nagapalig-on sang ila gugma para sa nakasala agod indi sia ‘lakas nga magkasubo’ kag nagapahanumdom sa iya sang mga kapuslanan sang pag-aplikar sa laygay.—2 Corinto 2:7, 8.
Isa ka gulang ang nakahimo sing daku nga kasaypanan kag nawasi ang iya pribilehiyo sa pagdumala sang kongregasyon. “Sang ginhatag ang pahibalo nahanungod sa pagkuha sa akon subong isa ka gulang, naghunahuna ako nga masaw-ahan ang mga kauturan nga makig-upod sa akon,” siling niya. “Apang, ginhuptan sang mga gulang ang rason nga kompidensyal gid kag ginhimo ang tanan agod palig-unon ako. Ang iban nga mga katapo sang kongregasyon nagpakita man sing gugma kag pagpakig-upod, nga nagpadasig gid sang akon pagpasag-uli sa espirituwal.”
Mangin Makapalig-on
Sa aton masako nga pagkabuhi, ang pagpalig-on mahapos pasapayanan. Apang daku gid ang mahimo sang pagpalig-on! Agod makahatag sing epektibo nga pagpalig-on, dapat naton huptan sa hunahuna ang duha ka butang. Una, hunahunaa kon ano ang isiling, agod ang imo pagpalig-on espisipiko. Ikaduha, mangita sing kahigayunan nga palapitan ang isa nga nagakabagay sing komendasyon ukon nagakinahanglan nga palig-unon.
Kon ginahimo mo ini sing labi, mangin labi ikaw ka malipayon. Ti, si Jesus nagapasalig sa aton: “Daku pa ang kalipay sa paghatag sangsa pagbaton.” (Binuhatan 20:35) Paagi sa pagpalig-on sa iban, ginapalig-on mo ang imo kaugalingon. Ngaa indi himuon nga imo tulumuron ang maghatag sing pagpalig-on sa iban kada adlaw?
Kon paano ang isa ka matahom nga bulak magakalaya kon indi mabunyagan, ang aton mga hinigugma mahimo man nga magaluya bangod sang kakulang sing pagpalig-on