Ginbaton Niya ang Diosnon nga Panuytoy

PANANGLITAN ginpaatipan sa imo ang isa ka himpit nga bata kag ginpaabot sa imo nga padakuon mo sia sing nagakaigo. Daw ano kabudlay nga hilikuton! Paano ina mahimo sang bisan sin-o nga dihimpit nga tawo? Paagi lamang sa pagbaton sang diosnon nga panuytoy kag sa pag-aplikar sini sa adlaw-adlaw nga pagkabuhi.

Amo gid sina ang ginhimo ni Jose, ang amay-amay ni Jesus. Kabaliskaran sa detalyado nga mga tradisyon sang apokripa nahanungod kay Jose, diutay lamang ang ginasiling sang Biblia nahanungod sa iya kubos nga papel sa pagkabata ni Jesus. Nahibaluan naton nga ginpadaku ni Jose kag sang iya asawa, nga si Maria, si Jesus, ang apat pa ka anak nga mga lalaki, kag anak nga mga babayi man.​—⁠Marcos 6:⁠3.

Si Jose kaliwat ni Hari David sang Israel paagi sa linya ni Solomon. Anak sia ni Jacob kag umagad nga lalaki ni Heli. (Mateo 1:16; Lucas 3:23) Subong isa ka panday sa siudad sang Nasaret sa Galilea, si Jose pigado. (Mateo 13:55; Lucas 2:​4, 24; ipaanggid ang Levitico 12:⁠8.) Apang manggaranon sia sa espirituwal. (Hulubaton 10:22) Pat-od gid ini bangod ginbaton niya ang diosnon nga panuytoy.

Sa walay duhaduha, si Jose isa ka malulo kag mapainubuson nga Judiyo nga may pagtuo sa Dios kag naghandum sa paghimo kon ano ang husto. Ang pila ka hitabo sang iya kabuhi nga ginrekord sa Kasulatan nagapakita nga matinumanon sia pirme sa mga sugo ni Jehova. Ini man mga sugo nga ginaunod sa Kasuguan ukon nabaton sing direkta ni Jose paagi sa mga anghel.

Isa ka Matarong nga Tawo nga May mga Problema

Ano ang dapat himuon sang isa ka diosnon nga tawo kon ginaatubang sing daku nga problema? Aba, dapat niya ‘itugyan ang iya lulan kay Jehova’ kag sundon ang diosnon nga panuytoy! (Salmo 55:22) Amo sina ang ginhimo ni Jose. Samtang nakagon sia kay Maria, “nasapwan sia nga nagamabdos paagi sa balaan nga espiritu sa wala pa sila mahiusa.” Bangod si Jose ‘matarong kag indi buot nga himuon sia nga isa ka pangpubliko nga talan-awon, nagbuko sia nga bulagan sia sing tago.’ Sang nakapanghunahuna sia nahanungod sini nga butang, ang anghel ni Jehova nagpakita sa iya sa damgo kag nagsiling: “Jose, anak ni David, dili ka magkahadlok sa pagdala kay Maria nga imo asawa sa balay, kay ang iya ginapanamkon iya sang balaan nga espiritu. Magaanak sia sing lalaki, kag tawgon mo ang iya ngalan Jesus, kay sia amo ang magaluwas sang iya katawhan sa ila mga sala.” Sang pagmata niya, “ginhimo [ni Jose] ang ginsugo sa iya sang anghel ni Jehova, kag gindala niya ang iya asawa sa balay. Apang wala sia maghulid sa iya tubtob nga nag-anak sia sing lalaki; kag gintawag niya ang iya ngalan Jesus.” (Mateo 1:​18-25) Ginbaton ni Jose ang diosnon nga panuytoy.

Nagmando si Agosto Cesar nga ang mga tawo magparehistro sa ila kaugalingon nga mga siudad. Sa pagtuman, sanday Jose kag Maria nagkadto sa Betlehem sa Judea. Didto ginbun-ag ni Maria si Jesus kag ginkulan sia sa pasungan bangod wala na sing iban pa nga dalayunan ang matigayon. Sadto nga gab-i ang mga manugbantay nga nakabati sang pahibalo sang anghel nahanungod sining pinasahi nga pagbun-ag nagkari agod makita ang lapsag. Mga 40 ka adlaw sang ulihi, gintuman nanday Jose kag Maria ang Kasuguan paagi sa pagdala kay Jesus sa templo sa Jerusalem upod ang halad. Natingala sila nga duha sang mabatian nila ang matagnaon nga mga pulong sang tigulang nga si Simeon nahanungod sa dalagku nga mga butang nga pagahimuon ni Jesus.​—⁠Lucas 2:​1-33; ipaanggid ang Levitico 12:​2-4, 6-8.

Bisan pa daw ginapakita sang Lucas 2:39 nga sanday Jose kag Maria nagkadto sa Nasaret pagkatapos mismo madala si Jesus sa templo, ini nga teksto bahin sang isa ka ginpalip-ot nga kasaysayan. Maathag nga mga pila ka tion pagkatapos sang pagdala kay Jesus sa templo, ginduaw sang mga astrologo (mga Mago) sang Sidlangan si Maria kag si Jesus sa isa ka balay sa Betlehem. Ang diosnon nga pagpasilabot nagpugong sining pagduaw sa pagdala sing kamatayon kay Jesus. Sang naglakat ang mga Mago, ang anghel ni Jehova nagpakita kay Jose sa palanan-awon kag nagsiling sa iya: “Pangitaon na ni Herodes ang bata sa paglaglag sa iya.” Subong sang kinaandan, ginpamatian ni Jose ang diosnon nga panuytoy kag gindala ang iya pamilya sa Egipto.​—⁠Mateo 2:​1-14.

Sang mapatay si Herodes, ang anghel nagpakita kay Jose sa Egipto sa damgo, nga nagasiling: “Bangon ka, dalha ang bata kag ang iya iloy kag kadto sa duta sang Israel.” Sang pagkabati ni Jose nga ang anak ni Herodes nga si Archelaus amo ang nagbulos sa iya amay, hinadlukan sia sa pagbalik sa Judea. Namati sa diosnon nga paandam nga ginhatag sa damgo, nagkadto sia sa teritoryo sang Galilea kag nagpuyo sa siudad sang Nasaret.​—⁠Mateo 2:​15-23.

Isa ka Espirituwal nga Tawo

Ginpat-od ni Jose nga gintuman sang iya pamilya ang balaan nga kasuguan kag nga napakaon sila sa espirituwal. Kada tuig gin-upod niya ang iya bug-os nga pamilya sa pagsaulog sang Paskuwa sa Jerusalem. Sa isa sining mga okasyon, manugpauli na sadto sanday Jose kag Maria sa Nasaret kag nakalakbay sing isa ka adlaw halin sa Jerusalem sang matukiban nila nga wala gali ang 12-anyos nga si Jesus. Nagbalik sa Jerusalem, ginpangita nila sia sing maayo kag nakita nila sia sang ulihi sa templo, nga nagapamati kag nagapamangkot sa mga manunudlo didto.​—⁠Lucas 2:​41-50.

Mahimo nga ginpabay-an ni Jose ang iya asawa nga manguna sa pila ka butang. Halimbawa, sang nagbalik sila sa Jerusalem kag nakita nila si Jesus sa templo, si Maria amo ang nakighambal sa iya lamharon nga anak nga lalaki nahanungod sa natabo. (Lucas 2:​48, 49) Samtang nagadaku subong “anak sang panday,” si Jesus nakabaton sing espirituwal nga pagpanudlo. Gintudluan man sia ni Jose sing pagpamanday, kay si Jesus gintawag nga “ang panday nga anak ni Maria.” (Mateo 13:55; Marcos 6:⁠3) Dapat man himuslan sing bug-os sang diosnon nga mga ginikanan karon ang kaanggid nga mga kahimusan agod tudluan ang ila mga anak, ilabi na ang paghatag sa ila sing espirituwal nga paghanas.​—⁠Efeso 6:4; 2 Timoteo 1:5; 3:​14-16.

Ang mga Paglaum ni Jose

Wala sing ginahatag nga impormasyon ang mga Kasulatan nahanungod sa kamatayon ni Jose. Apang talalupangdon nga gintawag sang Marcos 6:3 si Jesus nga “anak ni Maria,” indi ni Jose. Nagapakita ini nga napatay na sadto si Jose. Dugang pa, kon nabuhi si Jose tubtob sang 33 C.E., indi mahimo nga gintulin ni Jesus ang pag-atipan kay Maria kay apostol Juan.​—⁠Juan 19:​26, 27.

Si Jose, nian, mangin kaupod sang mga patay nga magapamati sa tingog sang Anak sang tawo kag pagabanhawon. (Juan 5:​28, 29) Nakahibalo sang aman ni Jehova para sa kabuhi nga dayon, walay duhaduha nga malipayon si Jose nga matigayon ini kag mangin isa ka matinumanon nga sakop sang dakung langitnon nga Hari, nga si Jesucristo, subong sang pagtuman niya sa diosnon nga panuytoy sang nagligad nga kapin sa 1,900 ka tuig.

[Retrato sa pahina 31]

Ginhatagan ni Jose si Jesus sing espirituwal nga pagpanudlo kag gintudluan man sia sing pagpamanday