May Pagkabanhaw sang mga Matarong

“May paglaum ako sa Dios . . . nga may pagkabanhaw sang mga matarong kag mga dimatarong.”​—⁠BINUHATAN 24:⁠15.

1. Anong kahimtangan ang gin-atubang sang tanan nga katawhan sugod sang nagpakasala sanday Adan kag Eva?

“ANG tanan nga makita nga himuon sang imo kamot, himua ini sa imo gahom, kay sa Sheol nga imo ginakadtuan walay buluhaton ukon pahito ukon ihibalo ukon kaalam.” (Manugwali 9:10) Paagi sa sining pila, pinili sing maayo nga mga tinaga, ginalaragway sang maalamon nga si Hari Solomon ang kahimtangan nga ginaatubang sang tanan nga kaliwatan sang katawhan kutob sang pagpakasala sang aton unang mga ginikanan, sanday Adan kag Eva. Sing walay pinilian, ginlamon sang ulihi sang kamatayon ang tanan​—⁠manggaranon kag imol, hari kag timawa, matutom kag dimatutom. Sa pagkamatuod, ang kamatayon “naggahom subong hari.”​—⁠Roma 5:17.

2. Ngaa ang iban nga mga matutom mahimo nga nahanusbo sa sining tion sang katapusan?

² Walay sapayan sang pinakaulihi nga mga pag-uswag sa siensia sang medisina, ang kamatayon padayon nga nagahari bisan karon. Walay sapayan nga indi ini makapakibot, ang iban mahimo nga nahanusbo sang naatubang nila sang ulihi ining madugay na nga kaaway. Ngaa? Ti, sadto pa sang katuigan 1920, ginbantala sang Watch Tower Society ang mensahe nga “Minilyon sang nagakabuhi karon ang indi na mapatay.” Sin-o ining minilyon? Ang “mga karnero” nga ginpatuhuyan sang mga pinamulong ni Jesus nahanungod sa mga karnero kag sa mga kanding. (Mateo 25:​31-46) Ining mga katulad-karnero gintagna nga magaluntad sa tion sang katapusan, kag ang ila paglaum mangin kabuhi nga walay katapusan sa paraiso nga duta. Sa pagligad sang tion, nahangpan sing labi sang katawhan sang Dios ang posisyon sining “mga karnero” sa mga katuyuan ni Jehova. Nahantupan nga ining mga matinumanon pagapainon gikan sa matig-a sing ulo nga “mga kanding,” kag pagkatapos malaglag ang mga kanding, ang mga karnero magapanubli sang dutan-on nga sakop sang Ginharian nga ginhanda para sa ila.

Pagtipon sa mga Katulad-Karnero

3. Sa anong hilikuton nagkonsentrar ang katawhan sang Dios sugod sang 1935?

³ Sugod sang 1935, ‘ang matutom nga ulipon’ nagkonsentrar sa pagpangita sa sinang mga katulad-karnero kag sa pagpasulod sa ila sa organisasyon ni Jehova. (Mateo 24:45; Juan 10:16) Nahantop sining handa magpatudlo nga mga Cristiano nga si Jesus nagahari na karon sa langitnon nga Ginharian ni Jehova kag nga ang tion madasig nga nagahinampot para sa katapusan sining malauton nga sistema sang mga butang kag sa pagsugod sang bag-ong kalibutan nga sa sini magapuyo ang pagkamatarong. (2 Pedro 3:13; Bugna 12:10) Sa sinang bag-ong kalibutan, ang makalilipay nga mga pinamulong ni Isaias matuman: “Ginlamon niya sing dayon ang kamatayon.”​—⁠Isaias 25:⁠8.

4. Walay sapayan nga hanuot nga nagalaum nga makita ang soberanya ni Jehova nga mabindikar sa Armagedon, ano ang natabo sa madamo sang iban nga mga karnero?

⁴ Sanglit ang katapusan sang kalibutan ni Satanas malapit na katama, ang katulad-karnero nga mga Cristiano magakalipay gid sa pagkabuhi tubtob mabindikar ang soberanya ni Jehova sa nagapakari nga kapipit-an sang Babilonya nga Daku kag sa tanan iban pa nga bahin sang kalibutan ni Satanas. (Bugna 19:​1-3, 19-21) Para sa madamo, indi amo sina ang natabo. Madamo sa naglaum nga malakip sa “minilyon” nga indi na mapatay ang napatay sa pagkamatuod. Ang iban ginpatay subong martir para sa kamatuoran sa mga bilangguan kag mga kampo konsentrasyon ukon sa mga kamot sang relihiosong mga panatiko. Ang iban napatay sa mga aksidente ukon sa ginatawag nga duna nga mga kabangdanan​—⁠balatian kag katigulangon. (Salmo 90:​9, 10; Manugwali 9:11) Sing maathag, madamo pa ang mapatay antes magaabot ang katapusan. Paano nila makita ang katumanan sang saad tuhoy sa isa ka bag-ong kalibutan nga sa sini magapuyo ang pagkamatarong?

Ang Paglaum nga Pagkabanhaw

5, 6. Ano ang nagaluntad nga palaabuton para sa mga may dutan-on nga paglaum nga mapatay antes sang Armagedon?

⁵ Ginhatag ni apostol Pablo ang sabat sang naghambal sia sa atubangan sang Romanong gobernador nga si Felix. Subong sang narekord sa Binuhatan 24:​15, si Pablo masidla nga nagsiling: “May paglaum ako sa Dios . . . nga may pagkabanhaw sang mga matarong kag mga dimatarong.” Ang paglaum sang pagkabanhaw nagahatag sa aton sing kaisog sa atubangan sang pinakamalain nga mga kahimtangan. Bangod sina nga paglaum, ang aton pinalangga nga mga kauturan nga nagamasakit kag nakahibalo nga sila mapatay wala ginaluyahan sing buot. Ano man ang matabo, nahibaluan nila nga anihon nila ang padya sang pagkamatutom. Bangod sang paglaum nga pagkabanhaw, nahibaluan sang aton maisog nga mga kauturan nga mga lalaki kag mga babayi nga nagaatubang sing kamatayon sa kamot sang mga manughingabot nga imposible gid nga magamadinalag-on ang mga nagahingabot sa ila. (Mateo 10:28) Kon may isa nga mapatay sa kongregasyon, nagakasubo kita sa pagtaliwan sina nga tawo. Sa amo man nga tion, kon isa sia sang iban nga mga karnero, nagakalipay kita nga ang aton masigkatumuluo napamatud-an nga matutom tubtob sa katapusan kag karon nagapahuway na, makasalig sang isa ka palaabuton sa ­bag-ong kalibutan sang Dios.​—⁠1 Tesalonica 4:⁠13.

⁶ Huo, ang paglaum nga pagkabanhaw isa ka importante nga bahin sang aton pagtuo. Apang, ngaa ang aton pagtuo sa pagkabanhaw tuman kabakod, kag sin-o ang nagaambit sa sina nga paglaum?

7. Ano ang pagkabanhaw, kag ano ang pila ka kasulatan nga nagapabutyag sang kapat-uran sini?

⁷ Ang Griegong tinaga para sa “pagkabanhaw” amo ang a·naʹsta·sis, nga literal nga nagakahulugan sing “nagatindog.” Nagapatuhoy ini sa pagbangon gikan sa minatay. Sing makawiwili, ang aktuwal nga tinaga nga “pagkabanhaw” indi makita sa Hebreong Kasulatan, apang ang paglaum nga pagkabanhaw maathag nga ginpabutyag diri. Aton ini makita, halimbawa, sa mga pinamulong nga ginbungat ni Job sa labing ital-ital nga tion sang iya pag-antos: “O kabay pa kuntani nga taguon mo ako sa Sheol, . . . nga tangduan mo ako kuntani sing pinat-od nga tion kag madumduman ako!” (Job 14:13) Sa kaanggid, sa Oseas 13:​14, aton mabasa: “Gawaron ko sila sa kamot sang Sheol; tubson ko sila sa kamatayon. Diin bala ang imo mga kalalat-an, O Kamatayon? Diin bala ang imo kalaglagan, O Sheol?” Sa 1 Corinto 15:​55, ginbalikwat ni apostol Pablo ining mga tinaga kag ginpakita nga ang gintagna nga kadalag-an sa kamatayon ginatigayon paagi sa pagkabanhaw. (Sa pagkamatuod, sa sinang kasulatan si Pablo nagpamulong nahanungod sa langitnon nga pagkabanhaw.)

Ang mga Tumuluo “Ginpahayag nga Matarong”

8, 9. (a) Paano ang dihimpit nga mga tawo may bahin sa pagkabanhaw sang mga matarong? (b) Ano ang sadsaran sang aton paglaum sa kabuhi nga indi mautod sang kamatayon?

⁸ Sa iya pinamulong kay Felix, nga ginbalikwat sa parapo 5, si Pablo nagsiling nga may pagkabanhaw sang mga matarong kag mga dimatarong. Sin-o ang mga matarong nga pagabanhawon? Ti, wala sing tawo nga duna nga matarong. Kita tanan ginbun-ag nga mga makasasala, kag nagahimo kita sing mga sala sa aton bug-os nga pagkabuhi​—⁠nga nagahimo sa aton nga nagakabagay sang kamatayon sa duha ka panumbungon. (Roma 5:12; 6:23) Apang, sa Biblia makita naton ang termino nga “ginpahayag nga matarong.” (Roma 3:28) Nagapatuhoy ini sa mga tawo nga, bisan pa dihimpit, ang ila mga sala ginpatawad ni Jehova.

⁹ Ang ekspresyon labing talalupangdon nga ginagamit may kaangtanan sa hinaplas nga mga Cristiano, nga may langitnon nga paglaum. Sa Roma 5:​1, si apostol Pablo nagasiling: “Karon nga ginapahayag kita nga matarong subong resulta sang pagtuo, agumon naton ang paghidait sa Dios paagi sa aton Ginuong Jesucristo.” Ang tanan nga hinaplas nga mga Cristiano ginapahayag nga matarong bangod sang pagtuo. Pagtuo sa ano? Subong sang ginpaathag sing detalyado ni Pablo sa tulun-an sang Roma, ini amo ang pagtuo kay Jesucristo. (Roma 10:​4, 9, 10) Si Jesus napatay nga isa ka himpit nga tawo kag nian ginbanhaw gikan sa minatay kag nagkayab sa langit agod ihalad ang balor sang iya tawhanon nga kabuhi tungod sa aton. (Hebreo 7:​26, 27; 9:​11, 12) Sang ginbaton ni Jehova yadto nga halad, ginbakal ni Jesus, sa katunayan, ang tawhanon nga rasa gikan sa kahiulipnan sang sala kag kamatayon. Yadtong nagtuo sa sining kahimusan nakabenepisyo sing daku gikan sa sini. (1 Corinto 15:45) Bangod sini ang matutom nga mga lalaki kag mga babayi may paglaum nga makapanubli sang kabuhi nga indi mautod sang mapintas nga kaaway, ang kamatayon.​—⁠Juan 3:⁠16.

10, 11. (a) Anong pagkabanhaw ang nagahulat sa matutom nga hinaplas nga mga Cristiano? (b) Anong sahi sang pagkabanhaw ang ginlauman sang antes-Cristianong panahon nga mga sumilimba?

¹⁰ Bangod sang halad-gawad ni Jesus, ang matutom nga mga hinaplas, subong ginpahayag nga matarong, may pat-od nga paglaum nga mabanhaw subong dimamalatyon nga espiritu nga mga tinuga, kaangay ni Jesus. (Bugna 2:10) Ang ila pagkabanhaw ginasambit sa Bugna 20:​6, nga nagasiling: “Malipayon kag balaan ang bisan sin-o nga may bahin sa unang pagkabanhaw; sa ila sini ang ikaduhang kamatayon wala sing gahom, kundi mangin mga saserdote sila sang Dios kag ni Cristo, kag magahari sila kaupod niya sing isa ka libo ka tuig.” Amo ini ang langitnon nga pagkabanhaw. Apang, talupangda nga ginatawag ini sang Biblia nga “unang pagkabanhaw,” nga nagapanugda nga madamo pa nga tawo ang pagabanhawon.

¹¹ Sa Hebreo kapitulo 11, ginpatuhuyan ni Pablo ang malawig nga linya sang antes-Cristiano nga mga alagad sang Dios nga nagpakita sing malig-on nga pagtuo kay Jehova nga Dios. Nagtuo man sila sa pagkabanhaw. Sa bersikulo 35 sina nga kapitulo, si Pablo nagahambal tuhoy sa milagruso nga mga pagbanhaw nga natabo sa maragtas sang Israel, nga nagasiling: “Ginbaton sang mga babayi ang ila mga patay paagi sa pagkabanhaw; apang ginpaantos ang iban nga mga tawo bangod indi sila magbaton sang paghilway paagi sa ano man nga gawad, agod maagom nila ang maayo pa nga pagkabanhaw.” Yadtong matutom nga mga saksi sang una sarang makapaabot sang pagkabanhaw nga maayo pa sangsa pagkabanhaw nga nagalakip, halimbawa, kay Elias kag kay Eliseo. (1 Hari 17:​17-22; 2 Hari 4:​32-37; 13:​20, 21) Ang ila paglaum amo ang pagkabanhaw pasulod sa isa ka kalibutan diin ang mga alagad sang Dios indi na pagapaantuson tungod sang ila pagtuo, isa ka kalibutan diin ang mga babayi indi na mamatyan sang ila mga hinigugma. Huo, ginahulat nila ang pagkabanhaw gikan sa minatay sa amo man nga bag-ong kalibutan nga ginalauman naton. (Isaias 65:​17-25) Wala ginsugid ni Jehova sa ila ang subong sang ginsugid niya sa aton nahanungod sining bag-ong kalibutan. Walay sapayan sina, nahibal-an nila nga magaabot ini, kag luyag nila nga mangin yari sa sini.

Ang Dutan-on nga Pagkabanhaw

12. Ang antes-Cristianong panahon nga mga matutom ginpahayag bala nga matarong? Ipaathag.

¹² Dapat bala naton kabigon ang pagbugtaw sining matutom nga antes-Cristiano nga mga lalaki kag mga babayi sa sinang bag-ong kalibutan subong bahin sang pagkabanhaw sang mga matarong? Maathag nga huo, bangod ginapatuhuyan sila sang Biblia subong mga matarong. Halimbawa, si disipulo Santiago nagasambit sang isa ka lalaki kag isa ka babayi sang una nga panahon nga ginpahayag nga matarong. Ang lalaki amo si Abraham, ang katigulangan sang Hebreo nga rasa. Nahanungod sa iya aton mabasa: “ ‘Si Abraham nagtuo kay Jehova, kag gin-isip ini sa iya nga pagkamatarong,’ kag gintawag sia nga ‘abyan ni Jehova.’ ” Ang babayi amo si Rahab, isa ka di-Israelinhon nga nagtuo kay Jehova. Sia “ginpahayag nga matarong” kag nangin bahin sang Hebreong pungsod. (Santiago 2:23-25) Busa, ang mga lalaki kag mga babayi sadtong una nga panahon nga nagtuo sing malig-on kay Jehova kag sa iya mga saad kag nagpabilin nga matutom tubtob sa kamatayon ginpahayag nga mga matarong ni Jehova sa sadsaran sang ila pagtuo, kag magapakigbahin sila sa walay duhaduha sa ‘pagkabanhaw sang mga matarong.’

13, 14. (a) Paano naton mahibaluan nga ang mga Cristiano nga may dutan-on nga paglaum mahimo mapahayag nga matarong? (b) Ano ang kahulugan sini para sa ila?

¹³ Apang, kamusta ang katulad-karnero nga mga indibiduwal karon, yadtong may dutan-on nga paglaum nga nagdedikar sang ila kaugalingon kay Jehova kag napatay nga matutom sa sining tion sang katapusan? Magapakigbahin bala sila sa pagkabanhaw sang mga matarong? Maathag nga huo. Ang dakung kadam-an sinang mga matutom nakita sa palanan-awon ni apostol Juan. Talupangda kon paano niya sila ginalaragway: “Nakita ko, kag, yari karon! ang dakung kadam-an nga walay tawo nga makaisip, gikan sa tagsa ka pungsod kag kabikahan kag katawhan kag hambal, nga nagatindog sa atubangan sang trono kag sang Kordero, nga napanaptan sing malaba nga mga panapton nga maputi; kag may mga paklang sa ila mga kamot. Kag padayon sila nga nagasinggit sa mabaskog nga tingog, nga nagasiling: ‘Ang kaluwasan utang namon sa amon Dios, nga nagalingkod sa trono, kag sa Kordero.’ ”​—⁠Bugna 7:​9, 10.

¹⁴ Talupangda nga ining mga mahagop kombinsido sing malig-on sa ila kaluwasan, kag ginapatungod nila ini kay Jehova kag kay Jesus, “ang Kordero.” Dugang pa, nagatindog sila sa atubangan ni Jehova kag sang Kordero, ang tanan napanaptan sing maputi. Ngaa maputi? Ang langitnon nga tinuga nagasugid kay Juan: “Ginbunakan nila ang ila panapton nga malaba kag ginpaputi ini sa dugo sang Kordero.” (Bugna 7:14) Sa Biblia, ang puti simbulo sang pagkaputli, pagkamatarong. (Salmo 51:7; Daniel 12:10; Bugna 19:⁠8) Ang katunayan nga ang dakung kadam-an nakita nga nagasuksok sing maputi nga mga panapton nagakahulugan nga ginatamod sila ni Jehova subong mga matarong. Paano ina nangin posible? Bangod ginbunakan nila, kon sa aton pa, ang ila mga panapton sa dugo sang Kordero. Nagtuo sila sa napatulo nga dugo ni Jesucristo kag busa ginpahayag nga matarong subong mga abyan sang Dios nga nagapaabot nga makalampuwas sa dakung kapipit-an. Busa, ang bisan sin-ong matutom nga dedikadong Cristiano nga bahin karon sang “dakung kadam-an” nga mapatay sa wala pa ang dakung kapipit-an makapat-od nga may bahin sa dutan-on nga pagkabanhaw sang mga matarong.

15. Sanglit ang mga matarong kag mga dimatarong lunsay pagabanhawon, ano ang bentaha sang pagkabanhaw sang mga matarong?

¹⁵ Ina nga pagkabanhaw ginalaragway sang Bugna kapitulo 20, bersikulo 13, sa sining mga pinamulong: “Ginhatag sang dagat ang mga patay nga yara sa iya, kag ginhatag sang kamatayon kag sang Hades ang mga patay nga yara sa ila, kag ginhukman ang tagsa ka tawo suno sa ila mga binuhatan.” Busa, sa tion sang isa ka libo ka tuig nga dakung Adlaw sang Paghukom ni Jehova, ang tanan nga yara sa handumanan sang Dios pagabanhawon​—⁠lunsay ang mga matarong kag mga dimatarong. (Binuhatan 17:31) Apang, daw ano nga bentaha ini para sa mga matarong! Nagkabuhi na sila nga may pagtuo. May suod na sila nga kaangtanan kay Jehova kag nagasalig nga tumanon niya ang iya mga katuyuan. Ang matarong nga mga saksi antes sang Cristianong Dag-on magabugtaw gikan sa kamatayon nga may kalangkag nga mahibaluan kon paano natuman ang mga saad ni Jehova nahanungod sa Binhi. (1 Pedro 1:​10-12) Ang iban nga mga karnero nga ginatamod ni Jehova subong mga matarong sa aton adlaw magabangon gikan sa lulubngan nga may kalangkag nga makita ang Paraiso nga duta nga ginahambal nila sang ginbantala nila ang maayong balita sa sining sistema sang mga butang. Daw ano gid ka makalilipay nga tion ina!

16. Ano ang masiling naton nahanungod sa pagbanhaw sa Adlaw sang Paghukom sa mga napatay sa tion naton?

¹⁶ Sa sinang isa ka libo ka tuig nga Adlaw sang Paghukom, san-o bala banhawon ang mga napatay nga matutom sa sining ulihi nga mga tuig sang sistema sang mga butang ni Satanas? Ang Biblia wala nagasugid. Apang, indi bala makatarunganon hunahunaon nga yadtong gin-isip nga mga matarong nga napatay sa aton tion banhawon sing una kag busa magapakigbahin upod sa dakung kadam-an sang mga makalampuwas sa Armagedon sa hilikuton nga pag-abiabi gikan sa minatay sang mas nauna nga kaliwatan? Huo, sa pagkamatuod!

Isa ka Paglaum nga Nagahatag sing Lugpay

17, 18. (a) Anong lugpay ang ginahatag sang paglaum nga pagkabanhaw? (b) Ano ang ginapahulag sa aton nga ipahayag nahanungod kay Jehova?

¹⁷ Ang paglaum nga pagkabanhaw nagahatag sing kusog kag lugpay sa tanan nga mga Cristiano karon. Kon magpabilin kita nga matutom, wala sing di-ginapaabot nga hitabo kag kaaway ang makaagaw sa aton sang aton padya! Halimbawa, sa 1992 Yearbook of Jehovah’s Witnesses, sa pahina 177, makita didto ang mga litrato sang maisugon nga mga Cristiano sa Etiopia nga napatay sa baylo nga ikompromiso ang ila pagtuo. Ang kapsion mabasa: “Mga nawong nga ginalauman naton nga makita sa pagkabanhaw.” Daw anong pribilehiyo nga makilala sila kag ang dimaisip pa nga iban nga nagpakita sing kaanggid nga katutom sa atubangan sang kamatayon!

¹⁸ Kamusta ang aton mismo mga hinigugma kag mga kauturan nga bangod sang katigulangon ukon balatian napatay antes sang dakung kapipit-an? Nahisuno sa paglaum nga pagkabanhaw, may yara sila matahom nga palaabuton kon magpabilin sila nga matutom. Kag kon maisugon man kita nga magpakita sing pagtuo sa halad-gawad ni Jesus, may matahom kita nga palaabuton. Ngaa? Bangod, kaangay ni Pablo, nagalaum kita sa “pagkabanhaw sang mga matarong kag mga dimatarong.” Bug-os tagipusuon naton nga ginapasalamatan si Jehova tungod sini nga paglaum. Sa pagkamatuod, nagapahulag ini sa aton nga ipalanog ang mga pinamulong sang salmista: “Ipahayag sa mga pungsod ang himaya [sang Dios], sa tanan nga katawhan ang iya makatilingala nga mga binuhatan. Kay si Jehova daku kag takus gid nga dayawon.”​—⁠Salmo 96:​3, 4.

Mapaathag Mo Bala?

◻ Anong mga kasulatan ang nagabulig sa pagpalig-on sang aton paglaum sa dutan-on nga pagkabanhaw?

◻ Sa anong sadsaran ang mga Cristiano karon ginapahayag nga matarong?

◻ Paano ang paglaum nga pagkabanhaw nagahatag sa aton sing kaisog kag determinasyon?

[Retrato sa pahina 9]

Kaangay ni Pablo, ang hinaplas nga mga Cristiano nagalaum sa langitnon nga pagkabanhaw