Mga Pamangkot Gikan sa mga Bumalasa

Sa husto nga kahulugan, may kinatuhayan bala sa ulot sang “iban nga mga karnero” kag sang “dakung kadam-an” nga mga termino sa Biblia?

Huo, bisan pa nga indi kita dapat dinagakaigo nga mangin sensitibo sa paggamit sa tinaga ukon maakig kon ginagamit sing bayluhanay sang isa ang mga termino.

Ang kalabanan nga mga Cristiano pamilyar sa mga teksto sa Biblia diin makita naton ining mga termino. Ang isa amo ang Juan 10:16. Didto si Jesus nagsiling: “May iban ako nga mga karnero, nga indi sa sining toril; sila man dapat ko dalhon, kag magapamati sila sa akon tingog, kag mangin isa sila ka panong, isa ka manugbantay.” Ang isa pa ka ekspresyon, ang “dakung kadam-an,” makita sa Bugna 7:⁠9. Aton mabasa: “Pagkatapos sining mga butang nakita ko, kag, yari karon! ang dakung kadam-an, nga walay tawo nga makaisip, gikan sa tanan nga pungsod kag kabikahan kag katawhan kag hambal, nga nagatindog sa atubangan sang trono kag sa atubangan sang Kordero, nga napanaptan sing malaba nga mga panapton nga maputi; kag may mga paklang sa ila mga kamot.”

Binagbinagon naton anay ang Juan 10:16. Sin-o ang mga karnero? Ti, maayo nga dumdumon nga ang tanan nga matutom nga mga sumulunod ni Jesus ginapatuhuyan subong mga karnero. Sa Lucas 12:​32, gintawag niya ang iya mga disipulo nga magakadto sa langit subong “diutay nga panong.” Panong sang ano? Sang mga karnero. Ang “mga karnero” sang “diutay nga panong” mangin bahin sang Ginharian sa langit. Apang, may iban pa, yadtong may tuhay nga paglaum, nga ginatamod man ni Jesus subong mga karnero.

Makita naton ini sa Juan kapitulo 10. Pagkatapos magpamulong nahanungod sa mga karnero subong sang iya mga apostoles nga gin-agda niya sa kabuhi sa langit, si Jesus nagdugang sa bersikulo 16: “May iban ako nga mga karnero, nga indi sa sining toril; sila man dapat ko dalhon.” Madugay na ginahangop sang mga Saksi ni Jehova nga sa sining bersikulo si Jesus nagpamulong sa mga tawo nga may paglaum nga mabuhi sa duta. Madamong matutom sang panahon antes sang Cristianismo, kaangay nanday Abraham, Sara, Noe, kag Malaquias, ang may amo sina nga paglaum. Gani malakip naton sila sing makatarunganon subong bahin sang “iban nga mga karnero” sang Juan 10:16. Sa Milenio, inang matutom nga mga saksi antes sang Cristianismo, pagabanhawon kag nian magatuon kag magabaton kay Cristo Jesus, nga mangin “iban nga mga karnero” sang Maayong Manugbantay.

Nahibaluan man naton nga sanglit natapos na ang kabilugan nga pagtawag sa langitnon nga klase, minilyon ang nangin matuod nga mga Cristiano. Sila man makatarunganon tawgon nga “iban nga mga karnero,” kay indi sila bahin sang “diutay nga panong.” Sa baylo, ang iban nga mga karnero karon nagalaum nga magkabuhi sa dutan-on nga paraiso.

Karon, ano ang masiling nahanungod sa pagkilala sa “dakung kadam-an” nga ginsambit sa Bugna 7:9? Ti, tan-awa ang bersikulo 13 kag ang pamangkot, “Sin-o bala sila kag diin sila maghalin?” Makita naton ang sabat sa Bugna 7:14: “Ini amo sila ang nagguwa sa dakung kapipit-an.” Gani ang “dakung kadam-an” ginahuman sadtong nagguwa, ukon nakalampuwas, sa dakung kapipit-an. Subong sang ginasiling sang bersikulo 17, sila ‘pagatuytuyan sa mga tuburan sang tubig sang kabuhi’ sa duta.

Apang, sing halangpunon, agod makalampuwas sila sa nagahilapit nga dakung kapipit-an, dapat nga ginbunakan nila anay ang ila malaba nga mga panapton sa dugo sang Kordero, nga nangin matuod nga mga sumilimba. Busa, bisan pa ginalaragway sang Bugna 7:9 ining kadam-an pagkatapos sang kapipit-an, mahimo naton maaplikar ang termino nga “dakung kadam-an” sa tanan nga may dutan-on nga mga paglaum nga nagahimo karon sing balaan nga pag-alagad kay Jehova, antes gid lamang magsugod ang dakung kapipit-an paagi sa pagsalakay sang mga pungsod sa butig nga relihion.

Bilang sumaryo, mahimo naton dumdumon ang “iban nga mga karnero” subong ang mas masangkad nga kahulugan, nga nagalakip sa tanan nga mga alagad sang Dios nga may paglaum nga magkabuhi sing dayon sa duta. Nagalakip ini sa mas limitado nga kategoriya sang mga katulad-karnero karon nga ginatipon subong ang “dakung kadam-an” upod ang paglaum nga magkabuhi lampas sa nagahilapit nga dakung kapipit-an. Ang kalabanan sadtong matutom nga mga Cristiano nga nagakabuhi karon iya sang “iban nga mga karnero,” kag bahin man sila sang “dakung kadam-an.”

Takus suliton nga, nagakaigo man ang mangin maathag sa sining mga espesipiko, indi kinahanglan para kay bisan sin-o nga Cristiano nga mangin sobra ka mahunahunaon sa tinaga​—⁠nga mahimo tawgon nga mamulayon sa tinaga. Si Pablo nagpaandam nahanungod sa pila nga “naghabok sa bugal” kag nadalahig sa “mga binais nahanungod sa mga tinaga.” (1 Timoteo 6:⁠4) Kon personal naton nga nahangpan ang pila ka kinatuhayan sa ulot sang mga tinaga, maayo ina. Apang, indi kinahanglan, sa guwa ukon sa sulod, nga mangin mamulayon kita sa iban nga mahimo wala nagagamit sing husto sang mga termino sa Biblia.